دعواتكم لزميلنا المفكر د.الباقر العفيف بالشفاء العاجل
|
|
 ديوان جديد للشاعر المكاشفي محمد بخيت : خبر ونص
|
عن دار عزة للطباعة والنشر والتوزيع صدر مؤخرا الديوان الثاني " كادان والجدول الرابع " للشاعر المكاشفي محمد بخيت وكان قد صدر له عن دار النشر جامعة الخرطوم ديوانه الاول " مسافة السكة " في النصف الثاني من الثمانينيات ، الاستاذ مكاشفي محمد بخيت الذي عاد من غربة طويلة، للبلاد اعاد بعضا من روحه بهذا الديوان ، لمحبي شعره وربما لجمهور جديد يتعرف عليه لاول مرة
هنا احد نصوص الديوان وربما كان هناك المزيد
حق العصافير
المكاشفي محمد بخيت
فى مرة من كمين سنة
كتبتْ وداعات الضفاف بى خط عريض:
مرّتْ عصافير من هِنا
عكست مرايةْ الاصطفاف
صورةْ مسافة ملونة
منقار مسامير الرياح
مسدار مستف بى الغُنا
كل العصافير ممكنة
لو فرت الأبواب جناح
وطوت مجاهيل الرياح
ورمت مراكب النيل شِباكْ
تصطاد فى داخلنا الحراكْ
تمنع وصول قولة أنا
كل المشاوير ممكنة
كل المسادير مؤمنة
ما سدا مسمار الرياح باب الحراز
ما شدا حيل همس الوتر صوتْ النشاز
فى البدء كانت كلمة..والكلمة الملاذ
تذكار بشيلو جنا الجنا
سرب العصافير ضوا جنحاتو وطفا الشمعة ورحلْ
من عتمة لى عتمور وبين مهلة وعَجَلْ
فى سكتو الغابات ربوع فى رحلتو الأعماق نَخَلْ
العدتو الصحر الرمال والأدتو القُدرة الجبال
ما كان مروقو مروق زَعَلْ
لاحت مناديل الوداع طاف فى بياضا سلامْ أهَلْ
عصفورة قالت لى الجناح:
سوق يا حبيبى على مهل
والسمحة فى وسْطْ الجروف تقرا الكتاب الما اكتمل
تسبق خطاويها السحاب
طافت مدن ما ليها باب
مطراً سقاها وما هطل
يوماً نساها وما سأل
وبروق تواعِد أزمنة
فى مرة جاية بعد خريف
كتبت عناقات الضفاف
بى خط محبّرْ بى الغُبار :
رجعت عصافير من هنا
أعشاشا أعواد ما اتلقت
سوَّكْ بها الليل الحُجارْ
من يوم مشت
أحواضا بور صبراً صبور
وخيوط ميبسة فى الشعار
والغُصنْ دافِنْ سر جذور
وغَلَطْ مواويل طوّلتْ
يا سِربْ فى قَدَم الإياب..
لابسات خطاك لسه الغياب
أحكى الرحيل كيف لى وطن
وأشكى الرحيل كيف من وطن
قول الثوانى بتبنى كيف طول الزمن
جغرافيا بس يبقى البُعادْ
واللا التواريخ يوم تُعادْ تملاك فِتَنْ
والمات من الأمل البعيد
ساكِنْ عيونك ما اندفن
والسر بلاد تصحى الصباح
بين حق عصافير فى الغُنا
حق الصغيرون فى اللبن
حق المجاميع فى الملاح
حق العواصف فى السكن
حق العواطف فى المزاح
حق الأيادى رمى سلاح
حف المسافات والغمام
حق القصايد والغرام
حق الأحاديث فى الشجن
حق الشراعات فى الصلاح
حق كل صوت يوم انسجن
حق الخصومات فى السماح
ما ببقى حق زول الوطن
لو ما بقى الحق كلو عام
لو ما بقى القول كلو صاح
سرب العصافير ما نسى
ما دسا فى الشِنَطْ الكلام
عشو القديم راجى النشيد
من قمرة صبّتْ سنسنة
ومن جمرة فى أصبع يشير
بى كل ضو نحو الظلام
ما برشح الضو غير سنا
ما بجرح الأصبع جَمُرْ
ما بِشرح الحاصل عَنا
|
|
 
|
|
|
|
|
|
|
 Re: ديوان جديد للشاعر المكاشفي محمد بخيت : خبر ونص (Re: Alsadig Alraady)
|
Quote: مرّتْ عصافير من هِنا
عكست مرايةْ الاصطفاف
صورةْ مسافة ملونة
منقار مسامير الرياح
مسدار مستف بى الغُنا
كل العصافير ممكنة |
كل العصافير ممكنة ..وهذه اللوحة الغارقة فى العمق والرهافة..شعر مبشر ومتفائل ويلمس الوجع فى عصبه الحساس..
Quote: بين حق عصافير فى الغُنا
حق الصغيرون فى اللبن
حق المجاميع فى الملاح
حق العواصف فى السكن
حق العواطف فى المزاح
حق الأيادى رمى سلاح
حف المسافات والغمام
حق القصايد والغرام
حق الأحاديث فى الشجن
حق الشراعات فى الصلاح
حق كل صوت يوم انسجن
حق الخصومات فى السماح
ما ببقى حق زول الوطن
لو ما بقى الحق كلو عام
لو ما بقى القول كلو صاح |
وهذا منفستو حضارى للغد الذى تحاول كل العقول النيرة التأسيس له..تمنياتى للمكاشفى التوفيق فى مساعى لنشر القصيدة ذات الاجنحة...
شكرا الصادق الرضى على "حسن المعشر" الثقافى..وعودا جميلا..لك تحية صادقة..و
| |
|
|
|
|
|
|
|
|
|
Re: ديوان جديد للشاعر المكاشفي محمد بخيت : خبر ونص (Re: Almokashfi)
|
(كادان )..والجدول الرابع
يا تالِتْ رابعنا الفاتْ
قسمك نُصين سِرْ الجدول
والنخلة الردت ليك الصاع جيلين
جيل مستنيكْ تلبس هِدْمك
وجيل متمنيكَ جميل للشينْ
لكن الضفة البى وشين
أدتك الموجة غسول لى الكف
وسدتْ بى الطمى والعشبْ اضنين
(كادان) ..يا ..حقل النفس الطيِّبْ..
أصابعك حاسبة الخمسة مراحِلْ
وزايدة عليها سنين ودنين..
لونك باهى فى وش لونين..
ولو تختار التربة قصائد..
