دعواتكم لزميلنا المفكر د.الباقر العفيف بالشفاء العاجل
|
|
 حجاب...لاندكروزر....ودوشكا..!!!
|
صاغة
هارون
ابكر
عمر
واسحاق...!!
قد تكون اقدامهم لم تطي ارض الخرطوم (حيث يعلمون فقط بانها الارض التي منها الانتنوف تقوم) وتضرب بيدا من حديد
علي القري والفيافي والوديان وتوزع الخلان والاهل والحبيبات ما بين موتي ومشردين في خيام الفرنجة علي اطراف (بانقي)
وكثري وام التيمان.وبعض خيام اللجو عند خور برنغا الشهير...!!!
يعلمون ايضا او قيل لهم بان الجنجويد اهل الحصين والكلاش الذين كانوا ولازالو يعيثون فساد ا في ارضهم وديارهم ويغتصبون الحرائر ايضا تمد لهم هاي الخرطوم يد العون..!!
اذن ردد الجميع وبصوت عالي..خرتوم.!!!
لازم ندقيييييييي ونكسري حتة حتة...!!!
خرطوم بلعا (اركوي مناي) الكان قبيل عيالا سرحا (بوبي مارلي) ويحاربون معنا في الفيافي والوديان وتقتسم الرصاص
والفراش والعصيدة القوية...ذهب مناوي وخرطم عبر ابوجا ولم نعد نسمع له حسا او صوتا....!!!
فكي ابكر الفكي المتجول في تخوم افريقيا ومحترف الحجابات في حروب بيافرا في نيجريا سمع تحت تحت بان هنالك تجريدة
من اهل الفيافي القريبة من فورت لامي ستذهب الي حربا شرسة مع قوما شرسين توعدوا (امريكيا وروسيا الاثنين معا)..!!
صاغة..!!!
ابا فكي ندوري حجاب هنا موت..!!!
هارون
ابا فكي ندوري حجاب هنا خرطمة..!!
عمر
ابا فكي ندوري حجاب هنا دوشكا..!!
اسحاق
ابا فكي ندوري حجاب هنا رصاص..!!
بياض عالي السقف ومطلب ابكري متكرر لكل سائل من افراد تلكم التجريدة باحثا عن (حجاب) وكادوك...
سرحو شعركم ومشطوه مثل افراد (اركوي مناي) بوب مارلي... فهي اولي المتطلبات للبقاء في الخرطوم حيث الانتنوف تقوم
في احدي شوراعها الرئيسة حيث لا متاعب ولادفاع شعبي ولا سلاه غوش..!!!
فكر..ونظر بعيدا في بخسه من قرعة نبتت في (السنغال) فكر ابكر وقال...
ياعيال حجاب ده يشتغل علي مرتين..!!!
مرتين..!!
نعم..وحدة حجابية بها شريحة قادرة علي التشويس علي كل رادارت الرصد والمتابعة ويمكنها حملكم الي قلب امدرمان..!!
دون رقيب
ودون حسيب
ودون كركبة ايضا..!!!
سيذيعون عبر التلفاز والاذاعة بانكم اتون اليهم ولكن لاعليكم فانكم اتون الي مرحلة وحدة الحجاب الاولي..ام درمان.!!!
وحدة الحجاب الاولي ام درمان...يا صاغة ويا ابكر ويا هارون..!!!
والوحدة الثانية تحتاج الي شحنات وطقوس استوائية وصياح تماسيح لابد من عبور نهر حتي يعمل الحجاب مرة اخري بفاعليته القصوي..!!!
ان لم تقطعوا نهر او بحرا او مجري مائي فان الحجابات سوف تتطاير علي حافة رصيف الشوراع والطرقات الامدرمانية
وستاكل حجابات الفكي الامدرماني حجاباتي...!!!!
اذن عليكم بقطوع النهر وعبوره...!!!
وساعتها ستجدون رفاقكم الذين تخلوا من البوب مارلي واصبحوا خرطوميين اكثر من الملك...
وستذهبون الي قصر منيف..وستناولون من رئيسا يجيد الرقص علي الحبال وعلي المنصات..!!!!
|
|
 
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
بث تلفزيون السودان فيما بث في تغطيته لمعركة الذراع الطويلة التي نفذتها حركة العدل والمساواة كيمات ماهولة وتجارية من
حجابات يبدو ان الغالبية العظمي من القوات الاتية علي صهوة اللاندكرورزات كانت ترتديها ..ويذهب الخيال بعيدا الي مراحل ما قبل التحرك والتدريب وتكاد تحس رواج سوق الفكيين واصحاب انتاج تلكم الاوراق المكتوبة بمهنية عالية وبطلس ملس معقد التركيب والطلاسم...!!!
وبفلاش باك سريع لدور الحجاب في الواقع السوداني المعاصر يلاحظ انتشاره بين غالبية الشعب السوداني في اسقاط واضح لثقافة تومن بالاسطورة والتعويذة الافريقية المخلوطة ببعض الوهج الصوفي..وان كان افراد العدل والمساواة اتوا بوابل من تلك الحجابات المغلفة بلجد (ابن لذينة) فان تفتيش سريع ونشط لكل وحدات الجيش السوداني قادرا علي استخراج مجروسات من الحجابات والتعاويذ...
1-حجاب مانع رصاص وممتصه ومحوله الي بردا وسلام
ويتنوع الي حجاب دوشكا وحجاب ضد المدفعية التقيلة يمكنها اصابتك في شكل حجر قد يخلف كدمات (فليع) ولكن لا طريقة للموت
2-حجاب اسر يحو ل اسريك الي حمائم وديعة تعاملك بكل ود ومحبة
3-حجاب محبة لزوم بعض الطلعات الحميمة في ارض الغنائم يعطيك مساحة وزمن وحبيبات دهشة ومتعة...!!!
4-حجاب تكديك القادة والاركان يقيك شرور المخالفات العسكرية والهواء البارد او الهبايب..
حجابات من كل نوع وشكل وفي ايامات الحروب الطويلة التي كانت في السودان نشط منتجين هذه الاشياء وراج سوقهم
وكل متحرك يعلنه الجيش السوداني كانت قطاطيهم ورواكيبهم تشهد حضورا من كل الرتب ابتداء من الجندي حتي (ابا كبير ذااتو)..!!!!
ولعل قصة الفكي (ابولوح) الشهير الذي كان يتجول بين المتحركات العسكرية كفكي دفاع شعبي بلوح يمارس (اللخ) وتوزيع مشروبه المحائي الاسود اللون حتي تم اسره لينكر لوحه
ويلعن سنسفيل الذين وشو به..عندما سال اهل الحركة الشعبية
لوه ده بتاع منو..؟؟؟
........
اذن انها معركة (حجاب لاقي حجاب) وهي القاعدة الثابتة لتعطي من الجانبان دفرات من التسليح والتكيتك والجاهزية وخطة الحرب ولكن في كل الاحوال يبقي الحجاب قابعا في الضراع او حول منطقة الوسط بالاضافة الي الشربات المحائية التي يكون الغالبية قد تناولها من باقات (العصير) الصغيرة الحجم..!!
انها رحلة البحث عن الاسطورة والعمل ضد قوانين الحياة الفيزئية والكيمياء واستدعاء البعد الرابع الي ارض المعركة..!!![/red]
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: شادية عبد المنعم)
|
| Quote: حمد لله على السلامة |
هلا شادية ومليون تحية
وحبابك الحجاب الجابك لينا..
