عاجل / تطور المخلوقات .. نظرية جديدة

دعواتكم لزميلنا المفكر د.الباقر العفيف بالشفاء العاجل
مرحبا Guest
اخر زيارك لك: 12-13-2024, 09:11 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مكتبة هبة عثمان عبده(سمرية)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
05-04-2010, 09:46 AM

سمرية
<aسمرية
تاريخ التسجيل: 01-16-2005
مجموع المشاركات: 2803

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
عاجل / تطور المخلوقات .. نظرية جديدة

    (1)

    تطور المخلوقات ..

    ***

    منذ الالاف السنين ، والمخلوقات تتطور حبة حبة ، فكما لاحظنا ان الانسان الاول كان طووويل وضخم الجسم ..
    وحاجة كدا لا يصدقها عقل الا لو شاف قبر سيدنا هابيل في الشام .. غايتو القبر دا من هنا لهناك ..
    المهم المخلوقات دي حسب ما انا قريت قبال دا انها كانت كبيرة وضخمة بشكل كدا خرافي ..
    حاجة اسمها الديناصور وشيء تنين .. وشيء الدودو .. طبعا عشان تناسب بنية الانسان الاول دا ،
    يعني اكيد ما ممكن الانسان كان يكون قدر الهجمة وبالمناسبة نفسي اعرف الهجمة دي قدر شنو بالضبط ؟
    وهل الهجمة ذاتها قاعدة تتطور ، بمعني انها قاعدة تكبر ولا تصغر حسب تطور الازمان وكدا ، السؤال دا اجباري . اها كنا وين ؟

    اها الانسان دا بما انه كان بالشكل داك لازم المخلوقات البتعيش معاهو في البكان ذاتو تكون هي ذاتها قدر الهجمة ،
    عشان الحياة ما تكون ساهلة برضو .. لانو السهولية ما بتخلي فيها متعة المكابدة واللذي منو ،
    لذا بما ان الانسان بدا يصغر حجمه كمرحلة من مراحل تطور المخلوقات ، بالتالي يجب ان تصغر احجام تلك المخلوقات ..
    بالمناسبة التطور دا شمل كائنات تانية برضو بس ما عارفة ادرجها تحت ياتو باب من ابواب المخلوقات ..
    مثلا الحاسوب دا قالوا كان قدر الاوضة .. حاجة كبيرة خلاس ، لما تكون داير تدخل بيانات..
    بتفتح باب وتدخل انت بروحك قصدي بكرعينك وتكون واقف فوق سطح المكتب تخت البيانات ..
    وديك ليها قدام عينك تتحول معلومات كانك واقف في فرن بلدي وتجي مارق بيها ..
    دا غير السيارات .. هسي كلها بقت صغيرة صغيرة .. البصات ضغطوها لــ هايس وغريس ..
    وامجادات .. الـــ فلكسواجن بقت ركشة .. وهكذا ..

    طيب خلونا نرجع للتطور حق المخلوقات ، انا بعتقد ان التطور دا بعد مرور الالاف السنين حيجعل الكثير من المخلوقات تنقرض تلقائيا ..
    مثلا التمساح رغم انو قالوا حجمه صغر شوية من زمان .. لكن ما اتطور شديد ..
    اها انا بتوقع .. التمساح دا يحل بدل عنه الضب ..
    بس بعد معاجلة حيوية للضب عشان ما يخاف من الموية .. ويبطل القراية الكتيرة .. ياخي مزعج بشكل .. ما طبيعي المخلوق دا ..!

    وبما اني بقيت عالمة في تطور المخلوقات دي مافي زول حيقدر يغالطني في انو السحلية دي ما هي الا تنين متطور ..


    لاحظ الصور






    دي سحلية




    دا تنين


    اما النمور فقد تترك الساحة لكدايس الخلا كمرحلة اولى من التطور النوعي ،
    ثم تتحول فيما بعد لـ كدايس المنازل رغم اني لا اثق في كدايس البيت لانها تطورت بشكل سريع جدا ..
    بعد ان تذوقت الوجبات المعدة خصيصا للقطط ، ياخي زمان الكديس كان غير الفار ما بياكل ..
    هسي بعد تطور المخلوقات دي الكديس اصبح يتقزز من الفار .. وما بحب يشوف شكلو ذاتو ..
    عشان كدا الفيران بقت تقدل ساااي في شوارع بورتسودان .. التطور دا حيغير حاجات كتيرة خلاس ،
    زمان الكلب كان بسك الحرامي .. واقل حاجة بعملها هو بمسكو من جلابيتو ..
    هسي الكلب لو كتبت على جبهتك حرامي ما بقرب منك .. برضو دا بسبب تطور المخلوقات ..
    الحرامي ذاتو مخلوق متطور .. زمان كان بكوس حفيان .. ولابس جلباية وسخانة ..
    سي الحرامي بقى عيني باردة .. بجذمته وكرفتته وقميصه النضيف وعندو سواق
    .. بس محيرني الفار دا لو اتطور حيبقى شنو ؟