ما بتختار الحصى تيرابك
لابس هدمك ..عارى سحابك
ما بتسقيك المطرة رشاوى..
ولا بتقيف ملطوعة فى بابك
يا (كادان) لميت أولادك
ذات فجرية ملبّسة أخضر
ملبس صوتك حزنو العبّر..
تَقْنِتْ..ترمى الشدرة كتابا
تصرخ..تفتح روحك بابا..
ويدخل طير الجنة براحك
وترمى سلاحك...
قعدةْ همك فوق الحيرة..
ونقدةْ حلمك من كم طيرة
تسفِّر فيكَ القطر البرجع
لما يلاقى محطةْ صاحك
وطلقو ولادك خيل اللمة
شدت روحهم سيرة وكلمة
وانت تلاحظ جوه عيونهم
قلق العالم كلو اتلما
تشير بى أصبع نحو غُناهم
ومن جواك تضوى الهاجس
يا أولاد السكة طويلة..
وتيراب زَرْعْ فى جيب الصى
سكت (كادان) ..اتكلم شافع
بى ألسنةْ اللحم الحىْ
القلم المبرى مع الكراس
زى برق العينة مع الأنفاس
وسكتو التانين..
ونطق (كادان) بى وجه النور
قسماتو نبى..
دردم للحوت كورة تمويج..
سلم للقمرى ..زمانو صبى
اختار للهدهد بابو شِتَا
وللبهم الرايح راعى صبور
لى البيتْ الراكز ضُلْ عصفور
للشافعة العين والرمش غَطَا
ولى الناس الصابرة تِمامةْ دور
(كادان)..حفيانْ
..جِلْدْ الغابات ما للنعلين..
جيعان ..عطشان
موية المترات..
فول العقبات..مافى الايدين
سُحب التاريخ..
كُتب التاريخ..
ما انشال فى غيما خيال جايين
ما لبست توب مصبوغ أطراف
ما اتلمت جوه عمر خواف..
ما انشاف من ريد الا البنشاف
عز الأكفان ..توليفة الدم
عز الانسان ...أرجوحةْ الهم
(كادان) والقعدة مع الأولاد..
..لا تسجيل حالة ولا محضر..
لا قهوة اتوسطت الطاولات..
لا قلماً يمضى..ولا دفتر..
سرديبة ضهرو المتكية
على حال الراهن..و المنظر
نضارتو حشا الأم المهرود
كرفتتو عبرة وخَتْ خنجر
لكن موجود بى باقى الناس
موجود..موجود....
فى الضل فى صقيعة..وما قصر..
أطوال أطوالو ...شموخ..وقفات
أعمار أعمارو ..شموس راميات
بذرة..وقُدرة...
كادان عاشق..مسك النجمات
سلما مشوار يبدابو رحيل
مسّكا عنوان فى حرفو تقيل..
شيّلا من حوض الدهشة نخيل
وطبع على خدها قُبلة نيل
ودََفَقْ باقيها فى موية السيل..
ياعاشق..أرمى الرمية الغنوة
إذا الصارقيل..ماجاب الكُور
وقلِّم شوق الجرف الزايد
ياما الشوق بتقوم لى ضفور
ضلم نورك ما يبراكا
محلةْ تلقى منابع النور
صبح كادان ..فى عشب الساحل
جرةْ ايدو ..خريطة ..وهيطة
خط استواء..من نَجْرْ ضلوعو
ومقياس رسمو..جريد وسبيطة..
...وغاية حلمو..شريفة..بسيطة
وحلما عدى بحارو السبعة
ما زى حلماً نطا الحيطة
يا كادان استوى فوق عرشك
ومد بين ايدك وعينك برشك
جاهك عَرَقك يسقى وريدك
وتاجك لمة ناس بتريدك...
يفضحو ناس فالحين فى غشك..
يا كادان الزمن الرابع ..
تالت دمعة تضحك جايى..
وخامس ترعة تسلف مطرة
برميل موية ورعدة وشافع..
(عدل بواسطة Almokashfi on 12-02-2004, 02:21 AM)
| |
|
|
|
|
|
|
|
|
|
Re: ديوان جديد للشاعر المكاشفي محمد بخيت : خبر ونص (Re: Alsadig Alraady)
|
عشمانة بت شيخنا النصيح
عشمانة بِتْ شيخنا النصيح
فتحت شبابيك النهار
الشافا من جِهةْ الشَرِقْ قال تستريح
والشافا من جهة الغَرِب قال هابه ريح
وجها ًيطل من طاقة الوكت المودر فى الغُلاط
تقراهو حيره معلقة وتقراهو فى جدل الشُراط
وتلقاهو فى النجمة المدسدسة ِتحت أباط..
عشمانة من شباكا داسا الكلمة من تحت البلاط
مكتوله فى أسر المكان مجروحة تسأل عن جريح..
ضاق النهار بى نظرة من شباك معلق
بين جدار جوانى بين سقف الوطن
يوم رجت الشمس الحليب
الراضع العَرَقْ البذوب فى كاس زمن
اترتعت خطواتها فى شارع يودى وما بجيب
اتجرعت جُقمةْ زمن ..شافت وطن عالى وفسيح..
عشمانة ما سكرانة ..
لكن السكات دردح عصب كان المسيكين
فى عشا الغنماية ..
فى صوت المغنى وكت يلعلع بالغنا الجافى القبيح
تالى الليالى ...عقاب صباح
تالى الليالى مصب نَهَرْ
مجدوع على السكك القديمة ومستباح
أحلم بحر ..وأنضم مطر إن كنت تحلم بى صحيح
وحبيبتى من طرف البحر جابت محارة وعنقريب
شفتك قريب..وبديت أحسب كم تغيب
الجية ما شرط الفراق ..واللقيا ما ذنب البغيب..
عشمانة من زمن التساب..
مشرورة فى السعده انتظار
مفروره توب غطى الرواكيب .
.ما ها ضُلْ..الضل بجينا وبنسحب..
ولاهى فُل.. الورد حرفو بينكتب ..
تتهامس الحته اللقتنا مصورين
فى إلبوم الغابة ورياح المتعبين
يوم شفنا فى المقرن طبنجة ومرفعين
من همسة أم در لى التواريخ ..
تستريح عشمانة فى النظرة
وتتوه فى ملتقى الأسف العميق
بى منتهى الوعد الجديد..
مرقت على الكنتين ..
ولادها مطعمين بى لفحة الشباك
وبى الزمن البضادى صغارو..
