انا دايما بنتظر قدوم عيد الاضحي بفارق الصبر عشان اشرب الشربوت ولمن انكشف حبي ليهو الشديد .. بقوا ناس البيت ما بجيبوا البلح وبتركوا شراية البلح علي انا كل سنة .. ملوة .. ملوتين حسب المزاج !!
والفحم برضو علي ... وحتى الخميرة .. اليوم داك بلقاها اتعدمت تماما من درج المطبخ !!
ومن الوقفة المسا حبوبة بعد تستلم البلح مني تشد( حلة الشربوت ) ... ولغاية فجر العيد .. بتكون الحلة فوق النار .. تزيد فحم وتنقص جمرة !!
وغالبا ما بتحصل شكلة ... بيني وبين حبوبة لانو حسب العادة الخميرة بتختها في الشربوت مع صلاة الصبح وانا بصحا بلقى حبوبة اتطانشت حكاية الخميرة دي عن قصد باتفاق مع امي .. على اساس انو الخميرة دي بتسكر وحرام وكلام كتير كدا !!
وشربوتنا اشتهر للاهل والجيران انو مضبوط وجميل جدا ... ومن ما تجي الساعة حداشر صباحا تلاقي جكاكة الحلة تتطاقش على بيتنا .. دايرين يضوقوا شربوتنا !!
دا غير الاصحاب البكونوا جابو جكاكتهم من بدري ..
ومن طرائف الشربوت الحصلت عندنا في البيت .. مرة اختي عندها واحدة صديقتها طلبت منها تخلى ليها الشربوت حقها لغاية ما تجي تشيلوا ... قامت اختى ملت باقة الكريستال الكبيرة بالشربوت ( تقول جابت البلح هي ) ودستها جوة دولاب المطبخ ... واول يوم وما جات البت وتاني يوم وما جات تالت يوم .. جاتنا بت خالتي ومعاها اطفالها يعيدوا علينا واثناء ما كنت في المطبخ بعمل ليهم في عصير ... نسمع ليك صوت طااااااااااااااخ طرااااااااخ والعدة الجوة دولاب المطبخ كلها تجي كاسرة باب الدولاب وجكوكة القزاز حقت امي تروح في غضب الله !!
وبت خالتي واولادها وكل ناس البيت يكسروا على المطبخ كانوا قايلين انبوبة الغاز هي الانفجرت !!
وطبعن معروف الانفجر شنو ؟؟!!
ومرة ... ثالت يوم في العيد وبعدما شربوتنا قرب يخلص .. فكرنا انا وحبوبة نعمل شربوت تاني عشان الطبايح لسه مدورة .. قامت حبوبة طمعت وملت ليك الحلة زوووود موية والشربوت دا غلي وغلي وكل شوية تزيد موووية .. قامت نادتني قالت لي تعالي ننزل الحلة دي عشان نزيد نار للشربوت وطبعا الحلة ( قوز ) كبيرة .. وتقيلة .. رفعناها .. انا وحبوبة وسندناها على حافة المنقد .. ولانها تقيلة ومليانة صعب ننزلها الارض لانها ممكن تحرق لينا رجلينا .. ولانها مليانة وتقيلة كان حاولنا ننزلها المنقد تاني برضو حتحرق لينا وشنا واصبح الوضع حرج للغاية ... كدا وووب وكدا وووب .. وانا قعدت اكورك .. وحيلي مااااااااااااااات وحبوبة صامدة ... ماسكين الحلة .. وما عارفين نتصرف كيف ؟!!
وحبوبة الله يديها العافية زولة المهام الصعبة ... كوركت لاختي وقالت ليها جيبي لي جردل صغير ... وماعون اقرف فيهو وانا من الموقف الحرج دا بقيت اضحك لمن حيلي خلاص ماااااااات كلو كلو وقربت ارمي الحلة ونخلص .. وحبوبة تنهر فيني وتقولي لي : امسكي قوي حتحرقينا وتريحينا !!
وفضلت حبوبة تقرف من الحلة وتقرف لغاية ما نقصت وبقى ممكن ننزلها دون خوووف !!
اها بعد دا كلو برضو ما تبنا من الشربوت ... وما زلت اتوق لتذوقه في العيد الجاي دا .. رغم انو مافي لحمة ... عشان كدا فكرنا نعمل اكلة شامية اسمها ( مقلوبة ) بالفراخ والارز ... ونشرب بعدها الشربوت وننووووووووووووووم ...
وكل سنة وشربوتكم بخير !!
والله يحمي بلح السودان من الآفات ..!!
12-16-2007, 11:54 AM
Ishraga Mustafa Ishraga Mustafa
تاريخ التسجيل: 09-05-2002
مجموع المشاركات: 11885
وعيد الاضحى الجاي تكون معيد هنا ، والعيد ما يكون شربوت ساي .. !!
تعرف السنة دي اول مرة من زمن طوووووووووووووووويل ابوي يعيد معانا ... وكان لما يتصل علينا .. يقول لينا كدي شممونني ريحة الشية !!
دا غير خالتي وزوجها ليهو سنوات طويلة خارج البلد وحيصل اليوم وجاي وبحلم بالمرارة وام فتفت وشية الصاج والشربوت ، اهاالسنة دي الحمى النزفية دي شرطت عينا !!
يديك العافية يا بله وكل سنة واسرتك كلها بخير !!
