|
|
|
 Re: يا خازن الأحزان (Re: أبوذر بابكر)
|
الحبيب أب آمنة .. المطر
الشوق بحر ياخي
انت لسة في جمالك دا
بس الجديد عومك في بحرين
بديت بي بحر أبيض الرقراق
وختمت بي الأزرق الدفاق
وفي الحالتين كلك .. كلك .. حلوو
شغلني الشكل عن المضمون
وتهت في يغني المغني وكل يبكي على ليلاه
بحثت عن ليلاي في حروفك فتوارت ولوحت
بكفها المخضب ثم احتجبت
احتاج لإرجاع البصر كرتين لعلي آتي منها بقبس أو أجد على النار هدى
تحياتي يا أبا الفيض
ومودتي التي تعلم
وأسمح لي بسؤال المشتاق
وييييييين جبران ياخي
| |
 
|
|
|
|
|
|
|
|
Re: يا خازن الأحزان (Re: singawi)
|
أخانا العزيز سنجاوى
وبعد التحايا والترحاب والسلام
نبدا من الختام
واراك هيجت الذكرى
اثرت لواعج الأشجان
وكلما اضاءت الحروف وهلت اقمار الكلام
يخضر حضور شيخنا امام الطيبين جبران
هو جبران براهو نان ؟
عقد فريد انفرط يا سنجاوى
زى حبات مسبحة خضراؤ ونضيرة الملامح
انفرطت واتشتت
مشو ومشينا
لا كمل المشوار ولا الزمن جبد نفسه ووقف ينده معانا
عبد الله جعفر
برضو هو حت كمان
انتبذ ركنه القاصى البعيد وخلانا
بقينا نبرك فى الفقرا وننده
مدد يا ناس فوق
مدد يا ناس فوق
اغيثونا وامطرونا واسقونا
مالك علينا يا سنجاوى ياخ
كدى خلينى هسه النتكرف عبق واريج جيتك دى
النفرح بيك
اصله الفرح بقى ممحوق والله فى ايامنا دى
وتانى غقب بجيك صاد
| |
|
|
|
|
|
|
|
|
Re: يا خازن الأحزان (Re: أبوذر بابكر)
|
الحبيب المطر
يا زول طمنتني ماني وحيدي المعبور
وخانقني الشوق لأخوان الصفا وخلان الوفاء
يعلم الله كل فترة بستعين بي عمك قوقل
وافتش عن المحراب لأعانق حروفهم واقالدها
شيخنا جبران والراهب عبد الله جعفر
وحبيبي بناديها وتوأمه السارا أميرة البنفسج
نورا ... صلاح درار.. سودانية .. دريييمز
الرحمابي /.. سماح .. يا حليلهم دوام بطراهم
يعلم الله يا حبيب قبل فترة اتذكرتك واتذكرت
أمحمد زين مكتول أم عيسى وإكرامك لينا
بي بكاهو الما خمج .. وقوقل عامل زي مركبة السفر عبر الزمن ديك
كل ما هاجت الذكرى بنقرات كيبورد يرجعك كم سنة لي وراء للزمن الأخضر
قبل دكتاتورية ساس يسوس فهو ممسوس وقبل عواصف العنصرية النتنة
التي شاكلت الرماد .. كان شالوا ما بنشال .. وكان خلوا سكن الدار
إيييييييييه يا حبيب .. الليل قسم .. و2011 في آخر يوم فيها فجعتنا بخطف حبيب
لذا تجدني تايه الخطى .. مخمور العبارة .. مضطرب العاطفة
اقتبس مني واقول :
إلا في آخر خطابي
كل قصدي أقول فراقكم سر عذابي
| |
|
|
|
|
|
|
|
|
|
Re: يا خازن الأحزان (Re: singawi)
|
الله على الوجع النبيل
الله على الدمع البرف
على الالم النزيف
على كلامك البوجع ياخ
اتمنى ان يعود هذا العام على الوطن بالخير وينسدل اخر ستار للاحزان
| |
|
|
|
|
|
|
|
|
|
Re: يا خازن الأحزان (Re: singawi)
|
عزيزى السنجاوى
وزى ما جاء فى أثر الشعر
لكل شئ اذا ما تم نقصان
أو كمان زى ما بقول اهلنا
كل اول لهو آخر
نقعد نحن "نتشعلق" فى بدايات الأشياء بى يد واحدة
وبالتانية نراود فى النهايات عن نفسها الأولى
نتشبث بحبال الذكرى الأوهن من حبل العنكبوت داك واقرب من حبل الوريد
نغنى للشموس وندوبى للنجمات
علنا نفوز بشوية ضوء ونور وحبة فرح نستعين بيه على وعثاء الغياب
ويخدر لينا شوية حيضان وتقانت فى واطاتنا اليباب
وبكل تداوينا
باقى لى مافى شى فضل غير العلاج اللخرانى داك
الجرحو نوسر بى
غور فى الضمير
فوق قلبى خلف الكى
يا ناس الله لى
خلينا نمشى يا صاحبى فى درب التلاقى
والسايقه واصله
وكان حيينا بنلاقى اؤلئك القوم الجميلين
وعساك انت بخير وعافية وسعادة
| |
|
|
|
|
|
|
|
|
|
Re: يا خازن الأحزان (Re: أبوذر بابكر)
|
العزيز جد
ابوذر
برضو العائد سنجاوي
الشوق مليون
وكدي يا ابوذر خليك في البوست دا مواصل يمكن الباقين يجو
وبرض يا خازن الاحزان
ويذات الحلم القديم
زي ما انت!!!!!!!!!!!!
مادام طريقك لي سفر
وحلمك مدمدم ومتكي
يبقي الحلم رجع السراب
الجاي من وجع العتامير
التشابي علي المطر
والدنيا صيف
لفح السموم
عطل مقاديف المراكب والشدر
لا غيم يضل
شوق الارض
للجاي باكر
من سفر
لا ضحكة
لا كبة دموع
شان خاطر
الولد البناتق للرجوع
ياقلبي هوي
فترت خيول احلامنا
من شيل الغنا
المليان بكا
ياربي من جودك
فرجك مطر
تغسل خطاوي الرجعة
من تعب البهادل والسهر
يالله من كرمك مطر
الود اقصاه ياصديقي
عبد الله جعفر
| |
|
|
|
|
|
|
| |
أبوذر بابكر
سلمى الشيخ سلامة
mohmed khalail
فيس بوك
تويتر
انستقرام
يوتيوب
بنتيريست