|
دعواتكم لزميلنا المفكر د.الباقر العفيف بالشفاء العاجل
|
|
 Re: يأخوانا المشتاق لودشــيقوق يرجع لينا يوقع هنا .. (Re: مجاهد عبدالله)
|
| Quote: أنا قلت أكلم ليهو سالم أحمد سالم أو عمر كوناكري أو بان كي مون ، |
الأخ المحترم محمدالمرتضى حامد
سلام غشاك ولقاك بكل عافية..
الزول دحين معاكم والكلام الفيهو العين بتشوف العين ما زي كلام الأسافير
بالله قول ليهو أرجع تعال عود لينا وخفف شوقنا شويه..
وبعدين الزول كلمو ليهو بكري بس والناس الفوق ديل ودشيقوق تب ماسايل فيهم .ز
شكراً للتوقيع..
خالص الود ..
| |
 
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: Tragie Mustafa)
|
حباب عولي والله تعبتوني شدييييييييييييد ما قدرت اكسر خاطر واحد فيكم
بس يا التراجى وبت طلحة كتلونى بضحكة عاااااااااااااااااااااااااالية حتى الجيران جوني قالوا انا مجنون
شكيتك على الله يا تراجي الله يمسخك ومافي حد عرف يشخص المرض غيرك
يلا مجاهد الابنوسي خليني انجم تاني يومين تلاته واجيكم قادل ومشنق الطاقية في الهامة
لكم اعزائي عميق حبي ومودتي
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: الطيب شيقوق)
|
شكرتك يا ود عمتى يا جابر الخواطر,
ومستنين على أحر من الجمر عودتك قادل حافى حالق وكمان مشنق طاقيتك.
وأنا مستنيك بى غادى أرجع ليك أمانتك التعبت شديد شايلها ليك.
أقصد بوست "ظلال وأشجان فى مسيرة القضاء السودانى".
وانتهز هذه الفرصة بدعوة الجميع للمساهمة فى هذا البوست المتفرد.
منعم الحويرص
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: مجاهد عبدالله)
|
المحترمون
Zoal Wahid
ماجدة عوض خوجلى
سلمى الشيخ سلامة
Gaafar Ismail
صباح حسين طه
سمية الحسن طلحة
Tragie Mustafa
Moneim Elhoweris
سلامٌ من الله عليكم
كل الشكر لكم وأنتم تتداعون بشوقكم لأخينا ودشيقوق وشد أزركم لحملتنا والتي نجحت وأعادت لنا كنزاً كما قالت الأخت صباح فهو من القلائل الذين يكتبون ..
شكراً لتوقيعكم ..
خالص الود ..
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: مجاهد عبدالله)
|
عفوا الأخ مجاهد عن عدم تواجدي بالمنبر في الايام القليلة الماضية.
بالطبع الاستاذ الطيب شيقوق عالم موسوعي وشخصية متفردة إشتقنا كتاباته ومساهمته كثيرا في هذا المنبر المتفرد.نفرح كثيرا بعودة يراعه المسنون وكلامه المرصع بالدر واللآلئ.
الشكر لكل الاخوة والأحبة اللذين قادو حملة إرجاع هذا الكوكب لمساره!وعلى راسهم الاخ عبدالمنعم الحويرص والاخت تراجي والاخ حيدر وسلمى الشيخ سلامة وبقية العقد الفريد.
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: مجاهد عبدالله)
|
| Quote: يلا مجاهد الابنوسي خليني انجم تاني يومين تلاته واجيكم قادل ومشنق الطاقية في الهامة |
حمدالله الف علي السلامة..
بركة الجيت وطبعاً ما ممكن نقول عسل انت وبسكويت ..
لأنو الكلام لولاد البندر..
وبعدين شنو حكاية تنجم ليك يومين تلاتة كنت مشمع زي مشبك الغسيل في لوري سفنجة ولاشنو؟؟ 
الود..
