دعواتكم لزميلنا المفكر د.الباقر العفيف بالشفاء العاجل
|
|
 الجزيرة سلام حلولنا وكنابينا ود مدني سلام مدنا وقرانا ( صور _ توثيق )
|
موضوع للربع القادم
الجزيرة الجميلة تستحق منا التوثيق لها على الاقل
ود مدني السني
بركات
الاقسام الزراعية
المكاتب
المدن
القرى
الحلول
الكنابي
.
.
خزان مكوار
الترعة الرئيسية
الكتارات الكبيرة والجنابيات
الترع
امات عشرينات
والكراكة ام دلو
.
.
السلوكة والجراية
الفوادين والهرسي
.
.
الدوستنتاريا والمستراح والضبان اللخدر
.
.
اللستبتالة والشفخانا ونقاط الغيار والحكيمباشا
.
.
العرس والطهور وود اب تشا والقاشيت
اللك والدحش اب ضنبا مقطوع
.
.
العمد والمشايخ وحل الشبك
ود اللمين وابو عركي وخلف الله حمد وسيد خليفة واحمد المصطفي ومصطفى سيد احمد
.
.
الشكينة وابو حراز وطيبة وسرحان وود الفادني وام ضوا بان
.
.
الفطرة في الصقيعة والعيد والرحمتات
كورة الشراب وكورة التنس والكورة ام بوز وسيد الاتيام
اللنداي والدوبيت والبصل اب عروق ومعتوق وقوز الرهيد وكنبو البان
.
.
عنصرية ما شفناها الا في الزمن العلينا دا
الحلة فيها كواهلة وتاما وجعليين ونوبة وحلاوين .... الجزيرة لمت السودان كلو في حلة واحدة
|
|
 
|
|
|
|
|
|
|
 Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: Alshafea Ibrahim)
|
الشفيع ود ابراهيم باللينقلنزي
وكت انقليزك قدر كدي المقعدك مع الطير ديل شنو ؟
حبابك والله حبابك لكن الدار دي دارك
وائ زول من الجزيرة قعاد ساهي كدي ليهو مافي
ضيفة وقرعة نضيفة ؟ لا اخوي
تجيب قدحك كان بملاح لوبا ولا كان ام شعيفة الكتلت المرة الضيفة
ولا ان شاء الله الترمة وموية البرمة
وتعزم ضيوفك وتنادي شفع العرب البتكلو فوق الشعب لقولة فلان كعب
تناديهن اغسلوا للضيوف كل واحد ابريقو في يدو
ولبعدين شفعنا ديل جنهن وجن البقوليهن بتقرا في سنة كم
لانهن كلهن بقروا في سنة خامسة
ساتة مافي ليها طوب ولا سابعة ولا تامنة السلم طلعوا بيهو وجدعوا
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: محمد إبراهيم علي)
|
الجزيرة بلد مترامي الاطراف وبها مدن وقرى وحلول وكنابي لاتحصى ولاتعد
ولكن حبنا لهذه الارض يحفزنا ويدفعنا للتوثيق لها واتمنى ان نمر
على كل المدن والقرى والحلول والكنابي ...
الامر يبدو مستحيلا ولكن بمعاونة الاعضاء والقراء على هذا الايميل
[email protected]
سوف نغطي على الاقل مساحات شاسعة
الاقسام الزراعية تدلنا على المكاتب ومن ثم القرى والحلول والكنابي
الاسواق الاسبوعية تدلنا ايضا على القرى التي تتسوق بها
اجتهد وتجتهدون حتى تفلحون يا ايها ناس الحلول
.
.
اتمنى ان اوفق في تر هذا الخيط ليصبح كيفة غليدة من قطن طويل التيلة
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: محمد إبراهيم علي)
|
امحمد ود ابراهيم
عوافي
يا اخوي والله طوبتك دي حيرتني
دا ضانقيل وين دا ؟
علا تكون كبيت فوقا حيمور
ولا حت كمان اندفق فوقا شاهي فداسي بالقديم
.
.
اخونا محمد ابراهيم نحتاجك في قرى البحر الجميلة
القريقريب ... فادسي العامراب .... فداسي الحليماب ... الدوينيب
العيكورة ... ود الفادني .... اركب التيمس وواصل المشوار
واطلع العالي وادلى بالدقداق
وخلي بوريك نغمتو .... الباظ السريع القام
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: عبدالله ود البوش)
|
Quote: تقع ولاية الجزيرة بين خطى عرض 32-13 درجة جنوبا 30-15 درجة شمالا
وخطى طول 22-32 درجة غربا و20-43 درجة شرقا
وتحدها من الشمال ولاية الخرطوم ومن الجنوب ولاية سنار
وشرقا ولاية القضارف ومن الغرب ولاية النيل الأبيض.
تبلغ مساحة الولاية حوالي 23,373كلم2 |
توصيف لا يعنينا
نحن وصفنا كالتالي:
تقع الجزيرة في القلب
الجزيرة في قلوبنا
تشيلها من قلوبنا .. تلقانا بلا قلوب
وفي عيوننا
تشيلها من العيون .. تكون شلت ود عينّا
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: طه إبراهيم عبد الله)
|
طه ود عمي ابراهيم
هذا البوست وجودك فيهو كالماء يجري بين جداوله
فان انقطعت عنه تاني الا يشرب بالناكوس
.
.
