دعواتكم لزميلنا المفكر د.الباقر العفيف بالشفاء العاجل
|
|
 مسامات الانامل
|
مسامات الانامل
ــــــــــــــ
لو بتعرفي
يا مسامات الانامل
التايه
في حر الضهيرة
قيمة الفرح
البعشعش
في مواسمنا المطيرة
و انو احزان القوافل
السايرة في جوف الخواطر
ما بتمنعنا المسيرة
ما كنتي
لملمتي الخطاوي
وقفتي
مديتي الاصابع
للمواعيد المثيرة
و الناس بقت
حبات سبح
لا خيط بلمها
لا ترانيم العباده
و اللهفه ذاتا
عليها لهفه
و في العيون
صبحت زياده
لي قطرة
تنزل في جموع
ضماها جوع
تمسح دموع
زاد ازدياده
لي ضوء
يغازل
نغمة الامل المصارع
بين مسافاتنا و بعاده
يا مسامات الانامل
مدي في عمقك اصابعك
و شيلي من الجوف حرايقو
و خلي حبك يبقي تابعك
في مشيكي علي الجراحات الطويلة
بين حروفك
في مسامعك
و خلي في املك عوالم
تنشرا
تغمر
كل مرابعك
|
|
 
|
|
|
|
|
|
|
|
Re: مسامات الانامل (Re: Yahya Fadlalla)
|
صاحب الأنامل القلقه والتي من مساماتها يهتز قلمه ونهتز طربا وانتشاء
و انو احزان القوافل
السايرة في جوف الخواطر
ما بتمنعنا المسيرة
يا يحيي تحيا ويموت عدوك
بعد الأبيات الجميله دي ليس لدي غير الأتكأة والنوم في هذه الواحة الدفيئة
رجائي لا توقظني دعني أنام فكم أنا مرهق الآن
سلامي
أخوك د.متوكل
| |
|
|
|
|
|
|
|
|
 Re: مسامات الانامل (Re: Yahya Fadlalla)
|
الاستاذ المبدع يحى .. تسلم ويسلم قلمك المتفرد واناملك العاشقة للابداع..كل سنة وانت طيب ربنا يحفظك و تروينا من ينبوعك الصافى ..
دكتور متوكل سلام وكل سنة وانت طيب يا طيب
كل سنة وانت طيب يا شيبا كل سنة والجميع بخير
| |
|
|
|
|
|
|
|
|
|
Re: مسامات الانامل (Re: sharnobi)
|
والله حلوه للغايه
وحقيقى ضحكت جدا لما قريت الاستاذ الموصلى حلف طلاق
وقال حقتى وانه قايم بى نمره واحد
لكن حقيقى القصيده
يا استاذ الموصلى اوتماتك
| |
|
|
|
|
|
|
|
|
|
Re: مسامات الانامل (Re: HAMZA SULIMAN)
|
يا ود فضل الله سلام سديمى
بكل زخمه اختلافه واتفاقه
يحمل نكهه الجيل الاول منها من حاتم ومحمد محى الدين
مرورا باحمد البكرى وجمال سوزى وجمال عبد الرحمن
ودجل السر؟؟؟
كل سنه وانت طيب
وكل عام وانت جميل
نشوف بيك الما بنشاف؟؟
وعلى الطريقه السودانيه الحمد لله الحجزنا رحيل
والله كان هسع طلاقاتا وقفت سلك؟؟
ويا استاذ يوسف هنيئا لك الاختيار
ونتمنى ليك ليها الهام قدر المعانى
ليكم الود
انور عبد الرحمن
| |
|
|
|
|
|
|
|
|
|
Re: مسامات الانامل (Re: Yahya Fadlalla)
|
الرائع يحى فضل الله
طلاتك هنا على قلتها تذكرنا بالسودان زمان وإنو الدنيا ما زالت بخير والدوش وعن المسرح نكتب والتداعيات وشيء من مزاج تمباك عالي الجودة
سلمت وردك الله لنا سالماً غانماً