ايدا قصيرا من رف الحلاوة
البسكويت والصلصة والماجى..ورغيف العيش
وما بتقدر تقول.. بكرةّ!! ومابتقدر تقول معليش
جناح اولادا ناقصو الريش
وقصو جناحا عسس الليل
وتمو عليهو بالتفتيش
مصاقرة الحاله ناقصة مرايا ..
.لا طفلاً ولادتو سمايه..
قدر الشوف فراغ العين ..
قدر الطوف غرق حفيان ..وملوة عيش ..
وقدر القمحة سنبلة طالعة
من شدة يباس وعويش ..
وقدرها مرتين الديش ...
وقدر أم قيردون ..الكودى ..
لو طُعم الشرك كشكيش
وتتذكر غناها الربا
فى قلب الوطن دعوات
وتكسر ضلفة الشباك.
.تطير عين الشمس من بالا..زى ميلين
ترك آخر السطر جيلين .
.وتكتب بى قلم ما بتبرا إلا الحال
ونخطف من نواحى سؤالا كم شبال ..
ونردف فوق حصانا اللاهى عصفورين ..
وننسى زوادة السفره ودعا الوالدين ..
ولسه الجيه فوق جيات...
وطاشه لغتنا فى البكيات ...
وما قرشتنا بين فكين ..
سوى العاصفة الملبكة بالصمغ ..والحزن ..والمنديل
لسه بطانا شايلين فى عيونم فرحة مابانت
تعضعض أصبع الأفق الطوى المشهد..
أبت عشمانه تابى نهار وطن ممسوك..
وسلت من حِيَطْ سيد المروه الباب..
وشدت خيلا فى رحلة مدن
مسواكا لى سِنْ الصباح أشجار
عتامير الزمن وحلانة فى رمل الفريق أسرار
مداميك البنا المهدوم ..بتبنى بيوت .
.تخت شباك أمل مهزوم
لكن النهار صحيان على ضفة شمس بيحوم..
وديك عشمانه
من رقراق حياتنا المستحيلة تطُلْ
مشربكة فى غصن من شوق
مكلبشة فى ثوانى الضُلْ
موحله فى الطمى العجلان ..
وشايله على الكتف هم كُلْ
أريتا حبيبتى بت وادى الرياح .
.والعُشْب ..والقندول
بت النخلة ..فاتحةُ خير وفارعة طول..
بت مسك الوطن فواحه
فى ساحاتو خاتية قول
َنخُبْ طول الطريق ماشين
نبعد ونستعد راجعين
وديك عشمانه تحلب ضَرْعْ يوم غايب..
توبا بقى الخريطة مشتتة العالم..
جرينا معاها ...ما خالين خطى وأنفاس ..
وفى كل خطوة وَلْدَةْ يوم ..
.وفى كل يوم وقوع لى فاس ...
وفى فاسك عِشِقْ مكتول ..
وفى المكتول حياة الناس ..
وفى الناس رغبة ما مطفية .
لى السفر البجيب الطاش
والطاش فى مطار مستنى ..
فوق حَرْ الجَمُرْ ..طاشين..
والطاشين هناك ..يقروكَ
فى يافطة محلات الدهب خاتم
والخاتم فى أصبع
من إيدين منسية فى جيب اليتيم ..
منسية من زمن الغنا الخواف ..
ومن زمن المدينة تعبى بكريها..
وتقسم فى تلوت الليل جواريها...
وتلبس توب مرتق بى عصب بردان .
.يشق الليل يعريها
وتلعن فى عميق السر ..
سلاليكا وطواريها ..
ومزازيكا وبواريها...
مدينة تحب ..لى حد الموت حراميها..
مدينة بتفتح الأحضان ..تزيد النار مطافيها ...
مدينة بلا تعب تنشاف ..
على كل الجهات ...أسواق
مدينة تصفى عِرْقْ الحُرْ تقسِّمو فى كواريها ..
وتقطع من جذور اللهفة طاريها ...
مدينة الفيها ..ما ليها ...
مدينا الليها مافيها..
مدينة بتكتب الحِجْبَاْت ..
مدينة ..تدين لى شاريها..
مدينة تدين لى كاريها..
مدينة وكت يجينا جواب
تدسو وَسُطْ مخاليها..
مدينةتضيع العنوان ..
مدينة توقف الإنسان
على حد الحَجَرْ والزيف..
ولو وصلت نَهَرْ ألحان ..
تقيف زى ليل تضاريها..
ويا عشمانة ..فى شباكك المقلوع نبت عصفور
وجنب المنجل المشروم نطق طمبور..
وجنب الجدول المفطوم بموية الدونكى ..خير مصرور
وجنب المسطرين ..طوبتين ..واحده وسادة للميتين
وواحدة حجر أساس الجايى بكره قريب..
وطولى من نظر تنشافى بيهو هناك...
وطولى من وتر تتباهى بيهو هنا ...
(عدل بواسطة Almokashfi on 12-02-2004, 02:19 AM)
| |
|
|
|
|
|
|
|
|
|
Re: ديوان جديد للشاعر المكاشفي محمد بخيت : خبر ونص (Re: Almokashfi)
|
[qb]
غنيوة فى حب الوطن المكاشفى محمد بخيت
تصبح على خير يا وطن
أنا ماشى أحلم بيك هناك
وأصحى وألاقيك فى البدن
والروح والقلب المعاك
الأغنيات خلّنى جن
شايلات مواعيدى ولقاك
والعود وحاتك ما اتوزن
كل حرف بسأل وين غناك
أشواقنا سابقات للزمن
وأعماقنا تسأل عن رضاك
حتى الفصول اتزاعلن
ما دق باب صيفك شتاك
سلم عليك وعلى المشن
بى حسك الراقى ونداك
علم حروف اتمحنن
كيف تبقى ليكا حروف هجاك
كلِّم جروف اتلبسن
بى طرحة النيل فى مساك
يدو السنين المابدن
والراحو اشراقة سماك
مالينا وأكتافك فنن
ركت عليهو طيور صفاك
فجراً خيوطو يدمعن
من فرحة هلّت فى رؤاك
يوم البنيات زغردن
فى ساحة من طلعة بهاك
لفحات شموسك وزعن
حباَ يكفى جنا جناك.
