ملوخية ..خضراء كلوروفيلية ...Malokhiyaonlive .love
تأسيس رجاء.. قبل الشروع في قراءة البوست, مراجعة الخيط أدناه – لمن لم يقف عليه قبلاً استعملوا الملوخيـــــــة .... محفـّـز جنســـــى ...!!! ..مع خالص الشكر للأخ بشرى سليمان الذي أوجد مكانة جديدة للملوخية في ....حياتنا براءة الشخصيات الواردة في البوست معظمها من البورداب الحلوين.. لكن الوقائع من خلال مجرى الاحداث ليست حقيقية ..لذا أتقدم باعتذاري مسبقاً لمن (استثقل) أية موقف يلتصق بشخصه.. __ فضاء افتراضي لا حديث للمدينة منذ كم يوما إلا عن الملوخية = الخدرة= بعد أن أعاد احد أعضاء المنبر العام بسودانيزاونلاين اكتشافها مرة أخرى وأنزل بوستاً عن فوائدها الطبية المتعددة وخصوصاً طاقتها (الكامنة) .. منذ ذلك الوقت انطلقت المعلومات في المدينة كما النار في الهشيم ووجد الناس أنفسهم بين (بوست) ومداخلاته يعيدون ترتيب حياتهم من جديد وفق مركزية كلوروفيلية تسمي الملوخية وبلغة أهل الريف تسمى ..خُدرة . ملكية مشاعة الاستاذ هشام مدني من مقر عمله بجنيف اتصل بالهاتف على الدكتور كامل ادريس المدير العام للمنظمة العالمية للملكية الفكرية (الوايبو) وهو سوداني ايضاً يقيم بجنيف .. التقاط للمحادثة وهذه تفاصيلها.. -السلام عليكم يا دكتور - اهلاً وسهلاً ...مين .. الاستاذ هشام ..كيف حالك .. ؟ - بخير والحمد لله كيف أنت والعمل ..؟ - تمام ..لكن زمن ما سمعنا صوتك.. - صحيح ..المشاغل زي ما عارف .. وانت برضو ما مستقر .. - أهـ صحيح يا هشام ..وأخبار السودان كيف عندكم ..؟ - جيدة ..وقالو الأحوال بقت كويسة والأمور استقرت يعني بعد الحوادث الأخيرة .. - ربنا يحفظ البلد يا هشام ..والله السودان دا بلد رائع وجميل لكن قدرو كدا والواحد قدر ما حاول يقدم حاجة للبلد يلقى نفسو مقصر وزي ما انت عارف انو المنظمة دي عندها مشاريع وبرامج وخطط لمساعدة كل بلدان العالم في حاجات كثيرة ..لكن السودان انا ما عارف اساعدو بي شنو..؟ - يا دكتور نحن واثقين وعارفين انك ما بتقصر..وأهو قدمت الكثير للجامعات ومنظمات المجتمع المدني وحتى الحكومة برضو ساعدتها وحاولت تساعدها في قضايا كثيرة .....و... (مقاطعة) - معليش يا هشام ... يعني الحاجة الشايفنها الناس ما زي الحاجة الأنا عارف ممكن اقدمها.. - والله كلامك دا يا دكتور اشجعني على طرح الموضوع اللأنا بفكر فيهو لي يومين ثلاثة ..يعني مما وقفت عليهو في الانترنت وانا بفكر في السودان بي إمكاناتو الكبيرة ومدى استفادتو من الموضوع دا ... - يعني ممكن توضح شوية يا استاذ هشام..؟ - طبعاً يا دكتور ..الموضوع انو بعض المراكز البحثية أثبتت فوائد كبيرة ومتعددة للملوخية .. يعني حاجة كدا تقول ممكن تعمل انقلاب في المجال الاقتصادي والمجال (الطبي) وأنا قلت أحدد معاك وقت عشان نناقش الموضوع دا بي رواقة ..عشان نعرف كل ابعادو ومدى امكانية استفادة السودان من الميزات النسبية المتوفرة في الزراعة والمياه و...و...و.. يعني زي ما انت مدرك.. يعني المقدمة دي وضحت ليك يا دكتور..؟ - نعم .نعم نعم ..يا هشام انا برضو قريت الموضوع دا وبالنسبة لي يعني تقول ما جديد.. لكن اعتبر كلامك دا مبادرة ممكن ندرسها في عدة جوانب ونشوف البيصلح منها للسودان شنو ونسعى عشان نحققه -أشكرك جدا يا دكتور - خلاص يا استاذ هشام ممكن تمر على بعد ساعتين كدا ..الليلة البرنامج خفيف والاسبوع الجاي انا مسافر.. - جداً ..إن شاء الله نتلاقى بعد ساعتين وانا اكون وفرت خلالها معلومات اضافية عن الموضوع والسودان ........ في المكتب الف....... ال....ال....(....) دار النقاش التالي .. بعد الترحيب والسلام ومعاودة السؤال عن كل الاحوال يبتدر الدكتور كامل ادريس النقاش ويقول... - طبعا يا استاذ هشام موضوع (الملوخية) دا شغلك كتير ..انا عارف انك زول وطني وبتحب بلدك شديد وبتتمنى ليه الخير ... ودا حاجة ما ساهلة ... وأنا ممكن أوريك كل الجوانب الممكن يستفيد منها السودان في الموضوع دا - طبعاً يا دكتور نحن منتظرين نحدد انو السودان يستفيد منها كيف..؟ - يا استاذ هشام ..نبدأ بنقطة أساسية ومهمة ..الملوخية لا تزرع في السودان وحده.. تقريبا كل مناخات العالم تصلح لزراعة الملوخية ..عشان كدا اولاً نتجاوز مسألة تسجيلها كـ(نبتة) سودانية ..طبعاً هنا في المنظمة بنطلب من الدول – خصوصا النامية – تسجيل كل ما يخصها من تراث ومقتنيات ومنتجات فكرية وثقافية وفنية وسلع ...و...و...و والملوخية دي غير مستوفية شروط التسجيل .. لكن هناك جوانب مهمة جداً تتصل بانتاج وتسويق الملوخية (كمحصول ومنتج صناعي متعدد الأغراض) يمكن أن يحدث ثورة اقتصادية كبيرة في السودان... - انا يا دكتور دا الموضوع الشاغل بالي ..يعني زي ما عارف بلدنا فيها 230 مليون فدان جاهزة للزراعة ونهرين يشكلان نهراً من أطول الانهار في العالم وروافد كثيرة ومياه جوفية و..و...و... و وخبراء وسوق في افريقيا والعالم العربي وسوق في أوربا وآسيا ... يعني ميزات ما بتتوفر لأي دولة في العالم كله عدا 3- 4 دول امكن ... يعني السودان لو (احتكر) حكاية الملوخية مش أفضل من البترول والكلام البجيب الحروب دا ..؟ - جداً يا استاذ هشام ..السودان دولة زراعية في المقام الأول ..والبترول دا مهمتو يساعد في توفير بنيات تحتية للزراعة وتوفير طاقة للصناعة لأنو في تكامل الزراعة والصناعة (التصنيع الزراعي) يضاف اليهما الثروة الحيوانية ممكن البلد – خلال 5 سنوات فقط تقود العالم ..غذائياً ..يعني هل ممكن واحد يصدق أن دولة مجاورة للسودان تستورد (الهامبيرغر) من الارجنتين..؟ ياخي بقرنا دا لو دفرناه على البحر الأحمر يغطيهو ويقطع بي غادي ...؟ معليش أنا انفعلت شوية...!!! -ولا يهمك يا ريت كل زول في موقعو ينفعل بي قضية واحدة تخص البلد ..كان الأمور مشت بي طريقة صحيحة والتفكير بيكون سليم والتخطيط بيكون في الاتجاه الصحيح ..ما هو العالم دا بتحكمو قضية واحدة هي الموارد وكيفية تنميتها ..لأنو الكرة الارضية تعاني من كثافة سكانية تجاوزت (6) مليارات نسمة وديل محتاجين طبعاً للغذاء في المقام الاول ..وأهو العالم بيلهث عشان الأمن الغذائي وما شاف حيلة الا وعمل بيها , يعني الهندسة الوراثية والأغذية المعدلة جينياً ما بتحل المشكلة .. حل المشكلة بالنسبة للغرب معروف في استثمار كل الاراضي الصالح للزراعة وتنميتها لتوفير الغذاء - كلامك صحيح مائة بالمائة ..مشكلة الغذاء بجانب مشكلة المياه هما اللتان ستدفعان إلى الصراع العالمي حول الموارد ومناطقها ..العالم الآن سئم من حكاية البترول بعد ارتفاعه الكبير وطبعاً البدائل حوله كثيرة ومتعددة – لذا لن يحبس العالم نفسه في برميل نفط في الفترة المقبلة ..