ده احنا ياشادية كنا مجهزين لاندكروزرات لحماية منطقة البرهانية وحواف السوق الشعبي القديم
ولكن الحمد الكباري عصلجت وخربت شغل الحجابات وكفتنا شرور تجهيز غزوة الدفاع عن الناس المدهشة
والاصدقاء
وكل الود
مع تحيات ابكر حجابات الزمان داك
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
سلام يا كيكي ..
الإشاعات الحايمة بتقول إنو التفسير الوحيد لعدم رصد الحكومة للجيش الزاحف حتى فوجئوا به في شوارع العرضة والفتيحاب هو إن الجيش بأكمله كان مسلحا بالحجبات (دبل قبينة) بحيث مر قدام كل المتحركات والطلعات الجوية وما تم رصدو إلا وهم داخلين علي امدرمان ..
وزي ما الناس سألت وإتأكدت من موضوع الحجبات ...
أكيد ناس خليل لسع بيسألو : ليه الحجبات دي (نفد منها الرصيد) لمن دخلو امدرمان ؟!!
لأنو لو كان الرصيد كافي الجماعة ديل اكيد ما كانوا بيتشافوا إلا وهم في الإذاعة والقصر والقيادة !!
ولا شنو ؟!!
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: ناذر محمد الخليفة)
|
Quote: أكيد ناس خليل لسع بيسألو : ليه الحجبات دي (نفد منها الرصيد) لمن دخلو امدرمان ؟!!
لأنو لو كان الرصيد كافي الجماعة ديل اكيد ما كانوا بيتشافوا إلا وهم في الإذاعة والقصر والقيادة !! |
هلا يا ناذر وحبابك يامان
الحجابات يا ناذر فيها نظريات كثيرة واكثر النظريات التي يمكن ان تنطبق علي موضوع الاذرع الطويلة
هي ان الحجاب الاصلي بشتغل في شكل موجات (waves) ولمسافة معينة من مركز انتاج الحجاب راكوبة او قطية الفكي...
فيبدو فعلا ان مسافة الف كيلو ونيف اخرجت الحجابات خارج الشبكة والعمل في مضارب الكباري ومنافذ الخرطوم...
الحجابات مشكلتها مشكلة مدي يا ناذر ولو الفكييين ديل كانوا في احدي اللاندكروزرات كان كل القوة
الخرطوم جوووه...
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: Hassan Makkawi)
|
Quote: الجماعة دقسوا فى النوعية
الحجبات بتاعتم كانت ماركة ( لا تموتناإلا إذا أجلنك تم ) |
هلا يا مكاوي
الحجابات دي ملبوسة بقناعة تامة وضاعف الايمان بها هي التجربة
فقوات خليل التي اتت الي الخرطوم حاربت لمدة سنوات وبنفس الادوات والقناعات الحجابية
ويبدو ان الاقدار والظروف لم تتيح للذين قتلوا تدعيم القناعات بهذا الحجابات وزيادة عددها في المعارك القادمة...
بالمناسبة الجيش السوداني ايضا الحجاب عدة اساسية وضروري كان في كل كعة من كعاته
يعني القصة حجاب لاقي حجاب..
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
الحجاب او التعويذة ثقافة سائدة في قطاع واسع من ارض السودان.
يقال والعهدة علي الراوي بان حجاب الرصاص يتم تجريبه بواسطة ديك له مواصفات معينة
(ديك له سبعة ارواح) يتم الباسه الحجاب ثم يصوب الرصاص بكثافة علي الديك الذي ما ان ينتهي الضرب
حتي يتنفض زي الما حصلت حاجة وبذهب لمواصلة مهامه الديكية زي الما حصلت حاجة...!!
حكي لي احد الشخوص بانه شاهد عيان علي تجربة (ديك تجارب)..!!
واعتقد بان التفسير المنطقي هي طريقة الضرب تجاه الديك تكون بحرفنة عالية تصوب فقط للمناطق المحيطة بالديك دون ضربه هو في مقتل...والله اعلم
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
وعلي هامش حجاب الرصاص واو حجاب الموت يمكننا السياحة ومهابشة بعض انواع الحجوبات التي تجد رواجا في الاسواق ولها حرفاء مهنة وسادة ينتجونها بكميات تجارية لتكفي الجميع ...
هنالك حجاب غريب وعجيب ياتي في شكل بلحة من فكي كان يطلق عليه (الفكي ابو بلحة)..
مهمة هذه البلحة هي محاربة وايقاف امتصاص عصير البلح (اي العرقي )..!!
يروج له النساء اللائي يعانين من ادمان الازواج وبعض الاسر التي تتحرج من الاحتساء المزمن لابنائها
من الشراب والسكر...
فقد راج سوق الفكي ابو بلحة حتي صار ثري ومن علية القوم وكانت كل بلحة تخرج منه تورثه مال وزغاريد امام بيته بعد اسبوع او اسبوعين التهام البلحة علي غفلة من قبل السكرجي الرعديد..!!!
وقيل في احدي المرات فشلت كل بلحاته التي اخرجها في اسناء احد محبي العرقي من التوبة
وكل بلحة كان تزيد ذلك الرجل المزيد من الرغبة في الكتح والشراب..!!
ليغضب الفكي ابو بلحة غضبا شديد ..!!
لتجد المدينة ذلك الرجل الرافض لتكلونجيا وكادوك البلحة ميتا
وبعد تحريات الشرطة الكثيفة اكتشفت الشرطة بان الفكي ابو بلحة هو من وجه كبار مجرمي المدينة
بقتله حتي لا يعيق تدفق الجنيهات وتبقي اسطورة بلحته هي السائدة
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: Hassan Makkawi)
|
| Quote: لكن الحجاب الاصلي في امدرمان |
هلا يامكاوي
امدرمان ملانة حجابات لكن يا صحبي الحجاب الاصلي
محلو قاعدد ومعروف وناس امدر ذاتم بملو عرباتهم بنزين وبمشوا بهناك....
وبعدين انا قناعاتي انو ناس العدل والمساواة ديل حجاباتهم من فكي (تندل)
والفكي التندل هو الفكي الاصلي(البرنجي) الا (دار صباح) لاقويسها دي يتفك اي حجاب لافي
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
حجاب اخر له حضور مميز ورواج تقيل وعبر كثيرا الي خارج الحدود
هو الحجاب ابو طلبة...
طلبة يمكن ان تكون في احجام مختلفة يكتب الححاب في محيطها وتغلف بجلد قووي ثم يترك (خرم) المفتاح
مفتوحا ..وهذا لمهام عديدة
محاكم
مقابلة مسوول
تمشية امور ومعاملات في مكاتب حكومية
وايضا يشاع بمقدرته في تكميم افواه المدراء اصحاب النقة العالية
انها طبلة لمهام عديدة (تقضية الامور وتسهيلها)
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
Quote: ديك له سبعة ارواح) يتم الباسه الحجاب ثم يصوب الرصاص بكثافة علي الديك الذي ما ان ينتهي الضرب
حتي يتنفض زي الما حصلت حاجة وبذهب لمواصلة مهامه الديكية زي الما حصلت حاجة...!!
|
كيكي تحياتي .. تجربة السلاح في الديك رابط ليه حجاب دي حقيقة حصلت قدام عينى في الثمينينات والله الديك ده ضربه سلاح يمن قال بس وطوالى بعد ما خلص مشى على الدجاجة التقول ادوه فياقرة او دائر افك غبينته فيها.... الحجاب داك اسمه ابوتكة...