ودعني اوضح وافصح اكثر
كانت فكرتي ان ادير هذا البوست بخطين
الخط الاول توثيقي بحت بجلب المعلومات من مصادرها
والخط التاني نعتمد على معلوماتنا الشخصية
اها قمت جبت اول المعلومات من وكيبيديا الموسوعة الحرة فيما يخص الموقع الجغرافي
وبعد ان اضفتها النصيحة شفتها مسيخة وما ركبا عدلا وقلت في نفسي دا كلام فاضي ساهي
ولبعدين تقسيم الولايات الاخير دا اصلو ما واقع لي في راسي
الجزيرة النحن بنعرفا هي مشروع الجزيرة وامتداد المناقل
اها مداخلتك وقعت لي في جرح وفرحت بها وقنعت من وكيبيديا وسجم رماد
فقلت لك خربت لي التوثيق قاصدا ما كنت اخطط له مسبقا
وهو بالفعل لايروق لي وانا اصلا ما بحب التجغمس والنقل من المصادر الاخرى
وهو في مصدر احسن ممن عاشوا في الجزيرة وتمردغوا بترابها واحبوهو
طه ..... رجاءا خذ مافي القلوب ولاتهتم بالمكتوب
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: عبدالله ود البوش)
|
وفي الجزيرة لمتنا
واريتها لمة السرور الوشوش ضاحكة والقلب مسرور
( لمة الجنيات البمسكوا السعيه وبحفرو بالطوريه)
وبقولو أنا أخو البنيه
ما فيهم البسمع _ يا أبومروووه ويجر ويضارى
وما فيهم الولد التدقو حقاره
أخي عبدالله
انت قت عوك
ونحن قلنالك حاضرين
وعشان جزيرتنا .. واجبة قومتنا
جزيرة .... البير والتيبار
والسعفه والمترار
جزيرة السعيه والعلوق .. والدوكة والسبروق
والسيرة للجناين ..... والقليبة وطوب الكماين
والجبنة مع المشّاطة .... والباتا ولبس الشُباطه
وقعاد الحفلة علي السباته .... والجرتق وقطع الرُحاطه
دي قولة سلام وراجعه ليك تاني .. وفي الجزيرة لمتنا >>>
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: محمد قسم الله محمد)
|
أخونا محمد قسم الله محمد
تحية وسلام
| Quote: يا أخي ذكرتني زمان زي الأيام دي تكون قاعد في راس الترعه حارق ليك عرشين فول |
صاح الليام دي لقيط القطن وقلع الفول
.
.
لكن يا محمد كان تكون احلى لو وريتنا ياتو ترعة وفي ياتو مكتب
وياتو حلة العينك ليها هناااااك وانت في راس الترعة شايف سهريجا من بعيد
وتجي داخل الحلة المغيرب في الصقيطة ديك وخشمك اغبش من الفول
.
.
تعال صاد وضاد وطا وظا وعين وغين
وشكرا جزيلا
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: Ridhaa)
|
ود البوش تحياتي
الجزيره الترع الاندرين في الترع السمك الشطه الخضره خضرة الخلا
مكتب سرحان يوم السوق صرف الفردي
بيوت الموظفين بيت المفتش التحليه جلي
بيت باش غفير التحليه بطيخ
المزارعين صرف الصرف
طيارات الرش
نقابات اضرابات
البورت الموؤسسه الفرعيه للحفريات
سوق العزازي الحاج عبدالله
حوش ابكر
والي الدين محمد عبدالله
سامي عزالدين شواطين
اهلينا ارجنتيا
الاتحاد الرومان
مكتب ابجن
الري الري اضمن لي
شبارقه مع وداللمين وابوعركي مع عمر جعفر
باقر العفيف وعادل عبدالعاطي
ياسر عرمان وازرق طيبه
وهجو وابواتنا اليغقوباب
فتح الرحمن البشير وبص النسيج
كمين من بيت عايش علي النسيج
مارنجان والمحالج
ولسع بجيكم راجع
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: رشا بابكر)
|
Quote: أول في التبادي بقوليك سلام
وتاني هوي يا ود المتامنة
والله ما حريتها فيك تتغاباني عديل
الكلام اللعوج مو كلام ناس الجزيرة
أسياد الكوم الما بعرفوا اللوم
كدي النشوف آخرتك
قُبال ابقى مارقه |
رشا بت عمي بابكر
ناس ود راوة البتغابكن حرم مو سوداني خلي زول جزيرة
وعلي بالطلاق يا رشا زعلتك دي لو لو تمنها السفر اليك اينما كنت
فدونها الطائرات وتذاكر السفر
والله العظيم انا لاسع ما عارفك زعلانة في شنو
لكن زعلتك شقتني النص
.
.
.
اوقفت الردود في اليومين الفاتو لموت دكتور خليل
حرقنتي موتو والله
.
.
رشا بابكر
حتى لو ما غلطان بعتذر
وما عاش من يزعلك وما عاش من يتغابك يا رشا
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: محمد عبد الماجد الصايم)
|
يبدو ان هذا البوست غير موفق ابدا
من بدايته بدأ بزعل اخونا طه ابراهيم
وانتهى بزعل اختنا رشا بابكر
.
.
.
اخونا طه كان نتيجة لبس في معنى كلمات كتبتها
.
.
اختنا رشا بابكر تحسب اني تجاهلتها
رغم ان ردودي كانت على المتداخلين حسب الاسبقية
1/ الشفيع
2/ محمد ابراهيم
3/ طه ابراهيم
وتوقفت هنا لموت الدكتور خليل وعدت اليوم
فلو رديت على ائ متداخل آخر قبل رشا فعلا يكون اللوم
وعلى كل حاله ارجو المعذرة من اختنا رشا واخونا طه ولهما العتبى حتى يرضو
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: عبدالله ود البوش)
|
عمنا ود تور كنيزة من الهدى انصاري متشدد
كان مسافر في الخريف وانقطع في حلها كلها صوفية وما بريدو الانصار
اها بعد فطروهو واسقوهو الشاهي والجبنة
وبدا معه الحوار التالي :
اللخو من وين
من الهدى
انصاري يعني ؟
انصاري احمد ربي
والمو انصاري ما بحمد ربو؟
احمد ربو على رماد خشمو ؟
.
.
الهدى بها قسم زراعي كبير هو قسم الهدى
ومن مكاتبه :
مكتب شندي الواصلاب
مكتب قوز الرهيد
مكتب سرحان
طبعا المعلومات دي من الراص ساكت
وشوية شوية نجمعا
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: عبدالله ود البوش)
|
سلام يا عبد الله
وقول بسم الله
أول تبادي أنا ما زعلت - الله ما جاب زعل ياخي
تاني حاجة إنت صاحب الموضوع ومن حقك أن تسير به إلى الغايات التي تريدها
ومن هنا كان استعدادي لمسح أي مداخلة تنحرف بالبوست عن مساره
وأنا جاد فيما قلت بدون أي زعل
وبما إننا نتطلع إلى مطالعة هذا البوست في الربع القادم - ربع بكري طبعا -
عايز أوضح رؤيتي حول مسألة التوثيق
فانا أرى أن للتوثيق مناهجه وطرقه المتبعة والتي لا تتوافق مع ما يمكن أن نطرحه هنا
ولكن ما يمكن أن يتم هنا هو حوار - وتثاقف - وتسليط ضوء على قرانا وكنابينا وحواشاتنا
وصلات أهلنا - قيمهم أعرافهم وتقاليدهم ومجمل ما يمكن أن نطلق عليه ( المحنّة في أرض المحنّة )
ما إنت عارف الأرض حنينة والناس أحنّ من الأرض .. إلخ
هذه رؤيتي باختصار .. ومن أراد المعلومات الموثقة عن الجزيرة فسيجدها في مظانها الرسمية
أما هنا أريد أن أقول أن شلعوها الجعليين أو أختها التي شلعوها الخوالدة ما هي إلا اسم قبيح لواقع جميل
من العمار والتعمير وأن وصف الجعليين أو الخوالدة ما هو إلا اسم ليس له من معناه شيء ..
