الطمبور صديقنا و عزنا و ملجانا وكتين السنين تفتح بوابة أحزانة مما قمنا نسمع فيهو لا ملينالا ملّانا زي إبل الرحيل شايلي السُقا و عطشانة الطمبــــــــــــــــــور
نادي الطمبور: وينو الحبيب نور الظلام ليه إنطفا؟ ومالو القمر من دارنا يا ناس إختفى؟ حبيبنا عود سيب الصدود سيب الجفا حبيبي أصلو الحب عهود و الحب وفا عندك طبايع يا جميل ما أظرفا رقة و رزانة و خفة غير متكلّفا
الطمبور: يا حبيبي انا إفتقدتك لمّا زاد الشوق علي و إنت عارف روحي بعدك لا بتموت لا بتقى حيَيِ
الطمبور:
يا نضاراً كاسي فيك و فيك آية فيك براءة طفل عمرو لسة ما تم السماية فيك وراعة شيخنا لمّا يحضر اللوح و الدوايا و فيك صدق حيرانو لماً يوقدوا نارهم للقراية يا سحابة ظليلة جاية و يا ربيع من غير نهاية
حبايب النادي:
زمن كايس أراضيهم وصف لي درب الريد عشان أوصل أراضيهم يا مرسال مرســــــــــــــــــــال الشوق أنا الضهبان
أما آن لهذا العملاق أن يعود؟ دعونا نستفتح به العام 2005 دعوة لكل عشاق الطمبور و الفن الراقي
علاء.. كل عام وإنت بخير ... والسنة الجاية على أمانيك...
طبعا اطريت أسأل الوالده عن "الطمبور".. انا بسميه الحاجه البمسكوها كده (وبعمل حركة مسكة الطمبور)... لو عندك ملفات يا ريت تشاركنا بيها...
عندي زميلي شايقي ظريف شديد... مرّه ببراءة سألته.. قلت ليهو انت بتعرف تعزف في الحاجه البمسكوها كده (قصدي على الطمبور)... قعد اضحك.. قال لي لأ، انا الناس البصفقوا بي ورا...
بنت الحسين
01-01-2005, 02:43 AM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
الغالية بنت الحسين و إنتي طيبة يا رب حقيقة ما توقعت مشاركتك في البوست دة قلت الزولة دي بتاعت أسلاك و أثير بس ، لكن واضح من كلاك إنك سميعة بس. و النكتة حلوة شديد حأقول ليك شيء جديد عليك في علاء بس ما يسحروني أنا بعزف أورغ و عود بإجادة و طمبور و جيتار و فلوت و ماندولين. و الموسيقى جارية في الدم مع الكمبيوتر طبعاً. حيجوا الشباب هسي و يزودنا بالمفيد
01-01-2005, 04:18 AM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
الغالية نت الحسين إنت داخلة صح الأدب لا يمكن إحترافه بل يمكن إكتسابه و العكس للكمبيوتر. و شكلك لميتي الإتنين فبالله طلعي من المستخبي من مخزونك الأدبي.لنا مهي و طلعت شاعرة كبيرة خلينا نشوف صوت نسائي تاني سواء في الشعر أو القصة أو غيرهما من المجالات الإنسانية.
01-01-2005, 08:11 AM
ست البنات ست البنات
تاريخ التسجيل: 10-02-2002
مجموع المشاركات: 3639
العزيز علاء ، كل عام وانت طيب ومبسوط وتقرقر يا رب! الطنبور اتولد معاى فى البيت ! الوالد يرحمه الله كان عازفا بارعا ! وكنا نرقص مع عزفه ونغنى ! فقد كان أبى يرحمه الله جميلا يتدفق فنا وانسانية وحبا وودا . ولى عودة وقعدة طويلة . واغشى لقدابتى أملا خشمك وقنب أكللك ديفيقاتن سميحات وكتحة ترمس ! ست البنات .