[/qb]
(عدل بواسطة Almokashfi on 11-27-2004, 11:35 PM)
(عدل بواسطة Almokashfi on 11-27-2004, 11:36 PM)
| |
|
|
|
|
|
|
|
|
 المهم دايرك في البوست دا تحكي لي القراء كيف واجهت تراب السودان (Re: Alsadig Alraady)
|
المشاء
الصديق الرائع المكاشفي
والله كلنا دايرين الرجعة
لكن الى اين؟
المهم دايرك في البوست دا تحكي لي القراء كيف واجهت تراب السودان عندما حطت الطائرة في مطار الخرطوم؟
دايرين نتعلم منك عشان نعرف كيف نواجه حبنا لأرضنا؟
تعرف انا المسالة دي بالنسبة لي مهمة جدا.
فمرة ذهبت الى موسكو في اوائل تسعينيات القرن الماضي للقاء اختي هبة,
والفضل في ذلك كان لبشير الكردفاني, المبدع المدهش,
بعدين بعد في قطار موسكو وانا راجع اصابتني حساسية في الظهر.
وعندما راجعت الاطباء قالوا ان هذه اثار صدمة نفسية
ودي من الحالات النادرة.وطبعا دا حصل نتيجة لقائي بأختي العزيزة هبة.
فما بالك بلقاء وطن كامل واصدقاء واسرة وأماكن وذكريات و..و....
بعدين انت لازمك شوية تقنيات في عرض شعرك
وحارسل ليك المسالة دي بالايميل
وايميلي هو :
[email protected]
المشاء
| |
|
|
|
|
|
|
|
|
|
Re: ديوان جديد للشاعر المكاشفي محمد بخيت : خبر ونص (Re: Almokashfi)
|
. . [qb]
عناوينك * المكاشفى محمد بخيت
عناوينك بقت ما ليكْ
أدق بابك تلاتْ مرات
وبين لاقيك وبين راجيكْ
أحضّر فى الكلام وأعيد
زمان رسماتى بى ايديكْ
ويفتح بابك المقفول
لكن من ورا عينيكْ
رجعت أراجع العنوان
وافتش فى الحُزُنْ أحزان
أفصّلا بى مزاج نيلين..وأقيسا عليكْ..
عناوينك بقت ما ليكْ
فَرِقْ بين قفلة الضلفة
ومفاتيح عُشْب فى الضفة
ومصابيح فى نهار مسكون
لسه الوكت ما كفا..
ولا اتغابى الزمن عرفة
ولا مسك الأمل عربون
أحبك انتى مختلفة ..
مغرقة فى الوطن إلفة
ومودره فى عقولنا جنون
من جياتنا مُْسْتّلفة
وفى سِلم الجناح رفة
اذا الأبنوس رضع عرجون..
منك كل شىء يشفى
اذا راس الأفق لفا
دواهو فى بسمتك معجون..
متين كان الوطن سلفة
نردها مشية فى الزفة
اذا ما كان وطن مفتون...
يضوى مشيك...
عناوينك بقت ماليك...
سلامى سلام..
بيغشى صباحك الماطر..
يشيلك غنوة فى الخاطر..
ويقطع بيكى سبعة بحور...
اذا كان الغلط ظاهر .
فى غلطة حزنك الشاطر
نلمو نختو تحت النور..
ونبدا نجيب من الآخر..
عناوينا البقت ساتر
مفاتيح فى الأيادى تدور
ويفتح رمشك الساهر .
.مغاليق فى الندا الباهر
وتغصب نظرة من عينيك..
قليبى الفى الأساس مجبور..
وعايش فيك..
عناوينك..بقت ما ليك..
[/qb]
| |
|
|
|
|
|
|
|
|
|
Re: ديوان جديد للشاعر المكاشفي محمد بخيت : خبر ونص (Re: Almokashfi)
|
بين حلم البنية وسنة المحرات منام
عليك من كل شى فى العالم المبسوط
حرن محراتِكْ الأصلى
عشان تربة مِلِحْنا الرشا حلق الحنضل الورانى
داسه مع المِلِحْ تابوت..
وجاكْ مَحْراتِكْ التقليد يِقَلِبْ عِرقِكْ المفلوت
سنونو عُضَام كَلِبْ أصفر
حلب تور المسا المربوط....
حبالو وريدنا ملفوف فى لَبَجْ تَمْره
فى شيل النفَسْ أشميق
وفى خَتْ النَفَسْ جمره
نَزِحْ لَبَجْ الكلام يتسدا باب الطُنْدُبْ الكاواى
وباقى الهمسة فى أرتيقْ ُضحانا الغاب
وحتة ضحكة لاصقه تِحِتْ كبابى الشاى
نفج صف الكلام ندخل
نكسر فى مرايةْ الخاطر البيبان
يجينا الشوق معطّنْ بالطمى ويابس
مدهّنْ بالشتا وعرقان
ومن ِوردةْ شبهنا القاسى نترجاك...
تغطى غُطانا نبرَدْ والصَدُرْ دفيان ..
وحُلْمِكْ راكْ على طَرَقْ العُشرْ أشّرْ
ما شافو المغمضه عينو ..
يوم كبرت عيون الباشا....
لما جدادو قالنا كرْ....
وليك من غابة ختت لى الشِدر بمبر
وليك من راعى فى وَسْطْ النعاج زمبر
وليك من صحرا دست فى الجُمالْ أبيار
تِخِنْ لحم السنام بالرجة والأسرار...
وليك عبق المدينة الفاح وكِتْ تتملا بالزحمه
وتشيل كبايتا وتكتح..
وليك عصار يشيل صمت الدهر يكسح
وليك ضُراع توسدى بيهو هم راسك
وتخلطى بيهو أنفاسك
تطيبى خاطر المكفوت..
نضاريك بالنحاس عمدان/
تميمةْ السكسك المدفون/
مطامير الممالك/ زانةْ النطة/
ومساخيط المغارة وطاعةْ العرجون/
دندين المودر كلو بالفضله /
تلمى جبالك المشايه فى القدله /
هناك تُرَبْ الدهب..عَرَقْ التُرُكْ../..
تيران سواقى معلقه ..
الواقود هبابيد الكلام
البستحما بموية يحتاجا المطر...
فى القباحة الغطست
حجر المطاليق والمعاليق والموائيق والشروط..
نرشرش مُلْحنا الدايب شوية على سنةْ سته
وباقى على المطر زخات..
وحُلمك حافر المحرات
مِتِلْ رغوة نَهَرْ زعلان ...دلق مويتو
انطوى ودفق بواقى الموية فى الزرعة
وناحية شتلة الليمون جدع تيارو فى قرعة
وقال: ياكل شيتاً حى صرفت عليهو دم مويتى
صغرت على زمن يكبر ..