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: مجاهد عبدالله)
|
الطيب حمد لله علي السلامه والله البورد براك خلا
تاني ما تسوي حركاتك دي واكان في شي
زعلك كلم روحك وقول
بلدي بطانه قفره وفيها جبلاً عالي
ومن عاصمة البلاد شرقاً كمان طوالي
بالخليج الروتين والغربه كاشفات حالي
راجي المولى عوده للوطن الفيه راحة بالي
راحت البال يا الطيب الا تجر عنقريبك تحت النيمه
وتخلف كراعك فوق التانيه وباب الشارع مفتوح
وسلام سلام من اضانك ماتمرق
ارجع لي الرطاني وبي ونستكم وضحكم نحن زاتنا ننبسط
شكرا ليك اخ مجاهد علي المبادره الحلوه
والزول ده يستاهل شيخ عرب يعجبك
ام احمد
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: مجاهد عبدالله)
|
الاخ مجاهد لك التحيه وشكرا العريبى ده وجودو مهم فى المنبر انا متواصل معاهو بى التلفون لكن انقطاعتو من المنبر مى سمحه وانا ماعندى ليكم غير مسادير شعراء البطانه اوردها اخونا سعد فى احد المنابر
مسدار الصُباغ
للشاعر احمد عوض الكريم ابوسن
دَنَّــاىْ القَفـَارات*ْ البِعرْف العوم
نَقضـتَ عليقْتُو بَاكرْْ بيهو قَصْدي شَيوم*
كـان سَهَّل علينـا الواحد القيُّـــوم
بَشوف بُوْ الكـافي قاعِد ومِنْ وسِطْ مقسوم
القفارات : السهول ، الشيوم : الرحلة إلى ديار المحبوبة
***
لَيْ تعبنـاً مطِّولْ مِنُّو خِلاي حَابْسـُو
جِبتـُو الليلة وتْبوبَحْ ضَرَبْ فوقْ يَابْسـُو
ابو خَداً بيلْمـَع بالغضب مــُو عَابْسُو
مِتْـوطي الحِشـَمْ تُوبْ المَحامِدْ لابْسُو
***
مَرَقْ مخَلـوفْتُوْ وقَيت*ْ فُوقُوْ لَشَّق*ْ طَافـُوْ*
شَدَّيتــُو ومغَيت ســير القُشاطْ في هَافُو
عَشِيّــة رُقَادِي عِند الكامـلات اوصَافُو
افْدَعْ جِيد واهْيـف وعَاليـَات ارْدَافُو
وقيت : هيأ ، لشق الطافة : رفعها لتستقر وترتاح فوق سنام البعير، الطافة : هي الحشية التي تشد فوقها المخلوفة وهي تصنع من الجلد وتوضع بين الجمل والمخلوفة حتى لا تؤذي المخلوفة ظهر الجمل .
***
مِنْ الشــَايَة* قَامْ هَابِر* بِي كَاربْ الزومْ
عَارفْ اليــُوم مِباشْرك بِي دَفَاق الدُّوم*ْ
عَلىِ الحَاويِّتو هـَامْ مردَهْ أب شَراياً كُومْ
سيت الدَابِـي جاك وتْسِوسِو البـَعَشوم
الشاية : حبل يقيد به الجمل من رجليه ، هابر : من الفعل هبر أي انفك وانطلق، الدوم : أو الدومات اعلى الرأس ، والمعنى أن الشاعر يتوقع أن يتصبب العرق من رأس جمله من شدة سعيه نحو ديار المحبوبة .
***
غِشيتْ عِدْ الصُّبـــــَاغْ نَشَّـــحْتُو فِيهُو نَشَاح*ْ
خَتَرْ واتــــــــــــِوَجَّه الغَافي المِسِن لُوْ وِشَاحْ
النشاح : مجرد تذوق الماء ثم المنع منه دون ارتواء.
عَلي سِيدْ الجمـــــــــال ابُوْ مُدْفعـــــــاً رَشَّاحْ
قَنَّبْ يِحـــــــَاكي في تِعلْ الخــــــــــَلا الكَشَّاحْ
***
جَاءُ بــــــَاري الْعُطـــاش تِيس الرَوايِن* دَاحْ
كُورُو يَجِضْ مِتــــِل كَلــــــــــــْب الخَلاَ النَبَّاحْ
هَجـــــــام دكة*َ الرَعْنــــــــــاْ* امْ عَبيراً فاحْ
مَصـــــــَعْ واتْهبْلع* الرِبْد* الوَطَاطــُو صَباحْ
الرواين : جمع روينة وهي السرب من الظباء أو حمر الوحش ، الدكة : مكان نزول العرب ، وهي المرتفع من الوادي وعادة ما ترمز لديار المحبوبة . الرعناء : أي الرنعاء وهي الفتاة البضة اللدنة ، المصعي والهبلعة : ضرب من سير الابل ، الربد : النعام .
***
وَخَرْبِي القـــِرُون* شَافْ أمْ عِشَيـــرة* زَوالْ
قَصـــــــْدو يَقَصِّرْ النَقَع الشِـــــــروفُو طُوَالْ
عَلي هجيـــــــم الدكَكَا متُوتْلـــــة* بِي الدَوَّالْ
شَدَّّ هَســـــــِالو*ْ شََّمر ؤشَنَّقْ الســــــــروالْ
القرون : اسم لقلعات بين أب قرف والعطشان تقع على خط عرض 52/13 شمال وخط الطول 23 شرق . ام عشيرة : اسم موضع في نفس الجهة . متوتلة : متراصة ومتتالية . الهسال : الرسن .