ودي
امين
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
نوعية اخري ورائجة ايضا من الحجابات والتعاويذ هو حجاب الرزق حجاب الشرتيت والضحكات
ومن الذي لايريد ويعشق الشرتيت فهو ياتي في نوعين..
1-محاية كيلة وملوة من لوح متر ونص عليك بشرابها (ون قو)
2-حجاب صغنبوتي بكرت
ولكن محاذيره صعبة المنال للمجارمة ومحبي الدنيا وفعالية هذا الحجاب تنهي اوتوماتيكي عند المكابسة في الشان الحريمي خارج اطار الموسسة الزوجية فيقال ان الفكي ابورزق يحذرك بذلك عقب شراب المحاية...
ويقال ان احدهم من الذين مولوعين بالدونجية ذهب به اهله الي فكي تندل لجرعة رزقية شربها ون قو
وعندما اخبره الفكي بالمحاذير سب الفكي وهدده بان قادرا علي استفراغ هذه المحاية في راسه...
رزقا تكوسه عند فكي ورزقا تكوسه في خشم البقرة..
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: Hassan Makkawi)
|
| Quote: كان ما غلطان من أغاني رقصة العروسة |
نعم يا حسان الحجاب ورد كثير في اغاني البنات
وياريت ابو الخل او سلمي الشيخ يجونا بجاي يدونا لمحة عن الحجاب في الاغاني الشعبية..
وعروس تخلي العريس يمسك حجاباتهم دي عروس بتكون مشت لفكي ما تندل
في مرحلة ما قبل العرس
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
!!!
Quote: هي ان الحجاب الاصلي بشتغل في شكل موجات (waves) ولمسافة معينة من مركز انتاج الحجاب راكوبة او قطية الفكي...
|
وليه ما يكون صاحبنا الفكي هو زاتو الكان في اللاندكروزر الفزت من قولة تيت من الدواس ولي هسي كايسين ليهو وما لاقينو !!
عشان كدة موجات الويف ما عملت توطش !!
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: ناذر محمد الخليفة)
|
وليه ما يكون صاحبنا الفكي هو زاتو الكان في اللاندكروزر الفزت من قولة تيت من الدواس ولي هسي كايسين ليهو وما لاقينو !!
عشان كدة موجات الويف ما عملت توطش !!
هلا يا ناذر
وحكاية(ابا كبير دي)
عندنا فيها نظرية اركلوجية بتقول
في الاصل هنالك فكي (خسوسي) مقدراته عالية وبشتغل علي تقيل وبشرتيت كثير
اخفاء--يااع- شتات خالي محطات
وممكن يشتغل اذاعة بيانات ومسك حكومات توضيب الامر..
فالفكي الخسوسي ده اكيد وصل برفقة ابا كبير الي ارض امدرمان برفقة الجيوش
وايضا استطاع ان يخارج (ابا كبير ) بتطلس ملس معقد ...
اما صحباني التانين بتاعين الويفس فديل بكون الفكيه بتاعنهم ما جو مع القوي عشان كده
الحجابات عصلجت معاهم..
فالقصة يا فردة مقام ورتب حجابية
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
بنكتة اضحكتني حتي الثمالة ارسلها احد الاصدقاء ويمكني استدعائها للضحك في كل مرة احتاج الي ضحكة طوييلللة
لابد من الذهاب ولو علي عجالة الي نوع قلبوس من الفكييه يعملون في حتات ضيقة خلاص...
حجاب زبون في بيوت النسوان الكعبات
حجاب لجلب الزبون المريش من طقاطيق الارض
وهنا القصة ليس بحجاب بل وصفة معقدة التركيب تخلط باعشاب ذات ريحة نفاذة مهمتها الاساسية هي
جلب الزبون والمنافسة مع الاخريات..
وده نوع من الفكييه وسخ ولا يعول عليه كثيرا في المهام النبيلة
وهو ايضا يمكنه النزول كزبون في ماتشات قد تكون عربون
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
| Quote: الحجاب داك اسمه ابوتكة |
هلا يا الامين ومعليش ياخي مداخلتك مدسوسة والظاهر انو سيرة الحجابات دي
طششت صحبك شوية
وابو تكة دي بكون رهيب ياخي وغالي
وفي حجاب في شكل عرق اسمو (عرق بندا) ح نحكي عنو شوية كده
رهيب وقاتل وصعب المراس
وتحياتي يا الامين
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
ويمكننا رصد بعض الاحجبة سريعا
1-حجاب باعوض
2-حجاب ضد الطير حتي لاتاكل الزراعة(يضاف اليه حجاب العنتد ثمز العكوك) التجارب اثبتت عدم جدواه
3-حجاب ضد ام الصبيان (العين)
4-حجاب نمو رزاعة
5-حجاب في رقاب الابقار ضد السرقة ولدر مزيد من الالبان
6-حجاب تطفيش عريس
7-حجاب طلاق
وهكذا..
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
كيكي سلامات يا رجل
حكيك ليهو طعم وسرد ممتع جدا
ياخوي مسالة الحجبات دي حقيقة واقعة في كل انحاء السودان
ديل وديل ناس حجبات
والمسالة في بلدي بقت حرب حجبات
كل الاحزاب السودانية التقليدية زعاماتها بتاعين حجبات
وحكومات العسكر السودانية اهم زول فيها الفكي بتاع الحجبات كدي اسال المشير
انت لو جيت فندق الشرق كنت امنت
البلد تحكم بالحجاب مش الفرنسي اقصد الحجاب ابو جلد ود لزينة
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: كمبورة)
|
| Quote: البلد تحكم بالحجاب مش الفرنسي اقصد الحجاب ابو جلد ود لزينة |
نعم يا كمبورة والحجابات ما تديك الدرب
وما ننستغرب لو سمعنا بحجابات انتخابات او حجاب فصل الدين عن الدولة
وحجاب لعودة المشروع الحضاري وهكذا...
الفكي اصبح هو الفوكل بوبينت بتاع الجميع...
شعبا وحكومة..
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
كيكي ..
Quote: 1-حجاب باعوض
2-حجاب ضد الطير حتي لاتاكل الزراعة(يضاف اليه حجاب العنتد ثمز العكوك) التجارب اثبتت عدم جدواه
3-حجاب ضد ام الصبيان (العين)
4-حجاب نمو رزاعة
5-حجاب في رقاب الابقار ضد السرقة ولدر مزيد من الالبان
6-حجاب تطفيش عريس
7-حجاب طلاق
|
ما في حجاب ضد الفصل من المنبر ؟
أو ضد إرجاع المفصول للمنبر ؟؟
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: ناذر محمد الخليفة)
|
Quote: ما في حجاب ضد الفصل من المنبر ؟
أو ضد إرجاع المفصول للمنبر ؟؟ |
تعرف يا ناذر مع سوق سودانيز القاجي ده ما تستبعد بعد شوية
يكون في تكديك حايم بين البوستات
كادوك لابوصلعة ضد الفصل
كادوك كلكلات
كادوك تطفيش اعداء اسفيرييين
(انا غايتو من حسع حاجز ملاسي)
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: طارق جبريل)
|
Quote: ياخي انا داير حجاب قروش
عايز ابقى اسامة داؤود نبر تو
كدي شوف لي القصة دي
ومافي داعي تقعد انت في الدوحة
بجبك معاي مستشار احجبة |
هلا يادكتور
وحجاب قروش ده ياطارق كلنا بنطلع معاك طوف وفزع
وبنفتشوا تفتيش شديد...