01-01-2005, 10:05 AM
ملكة سبأ ملكة سبأ
تاريخ التسجيل: 06-18-2003
مجموع المشاركات: 3855
عارف حديثك ذوق وفن وين كنتي كايس ليك زمن جايانا بعد الليل سكن راحن نجيماتو إتّكن وين كنتي كايس ليك زمن بان الصباح و نسايمو جن و بلابلو في الأغصان شدن وين كنتي كايس ليك زمن
أتابع كتاباتك في سودان.نت و جهودك الجميلة في عكس صورة مشرفة و مشرقة عن "الشمال بلد الأحبة" و عن أهلي الأفاضل زاد شوقي ليهم يا ماشي سادر سلم عليهم. ما تغيبي ، الصفاقين في السكة و عندنا الغنايين راجينكم للشبال.
01-01-2005, 10:29 PM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
Quote: الوالد يرحمه الله كان عازفا بارعا ! وكنا نرقص مع عزفه ونغنى ! فقد كان أبى يرحمه الله جميلا يتدفق فنا وانسانية وحبا وودا .
رحمه الله رحمة واسعة
يا قمرا أقلبي السنسن الحمرا و شوفي أبوي أنا الراجياهو كل صباح والله جاهو العيد كمان زاد القليب حسرة هو منطمي قلبو و نفسو منكسرة لا لمّة القروش لا حصل المسرى بلد ما فيها زول مات من عدم كسرة فراقكم ليها يا أحباب دة ما كان صاح
التحتها خط دي عايزة ول يجي يصلحة حباب ست البنات ، قعدنا تحت النقيقيرات و جبنا طمبورنا وريحة الجروف سابقي قعدتنا ، و بنات الشيخ يسون في الشاي المن لبن النعجي ، و حنبدأ الجلسة.
01-01-2005, 09:56 AM
yasiko yasiko
تاريخ التسجيل: 02-04-2002
مجموع المشاركات: 2906
الأخ علاء الدين سلام كل عام وانت بخير الموضوعان التاليان وجدتهما في "سودان نت" وبكل اسف لم اتذكر الكاتبين ، والان استسمحهما ، غياباً ، لنقلهما إلى هنا ولهما العتبى حتى يرضيان
01-01-2005, 10:42 PM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
يا نسمة جروف بكتب ليك حروف من قلبي الولوف لزولي العطوف أغريهو السلام
لمن الطمبور يرن يخلي قلب الكافر يحن
الطمبور ساحر ذو خمس أوتار لكنه شكّل مع نقرات الدليب التي قال عنها باحث موسيقي ألماني"هذا أجمل إيقاع في العالم" إيقاع الدليب الذي عرفه YANI ذلكم الموسيقار العالمي و ألّف عليه عدة مقطوعات مسموعة.
نحاول نستضيف الأستاذ الموصلي ليدلو بلدوه عمَا يختزنه في جعبته عن الطمبور و أوتاره و الدليب كإيقاع.
حبيبنا علاء : والله نضمك في الثقافة بقا لي غريب غريب طوووولنا ما سمعنا ابداعتك دي ..الله يجازي اللكان السبب ..