    قبال ما نمشي بعيد احكي ليكم النكتة دي عن تطور المخلوقات برضو ؟

    قالوا في مسابقة للكدايس اقيمت في امريكا ..

    جاءت الكدايس من كل بلاد الدنيا للمشاركة ، من ضمن المتشاركين كان في متسابق من كدايس السودان ..
    الناس استغربت وتوقعت الهزيمة لذاك الكديس الهزيل ..
    المهم المسابقة بدت والكدايس جرت ومعطت ريش بعض ، وجوطة شديدة . .. عارفين الجا الاول منو ؟


    كديس السودان طبعن .. المهم طوالي ناس الــ
    bbc و cnn
    وقنوات تانية كتيرة اتملوا حول الكديس السوداني دا ..
    وعاوزين كلهم يعرفوا كيف هو قدر يفوز .. رغم انو سامعين انو السودان فيهو مجاعة وحروب و ... لا نور لا موية !

    الكديس طوالي شال المايك وقال ليهو : طبعن انا لما كنت في السودان كنت نمر ... عشان كدا !


    قرقرقر

    اها كدي حنرجع للتطور دا تاني ونتكلم على نحو علمي شوية ،
    زمان قالوا لما لقوا متحجرات لمخلوقات ما لقوا اي متحجرات لأبقار أو أغنام أو إبل أو أسود أو كلاب أو دببه أو ذئاب أو إلى ما هنالك، ..
    يعني المخلوقات دي اما كانت حاجة تانية واتطورت لما وصلت لينا بالشكل دا ،
    يا اما ما كانت في من اصلو .. بس في سؤال بفرض نفسو .. ما كان عندهم ( سيد لبن ) كلوو كلوو .. ؟؟
    سبحان الله ..

    ياربي الديناصور كان بخلي زول ( يحلبو ) .. بالجدا حاجة تحير خلاس ..

    ولبنو ذاتو بتشرب ..؟

    طيب عشان ادعم ليكم كلامي دا ، الدببة مثلا ..
    قاعدة تتطور حسب تطور البيئة الحولها .. يعني الدب القطبي .. ما زي الدب حق اي بكان تاني ..
    وشكلو قاعد يختلف وعندو تغيرات عضوية كتيرة جدا عن دب اي بكان تاني .. بس سؤال ليه السودان دا ما فيه دببة ؟

    انا غايتو عارفة الاجابة ، بس عاوزة اخلي المسألة لخيالكم الفضفاض ..

    كلامي دا يا جماعة مبني على دارسة كافية على الفار مووش دايمن الدارسات العلمية بتدعم بتجارب عملية على الفيران
    اها في فار الكان مترصد دولابي فترة من الزمن ..
    واجريت عليه عدة تجارب .. بعد ما جبنا كدايس الدنيا كلها وما اشتغلت بيهو شغلة .. غايتو انا قلت بكون بسبب تطور المخلوقات ..

    لكن في زول تاني قال لي الفار دا بكون عامل ليهو ( رتينزا ) كاربة ..!

    ***


    طيب البيوت برضو اتطورت .. عشان تناسب المخلوقات الجديدة

    البيوت زمان كانت قلاع ، يعني قصور وحاجة كدا كبيرة وضخمة ..
    هسي بقينا نعملها متاحف وقلعة صلاح الدين ، وقلعة بيت العظم .. ومش عارفة ايه ؟

    يعني المخلوقات الزمان ديك ما بنوا القلاع دي عباطة ساي منهم .. لكن عشان حجمهم كان كبير ..

    اها تطور البيوت دا ذاتو ادى لتطور مستلزمات البيوت ذاتها .. مثلا المفراكة ..
    حقت الاكل ما الكانوا بيلبعوك بيها ديك .. زمان كانت كبيرة وغليدة ..
    هسي بقت صغنونة بشكل كدا يحير ..
    وكمان في واحدة حقت كهربا .. اتخيل ربات البيوت ديل يقومن ..
    يستخدمن المفراكة الكهربائية دي في جلد الشفع المشاغبين .. يا للهول ..