..
مودتي واحترامي
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: عبدالله ود البوش)
|
ود البوش,,,,,
طبعاً,,,,,,,,,
عليك الله اقرأ قلبي دا قاعد يقول في شنو؟؟؟؟؟؟
الجزيرة هي جزيرة الحب والمودة والتلاقي
هي الحب المقيم في القلوب
الشيخ مدني السني
الشيخ سعدابي
الشيخ محمد شاطوط
أهل الله الكرام رضي الله عنهم في ابو حراز
الشيخ يوسف ابو شراء
الشيخ يوسف بقوي - المناقل
ابوي الشيخ الجيلاني - الهلالية رضي الله عنه وارضاه ونفعني بجاهه الكبير
الهلالية الحب الأبدي - دار ابوي الشيخ الجيلاني عمر التاي - جامعة القرآن الكريم
مدني الحب الضارب في الأعماق
حي مايو40 - دردق - مايو نص - مايو طرف - اركويت - عووضة - حي الزمالك - الحي السوداني - الري - المؤسسة العامة لأعمال الري ومديرها السر علي سليمان كلودة رحمه الله - ناس الخواض الكرام - ناس ابوسنون الرجال الكرام - أبوي يوسف محمد أحمد مريودة والجعيلي وطلب والزين وعبدالرحيم الجاك والجاك وآل الجاك وآل مريودة وآل كلودة
جبرونا والمزاد وشندي فوق والحلة الجديدة والبيان والقلعة ومدرسة فريني
نادي الخريجين وبانت
زراع وجني رحمهما الله
سيد الأتيام والعوض وعمر ملكية ونادي الثوار ونورالدين عبدالمجيد وحسكو واولاد جوني وعارف فولة وأسامة لاتو وتندبة ونقشة والتوم الحارس
السلمابي الابتدائية وشقدي المتوسطة والأميرية ومالك محمد الجاك ومدني الثانوية
نادي النصر وما أدراكما نادي النصر
حسان حامد ابزيد ونقدالله الكشان وعباس وودالياس وعصام جبرالله وكبلو وعماد الناسخ وحوري ومعتصم جنا وعبداللطيف وياسر عمر هاشم
فريقنا يا ودالبوش (حي مايو 40) وناس ابوالوفاء وناس العاقب وناس محمد الأمين وناس حمدان وناس جيلاني وناس سلوى وناس مستقيمة وناس بدوي وبيتنا ناس صديق والفسحة والدافوري
سفيان عمو وعبد الوهاب حسن الباهي وأنس ابوالوفاء وحسن مصطفى شانز ومحمد مختار شطة ووليد عثمان محمد سعيد سيكا
الدموع ما وقفت وانا بقيف هنا لكن ساكن قبلي يا ودالبوش
الصادق
(عدل بواسطة الصادق صديق سلمان on 12-28-2011, 10:50 AM)
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: محمد علي البصير)
|
زمان في الجزيرة في حاوي واحد بس
الان ائ زول حاوي
لو الواحد ما بقى حاوي كيف يعيش اسرة تتكون من سبعة افراد
تحتاج لمصاريف يومية لا تقل عن 30 ألف ودخله في الشهر لايزيد عن تلتمائة وعشرين الف
زمان في الجزيرة في حيدر قطامة واحد
اتمنى الا يكون الحال غير الاحوال
.
.
اها وين يا جماعة الحواي حي ولا ميت
وهو ذاتو منو ؟ اسمو وبلدو
وكذلك حيدر قطامة
امبرسي يا يا امبر سي يا يا
وكوفك طوبة الضانقيل تتفقش
.
.
اردم يا ود البصير ادرم ما قصرت
وتعال صاد وضاد وطا وظا وعين وغين لحدي لام الاف واليا نقطتين من تحت
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: محمد علي البصير)
|
ود البصير سلام
المحيربا سلام
ود جروب سلام
ام بوشة والريداب وحلة ارباب سلام
وايضا كذلك ود مقبول سلام
.
.
.
لكن يا اخوي ناسك مثقفين ثقافة عالية
اجتماع فيهو كربيتة وورق ومكرفون ونظرات وسنو وسنو
.
.
اجتماع قرية في شكل مدينة
ولو اسعفتني الظروف سوف انقل لك اجتماعا على الارض مباشرة
الواحد اتكلم واضرر في التراب ولا كمان اطقطق في الحجار باقي خرصانة الجامع
الكلام من الراس للراس هكذا اجندة الاجتماع وفي اللاخر نفضوا هدومن من التراب
واتوجهوا بيوتن مع المغيرب يحكي لام العيال وعيالها ما دار هناك من كلام فاضي ساهي
لهم الله .... اهلي الطيبون
النصيحة ود مقبول سمحة ان شاء الله حلولنا كلهن ابقن زي ود مقبول
شكرا جزيلا اخي محمدعلي البصير على الاضافة الثرة
.
.
وكمان كان جبت لينا اغنية من ارض المحنة حقت محمد مسكين تكون ما قصرت طب
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: Haju Muktar)
|
هجو سلام ياخي
غايتو يا اما انت كنت مفتش ولا ابوك كان مفتش ولا مدرس
ولا كمان حكايتك شنو ذاتا انا ما عارفا
لميت مكتب سرحان على مكتب ابجن
وقلت الري اضمن لي ونحن بنقول الري افضل لي آآآآآآآآآآخ يا الري عبدالماجد
.
.
خترت كدي علي حوش ابكر وجيت صادي علي حلة سعيد بكان ياسر عرمان
وقطعت قلبي بالوالي الله ارحمو واغفر ليهو عندي ولد طالع زيو خلقة واخلاق وكورة
ولدي حسن جاب نفس قونو الفي الهلال السعوي
.
.
ومشيت كدي علي الباقير وعقب جيت مارنجان حكايتك شنو تعال ورينا ياخي
.
.
يوم الصرف والملاح بنعرف
الرغيف والموز والبصل
هجو شكرا ياخي
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: عبدالله ود البوش)
|
من كلمة وزير الثقافة الأستاذ عمر الحاج موسى بمناسبة افتتاح تلفزيون الجزيرة 1972م. وإن كان من تعليق بين لغة هذا الرجل ولغة بعضهم لا نستطيع أن نشبهها إلا بالإرسال التلفزيوني عبر المايكرويف والإرسال التلفزيوني بالأقمار الاصطناعية.
