دعواتكم لزميلنا المفكر د.الباقر العفيف بالشفاء العاجل
|
|
 أنا و مايكل جاكسون .. تلك الأيام
|
لا أذكر المناسبة الأولى التي سمعت فيها اسم مايكل جاكسون.
لكنني فجأة كأبناء جيلي في منتصف الثمانينيات وجدت نفسي اتكلم عن مايكل جاكسون و البريك دانسر (الذي كنته اظنه اسم مغني حتى وقت قريب ) و شارلس برونسون (الذي لم نرى له الا نصف فيلم واحد في سينما سينما يوم الجمعة ) و نردد اسمائهم في انبهار و احترافية كأنهم اصدقاء لنا لنثبت ثقافتنا.
|
|
 
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
لكني بالتأكيد اذكر اول مره اشاهد فيها مايكل جاكسون.
كان أحد ايام الاجازة الصيفية في منتصف الثمانينيات و كان يوما قائظا لا يطاق افشل رغبتنا في لعب الكرة او الجلوس على مصطبة بيت ال زلفو لنتحدث عن الكون و الحياة و افلام الكرتون و كل الامور الفلسفية العميقة التي تهم اطفالا في عمرنا.
اقترح احد الاصدقاء ممن حباهم الله بوالد مغترب في السعودية ( و كان ذلك شيئا خرافيا يجعلك في مصاف اولاد الراحات و هي التهمة التي كان كل طفل يحرص على انكارها بشدة حتى لو تبرأ من والديه ) أن نذهب الى منزلهم لننعم بالمروحة و نشاهد الفيديو.
جهاز الفيديو لمن يقرأ هذا الموضوع من ابناء الجيل الجديد هو جهاز اسطوري في حجم حقيبة سفر ضخمة أسود اللون به فتحة مستطيلة تلقمها شرائط الفيديو الضخمة التي هي في حجم صندوق مناديل الورق الذي تضعه على تابلوه سيارتك.
كانت الفكرة مغرية جدا خصوصا ان عرض مشاهدة الفيديو قد يعني ان نستمتع بفيلم اجنبي رائع يقبل فيه البطل البطلة و هو شئ لم نكن نراه في افلام سينما سينما او ربما اكرمنا الحظ فشاهدنا فيلما لبروس لي به نسوة اسيويات مختطفات عاريات النهود.
قبلنا الاقتراح و غزونا منزل الصديق سريعا لنجلس على الارض ( كان من اداب زيارة الاطفال ذلك الزمن ان لا تجلس على السراير حتى لا توسخ الملايات ) و نتحلق حول جهاز التلفزيون.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
بعد مشاورات طويلة مع والدته اخرج صاحبنا من دولاب الهدوم شريطا ضخما و ألقمه فم جهاز الفيديو .
اشرطة الفيديو المنوعة كانت تحتوي على عدة اشياء لا علاقة لها ببعضها في ذلك الزمن.
فتجد اغنية هندية يتقلب البطل و البطلة فيها على النجيلة و هو يغني لها " مرشا مرشا هنجب اشو كاسييي " و هي تجيبه " وي ي ي ي ي ي " و مشاهد من اهداف فان باستن و جزء من محاضرات احمد ديدات و برامج عن الطبيعة تعرض اشياء رقيقة كأصلة ضخمة تلتهم فأر حقل مذعور او اسد يتربص بغزالة ليلا عند بحيرة لا تراهاانت لأن الظلام حالك.
و كان شريط صاحبنا يحوي من كل تلك الاشياء طرفا و ايضا يحوي اغنية لمايكل جاكسون.
و لأننا نعرف بظهر الغيب ان مايكل جاكسون فنان عملاق و رهيب و اسطورة (رغم اننا لم نشاهده من قبل ) فما ان قال قائل "دي اغنية مايكل جاكسون " حتى قلنا " أوو أووو " و اعتدلنا في مجالسنا لنستمتع.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
كانت الاغنية تصور فتاة يخرج عليها فجأة مجموعة من مصاصي الدماء و الزومبي اللطفاء يقودهم مايكل جاكسون.
و يأخذ جاكسون في التلوي كمراهقة مصابة بمغص و يتشنج وجهه قبل ان ينظر الى الشاشة نظرة من طراز " انا الملك مايكل جاكسون و عليك ان تعجب بما افعله و الا فانت احمق ".
في الواقع كنت انا احمقا لأني لم افهم الاغنية طبعا و لم تعجبني الحبكة (ربما لحداثة عهدنا بالفيديو كليب ؟؟؟ )
و اخذت انظر لرفاقي الذين يتصايحون في نشوة " عاين ليو.. عاين ليو عمل عمل كيف " فاعاين ليو كما صاحو لأجده يتلوى ايضا و أفكر ان كوبا من الحلبة المغلية ربما كان مفيدا له.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
طبعا لم استطع ان اصرح برأيي هذا و الا صرت بعدها منبوذا كمجذوم في قرية هندية. و اكتفيت بان اهز رأسي في وقار كلما صاح احد رفاقي " ديناااااااااك " علامة على الاعجاب و الانبهار منقطع النظير.
و اتهمت نفسي بشدة على عجزي و تقصيري ذاك و كفيت خيري شري. و استعضت عن عجزي تذوق مايكل جاكسون بالفيلم الرائع الذي شاهدناه بعد ذلك و هو فيلم "ثري سوبرمن ان طوكيو " .
لكن ملك البوب لم يغب طبعا عن حياتنا فقد انتظرنا في التلفزيون ليخبرنا عن المجاعة.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
حين ضربت المجاعة السودان كان اغرب شئ ان يذيع تلفزيوننا القومي اعلانات نداء السودان التي تشحد من العالم لقمة الخبز و تعرض امرأة يابسة كعود قصب أحسن احدهم مصه و هي تبحث عن القمح او الدخن لا ادري في جحر النمل.
الغريب في هذا الامر هو ان ارسالنا كان محليا لا يمكن مشاهدته ابعد من شمبات شمالا و الصحافة جنوبا فمن هو المخاطب بهذا الاعلان الذي كان يقول بصوت عميق (اظنه صوت الفاتح الصباغ ) " نداااء السوداااااان ". فيشعرك الصوت بالجوع فتهرع لتتأكد هل بقي في كيس العيش الذي احضره والدك قبل صلاة الصبح اي شئ تأكله قبل ان تنطوي على نفسك و تموت بالجوع ؟
و كان من ضمن تلك الحملة الاغنية الشهيرة "نحن العالم ".
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
we are the world
يا الله.
احتاج أن اقول انني لم اسمع هذه الاغنية منذ الثمانينيات الا العام الماضي حين وجدتها على اليويوب و قمت بحفظها في جهازي. و هي فرصة ان اقول ان هذا الشئ المسمى اليوتيوب هو عبارة عن ذكريات جيلنا محفوظة في شبكة الانترنت. و لن اندهش لو بحثت باسمي فوجدتني فيه العب في شوارع حي البوستة او اجلس في حوش بيتنا ذات عصر ارسم مجلتي " مازمات " و أحلم باليوم الذي سأصبح فيه نجيب محفوظ.
اما عن الاغنية فاني لم اسمعها اكثر من مرة واحدة فقد اجرت مدامعي من الحنين الى تلك الايام.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
الاغنية يؤديها مجموعة من الخواجات كأنهم في مظاهرة و كانت تبدوا كما لو كانت بروفة لأننا لم نعتد على اداء الاوبريت هذا الذي يسجلونه داخل الاستديو و يحملون فيه الاوراق.
و كنت انا مصرا زمانا طويلا ان ما نشاهده هو بروفه لأنهم يغنون حاملين الاوراق و ان هذا مجرد اعلان عن الاغنية التي بلا شك ستكون حدثا فريدا.
طبعا اثبت لي الزمن ان هذا كلام فارغ.
لم نكن نفهم من الاغنية الا مطلعها
we are the world we are the children
ثم نركب على ما بقي ما نشاء من كلمات.