نادر
| |
|
|
|
|
|
|
|
|
|
Re: مسامات الانامل (Re: sheba)
|
الأستاذ يحي فضل الله
حمد لله جمعنا
المنبر بالمدعين أمثلكم
على قلة طلتكم
ويكون الإبداع
مثانى
أستاذنا الموصلى
وثالث أستاذنا حمزة
ورابع للرائع شيبه
وما لانهاية
| |
|
|
|
|
|
|
|
|
|
Re: مسامات الانامل (Re: sheba)
|
والله ياحمزه
الحليفه ديه جاده
وانا قايم بي نمره واحد اشد من قومة اميقو وهو اكبر قايم بي نمره واحد
وبعدين ياشيبه انا ومصطفي نتلاقي هناك قول في الجته ان شاء الله حيكون بيناتنا شكله كبيره
ان شاء الله لوطلع ملحن النص ده
ومالو والله نستمتع بيهو
كدي ورينا الاكيده ياشيبه
دكتور متوكل
ان وجود مصطفي في اغنيتي طفل العالم مع وردي لهو
سبب كاف كي اتنازل من كل ما ملك من اجله
تسلمو كلكم
| |
|
|
|
|
|
|
|
|
|
Re: مسامات الانامل (Re: Yahya Fadlalla)
|
الجـميل ..يحـى
سـلال من الـورد..و عنقودين محبة..
كـتر خيرك واصرارك على انـك تدينا مـبرر واحد بأن نبقى ونتصالح مع حاجاتنا وأولها مفردة منتحرة اسمها الأمل..
لـيك كل المحبة والسلامات
ودمت
كبر
| |
|
|
|
|
|
|
|
|
|
Re: مسامات الانامل (Re: Yahya Fadlalla)
|
ياموصلي وياحمزه ويحيي فضل الله
شيبا ده زول مدهش ومزعج في نفس الوقت اه طرشق ليكم أفكاركم تعالو بالدس نصل السودان ونتلب حيطة بيتهم ونسرق كل الشرايط العنده دي ونحيره أيه رأيكم دام فضلكم
أما أنت يا مدهش ياشيبا واصل توثيقك فبمثل هذا الأعمال تبني الأوطان وتحفظ الحقيقه وتقتل البطولات الزائفة وما أكثرها في هذا الزمن الردئ
رجائي ياشيبا أن يحفظ كل ما لديك من تراث فني وأدبي زاخر في أقراص مدمجة أومضغوطة حديثة وبتقنية عالية خوفا من الضياع والفقدان بعامل التآكل والتعريه
دعنا نتفاكر في أمر هذه المكتبة الفنية العتيقة
شكرا لكم جميعا
أخوكم د.متوكل
| |
|
|
|
|
|
|
|
|
|
Re: مسامات الانامل (Re: sheba)
|
و الناس بقت
حبات سبح
لا خيط بلمها
لا ترانيم العباده
تصوير رائع
وشكرا للكلمات الصادقة الملمس
الموصلي التحية لك
ايه رأيك تعطينا فرصة ولو بنمرة أربعة
ود سليمان
انا قاعد في المحطة
انشاء الله تجي مرور قبل ما نسافر
| |
|
|
|
|
|
|
|
|
|
Re: مسامات الانامل (Re: sheba)
|
معقوله ياشيبه الحبيب
ياخي انت الذوق كلو والادب كلو وقلوبنا مفتوحه ليك علي مصراعيها
والله انت بي عملك الجميل لي مصطفي ولطفك بقيت اقرب لينا من حبل الوريد
تسلم
| |
|
|
|
|
|
|
|
|
 Re: مسامات الانامل (Re: Elmosley)
|
ســلام مأصــل للكل
والله يادرر... انا ادمنت البورد بسببكم ياموصــلى
جهازى فى البيت خربان جيت المكتب جرى بعـد صـلاة الجمعه ... ووجدت الروائع دى مش لى حق أدمن؟
وكمان انا اثنّى أستاذنا العظيم موصـلى وأقول حرّمّ حقتوا آهآ؟ ودمتم