وكدي النكلم فكي قوبي بتاع الكمبو رغم انو بشتغل في العملة القديمة
لكن نخليهو يجتهد لينا اجتهاد شديد ما دام القصة فيها طلوع من الدوحة دي
ومستشار كمان (واااااااو)...!!!
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: elameen)
|
نتمني ان يتضاير الجميع قليلا....!!!! فاننا بصدد التحدث عن نوع معين وغريب وعجيب من الحجابات فهو في الاصل عرق
يغلف وبقال انه يخلط ببعض الايات القرانية في مجاوزة معقدة وغامضة لاداء مهمة (تعطيل مهام)..!!!
اذا اختصم احدهما والاخر في امر امراءة ونالها زوجة صالحة لايترك علي راحته بل لابد من ملاحقته طلس ملاسا
حتي وفي فراشه لتعطيل مهامه الاساسية كزوج في فترة شهر عسل...ويقال ان هذا الحجاب يسرب الي مرقد الزوجين
ويضع علي مرمي حجر من المرقد الافتراضي..!!!
وقد قيل في الحكي العجيب بان احد الفتية اعجبته فتاة وهام بها واستطاع اقتلاعها من براثن الكثيرين من الذين كانوا
يريدونها فيبدو ان احدهم قد (لبد له) في زقاق حجابي ضيق او كما تخيل الجميع..
ذهب الي شهر العسل بعيدا من مدارات المنافسين وظنه بانه قد يتخارج من مدي بث الحجاب ولكن يبدو ان تعديلا ما قد اجري علي فاعلية الحجاب ليصل الي في مرقده البعيد ولكن في شكل موجات متقطعة...!!!
كل التحضيرات ومقدمات القصة كان صاحبنا في كامل لياقته (العدية) وكان يودي مهام ما قبل الايلاج بكل نشاط ووبطريقة متكملة ولكن وبمجرد اقترابه من المرمي كان الامر يتحول الي (سراب بقيع) ولا فعالية تذكر واكبر كميات من الفياجرا لم تكن قادرة علي اعادة الامر الي العمل..!!!!!
قصة كانت مشهورة ومحيرة وتعكس الاسقاط النفسي في فوبيا الحجابات ومدي تغلغلها بعيدا في الوعي الشعبي لدي الكثيرين
والايمان القاطع بها...!!!!
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: elameen)
|
| Quote: سلام يا كيكي شوف حتى في المداخلات بنعمل ليها حجبات عشان تكون مخفية؟ تقول لي كيف دخلوا امدرمان؟ |
هلا ياالامين وما هينين تب في حتت الحجابات دي
بس المرة الجاية بالله خلوها فورويل درايف عشان القصة تظبط معاكم(ههه)
كل الود
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
أبنت إبانه فصيحة وجسدت موضوع الحجاب بعيداً عن الغزوة بدرجة قف تأمل وتاملت كثيراً في الحجاب والخربني خراب حتى قبل أن يرفع الستار وبقيت فاغراً فاهي لجمال الحرف ورشاقة الكلمة حتى بعد أن أضيئت الأنوار وفتحت الأبواب معلنة إنتهاء العرض أو الفصل أو حتى إستراحة ما بين الشوطين، ولن أجد ما أزيد على ما أفاض به كيبوردك والذي أحسب أنه من نوع Dell وإلا فمايكروسوفت ويرلس في أسوأ الأحوال، وددت لو أخبرتنا أكثر عن إستعانة البشر بالجن في سعيهم الدؤوب للولوج إلى عوالم الغيب والغيبيات والنبؤات فالإنسان شغوف بمثل هذه الأمور ويستوي في هذا الشغف والتعلق الذين يعلمون والذين ما ناقشين حنانهم. والحال كذلك أجد أن الحجاب كما فهمت من إفاضتكم بالبوست يجمع أحجبه أو حجبات ويسمي في أمصار غير بلادنا تعويذة أو تعاويذ ، ويمكن أن يكون كادوك أو عمل أو دنبوشي إلى آخر التسميات في هذا الباب الضلفتين من أبواب العوالم الخفية. ولكن ما علاقة الحجاب بالحجب فقد لعلع الفنان غير ذي مرة بأن حجبوه عن عينو وبقو بينو ما بينو – والبين الأول هو والبين التاني المحبوب والمعني بين والله أعلم – فهل الحجب هنا هو الإقامة الجبرية للجكساية أم تربية كلاب من النوع الذي يتمضمض من عراقيب الرجال أمام البيت أم تم إستعانة الأسرة بخدامه أغنتهم عناء الوقوف قدام الباب لكشح موية الغسيل أو البلاعة بجردل أو نص صفيحة في الظاهر والتلصص والنظر للرايح والغادي. هناك الحجاب أو العرق الذي يجلب المحبة كما قلت وهناك حجاب تغيير نتيجة المباراة وبخاصة في كرة القدم وهو حجاب على الطائر أو through وهناك حجاب يحرسك من شر ما خلق وهذا أقرب لجماعة بلاك ووتر الأمنية.
الموضوع جد شيق وعميق الأغوار ، أخي الكريم نحن بإختصار شعب يصنع الوهم ويصدقه
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: almulaomar)
|
| Quote: أخي الكريم نحن بإختصار شعب يصنع الوهم ويصدقه |
هلا والف مرحب بالملا عمر
وشكرا علي اضافتك الثرة وفتحك لبعض مدارك الحديث في مدارات الحجابات والكواديك التي هي بالطبع
اصبحت شانا سودانيا اخر مثله ومثل كل الشوون الاخري يحتاج الي تفكيك وحديث ومعالجات ملحة وتثقيف..
وقد نضيف...
من الحجابات التي وجدت رواجا وصدي وسوق هي حجابات الماتشات الكروية ونذكر انه في زمن مضي اوردت
احدي الصحف السودانية صورة للاعب هلالي كبير وهو يضع (حجاب) من النوع ابوكديس في داخل شرابه
والغريبة في الامر هو ان ذلك اللاعب كان جامعي وعلي قدر كبير من الحرفنة والموهبة ولايحتاج الي مثل هذه
الاشياء..ولكن يبدو انها عقلية الادارة هي من اقنعته بذلك (بجانب راسه الخفيف ايضا)..!!!
ويحكي في سيرة النكات بان اللاعب حموري في ايامات تواجده في فريقه الاول في ودمدني قد اختلف مع الادارة في مبلغ
يبدو ان الادارة قد دفعت الي الفكي اكثر منه ليحاور في المباراة كل دفاع الخصم ويضع الكورة علي خط المرمي ويذهب دون ااحرازها هدف...وعندما سال عن ذلك قال ليهم (خلو الفكي يجي يدخلها قوون)..!!!
في حجابات الكورة دائما المرمي وحارس المرمي هي منطقة الكوراث الحجابية فقد افتي بعض المهاجمين(والله اعلم ) بانهم
عندما يواجهون ذلك حارس المرمي يتحول امامهم الي اسد كاسر بانياب ليث لا تضحك فيهرب الجميع من امامه ويتركون الكورة له...!!!