***
عِنْد الــــــوادي هَا الايِدُو جَاتـــــــــــــُو تَقِنْ
قَطَعْ في رَاســـــــُو كاس مَنْتــَة وقَزَازَة جِنْ*
عَلى هجوم السَحِى ألما بجيبْ كلام غِير حِنْ
كَضـــــــــَمْ القِيدْ وحِس كُورُو جَوالسُوْ تَطِنْ
المنتة والجن : انواع من الشراب المسكر .
***
بينَــــــك وبيِن بِلـــــودْ العِنْدو فُوقْنَا حَقوقْ
جَاكْ صَيَّا*ً مَفَاســــــِح وفي وطَاطُو شِقُوقْ
عَلى سُكــــــــّرْ نبات الفي العِــــلبْ مَدْقُوقْ
قَمــــــــــــاري الجَالسَة خَلّيتِنْ يَسَوّنْ قُوقْ
الصي : الفلاة
***
شَافْ شـــُوشْتْ الحَمَرَّب*ْ وليها فَاسِحْ عَاقْتُو*
دَرَعْتَ الســـوطْ عَلى سَرجُو ولِمِس حَراكْتُو
عَلى هَجيــــــــــم المَسرَّحْ عَابِدْ دلالو وفَاقتُو
رَحَلْ واتْشـــَابَى الشَبَّاك قَطَـــــــــــعْ عَلَّاقتو*
شوشة الحمرب : قطعة من ارض البطانة ، ولعل تسميتها ترجع الى نبات الحمريب وشوشته هي اعلى جزء منه . فاسح عاقتو أي اسرع في جريه نحوها ، العلاقة : حلقة في انف البعير .
***
قَصَدْ العُقـــــــدة فات بِي سَافــــــــل الرَتَّاجْ*
جَاء نَاطحْ الحَــــــــاكِم اللابس البِدل والتاجْ
تيس الحِنــــــُّو* الهبَّرْ شـــــــــــِروكْ القَاجْ
قَيَّل فيهــــــــــــا قَبْل الحَر يجيب لي ازعَاجْ
مَابــــــــي النزلة ضــــــَرَّاع النَقيبات*ْ سَاجْ*
دَاير الفــــــي الجِدلْ طابقــة السُوار والعَاجْ
يِكشِّرْ نايبــــــو في ارض الحَصَى أب دَهَّاجْ
مَا خَصَّاهــــو في الهُرْبَة* المِســــِى مُدْهَاج*ْ
الرتاج : اسم منطقة ، الحنو : المرتفع أي المكان العالي . النقيبات : جمع نقيب وهو الطريق في الجبل أو الخلاء ، ساج : رفض النزول واخذ يدور حول نفسه من فرط نشاطه ولعلها من سج أي اندفع في فعله من غير تواني ، ونقول في العامية أن فلان " سج ولج " . الهربة : الارض المشققة ، مدهاج : من الفعل دهج أي حطم .
مسدار رفاعة
احمد عوض الكريم ابو سن
رُفـَاعَه الرُبَّة* قَافَاها البـَليب* طَربـانْ
نـَاطح المِنُّو ميثـاق قلبي مو خَرْبـَانْ
فـوسيبْ* السَواقي البي اللَدوب* شَرْبانْ
بِلودُوْ بعيدة فـوقْ في بَاديةْ العُرْبـانْ
الربة : أي الخليط . ورفاعة كانت تعرف بهذا لاسم لانها تجمع العديد من العرقيات وتتعدد فيها الاجناس ، ومن الاقوال الشائعة " رفاعة الربة لا مسيد لا قبة " . البليب : اسم جمل الشاعر . الفوسيب : القصبة المخضرة التي تنبت منفردة في وسط الماء فتمتص كمية كبيرة من الماء ، والفوسيب ايضاً مرحلة من مراحل نمو العشب . اللدوب : أي الادوب ، وهو الثور الذلول المتمرس على جر الساقية .
***
رِجَالْ التَاكـَا بي جَاهُـن قَواسـيك هَانَتْ
مَسكْ فَجـاً عميـق والبَيدا ليك ادَّنتْ
عَلى الفي جِيدَا مَتْبور* البَرَاتىْ مَبــــَانتْ*
المَخَلوفـه ضَجَّتْ من دَويـكَ وعَانتْ
متبور البراتى : المقصود الذهب ويبدو انها مشتقة من كلمة تبر . والبراتي أي البرته قبيلة سودانية معروفة اشتهرت بالاشتغال بالذهب . مبانت : منسق ومنظوم
***
بِلْداتْ الكَموقَــة وحِلَّة السَــرَّافْ*
جـَاهِنْ دَاوِىْ دَنَّايْ المسَافَاتْ رَافْ*
يَاالضِيبْ* العَلِــي راس القَلـَــعْ هَرَّافْ
لاهْطَكْ* حَــرْ شَيومْ لُوْ قـرادْ ولاهُوْ قَرافْ
حلة السراف : حلة السروفاب غرب رفاعة . راف : مسرع . الضيب : أي الذئب ويشبه به الشاعر جمله . لاهطك : أي اجهدك وارهقك . القراف : وعاء من الجلد لحمل الحبوب وغيرها .