لكن ياخوانا خلو الغتاته وخلونا نقدر ننزلها
اخوكم بشـراب
| |
|
|
|
|
|
|
|
|
|
Re: مسامات الانامل (Re: bushramk)
|
الاصدقاء
متوكل
كويس انك قادر تنوم وخليك برضو صاحي معنا و وين المشروع؟
شيبا
دائما تهدينا ما يحرض علي الدهشة
هل غني مصطفي هذا النص؟ انا لا اعرف و كم يسعدني لوحدث ذلك و اتمني ان يكون عندك تسجيل لذلك
سوما
لك شكري و دفء الاغنيات
موصلي
انت ما محتاج لحليفة و بعدين ايه حكاية الطلاقات الحايمة في البورد دي مره اتصلت بالصديق قاسم ابو زيد سلك حميم بين اتاوا و الفتيحاب و حين سالني ماذا افعل في هذه اللحظة ادرت المسجل و وضعت سماعة التلفون بقرب السماعة ليسمع معي اغنية لصديق احمد فهتف قاسم ابو زيد قائلا علي الطلاق انت راجع و حين تحدثت مع زوجته الاخت سهير سالتها عن موقفها مع طلاق قاسم المرتبط بعودتي والتي قد تماهي مع المثل الذي يضرب حين تكون الاشياء بعيدة المني ـ عصيدة ملاحا في الريف فقالت لي سهير علي الطلاق انت راجع
المهم علي الطلاق النص حقك و حتي لو لحنو مصطفي و مالو علي الاقل يكسب النص حيوية ورؤية لحنية اخري و لا شنو؟
شرنوبي
الرجل الذي يصر علي هزيمة المدن الظلامية بمشاريع الجمال شكرا و لك مني كثيف الود و التقدير
حمزة سليمان
ازيك ياحنين و انت عارف انا لحدي هذه اللحظة لم اسمع قصيدتي رحيل و لاحتي قصيدتي ـ مين علم الوردـ حمزة ما تهم معانا شويه و خليك حنين
انور عبد الرحمن
صاح يا انور هذا النص من تلك العوالم و ذكرتني اخونا الجميل قاسم نصر كان كلما يسمع يا ضلنا يقول لي الغنية دي فيها ريحة شري
انور بي لهفة كي اسمع صوتك الندي في مشاريع غنائية جديدة فهلا فعلت؟
نادر
اشكرك حتي تستغيث
المهندس
الشكر و حميم الود و التقدير
كبر
اول حاجة انت وين في كندا؟
اتابع ما تكتب و اكاد اشتهي الهالوك و ام تقلقل و قرعة روب تحت شجرة نيم بالدلنج و انا اخب نحو حي اقوز
تري هل هنالك امل لتحقيق ما اشتهي؟
هدهد
شكرا ولك الحب و التقدير
المسافر
شكري لك يضئ دروب السفر
شيراب
شكرا ولك مني الود والتقدير
| |
|
|
|
|
|
|
|
|
|
Re: مسامات الانامل (Re: Yahya Fadlalla)
|
الاخ طارق اسماعيل
كثيف الود و التقدير
يبدو اني نسيتك و انا ارد علي كل في هذا البوست فلك العذر
اخي طارق
شايف طرحت مسالة العودة للسودان و الغريبة انا حكيت لموصلي تلفوني لقاسم ابو زيد و ذكرت ان هذه العودة دي بينطبق عليها المثل البقول عصيدة ملاحا في الريف
لكن برضو انا كتبت في اخر قصيدة لي ـ المنفي بكائية لا تخصني وحدي ـ
و النوايا مسرفات
في الرجوع
لبيوت الحلم
في تلك الربوع
و ياريت يا طارق
| |
|
|
|
|
|
|
|
|
|
Re: مسامات الانامل (Re: Yahya Fadlalla)