    بس في سؤال حشري بفرض نفسه ، الكسرة دي مالها ما اتطورت ..
    يعني ياها الكسرة وياهو دقيقها .. رغم ( المنتج الجديد بتاع زادنا ) ..
    واللي زاد العصيدة ليونة .. اها انا بعتقد ان تطور الكسرة دا بطيء خالص ..
    يعني من السنة القبال يحفرو البحر .. الكسرة دي ما اتطورت شديد .. حتقولوا لي صاج الكهربا وما ادراك ..
    لاحظو للحجم برضو .. صغر كيف ؟
    لكن بما ان الكسرة دي مخلوق قومي .. مفروض يكون حاصل ليها تطور كدا ما عادي ..
    وغايتو ما عارفة لكن قاعدة افكر في الحتة دي شديد .. وبعدين الويكة ذاتها ما اتطورت ..
    ياهو نفس الاضطهاد حق الكسرة .. بالجد حقو تتعمل رابطة او جمعية لمناصرة الكسرة والويكة لينال كل ذي حق حقه ..
    والتهميش الحاصل .. للكسرة دا ما بيرضي مخلوق ..

    الكركدي .. اسحن منهن ؟

    ما ياهو بقى معلب في صناديق ، وشيء مسحون .. وشيء مدقوق .. وبيصدر بره كمان !

    ولا عشان المخلوقات الراقية قاعدة تحب الكركدي ؟

    مالها كسرتنا .. ومالها ويكتنا .. مافي زول شغال بيهن .. الا ستات الكسرة .. الله يديهن العافية .. !

    حاجة تانية .. طالما البيوت قاعدة تتطور
    .. والحاجات الجواها قاعدة تتطور .. ادوات الكمش ذاتها قاعدة

    تتطور .. ... الهتافات .. ذاتها اتطورت .. وبقت الكترونية
    .. vote
    ... لاسقاط المادة 76 .. من قانون تطور المخلوقات ..


    زول سألني انت الخلاك تفركي في المخلوقات دي شنو ؟ شربتي حاجة ؟

    قلت ليهو امبارح فطرت بـــ فول بدون دنلكة ..
    وشربت كباية عصير ليمون بالنعناع وبث .. يكون من الكباية مووش ؟

    اها شوووفتوا الكبايات ذاتها اتطورت ..
    زمان الكباية قدر البستلة .. لمن تمسك الواحدة فيهن الا تسند بيدك التانية ..
    والقزاز حقها ذاتو تخييين لمن عندو قعر .. كدا .. عجيب لمن بيضربو بيهو المثل ..
    هسي امانة في ذمتكم قريب دا شووووفتو ليكم كباية بالقعر العجيب داك ..؟؟
    القزاز ذاتو هي يا يمة اتطور واتطور لمن بقى فابير قلاس .. وخفيف ولفيف ... !

    يا سلام على التطور .. الحاجات كلها بقت حاجة صغيرة ..
    قبيل الصباح وانا جاية المكتب وقفت جمبي عربية همر زي حقت
    Mbc action
    .. ياخي الشارع كلو .. رقبتو اتكسرت ..
    وهي زي الملكة اليزابيث .. واقفة بفخر ..
    اها شوفوا تطور المخلوقات دا كيف .. لانو الهمر دي ما هي الا تطور للمخلوق الاسمو ( دبابة ) .. !


    في واحدة بعرفا رأسها لسه كابس في المدرسة وجهجة الامتحانات رغم انها اتخرجت قبالي بعشرة سنوات..
    هسي خليهم الطلبة .. المقررات ما كشت ؟

    وين المناهج الكبيرة المليانة ، شيء ندرسوا .. وشيء ما نجي بجمبو .. ساي ..
    في كتاب كان اسمو الهندسة التحليلية .. بت جيراننا قالت لي الكتاب دا هم ما حصلوووه ..
    يعني ما لحقوا قرووووه من كبرة الكتب العندهم ...
    ياخي التطور دا ريح الطلبة ديل شديد .. زمان ( القصائد ) كان معلقات في الشدر ..
    هسي بقت صغيرة وحتة كدا عشان تناسب مسج الجوال ...

    انا اتخيل لي التطور دا عشان ..
    الكرة الارضية دي تشلينا كلنا .. زمان الناس كانت شووية وهسي كترت ..
    بعد ما الناس بقت تلجأ للتلقيح الصناعي .. زي ناس ( ناديا سليمان ) المراة العنبكوتية ديك .. عندها اربعتاشر شافع وشافعة ..