***
عَقَبْ سَيـالُوْ* قَدْ فُوقْ الحِلَيــةْ بَدينـا*
قصدو الليلــة في باكريتـو يعد ينَـا
عَلى بلد العَلــى سِيدَكْ مَرَدَّومْ دينـَـا
ارَحْ يَا قُمــرِي في بَاقي النهار ودَّينـَـا
سياله : المقصود سيال ود فاطر . بدينة : حِلة شمال تنبول وقرب رفاعة .
***
حِفيراتْ السُنـُـطْ* جِيتنْ تَعومْ بي التَنْيـَــة*
نَاطِــحْ الشمْعَدانة عَديلَـــة مي منْحَنيــة
دِرْعَاتْ العَفَـــا* الكَبدْ العَسينْ* مِنْتنيـَــة
مـِــي لافْخَاكَ يَاتيس قُنَّةْ* بيكْ مِعتَنْيـــَـة
حفيرات السنط : اسم لحفائر معلومة . التنيه حيث ينثني الجسم ، وسط الظهر . العفا : العفاء هو الخلاء . العسين : نبات اخضر ينبت بعد هطول الامطار ، وتعني ايضاً الارض الرخوة المنخفضة وقد يغطيها النبات الاخضر . تيس قنة : القنة المرتفع وتيس قنة هو جمل الشاعر
***
عَقَبْ ود موسـى شَرْفْ اُمَّاتْ رقَاريِقْ* شُفـْـتَ
بَعَشومــاً سِمعْ نَقـْـرَة وقَطَعْتَ اللفتـه
بَعَدْ دَحَّــنْ جَرايدك ومِنْ شَقيقـكْ* خُفْتَ
واغْل* الاصـْـدَرتْ امْر القَضــَـا والإفتا
امات رقاريق : اسم مكان قرب حلة موسى . شقيقك : الشقيق هو السوط
***
ايدين أب تِبــوبْ* شَقّيتْ وَعرْهِـنْ خَاترْ
جين لي ام عُودْ* تَجمِّعْ في النَقَـعْ* مَاكْ فَاتِرْ
الحـَافِظْ حضورَكْ ولـي غِيـابَكْ سَاتِرْ
اسرِع واغْلوْ ياالجَمَّـامْ قَفَاكْ مِتْمَاتــِـرْ*
أب تبوب : وادي يقع على خط عرض 57 / 14 شمال و 43/ 33 شرق . ام عود : حفير يقع على خط عرض 53/ 14 شمال وخط العرض 59 / 13 شرق . النقع : الارض الفضاء ، وايضاً المكان الذي تتجمع فيه الماء . متماتر : أي يتصبب منه العرق وهذا يدل على عراقة واصالة الجمل .
***
دِيكْ الشَـاقَّه* بانت ومِنهَّـا الحَمَريبْ
عُومْ بي الرَاحة اوعَى تَقطِّـعْ الدَمــَـريبْ*
ود جَمَل النِدِم عَنَاَّفي مُو كَهــَريبْ*
مَا هـُـوْ بَعيدْ عليك بلد ام حَنَانـَـة قـَريِبْ
الشاقة : الارض الجرداء . الدمريب : زمام الجمل . العنافي : الجمل الحر . الكهريب : الجمل غير الاصيل .
***
خـَـرَتْ القِدَة شَبْ فُـوقْ دَبَّة الاسـادْ*
حَسَن شيخْ طُرقِى يِنجي التيس من الحُـادْ
مَحْمـودْ الطَبَايــعْ ليـِّـنْ الاجْسَـادْ
جَميلاً بـي الظُرُوفْ فـوقْ النَدايِد سَـادْ
دبة الاساد : مكان دبة اسد
***
اجَمـَّــع بعد شــَرفْ الحِريحير* طـَارْ
داني بعيد وبي المَصَعي* وجرِيْ الحَارحـَار
علي جريعة البِنونـِي* ومِسكة أب مُحَّارْ*
لولَحْ راسو واتْمَرْعَفْ بَلا السَحـَّارْ
الحريحر : اسم وادي قرب دبة اسد . المصعي : سرعة الجري . جريعة البنوني : البنوني النحل والمقصود تشبيه تشبيه تقبيل المحبوبة بالعسل . مِسكة أب محار : أب محار هو التمساح والمعروف أن اجود انواع المسك تستخرج من التمساح ويكني الشاعر بذلك عن طيب رائحة محبوبته .