|
يحي اخوي انا حليفتي ماليك انا ضامن ودك لكن الحليفه لي ناس حمزه وسيف
بالله سلم لي شديد علي قاسم وقول ليه صلحو الصواني في البلد ونحن بنجي
مش الصواني بتاعت يوسف عبد الفتاح
| |
|
|
|
|
|
|
|
|
|
Re: مسامات الانامل (Re: Elmosley)
|
الموصـلى .... سـلام يا رائع
بالمناســـبه ... أين الاســتاذ الماحى سـليمان لم نســمع عـنه او منه مره أخــرى ....ما يكــون غــير رايه...تحــايــا الـوّد للكـل
بـشـراب
| |
|
|
|
|
|
|
|
|
|
Re: مسامات الانامل (Re: Yahya Fadlalla)
|
الاستاذ يحيي فضل الله
تحياتي الكثيرة لك من بلاد الغربة الى حيث تعيش في بلاد الغربة الابعد
تابعت يحيي فضل الله منذ تداعيات يحيي فضل الله في جريدة الخرطوم وشاءت الصدف ان التقي الاستاذ يحيي فضل الله سريعا مع الصديقة العزيزة الهام عبدالخالق في مسقط عند الاحتفال باعياد الاستقلال قبل 3 سنوات وكان الاستاذ يحيي فضل الله ضمن تلك الكوكبة الجميلة التي حضرت للمشاركة في الاحتفالات
وقدم يحيي فضل الله ندوة جميلة جدا في النادي السوداني سرد لجزء من تداعياته في جريدة الخرطوم
فشكرا لهذا الفنان الذي نأمل ان تزيده الغربة ابداعا
وياريت يا استاذ يحيي لو اصبحت الهام عبدالخالق ضمن اعضاء هذا البورد فالهام شخص مبدع وجودها في هذا البورد ممكن يرجعها لمساحات غابت عنها طويلا
مايا
| |
|
|
|
|
|
|
|
|
|
Re: مسامات الانامل (Re: maia)
|
شكرا يا مايا ولك الود وعظيم التقدير
و ارحب بالاخت الهام عبد الخالق و ادعوها للانضمام لهذا الحوش الالكتروني و يلا جرجريها و يا بكري ابو بكر ها هي الهام عبد الخالق علي عتبة البورد هلا ادخلتها الي الداخل
تحياتي الحارة لناس مسقط
| |
|
|
|
|
|
|
|
|
|
Re: مسامات الانامل (Re: Yahya Fadlalla)
|
يا يحيى
ح انزل ليك الورده فى اقرب وقت
وهى سجلت فى شرسط من بدرى لكن الشريط لم ينزل لظروف كتيره
اما رحيل فلها من المكانه فى نفسى
ما لها
واعدك بىغناءها فى القريب
لك السلام
وكنت اعتقد مجدى الحواتى ارسل لك الشريط الفيه الورده
| |
|
|
|
|
|
|
|
|
|
Re: مسامات الانامل (Re: Yahya Fadlalla)
|
خالص التقدير الى الاستاذ يحيي فضل الله
وبعد كتابتي للبوست اتصلت بالهام عبدالخالق فقالت لي بانها كم في حاجة الى الدخول لمثل هذا البورد حتى تنفض عن نفسها تراب الغربة التي اوشكت ان تشوه ما فينا
فشكرا لك كثيرا وشكرا لكل من يمنحنا في هذا البورد بعض من ملامح ذلك الوطن الذي يعيش فينا وقد انهكتنا الغربة
مايا
| |
|
|
|
|
|
|
| |
Yahya Fadlalla
Mutwakil Mahmoud
sheba
Elmosley
sharnobi
HAMZA SULIMAN
almohndis
Kabar
المسافر
طارق اسماعيل
bushramk
فيس بوك
تويتر
انستقرام
يوتيوب
بنتيريست