الى كلمة عمر:
الجمعية الأدبية... المهرجان الثقافى... الدعوة لمؤتمر الخريجين... حنتوب... بخت الرضا... الأبحاث... بركات . جـادت ومافـتـئـت الثـوّار... الأرباب دفع الله... أحمد وعامر المكاشفي... ود الصليحابى... ود برجوب... المهدى... ود حبوبة... القرشي... المزارعين... العمال والطلاب.
وحضنت أجمل الناس... الشنابلة... الحضور... السناهير... الحلاوين... العوضية... العايداب... الجعافرة... الدباسين وناس ود اللـِّدِر.
وأهلى فى الجزيرة سيدى الرئيس نايرين وزينين... طيبين وسمحين ومتسامحين... حمالين شيل وحلالين شِـبـك وأخوان بنات... يبشرون للثورة ويبشرون بها... ويتحزمون لها... ويغيرون عليها... فهي لهم القوت والعشم والعَـشـا... وهي الرجاء والأمان... هي النجدة والفزعة والنديهة.
لأطفالها: هي اللبن وهي اللبا... هي الحفيظة وهي القلادة... هي الحُجـا وهي الحجاب وهي اللوح والشرافة.
لزرّاعها وعمّـالها: هي التاتيبة وهي القِـسِّـيـبـة وهي السويبة... هي الرخـا وهي التخـا... هي الدخرى وهي البكرى... هي المطمورة وهي الشونة... هي العـد وهي السرف... هي الجَمَّام وهي المترة... هي التساب وهي أم رويق... هي العبادى وهي الدعاش هي الحملة... هي الشراية هي اللبنة... هي السُّـقـْدة هي الـلـقـدة... هي الشاية وهي التاية... هي القمح وهي القطن... هي المُـقـُد وهي السمسم.
لشبانها وشاباتها: هي النم هي الدوباى هي الشاشاى... هي الشوف وهي الشاف... هي الـحُـق وهي الحَقو... هي العديلة وهي الجَبيرة وهي الحَريرة وهي الضَريرة وهي الوزيرة.
ولشِـيبها: هي العمار وهي العمار... هي الودعة وهي الطية وهي العافية... وأحباؤك هنا فى الجزيرة يكيلون فريك حبهم للثورة بالأردب... وخضرة أملهم بالحواشة... وعِـيـنـة خريف رجائهم بالجبهة والطـَرْفـة والخيرصان... لا بُـتـَّاب فى حب حبهم ولا بـُور فى خضار أملهم... ولا رهاب فى حقيقة رجائهم... وهم لخير السودان يحرثون الأرض ويحلبون الضرع ويجمعون الزرع ويفرعون الفـرع ويلملمون الماء فى أب ستة وأب عشرين فهو الحبيب القادم عـبـر الوهاد والنهاد والنهود خلاصة دموع عيون المكادة.
والشكر لك ولجمهورية ألمانيا على كل ماقدمت وستقدم ونحن مدينون لها بتلفزيون أم درمان والجزيرة... ونريد أن نكون مدينين لها بتلفزيون كسلا وعطبرة وهم فاعلون.
والشكر لأهل مدنى ولأهل مدنى ولأهل مدنى فقد بردت ظلال ذراهم لنا واحلولى جنى نعماهم لنا وصفا جمام نداهم لنا وموضع السجدة والسندة فى الشكر لك سيدى الرئيس.
رجاؤنا أن تكون المحطة خيراً وبركة على الجزيرة... أن تكون أنسـاً للياليها... مُثـقـِّفـاً لبنيها... مُعلمـاً لعُمالها ومُزارعيها... منبراً لأدبائها... قيثارة لشعرائها.
السادة المدعوون لنفرح بهذا اليوم فهو تجمعت فيه الرجال والنساء والأطفال... حضنوا الطنبور ودقوا الدنقر ونقروا الشتم واستافوا طيب المِسك والجلاد.
يوم يهنئ فيه الصغار الكبار ويهنئ فيه الكبار الصغار ويهنأ فيه الكبار والصغار... وفيه تـُنـاغِـم العذارى العذارى... ويستنفر الشباب الشباب وفيه يخرج البشر بشيشه ويهز العطف عطفه ويذر ذر الفرح عطره وفيه يشدو الصفاء ويصفق الهناء... وترقص البهجة ويبشر البشر وفيه تزغرد السعادة للحاضر الأخضر والغد المعطاء......... ودامت الأفـراح.
| |
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: رشا بابكر)
|
رشا تاني سلام
وتالت سلام ورابع ومليون سلام رشا
.
.
Quote: جزيرة .... البير والتيبار
والسعفه والمترار
جزيرة السعيه والعلوق .. والدوكة والسبروق
والسيرة للجناين ..... والقليبة وطوب الكماين
والجبنة مع المشّاطة .... والباتا ولبس الشُباطه
وقعاد الحفلة علي السباته .... والجرتق وقطع الرُحاطه
دي قولة سلام وراجعه ليك تاني .. وفي الجزيرة لمتنا >>>
|
زول عندو جنس النضمي دا كان ما جانا راجع وا مغستنا
عليك الله تعالي يا رشا
تاتي تاتي يا رشا تاتي
.
.
عليك الطرمبلة تعالي
عليك ود اب تشة تعالي
عليك الودك والربيت
عليك البسملة والشرافة
عليك الخلوة والتقابة
عليك المطمورة تعالي
عليك الكرب تعالي وعليك الدبلان تعالي
عليك البينا تعالي
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: عبدالله ود البوش)
|
Quote: الجزيره الترع الاندرين في الترع السمك الشطه الخضره خضرة الخلا
مكتب سرحان يوم السوق صرف الفردي
بيوت الموظفين بيت المفتش التحليه جلي
بيت باش غفير التحليه بطيخ
المزارعين صرف الصرف
طيارات الرش
نقابات اضرابات
البورت الموؤسسه الفرعيه للحفريات
سوق العزازي الحاج عبدالله
حوش ابكر
والي الدين محمد عبدالله
سامي عزالدين شواطين
اهلينا ارجنتيا
الاتحاد الرومان
مكتب ابجن
الري الري اضمن لي
شبارقه مع وداللمين وابوعركي مع عمر جعفر
باقر العفيف وعادل عبدالعاطي
ياسر عرمان وازرق طيبه
وهجو وابواتنا اليغقوباب
فتح الرحمن البشير وبص النسيج
كمين من بيت عايش علي النسيج
مارنجان والمحالج
ولسع بجيكم راجع |
أخونا هجو
سلام وعوافي
يازول حيرتني في معرفتك للحلول والمكاتب المتباعدة دي
ووجود باستمرار معنا مهم جدا والبيت بيتك
.