    .. غايتو ..

    اها العرس ذاتو .. فيهو تطور رهيب للمخلوقات ... حاجة تخوف عديل ..

    بس التطور حق العرس دا ، بيكون ظاهر شديد في الوقت ..
    يعني الوقت بيحصل ليهو تطور فلكي عديل ..
    زمان الوقت كان بكون واسع ومتسع .. وفاضي ...
    وقت كان رب البيت دا بيرجع الساعة اتنين .. ويكون شايل في يده بطيخة ..
    وفي اليد التانية كيس الملاح والسلطة والجريدة باليد التانية مع البطيخة .. !

    يصل البيت .. ياخد دش ويديها نومة بعد ما الولية.. تجيب كباية عصير الليمون ..
    ويصحا يصلي العصر .. ويتغدى بطبيخ بطاطس ما بايت ..
    وملاح ام رقيقة معاهو شطة خضرا بالليمون وسلطة اسود ..
    ويشرب كباية الشاي بعد ما ياكل الكاسترد ويقعد يقرأ الجريدة ..
    ودا كلوو الساعة خمسة ما جات .. بعد داك يشيل كرسيه ويقعد قدام خشم الباب ..
    والولية بجوة تكون بترش في الحوش المفروش رملة .. وتفرش السراير ..
    وتخت جمبها تربيزة فوقها حفاظة موية باردة ... وكرسي واحد !

    المغربية ، المرا تكون قاعدة ترمي في لقيمات شاي المغرب ..
    وتخت اللبن في على النار وتكشح فوقو شاي حب .. وتخليهو يغلي ..
    تخت السكر المدقون في السكرية ام غطاية وجمبها كباية شاي اللبن وصحن اللقيمات ..
    وتختها قدام ابو الوليدات .. وتقعد تونسو ..
    هي الليلة النعمة جارتنا .. ما وقعت وكسرت مخروقتها ..
    اتخيل كانت طالعة فوق السلم حق برج الحمام .. الشقية انا قلت ليها يا النعمة خلي الوليدات يطلعو.. ما سمعت كلامي !

    وعمك اب طاقية .. ساق مرتو المطوفشة رجعها لاهلها .. واتشاكل معاهم .. قالوا اخوها .. ضربوا بالعتلة .. كسر ليهو كراعو .. !

    وانت تكون شالتك نومة تانية من سماحة الونسة الدقاقة دي ..

    هوي يا راجل انت نمت ؟

    **

    بالله شووفوا التطور الحصل للعرس دا .. يا حليل اللقيمات وبرش الصلاة ..

    يا حليل .. شاي المغربية ... ورشريش الحيشان ..


    بس اعتقد ان التطور الذي صاحب العرس والاوقات المنزلية دا ..
    عشان الزوجات اصلن ما يشعرن بفرار الازواج من عش الزوجية ..


    بالنسبة للتطور الحصل علي انا ..

    انا بصراحة زيي وزي الكسرة ..
    تطوري نفس تطور مخلوقات السلاحف ( ابو القدح ) يعني .. بطيء بعيد عنك .. ودي حاجة خلتني اشعر بالتهميش الخُلقي ..
    يعني المخلوقات كلها قاعدة تصغر .. الا انا قاعدة اكبر .. حاجة بتغيظ عديل كدا ..


    ولا هو التطور بتاع المخلوقات دا ..
    ما بحصل للمخلوق في حد ذاتوو .. بمعنى ان كل مخلوق ..
    قادر على التطور في اطار الحوجة الماسة .. لخلقة جديدة ..
    كأن يكون مذيع في قناة النيل الازرق .. او مذيعة ... او مغنية .. او ممثلة ..

    برضو التطور بتاع الجماعة ديل ،
    في السودان من النوع السلحفائي .. يعني نادر تلقى ليك واحد منهم متطور بشكل كدا ملحوظ .. ودا اظنو برضو نوع من التهميش الخلقي ..


    واحد قال لي انت لسانك حاصل ليهو تطور رهيب ..
    لكن
    لساني . ما حاصل ليهو اي تطور .. لسه قاعد في محلو ..

    اما عن كي بوردي .. لاحظت عندو شوية تطور كدا غريب ..
    بس انا ظنيتها حالة مرضية .. يعني زي العندو موية بيضاء كدا ..
    لانو مرات مرات بكتب حروف غلط .. ولكن ما دي المشكلة ..
    المشكلة .. انو بقدم حرف على حرف ..
    بصراحة الحركة دي اصبحت واضحة جدا في النضمي حقي .. لكن ما عارفة اعالج التطور حقو دا كيفن ..