و استطيع اليوم ان اذيع سرا ان اغلب من اعرفهم كانوا معجبين بهذه الاغنية لأجل الاخت التي صبغت شعرها بالاصفر و الاحمر فبدت كقطة منفوشة الفرو وقعت في دلو طلاء.
و هي تغني بتشنج و روشنة و تشنك انفها حتى يكاد يبلغ شعرها.
و كنا نعجب بحضورها و انوثتها و دخولها المباغت في الاغنية ناهيك عن صيحتها فجأة " ياي ياي يااااي ".
هذه الشعنونة كانت ملهمة خيالات غريبة في اطفال هم على عتبة المراهقة و أجمل فتاة رأوها هي ابنة الجيران النحيفة المصابة بالبرجم.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
و كنا نضحك بشدة على الاخ ذي الصوت المتحشرج المخنوق الذي يجعلك تظن انه تناول قنفذا قبل ان يدخل الاستديو. و قد كنت اظن لفترة انه لابد ان يكون قريب المخرج حتى يسمح له بالغناء في هذه المجموعة.
و الغريب اني لا اذكر شيئا عن الاخ الذي يبدو جواره في الصورة بنظارته التي تشبه نظارات قادة الطائرات في الحرب العالمية الاولى. لكني حين اعدت استماع الاغنية وجدت انه شخص لا يمكن تجاوزه بحال. فاهتزازاته هذه لا يمكن تجاوزها.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
اذن اين هو مايكل جاكسون في هذه الاغنية ؟
الحقيقة اننا لم نحب جاكسون هنا كثيرا رغم ان اسمه كان هو الوحيد الذي نعرفه. فمقارنه بتشنج البقية و اخلاصهم الواضح في الغناء ناهيك عن دموع احدى المغنيات ( التي اتضح انها تيا تيرنر بعد ذلك ) فان مايكل جاكسون يظهر متكلفا مصنوعا بوقفته و قفازة المصنوع من الدانتيلا المزينة بسكسك لامع .
و لم تفد هذه الاغنية مايكل جاكسون عندنا الا انه يرتدي الثياب الضيقة دائما لا فقط عندما يمثل دور مصاص دماء.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
ملابس جاكسون الضيقة كان لها دورا مهما في حسم قضية حيوية في اواخر الثمانينيات.
ففجأة و من حيث لا ندري ظهرت شأئعات تقول ان مايكل جاكسون تخلص مما يجعلك تخاطبه بصفة "هو" و يجعله سيان مع "هي" و أنه قام في عملية جراحية دقيقة ببتر اعز ما يملك. و كان لوقع الخبر صدمة عظيمة علينا حتى اننا حين كنا نسمعه كنا نتلمس اجسادنا خفية لنتأكد اننا مازلنا كما نحن و لم نفقد فجأة ما يجعلنا فخورين بانفسنا كرجال.
و لك ان تتخيل كم كرهنا جاكسون حينها.
فعلى حين لم تكن قضية تغيير اللون التي بدأ فيها مهمة بالنسبة لنا كثيرا الا ان تغيير النوع كان امرا لا يمكن السكوت عليه.
و قد كنت مشككا في هذا الامر لا عن حسن نية لكن لظني ان التخلص من شئ كهذا تكون نتيجته الموت.
الا ان احد الاصدقاء القادمين من الاغتراب و من قطر تحديدا اكد لنا في لهجة قاطعة " لمن كان في الدوحة مايكل جاكسون عمل العملية دي". و عبارة "لمن كنا في الدوحة" طبعا عبارة مفحمة للرجرجه من امثالي الذين لم يذهبوا للدوحة فلم يكن يمكننا ان نجادل.
و أكد لنا صاحبنا القادم من الدوحة العالم ببواطن الاموران جاكسون برر فعلته هذه بان "المقطوع " يضايقه اثناء الغناء.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
صدقنا و سلمنا ان مايكل جاكسون " الله يخيبو " كما كنا نقول اصبح مجبوبا اعتمادا على رواية المغترب ود الراحات القادم من الدوحة.
لكن احد اصحابنا خلص جاكسون من هذه الورطة ليوقع نفسه في ورطة اكبر.
فقد اتانا الصديق " س. ي " حياه الغمام اينما كان اليوم ليؤكد ان مايكل جاكسون لم يفعل فعلته تلك. و أكد انه رأى انبعاجا تحت ملابس مايكل جاكسون الضيقة يؤكد براءته من التهمة.
حسنا.. دون الدخول في تفاصيل كثيرة فقد صدقنا هذا الصديق ({بما لأنه كان محبوبا في الحي أكثر من ذلك القادم من قطر لاسباب طبقية) لكننا لم نسأله قط (ربما لحبنا اياه ) ما الذي دعاه للتأمل و التأكد بهذه الدقة ؟
هذه كانت نعمة ملابس جاكسون الضيقة على سمعته في بلاد السودان.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
بعدها لم نسمع عن مايكل جاكسون الا في اشاعات متفرقة اغلبها يأتي من الخليج كانه غنى في حفل و ذهب اليه بعض المعجبين العرب ليحيوه فقال لو كنت اعرف ان عربا يستمعون لي لما غنيت.
و كل من يروي هذه القصة يؤكد ان خاله او والد صديقه او زوج عمته كان احد ابطالها.
و جاءت الاشاعة الاخرى لتقول انه احد اكبر المساهمين في الكوكاكولا و هي الشركة التي تتبرع سنويا لاسرائيل ب150 مليون دولار. و قيل انه يلبس سلسلا عليه نجمة داود.
هذه الشائعات كانت تجبرنا على تذكر خبر المقطوع و نقول لعله.
ثم نقلب شفاهنا في ازدراء.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
غاب مايكل عن اهتمامي زمانا طويلا حتى لقيته صدفة و انا ابحث خلف اسطورة الفيس بريسلي الذي يصر الامريكان انه حي و سيعود للظهور من جديد يوما ما.
فقد عثرت اثناء بحثي ان للاخ الفيس ابنة و ان هذه الابنة (تصور !!) تزوجها مايكل جاكسون.
و قد افادتني مجلة الحوادث اللبنانية مصدرا طيبا للشائعات عن مايكل جاكسون في هذا الامر و كيف انه كان ينام في غرفة منفصلة و ان زوجته الاخت ليز بريسلي تخرج عارية من غرفتها لتطرق بابه و تبكي صارخة افتح ايها الجبان العاجز.
قيل ان هذه مذكرات الطباخ الخاص لجاكسون. و انا احسد هذا الطباخ على ما شاهد و سمع.
ثم جاءت فضيحة التحرش الجنسي بالاطفال كقنبلة ضخمة تتفجر في سمعة جاكسون و معرفتنا به.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
و ..
مات مايكل جاكسون ..
لا ازعم ان ذلك المني على المستوى الشخصي. فانا لم اتابع فنه يوما و كرهت تنكره للون الاسود و تحوله الى اللون الابيض الشمعي كتماثيل مدام روسو.
لكن المني ان جزء من عالمي يموت.
الاسماء و الاماكن التي ضمخت طفولتنا.
بخيرها و شرها.
جيلنا كان يضرب المثل في اجادة الرقص بترافولتا و جاكسون.
و اليوم مات جاكسون.
يموت معالم طفولتنا من الاشخاص.
تتغير الشوارع التي مشينا فيها.
الميادين التي لعبنا بها تصبح عمارات.
الفتيات اللائي احببناهن و تمنينا ان نكبر لنتزوجهن يكبرن و تتغضن جلودهن و يصبحن شمطاوات يفقدن كل رونق سحر.