بت الحسين مريوما : والله علاء ده انا ساكيهو لي زمن يسمعني حاجة وهو زايغ اجيب ليهو الاورغن يقول لي والله لو لقينا عود يكون احسن اشوف ليهو العود يقول لي ياخ غنا الشوايقة حنيين خليني اشوف لي طمبور اها بس شغال معاهو يا كديسة سكي الفار ... انا خايفو يطلع (عازف) عن الزواج .. لك التحايا
01-01-2005, 10:45 PM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
و إنت كمان تجينا و نمشي مع بعض نلف البلد حلّي حلّي و محل محل ، نغشا ناس قوز قرافي و نقعد مع يعقوب تاج السر و نسمع حكاويهو مع الغرام و نبكي لمّا يقول :
إن مت أكتبو فوق قبر المحب كلمات هذا شهيد الحب عاشق الجمال المات
و نجابد لامن نصل لعاشق نجلا ، سيد أحمد عبد الحميد يحكيلنا أنبل قصة غرام و يحكيلنا شعورو في اللحظات القال فيها للمحبوبة بت العم السافرت و غابت و جات و جابت :
أخلف للوعود و عذرتو و قلنا نصيب و أقسام طاف كل الفريق في عيدو زار كل البلد حام لكن طول إجازتو أبانا لامن كملا و قام حرام والله نحن البينا أرحام
01-02-2005, 00:22 AM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
و على ذات النسق جاءت أغنية يوسف ود كرم الله لمحبوبة شاعر الأغنية "رانيا" التي يقال أنها كانت هندية و عايرته بسمرة لونه فقال لها:
الريدة ما بتعرف حدود لا ليها مرسى ولا بلود يا رانيا قلبك ليه جحود أسمر صحيح أنا معترف و أهلي الهناك بالجملة سود لكن سمارة لون و بس أما القلوب عكس الجلود يا رانيا قلبك ليه جحود يا رانيا لو زرتي الشمال تلقينا أهل ترحاب وجود تلقينا سمحين الطباع تلقينا وقت الجد أسود
شكرا يا علاء علي هذا البوست وحقيقة الامر فانا اعشق الة الطمبور وهي اله منتشره علي طول ساحل البحر الاحمر وغربه الي الشمال وهي اله لها العديد من الاسماء مثل اللير وكيسر وكما اجاد عزفها في شمال السودان الشوايقه فان شرق السودان يجيدها ايضاوفي سائر انحاء الشرق يطلق عليها (بازانكوب) ولكنها بلغة التقري تسمي (مسنغو)
اما عن ايقاع الدليب فهو ليس منحصر في السودان فقط كما يعتقد البعض منا ولكنه منتشر في كثير من انحاء العالم خصوصا في بعض المناطق الاوربية ولكن الضرب الايقاعي للدليب وهو في ميزان 7/8 له تمييز وجمال ومهارات خاصه لدي قبيلة الشايقيه
فقد الف عليه اعظم مؤلف موسيقي في القرن السابق ايجور سترافنسكي كما الف عليه كثيرا الموسيقار الاغريقي ياني وايقاع الدليب يطلق عليه الاعرج لانه ميزان مركب
الموصلي وليك من غير ما تقولِّي سلام بقول أهلاً حباب و أفضل إستناك قدر زمني الرجيتك فيهو لو قدري استجاب كل شعري و نثري كلو وهبتو لقمري المطول مني غاب و إنت مهما طال زمانك ليك آخر يا عذاب أنا بعشقك و بعشقك و ما شفتة إنسان أدمن الريد و منو تاب و بعشقك و ما شفتة مجنون غير فقيرو يمسو طاب إلا خايف عمري يكمل و لسة في صدري العقاب ومني ليك لابد أواصل و يبقى قلبي أنا غاب و جاب أنا بعشقك
ما أجمل حضورك يا أستاذنا الموصلي و أنت تضفي على الجلسة سر العلام و العلامة ، دخلت من باب الكشر الكبير و جيتنا في بطن الحوش ، إتوهط يا موصلي هاك جُر عليك سبيطة مدين و سبيطة مشرق و رطِّب جوفك و بعدها بيجيك الشربوت بمناسبة راس السنة و شاي المغيرب المقنن. القعدة شكلها حتطول و لسة الجايِّ جايَ. معلومات مفيدة من أستاذنا الكبير و شخصياً جديدة علي و مفيدة نستفيد منها في مقبل الأيام شكراً يا موصلي و ياريت تطلّنا مرة مرة و الشوق وريدك في قليبنا بلا حدود
01-02-2005, 03:07 AM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
أحبتي عشاق الطمبور دعونا لا ننسى أن نزجي التحايا مباركات لكل من حمل الشعلة الطمبورية على مرّ السنين و الأيام ، وقفة صغيرة لتحية الأستاذة العملاقة الغايبة عن العين الحاضرة دوماً في البال و الخاطرة ، الأستاذة نفيسة أحمد علي مِزيِّر المقدمة السابقة للنادي التي أمتعت الكثيرين بكنوز الشمال ، يقال أنها بالأمارات العربية المتحدة بعد أن خطفها الفارس ذو الحصان الأبيض: أصلو ود أب زيد كل يوم من بلدنا مرحِّل جِدي و نقول لها مشتاقين إنتي متين تجينا تعبانين و الشوق طال علينا حور في سور و سيدو معلّي سورو و الجيران ما قادرين يزوروا لكل من يعرف لها طريقاً أو يسمع عنها خبراً أن يبلغها عنّا السلام و الحب و عبرها يمتد للفارس الهمام خالد شقوري المقدم الحالي للبرنامج و الشاعر الشاب الفاتح.