الأغذية هي القنبلة القادمة والغذاء الآمن (الطبيعي) سيكون اللاعب الرئيسي في معادلة العولمة .. - اتفق معاك يا دكتور .. لذلك سأتجاوز مركزية الملوخية هنا ونناقش الموضوع بي صورة عامة .. -أنا لا اريد أن نتجاوز الملوخية .. هناك جانب ايجابي في طرح الموضوع ومناقشته من مختلف الزوايا .. والملوخية بحسب خصائصها الغذائية والطبية تستحق أن نفرد لها حيزاً كبيراً في النقاش ... يا استاذ هشام – بعد تطبيق اتفاقية التجارة العالمية على الدول الأعضاء لن تستطيع دولة ما أن تغلق حدودها امام منتجات الدول الأخرى أو تفرض عليها رسوما .. المعادلة العالمية تقول بإزالة كل الحواجز والقيود امام حركة الجميع ( الشركات المنتجات السلعية والخدمية والانشطة الانسانية....ألخ) – عدا البشر- لذلك تبحث الدول الجادة عن ما يميّز سلعها ومنتجاتها ..السودان يمكنه أن يقود العالم – في مجالات معينة – إذا حدد بالضبط ماذا يريد من العولمة وما هي امكانياته الحقيقية التي يمكن أن ينافس بها... - واصل يا دكتور ..هذا كلام جميل.. - إذا ركزنا على جانب الزراعة ممكن نعمل كشف حساب بالمعطيات الموجودة وحجم المخرجات وعائداها على الخزينة العامة ومساهمتها في الناتج القومي الاجمالي ... السودان مثلاً يمتلك أكثر من (230) مليون فدان ..المستغل منها حوالي (30) مليون فدان ..الزراعية المروية لا تصل إلى (5) ملايين فدان منتظمة الزراعة ومشروع الجزيرة مساحته مليوني فدان ولسه ما استفادوا منو الفائدة القصوى ..والمشروع طبعاً داخل في مشاكل بخصوص التركيبة المحصولية وعدم وضوح السياسة الخاصة بزراعة القطن وتحس كدا أنو في تخبط في الموضوع كلو..مشروع زي دا ممكن يجيب دهب ..وأنا قاصد انو ممكن نقيف على احتياجات السوق المحلي والاسواق الاقليمية والعالمية عشان نلبي احتياجاتها .. لغة المستهلكين في العالم ما عادت سؤال للعارض ..انت عندك شنو..؟) بل أصبح السؤال يوجه للمستهلك (أنت عايز شنو عشان نعلمو ليك ..؟) والسودان ممكن يقول للعالم أنت عايز شنو انا ازرعو ليك ..؟ وميزة السودان النسبية في الزراعة غير متوفرة لكثير من الدول ..السودان من الدول القليلة التي يمكنها انتاج أغذية طبيعية خالية من الكيماويات والعناصر الاضافية ..والغذاء الطبيعي صار الهدف الأول للانسان الغربي ..الانسان في امريكا وأوربا مثلاً ما عاد يسأل عن حقوقه المادية والمعنوية .. الانسان هناك يسأل كيف يعيش حياة طبيعية خالية من المهددات البيئية والغذائية , والمهددات الأمنية (وهم) حاول الساسة زراعته في عقل الانسان الغربي لتبرير العدوان على العالم الآخر ..لكنه تبرير زائف .. الانسان الغربي يفضل أن يحصل على وجبة غذائية نظيفة (طبيعية) على أن يفوز حزبه في الانتخابات – هذا هو هم الانسان العادي في الغرب ...لأنه كما تعرف فإن امراض السرطان باتت من المهددات الخطيرة لحياة البشرية هناك. لذلك إذا (ضَمِن) الانسان الغربي أن الغذاء الذي سيحصل عليه غذاءً طبيعياً يستطيع أن يدفع فيه أعلى الاسعار.. شُفت الحياة عندهم غالية كيف..؟ والسودان يمكن أن يوظف امكاناته في هذا الاتجاه لتوفير غذاء آمن لعدد كبير من سكان الكرة الأرضية.. - أهـ دا والله كلام ممتع وجميل لكن العالم يعرف كيف انو الغذاء الجاي من السودان دا غذاء آمن ..؟ - كلامك سليم يا أستاذ هشام ..والسؤال مهم جداً .. طبعاً نحن ممكن نساعد في هذا الموضوع بشكل كبير جداً .. الإنسان في الغرب يثق ثقة كبيرة في المنظمات والمؤسسات الدولية خاصة التي تعمل في المجال البحثي والعلمي .. هناك منظمات ومؤسسات دولية معترف بها عالمياً من اختصاصها منح شهادة مواصفات موثوق بها في هذا الاتجاه حسب المعايير والشروط المطلوبة..هذه الشهادات لا تمنح اعتباطاً ..لأن المؤسسات تقوم باجراء بحوث ودراسات ميدانية ورقابة مستمرة للسلع أو المنتجات بواسطة خبراء متخصصون ..وهذه الشهادات (مكلفة جداً) .. لكنها (فيزا) مهمة جداً دخول لأي سوق عالمية وتستطيع أن تحصل عن طريقها على أفضل الاسعار لمنتجاتك ..يعني إذا نجحنا في استصدار شهادة مثلاً للحوم السودانية نستطيع أن نبيعها في أسواق امريكا باسعار أفضل من اسعار اللحوم الامريكية نفسها .. لأن البائع مثلاً حينما يضع مثل هذه الشهادة على المنتجات يشتريها المستهلك وهو واثق تماماً من سلامتها.. وعلى ذلك يمكن القياس على بقية السلع والمنتجات ..وما يصدق على السمسم مثلاً يصدق على الملوخية .. -يعني ممكن نواصل النقاش حول الملوخية ..انا اتوقع أن تحدث النتائج البحثية الأخيرة (فورة) وحراكاً كبيراً خاصة وسط الشركات المصنعة للأدوية.. السودان يمكنه أن يوفر مساحات كبيرة لزراعتها (يعني ممكن نقسم مشروع الجزيرة دا) لأن العائد سيكون فورياً ومجزياً ..تخيل لو لقينا مليون فدان في مشروع الجزيرة ..الأرض السهلية المنبسطة والري الانسيابي والعمالة الوفيرة ..لو لقينا دا ممكن نقنع كم شركة من شركات الأدوية وتجي تعمل ليها فروع في السودان ..ومع وجود شهادة (براءة) لمنتجاتنا من الملوثات الكيماوية والبيئية .. العالم كله سيوقف حياته على الملوخية السودانية ومنتجاتها .. - صحيح والمسألة دي بحساب بسيط ممكن تحقق عائد يصل سنوياً إلى (100) مليار دولار... - نعم ..؟ مائة مليار دولار ..كيف دا بترول (...) يا دوبك بعد ارتفاع الاسعار حتى يحقق السنة دي (100) مليار دولار ..الكلام دا كتير جداً ..!! -أبدا ما كتير.. لعدة أسباب ..المليون فدان ستكون مزروعة طوال العام مع فترة (بوار) بسيطة نسبياً لا تتعدى شهرين .. المسألة الثانية انو الطن ممكن يصل صافي عائدة في السوق العالمي إلى الفي دولار ..والفدان الواحد ممكن يصل انتاجه السنوي إلى (50) طناً يعني المليون فدان ممكن تنتج (50) مليون طن والمليون فدان تحقق عائد يصل إلى (100)مليار دولار سنويا باعتبار ان عائد الفدان الواحد يصل الى (100) ألف دولار وبعد اضافة قيمة أخرى – التصنيعية – يمكن أن يصل العائد من الطن إلى (300) ألف دولار... -يا هـ دا كلام خطير جداً ..يعني البلد دي ممكن تكون جنة الله في الارض .. اذا زرعوها ملوخية..؟ - نعم وانت الصادق ..ممكن وأكثر من هذا ..! - طيب والمشكلة شنو ...؟ -المشكلة أنو النـ............ انقطع الحديث فجأة وفشلت كل المحاولات في رصد بقيته......... ------------------------------- نواصل (عدل بواسطة عادل فضل المولى on 08-23-2005, 04:53 AM) (عدل بواسطة عادل فضل المولى on 08-23-2005, 04:57 AM) (عدل بواسطة عادل فضل المولى on 08-24-2005, 06:56 AM)