نوع اخر من فنون اللقوسة الكروية هي من كان يوديها ذلك الفكي الشهير في احدي المدن وايهام الاداريين بان المباراة يتم
مشاهدتها في طشت به ماء يهز الطش الطش هزا عنيفا بقوي رختيرية عندما تصل الكورة لمرمي الفريق (جالب الفكي)
اايضا تكدك الكورة في (كديس) عليه مهمة التجوال في الملعب ولو بجزء منه.....
وكذلك هنالك منطقة خلف المرمي حيث توضع بها بعض الحجابات التي تقي شرور الكرات المرتدة...!!!!!
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
الاخ عبد الكريم
سلام
كتر خيرك والله المقال خفيف وظريف ومهضوم
علي الاقل خفف لينا دبرسة الاحداث
وكدي نقوم نمشي علي المعرض امكن نقدر نجازف لينا حجاب
عندنا حاجات كتيرة معصلجة امكن تحلحل
تحياتي مرة واخرى نحتاج لكتاباتك لا تنقطع
ناصر احمدالمصطفى
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: Nasir Ahmed Elmustafa)
|
الأخ الباشمهندس عبد الكريم كيكي
السلام عليكم و رحمة الله
عرضك للموضوع طريف و ظريف أتفق معك في معظم طرحك
بكل أسف مقولتك حجاب لاقي حجاب صحيحة بنسبة كبيرة
يفترض في المجاهدين الرساليين صحة المعتقد لكن وجد مع الجمالي بعد مقتله
الكثير من الأحجبة و هو أحد من رباهم الترابي ، مما يدل على شيئين مؤسفين
هما الخلل العقدي الذي نتج عنه الاعتقاد الخاطئ في التمائم أنها تنفع من
دون الله ، و الثاني الخلل في الأخوة الإيمانية الذي نتج عنه لجوء هؤلاء للسلطة
عبر السلاح و قتل المسلمين ، نعم دفع الصائل و رد الباغي و لو بقتاله مشروع
حتى يكف عن العدوان و القصاص من القاتل مشروع ، لكن أن يقتل المسلم أخاه من
أجل سلطة أو مال فهذا يدل على خلل في تربيته الإيمانية ، المؤسف أن الترابي
و جماعته ظلوا يربون أتباعهم على السعي للسلطة و أهملوا التربية العقدية
و الإيمانية فكانت هذه هي الثمار المرة .
و لذا الواجب على الدعاة التركيز على جانب العقيدة تعليماً و تصحيحاً حتى إذا قاتل
المسلم قتالاً مشروعاً كان على حق فإن قتل مات شهيداً ، أما الذي يعتقد في الحجاب
فإنه يعتقد عقيدة شركية و لو مات يخشى عليه دخول النار لأنه لقي الله يشرك به شيئاً.
أتفق معك أن الحجاب لا ينفع صاحبه ، و لكن قد يكون له تأثير من نوع ما لأنه سحر و السحر
حق ، فتجريب السلاح في ديك أو عجل و نحوه أحياناً لا يصيب السلاح و الأمر ليس خفة يد أو
حيلة و لكن الشياطين المكلين بالسحر قد يحولون دون ذلك ، و يكون إبطال عمله بقراءة
آيات إبطال السحر مثل آية الكرسي ، و لذلك دخل الموحدون من أنصار السنة بالسودان
في تحديات كثيرة لهؤلاء السحرة الدجاجلة و أبطلوا سحرهم بإذن الله .
و الحمد لله لم يتم مقصود هؤلاء البغاة بالأحجبة و خسروا دينهم و دنياهم ، مصداقاً لقول
النبي صلى الله عليه و سلم : ( من تعلق تميمة فلا أتم الله له و من تعلق ودعة فلا ودع الله له )
و قوله : ( من تعلق شيئاً وكل إليه ) ، و رأى النبي عليه الصلاة و السلام حلقة من صفر ( نحاس )
في عضد رجل فسأله ما هذه ؟ فقال الرجل من الواهنة ( مرض ) فقال : ( انزعها فإنها لا تزيدك
إلا وهناً و لو مت و هي عليك لم تفلح أبداً ) .
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: Hassan Makkawi)
|
| Quote: وستاكل حجابات الفكي الامدرماني حجاباتي...!!!! |
هي زول حجابات البندر دي خترييية مرة واحدة بعدين دا تمزاج وتلاقح بتاع خبرات بتاع كل فكي في سودان جابوا البندر دا اي والله حتي ابركونا بتعانا زاتووو عنده يد معاهم في البندر
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: Hassan Makkawi)
|
Quote: المحكمة ليها حاجب
و العين ليها حاجب
و ما بتعلى العين على الحاجب |
نعم يا حسان
وفكرة الحجاب تبدو في فلسفتها محاولة لعلو العين علي الحاجب
اي تجاوز الاشياء الطبيعية ومحاولة الاحتيال عليها ولو بالطموح او الحلم..
الخواجات اهل النقة والعلم الحاجات الزي ما بفوتها ساكت وبعد ان حاول انشتاين ايجاد نظرية تعطي الاشياء بعد رابعا تطورت اهتمامهم الان بظواهر ماوراء الطبيعة والان هو التحدي الذي يحاولون ايجاد له مداخل بعض ان جضموا العلوم الاخري ورقدوها هبطرش
وتحياتي يا حسان
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبد الرحمن الطقي)
|
| Quote: و لذا الواجب على الدعاة التركيز على جانب العقيدة تعليماً و تصحيحاً |
هلا بالاخ الكريم شيخ الطقي
وشكرا علي حضورك الي هنا الذي حتما سيعطي الامر رؤية دينية عميقة وتامل مربوط بشوؤن العقيدة التي نومن بها جمعيا
ويا الطقي للموسسة الدينية (ان صح التعبير) دور عالي ومهم في التثقيف الديني المبني علي الايمان
والعقيدة الصحيحة التي تربط المجتمع السوداني بقيم الدين التي لامكان فيها لمثل هذه الخزعبلات التي محاربتها هو واجبنا جميعا في زمن العلم المعرفة ....
والجن والسحر كما ذكرت انت امر صحيح ومتواجد بكثرة ويسخره بعض القبالسة لضرر الناس واذيتهم...
ونحلم يا الطقي لدور تكاملي عميق ونشط من كل الجهات ذات الشان لانتشال مجتمعنا من هذا الامر السابح في بحور جهل عميقة
وكل التحية والود يا استاذ الطقي
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: Nasir Ahmed Elmustafa)
|
Quote: وكدي نقوم نمشي علي المعرض امكن نقدر نجازف لينا حجاب
عندنا حاجات كتيرة معصلجة امكن تحلحل |
هلا ياناصر والف مرحب وحبابك في سيرة الحجابات والكواديك..
ويا ابو النصر حجابات المعرض دي (اوت اوف ديت) ومفعولها بكون انتهي زمان في شارع العرضة
بفعل قلة تردد الموجات...
ولكن في سيرة الحاجات الكثيرة المعصلجة بتاعتك فعندي ليك (محل كواديك ما تخرش منه الموية)
كل الود والتقدير يا ناصر
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
من الاشياء الطريفة في حكاوي وقصص الفكيه كان احدهم قد ادعي بانه فكي له مقدرات علي (تحويط المنازل) ضد اللصوص وزوار الليل وكنت شاهد عيان في اطار الشمشمة والرغبة في معرفة( ماذا هناك)...ليطلب هذا الرجل كباية بها
ماء ثم يقراء في داخلها تعاويذ وقراءت موغلة في الغموض وفجاءة نظر الي الكباية وتكاد تحس بان هذا الرجل لايدري ماذا يفعل بهذا الماء ولكن لاعليكم فقط قام بسكب الماء بكل عنفوان في سقف البرندة التي كان يقف فيهنا وقال بنبرة قوييية(تاني حرامي مستحيل يجي هنا في البيت ده ابد الدهر....)