***
سيتْ لُوْ مقيلُو بي البَاكْرِيّة في الضَقَّال*
خَدْ لي هَجْسَة قُمُ فَاقْد السَحى* المَاقـَالْ
اليَبــَّس سراة السُرْعُـوْ ما هُوْ تْقَـالْ
لطيفْ قَامَة ادعَجْ واكُحَلْ الامْقـَالْ
الضقال : جمع ضقل وهو القطعة من جذع الشجر الجاف . السحي : الخجول . د
مسدار قوز رجب
الصادق احمد الحلال
شَدَّيتو رِكِبْ مِن قـُوز رَجَبْ باكْريَّة
نَفَى شَنْشُونو* واتْلحَّضْ بَلا الغَازيـِّة*
اسَلَّكْ فيهو لامِنْ وَخَّر الظَبْطيـّة
هَسـّعْ حَاكَى لي المِنْ كوستي شََال نَقْليــة
الشنشون : مايتبقى من الشعر بعد الجز . اتلحض : من لحض " لحظ " نظر بمؤخرة عينه يمين ويسار . الغازية : الفاجرة
***
تيس القُنـَّة دَعْدَعْ بي الكَربْ واتْشَابَـى
قَطـَـعْ البَاحْ* مِغَبِى بِي وهَسـالُو* رَبَابَة
تَبْقَى عَليهـُو جَافِلْ مِنْ قِمِيــرى الغَابة
اهَجِم بِي البِقَطَّـعْ في البِطونْ سَاكْلَابَا*
دعدع : اسرع في سيره . الباج : أي الباحة وهي الساحة أو الفضاء المتسع . الهسال : الرسن ، والمعنى المراد أن هذا الجمل من فرط نشاطه شد رسنه وجذبه حتى صار وكأنه وتر الربابة . الساكلاب : الخنجر المعقوف .
***
اجَفَّـلْ بَعَدْ وَخَّرْ حِليلــةْ القُـوزْ
قَفَاكْ الحِرْتَـة والمجموع رَمَاهِنْ جُوزْ
يَاتيس قُنـَّـة اسْكُتْ اسْتَعِدْ لي القُوزْ
نيِتـِّـي اكـَزِّمْ* الرُّطَبْ الحَلايِن مُوزْ
اكزم : اقبل
***
لَفَخْ السَّمْـرَة* وادَّلى الـوِعيرْ* مِنْ ضَوْ
رَدَفْ الزَّرعَة* واتْصَعَّدْ هَبُوبْ الْهَـــوْ*
اُنْس الغيـرَا مَالَى في الشبابات هَوْ
خَلَّتْ ريقِـي قِرْقِدَّه* ولِهَاتـِـي " كَرَوْ "
السمرة : نوع من الشجر جيد الخشب يشبه السلم . الوعير : تصغير وعر ، صعب المسالك . الزوعة : ضرب من جري الإبل . الهو : الخلاء . القرقده : الجلد الجاف .
***
سَروبـَاتْ قُوز دَريش* جَاهِنْ جَريدُو مَشــوِّرْ
اتْعَقَّـلْ بَلا العَقَـبْ الرَوينَةْ* مدَوِّرْ
لَتيَبةْ المِدْلـِقْ* التوريقُـوْ* نَالُو يدَوِّرْ
امْسَـى جِرَاحَوْ مِنْ لَمَعـِي البِروقْ مِتْعوَّرْ
سروبات قوز دريش : السروبة هي شجرة الطندب وقوز دريش اسم لمكان معلوم قرب قوز رجب . الروينة : جمعها روائن وهي مجموعة وسرب من الحيوانات . المدلق : مكان جريان الماء . التوريق : عمود الساقية .
***
داؤدْ والطُّـوالْ* جَاهِنْ يِسَـوِّي وَليلْ
عُسَّابْ السِّجَـارْ يـِزيدُو جِنْ وجَفيلْ
هَجيمْ دِكَّة المُـوشَينْ وطَبعــوْ رَزيلْ
خَلَّى قَفَاكْ يدَفِّقْ في الـزَراقْ ؤيسيِلْ
داؤد و الطوال : اسماء مناطق
***
تَقَّايْ* المَفّلخْ* شِلتُـو فِي مُشوارَكْ
جُوطْ وإجّـوجَى* لاَ سَهَّـعْ بَعيدْ مُتْرارَكْ
قَالْ لَيْ الهَسَـالْ كَانْ تَرْخـي مِنُّو يَسَاركْ
بوريكْ ادْعَجْ* النَقَعْ الفَتَقْ نَوسَارك*
تقاي : جمع تقية " تقه " وهي قطعة الارض تترك خالية من الزراعة لحفظ المحصول . المفلح : الوادي الذي تتعدد مسالكه واقسامه . واجوجى : سر بعزه وتفاخر . الادعج : شديد سواد عين مع اتساعها . النوسار : الجرح أو المرض والهزال ، والمقصود هنا مايسببه الحب من سقم وضعف .
