رئيس الجمهوريه السودانى قاعد فى الكرسى و ماعايز يتحتح منو شبر الوزير السودانى قاعد فى الكرسى و ماعايز يتحتح منو شبر المدير السودانى قاعد فى الكرسى و ماعايز يتحتح منو شبر رئيس الحزب السودانى قاعد فى الكرسى و ماعايز يتحتح منو شبر رئيس التحرير السودانى قاعد فى الكرسى و ماعايز يتحتح منو شبر بواب المستشفى قاعد فى الكرسى و ماعايز يتحتح منو شبر و القائمه تطول قصة الكنكشه دى شنو؟؟؟ زمان قبل سنين طويله يعنى ذى قبل 22 سنه كده كان فى نقاش سياسى ما بين اخوى الكبير عصام و الوالد رحمة الله عليه و الوالده ..فى تص النقاش كده قام عصام قال ليهم: اقول ليكم حاجه البلد ما بتنفع و لا بتمشى لقدام لو ما الناس المشلخين ديل انقرضوا.... طبعا عصام هنا كان بيعنى الناس المكنكشين على مواقع صناعة القرار مشلخين او غير مشلخين... و نسى انو المناقشين الاتنين كانو مشلخين المهم القصه فى بيتنا اتحولت لنكته و مكاوه لكن انا كل ما اشوف الحاصل فى بلدنا ده اقول عصام "قالها كلمه" فعلا انا اعتقد ان عصام كان من اوائل من لمسو عمق مأساتنا السياسيه والاجتماعيه فى السودان... الغريبه انو عمرو ما كان ناشط سياسى و عنده رأى فى القصه دى !!.... و اغرب حاجه تانيه انو لما يتناقش معاك فى حدث حديث بتحس انو رأيه غريب و طوالى تتخندق معارضه و تمر الايام لتكتشف كم كان على حق!!... المهم ... الجميع مكنكش السودانى ما بيصدق يقعد ليهو فى كرسى ما عارفة القصه دى شنو يمكن الجيل القديم ده قعد فى البنابر لما فتر وما صدق يلقى ليهو كرسى يسند فيهو ضهره و بعدين يقوم يجيب اهله و عشيرته و اصحابه و ود خاله اخت مرته و ود جد ابو اهله عشان ينسندوا فى الكراسى الحوله... و الكل يتحدث عن حرصه على نقل خبراتو للاجيال الصاعده والتى بحكم الكنكشه كتب لها الا تصعد ابدا
و بجيكم راجعه
05-20-2007, 10:08 AM
Nazar Yousif Nazar Yousif
تاريخ التسجيل: 05-07-2005
مجموع المشاركات: 12465
Dear Siham حنتوب.. وادى سيدنا .. الكلية الحربية مثلث الكنكنشة فى السودان.. الآن حنتوب خارج الملعب ودخلت جامعة الخرطوم وطبعا لسه بدرى على الكلية الحربية حتى يجوا عايدين ناس أمريكا والمهاجرين.
05-21-2007, 12:08 PM
Muna Khugali Muna Khugali
تاريخ التسجيل: 11-27-2004
مجموع المشاركات: 22503
بنكنكش لأننا ما بنقدر نقدم غير القدمناه.. وصدقنا ساعة ماقدمناه انه مافي زول تاني بيقدر يقدمه.. ولأنه لو خلينا محل كنكشتنا بيجي زول ويقول انا احسن من الفات.. ويشيل مجهودنا كله ومعاه نظرة احتقار ويرميه بغتاته حتي لو أحسن منه..
وبعدين غفير المستشفي ده يزح من كنكشته وين.. ودي البوابه الوحيده البيمارس من خلالها سلطاته الضايعه في الدنيا ومرات كتيره بتطلع ليه "ماهيه" تانيه.. وأنا لو مكانه امكن كمان أكنكش وأجيب ولدي يكنكش معاي علشان لو أضطريت امشي مشوار صغير كده ساعة الكنكشه..ينكنكش هو بدالي ..واهه زيتنا في بيتنا.. الكنكشه دي في حد ذاتها وظيفه ذهنيه تحتاج الي مجهود ذهني ووقتي رهيب.. يتحول الي علاقات عامه من أجل الاستمراريه فيما نكنكش فيه...يعني ماتستهوني بيها شديد.. والكنكشه فن..يمارس أيضا علي أعلي المستويات..يسمونها في لغة المثقفين بالأحتكار..طبعا برضه مصطلحات اقتصاديه تدعم في نظم سياسيه..لكن علي المستوي الفني برضه ممكن تشاهديها ظاهره..
