|
|
 Re: مصطفى سيد أحمد - زمن حظر التجوُّل (Re: فتحي الصديق)
|
الأخ فتحي الصديق ...
صحيح ... القصيدة للمبدع أحمد الفرجوني ...
زمن حظر التجول - (عمنا الحاج ود عجبنا)
للشاعر / أحمد الفرجوني
عمنا الحاج ودعجبنا
فى الفريق ياهو الركيزة
هو البشيل حمل الرباعة
وعنده كلمة على الجماعة
وفى الفريق باقيلنا تاية
وكل طيب ليهو غاية
وللضعيف تلقاهو ساند
ويقهر الكعب المعاند
للضيوف ديوانو فاتح
ديل يقوموا وديل ينزلوا
يا ولد ضووا الرتاين
وجيهوا الديوان فراشو
والإباريق .. والتباريق
وافرشوا الفرشة الكبيرة
وأضبحوا الحمل المدوعل
عمنا الحاج ودعجبنا
من سنين أيام جهلتو
ديمة فى دعوات صلاتو
بسأل المولى السلامة
وسترة الحال والكرامة
عمنا الحاج ود عجبنا
فى ليلة من ذات اليالى
فى زمن حظر التجول
جاهو ضيف فى راس حداشر
رحب الحاج بيهو جدا
فرشولو ونزلوهو
وكاسوا للعشاء ما أتلقالو
ما الرغيف ممحوق مقصر
والبلد فى حال معسر
وعمنا الحاج فى مبادؤ
وجبة الضيف زى فريضة
وهسة ضاقت بيه العريضة
ضيفوا كيف يترك عشاهو
من دي زايد إختشاهو
وجاتو فكرة
يمشى للفرن المجاور
ولى رجال العيش يشاور
بس عشا الضيف يا جماعة
وضيفي نازل ليهو ساعة
شاكلوهو ودفروهو
وجاتو دورية الطواري
وأمسى بايت فى الحراسة
وناسوا جنوا
للصباح ما عرفوا حاجة
وين دا روح
وجاهم الخبر المؤكد
ود عجبنا فى الحراسة
و ماشى محكمة الطواري
ناسو أولادو وبناتو
عرفوا حالوا وبدرى فاتوا
فاتوا محكمة الطواري
فيها فى نص الخلايق
شافوا حالا ماهو لايق
عمنا الحاج بى جلالو
فوقو حس السوط يولول
فوق قفاهو
وفوق سنونو
وفوق رجولو
ومرة فوق فججا حشايم
أصلو ما قايل بهونن
حتى كان نزلن هجايم
إلا لكن الليالى
هي البترخص كل غالي
حاكموا الولد المنصب
كتفو بالدبور مقصب
إنت يا حاج يا مخالف
زول مخرف وعقلو تالف
إنت يازول ماكا دارى
سنة الناس فى الطواري
أجلدوهو وغرموهو
ونفذوا الحكم البيدينو
شان يفتح تانى عينو
وتسمع السوط ليهو خاوية
فوق قفا الحاج صيحتو داوية
كل جلدة جبل مذلة
فوق ضمير الحاج وقلبو
وفجاة رفع الحاج عيونو
شاف بنات ولدو وبناتو
كلهن واقفات يعاينن
دمعتن فى العين ترقرق
وجعتن فى الجوف تحرق
والحزن ليهن مخرق
دى النجوم الفى سماهن
ده الزمان الكان حماهن
كل سوط نازل عليهو
من شعاع الضو عماهن
عمك الحاج دمعو زرف
وسيلو فوق أشنابو سرب
تم حكمو وراح بيوتو
نفسو مكسورة وذليلة
كيف ملاقاة الحليلة
وصحوة الروح العليلة
في البيوت الجوه غادي
عمك الحاج ما اعتيادي
فوقو متلمين جماعتو
والسكيلى ضرب حزايني
وقالوا ناداهو المنادي
فارق الدنيا المهينة
يقطع الذلة وسنينا
فوق فراش حاج ود عجبنا
بسمع الزول البوصي
أقفلوا الحوش يا جماعة
طفوا أنوار الرتاين
داك حرس حظر التجول
من بعيد ليكم بعاين
يا زمن حظر التجول
يا زمن حظر التجول
يا زمن حظر التجول
| |
 
|
|
|
|
محمد أبوالعزائم أبوالريش
عماد الشبلي
فتحي الصديق
فيس بوك
تويتر
انستقرام
يوتيوب
بنتيريست