.
.
ذكرتني لمن كنا شغالين في سم الفار
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: عبدالله ود البوش)
|
بالله أنت زميل معنا في حملات سم الفأر؟ ايام وأيام سم الفأر ، حرق سيقان القطن ، عتالة الملح اليوريا من اسطح عربات الترماج ، كنا نذهب بعيدا مئات الكيلومترات من محطة الضباب غربا إلي كندرة ، الفريجاب سرحان حتى سقدي والواحة ، أها سم الفأر قسم وادي شعير .. عليك أمان الله مشينا (كدر) وشايلين السم من تنوب الخشيم حتى ود ريعة وشلعوها الخوالدة ، ود الجمل وتلك القرى الجميلة شاقين ( النمر) جمع (نمرة) وموعدنا سوق ودرعية للفطور الكارب ...
وغالبا ما تكون تلك الأعمال في أشد ايام السنة حرا ، الجميل أن الخضرة (صيفا) تغطي مساحات ومساحات مد البصر ( الجناين) البصل (الحار) والعجور الصيفي والعدس الغابة ، ذكريات وذكريات على القناطر والسرايات نودع بصات ( الأوستن) الأنيقة في طريقها لمدني ونستقبلها عصرا في رحلة عودتها لتلك القرى الجميلة .. يالله ، نادرا ما تجد (عربة) كارو بدون حمولة حتى ولو كانت (علفا) أخضرا (للسعية) ومنظر تلك اللواري وهي تئن تحت وطئة الأحمال الثقيلة من ذرة وقمح وعدسي وبصل وفول وهي تجوب القرى وتسلك طرق الترع والكنارات صوب المناقل أو الحصاحيصا أو مدني .. خيرات ونعم ورفاهية وراحة بال ولقمة شريفة يا لسوء حظ من لم يعاصرها ..
أها قاعدين ومنتظرين
الشفيع
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: Alshafea Ibrahim)
|
سلام يا ود البوش
أنا بشتغل معاك كمساري بس ويلا
الكريبة- بيكة-114- أبريش - الخولاب - جاموسية- سعداب- سعد الله - ودكري - أم جلود- شادلي- مريود -تنوب يا
كبري 4- مندرة- العزازى - حلة عبد العزيز- ود سليمان - فارس الكتاب- حلة حمد - عبد الجليل - ودساوي - المسلمية- أبو قدوم- ود بلية - حلة شاع الدين -
حلة فضل الله -
الدوينيب- الفقراء - ود سلفاب- الكشامر- نايل- الكبر- النديانة - المناصير - حلة عبد الرحمن- قوز أحمد نور
ود شمو- كندوة- ود بهاي- صراصر- قنطرة الهوى- أم عضام- المريبيعة - كنبو مكي- ودحسين أبو لقمة
أم عود- ود كرار- أم دوينة- التبوب- ود مطر- ودالبر- ود رعية- الشبيك - طيبة كمال الدين- الخشيم- أبو جن
لحدي عنكم
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: نادر النور آدم)
|
عبد الله ود البوش وكل ناس الجزيره سلام جاكم من ناس الجزيره شرق البطانه
رفاعه .. الجنيد.. تمبول .. العماره .. عد الغباش .. عد الحاج .. عد الخضر .. ابو جلفه
الطندب .. السيال .. زرقه .. الفادنيه .. فاتحة الجعلين .. العيشاب .. ودابوعشر
ود الفضل .. الموته .. بيكا .. ريبا .. الجعافره ..الحضور .. المحس
وما تنسوا قرى المهيدات ام بلي .. ام حجير .. حداف .. الدناقله .. سر الكل .. ود اكرت .. ودابو شام
والكثير الكثير من قرى تلك المنطقه والتى بها اخر مكتبين فى مشروع الجزيره من ناحية الشرق
وهما مكتب حداف ومكتب ود الفضل ...
ولي عوده مع خالص تحياتي لكل أهلي بالجزيره خاصة اهلي بقرية فاتحة الجعليين ريفي تمبول
وهاكم مني كبدة إبل طااااااااازجه
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: منتصر الامين)
|
اووووووووووو اهلنا ناس البطانة
اخونا منتصر الامين
سلام وسلام وابقى داخل يا زول
.
.
الشم خوخت وبردن ليالي الحرة شوف عيني الصقير بجناحو كفت الفرة
والليلة ام خدود تلقاها مرقت برة ... كعععععععععع
.
.
البطانة صحة وعافية في همبريبا
يا الشيخ بدوي تمسكني من اضاني توديني لبكاني اكل الويوك قد مصراني
ابودليق ابو دليق يا منتصر
وود حسونة وين ليكن ما من تالاكن ؟
ولا اظنكن اتو دون جاي قريب البحر ماكن في الصي هنااااااااك
.
.
منتصر شكرا جزيلا ياخي
| |
|
|
|
|
|
|
|
|
 Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: محمد المسلمي)
|
Quote: التحية لأهلنا بالجزيرة منطقة الحاج عبدالله وذكريات مصنع النسيج وأهلنا في قري
ودالحداد وام عدارة ونوارة وليمون وهولاء ناس طيبين لم تدخلهم العنصرية اوالقبلية
ولكنهم أخوة متحابين ومتواصلين وديدنهم المحبة والأخوة الصادقة فلك ولهم الف
مليون تحية |
الاخ محمد المسلمي سلام
والكباشي سلام
والمكاشفي سلام
الافاضل اينما وجدوا يظهر فضلهم
تحياتي وتقديري الذي تعلم
سلم على حاج العوض
| |
|
|
|
|
|
|
|
|
 Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: نادر النور آدم)
|
حبيبنا نادر النور
سلام واحترام
الله اسامحك يا نادر لكن اصلك ما خفت في الله كلو كلو
يازوووووووووول برينسة شنو وكاربة شنو؟
انا كتلني التراب الواقفة عليهو البرينسة يا نادر
ان كنت لا تعلم غلاة كل حبة من تراب هذه المنطقة علي
فلتعلم الان حصحاصة منه عندي افضل من وزنها ذهبا وقسما بالله عظيم
اهدتني هذه الارض التي تقف عليهاالبرينسة سعادة ما كنت اجدها لو حزت بدلها ذهبا وتا الله
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: عبدالله ود البوش)
|
الأخ طه إبراهيم ....