    اشتري لاب توب .. ؟


    واحد اقترح علي اعمل اشتغل في الاذاعة عشان ابث النظرية حقتي دي كل صباح ..

    الاذاعة ذاتها حصل ليها تطور .. وتطور الاذاعة دا بالجد محيريني ..

    زمان الاذاعة دي كانت بتجيب اغاني الحقيبة حقت الفنانين الكبار ..
    والغنية ذاتها بتكون طووويلة .. ورايقة .. ( والدقة قديمة ) ..

    القمر بوبا عليك تقيل .
    الصغيرون الما كبير.
    الرقيبه قزازة عصير
    العيون متل الفناجين
    السنون راقن يشير
    ما بتحش ... قشله تتاقير
    ما بتشيل جردل على الزير
    الزراق فوقها تقول حرير
    شتتى الشبال .. يا ام ضمير
    خلي قلوب الصبيان تطير!!
    انتى ريحتك دمور فرير
    ولا ... بت السودان اصيل
    القمر بوبا عليك تقيل
    القديمها قديم الحمام
    الوزيزين فى موجو عام
    يا ما رايقه قليله كلام
    وآحلاتها !!
    تقول السلام
    يا القمر بوبا عليك تقيل

    وهسي اها شووفوا التطور الحصل .. برضو لاغاني الاذاعة ..

    سماحه الزول في الطول والعلا قنبلة ..
    دي قالو احتمال تنفجر......... قنبله
    تقيف معاك والله ما بجر ........قنبله
    ما بفيد الصد والهجر
    والبتحصل انا بقبلا
    قنبـــــــــــــله
    العيون سلاح الموت........ قنبله
    الخشيم دا كاتم صوت ........قنبله
    بي الجو بي البرشوت
    جيوشك علي انقلا
    قنبـــــــــــــله
    السنون زي در وبلي ........قنبله
    والخد مسدس سته مل........قنبله
    يا عيوني ما تملي
    الشوف والعود والسنبله
    قنبـــــــــــــله
    الايدين كلاشنكوف........قنبله


    اها كل واحد يحاول بالله يواكب التطور بتاع المخلوقات دي ..
    يعني ما ممكن ليكم عشرين سنة ما قادرين تفهموا السبب الخلا ..
    الدفار الكبير داك الا اسمو ( الديانا) ، يتحول الى ( دباب ) قدر كدا هو .. !

    احكي ليكم النكتة دي ...
    قالوا في واحد مغترب اتصل على برنامج في قناة السودان كان فيهو مسؤول كبير ...
    بتكلم عن جمارك العربات وان الشغلة فتحت وممكن الزول يستورد الي نوع من العربات وشنو ما عارفة ..
    المهم زولك دا اتصل وسال المسؤول .. حقنا ..

    - الو .. السلام عليكم ..

    - وعليكم السلام .. معانا منو ؟

    - معاكم .. الوسيلة حسين من الدمام ..

    - اهلا اخ الوسيلة . اتفضل بسؤالك لسيادة الوزير ..

    - انا بسأل يعني ممكن بعد كدا نجيب ( دبابات )

    المسؤول طبعا رأسو كابس في الدبابات الكبيرة ديك ..
    وما متخيل انو في حاجة صغيرة كدا ( ربع نقل ) اسمها ( دباب )

    رد طوالي بخلعة :
    - لالا لالا .. دبابات شنو .. عربات قلنا ، عربات ، عربات !

    **
    في واحد صاحب واحد انا بعرفو قال انو
    (في احدى زياراتو للهند كان ماشي في الشارع فاذا بكديس لا يُشق له غبار جاي جاااااااري بسرعة خيالية ،
    قلت يا ربي الكديس دهـ مالو و فجأة كدهـ اشوف ليك فار جاي مشتت ساكي هذا الكديس )

    وصاحبو برضو قال :
    (في ذات مرة من المرات قال لينا انو الثعابين في الهند بتطير )

    قبال ما اتكلم ليكم عن الفار والدبيب حقك الهند داك ..
    عاوزة اقول ليكم حاجة عن الجداد ..
    طبعا اكيد ما فايت عليكم ان الجداد دا اصلا كان نعام ..
    وبعدين حصل ليهو تطور عشان يبطل الخوف حقو دااك ..
    لكن رغم التطور الحصل للنعام دا .. لسه قاعد يخاف خوفة ..