***
المَارينبَـة* قَافَاهَا وقَبضْ لُوْ بُطَانَة
جُوطْ وإجّوجَى عرف أُم ريد بَعيــدا إدَّانى
عَلي سِتْ الْحَيـَـا الخَاتِـي الشَّرَازَة لِسَانَا
امْسَى يِحَاكِـى عَجَل الزَّادْ لَهَا قُبْطَانَا*
المارينبه : قلعة تقع في وسط البطانة . القطبان : المقصود هنا هو سائق القطار .
***
اُم بُتَّيخْ* بَدَتْ تحتْ الرِّهابْ الطَّالعْ
جَاهَـا يَحاكي في الشَّايـِل شُحُنْتو وقَالعْ
واغلْ الفَرُّو زَيْ بَـرقْ الصَّبيبْ الشَّالـــعْ*
عَطْشَاناً علي كمْعَـــةْ* بَراطْمُو مِهَالـعْ*
ام بتيخ : اسم مكان جهة المارينبة . الشالع : اللامع ، مشتقة من اللمعان والبريق . الكمع : التقبيل . مهالع : متعجل من شدة الشوق .
***
ادلَّى ام رَمادَة* وغَايَدْ المَكْســورْ
جَرَىْ بِي تنيتـو جَافِلْ مِنْ غُنَى البَاصُــورْ*
لَتيبة المِـدْلِقْ الجابَنْ مَعَالقُو* مِطُــــورْ*
اهَجِـــمْ دورا قُبَّـــــالْ ديدَبَانـَــا يــدورْ
ام رمادة : اسم موضع قرب وادي العطشان . الباصور : سرج الجمل . معالق الوادي : اعاليه . مطور : جمع مطر .
***
اجَفَّــــــلْ بَعدْ ما وَخـَّـــرْ العَطْشَــانْ*
تَقول شَرْبَـــــانْ كمنْقَة بيعتَــــرَنُو جِنَانْ
عَجـَــــلكْ تِرُّوْ يا المِقْـــــدِرْ بَعيدَكْ هَانْ
حَوّيتَكْ رِجــــــالْ الله وضَريـــحْ عُثْمانْ
العطشان : وادي العطشان .
***
عَقَبْ عَطشَـــــانْ عَلى ومُطْمَرْ جَلالَه* الشَّامِرْ
إدَّفقْ بَلا الضُّــــــهرِي* أبْ سِحَابــاً عَامرْ
هَجيـــــمْ دِكَّة الفى عَصــــرُوْ مَالُوْ مقَامِرْ
ايَّا الصبّــــحَكْ مَحنـِـــــىْ وفُؤادَكْ ضامِرْ
جلالة : اسم موضع به مزارع وتكثر فيه المطامير " المطمورة هي : مخازن الغلال " . الضهري : المطر الضهري أي الذي يهطل في وقت الظهيرة .
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: خالد المحرب)
|
عَقَبْ عَطشَـــــانْ عَلى ومُطْمَرْ جَلالَه* الشَّامِرْ
إدَّفقْ بَلا الضُّــــــهرِي* أبْ سِحَابــاً عَامرْ
هَجيـــــمْ دِكَّة الفى عَصــــرُوْ مَالُوْ مقَامِرْ
ايَّا الصبّــــحَكْ مَحنـِـــــىْ وفُؤادَكْ ضامِرْ
جلالة : اسم موضع به مزارع وتكثر فيه المطامير " المطمورة هي : مخازن الغلال " . الضهري : المطر الضهري أي الذي يهطل في وقت الظهيرة .
ود المحرب
هلا هلا هلا دخري القرعم الصنديد ورد الميس بى تقلو - الله يخضر ضراعك يا اب احمد حرم دى نعمة كنت محروم منها شهر كاااااااااااااااااامل -
وحياتك يا الود المحرب هيجت ذكريات ما زالت شواهدها في الذاكرة
المطامير والسويبا
زمان يا اب احمد اخوى وقت الدرتية العيش كان بعد الحصاد والدق بنزلوهو بالجمال وكمان بالقراف
انا بتذكر كنت زمان نجيض بحبسونى المطمورة من الغنم وبكون واقف في طرف المطمورة بالعراقي بتاع الدمورية ولابس لى حجاب في رقبتي من العين وكنت فصيح فصاحة اغالتك في شنبك الماكن ده .