يالله عليك ، ذكريات سكة حديد الجزيرة منذ العام 1953م حيث بدايات عمل الوالد (عليه رحمة الله ومغفرته التي نرجوها ونطلبها دوما صبح مساء كل يوم) والتي أنتهت عام 2000 م بمنطقة ( الضباب ) ( فطيس ) مكتب وادي شعير ، ولما قدر الله لنا أن نرى الدنيا قدرنا سخر لنا ذلك وما كنا له مقرنين ، القطارات ، العربات ، السواقين ، الزياتين ، المحولجية ، المكانيكا ، الزيوت ، الناظر ، الكاتب ، الخفير ، الدريسة ، الترولي ، السرايات ، بيوت الموظفين ، بيوت العمال ، رائحة القطن والقمح والمبيدات والتقاوي ، الخيش ، الزيوت ، عطر زهور أشجار الشوارع والسرايات ، كنا نسافر كثيرا مارنجان ، ود الشافعي ، الطلحة ، التبوب ، الضباب ، كندرة ، لغاية 24 القرشي وبعدها سقدي والواحة ... شمالا وداي شعير ، صرار ، القوز ، قرشي ، لغاية الباقير حيث المحالج والمطاحن ...
تعايشنا وعشنا وأختلطنا وعاشرنا وأكلنا الملح والملاح وتتشاركنا الأفراح والأتراح مع قبائل السودان قاطبة دون تمييز من كان يأكل ( الكول) أو ( الملوحة) أو ( الويكاب) دخلنا الأنادي والكنابي والنوادي والمدارس والشفخانات ، ركبنا الترماج واللوري والبصات والبرينسات ، شوينا الفول والقنقر على ضفاف أبعشرين والجنابية ، سرقنا الطماطم والعجور والعنكوليب بالليل البهيم لزوم الشقاوة والرجالة ، سربنا بالسعية في شهر فبرائر والقطن أخضر والمزارعين يرجون منه كم لقطة ولقطات ..
شكرا ياطه ، وشكرا ود البوش الذي جعل ذلك ممكنا ...
في 2009 م وبمحطة بنزين بالحصاحيصا ( المحطة التي تقع في بداية الحصاحيصا من جنوب) عند تقاطع شارع الفريجاب طابت ... توقفت لغرض ما ، فوجدت شاحنات (دبل) وعلى كل ترلة عدد (2) ترماج البعرفو ذي جوع بطني ، في طريقها إلي (محرقة) جياد للحديد ... لم يتركوا لنا حتى أثرا نستدل به على ذلك الإرث القومي الجميل كل أصول ومنقولات حتى عقارات المشروع أنتهت بجرائم بشعة ومروعة لا يأتيها إلا الكيزان ...
الشفيع
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: Alshafea Ibrahim)
|
سلام أخوي عبدالله
السمح في البوست ده أنو خلا الناس تتكلم علي سجيتها
يعني مافي (فلفسه) ولا قعّيد كلام
ننضم نضم أهل الطاعم وسمح
والله لاني زعلانه ولا شي الله لا جاب زعل بين الأخوان
أها الليلة جيب ليك نضماً سمح بلحيل.
أمي بتحكي لينا عن واحد بريد بت في الحله وهي كمان بتريدو واتعاهدوا واحد يخلي التاني مافي
البنات حسدوها وبقن يجيبن ليها الكلامات الكِضب عن زوله . ابوها سمع الكلامات وحبسها المسكينة في البيت
وحرّم عليها المرّقه
تعب صاحبنا داير يجن
ويومن في اتسرقت بالدس ومشت لي صاحبتها ، جاهو جاري صاحبن لي
الحق الحق فلانة واقفة تحت النيمه مع صاحبته .. وما صدق وطلق كرعي
وناداها وقال ليها :
وكت كُتي بتريديني الخِلوق عارفنك
إسمي ما بتجيبي ... حتى ان بقن كاتلنك
اليوم يا السمعتي كلمة الواشنك
إنتي العيش لتيب .... وأنا المطر الشّنح منك
قالت ليهو :
لامِن أموت بريدك ... حتى ان بقيت محبوسة
بفديك بي رويحتي .... والجمرة شانك ادوسها
يا مطر البطانة ..... الضّرب السهول وتروسا
ريدتن بعدك أنتَ ..... تحرم علي ما اكوسا
...................................................
عبدالله أخوي شن قولك في زي ده
تعال شوف الزمن الفينا شن فيهو !!
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: رشا بابكر)
|
أختنا رشا بابكر
سلام ومراحب والله
Quote: وكت كُتي بتريديني الخِلوق عارفنك
إسمي ما بتجيبي ... حتى ان بقن كاتلنك
اليوم يا السمعتي كلمة الواشنك
إنتي العيش لتيب .... وأنا المطر الشّنح منك
قالت ليهو :
لامِن أموت بريدك ... حتى ان بقيت محبوسة
بفديك بي رويحتي .... والجمرة شانك ادوسها
يا مطر البطانة ..... الضّرب السهول وتروسا
ريدتن بعدك أنتَ ..... تحرم علي ما اكوسا
|
اول حاجة يا رشا خليني اضرب الراراي بجيتك السمحة دي
ولا اخفي فرحتي بعودتك للبوست
.
.
وكلامك الفوق ياهو الكان حاصل واياهو تعاملنا العادي
اقوليك حاجة يا رشا في حاجة كانت عجيبة جدا الواحد فينا كان مناهو اشوف حبيبتو شوف ساهي بس
ومن بعيييييييد ولو اصتدم بها في زقاق يبقى في التخارجو من الموقف الصعب دا
احكي ليك حكاية حقيقية حصلت معاي وانا في الثانوي
بعد صلاة العشا مباشرة وانا ماشي في زقاق ضيق جدا الزول الشايل عنكوليب ما بمش بالزقاق دا
اها وفجاة وقدامي مباشرة يطلع لي القمر وانزنقت زنقة كـلـب في طاحونة
عارفة عملت شنو يا رشا حرم تلب تلبت في بيت الناس وقعت فرق العناقريب ما بركة الما وقعت
فوق المرة الكانت راقدة فوق العنقريب وراجلها راقد في النعقريب التاني
واخدت علقة لن انساها ابدا والزول اسع قاعد ولليوم العلينا دا كلما الاقيهو يتذكر الموقف دا
طبعا وقتها لم يصدق ان قصدي شريف مهما حلفت له بالتكسرني وتطفا اهلي بنار ما ممكن اصدقني
والا كان تصديق الزول المنتظر عربية السوق اقرب للتصديق من موقفي هذا
ولكن فيما بعد ... فيما بعد دي بعد سنين طويلة ... بعدما تزوجت نفس الحبيبة
.