    طيب ..الزول داك قال صاحبو شاف فار ساكي كديسة ..
    ايوة دا تطور .. كان لازم يحصل .. لو انتو متابع لنظرية التطور دي من الاول ..
    حتلاحظو ان الكديس بقى ما شغال بالفار ..
    وبالتالي الفار بقى ما بخاف من الكديس باعتبار ان الكديس بطل ياكل الفار ..
    اها الفار دا ما عندو تأر قديم عند جميع قبايل الكدايس ؟

    اها الفار الهندي دا ..
    ساكي الكديسة كنوع من التخويف .. بس ما عارفة حيقدر ياكلو ولا لا ..
    لان التطور حق سنون الفار .. لسه ما وصلت فيها لحاجة رغم ان سنون الفار حصل ليها تطور كبير ..
    وبقت تتطور حسب علب التعبأة .. زمان الـ
    packing
    كلو كان حق ورق .. هسي علب بلاستيك محكمة ..
    والخشب زمان كان مهوقني وموسكي .. هسي بقى
    MDF

    اما بالنسبة للثعبان بما انو عندو عقلية هندية .. فيمكن ..
    عاوز يقلد ليهو ممثل هندي جاي ناطي من ناطحة سحاب ..
    بالجد التطور حق مخلوقات الهند دا عجيب .. خلاس ...
    لانو التطور حقهم .. ما عندو قانون محدد ..
    فما تستغرب انو الثعبان بيطير .. اذا كانت الهند كلها بتطير لموقع تمثيل اي فيلم جديد ..
    والواحد ما بقدر يفرز بين الكومبارس وما بين عامة الشعب ..


    واحدة حنكوشة قالت بتخاف من كلامي دا عن المخلوقات

    .. ياخي ما تخافي .. يا حليل زمن المخلوقات البتخوف ..

    هسي المخلوقات كلها بقت وديعة .. وبتاكل معلب ..

    بعدين اصلا قالوا في علاقة بين اكل الشوارع واكل المعلبات ..

    اكل الشوارع بخلى المخلوق .. شرس ومكاتل ..

    حصل دخلتوا محل بتاع فول ..
    شوفي شكل الناس القاعدة تاكل .. هناك ..

    ياخي الوشوش دي مصرورة .. تقرب تقع .. ..

    والاصوات خشنة التقول انكشح فيها لوري حصحاص ..

    اما اكل العلب بخلي المخلوق هادي جدا ومسالم ..

    شايل علبتو في يد وشايل الريموت كنترول في اليد التانية

    ***

    برضو في واحد قال في تطور حصل للمغتربين زامن كانوا شنا ورنا ..
    هسي البنات بقت يهربن منهم
    اها

    مصائب قوم عند قوم فوائد .. زمان كان المغترب حشاش وبملا شبكته سريع ..
    اما ناس قريعتي راحت .. قاموا لقوها كدا بعد ناس البترول جو ..
    وحفروا الواطة .. اي قريعة كانت رايحة اتلقت
    اها البنات قبلن تاني يكوسن المحلي داخل عطبرة .. انا ليل ليلينا ....
    عشان كدا .. المغتربين راحو شمار في مرقة ..
    اها بعد دا الا يلقوا ليهم شركة حقت تنقية عشان تطلع ليهم كورية شوربة بدون شمار .. !

    لكن ما اتطورتن يا الجكس ..


    برضو في زول لايقو تاني سألني
    عن التطور الحصل لي ..

    قلت ليهو جقلمية مرة انا قلت ليكم ما قاعدة اتطور ..
    وخاصة في الوقت دا ... لاني لو اتطورت ما حاقدر اكمل نظريتي دا ..
    لاني قريب حاعمل براءة اختراع .. واسجلها عند ناس الملكية الفكرية ..

    بعدين انتو كدي وروني التطور الحصل عليكم شنو .. من عشرين سنة ..؟!

    حتقولوا لي .. بقت ما قاعدة تجيكم ملاريا ..
    حاقول ليكم الملاريا ذاتها اتطورت ..

    الناموس بقى بعرف يقد الناموسية ،
    وبقى يلبس كمامات عشان المبيدات ما تكلتو ..

    المشكلة يا شباب في الغرور حق الانسان دا ..
    قايل نفسو هو المخلوق الوحيد القاعد يتطور وما متخيل بقية الكائنات دي ذاتها قاعدة تتطور معاهو ..

    ولسه ناس السعودية قايلين الملاريا دي ما بتجيك الا تكون في السودان ..
    عشان بعوض السودان .. وكدا ..