ولكن بكل اسف وفي مساء نفس اليوم كان الحرامي زائرا وليس وحده بل معه مجموعة من الحرامية وقضو علي اخضر ويابس ذلك البيت بكل ارتياح وهدوء ...!!!!!!
نفس هذا الشخص رايته في طقوس تعويذية من اجل ايقاف مطر ولكن ما ان بداء في قراءته حتي انهمر المطر وبكثافة سونامية
جعلته يهرب من امامها..!!!!
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
| Quote: هي زول حجابات البندر دي خترييية |
هلا يا حبيب الكل والف تحية...
ودوما يا حبيب الكل فكي الحي مثله ومثل زمار الحي لا يطرب
واهل البنادر نعم يعشقون الحجوبات والحاجات الزي دي ولكن الشاهد بانهم يصرفون بنزين تقيل وقروش اتقل للبحث عن فكي خارج الديار...
نعم نتفق ان اشتغل الفكييه البندرين مع بعض ككونسلتو تاني عوجة ما بتجي للبندر ولكن من يقنع فكي
عشان يلم شغلوا علي فكي تاني
كل التحية والتقدير
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: khaleel)
|
من طرائف المشعوذين يا كيكي إنو كان عندنا بخو طقت جدنا خال الوالدة فكي مشهور ، و كان بشرب لامن يدخل قلم البوص مرة في
الدواية و مرة في التراب و هو يكتب للناس المحاية و الحجبات و هو يقول : أنا أبوكي يا ام جاهين نشرب حار و نكتب حار !!
كان بكتب حجاب السلاح ، و يجي الحفلات يبشر فوق البنات و يطعن نفسه بالسكين و ما بتاكله و مرة جا في عرس و بشر فوق
النسوان و طلع السكين و طعن بيها ضراعو .. قال ليك السكين ما مشت فيه ؟! بالله مشت فيه لامن الدم رش النسوان و اتفرتقت الحفلة !!
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبد الرحمن الطقي)
|
| Quote: أنا أبوكي يا ام جاهين نشرب حار و نكتب حار !! |
قريبك ده فكي تندل شديد يا الطقي وما ساهل تب..
تعرف مرة احنا برضو عندنا قريبنا فكي
يوم العيد ودخالتي مشي يبارك ليهو وقال ليه
ياجدي انشاء الله السنة الجاية فكي كبير
فزعل زعل شديد وقال لييهو يا ود الكلب انا حسع مافكي كبير
وسمعت ايضا من نفس الرجل وهو يفاخر بانه الفكي الوحيد في كل فيافي كردفان
من له المقدرة علي كتابة لوح صعب وقاتل يسمي (البلبلي)
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
تلخيصا لهذه الونسة الحجابية يظهر جليا بان الحجاب اشكال وانواع ويتفنن الفكيه في موضاته حسب حوجة المجتمع المومن به وبذكاء حاد
وكذلك يمكننا رصد بان هنالك عدة طرق لممارسة فنون الفكي
1-فكي ثابت وفي مكان معروف يزوره الجميع لاداء فروض الولاء والطاعة ويعطيهم حلا لكل المشاكل
2-فكي متجول ياتي من بقاع بعيدة لمناطق الاستهلاك ويعطي ما يسال عنه من طرف
3-فكي موسمي او(بار تايم فكي) يعمل في مهنة معينة في موسم ما ولكن في مواسم الركلسة يمارس الفكي
شغل
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
Quote: يفترض في المجاهدين الرساليين صحة المعتقد لكن وجد مع الجمالي بعد مقتله
الكثير من الأحجبة و هو أحد من رباهم الترابي ، مما يدل على شيئين مؤسفين
هما الخلل العقدي الذي نتج عنه الاعتقاد الخاطئ في التمائم أنها تنفع من
دون الله ، و الثاني الخلل في الأخوة الإيمانية الذي نتج عنه لجوء هؤلاء للسلطة
عبر السلاح و قتل المسلمين ، نعم دفع الصائل و رد الباغي و لو بقتاله مشروع
حتى يكف عن العدوان و القصاص من القاتل مشروع ، لكن أن يقتل المسلم أخاه من
أجل سلطة أو مال فهذا يدل على خلل في تربيته الإيمانية ، المؤسف أن الترابي
و جماعته ظلوا يربون أتباعهم على السعي للسلطة و أهملوا التربية العقدية
و الإيمانية فكانت هذه هي الثمار المرة . |
شيخ عبد الرحمن الطقى ربنا إديك العافية
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
قوبي الخطير.....
لا ادري من اين ياتي.ولكن حضوره يكون دائما عقب
كل حصاد ناجح...وعندما ياتي الي تلك المنطقة....يعلم
الجميع...ويزورنه..في منزل زوجته الغامضة(ركيا)...اي(رقية)...
لما لا....انه.....قوبي...
رجل وقور الملامح..له دقن من النوع(الزنداني)...
وبوجهة ابتسامة غامضة تخفي عينين..يطل منها ذكاء
حاد...ودهاء كبير....
يتمدد في العقد الرابع...وله سبحة لاتفارق ايديه...
وعندما ياتي(قوبي)...تبور ونفسد تجارة الوداعية
حواية..وفكي(ادم)...وكل الفقرا المحليين...
حتي الفكي سعيد رجل الدين لن يجد له(راسا) يتف فيه....
لان (قوبي)..يمثل المهارة...والسمعة التجارية التي
تلاحقه اينما حل......
ادم تمباك في جاهليته الاولي كان
يذدري(قوبي)...ويصفه لي (باش...
قوبي ده اكبر بتاع لقوايس)...
ولكن عندما اسلم تمباك وحسنت توبته..كان
حضور قوبي تمثل ايام يدك فيه تمباك
العمل...بدون اي تردد....وياتي
بعد كل هذا...ليقول(باش..انا مشيت
لابا.... قوبي)...
حضور قوبي تمثل مهرجانا للاماني
والامال...وتصفية للحسابات...
ويجلس قوبي في خلوة (ركية)...يقابل
زبائنه بكل مهنية عالية...ودراية للنفس البشرية...
وكان هنالك بعض الموظفيين يتسللون (تحت تحت كده)
لمقابلة الوسيط الروحي الكبير(قوبي)....
ونواصل مع قوبي
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
قوبي الخطير 2
عندما اتي قوبي هذه المرة كانت تلك البقاع..
تشهد اغرب قصص العشق..واكثرها اثارة للدهشة
مابين المعلمة(بت هجليد)....و وامهر عمال النسيج في تلك الفيافي (ودقري)
علاقة شهدت شد وجذب كبيرين....وطبقت فيها كل متطالبات فنيات العلاقات
الانسانية....
ماقبل الخطوبة..ملات الاشاعات المكان..وفاحت رائحة العلاقة..
وشوهت..ما اعطي اخوة الاستاذة الحق في ضرب (ودقري)..ضرب رهيب
ارقدبعدها (المستشفي)..ايام عديدة...