01-02-2005, 07:12 AM
osly2 osly2
تاريخ التسجيل: 10-17-2002
مجموع المشاركات: 3541
osly2 حبيبنا أوسلي سلام عليك و إنتجايب ريحة يس عبد العظيم ألا رحمة الله عليه لا بتالفو ولا بتوالفو لا قادر منو ترجع
تعال و كمِّل لينا الغنية و خلي قعيدتك تطول
لا زلت أذكر قبل سنوات ليست بالطويلة حينما كنت مسافراً عبر "زهرة الشمال" مع عبد الرحمن ود مكي و كانت نفسي تنازعني البقاء ، عبرنا من الشرق للغرب ووصلنا أوسلي و بين مد و جذر ما بين البقاء و المواصلة لمحت أحدهم في أوسلي الحلوة يشير لود مكي بأن توقف و كان يريد مقعداً للخرطوم غير "مسطح" بأي حال من الأحوال و الدنيا برد ، و لقيتة فرصة و أديتو تذكرتي و قبضت قروشه وودعت ود مكي و مساعدو إبراهيم ولد أخوهو "الله يرحمو إتوفى قبل شهور قليلة" و عدت أدراجي من أوسلي إلي سوق القرير "راجلاً غير راكب" ومنها إلي تنقاسي السوق "بفوردكي" و من ثم لمروي غرب ثم البنطون و البيت الكبير.
الزول الوسيم في طبعو دايماً هادي حلات رويحتك يا ود عطا المنان و حلالنا بيك وبي دخلتك علينا المافي متلها شي في الدنيي دي و شن الدنيي عليك الله "خرباني أم بناين قش"
و حلاة نويدينا الجابك لينا و حق لقبيلة الطنابرة أنت تفخر بك يا ود عطا المنان. و راجينك
01-02-2005, 10:54 PM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
أقدم اشتراكي في النادي ( وما تنسو تقطعو لي ايصال).. قصيدة للسر عثمان الطيب شدى بها في زمان سابق الفنان الفنان محمد جبارة، وهي يا صحاب قمري حليلو.. من زمان فارق خميلو
مامان
يا صحاب قمري حليلو
السر عثمان الطيب
يا صحاب قمرى iiحليلو من زمان فارق iiخميلو ** مالوفى العش ساب iiخليلو دون وداع فى يوم iiرحيلو فر سايق الشوق iiدليلو ما اتعرف شقيش iiسبيلو ** الدموع زادو iiالبشيلو فى الطريق يرون iiغليلو يسرى دايح جن iiليلو حنن الكافر iiحويلو ** هد بى ترحالو iiحيلو زاد كتر فى السفرة iiويلو يا حليلو غنا وهديلو لي يجى النسام iiيشيلو ** منى كل الهم iiيزيلو ما اتلقالى محال iiمثيلو كنت بلقى وكت iiمقيلو حاضنو شايلو جريد نخيلو
01-03-2005, 05:55 AM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
خشيت علي لقدابة ست البنات لقيتك تقرٍّض في حرفك الليل القراصة و تنضم في نضم حناكيش الطنابرة ما بيفهموهو ، نضماً شهاني البلد بالحيل يا مامان ، عجبني حديثك تب و قلت أندهلك تجينا كمان تدينا طلة بي هني لكن قلت كدي خلّو براهو هسعيتي طنيبيرنا المو خمج يجيبو يلوِّح بي عمتو و خاشي على بنوتن تحاكي الخيل يشيلو شبال شبالين و يقعد.
علاء الدين يوسف علي محمد
مريم بنت الحسين
ست البنات
ملكة سبأ
yasiko
alsngaq
Elmosley
osly2
خضر عطا المنان
maman