والله يا اب احمد بجن البنيات الصغار وحليوات شايلات الكويرات واخوك يمسك ليك الكورة ويتلب ليك جوة المطمورة يغرف للبنيات يشهلن وانعدلن - اها البنيات يقومن يمشن يبدلن العيش باللاوب ويجن جاريات مبسوطاااااااااات يغنن لينا باغنية ام برمة .
هييييييييييييييييع
وينك يا المجاهد ود البندر وا شوقك للعسل ده الله حرموكم منو وخليكم بس مع الجنز والشعيرية
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: الطيب شيقوق)
|
عفاف ام احمد
لطيب حمد لله علي السلامه والله البورد براك خلا
تاني ما تسوي حركاتك دي واكان في شي
زعلك كلم روحك وقول
بلدي بطانه قفره وفيها جبلاً عالي
ومن عاصمة البلاد شرقاً كمان طوالي
بالخليج الروتين والغربه كاشفات حالي
راجي المولى عوده للوطن الفيه راحة بالي
راحت البال يا الطيب الا تجر عنقريبك تحت النيمه
وتخلف كراعك فوق التانيه وباب الشارع مفتوح
وسلام سلام من اضانك ماتمرق
ارجع لي الرطاني وبي ونستكم وضحكم نحن زاتنا ننبسط
شكرا ليك اخ مجاهد علي المبادره الحلوه
والزول ده يستاهل شيخ عرب يعجبك
ام احمد
وحياتك قلت كلام احلى من العسل ذاتو - والله جرت اعنقريب يا عفاف تحت النيمة وخلفة كراع في كراع فوق التانية وتعاين فووووووووووق في الراكوبة ومرات يجي فيك ابو الملود طائر فررررررررررر ( ابو الملود ده طيره بتخلع الرطانة) يصحيك من النوم . اها بعد شوية تجى الصحانة تتطاقش فيك شى لوبا وشى ام صقعو وشى فرطاقة وشي روب واى واحد خات ليهو فنيجين حق زيت ولد في طرف الصينية . اكلنا زيييييييييييييييييييييين وبعد شوية جاك الشاى احمر دم الغزال شربت نامن عرقت وبعد شوية جاتك الجبنة ام وقاية شايلة الوليد منتكي بيها تكية حلوة ويقوم يترس بيها من البدنة الضارباهو يخجها ليك وطوالى تديهو نهرة حارة يقوم يزعل يمشى يحرد ويقعد بعيد منك جنبك الدقاقة يعاين ليك بطرف عينه .
اها شن رايك
المجا هد - محروم من الحاجات دى لانك زول سرامس وحفاظات وموية باردة سااااااااااااااااااااااى.
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: Tumadir)
|
طبعا يا مجاهد شيقوق ده الناس تعبانه وراهو لازم ترجع .. عشان خاترنا ترجع .. بوساتك
حلوه أرجع ليها دار الغربه ما بترحم .. رجعنالك .. لما ترجع بالسلامه .. رجع البلد..
وسمعت انو مطربه قربت تغني ليهو تعال لي يا شيقوق .. تعال لي خلي الناس تروق .. تعال لي وما تشمِّت المنبر علي ، في الوقت اللي كان فيهو يتمخطر في البيتش مع فضيلي جماع.
عالم عجيب.
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: محمد المرتضى حامد)
|
| Quote: طبعا يا مجاهد شيقوق ده الناس تعبانه وراهو لازم ترجع .. عشان خاترنا ترجع .. بوساتكحلوه أرجع ليها دار الغربه ما بترحم .. رجعنالك .. لما ترجع بالسلامه .. رجع البلد.. |
بالطبع المقصودة (بوستاتك) والخطأ غير مقصود فلشيقوق عدد من البوستات عن مسيرة القضاء في السودان ومسيرته الشخصية في السودان برضو ولم يكن من العدل أن توأد تلك البوستات التوثيقية
الجاده في بداياتها كحال الديمقراطيات في بلادنا.
مرحبا بكم مرة أخرى يا طيب.
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: مجاهد عبدالله)
|
تماضر الرائعة كيفنك
يا المرتضى
أها أنا "ارجل" من بكرى ابو بكر
اها يا تماضر رجعتينا تاني لبكرى ابو بكر ده كتر خيرو على راكوبتو دى لكن رجالته طايرة الما قبل طلبي لضم ود الخضر وشوقي حمزة والخالة حنانة ديل يا تماضر انت بتعرفيهم كويس اكيد حيكونوا اضافة حقيقية للمنبر لانهم اساتذة مخضرمين وكّتاب لا يشق لهم غبار والمرتضى يشهد على الكلام ده لكنه طيب وما ملحاح ولا بيزعل زيي كده بدارج مدارجة ساى ( المدارجة هي التحنيس يا مرتضى والتحنيس مصطلح انسب مكانة له ............ في المنبر العام لانه من اسوا ادوات الاغواء العاطفي مالم يستصحب بحسن النية من فاعله ويقبل من طرف اخر يتمتع بكامل قواه العقلية المعتبرة شرعا .