موت جاكسون موت جزء من طفولتي.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
الى طفولتنا التي ماتت مع جاكسون ( عفوا جاكسون تنحى قليلا انا لا اقصدك بهذا الحزن و الحنين فلا تحشر نفسك ) .. ابكيك مع صلاح جاهين
الشوارع حواديت
حواديه الحب فيها
وحودايه...عفاريت
اسمعي يا حلوة لما اضحكك
الشارع دا كنا ساكنين فيه زمان
كل يوم يضيق زيادة عن ما كان
اصبح الآن بعد ما كبرنا عليه
زي بطن الأم مالناش فيه مكان
الشارع دا رحنا فيه المدرسة
اللي باقي منه باقي
واللي مش باقي...اتنسى
كنسوه الكناسين بالمكنسة
ييجي دور لحظة أسى
أنا برضه كمان نسيت
الشارع دا أوله بساتين
وآخره حيطة سد
ليا فيه قصة غرام ماحكيتش عنها لأي حد
من طرف واحد...وكنت سعيد أوي
بس حراس الشوارع حطوا للحدودته حد
الشارع دا شفتك إنتي ماشية فيه
لابسة جيب...وبلوزة وردي
وعاملة ديل حصان وجيه
اتجاهك اتجاهي...مشينا ليه
والشارع دا زحام وتيه
بس لازم نستميت
والشوارع حواديت
حودايه الحب فيها
وحودايه...عفاريت
واضحكي يا حلوة لما اسمّعك
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: omer osman)
|
حمور يالذيذ
اغنية نحن العالم اخدت حيزا كبيرا في قلوبنا
كنت بعرف منهم مايكل جاكسون ولايونيل ريتشي واستيف ووندر وهو الذي يلبس نظارات خلف صورتك الذكرتها
اجمل حاجة كنا بنغني اغاني لي مايكل جاكسون بس بي كلماتنا الخاصة
زي
كده كده فنتاستك كونك تمشي وتجي بي رداء
فقدت اغاني البوب عمودها الاساسي
تحياتي
زاتوووو
| |
|
|
|
|
|
|
|
|
 Re: أنا و مايكل جاكسون .. تلك الأيام (Re: حمور زيادة)
|
Quote: كانت الاغنية تصور فتاة يخرج عليها فجأة مجموعة من مصاصي الدماء و الزومبي اللطفاء يقودهم مايكل جاكسون.
و يأخذ جاكسون في التلوي كمراهقة مصابة بمغص و يتشنج وجهه قبل ان ينظر الى الشاشة نظرة من طراز " انا الملك مايكل جاكسون و عليك ان تعجب بما افعله و الا فانت احمق ".
في الواقع كنت انا احمقا لأني لم افهم الاغنية طبعا و لم تعجبني الحبكة (ربما لحداثة عهدنا بالفيديو كليب ؟؟؟ )
و اخذت انظر لرفاقي الذين يتصايحون في نشوة " عاين ليو.. عاين ليو عمل عمل كيف " فاعاين ليو كما صاحو لأجده يتلوى ايضا و أفكر ان كوبا من الحلبة المغلية ربما كان مفيدا له. |
والله مافي ملك غيرك......
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
الزول زاتوووو
Quote: كنت بعرف منهم مايكل جاكسون ولايونيل ريتشي واستيف ووندر وهو الذي يلبس نظارات خلف صورتك الذكرتها
اجمل حاجة كنا بنغني اغاني لي مايكل جاكسون بس بي كلماتنا الخاصة
زي
كده كده فنتاستك كونك تمشي وتجي بي رداء
|
استيف ووندر ده سمعت بيو لكن ما كنت قايل روحي شفتو .. ده بالله ابو نضاره ده ؟
اما الحاجه الاسمها لايونيل ريتشي فوالله شكلو كده اسم مطعم ما اسم زول.
ياخ و الله انتو مثقفين خلاص .
كونك تجي ردا دي اغنية مايكل جاكسون الماسكاهو فيها الفريحانه ديك. و انا ليوم الليلة مصمم و مصر انو الاغنية بتقول كونك تجي بردا و مافي زول بيقدر يقنعني بغير كده حتى لو قام جاكسون تاني عشان يغالطني.
يا عمك الشي ده سمع اضانا يغالطونا فيو ؟
ده زي "سايقا ماشي وين ؟ ماشي الحفلة دي. مالكم ما بتجونا ؟ عشان ركبتو دش ؟" دي كانت اغنية منوعات العاشرة.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
Quote: فعلى حين لم تكن قضية تغيير اللون التي بدأ فيها مهمة بالنسبة لنا كثيرا الا ان تغيير النوع كان امرا لا يمكن السكوت عليه.
و قد كنت مشككا في هذا الامر لا عن حسن نية لكن لظني ان التخلص من شئ كهذا تكون نتيجته الموت.
الا ان احد الاصدقاء القادمين من الاغتراب و من قطر تحديدا اكد لنا في لهجة قاطعة " لمن كان في الدوحة مايكل جاكسون عمل العملية دي". و عبارة "لمن كنا في الدوحة" طبعا عبارة مفحمة للرجرجه من امثالي الذين لم يذهبوا للدوحة فلم يكن يمكننا ان نجادل.
و أكد لنا صاحبنا القادم من الدوحة العالم ببواطن الاموران جاكسون برر فعلته هذه بان "المقطوع " يضايقه اثناء الغناء. |
السهل الممتنع
عليك الله يا حمور ما تعلمني اكتب زيك
معجب
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
( يا أيها الإنسان إنك كادح إلى ربك كدحا فملاقيه )...
أخي حمور, نحن نسير في طريق إتجاه وآحد. لانستطيع أن
نرجع ثانية واحدة للخلف, لكن الله سبحانه وتعالى أنعم
علينا بنعمة إجترار الذكريات, التي نجد فيها قمة المتعة
عندما يخطها لنا إنسان تتداعى عليه العبارات الجميلة
من كل صوب وحدب وتكون طوع بنانه. الاشياء التي لاتعني
لنا شئ في حياتناعندما تمضي ونذكرها أو يحدث ما يذكرنا
بها لا تأتي لوحدها إنما تكون مصحوبة بأشياء تجعل الذكرى
جميلة وشيقة. مثلا, عندما أذكر (الكوشة) في حلتنا تذهب
بي الذكريات إلي ما حولها فاجد نفسي قد طرحتها بعيدا
وسرحت مع أجمل ذكريات مراتع طفولتي ورفاق صباي.
لم أقصد التقليل من شأن الرجل, إنما قصدت تقريب فكرتي
للأذهان...
نداولها بين الناس...
أنت أخي حمور رائع وكفى...
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
Quote: هد بشير ..
و الله ليك وحشة ..
الله ما قسم لينا الشوفه و تلفونك ما رديتي عليو.
شكرا لطلتك الرائعة يا رائعة. |
ياحمور ياخى رسلت ليك تلاتة مراسيل
عشان بس الاقيك لكن الله ماهون
اها فى الطريق اليكم بعد اسبوع
ماضرورى ترد
واصل
واحكينا
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: Shams eldin Alsanosi)
|
| Quote: المني ان جزء من عالمي يموت |
انت بالضبط يا حمور وريتني مشكلتي شنو، كنت حاسه بحزن عميق امس من اول ما سمعته الخبر، والليله الصباح جاني الاحساس بتاع "الامس ده حلم ولا حقيقه"... انا بتذكر اول مره اشتريت شريط كاسيت، كان عمري 14، وكان شريط مايكل جاكسون History وكنا وقتها راجعين من الامارات للسودان نهائي... وبدأت بالشريط ده رحلة تمرّد لمدة عام في السودان.. اعادت صياغة شخصيتي على انغام black and white وBelli Jane وAnny are you ok.. مازن اخوي مستهبل كبير,, وعلى سيرة Anny، كان قبل فترة بتناقش مع واحده صاحبه حول انه الاغاني زمان كانت اجمل وموسيقتها اجود.. قال ليه والحديث لمازن، احنا لحدي حسي ما عارفين Anny كويسه ولا لأ.. لكن متذكرين الاغنية....