صمد (ودقري)..من اجل حبه وتقدم لخطبة..المعلمة..ووسط دهشة الجميع
وافق اهلها عليه دون ادني معارضة.....
فرتقت الخطوبة ثلاث مرارت للغيرة الشديدة من الطرفيين
ساهمت(كاويك)..باشعال نهارها..باغنيتها الشهيرة...(ود قري جوه قلبي)
وانتقمت المعلمة وارتمت لمدة قصيرة في احضان احد الموظفيين
وتفككت العلاقة وذهب (ودقري )..شمالا..وذهبت المعلمة اقصي اليمين...
واصبح ما بينهم مثل ما في( الداحس والغبراء)....
الا ان اتي هذا الملف الي (قوبي)..عبر والدة المعلمة التي تومن بمقدرته
في تغيير الاقدار..
ويقال ان بياضه في هذه القضية كان عالي السقف..
وانه اسهب في التامل..والحديث بلكنة غريبة النطق
ليخبرها (انشاء اللاهو ما في اوجة)...
(ايال ديل كتبوهم في كراع طيرة..والطير حسي كان قريب في فاشر)....
لكن (نجيبي)!!!!!!!!!!!!
وفعلا لم تمر ايام اوقل اسابيع..الا وصدقت نبوة(قوبي الرهيب)..
وفعلا (جابا)!!!!
وتخلص ودقري من احباطه وخيانة (محبوبيه)...وتخلصت..(بت هجليد)..
من شهوة الانتقام...
ولم الشمل...والجماعة عقدوا...
...
واضيفت قصة معقدة الي السيرة الذاتية لقوبي لتعطيه..مكانا مرموقا...
وبياضا عالي السقف في القصص الاخري ....
وسنواصل
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
قوبي….وعثمان فركة!!!!!!!!!!
كان فركة من اكثر (جنقو عوضية)..بوهمية..وحبا
لبنات الليل…وكان ايضا اكثرهم انتاجا وتبديد للمال..
في الخمرالغرام الكاذب
تاركا لزوجته اعالة اربعة من الاطفال الابرياء
من عملها الموسمي في الغيط…
ليتفرغ فركة لجولاته ومغامراته العجيبة تلك
في اطراف المدن القريبة مثل سنار وسنجة
ويرتمي في احضان القادمات من (الحبشة)
وسمي (بفركة)…لقصة تناولها الجميع حينها ان عثمان
تم احضاره الي نقطة البوليس في احد المدن القريبة
وهو يرتدي..(فركة)…و(فركة)..فقط في احد الكشات..
ومن يومها اصبح عثمان (فركة)…شخصا لا يوتمن
عليه في القضايا (الشرفيه)….تحذره النساء
رغم مقدراته العالية في الحديث معهن…
وعلو كعبه في الغزل…..
كانت تصرفات (فركة) تلك تورق زوجته كثير
وكثير ما اشتكته لحكماء الكمبو..الذين احتارو في امر
(فركة)…وقيل ان سوفيت…قام بضربه ضرب مبرح
عندما غازل احدي الفتيات…غزل خشن…
وعقدت الكتير من جلسات الجودية
لجعل..(فركة)..يحييد عن طريقه..
البوهيمي ذلك..
الا انه يزداد تعنتا..وتمسكا..وسفر الي
معشوقاته..ويبيت الليالي مهدرا…مالا وفير
كسبه بعرق جبينه….ولكن ليس لاسرته…وزوجته الطيبة الملامح شي…
……الا ان حدث شي غريب…
قيل ان احد النساء العجائز بالكمبو
اتت ذات صباح…الي زوجة(فركة)…
لتخبرها….بقدوم (قوبي)…ولابد من الذهاب اليه…
وتسليمه ملف (فركة)…..ووضع حد
لهذا الالعبان…العجيب…
لييتفهم (قوبي) المعضلة ويطلب(بياضا)..
عالي السقف…ولكن استطاعت
وبمساعدة كل نساء الكمبو من جمع ذلك المال..
وتاتي به فرحة الي (قوبي)…
الذي بشرها بقوله…
(عثمان بتاكم ده…انا من زمان لابد لي)…
لم تمر عدة شهور..الا واستطاع
(ابو القوب)….من تشفير عثمان…فركة
وجعله احادي البث…واعاده الي احضان زوجته…
واستقر (عثمان)…واصبح زوجا صالحا…
لا يقرب النساء..ولا الخمر….
ولحق بتوبة تمباك
واضيف انجاز ضخم لقوبي
العجيب…
ولسع مع قوبي
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
حجاب المحبة ما بسوي الحبة
والغي القديم ما نبقبا
(اي يخلع اوتاده من تعاريش القلب)
كيكي ازيك..
انا ما تابعت البوست كتير لزنقة ما انزل الله بها من سلطان..
بس ياني الراجعة ومصاقرة البوست دا.. عندي قصة حجاب واجعاني..
الا بالمناسبة يا كيكي ما دام في مدى للحجاب.. ما في ليهو باسوورد للولوج ؟
ولا مجالو مفتوح ساااااكت؟
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: حليمة محمد عبد الرحمن)
|
| Quote: ولا مجالو مفتوح ساااااكت؟ |
هلا يا حليمة ووينك ياخي طافشة مننا حتي اننا قربنا نعلن عطاء لتوريد فكي اسفيري لكي يصنع لينا حجاب
يخليك تجي تتمي لينا السرد البجنن الهنا ده
لمن الحكومة السودانية طلعت لي جواز مزور...!!!
وبعدين يا حليمة الحجابات اشكال والوان (كثير نومنة علي قولة الهنود)
ولكن كل حجاب عندو شفرة خاصة بيهو ويمكن اعادته للعمل مرة اخري في حال حصول عطل حجابي
يعني لو الحجاب قطع بحر خرب ممكن يرجع الورشة بتاعة الفكي تاني ويعيد صياغتة مرة اخري(يعمل ليهو تاصيل)
وفي انتظارك دوما بحجاب وبدون حجاب هنا وفي موضوع الجواز القاعد منتظرك داااااااك
وكل الود والتقدير ياحليمة
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: noon)
|
Quote: لا حولا يا كريم انت من غير حجاب تخوف كمان جاينا بي
سنجابك علي قول بت اختي |
هلا يانوون هلا
وحبابك في مدارات الحجابات وماتخافوا انتي وطارق جبريل
حنشوف ليكم حجاب داوودي اللون وخاتف اخويين من فكي قوبي...
ولو مانفع نشوف ليك حجاب يبقي طارق جمال الوالي لانو مريخابي
وانتي صلاح ادريس..والحشاش يملا جيوبه...وبس ادونا معاكم حبة بعدين
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
نعود مرة اخري للشهير (قوبي)...ونري حكايته مع (علي كعوك).....
لم اري خلال حياتي رجل به مس من الجن بتلك
طبائع (علي كعوك).....
فالرجل في عزه شبابه...وكان عنيف لدرجة مخيفة...ورقيق ايضا لدرجة مريبة...
كان ذات يوما ما من انشط مزارعي الري المطري ويمتلك ارض
زراعية وصفت انها عالية الخصوبة....ودرت له مالا وفيرا..وزوجة جمالها..
حديث كل الناس.....
ولكن ذات خريف ما..,و(علي)..في قمة نشاطه..
واهتمامه بزرعة...واحلامه الكبيرة في ذلك الموسم....الذي انبت له
سمسما لا يوصف...وتسربت اخباره الي كل المزاراعين....واصبح حديث الاسواق
والحانات....ومما مكنه لاستلام...(سلف)...كبير من كبار التجار...الذين
يشترون السمسم مقدما قبل حصاده....