وكِبْرْ الخد على الصفعة
ماشى بلاد أكوس عنوان...
هناك راح اشتغل ترعة
نرتب حلمنا التانى
ونرجع لى البداية نموت..
وحُلْمِكْ يابنية الجدول الشاقى السواقى مقص
قسمتى النخلة منديلين ..
واحد لى الكلام والقص ..
والتانى انتظار أُماتْ بُطَانِنْ فى المتاهة خيوط..
بنية حُلمنا المردوف على سرج الندا الرايح
منو الدلاكى لى فوق والمطر لزاك
دخلتى بيوتنا من رقراق زمن خلاك
فدعتى قوامك المنسلى
من بطن السَقِفْ والمُنضرة الشايلاك
واتلفيتى فى صَدْرْ الكلام مليانه..
قمحاً مشتهيك ضراكْ..
ووعداَ يرتجيك عباك..
حِرِدْ مُحراتِكْ البذرة
وشرد بى صمتك المكبوت...
إذا طلع النهار ليّلْ...
نخُتْ القدرو بيناتنا ...
ونسالم حلمنا الأول...
نولع شمْسَنا التالته...
حترجعى لى التِحِت مُنْجَلْ....
تختى الراس
مخدةْ وكتك المهدوم سفنجةْ صوت...
(عدل بواسطة Almokashfi on 12-02-2004, 02:00 AM)
| |
|
|
|
|
|
|
|
|
|
Re: ديوان جديد للشاعر المكاشفي محمد بخيت : خبر ونص (Re: Almokashfi)
|
يا مــكــاشـــفــي
وينك انت وإنت وين ؟؟؟
أفتقدناك كثيرا هنا في الغربة
ولكن حظ الوطن الذي يحتضن من هم مثلك
مبدع دائما كا عودتنا
وليكن هذه البورد جسر للتواصل
ملحوظة : تفرق جمع الشتات السالم
طلب أخير : لو سمحت انشر قصيدتك مرثية مصطفى سيداحمد التي قرأتها لنا في جدة
ونواصل
جمال السنوسي
| |
|
|
|
|
|
|
|
|
|
Re: ديوان جديد للشاعر المكاشفي محمد بخيت : خبر ونص (Re: جمال السنوسي)
|
الصديق جداً ...جمال السنوسى...جمع الشتات السالم...تفرق أيضاً أيدى سبأ جراحات الوطن..الغربة هنا تسكن الأغلبية ...لم تعد الغربة هى تلك ذات أختام الجوازات وصالات الجمارك...أقسى صنوف الغربة إيلاماً تلك الساكنة غرف القلب العليا..تحياتلى لك ولمن حولك
ابن العمة ..نصر... استعدى عشان نسافر فى عيون المستحيل...كانت قبل أن يسرق الجناة كحل الوطن الأبيض من تلك العيون المستحيلة...سأعدها للعرض هنا...وستجدها منشورة هنا
لك كل الأمنيات
مكاشفى
| |
|
|
|
|
|
|
|
|
|
Re: ديوان جديد للشاعر المكاشفي محمد بخيت : خبر ونص (Re: Almokashfi)
|
استعدى عشان نسافر
فى عيون المستحيل
سرجى الخيل التسابق
زمنى للريد النبيل
ختى فى الأرض الخصوبة
وزيدى موية النيل عذوبة
ونادى للأطفال يغنو ويشدو للزمن الجميل
الزوايا العارفة ريدنا
أبقى أسرعى فى وداعا
والربى العرفت نصيبك
من مواريث البراعة
رسلى لها نغم مسافر
لى لقا الشمس وشعاعا
أبقى فى الأعماق عميقة
ولى مراكب الليل شراعا
استريحى على المرافى
الحالمة فى أبيات قصيدة
وأحزمى الزادبى الكلام
القلنا فى أبعاد جديدة
قالدى نجمات فى مسانا
تضوى فى آفاق جديدة
وكلمى الريح كان تسابق
فينا ومضة ريد جديدة
قولى للشدرة الظليلة
البى مودة ملازمة بابنا
ترعى رحلة عمر باهية
من طفولتنا وشبابنا
وكلميها تشوف عمرنا
الباقى طول مدة غيابنا
ووصى نيلنا على أرضنا
ويبقى عشرة على عقابنا
*هذه القصيدة من بدايات تجربتى الشعرية))
(عدل بواسطة Almokashfi on 12-01-2004, 09:41 PM)
(عدل بواسطة Almokashfi on 12-01-2004, 09:58 PM)
| |
|
|
|
|
|
|
|
|
|
Re: ديوان جديد للشاعر المكاشفي محمد بخيت : خبر ونص (Re: Almokashfi)
|
جزء من مرثية حاضرنا مصطفى سيد أحمد بناء على طلب العزيز جمال السنوسى..وعبره مهداه لكم جميعاً ..... مكاشفى
سرى ذات ليل وطن
شقت تلوتو الصاقعة
جرى فى النيل تجاهنا
لقانا موجةً دامعة
قصّ دروبنا شال
ظرف الرسايلْ الراجعة
دسَّ العود نغم بان
فى سمانا السابعة
خطوتو كم مشت
وأدت جوابنا الطابعة
يستلمو النهار
تقراهو نخلة مرابعة
تلاته عيون تشوف
من وين محنتو نابعة؟
ماشيك الوطن ..
دسدس مسامعو وغنى
شفا من المطر
كيف الكلام فى الصنّه
كيف ورق الشدر
يكتب عصافير جنة
وليه وتر النهار
شدَّ العصب.فى الرنة.
وكيف خنا النشيد
دسينا بابو قفلنا
يا نبى فى فجُر
وصَّل رسالتو أملنا
طاف مدن النعاس
بى قُدرتو اتكاملنا
دقينا الطبول
غابات شجونو دخلنا
جيت فى وكت بعيد
ما صُلنا فيهو وجُلنا
جيت فى زمن وجوه
ما بتعلن المحفوظ
جيت والشوق قِسَمْ
والحظوة لى المحظوظ
جيت والريد ملح
فى خَشْمْ ليل مغيوظ
حتى قطن بلدنا
أبا اشتعال اللوز
وبقى ياخد طريق
لى مخدة ..الطاغى
..
يا فالت من الزمن
الولِد كيمان
لو ساويت معنى الجُرح
بمعنى ...الوحلة فى الإمكان
حنلقى بلد من التاريخ
وتسقى حلمنا
فيض سابع بحر شرقان
وتفتح فى معانى الرحلة
كيف القافلة تلقى زمان
تمد ايديك..