08-22-2005, 08:48 AM

bushra suleiman

bushra suleiman
تاريخ التسجيل: 05-27-2003
مجموع المشاركات: 2627

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
عزيزى عادل التحايا والود فى انتطار اكتمال مشروعك الحلم الجميل..نواصل القراءة/المتعة.

08-22-2005, 09:05 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
شمارات كلوروفيلية بعد أن وقفت الاستاذة عبير خيري على بوست الملوخية لبشرى سليمان قيل انها اخذت شهقة كمن تذكر شيئاً مهماً.. رصدها الملك وهي تحادث نفسها ..يعني الراجل الكلوروفيلي بتاع محسن خالد داك (الـ شفرو الطيب مصطفى) كان بياكل خدرة ..؟ عجب والله ..شوفو الجنى دا = أي محسن خالد= يعني جاب سيرة الطلح والشاف وال...الا ما جاب سيرة الخدرة كلو كلو..دا نظام حسادة يعني ولىّ شنو..؟ استغفر الله. احسن أقوم اسحب بوستي الرفعتو زمان..! ... أسرار الكون حسين ملاسي ذهب مبكراً إلى (الخضرجي) عوض الكائن في سوق الموردة ودار بينهما الحوار التالي... - يا عووضة ..كيفك ,؟ - تمام والله .. الا كم يوم ما شايفنك... يعني من يوم الطماطم وصلت 10 ألف انت كبيت الزوغة يا زول انتو صايمين ولىّ شنو..؟ -يعني في زول بيصوم من الأكل ..أبداً الموضوع انو انا بقيت أمشي ناس عمتي هناك في الصحافة وأجى آخر اليوم بي السوق المركزي وأهو بشيل الحاجات البقدر عليها .. وانت عارف فرصة انك تلقى نفسك في السوق المركزي ما بتكرر كل يوم .. لكن شايف الخضار مفرهد كدا ومنور.. وبعدين شايف لى ربطة (فياغرا) كبيرة ممكن تديني منها حبتين..؟ -يا حسين هزارك بقى عجيب الليلة ..فياغرا شنو؟ انت شايفني فاتح صيدلية..؟ -لا أبدا يا ابو الشباب ..ما تزعل ..جيب اضانك قريب .. ...... ...... ...... ..... ..... .... -ياخ صحي الكلام دا ؟ -أي والله ..حتى ناس المواصفات قالوا منعوها تدخل الاسواق .. وسمعت تحت تحت انو الوزير قال داير يحجزا على كل المزارع الزارعنها فيها ..عشان لو الموضوع دا طلع بالجد ..حيحولو مصانع الادوية دا كلها ليها ..برا دوا قحة برا كلام فارغ ..دا كلام الوزير الأنا سمعتو أمس..! -الموضوع دا كبير بالجد ...ولحدي هسا مافي زول نقشو ..أحسن انا ألم باقي الربطة دا ومعليش ما بقدر اديك منها اكثر من كيلو -ليه دا ما اتفاقنا ..خلاص خليهم اتنين كيلو بس ! شوهد حسين ملاسي يدخل الكمية في كيس أسود داكن قبل أن يضعها على المقعد الخلفي وشتات يا رييييييييييييييييييييييييييييييييييييييييييييييييييييييييييييييييييييم قال طماطم قال .... نواصل (عدل بواسطة عادل فضل المولى on 08-22-2005, 09:08 AM) (عدل بواسطة عادل فضل المولى on 08-22-2005, 09:20 AM)