احييك مليون يا التماضر
وينك يا المجاهد
انبرامة
المرتضى انا بقيت ما بقدر اعمل كوتنج لان المتصفح بتاعي جديد وسريع اسمه موزيلا فايروفكس
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: مجاهد عبدالله)
|
ناذر احوالك ياعريس..
شكراً على الأغنية وياهو محلها ..
الود..
| Quote: انا الزول دا ما بعرفو(ودشــيقوق ) لكن حرم كان اوقع |
أبوبكر أحمد
شكراً للتوقيع وزي ماقال ودشيقوق حرم انت أرجل زول ...
الود ..
Quote: جيت لقيت الزول البسألو منه رجع
وبرضو وقعت...... |
تماضر بت شيخ الدين أزيك يامحترمة..
أها ياود شيقوق كدي تاني غيب..
شكراً لتوقيعكَ الأنيق ..
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: mamkouna)
|
ممكووووووووووووووونة
كنا ماشين ليك..كاكوم..!!!!
ده شنو يا بتي نمسك الخشب عديييييييل كده انت ما نسيتيها ولا بتمنى النفس بزيارتها لاغراضك الخاصة
اها لو مقروضة في كاكوم دى كلميني وعلى طول غرضك بيقضى بس البياض البختوهو تحت التبروقة برااااااااااااااحة مهم جدا .
انا هسع مكتف عدييييييييييييي كده ل الحور ديل كلهن ما ماليات عيني الا السمحة ام ولدي
لقيتيني كيف؟
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: الطيب شيقوق)
|
المرتضى
بالطبع المقصودة (بوستاتك) والخطأ غير مقصود فلشيقوق عدد من البوستات عن مسيرة القضاء في السودان ومسيرته الشخصية في السودان برضو ولم يكن من العدل أن توأد تلك البوستات التوثيقية
انا ما لاحظت يا المرتضى فين العبارة الاخطأت انت فيها هل يمكن اعادة الحال الى ما كانت عليه قبل الاستدراك والتصحيح ؟؟؟؟؟؟؟؟؟؟؟؟؟ اى كلمة من سهواتك احلى غنوة .
| |
|
|
|
|
|
|
|
|
|
Re: يأخوانا المشتاق لودشــيقوق يرجع لينا يوقع هنا .. (Re: الطيب شيقوق)
|
Quote: المحترم الشفيع سلام غشاك..
إنشاءالله شفاعتك لينا ياشفيع عند ودشيقوق ماتقع الأرض ويرجع لينا ..
شكراً لتوقيعك وبصمتك..
الود.. |
انت عارف ياودشيقوق بعد ما بقينا نقول ليك الأخ شكلنا حانرجع تاني نقول عمنا
عارف ليه ما واحد من اتنين يا انت كبرت خلاص (بس ما من الغرام توبة)يعني عجزت وما شوفت ردي عليهو وجاي زي الرجال العجائز تشاكل ساكت ولا كمان تورينا المشكلة وين وفين؟؟
لحدي الزمن داك ارقد عافية يا جدو..
| |
|
|
|
|
|
|
|
|
 Re: يأخوانا المشتاق لودشــيقوق يرجع لينا يوقع هنا .. (Re: مجاهد عبدالله)
|
ود شيقوق !!!
يالكلك ذوق ,,,
كويس إنك رجعت ,, لقد جهزنا زادنا وعتادنا من الحب والشوق وكنا عايزين نغزو مسقط ولكن خفنا عليها
من هذا الغزو الهمجي .. فما زالت مسقط تعاني من فعل الإعصار ,,, شكرا على العودة ,, شكرا يا مجاهد
على البوست الجميل ,,,
| |
|
|
|
|
|
|
| |
محمد المرتضى حامد
حيدر حسن ميرغني
Moneim Elhoweris
ismeil abbas
هاشم أحمد خلف الله
خالد علي محجوب المنسي
ماجدة عوض خوجلى
سلمى الشيخ سلامة
Gaafar Ismail
Tragie Mustafa
الطيب شيقوق
الفاتح ميرغني
عفاف أبو حريرة
salma subhi
الفاتح الجنيد
خالد المحرب
ناذر محمد الخليفة
Tumadir
Nader Abu Kadouk
mamkouna
عواطف ادريس اسماعيل
فيس بوك
تويتر
انستقرام
يوتيوب
بنتيريست