يترسم الوجود بالنية..
تنسج توب رحيل ألوان
كفوفك تسقى
نغم الانعتاق ترنيم
يهب من تالا روحنا نسيم
ونلقاك فى الجبل والوادى
فى النهر العظيم وقديم
فى جرف الغُنا الممدود
على صدر الحَرِفْ والغيم
أبيت ترجانا ...نحن وقفنا
ضللنا الرصيف ياقوت
أبيت تتخلى عن مبداك
وتدِّى شرف جموعنا الموت
شفناك والصباح عرقان
تفل ايد الوداع وتفوت
وتفتح فى الصدى الشباك
وتفرح يوم يصلنا الصوت..
وديكا بيوت..
معلبه فى وطن بردان
معلقة فى كتاب مغلوط
أمانة عليك تصلنا بعد
تصل لى مكانك الشاهق
عشان تسمع أسفنا الناهى
عن منكر وقوفنا كسل
أمانة عليك وصِل روحك المرسال
قَبُلْ مركب على الله تصل..
غُنانا الكان بيحدر ليك
بوصف السمحة جيد وكفل
وإنت تغنى فى أبعاد
ونحن بلاد خيالا أفل
جوابنا مغرّق استفهام
سؤالنا وسط سؤالو سأل
(عدل بواسطة Almokashfi on 12-01-2004, 09:37 PM)
(عدل بواسطة Almokashfi on 12-01-2004, 09:58 PM)
(عدل بواسطة Almokashfi on 12-02-2004, 02:27 AM)
| |
|
|
|
|
|
|
|
|
|
Re: ديوان جديد للشاعر المكاشفي محمد بخيت : خبر ونص (Re: Almokashfi)
|
مرجيحة شمس
رعدة ونهار مبلول
يشُرْ ايدينو مرجيحة شَمِسْ
الانتظار يتدبا بين السعدة والجَرِفْ القديم
يتدسا بين بكرة وأمِسْ
مالك سباليق لى مطر
مردوف على سرج الحراز
محذوف من الرجعة المتيمة
بى دبيب نمل الأرِضْ
مشفوف ملامح من حُجارْ الجير
ومن شبةْ نهارات فى حَلِقْ شوقنا المِرِضْ
مشبوب قَصَبْ نار المُتاحْ المنقرض
ومصبوب مطر ،موية وضو ، وماعون سراب
اتلاقو فى جوف الحبيبة..مع العَقابْ.00
سكت المباح ....بان الفَرِقْ
- ومضيت أسألك التوقف
- إن شوقك ماثلٌ
- أخفض جناح الذل
- عُد من حيث أنت
- تقارع ُ الأوطانَ بالوطنِ المقفى
- قلت خُذْ من طولنا الأمتار قِسْ
ونعلت كل طولاً عِرِضْ
والساقى وقيف الدقايق
دايرة الصارقيل مربع
فى بطُنْ ليل مستطيل
والمسافة البين همودك
وانفجارِكْ لسه أصبَعْ
هزى يا شمس المطالع
ايد نهارك خلى يطلع
وشدى من حيل المسافات
المشت تتدبا تسمع
-لم يكن إلا حديثاً عابراً
-فتجمدت أوتارنا الأولى
-ولم نسمع سوى صوت انكسار الشمس
-فوق منابت الوطن المعلب..
-أينا امتلك الشظايا؟
-لم يكن شيئاً ..ولا.....
انشق فى نُصْ البحر ضُل السحاب المنسحب
يوم جاتك الحيتان تخُبْ
مطعونة فى الجنبْْ الشِمالْ
مالك موطى الخطوة فوق
نزِّلْ كتوفك للسما
الواقع جنوب النهر غربْ الاحتمال
مالك مدوخ وقفة الأبنوس تيبس فى الرذاذ
اتصارعو الليل والنهار ..مين الغلب؟
- ورسمت ظلك..ثم ..لا
- إن المدينةَ تشتهى نفساً مجردة الغياب
- تتساوق الأنهارُ لا تجرى
- ولا تبدو المحطات الأليفة
- غير حزن موغل فى الدهشة العرجاء
- لا تبدو سوى قوس وقاب....
اتغالطو المد والبحر
مين البجر التانى للجذر اللعين
ومنو البيمضى الموية يختما بالزعانف
وصورة للجدول لَبَقْ
وصورة لى خيل السَبَقْ
وصورة للسماكة
خاتين فى جيوبهم شمعة الزيت المُهَرَبْ
ونجمة الصُبحْ المغرِّبْ
وقسمة النيل فى النَبَقْ
|
| |
|
|
|
|
|
|
|
|
|
Re: ديوان جديد للشاعر المكاشفي محمد بخيت : خبر ونص (Re: Almokashfi)
|
ارتياد أمكنة ....لا تقاس ...بالرائحة
هبنى من لدنك ..لغة حافية..
فالطريق سالكة...والخطوة شوك
لن تئن الحروف لحظة أن تطأ الجمرة
أو تزيل عن رمش الحبيبة ..
آخر ما التصق بخديها من عناء ليلة فاترة العطاء....
هزى بجزع شوقك ايتها العصافير
المكسوة بفخار لحظة العذوبة...
هل يستوى جرحك اللدود ...
بوجهك المرسوم حرفاً ناطقاً
على لافتات شوقى الأزلى ...
كنت قابعاً فى ركن قصى
من ذاكرة الأشياء ..
لم يتساقط القمح
من شواهق السنبلة
نحو سفح الإمكان
...لم تتعبأ آنية الزمن المتاح ...
بصليل الثوانى ...
الفتيات السابقات لعهدهن المضىء ..
غمرننى
شئت ثم أبيت
أبيت ...ثم شئت
أسبلت( موفى) قدرتها الخارقة على الإنغماس ..
لم يعد لليمامة زرقاء ...
لم يعد للفجر غايته الكبرى
وعباءة شيخنا الغارق ميكافيلى
تسع بوحه الطافر من شغف قريتنا
التى حملها فى جيبه السفلى الأيسر
مدينة من سابع المستقيلات عن وظائف الإطالة..
والحلم أحدب الظهر..
لم تعد قريتنا فى جيب ذلك المأفون .
..سوى علبة تبغ ..
ولا يبلغ طولها العرضى
سوى المسافة بين آهة مستطرقة
وآهة ترتمى بثقلها الأرجوانى ..
خلف ظلال لوحة رسمتها ذات يوم ..
وظللت أبحث عنها بين طيات الشجو المقيت ...