شكرا على السرد الجميل
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
| Quote: انا بتذكر اول مره اشتريت شريط كاسيت، كان عمري 14، وكان شريط مايكل جاكسون History وكنا وقتها راجعين من الامارات للسودان نهائي |
مريم بت الراحااااااااااااااااااات
ووووووووووووووووو
طبعا يا مريم لو كنتي قلتي كلامك ده قبل كم و عشرين سنة فمافي رد عليو غير :
أحي انا يا ناس الامارات يا اولاد العز ( ما عارف هل برضو بيقولو بنات العز ؟ )
ناس راحات تاكلو مربى بالزبدة. (باعتبار المربى بالزبدة ارقى ما يمكن أن يؤكل في طبقة البرجوازيين و المرطبين )
من حظك انو ما اتلاقينا زمان لما الحقد الطبقي ده على اصولو. هسه في الزيف الطبقي و كلنا عاوزين نعمل فيها مدلعين و كنا بنفطر كريم نيفيا.
موت معالم الطفولة شئ مؤسف.
لا اذكر من هو الذي قال كلما مات احد اعلام طفولتي احسست بجزء مني يموت. ربما اكون انا من قالها في ساعة تجلي او قرأتها في مكان ما.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
معاوية المدير ..
شكرا اخي و انت تقدح نواقيس اخرى من ذكرياتنا.
الكوشة و ماعون الوسخ في طرف الحلة الضخم الذي تجمع الحلة فيه اوساخها.
اشياء في وقتها كانت تبدو قبيحة عصية.
لكن حين يطوقها عطر الذكرى تصبح لها رائحة جميلة.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
حمور...
الموهبة يا حمور متعبة شديد
مايكل...مارادونا... صلاح جاهين.. محمود عبد العزيز وغيرهم كثر
الموهبة اتعبتهم بشكل غير عادي
مايكل جعل للرقص في موسيقى البوب معنى آخر
خلق فنا قائما بذاته
موهبته الفذة جعلت من اغانيه وهجا لا تخطئه العين
ثقل الموهبة جعله يأتي بتصرفات غريبة
الموهبة حين تكون كبيرة تثقل على صاحبها وتضغط عليه
لذا معظم الموهبين غالبا ما تكون حياتهم قصيرة (لست قاعدة ولكنه ملاحظة)
الفيس بروسلي عانى من نفس الشي وانتهى نهاية مأساوية
مارادونا خلق الفرجة والمتعة في الميادين لكن ثقل الموهبة دفعه لاتجاه آخر
رحلة صلاح جاهين الاخيرة الى لندن كانت اقرب الى الانتحار
سعاد حسني قادتها الموهبة الى المأساة
مايكل كان موهوبا حد التخمة يا حمور
هذه الموهبة حطمته داخليا تقريبا
الموهبة والشهرة متعبتان حد الضجر
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
Quote: لا أذكر المناسبة الأولى التي سمعت فيها اسم مايكل جاكسون.
لكنني فجأة كأبناء جيلي في منتصف الثمانينيات وجدت نفسي اتكلم عن مايكل جاكسون و البريك دانسر (الذي كنته اظنه اسم مغني حتى وقت قريب ) و شارلس برونسون (الذي لم نرى له الا نصف فيلم واحد في سينما سينما يوم الجمعة ) و نردد اسمائهم في انبهار و احترافية كأنهم اصدقاء لنا لنثبت ثقافتنا.
|
يا سلام عليك يا حمور على هذا التداعي
وما تنسى الموسيقى - وقيل الموسيقا - الخاصة ببرنامج "سينما سينما". هذا اللحن البديع الذي زيّن مقدمة البرنامج، كان محفوظاً عند كثيرين من أبناء تلك الفترة.
و"مسلسل كوكي" يا حمور، و"الليث الأبيض" في عرضه الأول في النصف الثاني من الثمانينيات، وقلت "عرضه الأول" لأنه جرى بثه للمرة الثانية مطالع التسعينيات على ما يبدو.
Quote: و استطيع اليوم ان اذيع سرا ان اغلب من اعرفهم كانوا معجبين بهذه الاغنية لأجل الاخت التي صبغت شعرها بالاصفر والاحمر فبدت كقطة منفوشة الفرو وقعت في دلو طلاء.
و هي تغني بتشنج و روشنة و تشنك انفها حتى يكاد يبلغ شعرها.
و كنا نعجب بحضورها و انوثتها و دخولها المباغت في الاغنية ناهيك عن صيحتها فجأة " ياي ياي يااااي ".
هذه الشعنونة كانت ملهمة خيالات غريبة في اطفال هم على عتبة المراهقة و أجمل فتاة رأوها هي ابنة الجيران النحيفة المصابة بالبرجم.
|
العبد الفقير كان من المعجبين بالأغنية والمؤديِّة ذات الشعر المنكوش.. والتوصيف في عبارتك: (هذه الشعنونة كانت ملهمة خيالات غريبة في أطفال هم على عتبة المراهقة وأجمل فتاة رآها هي ابنة الجيران النحيفة المصابة بالبرجم) مع واقعيته، إلا أنه مفعم بالجمال والدقة. "البرجم"، وفي رواية "البُرجُب" – كما يقول أهل شمال كردفان، وزمان "البرجم/ البرجب" لعله انقضى، حتى الأمراض يا حمور لها أزمان!! والآن يقولون لك "زمن العولمة" و"زمن أورهان باموق"، وهي إشارة لمقالة سديدة للقاص نبيل غالي يتحدث فيها عن الروائي التركي "أورهان باموق" متأسفاً فيها على واقع مأزوم يهتم بالمسلسلات التركية وأبطالها وبطلاتها، دون أن تكون هناك أدنى التفاتة لما خطه بنان "أورهان".
على أيام Sudan Call (نداء السودان) كان التلفزيون يعرض أغنية للمغني الأمريكي الشهير يومذاك (صاحب الشعر المفلفل) اسمو شنو كدا.... (ريتشي) تصب في ذات شأن (المجاعة)، وهو ذات المغني الذي يعرض له التلفزيون (إعلان البيبسي) وكنا نسميها (دعاية البيبسي).. ولم تكن هناك فواصل كثيرة للإعلانات أثناء عرض المسلسل اليومي. يا حمور تجدني أكتب من ذاكرة ذات ثقوب، فلا تثريب إن فلتت منا أشياء أو اختلطت.
مودتي
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
سلام يا خالد ..
ياخي في حلقة في كوكي العجيب بيتكسر فيها حته حته قبل ما البروفيسور يعمل ليو جسم تاني.
ياخ الحلقة دي نحن بكينا فيها عدييييل.
و حسينا انو كوكي بعد التعديل ما بقى زي اول. و كنا زعلانين شديد.
الله يرحم الزمن داك.
البرجم موجود لسه لكن الغريبة بقى يمسك الناس الكبار .. تفتكر ده بيدل على حاجه معينة ؟
بالله ريتشي ده ياهو بتاع دعاية البيبسي ؟ و انا اقول شكلو مألوف ليه.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
حامد يا دفعة المرحوم ..
من الصعب الخروج على الشعور العام.
و اشعاع الجماهير له تأثيره ناهيك عن جلال موت المشهور.
يوم فوز اوباما لما شفت اوبرا و جيسي جاكسون بيبكوا (رغم انهم ما بيعنو لي شي كتير ) لكن باعتبارم شخصيات عالمية مشهورة و متأثرين و الناس حوالينم بتهتف و عاوزين يجنو حسيت انو يا سلااااام في شي عظيم حاصل و لقيت ليك روحي فرحان و متأثر.
يوم وفاة نميري لم استطع ان انسى اي جبار كان مات كأي نجار كان يعتبر ان بثينة لا تقارن بزوجته فتأثرت.
اول شعور لموت جاكسون كان يا الله ركن ( حتى لو كان متهالكا منزويا ) من طفولتي مات.
ثم تداعت الذكريات التي بين يديك.
| |
|
|
|
|
|
|
|
|
 Re: أنا و مايكل جاكسون .. تلك الأيام (Re: حمور زيادة)
|
Quote: لكن يا راوية انا ما حضرت زمن عبود.
و لا الكبار حكو لي زي ما حكو ليك.
ده شنو ؟ |
عبود ياشين
أسكت أنا صاراها ليك من ألبارح
وكدي خليني أطلع من الحوزون ومن الموضوع شوية .....