08-22-2005, 12:44 PM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
ود الهبيل قيل إن الخبر انتشر بسرعة وسط الناس ..وصار جزءً من نقاش العامة ...صالح (تبلدينا) خريج كلية الزراعة دخل في نقاش حار مع ود الجيران الخريج والعاطل.. حول الموضوع ...تبلدينا كان منحازاً بشكل (كلي) للملوخية ويشير الى انها من النباتات المستوطنة في السودان وتستحق الرعاية والعناية من جهات الاختصاص ..وزارة الزراعة مثلاً أو وزارة الرعاية الاجتماعية لأنها يمكن أن تعود بمنافع متعددة عبر مشروعات لتوظيف الخريجين ..ويعتقد إن اكمال المهمة يكمن في انشاء مصانع موازية تعمل في مجال المنتجات الزراعية مثل تجربة تجفيف البصل في كسلا وتعبئة التمور في كريمة وهكذا .. حتى تعود الفائدة على الجميع .. صاحبنا الخريج والعاطل عن العمل منذ كم سنة اصابته نوبة من النرفزة بعد حديث تبلدينا وقال بلهجة تهديدية : -اسمع يا صالح ما تقول لي انو البلد دي ممكن تمشي لي قدام لو اهتموا بالزراعة ..الكلام دا انت بتقولو لأنك خريج زراعة ..لكن الانت ما عارفو انو البلد فيها ناس عقولهم حجرية ..يعني في حجر ممكن تقوم فوقو زراعة ..؟ ياخي بالله سيبك من الكلام دا ..وحكاية الملوخية دا ما تركب في رأس أي زول ...عليك الله هسا انت قاعد تأكلها في الاسبوع كم مرة ..؟ -يعني زي مرتين ..لكن دا ما المهم ..المهم انو يكون عندك القابلية للاقتناع بأنو للملوخية فوائد متعددة ..يعني فهم السؤال نصف الاجابة ..والاستعداد لتقبل مرارة الدواء نصف العلاج ..يعني البلد دي كلها بتأكل في الملوخية من زمان والموضوع فايت عليها وجدودنا ما كانوا عارفين من أين تأتيهم الهمة والنشاط ..ناس يقولو ليك الدخن وناس يقولو البلح وهي المسكينة- الخدرة- مافي زول مهببا .. -سيبك من اللف والدوران أنا عايز أقول ليك أنو في حاجتين أن بكرهن موت لانهن (هُبل) .. الملوخية والعوير ...تعرف ديل عندهن استعداد يقومن في أي مكان عليك الله هسي التفاح دا لو ما عندو قيمة ما كان يقوم في السودان ..؟ -انت ما شفتو في جبل مرة ...؟ -لا بالله.. تقصد الحميض الصغار داك اسمو تفاح ..؟ انت ما شايف الأحمر الـفي السوق ولىّ الأصفر ..دي نباتات عندها قيمة وفايدة ..قال ملوخية قال ..وبعدين ياخي لو فيها فايدة ليه تلقاها هي الوحيدة البايرة في السوق ..تعال آخر اليوم شوف الكميات البتمشي برميل الوساخة قدر شنو..؟ طيب ما كان يعملوا ليها مصانع بدل ما يشتتوها كدا....؟ لما أحس تبلدينا بأن النقاش لا يستند على حقائق علمية مع جارهم آثر تغيير الموضوع ... ........... اشارات متقاطعة هميمة المحامية اللبقة والظريفة والمحبوبة من جيرانها في الحلة وقفت كثيراً عند بوست الملوخية ولم تقتنع بالموضوع لكنها من باب الشمار الناعم قامت بالتحدث مع جارتها سناء في الحلة ونقلت الكلام المكتوب بي ضبانته في النت.. سناء انفعلت مع الموضوع وأعادت تدويره أكثر من مرة وهي تسترسل في الأسئلة من جهة وتعيد حفز الذاكرة من جهة أخرى ..ومن بين عمليات القدح المتوالية للذاكرة نطّ موقف ما جدير بالتوثيق.. هميمة قالت ليها: - عليك الله انت يا سناء ابوكم دا يوم واحد فتح ليك سيرة موضوع زي دا ..؟ -ابداً ما حصل كلو كلو وهو ذاتو ما بحب الملوخية لأنو وقت كان عزابي قال لي مرة مشيت مطعم شعبي في السوق العربي وطلبتها لكن بعد ما دخلت يدي نفسي انقفلت منها .. تصوري أظن عملوها بي طينها وهو زي قرش ليهو حصاية صغيرة ..أها قال بطلها من اليوم داك ومما اتزوجنا اظنو جابها مرتين ولا تلاتة ... - يعني اصلو ما في زول جاب سيرة لي موضوع زي دا - خالص ..وكمان الراجل بحب عسل النحل ويوم الخميس بيجي طابي ليهو فرخة كدا زي كيلو ونص بنعملها في العشاء و...و... لكن يا هميمة انا ما تذكرت موقف ..لا حول ولا قوة الا بالله ...يوم شايفة ليك تيس ناس علاء تمبس (الفي السعودية) بتعرفيهو..؟ أكل باقي الخدرة وعيدانها الرمتن تراجي ..أشوف التيس بعد ما كمل الخدرة قام يهاجم في الغنم بتاعات الحلة ..كان سمعتي صوتو بتقولي زي الضربوه بي حاجة ..هو يلبلب والغنم جاريات ..وقفو ليك الحلة على فد رجل .. - لا جنس دا ما سمعنا بيهو ... -هي كدي الرسول خشي لي جوة -مستعجلة شوية ولو ما عندك مانع عندي مشوار بعدين العصر كدا لي سعد قشرة تمشي معاي ..؟ -خلاص لو الزول دا جاء بدري ما بقدر اطلع لأنو بكون جاي تعبان وعايز ياخد ليهو نومة ويتغدى قريب المغرب ..غايتو انتي تعالي غاشياني ونشوف البيحصل شنو..؟ -سمح مع السلامة..! وعند الساعة السادسة مرت هميمة بجوار البيت ووجدت طفل سناء ذي الاربع أعوام واقفاً بالقرب من الباب ... -يا حلو ماما في ..؟ - نعم يا خالتو .. -أها وبابا جاء ولىّ لسه -بابا جا قبيل وامي قامت رسلتو السوق ,,؟ -لي شنو ..عندك فكرة..؟ -انا ما عارف لكن جا شايل معاه ملوخية كتييييييييييرة ..؟ فغرت هميمة فاها من الدهشة وحاولت استثمار صراحة الولد لاستخلاص آخر المواقف -أها قلت لي ..ماما بتعمل في شنو ..هسي؟ -ماما بتكسر في الحطب .. -وبابا ..؟ -بابا ...بابا ...بابا ...بابا ...بابا ...بابا...؟ -أي بابا ..مالو..؟ -بابا بياكل في الخدرة ..! -هي ما تكذب ..؟ -انا ما بكذب ..ممكن تشوفيهو من هنا ...أهو داك..! وفعلاً رأت هميمة بأم عينها أن الرجل (يمضغ) في الملوخية... قالت في نفسها : -مسكينة سناء حولتو لي (تيس) بالسرعة دي..ما كان تصبر لحدي ما تطبخها ليهو..عجب يا حريم...........! كتمت ضحكتها حتى لا يفتضح أمر الرجل امام ابنه ..وألغت المشوار ---------- نواصل

08-22-2005, 01:35 PM

Abdulla Ageed

Abdulla Ageed
تاريخ التسجيل: 07-31-2005
مجموع المشاركات: 803

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
دا شنو دا يا عادل؟! إبداع والله اللهم بارك

08-23-2005, 04:35 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: Abdulla Ageed)

الرائع سليمان بشرى

Quote: فى انتطار اكتمال مشروعك الحلم الجميل..نواصل القراءة/المتعة.