لم تعد للزرقة بحرها الغارق
حتى أذنيه فى أتون شهوة الإنزلاق...
لم تشق (موفى) عصا طاعة
نهد جزيرة باغتها القراصنة القدامى
وتوالى على جسر صدرها رجال العصابات ..
تسبقهم رماحهم المجتزأة حداً
من قعقعة الصوارم ....الجدب..
لم يكن بوسعها الحديث..
لم يتسنى لها الغضب...
أفيقى ...افيقى ..
فأنت إمرأتى التى وزعت صوتها
على مداخل ومخارج مدينتنا الزائغة فى جسد العالم
شوكة انزلقت ...انغرست فى باطن الكف .
.وتناقلتها الشرايين فيما بينها
حتى حطت بمقصورة القلب.....
تلك الوسيلة المتوفرة
لجعل حارس الليل بعيداً عن مداخل الروح...
قريباً من الجدل العدمى .
.الموروث القطبى
المعطوف على لاشىء..
فيا أيها الوطن
الخرائط القديمة غارقة فى أطلس القواطع
السككك العالقة ...تمور ....
وتفر من خطوة تتلمس مشوارها الممتد
عبر مشاوير لا تصل
الشوق بدين مفرط السمنه ....
.الإمكان قزم موغل فى القصر...
فالشوق معبره حبل معلق ..
.والإمكان مقصده نجمة وبينه وبين النجمة
قدرة القفز العالى ...وعمودية التجاوز الحر ...
الأطفال هنالك بين ارتماءة الشفق ..
.وصحو المسادير
غارقون فى التباس .
..لغة ولغة
أب وأب
أم و أم
مرجيحة زاحفة ...
وأخرى ...لها خاصية جذر البصل ....
ورأس النعامة
مسامات الرمل ...ورياحات القيامة
صدف البحر الأرجوانى ..
وجنوح النهر القديم ...
واقتحاماته لغرف الشلال العاشر....
هنالك حيث لا تنسدل الستارة الحمراء..
لا تقهقه ا لحظة التو
فى صالة مسرح الليل الغجرى
تجلجل بأركان اللهفة لالتقاء ساكنين
أو قصة مدينتين
أو اتقاداً محدود النبرة
والعثرة والإرتماء
لايصمد السياج فى وجه الإختراق
ولا تصمت الجمرة الحارقة عن كلامها المباح
لاتذرو الرياح رماد الأسف العميق
لا يشهق الناى ..لمجرد لمحة
لا ينبس الجوع ببنت قمحة
لا يحفل التانغو بآخر و أول
ولا يتحول الثبات الراسخ ...فى ذهن الكوالح
لا تستدر المداخن عطف الروائح ...
لاتنتهى القصة بعواقب ونهايات
لا تنتهى الرقصة ....تحت أقدام الجميلات
العطر مورق فى شجرة الحناء .
.والعشب يتلوى بلا ساقين تحت غطاء الروح
الرمل ... مسام ...
الوطن غاص بوحشته ...بدهشه تفغر فاها...
بأسئلة محملة ببراكين الإذابة ...
فأسالينى أيتها الجميلة شيئاً أنا فاقده...
أسألينى وطناً أتخلل خصلات شعره بأصابعى التى ترينها بكفيك
وأسبل عليه جفناً سينطبق على ثلاثتنا....
اغترفى من نهر أذابنا فى قاع صبره وأعاد تشكيل قدراتنا ....
لتسقى ....شتلة ورثتها حلماً عن حد...
أذبتها فى قوانين الإفاضة ..لتنمو وتكبر ...
تكبر وتنمو
فأهز بجزعها ......
أو أدع جريدها ركنى المفضل فى مقهى
فى محطة ما ...
فى وطن ...أمسكت بى رياحه المستباحة..
ولم تعصف بوجهى أعاصيرة المنتقاة .
.من أجمل عناصر حبييتى ..
ومن أبعد وديانها صرخة ..
ومن أقصى غضبها إلى أوج سكونها...
الى التباسها الأبدى بمحطة .
.موسومة بقطاراتها العائدة.....
|
| |
|
|
|
|
|
|
|
|
|
Re: ديوان جديد للشاعر المكاشفي محمد بخيت : خبر ونص (Re: Almokashfi)
|
مدخل البلد الغُنا
قلت : الرحيل
قالت: كفاك،
لمتين مبارى دَرِبْ عَصاكْ
قلت : الوطن!
قالت: هَدَاكْ
بين رمشة الشمس وجَناكْ
ياروحى تنسدل الغيوم
أرجع أفتش مبتداك
تنسانى خطوات ما بتَصَلْ
ترجانى أشواقك معاك
مخرج شتاتنا زَعَل غُنا
مدخل بلدنا شعور رضاك
والليلة جيت من آخر الشهقة
وعصافير المدن..