ودا كلووو عشان بقيت فجأة زبون دائم في الاستيتس بتاعة كيكي وذلك بعد أن طرأ عليها ماطرأ
من متيييين بتضهب في إستيتس كيكي إنت؟؟
________________
نشيل حالك أكتر من كدا ولا تعترف وتعلن توبة
| |
|
|
|
|
|
|
|
|
 Re: أنا و مايكل جاكسون .. تلك الأيام (Re: Rawia)
|
يا رورو (ركزي مع رورو دي ) انا ما قلت ليك حضرتي زمن عبود ..
انا قلت ليك حكو ليك بزمن عبود.
ثم استيتس كيكي مالا ؟
لو قصدك عشان اب قرشين فانا و ابو الحسين و كيكي كنا عاملين قعده برانا و مدورين و جانا وهبة فجأة اشرقت الانوار و أهلت البركات و رقصت الكبابي و زعردت الصواني و دخل اب قرشين.
فالضهب سابق الوجود و ما الوجود بسابق الضهب.
لكن ده ما يمنع التوبة طبعا.
انت تؤمر يا ابو الرا.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: الصادق اسماعيل)
|
| Quote: والله يا نادية جننتي كتاب العلوم جن :) |
تعرف يا عمر ..
مره في ذات شلاقة بدون ذكر اسباب كنا بنتغالط في عمر اختين ..
واحد صاحبنا مصمم انو فلانه هي الاصغر.
قلنا ليو ياخ شكلها كبير.
قال" هي الصغيرة لكن مولودة كبيرة."
اتناشر سنة و انا بفكر في الكلام ده ما قادر افهمو
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
يا الصادق ..
ذكرياتي الجميلة تشكيك لله.
ليه ياخ ؟
حرام عليك.
اسمع شنو ؟ اول حاجه انا ما استاذ الموصلي عشان افتيك.
انا اهتميت بانو يا سلاااام حاشوف الشعنونة.
و ياريتني ما شفت.
بالله دي حالة دي ؟
الزمن جار عليها قدر ده ؟
الكم و عشرين سنة الفاتو ديل مروا عليها كمرور شاحنات على طريق جديد لم يجف الاسفلت على سطحه بعد.
ياخ ما ممكن.
هسه الزوله دي نفسها دي
وين الشعر المنكوش زي الكديس الواقع في الموية و مرق يتنفض ؟
وين الحيوية ؟
عاينا مضبلنه كيف زي الليمونه الليها شهر ما سقوها.
اييييييييييييه .. يا حليل زمان.
اجرمت في حق الذكريات يا الصادق.
| |
|
|
|
|
|
|
|
|
 Re: أنا و مايكل جاكسون .. تلك الأيام (Re: حمور زيادة)
|
Quote: قلنا ليو ياخ شكلها كبير.
قال" هي الصغيرة لكن مولودة كبيرة."
اتناشر سنة و انا بفكر في الكلام ده ما قادر افهمو |
حمور البكاي في الشعنونة
روي أن جدنا العباس بقية آباء رسول الله صلى الله عليه وآله وسلم سئل يوماً: من أكبر أنت أم النبي؟ فقال هو أكبر لكنني ولدت قبله :)
قريبة من حقت زولك الحيرك :)
بأبي وأمي سبعة أحببتهم/ لله لا لعطية أعطاها/بأبي النبي محمد ووصيه/ والطيبان وبنته وأبناها
*الطيبان: الحمزة والعباس صلوات الله عليهما.
بالمناسبة ياحمور قريت في مكان ما أن مايكل جاكسون أصيب بمرض البهاق وتشوه جلده فقام بإجراء عملية لإزالة ماتبقى من بقع سمراء ، يعني الحكاية ماتغيير لون ، هذا والله أعلم :)
.
.
| |
|
|
|
|
|
|
|
|
 Re: أنا و مايكل جاكسون .. تلك الأيام (Re: Salahaldeen Nadir)
|
Quote: بس معقول ياحمور ما بتعرف Cyndi Laauper بالغت ياخ
Good enough
الغنية دي من فيلم بعنوان the gonnies
اما الأخ أجش الصوت Bruce Springsteen فالمفروض إنو غني عن التعريف, لكنك جهلتو عاااااادي زيو زيو Stevie Wonder |
سبقتنى يا صلاح الدين نادر،،
حمور دة (أستفزانى) شديد خلاص،،
بالمناسبة يا حمور،
بروس سبرينغستين دة بكون المخرج هو القريبو،
عشان كدة جا يخرج العمل،،
و ستيفى وندر دة ضيعت نصف عمرك لو ما سمعت ليهو (لوحدو)،،
دة طبعا لو كنت من متذوقى الأغانى الأجنبية،،
و أفتكر هو من مؤلفين العمل و اللحن،،،
يعنى اقلاهم سيندى لوبر،،،،
______________________________
كنت دايرة أخت وش بيدردق،
لكن ما قادرة عشان زعلانة على الواد (الأسطورة) مايكل،،،،
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: Salahaldeen Nadir)
|
حبيبنا حمور
والله نفسي اكتب ليك رد ساخر أشاغلك بيهو (فنحن أولاد دفعة واحدة تقريباً وكل ما ورد في مقالتك عشناه تقريباً) لكن للاسف حاتضامن مع صديقي حامد محمد حامد وأقول..
الشعور المتناقض المتقلب هو يا عزيزي هو ما أحسست به عندما أستيقظت صباح الجمعة المبارك على نبأ رحيل مايكل جاكسون من أذاعتي التي ظللت مخلصاً لها صباحاً..راديو البي بي سي الذي أبكاني مرتين في الصباح لأسباب غامضة ربما لطريقة تقديم الأخبار الفريدة عند بعض عمالقته ومصادفتها لتلك الثواني الوحيدة التي تصبح فيها روحك شفافة و"حنينة"..لا أدري لماذا فكلتا الخبرين لما يكونا مؤثرين حقيقة نسبة لمقاييس الفظائع التي تخرج علينا من المحطات الأخبارية والتي "نقرمشها" مع الشاي..ولا أبالغ إن قلت أنهما في الأحوال العادية لا يمكن أن تفيض لهما عيناي..مرة عندما سقطت طائرة الخطوط السودانية في مدينة بورتسودان فكان أول ما سمعته مع الصباح هو صوت المذيع "محمد صالح الصيت" وهو يقول "صباح الخير..استيقظت الخرطوم اليوم على نبأ مفجع......" لا أدري ولكني أحسست أن أهلي كلهم كانوا في تلك الطائرة..والمرة الثانية في البي بي سي أيضاً هو نبأ وفاة رجل لا تربطني به أي علاقة ولا أعرفه حتى وهو الشهيد "عبدالعزيز الرنتيسي" القيادي في حماس الفلسطينية الذي خطر في بالي لسبب غامض وظللت حينها أتذكر الحديث الوحيد لهذا الرجل الذي لا تربطني به أدنى علاقة في محطة الإم بي سي قبل اسبوع من اغتياله وهو يتكلم عن الاستشهاد..فافجأ في ذلك اليوم بخبر اغتياله عن طريق طائرة اسرائيلية في غزة..والى الآن لم أستطع أن أفك لغز دموعي تلك.
المهم شعور غريب متناقض (لم تصل لمرحلة البكاء إن كنت تريد أن تشمت فيني) عندما سمعت نبأ وفاة الرجل وقد ظللت طيلة سنوات أسخر من هذا المسخ وأنكر أني كنت من معجبيه ولكن يبدو أن كل هذه السنوات قد محيت واستعدت مراهقتي بسرعة شديدة وتحديداً الأعوام من 92 عندما كنت أحمقاً يولي قضية الموسيقى الجزء الأكبر من اهتماماتي..فكنت "راستا" مخلصاً للأخ العزيز بوب مارلي ذلك الثائر المجنون وشيطانه الذي يؤلف له دقة الريقي المجنونة ، ثم مايكل جاكسون..ومايكل عبقري التأليف الموسيقي بعيداً عن عروضه المبهرة في الرقصات وفن الترفيه البصري فكانت الأغاني والموسيقى والايقاعات مجنونة ثائرة لها وقع غريب ووممتع ، وكانت عندي كل تسجيلاته وحفلاته (حتى جلسات العود :) ) وقد شهدت أنا شخصياً اطلاق شريط "دينجروز" وشريط "هيستوري" ، وبعدها نظفت أذني قليلاً وصرت أسمع لـ "ويتني هيوستن" و"بيبي فيس" ثم الفريق الخرافي "بويز تو مين" وتشكيلة من أغاني رونان كيتون مع بويزون وغيرها من الموسيقى السهلة والجيدة..