.
رشا بجيك راجع تاني
شكرا جزيلا اختي الغالية
| |
|
|
|
|
|
|
|
|
 Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: عادل خياري)
|
عادل خياااااااااااري عديل كدي
يازول سلام سلام سلاااااااااام نعلكن طيبين وجركن ملان عجين
يا زول ات معانا في الحلة دي ولا حس ولاخبر
وكمان قديييييم لكن كلامك ما قل ودل
والله كترت الكلام كان سمح في القرايا
.
.
لك التحية والسلام
وايضا كذلك التحية لاخونا زيادة عبدالباقي ود الفضل
.
.
Quote: سوف نمدك بمعلومات عن الهدى بلد سيدي خالد
|
معلوماتك اكيد تفيد كتير في هذا البوست
ولكن الهدى بلدي ودمي الذي يجري في عروقي نصو من الهدى
وطبعا بدينا البوست بالحلول والكنابي والقرى
والهدى دورها لم يات بعد فهي من المدن العريقة بالجزيرة
والتي لها طعم خاص ونكهة لاتوجد الا في الهدى والجزيرة ابا
الهدى كل شخص منها يمثل علما خاصا من اعلام المهدية الخالدة
ولا الزمن العلينا دا يا عادل اختلط حابلها بنابل الكيزان
ولكني حسب معرفتي بناس الهدى فهي لن تتبدل ابدا
الله اكبر ولله الحمد ( القديمة حقتنا )
سلام يا الهدى
سلام حي المهدية وسلام سهريج الكواهلة وسلام عد الكواهلة
سلام حي التعاون
سلام حي البان
سلام حي المستشفى
سلام الحلاوين سلام العوامرة سلام
الهجرة الثانوية العامة بالهدى سلاااااااااااااااام
الان ابكيتني يا رجل
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: عبدالله ود البوش)
|
الحصاحيصا
درة مدن الجزيرة
.
.
اخونا شمس الدين خليفة ارسل لي رسالتين على الايميل
وهو من الناس الغيورين جدا على مدينته الجميلة الحصاحيصا
مع انه طلب مني ترتيب الكلام المكتوب ولكني لا ارى ترتيبا اجمل
مما رتبه وخطاهو .... غايتو ناس الجزيرة ديل الواحد تلقاهو
استشاري باطنية واقعد في بيت العزاء وكانه لايفرق بين القحة
والجضمارة ....
استاذ شمس الدين دا كلامك زي ما هو
بضبانتو
Quote: شنو يا خوي نسيت الحصاحيصا اللمت كل قبائل السودان فيها
امسك معاي
حي العمدة
الحي الاوسط
الحي الشرقي
كريمة
الحلة الجديدة
حلة فور
الكمبو
المزاد
الامتداد
المايقوما
اركويت
ربع الخراب
حي السينما
الانادي
ود الكامل
الدبة او الصداقة او حلة موسى
ابوفروع
الضقالة
كمبو حاج علي
باسطة ود حميد والحليب البارد
فول البربري
عمك محي الدين
قهوة المشلخين
السوق وبداخله كل الاسواق
يمكن اجيك راجع
ان شاء الله
شمس الدين
اااااااااااااااااااااااااااااااااااااااااااااااااااااااااااااا |
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: عبدالله ود البوش)
|
رديت ليهو باني كيف انسى الحصاحيصا
وأمي لاتعترف الا باطباء مستشفى الحصاحيصا
.
.
واها دي رسالتك التانية اخي الاستاذ شمس الدين
قال نحن ناس مساكين ساهي قال
ات يا شمس الدين بقيت مسكين بعد الماجستير ولا شنو
..
Quote: تسلم اخي عبدالله
نسينا نضيف
حي الزهور
ومكتب قرشي وحي الجملونات وحي الموظفين
والفبارك والمحالج ومصنع الصداقة سابقا
وكبري رفاعة الذي افقر رفاعة
وام دغينةواريجي
ما تنسى جعفر الطيار وشيخ خوجلي وخديجة الضكريةوود الواطا
وناس الكورة شواطين وعروه وسيف واخوه ابوالعز وعلي الامين ومحمد الامين واولاد جبارة واولاد مطر
وناس سمحين سماحة فوق الوصف
وسمك التنقور ودرار
عليك الله ياودالبوش
رتب الكلام ده نحن ناس مساكين ورص الكلام ما بنعرف ليه
حبينا نشارك بس لاننا اتربينا ودرسنا وعشنا في الجزيرة ولا زلنا نعيش بها وخيرها مغرقنا للرأس
بجيك صاد كان الله اراد
لك الود والاحترام
|
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: عبدالله ود البوش)
|
رسالة سمينة من اخونا الجنيد عبر الايميل
Quote: تحية طيبة
بالتبادي
اخوك في الوطن ما اخوك بتاعت الجماعة اياهم
الجنيد حمد بابكر الماحي العمدة احمد حاج البشير
من قرية عجان ده اسم الدلع وهى كمبو عجان
ودى من جملة 14 كمبو كالتالي (عجان - ام سنة- ام وزين - ابارا- ابوكرنة-المنسي-مقدر-خيار
-محمد عبدالله-الحدايحيد - تميرا ديل كم وتقريباً معاهن تورس وام كوراك) فوقن طوالى بتقع المحيريبا
ودي محلية غالبية قراها من قري الحلاوين ومنهن (ودالبصير-الفوار-بحرالعلوم
-منى-شكيرات الحليواب وحاج الصافي والوادي-وودشنينة -وجادالعين واولاد يوسف
ودبترو وكتفية وصافية والطرش زمان واسم الدلع السنية وابسير
وما ننسي كبكباية وقوزعبدالسلام بكان ودحبوبة زاااتو والولى
ونرجعبك تانى لا وراء عندك امبوشة وود جروب وكمبو ابودقينة
وكمبو جبرالله ديل في الكنار وتلقى سليم منها لا وراء الربع والارئك العوامرة
وجمبها الزهراب وتعال تاني قنطرة ستة وعشرين وتمسك الفنقة البتوديك خرتوم الجن
تلقى المحريبة ياناس اللغات ضعفوا الحاء وبيضاء والنخيرة وكاب الجداد حدى هنا
ارجعبك للحلاوين تاني فوق جاد العين بتلقى كمبو الكودة ومن طوالى العديد