راكات على أغصان نداك
ما كنتى خطوات فى البعيد
لا رجفة الليل فى المدن
لا وقفة ..لا تيمة شجن
كم رن فى صوتك نشيد
وأنا فى زمن سامع خطاك
من مدخل البلد الغُنا
للمشية فوق زعل الشِراكْ
|
| |
|
|
|
|
|
|
|
|
|
طبعا انا ما بهظر في المسالة دي (Re: Alsadig Alraady)
|
عزيزي المكاشفي
شايف كيف" الفيد باك" ممكن يكون يعمل معجزة؟
اها بي سرعة عرفتا الكودات,
لكن ما قلت منو القال ليك؟
طبعا انا ما بهظر في المسالة دي
لانو ثقافتنا فيها مشكلة احقاق الحق
تجربتك لطيفة
وانت اتعلمت المسالة في ايام معدودات,
نحنا قضينا زمن طويل خارج هذه المسالة
وبولا دوبو قبل كم يوم اتعلم كيف يعمل الاستشهادات
المشاء
| |
|
|
|
|
|
|
|
|
|
لقد خذلتني في ردك الاخير عن "كيف واجهت وطنك أيها المشاء الايب" (Re: Alsadig Alraady)
|
عزيزي المكاشفي
جيتك مرة تانية
لقد خذلتني في ردك الاخير عن "كيف واجهت وطنك أيها المشاء الايب"
طبعا كلامي بيتعلق بي تنسيق الصفحة
يبدو أن هنالك من "عمل " ليك بالنيابة ذلك التنسيق,
و"في ميزان حسناتو"
المهم كان ممكن تنسق الكلام داك من داخل صفحة الرد نفسها
ويا ريت لو صديقنا بكري عمل بوست اسمو او مهم مضمونو ارشادات للأعضاء الجدد حول كيف ممكن يستفيدوا من الامكانيات المتاحة في المنبر في سبيل المزيد من الجمال والاتساق
المهم شكرا لتلبيتك لطلبي
ونحنا قاعدين نسمع الان
واصل
المشاء
| |
|
|
|
|
|
|
|
|
|
Re: لقد خذلتني في ردك الاخير عن "كيف واجهت وطنك أيها المشاء الايب" (Re: osama elkhawad)
|
عزيزى المشاء العظيم....أسامة تعلمته من محركات البحث ....عندما بحثت عن أكواد المنتديات..طبقته ففشلت وفشلت ثم نجحت...عثرات السايبر تعلم مشى التجربة...!!! سرنى حضورك الباذخ....وليتك بالوطن ...توصيف عودتى أمر صعب التعبير ...أتذكر يا أسامة يوم أن قمت أنت بوصف مباراة كرة قدم فى جريدة كلية الصيدلة الحائطية بين منتخبى الصيدلة والآداب إن لم تخنى الذاكرة...فسألك آخرون بعد القراءة ..أين هى كرة القدم؟!!!...فقد كان وصفك قطعة أدبية رصينة ...حلقت فى بعيد الرمز وعمق المضمون.. فهكذا الوصف يا صديقى...يختنق أحياناً بالراهن لاسيما اذا ضربت جذور حدثه فى ما مضى.. ونواصل وقل لى متى عودتك ...لنرسم لك خريطة القدوم ...أيها الشفيف مكاشفى
(عدل بواسطة Almokashfi on 12-05-2004, 11:15 PM)
| |
|
|
|
|
|
|
|
|
|
المهم واصل كلامك (Re: Alsadig Alraady)
|
عزيزي المكاشفي
كويس انك صلحت "النتسيق"
وأنا هسع ,رغم انو بكتب عن خطاب الاستاذ, واتحاد الكتاب, وحاجات كتيره اخرى,
لكن أبحث عن سكن مناسب في غربتي الجديدة
طبعا دا ما اعلان
المهم واصل كلامك
المشاء
| |
|
|
|
|
|
|
|
|
|
Re: سأمايلك –وفقا لما نحته بشرى الفاضل- غدا (Re: osama elkhawad)
|
أستاذ المكاشفي
كيفك يا رائع ، وشق شديد . اتصلت عليك عدة مرات ولم أسعد بسماع صوتك .
ليتك تسعدنا بقصيدة قدام بندقية غن شهيدنا واقف وخلف البندقية صورة طاغية راجف . والوصية في الذمة شريطي ما تضيعوا ، لانه النسخة الوحيدة لحفل وردي أو بالأحرى مجموع حفلتي الاستاذ وردي في نادي دلة وفي كازينو البلولاقون . وبهذه المناسبة أسأل عن التغيير في المقطع في قصيدة فتش في ترابك هل هو من عندك أم من عند الرقيب :
Quote: زرعو خصام جنوبنا ..فى برداً شال غُطانا .. ..
طول تاريخنا عايشين فى السودان ضرانا
فينا لسانو عربى وفينا لسان رطانه..
مختلفين ثقافة ومختلفين ديانه
من كل التباين وحدنا إنتمانا
ومتفقين فى حبك يا عالى المكانة. |
لاحدي ما سافرت مننا كان مطلع المقطع دا:
فرضو خصام جنوبنا بي سبب الديانه
والأديان سماحة وروح الدين أمانه
أكرر شريط الفيديو حقي أمانه في ذمتك وتحياتي للعيال وأمهم ، وحميد وأزهري محمد علي . وقول لي فاطني الدولارات الخيتيهن لي في اللحاف وصلن ما شافوهن .
ولك تحياتي ومودتي
أبو قصي
| |
|
|
|
|
|
|
|
|
|
h (Re: Alsadig Alraady)
|
SAaaaadik
we are very angry for you
this message not from me or rogia
but from Eyas and Waref
buy Ya sheeeeeeeeeeeeen
| |
|
|
|
|
|
|
|
|
|
Re: h (Re: خالد العبيد)
|
أعزائى
أسامة مايلنى ....نحن فى الإنتظار..تحياتى لك ولمن حولك
طه...كيف أنت ياصديقى ..أعرف أنك كنت متلهفاً لمعانقة الوطن ..ولكن..عدت ثم قفلت راجعاً !!! سيأتى اليوم ..وكما قال شاعرنا محجوب..
شعباً ترترِب حيقوم.....وفجراً كالكرب حيعم...
وأنا أسألك يا صديقى طه... أن تزودنى بنص مرثية مصطفى كاملاً ..إذا تمكنت من ذلك..تحياتى لك ولمن حولك
أبو قصى ..أشتاقك جداً...وستجد النصوص التى طلبتها هنا ...وتساؤلاتك فى مكانها ولكن ....زرعو خصام جنوبنا بى سبب الديانة...الإسلام سماحة وروح الدين أمانة
سرقو دفا الليالى فى برداً شال غُطانا.......هنا حدث التداخل الطباعى عزيزى أبو قصى ..هنالك إضافة وليست حذفاً أو رقابة..أرجو أن نتواصل أكثر ...تحياتى لأسرتك ومن هم حولك
مع ودى وتقديرى
المكاشفى محمد بخيت
| |
|
|
|
|
|
|
|
|
|
Re: h (Re: Almokashfi)
|
عزيزى ...أبوقصى والجميع هنا....هذا ما طلبته.....
قدام بندقية غنى
شهيدنا واقف
وخلف البندقية
صورة طاغية راجف
تتباين مواقف
بين إنسان قضية
ودكتاتور مخالف
حتى النهر جارف
يسقى وريد شموسنا
ويفرد ضلو وارف
الثورة الفتية
ما لون أو زخارف
ولا ماعون يلملم
جواهو السفاسف
الثورة إشتعالا
مسكون بى جمالا
حين الحُر يسابق
أزمانو ويكاتل
لما الأرض تنبت
فى صوتا السنابل
تبقى الرحلة ثورة
والإنسان قضية
لا حبلاً معلق
لا صوت بندقية
حد من انطلاقةْ
انسان القضية
|
| |
|
|
|
|
|
|
| |
Alsadig Alraady
Tumadir
Almokashfi
osama elkhawad
فتحي الصديق
جمال السنوسي
Nasr
Safa Fagiri
طه حسن عبدالله
ABU QUSAI
خالد العبيد
فيس بوك
تويتر
انستقرام
يوتيوب
بنتيريست