12-17-2007, 07:29 AM
DKEEN DKEEN
تاريخ التسجيل: 11-30-2002
مجموع المشاركات: 6772
Quote: وشربوتنا اشتهر للاهل والجيران انو مضبوط وجميل جدا ... ومن ما تجي الساعة حداشر صباحا تلاقي جكاكة الحلة تتطاقش على بيتنا .. دايرين يضوقوا شربوتنا !!
ما في طريقة لارسال باقة الكريستال أو جركانة الشربوت بالدي اتس ال (DHL) لكندا.... لــول .... واحد محروم من الشربوت لاكثر من 15 سنة وبمزح ساكت، وكل سنة وشربوتكم بخير !!
12-17-2007, 08:28 AM
wadalzain wadalzain
تاريخ التسجيل: 06-16-2002
مجموع المشاركات: 4701
والجميع بخير وشواءاتهم دخاخينها فى السماء وشربوتكم يغلى وينعنش يسنسن
وهذه مناسبه ليستعرض لنا كل واحد او واحده طريقته فى عمل الشربوت
ابدى لنا انت ياسمريه ما هى طريقة حبوبتك فى عمل الشربوت ، اكيد طبعا خبرة سنين كثيره ، ما هى المواد والبهارات غير البلح طبعا وكيف يغلى واين يترك .... الخ
وشكرا
12-17-2007, 09:08 AM
سمرية سمرية
تاريخ التسجيل: 01-16-2005
مجموع المشاركات: 2803
وشكرا لاقتراحك ، بالنسبة لشربوتنا نحنا .. انا بشوف حبوبة بتغسل البلح كوووويس وبعدين كلما كان البلح جديد كلما كان الشربوت طاااااااااعم ولذيذ ... اها بتقوم حبوبة تخت الشربوت في النار بعد تكب ليهو الموية اللازمة .. والبهارات البنختها ( قورنجال وشوية زنجبيل ) .. !!
اها بعد البلح ينضج بتقوم حبوبة بتكب الخميرة حسب كمية البلح .. وهنا بتكون نزلت البلح من النار طبعن ويترك فترة قصيرة ثم يصفى ويدخل الثلاجة فورا .. !!
ما حصل طبعن عملتوا براااي !!
واتفضل معانا شربووووت سااااااي ...
12-17-2007, 08:30 AM
إسماعيل حميم إسماعيل حميم
تاريخ التسجيل: 07-19-2005
مجموع المشاركات: 2251
Quote: ما في طريقة لارسال باقة الكريستال أو جركانة الشربوت بالدي اتس ال (DHL) لكندا.... لــول .... واحد محروم من الشربوت لاكثر من 15 سنة وبمزح ساكت، وكل سنة وشربوتكم بخير !!
العزيز فيصل ..
اريتو لو كان بصلك .. كان رسلت ليك كرتونة من الباقات ( حجم عائلي ) والله لو ما شربوت الضحية دا انا كان خليت السودان زمااااااااااااان .. دا السبب الوحيد المصبرني ومخليني اقعد فيهو .. تصدق ؟؟!!
وكل سنة وانت طيب .. ويديك الصحة والعافية ..
12-17-2007, 09:39 AM
عمرو كمال ابراهيم عمرو كمال ابراهيم
تاريخ التسجيل: 10-09-2007
مجموع المشاركات: 1226
Quote: وشكرا لاقتراحك ، بالنسبة لشربوتنا نحنا .. انا بشوف حبوبة بتغسل البلح كوووويس وبعدين كلما كان البلح جديد كلما كان الشربوت طاااااااااعم ولذيذ ... اها بتقوم حبوبة تخت الشربوت في النار بعد تكب ليهو الموية اللازمة .. والبهارات البنختها ( قورنجال وشوية زنجبيل ) .. !!
اها بعد البلح ينضج بتقوم حبوبة بتكب الخميرة حسب كمية البلح .. وهنا بتكون نزلت البلح من النار طبعن ويترك فترة قصيرة ثم يصفى ويدخل الثلاجة فورا .. !!
سلامات يا سمرية وعيد سعيد
قلت اشيل اعمل وصفتك دى وكنت عاوزة اضرب ليك عديل لانى شايفة حكاية انه اقول ليك عاوزة لى كريستال حجم عائلى دى شوية مرهقة قلت اعمله براى اها القاك يا اختى ولا قلتى المقادير ولا حاجة يعنى لازم تمشى تسألى حبوبة من دربك دة وتجى بالوصفة والمقادير يا اختى ده شربوت سااااااااى وبس سريع فى الانتظار الوقفة قربت خلينا نمشى نجيب البلح الجديد ده قدر شنو بالظبط؟ يعنى تحددى كوب كذا وكيلو عدد كذا والموية دى اهم حاجة تتوزن اسمعى مستنيين والا بيتكم محاصر من يوم الوقفة بالليل ( لزوم حراسة الحلة)
تعيدى بالف خير وبلاش المقلوبة ما احنا اصلا مقلوبين وقاتلبين هوبة فى البلد دى. جادة جدا فى حكاية الوصفة بالمقادير
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سمرية
Ishraga Mustafa
بله محمد الفاضل
wadalzain
إسماعيل حميم
عمرو كمال ابراهيم
mamkouna
ريهان الريح الشاذلي
محمد أبوالعزائم أبوالريش
الطاهر ساتي
Rawia
علاء الدين حيموره
فيس بوك
تويتر
انستقرام
يوتيوب
بنتيريست