كبرنا وسمعنا نبأ وفاة مايكل جاكسون وانهالت سيول وفيضانات من الذكريات أبطالها أشخاص من الحي ورفاق قديمين لولا الخبر لما تذكرتهم ، كبرنا وسمعنا نبأ وفاة مايكل وصارت أغاني مايكل تاريخاً سحيقاً وقد صرت عجوزاً يتلذذ ببرنامج قلم رصاص لحمدي قنديل والعاشرة مساء لمنى الشاذلي ونشرة البي بي سي وقناة إقرأ وبرامج إذاعة الفرقان السودانية،
فتسللت على حين غرة من زوجتي الحبيبة وفتحت التلفاز في الواحدة صباح من يوم أمس وأخذت أشاهد قناة الام تي في وهي تعرض كل كليبات مايكل وأردد مع الرجل وأتقافز وأتلفت ًلكي لا أقبض متلبساً بهذه النزوة.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: العوض المسلمي)
|
الحبيب حمور
البركة فينا آآآآآخوى
والله كيف وجعنى..
..
..
..
الحاجة العجيبة وبينما أقلب فى القنوات ليلة الجمعة جبت ليك CNN
وشفلت ليك الجماعة ململمين خارج المستشفى..وخبر وفاته حتى تلك اللحظة لم يؤكد..وديك ياتعليقةللصباح مانمتا..الجماعة يشخروا وأنا أجعر..
سألت نفسى..أنا الحاصل على ده من شنو..!! يا أنا ماطبيعى !! يا الناس الحوالينى ديل ماطبيعيين..وخاصة بعد وفاته..ما تتخييل يا حمور..كمية الأسى والحزن التى أصابتنى..
هذا الشخص كان متفرد..ويكفيه التفرد..إضافة لإنسانيته وحبه الخير للآخرين..
رحمه الله رحمة واسعة وألهمنا وذويه الصبر وحسن العزاء..!!
..
..
مافى واحد ينط يعمل لى فيها فكى.......الزول ده ثبت بما لايدع مجال للشك إعتناقه ا لإسلام قبل عام من وفاته والعندو شك يمشى يفتش ليهو مخرج..ونحنا ترانا فى SAVE SIDE
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
Quote: بس معقول ياحمور ما بتعرف Cyndi Laauper بالغت ياخ
Good enough
الغنية دي من فيلم بعنوان the gonnies
اما الأخ أجش الصوت Bruce Springsteen فالمفروض إنو غني عن التعريف, لكنك جهلتو عاااااادي زيو زيو Stevie Wonder
وكلهم عمالقة من زمن كان الناس بتغني وترقص وهي لابسه هدومها |
تعرف يا صلاح
ود خالتي فوجئ بكتاب الحب في زمن الكوليرا في مكتبتي.
قال لي يعني ده كتاب فعلا ؟ انا قايلو حاجه حقت عادل امام في فيلم السفارة في العمارة ساي.
قلت ليو عمرك ما سمعت بماركيز ؟ فعاين لي بنظرة بتاعة كمبيوتر الهارديسك بتاعو ضارب.
هسه اعتقد اني بعاين ليك بنفس النظرة و بقول في سري :
يعني بالله الناس ديل مهمين و مشهورين ؟
يا عمك نحن بنسمع حميره بس.
بتعرف حميره ؟
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
عاين هالة كمان تقول استفزاني.
يا هالة انا اضمن ليك انو البلد دي ام تعدادا 38 مليون فيها ما لا يقل عن 25 مليون ما سمعوا بالناس دي.
يا زولة استغفري.
قال كان بيرسلو ليهم الشرايط قال.
زمان الناس بترسل لبن البدرة و المعجون من بره.
و مرات مرات بيرسلو صور عشان يغيظوا ناس السودان.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
| Quote: أنا و مايكل جاكسون .. تلك الأيام |
عنوان البوست يعطى إنطباع بصداقة وحميمية بين صاحب البوست وملك البوب مايكل جاكسون..
ورفع الكلفة والألقاب
يعنى العنوان لو جاء هكذا (مايكل جاكسون..تلك الأيام) (بحذف الأنا ) لكان عنوان البوست مستساغا..
.أو (مايكل جاكسون وأنا) بتقديم ملك البوب أولا فى الخطاب.....
| Quote: لكني بالتأكيد اذكر اول مره اشاهد فيها مايكل جاكسون. |
هىء هىء هىء
غايتو لو البورد دة بيقروهوا غير السودانيين ..الضحك شرطنا..
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: محمد عبد الماجد الصايم)
|
دكتور امبده ..
Quote: عنوان البوست يعطى إنطباع بصداقة وحميمية بين صاحب البوست وملك البوب مايكل جاكسون..
ورفع الكلفة والألقاب |
و هو المطلوب من العنوان.
انا قربت اسميو " انا و مايكي " من شدة ما شايف الناس بتتعامل معاو بعتبارو ولدنا البيقضي غرضنا ما باعتبارو ملك البوب اللي هو على ما كنت اعتقد نوع من الموسيقى ما عندنا علاقة بيها لكن بنسمعا كنوع من الاطلاع على ثقافة الاخر لكن ظهر لي انو البوب ده حقنا و مننا و فينا و شكلو من تراثيات سنار و مملكة الفونج.
Quote: يعنى العنوان لو جاء هكذا (مايكل جاكسون..تلك الأيام) (بحذف الأنا ) لكان عنوان البوست مستساغا..
.أو (مايكل جاكسون وأنا) بتقديم ملك البوب أولا فى الخطاب..... |
لو كان العنوان مايكل جاكسون بحذف الانا لما اصبح ملائما للموضوع لأن الموضوع عن معرفتي " أنا " بمايكل جاكسون و لاصبح مختلا.
و لا اعرف ما هو غير المستساغ في هذا العنوان بحساب انه معبر عن الموضوع المكتوب.
اما تقديم مايكل على الانا فهو يعني الموافقه على وجود انا لكن الاعتراض على مكانها وان مكانة جاكسون ان يقدم في الخطاب على العبد لله.
و مع احترامي لتقديرك لجاكسون لكن عند نفسي "أنا " مقدم على جاكسون هذا اولا .. ثانيا الموضوع كما قلت لك سابقا عن معرفتي "أنا" بمايكل جاكسون. فكيف يتأخر ما عنه الموضوع اساسا ؟؟
Quote: هىء هىء هىء
غايتو لو البورد دة بيقروهوا غير السودانيين ..الضحك شرطنا |
غير السودانيين ما شاهدوا مايكل جاكسون ؟ شموهو وله شنو ؟
وله ما كان في اول مره ؟ ما اظن غير السودانيين طلعوا من بطون اماتم شايفين جاكسون. أكيد كان في مرة اولى شافوهو فيها.
قنب عافية
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
سلامات يا أستاذ/
كتاباتك رائعة,
عارف قصة نفهم أول الأغنية و نتم الباقي من راسنا دي, ذكرتني شقيق احد أصدقائي الأعزاء
كان تقريبا في عامه العاشر وقتها,
كنا نسمعه يغني بكل صوته ( بثينة و أسـامة,, ماتوا سـوا ,,,, و بثينة و أسـامة,, ماتوا سـوا )!!
و يصر أن هذا ما يقوله مايكل جاكسـون في احدى أغنياته!!
حاجة تانية:
عارف يا حمور, لو كان في إنترنت أيام ناس الطيب صالح و نجيب محفوظ و ماركيز
أكان غرف الدردشة و المنابر إمتصت كل الإبداع الفيهم!!