هذا الذي مشروعاً..قام على ساقي ما نثرته من ابداع في البوست الذي رفعته أنت
لقد كانت محاولة لوضع حواشي (بصورة مغايرة) لـ متن متكامل الابداع
لك كل المحبة
....
ود عقيد
الابداع
هاهنا
أنظر ...

ربنا يحفظو
ويحفظ كمان اصحابو
وانا حاكلم (تبلدينا) عشان يسجلو في الروضة الجديدة
..
وتسلم يا جميل

08-23-2005, 05:58 AM

bushra suleiman

bushra suleiman
تاريخ التسجيل: 05-27-2003
مجموع المشاركات: 2627

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
الزاهى عادل الزارعناهنا..كدى اليقدر يقلعنا..وفى الانتظار لغاية ما نقطف الثمار يا رائع

08-24-2005, 06:35 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: bushra suleiman)

البشرى

Quote: الزارعناهنا..كدى اليقدر يقلعنا

مين يقدر على زولا زرعو الله ..؟
والود ودي ان تمتلئ (شبعاً وريّاً)
وبالنسبة لـ

Quote: وفى الانتظار لغاية ما نقطف الثمار

انت انتظر انتظارك ...أما أنا فقد
تشبعت منها وقتما اكتحلت عيناي ببوستكم الرائع...
لك الود أكمله
وشايفها نورّت ...

08-24-2005, 10:16 AM

Abdulla Ageed

Abdulla Ageed
تاريخ التسجيل: 07-31-2005
مجموع المشاركات: 803

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)

Quote: وشايفها نورّت ...

loooooooooooool

يا ابو محمود دا طبعا (مشعل) وهو إبني الوحيد (حتى الآن).

ومن يوم داك وهو لابس عشان يمشي روضة (تبلدينا) وانت مطنّش....

مشعل عقيد

08-25-2005, 03:53 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: Abdulla Ageed)

ود عقيد

Quote: إبني الوحيد (حتى الآن).

ربنا يحفظو
وبعد إذن البشرى
سأرسل لك (500) ملم من الـ(Takashow Powder)
لزوم المساعدة و(تحفيز القوى العاملة) لرفع معدل الانتاج
__

إذااردت التفسير فعليك بتجفيف الملوخية... ستحصل على الـ(...Tak)

--
بالمناسبة مشعل دا ممكن ننزلو الروضة مع محمود عشان يمشو ويجو بي حافلة واحدة
وبعدين انتو تتفرغو شوية
....
...
..
.
لي
أ
خ
ت
مشعل
...
حبل المحبة
لا ينقطع
يا سعادة
ابو (مرمر)

08-25-2005, 07:30 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
من أي الجهات ؟ ناذر محمد الخليفة ..فنان ومبدع وعضو مهم في البورد ..قضيته الاساسية في نظر الكثيرين هي مسألة تهربه من الزواج ...رفع أكثر من بوست حول الموضوع لكنه لم يصل الى نتيجة مقنعة ..بعد قراءته بوست الملوخية انفجرت في ذهنه عدة اسئلة وتصورات وخطط للمخارجة والزوغان من أي اسئلة سخيفة من جنس " أها عملت شنو في موضوع العرس ..؟".. أعاد الموضوع في ذهن ناذر المقولة التي كادت ان تصير مثلاً : ثلاثة يذهبن الحزن ...الماء والخضرة والوجه الحسن...!" الله ...مقولة جميلة قالها بصوت مسموع ,,, ثم شرع في محاولة جادة لتفكيك بنية المقولة وفقاً لمنهجية نقدية جديدة تقوم على الملوخية بوصفها رؤية وموضوع في آن واحد...!! يا ه ..النص جميل ومتسق ومتماسك بصورة مدهشة تماما مثل القاعدة الاسمنتية .. الماء ....يا سلام الماء ضروري جداً للحياة وبعدين في الصيف بيكون مهم جداً لأنو واحد من وسائل مكافحة السحائي في بلد زي السودان ...أدمنت رش الحيشان الخضرة : آه المقصود هنا (الخدرة) لانو نحن السودانيين بنخفف بعض الحروف مثلاً نقول (خدر) ونحن نقصد خضر وكذلك نقول (عتمان) بالتاء – ونكون قاصدين عثمان بالثاء .. إذن القائل – وفقاً للحيثيات أعلاه – يقصد دون شك بكلمة (الخضرة) الملوخية ..وفي هذا معرفة بأهمية الملوخية - متقدمة على المراكز البحثية ...والقائل نفسه يكون على صلة بالطب والفلسفة والرياضيات ..لأن العرب زمان كانت لديهم اهتمامات متعددة – يعني تجد الطبيب والشاعر والكيميائي والفيلسوف كلهم في شخص واحد مع أن الجامعات لم تكن منتشرة في ذلك الوقت والجزيرة العربية كلها لا توجد فيها 26 جامعة !! قدر الجامعات الولائية هنا.. وطبعا الوجه الحسن ...ما يا هن البنات السمحات !! لكن ما الرابط بين المعطيات الثلاثة في تماهيها لتجاوز ثيمة الحزن ...؟ ..... .... ... .. . بعد (تحليل) عميق وصل ناذر الى نتيحة مفادها : شوف يا معلم الشاعر بيقول 1-تضرب ملوخية صااااااااااااااااااااااااح 2-تفتش الحنان وييييييييييييين 3-تنزل بيهو البحر ولو الحنان ما بيعرف يعوم يكون دا المطلوب عشان ياخد اول درس تطبيقي !!! وبعد دا دبرسة مافي -------------- نواصل

08-27-2005, 08:38 AM

Abdulla Ageed

Abdulla Ageed
تاريخ التسجيل: 07-31-2005
مجموع المشاركات: 803

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
الغالي أبو محمود أم تكشو دي طبعا لنا معها عشرة طويلة ولكن للأسف اقتراحك بإرسال المستخلصات في هذه اللحظة لن يجدي نفعا.. لأنو الجماعة في وادي ونحن في قارة تانية فوجودمستخلصات ام تكشو في هذه الحالة سيتسبب في أضرار غير متوقعة أما الاقتراح الثاني فنبصم عليه بالعشرة.. على الأقل مشعل يخرج من (ظلامية) القرية، ويتعلم شوية حنكشة من ابن المدينة (محمود).. عشان ما يطلع تور الله في بلد الله زي أبوهو. لك المودة الخالصة

08-27-2005, 05:00 AM

أحمد طه

أحمد طه
تاريخ التسجيل: 03-31-2004
مجموع المشاركات: 580

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
up

08-28-2005, 03:48 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: أحمد طه)
سعادة الجنرال شكراً على المرور لكن ما قلت لينا ام تكشو عند الهدندوة اسمها شنو؟

08-28-2005, 10:50 AM

Abdulla Ageed

Abdulla Ageed
تاريخ التسجيل: 07-31-2005
مجموع المشاركات: 803

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)

Quote: ام تكشو عند الهدندوة اسمها شنو؟

والله ياخي.. ما عارف

بس خلينا نسأل..

