|
|
 بكري أبو بكر رجاء فتح باب العضوية لهذا القلم
|
مشاركة للأخ المرشح بصحيفة المشاهير
من كل شجرة عصا
بقلم: علي همشري
بسم الله الرحمن الرحيم
الأخ علي همشري
السلام والرحمة والبركة حالك واحوالك وصحتك واخلاقك وكللللللللللللللللللللل الحاجات انشاء الله كويسة
طبعا لا بعرفك لا حاجة يعني بس بقرا ليك من زمااااااااااااااااااااااااااان من ناس نبض الكراكتير وووووو .
واسة مع وجع الغربة الخرافي ده واخبار الدمار والحرب ووجع القلب خلتنا نفتش لي واحة راحة وحتة نقدر نرسم فيها ابتسامة ولو لحين فكان ظل شجرتك هو الملاز وكانات عصاياتك احن علينا من ريالات السعودية (بترقيق الراء وليس تفخيمها )
زمااااااااااااااااااان في الستينات سنة 87 كنت قاعد اشارك في كتابة حاج مرارة وامكن نزل فيها اكتر من موضوع لكن من ديك وعيييييييييييييييييييق الواحد نسي الكتابة مع جدد اقامتك وما تنقل كفالتك وادفع ضريبتك والغريبة في الضريبة دي فنون يعني يشيلو منك قروش عشان دعم المجهود (الحربي) وضريبة تااااااااانية عشان دعم (السلام ) وضريبة لي دمغة (الجريح) في طريقك من بورتسودان للخرطوم وفي سوبا يشيلو ضريبة (الشهيد) يعني بس في المسافة بين الخرطوم وبورتسودان بيكون الجريح استشهد ..
طبعا ما داير اعمل ليك حركات الكشكرة ديك ونظام والله عمودك سمح واحسن عمود وانت احسن زول عشان بعدين ادقسك وتقوم تنشر لي مشاركاتي زي ما انت عارف الحنك البيش داك لكن يازول دي مشاركتي ليك عايز تنشرا انشرا ما عايز تنشرا بي جاااااااااااااااااااااازك وعمودك ولا سمح ولا شتين
امش قول ليهو يا المرسال الزول ده في الطريق بس المواصلات صعبة ...
حاول يخفي نفسو وهو ماري جمب بتاع الدكان ...
يامعاين من الشباك احجز بي شنطتك وتعال اركب بي الباب ...
نالت علي يدها 25 مليون كاااااااااش مهر ومؤخر الصداق بي شيك..
قلنا ما ممكن تسافر قبل ما تاخد مقاساتنا ...
قالوا وقلنا :-
قالوا الولف كتال..
قلنا ده ولف ولا طريق مدني..
قالوا القصار طالو
قلنا عبد الله البعيو ما سمع بي الشمار ده ولا شنو ..
قالوا لينا مسافر ماشي وين يا نافر
قلنا عمرة وزوغة
قالوا ليك اوصف جمالك
قلنا جمال فرفور وجمال حسن سعيد عندهم صلعة وجمال عبدالرحمن قصير
كلمات متقاطعة :-
اداة تنبيه : قرصة يا معلم ..
مترادفات : الحلة وغتايتا ..
تجدها في النيل : المشوكشة ..
للنفي: نهي زندقي ..
مبالغة :
عايز تعرف انو الامارات جوة السودان؟
اقرا لي مزمل ابو القاسم وهو بيحلل مباراة لي الهلال
ياخوي كفاك ما اقدك غايتو حقوق الطبع لا محفوظة لا حاجة شيل البيعجبك وخلي الباقي وكان داير تبقا صحبي ده ايميلي معاك ونبقا نتراسل انشاء الله و أهو الواحد يقول استفاد من النت شوية وعرف ليهو ناس فيهم فايدة
فاااااااااااااااااااااااااااااااااااااااااااا ...بس
سؤال صغمبروتي كده
العمر وعرفناهو بيشترو من سوق العمر موضوع الحنين ده اتحلا كيف؟؟؟
سلام
عمر الفاروق شيخ الدين
مخترب من الرياض المسعودية (السعودية سابقا)
الأستاذ المهندس عمر الفاروق "أستاذ مستقيل من جامعة السودان" متخصص في البرمجة متميز جداً في مجاله العلمي و العملي رجل يتسم بالطرافة و خفة الدم و الروح ، عاشق للبورد و متابع له منذ أمد بعيد كتب كثيراً في شأن إنضمامه للبورد لكن بكري سادي دي بطينة و دي بعجينة و ياخي طالما فتحت الباب يا بكري نرجو أن تتكرم بإضافة هذا القلم الذي سيكون إضافة خفيفة الظل للبورد.
|
|
 
|
|
|
|
علاء الدين يوسف علي محمد
Raja
فيس بوك
تويتر
انستقرام
يوتيوب
بنتيريست