وابوعشر ولزق ليهو حلة عباس وتعال بى جاي فوق لا كتفية تلقى توبة وكمبو الفلاتة واسترحنا
ومناقزا وانجضوا وكمبو حريقة وحلة والتكلة جبارة وحلة الحاج وحلة مصطفي والحليلة ودلقا وقنب
اها وصلناك الظلط للتذكير الحتات اللاوراء دي في الخريف الا عن طريق الانزال
حتن شوفتا حتن دي كيف حتن تدخلاء ما متذكر كويس احتمالن ناسيلي كم قرية كدى
المهم والاهم الناس القلتهم ديل تخش اى بيت زى البيتكم تضرب ام تكشوا
والجبنة البلدية ما الحبشية وتنوم فوق عنقريب ماشرو وجمبك ###### الجيران
وغنماية ناس البيت وتمانية سخلان وجعير العجول مالى الحتة
تطلع برة تلقى الناس مخلفة يعنى راكبة متقريفة فوق حميراء
وماشي الخلاء ضاربة هموما في الواطة عشان يطلع عيش وفول تقابة الناس هناك
ناس الله قلوبة نضيفة زى يو الجمعة ما في حقد وما في زعل
الا دخلوا علينا الجماعة اياهمبوظوا اى حاجة ولكن الفينا ما بتغير
نحنا اولاد الارض الارض البتدى وما بتشيل اولاد الجزيرة اتعلمنا نقول الحق
ونقيف معاهو ما بنقول سوينا ولا بنقول دايرين من ضراعنا بننتج ومن ضراعنا بنقسم زادنا
كل القبائل تقول اهل مافي مشاكل بتاتاً
وبرضو الله يجازى الكان سبب ضيع البلد وبدور يضيعنا معاهو
وبقول ياناس الجزيرة حافظوا على التسامح حافظوا على الخوة البنكم ما تنغشوا ما تتددقسوا
طالبوا بحقكم حل خلافكم بينكم والمسعول إن جاكم ما تدوهوا البيضاء ماف مسؤول الا الله
ودمتم
الجنيد حمد بابكر الماحي
قرية عجان ريفي المحيريبا محافظة الحصاحيصا
الامارات ابوظبي |
الله اديك العافية يا الجنيد اخوي
تحياتي وشكرا جزيلا
ياخي تعال اكتب معانا هنا كتابتك طاعمة زي ملاح اللوبة
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: عبدالله ود البوش)
|
الهدى مدينة بدون بوليص
.
.
هل سمعت في الدنيا دي كلها في مدينة مافيها بوليص ؟
هذه هي مدينة الهدى بالجزيرة ...
لكن اسع قطع شك بكون فيها بواليص وامكن كمان قسم عديل
الاخ الزميل عادل خياري ارجو الافادة باقي انا طولت من الهدى
والله ما عارف فيها بوليص ولا ما فيها
في الماضي كل هذه المنطقة لايوجد بها مركز شرطة الا في العقدة
وكان شغلوا كتل الكلاب السعرانة واقبض ناس اللنداي احيانا او يوصلهم لبيوتهم
حسب القانون الساري حينئذ
.
.
واحد من المنطقة فلقوا ولدو ( الجنا عميكة ) فلق ابوهو
اها ابوهو مشى المستشفى قاليهو الا تجيب اورنيك من البوليص
مشى نقطة العقدة العسكري قاليهو ورينا الحاصل بالضبط
الزول قاليهو ياخي الولد عميكة وفلقني وانا ابوهو
البوليص اصر اجي الولد
الولد جا البوليس قاليهو فلقت ابوك لشنو
فاجاب الولد : ما تان ابلد؟ ينطق الكاف تاءا لانو عجمي برضو
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: طه إبراهيم عبد الله)
|
هووووو..
مدد يااهل الله مدد ...
مدد يااهل الجزيرة مدد ..
حباب القرشى ودالزين
حباب الشيخ عبدالمحمود
حباب الشيوم التوم ودبانقا ..
حباب اهل الله من ذكرت ومن لم اذكر ...
حباب اهل ناس التقابة والتقند والواسوق
والطورية ..حباب اهل (البعوجوا ) الدرب ..
حبابكم نتابع كل حرف يخط هنا ...فى ضيافة
ودالبوش ...وفى انتظار اطلالة ابوحراز كمان
لتكتمل الصورة ..
وان ماجيتا من زى ديلا واسفاى وماساتى واذلى ..
| |
|
|
|
|
|
|
|
|
|
Re: الجزيرة سلام حلولنا وكنابينا ود مدني سلام مدنا وقرانا ( صور _ توثي (Re: محمد عبدالرحمن)
|
سلام هييي
الجزيرة حرق الفول وسرقة العنكوليب والسسسسسسسسسسسسكة من سيد الحواشة والدقـــة الصباح في المدرسة، الجزيرة الغولاط (الجدال) في برندات الدكاكين و العرس البتلتوا لي من الصباح
زولكم دي من قرية الكشامر غرب الكنار جنب الحصاحيصاوقبل المسلمية وجيرانها ود شمو والرحلاب والنديانة ونايل وانت ماشي علي الحصاحيصا بتلاقيك وودسلفاب، وانت ماشي علي المسلمية بتلاقيك الفقراء و العمارة طه وتقطع كبري الخشب وقدامها طوالي ود الفادني شرق الكنار.
انتو عارفين احلي حاجة في الجزيرة شنو؟ الونسة في ضل الصباح و بعد صلاة العشاء غايتو جنس غولاط وفلهمة وكمان في ناس كده بس يدوك الكضبة لحد مافي تهبش راسك والناس بعد داك يمشو ينومو ومافي زول شايل في قلبو حاجه
يا حليل ايام الجزيرة لمن كانت ريحة الشية تضرب في البلد بعد الصرف وهاك يا بوبار مرة قالوا في واحد مننا اجر ليهو تاكسي من الخرطوم لحد الكشامر وقال لسيد التاكسي اهم حاجة تلف الكشامر دائرة وتضرب البوري تووووووووووت عشان الناس دي كلها تعرف
كان حيين بنتلاقي
| |
|
|
|
|
|
|
| |
عبدالله ود البوش
محمد إبراهيم علي
رشا بابكر
Nazik Eltayeb
Ridhaa
محمد قسم الله محمد
Haju Muktar
محمد عبد الماجد الصايم
ايهاب
الصادق صديق سلمان
أمجد الزين
محمد علي البصير
فيصل محمد خليل
حمد عبد الغفار عمر
نادر النور آدم
منتصر الامين
عماد حسين
محمد المسلمي
محمد نجيب عبدا لرحيم
عادل خياري
محمد عبدالرحمن
فيس بوك
تويتر
انستقرام
يوتيوب
بنتيريست