    اها البعوض .. دا بقى يمشي يصيف في بورتسودان ..
    ومرات اقرب .. باخرة .. والى جدة .. !


    برضو اتذكرت المثل بقول الفقراء اتقسموا النبقة ...
    اها النبق ذاتو حصل ليهو تطور .. زمان بكون كان قدر التبش ..

    ولسه في مخلوقات كتيرة قاعدة تتطور زي التطور القاعد يحصل في اكلات البنات البعملن رجيم

    السويت كورن .. تطور للبليلة

    المايونيز .. تطور لملاح الروب

    الهوت صوص تطور للشطة الحمراء

    الجبنة سايلة تطور .. للصلصة البيضاء

    والتونة بزيت الزيتون تطور .. للفسيخ.

    زيت الزيتون ذاتو تطور للكركار .. ههه

    المخلل تطور .. لخيار الشعب

    وليمونة حااااامضة تطور اكيد للناس الغياظة

    العيش المصري الحار ... تطور للمجموعة الشمسية ..

    وانتهي ..



    هبة عثمان / نقلا عن موقع بيت السودانيين


    ـــــــــــــــــ


    انتظروني قريبا .. مع تطور المخلوقات النارية ..( الجن )

    (عدل بواسطة سمرية on 05-04-2010, 12:03 PM)
                  

05-04-2010, 09:56 AM

محمد عبد الماجد الصايم
<aمحمد عبد الماجد الصايم
تاريخ التسجيل: 10-16-2005
مجموع المشاركات: 35312

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: سمرية)

    لا حوولاااااااااا
    والله البوست زاتو داير ليهو نظرية تطور عشان يصغر شوية!



    أنا غايتو وقفت عن الديسكتوب وتحليل البيانات!
                  

05-04-2010, 10:02 AM

سمرية
<aسمرية
تاريخ التسجيل: 01-16-2005
مجموع المشاركات: 2803

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: محمد عبد الماجد الصايم)

    ما قصرت تب يا ود الصائم .. بس بكون فاتكـ تطور الاذاعة ... !

    انت زمان سنة طاش وطاشين ... كنت بتكتب يا عمكــ وتتخارج ..

    هسي عيني باردة .. بقن تلاتة سطور ... ووشوش باسمة ..

    ياخي في تطور احلى من كدا ...


    ــــــــــــــــــــ

    إزيكـ .. ؟؟
                  

05-04-2010, 10:11 AM

عمار محمد ادم
<aعمار محمد ادم
تاريخ التسجيل: 07-01-2009
مجموع المشاركات: 2160

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: سمرية)

    Quote: ومعطت ريش بعض
    الكدايس ما عندها ربش العندها ريش الصقور..
                  

05-04-2010, 10:18 AM

سمرية
<aسمرية
تاريخ التسجيل: 01-16-2005
مجموع المشاركات: 2803

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: عمار محمد ادم)

    Quote: الكدايس ما عندها ريش العندها ريش الصقور..




    اهـــن الكدايس ، عندهم شنو ؟!
    صوووف .. ؟!

    طيب الريش .. ما ياهو دا التطور الحصل للصوف ذاتو ... !
                  

05-04-2010, 10:05 AM

الرفاعي عبدالعاطي حجر
<aالرفاعي عبدالعاطي حجر
تاريخ التسجيل: 04-27-2005
مجموع المشاركات: 14684

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: محمد عبد الماجد الصايم)

    في اركويت ؟؟؟

    اوووع يكون في اركويت ياسمرية ؟؟؟

    وبعيد عننا ....


    البوست دا طبعتو اقراهو بعدين ؟؟؟


    الله يكون في عونك بوست ح يجيب ليك الهوا

    بس اهم شئ يبعد عنو هشام آدم ؟!!!!!!








    ...........................................حجر.
                  

05-04-2010, 10:09 AM

سمرية
<aسمرية
تاريخ التسجيل: 01-16-2005
مجموع المشاركات: 2803

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: الرفاعي عبدالعاطي حجر)

    يا حجر ..... اركويت تبرا وتستبرأ ..

    الله لا جاب ليها تطور .. غير التطور الديراينو ليها ...!

    بالله اقراهو بمزاج .. ولو في اي تطور كدا سقط سهوا .. لقطو لينا .. !


    ،،،،،،،،،،،،،


    البوست دا محمي من .. ... ... الجماعة اللفي آخر سطر .. .. !
                  