بالله عليك الله ركز معانا شوية و أقعد أكتب لينا ( موسم هجرة الى الشمال) تانية!!!
تحياتي ليك يا عبقري,
يا هو دا,,,
أحمد الطيب ود بدرالدين/
(عدل بواسطة أحمد الطيب بدرالدين on 06-28-2009, 09:46 PM)
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: Ishraga Mustafa)
|
Quote: عارف قصة نفهم أول الأغنية و نتم الباقي من راسنا دي, ذكرتني شقيق احد أصدقائي الأعزاء
كان تقريبا في عامه العاشر,
كنانسمعه يغني بكل صوته ( بثينة و أسـامة,, ماتوا سـوا ,,,, و بثينة و أسـامة,, و ماتوا سـوا )!!
و يصر أن هذا ما يقوله مايكل جاكسـون في احدى أغنياته!!
|
سلامات يا أحمد ..
تعرف مره لاقيت واحد بيغني لوردي " في زول أكل عمرو ". قدر ما حاججتو انو ما ممكن يكون في زول بيغني الكلام ده اصر جدا.
و نحن اطفال طبعا ما بنميز حاجه.. فربك رب الخير مره سمعت الاغنية صدفة فلقيت فعلا وردي بيقول "في زول أكل عمرو".
استغربت لكن قلت قطع شك الكلام ده حكيم و اكبر من مستوى طفولتي ولما اكبر واخش العام حافهمو.
لما خشيت العام فعلا ربنا فتحا عليّ و اكتشفت انو وردي بيقول " فدىّ لك العمرُ ".
نصحيتك الجليلة وصلت و شكر لك الله بذلها و اثابك رضوانا و رزقني العمل بها.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
| Quote: تغيير مايكل جاكسون لجلدو ده موضوع حارقني جدا |
ياحمور أمريكا فيها قاعدة إسمها the one drop rule
وبإختصار شديد معناها إنو أي شخص لو فيه (نقطة دم) واحده من العرق الأسود فهو أسود (أو أي عرق أخر غير العرق القوقازي)
يعني كولن باول بي لونو الأفتح من أي زول هنا أسود
Alicia Keys لاتينية سوداء Hispanic black
Mariah Carey سوداء
أسود وأبيض في امريكا ليست عن لون الجلد بل العرق, فمهما كان لون جلد فاتح, فأنت أسود طالما فيك (نقطة) دم أسود
يبقى مسألة تغيير مايكل جاكسون للون جلده (على إفتراض إنها حدثت فعلا) زيها زي لما بناتنا يكترن من ال فير اند لوفلي
أو لما تايرا بانكس وأوبرا وينفري وميشيل اوباما يظهرن بشعر املس ناعم
حاجة تانيه
ماظهر من خلال أعمال مايكل جاكسون إنو متنكر لعرقه الأسود, بالعكس دايما كان ال cast في الكليبات أغلبهم سود أو من الأقليات
ما تقول لي عشان يظهر وسطهم أبيض
MJ- BAD
MJ - they dont care about us
MJ - Black or White
الكليبات وكلمات الأغاني الفوق دي ما افتكر تطلع من زول متنكر للعرق اللذي ينتمي إليه
-------------------------------------------
(حمير) مين؟
!
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
العزيز حمور
شكرا على هذا الحرف النبيل ,,,,,,,,
بالرغم اني اشتر وما بفهم في الغنى ,, لكن زمان في حديقة القرشي جنب الجبل الفي الناحية الجنوبية الغربية للحديقة شاركة في عزاء
وحداد المرحوم بوب مارلي , لم يكن لدي المؤهل الكافي لفهم ما بقول بالاضافة لاذني غير الموسيقيه وشترتي في الرقيص لكني حزنت عليه
وكلما ارى له صورة بمشاطنه احزن عليه,, لانه كما قلت جزء من مراهقتي ,,,
لذا تجدني اقدر احزان من يفتقدون مايكل جاكسون ,, ولو كنت امريكي لاتصلت على اوباما الومه لتجاهله في وفاة مايكل جاكسون ,,
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: عمار عبدالله عبدالرحمن)
|
Quote: شوف ياأأخ طارق المضامين الانسانية
العميقة والتعبير الفني الراقي
شوف الرقصات. وتأمل إصراره على
إختراع خطوات رقص فرعونية ودي
ليها أصول في أغنية قديمة له
عن قصة سيدنا يوسف. وشوف وجود
الاطفال في قلب الاغنية.
اعتقد مداخلتك دي رد عميق على
خطرفات ودجل مفترع البوست!
كف عن هذا يا حمور فنحن في حالة
حزن لا نقبل السخرية. |
يا اخ مصطفى..
اول حاجة ما عارفك حشرت مداخلتك دي في نص الكلام ليه.
خجلان ما عاوز الناس تقراها ؟
غالبا.
وينا الخطرفات و الدجل هنا ؟
كون اقول اول مره اسمع جاكسون في بيت واحد صاحبي ده دجل وله خطرفات ؟
يعني عشان ما فرشت و بكيت و اتكشحت بالتراب اكون بخطرف و دجال ؟
لازم يكون مايكل جاكسون شكل طفولتي زيك ( زي ما قلت لي في بداية نقاش معاك في بوست استاذ الموصلي و نقلتو هنا فجأة ) و الا اكون مخطرف و دجال ؟
ثم منو انتو الفي حالة حزن ولا تقبلو السخرية ؟
البوست ده دخلوهو قبلك بالضبط 32 متداخل فيهم الحزين و فيهم من لا يعني له جاكسون شئ. و شاهدوه اكتر من الف و اربعيمة مشاهدة. ديل ما مالين عينك و ما معتبر عندهم راي عشان تجي تعبر عن نفسك و نفسك فقط و لا شئ غير نفسك و تقول "نحن في حالة حزن لا نقبل السخرية " ؟
انتو منو يا مدثر اساسا ؟ و انت ما دام حزين و حادي و لابس القنده الجابك هنا شنو ؟
البورد ده فيو صيوان ؟ و الحد ده بيخلص متين ؟ التلاتة يوم تمت. اها انتو الحزن بتاعكم يا مصطفى و مصطفى و ناس مصطفى بيخلص متين عشان نسخر.
"نحن " ؟؟انا لا ارى غيرك و ليتني لا اراك بعد الالفاظ القبيحة الانت استعملتها في بوست الموصلي. و لولا انك في بوست حقي لتجاهلتك كما هو جدير بك و بالفاظك.
ممصطفى مدثر اما ان توافقه في ما يحب (لاحظ انو ما يحب و لي ما يراه من رأي ) او تكون دجال و مخطرف و سطحي و يسألك عن مصلحتك.
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: حمور زيادة)
|
يا أيها الكاتب الألمعي حمور زيادة
ياخي الدجل في كونك تقول أنو مايكل
جاكسون وذلك نقلأ عن المغتربين تخلى
عن نقط.. نقط، عشان ما تزعل من الاسم
القالوهو لي ناس امي وخالتي، إنت
ولدوك وين؟ بتعرف الحموسة؟ ياخي دا
كلام اهلنا وما فيهو استحياء.
دا الدجل واحد.
نمره إتنين
الخطرفة انك بتهرف بما لا تعرف. شفت
أولاد حي البوستة ديل أنا منهم
وبنعرف مايكل جاكسون زي ما بنعرف
الفاضل اب أحمد فما تقعد تتريق على
حبيبنا أو إذا أصريت فنحن بندافع
عنو
ولي قدام يا شاب!
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: mustafa mudathir)
|
الاخ مصطفي يا اخي البركة فيكم في مايكل ..... يا اخوي الكاشف مات وعثمان حسين واحمد المصطفي والخالدي وابراهيم عوض والجابري
وخوجلي عثمان ومطصفي سيد احمد ...... وكلنا لها. بس حمور زيادة ده بقي من (ثوابت المنبر وخط احمر) مابنرضي فيهو كلام ......
