زارتني أمي في المنام وبكيت زي الجهال أتجرست شديد خلاس وحدتثتها عن حالي والبلد والناس يمه وردي ما فات وأصبح أحلي نغمة تصارع متاهات العدم وحميد رحل ولسه بينادي نورة وسلاحوهناك مجدوع كان أصدق نمه ولسان الغلابه منو بعدو برفع الصوت بكلام أهلنا الحنان ونقد كمان جاءكم هناك لما الدار خلت من كريم خصال و أمان أخ ياميمه أوجعنا زادت وأحزاننا بقت بحور
+++++++++++++++++++++
يمه ممكن أجيكم أنا ما الزمن دا للنبيل حسرة وندامة ماهي دنيا الفاجر اللئيم بجدارة والله مشتاق ليك كتير وبعدك غابت شموس ونهاراتي هضلمان والقمرة في سماها بخلت علينا بالضي والبت البريدا أنا قلت ما عاد بيننا شيء سألتك بألله تسوي بنيه من الحلاوة بالحيل بدور لي عروس محتاجك منو غيرك بتفقد أحوالي بالرحمة والحق بكمل نواقصي بالنصيحة يهديني يمه أتمنيت رفيقة عمر وصغار يلعبوا يضجوا هناوهناك ما البيت بعدك أصبح خلا والبلد الزينه ديك أتبهدلت ونهبوها التيوس يمه بالجد داير أجيكم أنا بس كيف الطريق والوسيله بعد الحال أضحي عجب والدنيا ضنينه أرقدي هناك مطمنئه ولدك بالجد نضيف وأنشالله ربي يستجيب دعاي و باكرأجيكم شهيد عرفتي يمه حالنا أتبدل كيف وعالمنا أصبح مر حنضل
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
ismeil abbas
فيس بوك
تويتر
انستقرام
يوتيوب
بنتيريست