ولا أقول ليك
أول نرفع البوست دا
لأنو مفروض يكون فوق..
بعدين نشوف الحاصل

ولا شنو!

08-29-2005, 08:43 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: Abdulla Ageed)
الاصيل ود عقيد اجتهد معي حتى نعرف اسم أم تكشو عند معظم القبائل السودانية لأن (الوصلة) القادمة من (التداعيات) ستركز عليها + + ++ وبعدين ياخ حرام عليك ضارب الهبايب من خلف الاسبليت وفاكي مشعل لي كتاتيح البلد دي لا يجوز لا يجوز .. . هذا تحريض لمشعل والباقية الـ تبقى يعني شنو..؟ سجن سجن..! غرامة غرامة..!

08-27-2005, 07:04 AM

ناذر محمد الخليفة

ناذر محمد الخليفة
تاريخ التسجيل: 01-28-2005
مجموع المشاركات: 29251

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)

[إبداع والله يا أخ عادل

Quote: بعد (تحليل) عميق وصل ناذر الى نتيحة مفادها :
شوف يا معلم الشاعر بيقول
1-تضرب ملوخية صااااااااااااااااااااااااح
2-تفتش الحنان وييييييييييييين
3-تنزل بيهو البحر
ولو الحنان ما بيعرف يعوم يكون دا المطلوب عشان ياخد اول درس تطبيقي !!!
وبعد دا دبرسة مافي

وأنا زاتي قررت أزرع ملوخية في حوش بيتنا دا بدل دقن الباشا العبيط دا ، وبما إنو العروس حا تتأخر شوية حا أزرع كمية تجارية وأكلها براااي شهرين تلاتة من صباحات الرحمن أسحنا وإتسوك بيها بدل المعجون وأشرب بيها الشاي بدل اللقيمات دي وأفطر بيها وإتغدى بيها وإتعشى بيها تلاتة شهور ولحدي قبل العرس بي يوم ...

أها يوم الدخلة العروس إلا تقوم جارية وبعد سنة بس .. حا أجي في البورد هنا وأعمل لي روضة برااااااي زي العملا تبلدينا لشفع المنبر

صنفرة :

يقال أن تروتسكي الموجود في الابيض هذه الأيام نصح طلاب المؤتمر الوطني الذين هزموا في إنتخابات جامعة كردفان بزراعة الملوخية في فناء الجامعة حتى يكونوا أكثر إستعدادا للإنتخابات القادمة ولكن رفض طلاب المؤتمر هذه النصيحة الخالصة وتمسكوا بزراعة الفناء (ويكة) لزوم اللزوجة للإنتخابات وكدة ..

08-27-2005, 10:41 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: ناذر محمد الخليفة)

ناذر الفنان

Quote: وبعد سنة بس .. حا أجي في البورد هنا وأعمل لي روضة برااااااي زي العملا تبلدينا لشفع المنبر

بالله سجل لينا (محمد المقتدى عادل فضل المولى) معاك
لأنو عمو تبلدينا قال ما بقبل الا طفل واحد من الاسرة
تسلم يا جميل

Quote: قررت أزرع ملوخية في حوش بيتنا دا بدل دقن الباشا العبيط دا

لو كل زول زرع ليهو حوض واحد
كان السودان بقى لوحة خضراء
مكتوب عليها
الانتاج
...
بلغ التحيات لى تروتسكي
وقول ليه
الأبيض عارفناها ما بتنفات اليومين ديل
لكن تعال اطمان وارجع

08-29-2005, 02:39 AM

bushra suleiman

bushra suleiman
تاريخ التسجيل: 05-27-2003
مجموع المشاركات: 2627

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
هوى يا جماعة...الا زراعة الملوخية فى البيوت، بعدين امريكا ترسل ليكم جيوش لمحاربة الزراعة الما مقننة(انا ماعارف دى جات من وين..لكين زمان كنا بنشرب لبن مقنن)..ونبقى زى ناس افغانستان البزرعو البنقو..هو مش بنقو؟؟ المهم التصاريح مهمة يا جماعة..عشان نكون فى السليم. مودتى

08-29-2005, 05:22 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: bushra suleiman)

ود سليمان
يا مشلخ الحروف
تحية خضراء في يوم أخضر

Quote: لكين زمان كنا بنشرب لبن مقنن..

صحي والله هسي البودرة ما [بتقنن]
_______
بعدين الحوض المنور دا لقيتو انا في حوش ناس ابوذر
وكان شايلو تمبس
يا ربي يكون الزرعو منو...؟
..
.

Quote: وعــد المستحيل
كلمات بشرى سليمان
غناء الهادي حامد ود الجبل
انا كنت قبلك لا غريب
ولا كنت عارف لى دار
لاعرفت معنى الدهشه كيف،
ولاضقت طعم الانتظار
صدقت وعد المستحيل
وبنيت على الاوهام مزار
وقلت اغنى..
صوتى ضاع وسط الزحام
كانت الاحزان معاى
فى سكتى وجوه الكلام
لاالهوان قادر عليهو
ولاالفرح فى حضنى نام
وجيتى فى زمنى الحزين
شاره للترحال بداية
الخطى التواهه لاقت
والامانى علينا جاية
لاالزمان حسيت مداهو
ولاحروفى لقت نهاية

__
لو الاحواض كلها بهذه الخضرة
لشنت أمريكا علينا
ا
ل
ح
.
.
.
.
.
.
.
.
بــــــــــــــــــــــــــــــ

08-30-2005, 03:05 AM

bushra suleiman

bushra suleiman
تاريخ التسجيل: 05-27-2003
مجموع المشاركات: 2627

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
الرائع عادل صباحك نور..وايامك عديلة تعرف الاحواض الزى دى كنا ينزرعا فى ايام ليها رنين..والريدة كانت ساهلة ومدفقة زى عطور الفلور دامور، ما بتحتاج لى اذن من الشرطة الشعبية وناس الامر بالعروف. حسى القصة بقت معارك طاحنة وفيها عمليات كوماندوز وشغل عصابات...الله يكون فى العون...ويا أمريكا جاكى بلا (على وزن دنا عذابها....طبعا بنطقوها عزابا عشان كتار) وارقد عافية

08-30-2005, 05:13 AM

Ali Alhalawi

تاريخ التسجيل: 02-10-2004
مجموع المشاركات: 1467

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: bushra suleiman)
شنو يا عادل .. جننتونا .. يعنى نقلّع الجرجير و نزرع بدلو ملوخية؟!!