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: mustafa mudathir)
|
حاجتين
ممكن تنافس قيها
مايكي
زاتو القيافة والرقص
والله انا القى طولك دا
ونحافتك دي
وشوية ايقاع
اكون اقيف واحد على ظهر البسيطة
ما كده نحاول
في الأيام الجاية
نخلق منك راقص
وفنان
اتجهز عليك الأستعداد
وعلى عبد الوهاب والمسلمي
الأنتاج
لنظهر للعالم
مايكي جديد
| |
|
|
|
|
|
|
|
|
|
Re: أنا و مايكل جاكسون .. تلك الأيام (Re: mustafa mudathir)
|
Quote: يا أيها الكاتب الألمعي حمور زيادة
ياخي الدجل في كونك تقول أنو مايكل
جاكسون وذلك نقلأ عن المغتربين تخلى
عن نقط.. نقط، عشان ما تزعل من الاسم
القالوهو لي ناس امي وخالتي، إنت
ولدوك وين؟ بتعرف الحموسة؟ ياخي دا
كلام اهلنا وما فيهو استحياء.
دا الدجل واحد.
نمره إتنين
الخطرفة انك بتهرف بما لا تعرف. شفت
أولاد حي البوستة ديل أنا منهم
وبنعرف مايكل جاكسون زي ما بنعرف
الفاضل اب أحمد فما تقعد تتريق على
حبيبنا أو إذا أصريت فنحن بندافع
عنو
ولي قدام يا شاب! |
اصبحنا و اصبح الملك لله يا مصطفى ..
الدجل شنو اني احكى ما قيل و ما عرفت به مايكل جاكسون ؟
الكلام ده كان منتشر جدا في اواخر الثمانينيات و اوائل التسعينيات ان مايكل جبّ نفسه.
و اعتقد انو انا عبرت بوضوح انو دي شائعات انتشرت .
و ما عارف انت الدجل عندك معناهو شنو عشان تقول انو ذكري للحوادث دي دجل.
حوادث حصلت و اشياء سمعتها و اثرت فيني و كانت هي جزء من سيرة جاكسون بالنسبة لي.
تقول لي دجل ؟
يعني الا اكون ما سمعت الكلام ده عشان اكون ما دجال ؟ هو انا اخترعتو ؟ وله انا الجبيتو ؟
اما الخطرفة يا ود البوستة(انت ود ناس منو في البوستة ما تكون طاشي كمان و ما عارف حلتكم ) فاثبتت انك ما بتعرف تقرا .. او بتقرا لكن بتقرا الفي راسك ..
اتحداك يا مصطفى .. شفت اتحداك دي اول مرة اقولا لزول في منبر بكري ده .. اتحداك عديل انت هدا و البوست بتاعي هدا جيب منو مقطع او جملة او كلمة قلت فيها اولاد حي البوستة ما كانوا بيعرفوا جاكسون.
اول جملة في البوست ده بتقول
لا أذكر المناسبة الأولى التي سمعت فيها اسم مايكل جاكسون.
لكنني فجأة كأبناء جيلي في منتصف الثمانينيات وجدت نفسي اتكلم عن مايكل جاكسون و البريك دانسر (الذي كنته اظنه اسم مغني حتى وقت قريب ) و شارلس برونسون (الذي لم نرى له الا نصف فيلم واحد في سينما سينما يوم الجمعة ) و نردد اسمائهم في انبهار و احترافية كأنهم اصدقاء لنا لنثبت ثقافتنا.
ما قريتا ؟
دي ما لاقتك :
و كان شريط صاحبنا يحوي من كل تلك الاشياء طرفا و ايضا يحوي اغنية لمايكل جاكسون.
و لأننا نعرف بظهر الغيب ان مايكل جاكسون فنان عملاق و رهيب و اسطورة (رغم اننا لم نشاهده من قبل ) فما ان قال قائل "دي اغنية مايكل جاكسون " حتى قلنا " أوو أووو " و اعتدلنا في مجالسنا لنستمتع
طبعا لم استطع ان اصرح برأيي هذا و الا صرت بعدها منبوذا كمجذوم في قرية هندية. و اكتفيت بان اهز رأسي في وقار كلما صاح احد رفاقي " ديناااااااااك " علامة على الاعجاب و الانبهار منقطع النظير.
و اتهمت نفسي بشدة على عجزي و تقصيري ذاك و كفيت خيري شري. و استعضت عن عجزي تذوق مايكل جاكسون بالفيلم الرائع الذي شاهدناه بعد ذلك
الفوق ده طبعا ما بتكون شفتو. لأنو الفي بالك و الشاغل بالك يتهنابو انو كيف زول يجرؤ و يقول ما بيعرف مايكل جاكسون و ما بيستمتع بيو .. دي عندك اهانة لجاكسون و كراهية توجب الحرب.
و برضو كعادتك بتفك كلمة و بتزوغ ما بترجع ليها .. سألتك قلت ليك انتو منو الفي حالة حزن و ما بتقبلو السخرية. ما مالين عينك الناس الحزنانين الهنا ديل ؟ راوية العباسي و طارق جبريل و صلاح النادر ديل ما حزنانين ؟ اشمعنى قبلو السخرية ؟ بتتكلم باسم منو انت لمن تقول لي نحن و تهددني ؟
و طالما انت عارف انو هو حبيبك يعني ما فريضة كونية مالك ماليني فقر ؟
اول امبارح بتكلم في المسينجر مع صديقة بولندية متخصصة في الاثار النوبية لما سألتني من الاخبار قلت ليها جاكسون مات قالت لي ايوه سمعت و واصلت ونستا عادي. اديك عنوانا في وارسو تمشي تسحب البي ادش دي حقتا عشان بتتعامل مع موت جاكسون كده عادي كأنو بس زول مات ؟
يا مصطفى مدثر اذا انت جاكسون مقدس عندك فدي مشكلتك و انصحك تتعالج و ترقد بالليل على ظهرك و ما تاكل لبن رايب.
البوست ده (رغم انو ما هو سبب زعلك لكن سبب زعلك اني سألت استاذ الموصلي عن تغيير جاكسون للون جلدو ) ما بيسخر من جاكسون البوست ده بيتكلم عن معرفتي انا (انا ما نحن ) بمايكل جاكسون و اظن اي طفل بيقرا كتابي الاول بيفهم الكلام ده و بيشوفو. لكن انت عاوز تشوف تمثال لجاكسون هنا و تقعد تدردق حوالينو و ما بتلقاها عندي.
المنبر فيو طرشمية بوست عزا .. و فيو كمية بوستات اصحابا بيستغربو و بيقولو جاكسون ده منو زاتو ؟
هاك ده واحد منهم
عاد يا ناس المنبر مااا بسألكم..!!
امشي اكتب لعمر الفاروق كلامك ده عشان يمرق ليك جاكسون و البوب و الصفارة ذاتا من راسك. و كان ما كفاك اخت ليك لينك لبوست حق اساسي كمان.
قال دجل و خطرفة قال.
غايتو الخطرفة البعرفا انو الزول يتكلم بره من راسو و يهضرب. و هي زي حقك ده.
شكلك بالجد زعلان شديد على جاكسون لامن قمت تهضرب.
| |
|
|
|
|
|
|
| |
حمور زيادة
ابراهيم قناوي
تيسير عووضة
مزمل خيرى
ناهد بشير الطيب
omer osman
ALZOLZATOO
ALazhary2
طارق جبريل
mustafa mudathir
شول اشوانق دينق
Shams eldin Alsanosi
معاوية المدير
مريم بنت الحسين
الصادق عوض
خالد أحمد بابكر
Rawia
عمر الفاروق
الصادق اسماعيل
Salahaldeen Nadir
محمد يوسف الزين
العوض المسلمي
أحمد عبدالوهاب الأحمدى
قلقو
ombadda
محمد عبد الماجد الصايم
Ishraga Mustafa
عمار عبدالله عبدالرحمن
محمد عثمان ابراهيم
محمد سنى دفع الله
فيس بوك
تويتر
انستقرام
يوتيوب
بنتيريست