استلم (علي)..السلف لاغلب محصوله..الذي قدره
الخبراء ( بقناطير)...كثيرة العدد....
وحلم (ابوعلي)...بمال وفير اتي....الا ان اتت
الطامة الكبري...ذات صباح ما وعلي ذاهب
الي مزرعته فوجد...(اسراب الكعوك)....
قد غزت زرعه...وامتصت كل رحيق سمسه....
والكعوك حشرة (سيئة السمعة والصيت تتخصص في امتصاص المادة الدهنية في
في السمسم)....وتركه ..خاويا..دون ادني جدوي.......................
امتص (الكعوك)..كل رحيق سمسم(علي)...وامتص احلامه
وماله...وكل مستقبله..(اصبح)...سراب بقيع...
وظلمت الدنيا في عينيه..واسوددت...
ليتجول بين الزراعة...وهو يصيح(لايا كعوك...لايا كعوك)...
في صيحة تختلف نبراتها...من عالية حتي صارت همسا...يدندن به مع نفسه...
واتي به اقرانه الي (قريته)..المجاورة لكمبو الري...
وحاولو معه شتي الطرق لعلاجه...الا ان
(جن)..الكعوك)....قيل انه..لايتداوي..(.با خوي واخوك)
واصبح علي الوسيم ...يتجول بين الطرقات...وفي وسط السوق..وجد له مكانا..رث الثياب..
واطلق شعرا..وصار مثل(بوب مارلي)...
وكان غريب الاطوار...يحب بعض الناس ويبتسم لهم...
ويكره بعضهم..ويهم بضربهم...,(عليك بالركض...ان وجدت نفسك..امامه)...
حيث انه لايتواني بضربك بكل ما وقعت عينيه عليه).....ويسبك ..
(الن ابوك لابو الكعوك)....
ومنها صار اسمه (علي كعوك).....................
الا ان نصح اهله باخذه الي (قوبي)...الذي رفع
لهم رسوم اتعابه الي الاعالي....دفعت بكل يسر.....
وبداء (قوبي)..يمارس الجلسات النفسية مع(كعوك)....بمهنيته العالية...
وسمعته عالية الصيت....
وقليلا قليلا...بداء علي يروق...واصبح يرتدي ملابس نظيفة...
الا ان حصلت الكارثة...
في يوم الجلسة الروحية التي وصفت بانها الاخيرة....
وكانت مغلقة....سمع كل الناس صوت جلبة
وفوضي كبيرة و(عياط)...اتيا من عند(ركية)...زوجة (قوبي)....
ليتكشف الحميع ان (علي )قام
بضرب الفكي ضرب غرائب الابل...,(فج راسه)....وارقده وطا...
ليس هناك شخص حضر ليحدثك بما حدث....
ولكن بعدها حمل (قوبي)....سلطة الي اقرب مستشفي...
ومنذ حينها عدنا لانراه في بدايات الحصاد....بل
لم نراه بعدها...الا الان!!!!!!!!!!!!!!!!!!!!
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
كيكي سلام
عارف يا عبد الكريم ثقافة الحجاب ده منتشره في كل انحاء السودان تقريبا
ذكر لي صديقي عمر الداتر ان بعض أخواننا الفلاتا ، عندهم قناعة كبيرة جدا بأن قصيدة نهج البردة للإمام البوصيري فيها أسرار
لدرجة ان بعضهم يكتب ليك هذا البيت المشهور:
ومن تكن برسول الله نصرته ......ان تلقه الاسد فى اجامها تجم
يكتبو ليك من اليمين للشمال و من الشمال لليمين و من فوق لي تحت و من تحت لي فوق و يطبق الورقة و يلفها لي في حجاب
و يقول ليك أمسك عندك : حجاب بتاع أسد
كذلك ذكر المغفور له بإذن الله بروفيسر عبد الله الطيب في احد حلقاته المشهورة ، ان أهله في الدامر كان عندهم نفس الإعتقاد
وذكر عليه رحمة الله انهم عندما كانوا صغار و عند لحاقهم للمراكب على ضفة النيل و حتى لا تفوتهم المركب كانوا يركضون نحوها من بعيد وهم يرددون :
دعى الى الله فالمستمسكون به مستمسكون بحبل غير منصرم
و كانت كثير ما تصيب فيذداد يقين الناس بالاسرار في هذه البردة.
===================
تحت تحت
ما عندكم حاجب بتاع مطر
الايام دي انا في سدني و عندنا مطرة ليها 10 ايام ما وقفت و ناس الإرصاد قاوا تاني إمكن إسبوع برضو ما تقيف
تحياتي لك و لضيوفك الكرام
عمار يس النور
عاشق بخت الرضا
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عمار يس النور)
|
هلا يا عمار
ومشتاقين ياخي
وشنو منقطع عن المنبر في الفترات الفاتن فنحن يا صديقي نفج البوستات فجا بحثا عنكم وعن سيرة الزمن الجميل ولعلها الان هي بلاد الكانقرا قد اخذها بردها وجمد لنا الباصوريرد...
وفعلا يا عمار الحجاب ثقافة افريقية وسودانية ومتجذر في عقلنا الشعبي والكزو لهم في ذلك شاوا عظيم
ولعيبة كبار باستطاعتهم ترويب الموية او تحويل الرمل الي سكر عالي الجودة كما كان يفعل الاسطوري ابكر قروش ..
فقروش ده يا عماد تقول ليهو يا ابكر اديني قرش
بهبشك في راسك وبطلع ليك قرش من بين خصلات شعرك حتي تتحير انت ذاااتك
ولك كل الشكر والتقدير
وتحياتي للبنيات وامهم
واظهر وبان وليك الامان
| |
|
|
|
|
|
|
|
|
|
Re: حجاب...لاندكروزر....ودوشكا..!!! (Re: عبدالكريم الامين احمد)
|
ياعمار وعلي سيرة الطلس ملس
في احدي مدن غرب السودان في اواخر الستنيات يحكي بان هنالك شخصا غريب الاطوار ظهر فجاة في سماء المدينة ومافي زول عارف الزول ده جاء من وين...
المهم الزول ده عندو حاجات خارقة ومقدرات فذة...ساحكي ليك جزء هنا بالتقطيع..
يقال والعهدة علي الراوي بان ابكر قروش كان يرقص في احدي الحفلات وتم زجره ومحاولة طرده
وفي ضخم معمعمة الرقص قام برمي قعونجة كبيرة جدا جدا ممكن بحجم (كديس) في وسط الدائرة بتاعة الرقص
وفرتق....وفرتقت الحفلة من الهلع والخوف...
جاب القعونجة من وين وكيف الله وحده اعلم
| |
|
|
|
|
|
|
| |
عبدالكريم الامين احمد
ناذر محمد الخليفة
Hassan Makkawi
طلحة عبدالله
khaleel
على محمد على بشير
كمبورة
تبارك شيخ الدين جبريل
طارق جبريل
almulaomar
Nasir Ahmed Elmustafa
عبد الرحمن الطقي
7abib_alkul
حسن الجيلى سعيد
حليمة محمد عبد الرحمن
عبد المنعم سليمان
noon
عمار يس النور
فيس بوك
تويتر
انستقرام
يوتيوب
بنتيريست