05-04-2010, 11:01 AM

عمار محمد ادم
<aعمار محمد ادم
تاريخ التسجيل: 07-01-2009
مجموع المشاركات: 2160

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: سمرية)

    زى ما العربات موديلات برضو الناس موديلات يعنى الجيل المتحكم الان فى الحياة اطباء محامين سياسيين ديل ناس عصر الاله ولسه ناس عصر الكمبيوتر ما جو ..اقابلك فى زمن ماشى وزمن جاييى وزمن لسه..اشوف الماضى فيك باكر اريت باكر يكون هسه..يعنى الصحابه اشكالهم ما كانت زينا ولا اكلهم ولا شرابهم ولا هدومهم زينا عشان كده الدين فى زمنهم مفروض يتطور كل مية سنه يجى واحد يعمل مواكبه بين الاصل والعصر النبى وعد بى كده مفروض نكون هسع فى المجدد رقم 15 ...ما شفتى اغنية كرومه يغنيها محمود عبد العزيز او فرفور نفس الكلمات ونفس اللحن ولكن النفس مختلف لانو الزمن مختلف ولا شنو..
                  

05-04-2010, 11:23 AM

عمار محمد ادم
<aعمار محمد ادم
تاريخ التسجيل: 07-01-2009
مجموع المشاركات: 2160

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: عمار محمد ادم)

    Quote: الدفار الكبير داك الا اسمو ( الديانا
    بالمناسبه فى ركشة صناعه محلية بتشيل اكتر اسمها جنى الدفار..
                  

05-05-2010, 05:36 AM

سمرية
<aسمرية
تاريخ التسجيل: 01-16-2005
مجموع المشاركات: 2803

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: عمار محمد ادم)

    وبرضو الدفار الــ Zy يا عمار ... في راويات اخرى اسمو جنى قطر ..
                  

05-04-2010, 11:51 AM

سمرية
<aسمرية
تاريخ التسجيل: 01-16-2005
مجموع المشاركات: 2803

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: عمار محمد ادم)

    اها شووفت يا عمار انا في حتت كدا في نظريتي دي خليتها عايمة شوية ...
    وخاصة الحاجات البتجيب الهوا زي ما قال حجر ..( وش خااااااااايف )
    وبرضو خليت المساحة لاصحاب الخيال الواسع عشان يتحفونا بما جادت عليهم نظرياتهم ..


    ــــــــــــــــــ

    اغنية كرومة ما شوفتها .. لكن سمعتها .. الظاهر ( الشوف ) عندنا لسه محتاج تطور كتير ...
                  

05-04-2010, 11:32 AM

حسبو عكاشة
<aحسبو عكاشة
تاريخ التسجيل: 04-25-2010
مجموع المشاركات: 1305

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: سمرية)

    سلام اخت سمرية
    بوست دمو خفيف
    Quote: انتظروني قريبا .. مع تطور المخوقات النارية ..( الجن )
    طيب الفات دا كان شنو!





    ----
    تحياتي
                  

05-04-2010, 12:47 PM

عمار محمد ادم
<aعمار محمد ادم
تاريخ التسجيل: 07-01-2009
مجموع المشاركات: 2160

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: حسبو عكاشة)

    Quote: اغنية كرومة ما شوفتها .. لكن سمعتها .. الظاهر ( الشوف ) عندنا لسه محتاج تطور كتير ...
    بالمناسبه الشوف مصدروا شنو..دى ما قدر الصوف والريش ..
                  

05-05-2010, 06:14 AM

سمرية
<aسمرية
تاريخ التسجيل: 01-16-2005
مجموع المشاركات: 2803

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: عمار محمد ادم)

    Quote: بالمناسبه الشوف مصدروا شنو..دى ما قدر الصوف والريش ..


    الشوف في حد ذاتو .. مصدر ..
    لبلاوي كتيرة ... !
                  

05-04-2010, 01:21 PM

walid taha
<awalid taha
تاريخ التسجيل: 01-28-2004
مجموع المشاركات: 4244

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: سمرية)

    سمرية إزيك

    ماشة بعيد مالك
    دكين حبا ليهو لوحةإتطورت بقت بت

    اها
                  

05-05-2010, 06:27 AM

سمرية
<aسمرية
تاريخ التسجيل: 01-16-2005
مجموع المشاركات: 2803

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: عاجل / تطور المخلوقات .. نظرية جديدة (Re: walid taha)

    يا وليد ....ازيكـ انت ؟

    اللوحة كما هي لم تتطور ..

    المتطور هو .. ( عقل دكين ) ... .... ...... وش او غمزة ..
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
 اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين 		News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de