09-03-2005, 12:20 PM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: Ali Alhalawi)
يا الحلاوي تحية طيبة يعني انت عايز تقول انك زارع جرجير.. ..؟ يا راجل لما (الموليتا) تنعدم في الحواشات يمكن ان تتذكر الجرجير ... سنخصص لك واحد (ملوة) فول سوداني - دكوة- لزوم تجهيز الموليتا ،،، وسلم لي على أم تكشو الكنتو بتعبوها بي الشوالات .. .

08-30-2005, 07:33 AM

Abdulla Ageed

Abdulla Ageed
تاريخ التسجيل: 07-31-2005
مجموع المشاركات: 803

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)

Quote: هذا تحريض لمشعل
والباقية
الـ تبقى
يعني شنو..؟
سجن
سجن..!
غرامة غرامة..!

الحبيب عادل
تحريضك قد يجدي
..
ولكن!!
المشكلة في بلادنا دي
الملوخية ما بجيب نتيجة
عشان كدا .. خلينا كِدا
احسن.

ولا شنو يااااااااااا.. مغتربين؟

08-31-2005, 03:55 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: Abdulla Ageed)
يا ودعقيد احلى تحية دا اتهام صريح... والمسألة لو بقت كدا عايزة بحث ... عندي اقتراح.. يعني نضيف للملوخية (كوّل) نشوف إمكن يجيب نتيجة .. وكمان ما تنسى اسم (ام تكشو) عند مختلف القبائل السودانية ..... .... ... وتاني تسلم

09-04-2005, 05:21 AM

Abdulla Ageed

Abdulla Ageed
تاريخ التسجيل: 07-31-2005
مجموع المشاركات: 803

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)

العزيز ابو محمود
لك التحية

Quote: عندي اقتراح..
يعني نضيف للملوخية (كوّل)
نشوف إمكن يجيب نتيجة

أخشى أن الآوان قد فات
ولا جدوى من هذه الإضافات
ولو مكذبني اسأل (ابحراز)
قول ليه الفقير قال ليلك شنو؟

Quote: وكمان ما تنسى اسم (ام تكشو) عند
مختلف القبائل السودانية

لكين القبائل السودانية ألم فيها وين؟
هنا عندنا قبائل (غير سودانية)..
وهم تجاوزوا مرحلة (ام تكشو) بجميع
مسمياتها إلى مستحضرات جديدة
تتميز بالفعالية الفورية

تقديري
ومحبتي

09-07-2005, 12:16 PM

هشام مدنى

تاريخ التسجيل: 08-08-2004
مجموع المشاركات: 6667

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
عزيزي المبدع عادل فضل المولى تحيه واحترام لاول مرة ادخل هنا... انت بحق مبدع واتوقع ليك مستقبل باهر... وان اتجهة لكتابت سناريوهات حتكون مدهش... وصدقت القول ان الاخ د.كامل انسان مهموم بوطنه... واصل ابداعك

09-08-2005, 08:21 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: هشام مدنى)
المحترم هشام مدني أطيب تحية أولاً اشكرك على القبول بـ(شخصيتك الافتراضية) في النص وشكراً ثانيا على الكلمات الرقيقة التي زينت بها ردك لك كامل المحبة ودامت المودة

09-07-2005, 02:15 PM

ناذر محمد الخليفة

ناذر محمد الخليفة
تاريخ التسجيل: 01-28-2005
مجموع المشاركات: 29251

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
والله يا عادل جبيل إتغديت ملوخية مع مجموعة من الزملاء وفجأة أتذكرت بوستك وبوست الأخ بشير وقعدت أضحك لمن ما قدرت أواصل الأكل والسبب إنو في واحد من الحاضرين فتح موضوع عن الضعف الجنسي والفياقرا في أثناء الأكل .. وهم إستغربوا من ضحكي وحكيت ليهم النظرية بتاعت الملوخية ولم بعد داك ما صدقوا ووقعوا في الملوخية هبر رغم إنو من الأول ما كانوا متحمسين ليها شديد وطلبوا زيادة وكملوا الحلة كلها صنفرة : يفترض أن أقابلهم غدا ليخبروني بنتيجة ال (تيست) العملوهو

09-09-2005, 09:00 AM

ناذر محمد الخليفة

ناذر محمد الخليفة
تاريخ التسجيل: 01-28-2005
مجموع المشاركات: 29251

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: ناذر محمد الخليفة)
................... (عدل بواسطة ناذر محمد الخليفة on 09-18-2005, 11:24 AM)

09-11-2005, 06:15 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: ناذر محمد الخليفة)
ناذر يا جميل أنا لي يومين (مصبن) الرد على المداخلة دي في انتظار نتيجة (الفحص المعملي) لكن يبدو ان موضوع (الصورة) عمل ليك خُلعة ونسيت تمشي (الفحيص) عشان نشوف النتيجة على العموم أنا اثق ثقة كاملة في بشرى سليمان لانه لا يكتب (بره رأسه) ولا يهاتر ولا يصف الناس بالـ(...) تعرف ليه..؟ لأنو زول فنان ومبدع حقيقي وروح الفنان دايماً كدة محبة للخير والجمال... وعليه ووفقا للحيثيات أعلاه اتجاوز نتيجة الفحص المعملي لكن لي طلب رجاء أخوي اسحب اللنك أدناه وتسلم

09-18-2005, 11:22 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
ناذر تحية خضراء في مساء ليس أخضر يعني لا رديت لا سحبت اللنك ولىّ لسه الوقعة مأثرة فيك..؟ انتظرك.

09-18-2005, 11:25 AM

ناذر محمد الخليفة

ناذر محمد الخليفة
تاريخ التسجيل: 01-28-2005
مجموع المشاركات: 29251

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
أخي عادل .. أسف جدا والله على التأخير .. ما شايفني الايامات دي مشغول مع الحصين والجمال والعنابليق

11-17-2005, 04:41 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: ناذر محمد الخليفة)
بمناسبة بوست الخال ودقاسم نداء الى آكلي ... نرفع هذا البوست لأن معظم زواره ممن أدمن التهام الخدرة

11-17-2005, 06:02 AM

ناصر محمد خليل

ناصر محمد خليل
تاريخ التسجيل: 10-25-2005
مجموع المشاركات: 848

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
الأخ عادل تحية طيبة بوست جميل جدا لا ادري كيف لم الاحظه قبلا لك الشكر ولضيوفك على هذا الامتاع

11-17-2005, 06:32 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: ناصر محمد خليل)

الاخ ناصر
اطيب سلام
شكراً على المرور
والكلمات الطيبة

Quote: لا ادري كيف لم الاحظه قبلا

نعم..
لقد كان البوست في صفحة متأخرة كثيراً

11-17-2005, 06:04 AM

هميمة

تاريخ التسجيل: 12-19-2003
مجموع المشاركات: 0

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
عادل فضل المولى تحياتى وودى العميق والله كنت زهجانه فرقت على وضحكت دورى زكرنى قصة واحدة شافت جيرانها كل ساعتين بيعلفوا التور حقهم ويدخلو لى بقرة كل ساعتين يعلفوا ويدخلو ليهو بقره وهكذ ........... الفكره عجبتا .. قالت تطبقا فى الراجل .. بقت تخت صينيه وتشيل صينيه وعندما لم يطرا اى تحسن ملحووظ سالتو ليه التور بنفع فيه الاكل وهو لا ؟؟؟؟؟؟؟؟؟ قال ليها يااااااااااااااااااااااا عويره لكن دا ما بغيروا ليه البقر !!!!! اظنو يا عادل القصه كلها تكمن فى تغيير البقر والتيران ومع الجديد كلوا ح يمشى حسب الخطه المرسومه .......... تحياتى ولو اديتنى ضوء اخضر انا ممكن اكمل ليك اقى القصة عادل ......... لقيتك حكاى والله