مش بتقري كلام زي احتكر المنتج الفلاني ماعارفه ايه في انتاج سينما ايه والذي تقوم فلانه الفلانيه الممثله المعروفه بتمثيل كل أدوار البطوله فيه لفتره الخمسة أعوام القادمه..اشمعني؟ لأنها بعد خمسة اعوام هاتكون ما نافعة لأدوار بطوله فتاة العشرين.. خاصه انه عمرها بقي يظهر انها في الأربعين.. شايفه هنا المنتج منكنكش والممثله مكنكشه واحنا برضه مكنكشين بس بدرجات مختلفه..لأنها حلوه وبتمثل حلو..ولكن الأهم من كده لو قمنا من المقعد المكنكشين فيه ساعة مشاهدة افلامها ولا مسلسلاتها بيجي زول يشيلو واحنا ما نعرف نعمل ايه..
يو سي؟ الكنكشه مهمه!
05-21-2007, 12:25 PM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
ايام نميرى المكنكش الاكبر كنا بنقول لن يحكمنا طيش حنتوب لكنه كنكش فينا ما شأالله له ان يكنكش اما الكليه الحربيه دى فقصة طويله لانها مكنكشة فى كل بلد ناسو بيشبهونا
A Razek Althalib
انت مش نقد قال ليكم هو ما ماشى؟؟؟ مالكم بتطاولو وتناقشوا قضايا خاصه به افتكر هو حر يشارك فى البرلمان و الا لا؟؟؟ جنس تحِشر!!!!
05-22-2007, 11:10 AM
Siham Elmugammar Siham Elmugammar
تاريخ التسجيل: 06-18-2004
مجموع المشاركات: 3488
منى خوجلى فى الفتره الاولى لعودتى للسودان كنت ما قادره استحمل الهبشه من اى زول قاعد فى اى كرسى دورت شكله فى كل مكان ابتدأت مع موظفى الاستقبال فى اى مستشفى دخلته ومع الممرضات مع الدكاتره و غيرهم كتيييييييييييير العجب بتاعين الشرطة البخشو الشارع غلط كل زول بفتكر القدامو فرصه ليستعرض قدراته فى التسلط!!!! و عجبى احيانا اتسـأل هل شعبنا بأكمله يعانى من عقد نقص؟؟!!! فى اعتقادى ان كل شخص يمارس السلطات التى له بحكم و ظيفته مهما كانت بطريقه فيها الحرفيه...التشفى....الاستعراض و .. و.... هو مريض والزاد الطين بله غياب المؤسسيه و عرج االقانون و بجيك راجعه يا منى لان هذا الموضوع يتصل باخر عالق فى ذهنى
05-22-2007, 08:04 PM
Muna Khugali Muna Khugali
تاريخ التسجيل: 11-27-2004
مجموع المشاركات: 22503
جيتك راجعه يا منى شخص عزيز شابكنى دوما بأن شعب اسودان ده كله عنده حاله نفسيه بما فيهم انا و هو... كنت اعتبرها نكته لكن كل ما طال بقائى كلما اقتنعت بنظريته و ساءت حالتى!!! الموضوع هو انو نحن ما عندنا اى اهتمام بالرعايه النفسيه و لا فى المستقبل القريب ممكن يكون فى اهتمام بها فهى فى الوقت الحاضر تعتبر رفاهيه ... الناس ما لاقيه تاكل...تشرب..تتعلم..تتوصل.. ده غير الحواجز من حجار و خرصانه التى تشكل مصدات طبيعيه لاى دعوه لخلق نظام رعايه نفسيه يلبى احتياجات شعب فى طريقه الحثيث نحو الجنون والمشكله انو حالتنا النفسيه ماشه متدهوره ... و متدهوله و ما عارفين نلقى صينيه تشيلنا كلنا ويييييييييين اها ده الموضوع الفى راسى انشألله ما لقيتيهو فاضى؟؟؟!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Siham Elmugammar
Nazar Yousif
Muna Khugali
A.Razek Althalib
فيس بوك
تويتر
انستقرام
يوتيوب
بنتيريست