11-19-2005, 05:39 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: هميمة)

الأحباب
ود عقيد وهميمة
شكراً على المرور والتشجيع
هميمة
وددت لو ان ردك واضافتك كانا هناك يجاوران تلك الفقرة التي (نقلت مشهداً افتراضياً لك)
لكن ..ليس هناك ما يقلق
فالبوست متصل
واضافتك كانت نوعية بالمعني الحرفي للكلمة

Quote: تحياتى ولو اديتنى ضوء اخضر انا ممكن اكمل ليك باقى القصة

تعرفي يا هميمة هناك علاقة تنافر بيني وبين ناس المرور
مع انني لا امتلك عربة
لذا فإن شوارعي مبسوطة دون ذلك اللون الغبي (ليس لون ...)
انتظر المزيد
والاضافة
ولك الود

11-17-2005, 07:06 AM

فيصل نوبي

فيصل نوبي
تاريخ التسجيل: 09-16-2005
مجموع المشاركات: 14194

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
ود فضل المولي الملوخية دي لسه حايمة كل موسم تظهر الموسم ده الرفعها منو ؟؟؟

11-19-2005, 02:00 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: فيصل نوبي)
العزيز نوبي افضل تحية ومبروك (الصورة) الجديدة (مالكوم X) ماعندنا فيها كلام.. لكن بقت (مستهلكة) ولو راجعت المنبر ستجد انها (نزلت) في ثلاثة بروفايلات - على ما اعتقد .. بالنسبة للملوخية فقد تخطت (الموسمية) بعد ان سجل معدل استهلاكها ارتفاعاً كبيراً وسط الشعب السوداني بعد اكتشاف (خواصها) وطاقتها الكامنة ..ولذلك فقد جنّ جنون (الفياغرا) واصبحت تباع في (البقالات) على حد افادة احد البوستات هنا وللاسباب اعلاه أوجد هذا البوست لنفسه مكانة في الصحفة الأولى ..و(ويجاهد) على ان يبقى في هذا المكان تأويل بعد ان هزمتنا امريكا في كافة الميادين ..اعتقد انه آن الأوان ان نهزمها عبر الملوخية بعد اسقاط منتجها (الفيا...) بالضربة القاضية..

11-17-2005, 07:15 AM

عبد الله عقيد

عبد الله عقيد
تاريخ التسجيل: 09-20-2005
مجموع المشاركات: 3728

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)

الأخ عادل
لك التحية والود
زي ما قال ليك فيصل
دا بوست موسمي..؟؟

الغريبة إنو الملوخية ما عندها موسم
ودواعيها أيضا.. حسب ما (ادعيت) ليس
لها موسم..

تحية للأخت هميمة

Quote: ولو اديتنى ضوء اخضر انا ممكن اكمل ليك اقى القصة

يا ريت والله تكملي
السرد فعلا شيّق
خلي عادل ينفض الكسل ويواصل معاك..

لكم ودي

11-19-2005, 02:11 PM

ناذر محمد الخليفة

ناذر محمد الخليفة
تاريخ التسجيل: 01-28-2005
مجموع المشاركات: 29251

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
إنتا يا عادل وكت حريف كدي في الأمور دي . البوست بتاع بيكهام داك ما لافاك ولا شنو صنفرة : ولا أاااااا !!!!

11-20-2005, 03:30 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: ناذر محمد الخليفة)

الحبيب ناذر ود الخليفة
اشكر لك مرورك الجميل

Quote: إنتا يا عادل وكت حريف كدي في الأمور دي .
البوست بتاع بيكهام داك ما لاقاك ولا شنو

البوست دا سمعت بيهو والكلام الجاني انو صاحبو
متخصص في تشريح وظائف الاعضاء
يعني بتاع بايولوجي
بينما بوست الملوخية
بتاع (وصفولوجي) يعني نظام كلام في كلام وكدا
يعني بدون وسائل ايضاحية
وكمان سمعت شمار حار جدا
انك يا ابو النيز لابد بي هناك
تحذير رسمي
كبدة الابل مضرة بالصحة

(عدل بواسطة عادل فضل المولى on 11-20-2005, 10:09 AM)

11-20-2005, 03:48 AM

فيصل نوبي

فيصل نوبي
تاريخ التسجيل: 09-16-2005
مجموع المشاركات: 14194

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: عادل فضل المولى)
تحذير رسمي كبدة الابل مضرة بالصحة لوووووووووووووووووووووووووووووووول ود فضل المولي انت ما دايرهم ياكلو شي تاني ولا شنو!!! اها رأيك شنو في لحم الغزال ؟؟ و العجب لو بقت ملوخية بي لحم غزال بي دمو ركوب البيجو عرفناو خلاس

11-20-2005, 10:06 AM

عادل فضل المولى

عادل فضل المولى
تاريخ التسجيل: 11-28-2004
مجموع المشاركات: 2165

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: ملوخية ..خضراء كلوروفيلية ...Malokhiyaonlive .love (Re: فيصل نوبي)

فيصل نوبي (البهّات)
يعني كبدة الابل النية
ماالحكاية ربما يكون فيها جنون ابل على
غرار جنون البقر
...

Quote: انت ما دايرهم ياكلو شي تاني ولا شنو!!!
اها رأيك شنو في لحم الغزال ؟؟
و العجب لو بقت ملوخية بي لحم غزال بي دمو

انا غايتو ما عندي معرفة بي لحوم الغزلان لأنو بي صراحة
ما أكلتو قبل كدا..
لذا لا استطيع الفتياء في هذا الموضوع

Quote: ركوب البيجو عرفناو خلاس

قالو البيجو - خمسة صفر اربعة - دي أكثر عربية مظلومة مع السودانيين
الجماعة يطلقون عليها لقب (غضب الوالدين) مع انها عربة
اسطورية بمعنى الكلمة(حافظت على تصميمها اكثر من37 سنة)
وقالوا لو كان لفرنسا شيء تفخر به بجانب ثورتها العظيمة
فيحق لها ان تفخر بالبيجو 504 التي يعرف سرها المصريون مثلما يعرفون سر الملوخية
والناس الاقتنوا البيجو المذكورة
يقولون انها (اقتصادية ومتينة وضهرها بارد ولها قوة تحمل على قطع المسافات الطويلة)
لكن حظها كدا في بلدنا ..نعمل شنو..
نوبي
انا عارف انو المعلومات الأخيرة دي انت ما طلبتها لكن زيادة خير مني ليك وللمتداخلين

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]