دعواتكم لزميلنا المفكر د.الباقر العفيف بالشفاء العاجل
|
|
 إتمسح أنت في الشارقة..!!
|
كدا صاح
ما في غلط في العنوان
هو فقط كومبنيشن من شعار الإمارة " إبتسم انت في الشارقة"
و حكاية مسح السودانيين الغريبة لبعض دي
يعني عادي تلافي السوداني في المسجد ولا السوق أو اي مكان عام تعمل فيها ما شايفه و تجليه
و إياك تسلم علي واحد ما بتعرفه و إلا يقول عليك جديد أو ضهب
و كان سلم عليك واحد و لا واحدة يا ماترد خالص و لا في احسن الأحوال تطنطن و تتخارج بسرعة
|
|
 
|
|
|
|
|
|
|
|
Re: إتمسح أنت في الشارقة..!! (Re: محمد البشرى الخضر)
|
و حكاية مسح السودانيين الغريبة لبعض دي
يعني عادي تلافي السوداني في المسجد ولا السوق أو اي مكان عام تعمل فيها ما شايفه و تجليه
و إياك تسلم علي واحد ما بتعرفه و إلا يقول عليك جديد أو ضهب
و كان سلم عليك واحد و لا واحدة يا ماترد خالص و لا في احسن الأحوال تطنطن و تتخارج بسرعة
ليه .... ؟؟؟؟؟؟؟؟؟؟؟؟؟؟؟؟؟
| |
|
|
|
|
|
|
|
|
|
Re: إتمسح أنت في الشارقة..!! (Re: الطاهر ساتي)
|
| Quote: ليه .... ؟؟؟؟؟؟؟؟؟؟؟؟؟؟؟؟؟ |
و الله يا الطاهر يا خوي ليه دي ما أظني بقدر اجاوب عليها
انا يادوب لي شهر هنا
و في الفجيرة أصلا عدد السودانيين قليل و بنفتش لي بعض تفتيش و بتسعد لما تقابل سوداني
و اغلب الناس العرفتهم إتقابلنا في المسجد او السوق و تبادلنا السلام و يازول إنت من وين و حق الله و بق الله و امور السودان دي
ويتم التعارف و بعد شوية الزيارات الاسرية و كدا
لكن تعال شوف هنا
أحكي ليك القصة دي
حتوت دا إتولد في مستشفى في الشارقة, زارنا قريب زوجتي (إبن خالة والدتها) و حضر أيضا جد زوجتي و في نفس الوقت خال قريب زوجتي الأول لزم, فسلم عليه عادي بعدم عرفة, داك قاليه ما عرفتني يا خال , و بإستغراب شديد و حرج تعرف عليه و قام سلم عليه و قالده من اول, تخيل ديل اهل واحد فيهم في أبوظبي و التاني في دبي و ليهم اكتر من عشرين سنة هنا و المسافة بينهم ساعة و نصف بالسيارة و ملايين السنين الضوئية .
والدة زوجتي كانت جاية من السودان قريب فعلقت بعجب" قبلكم يا المغتربين"
إجابة سؤالك يا الطاهر إمكن تكون الحياة و إيقاعها و ضغوطها
أو البعد عن جو السودان و مخالطة الشعوب الأخرى اللي ضيع كتير من المعاني و القيم الإتعودنا عليها
او يمكن - و غالبا- فلهمة مغتربين ساي
اها رايك شنو؟
| |
|
|
|
|
|
|
|
|
|
Re: إتمسح أنت في الشارقة..!! (Re: محمد البشرى الخضر)
|
محمد البشرى تحياتي لك ولمن معك
أولاً ألف مرحب بيك في الشارقة ويظهر الفكي بتاعك قوي قاموا
نقلوك كية على العريس ناذر..
ظروف التعايش بين السودانيين بتختلف بين أبو ظبي ودبي والشارقة
وبقية الإمارات الاخرى. في إمارات زي راس الخيمة والفجيرة وأم القيوين
عدد السودانيين قليل وهم بيعرفوا بعض ولديهم القابلية على التعارف
لكن في غيرها إذا سلمت على واحد حيصفك بأنك إنسان (بيئة) يعني بلدي
والبعض لجهلهم بيفتكروا إنك سلمت عاوز حاجة لأن العلاقات هنا للأسف
الشديد علاقات مصالح مشتركة. وطيبة أهلنا وتواددهم وتراحمهم الناس
تركوها في السودان، وهذا من الإشكاليات التي أعاني منها أنا شخصياً
لذلك بقيت من البيت للمكتب وبالعكس..
تصدق مرة اتصلت على واحد معرفة لأني طوّلت منو وحبيت أطمئن عليهو
فبعد السلام والكلام قال لي بطريقة دعابة: (تعال من الآخر)
يعني اتصلت عاوز إيه. صراحة زعلت وقلت ليهو أنا ما قاعد اتصل على الناس
عشان أطلب منهم شيء واتصلت لزوم التحية وكتر خيرك يا أخي
وقفلت الخط وقفلت منو إلى الآن. بقى يخجل يتصل علي من فترة إلى أخرى..
معليش يا محمد إنو الواحد يذكر مثل هذه الاشياء المحبطة لكنها
واقع مؤلم معاش..
يمكنك الاتصال بي على المحمول 3445171
ولك فائق المعزة..
| |
|
|
|
|
|
|
|
|
|
Re: إتمسح أنت في الشارقة..!! (Re: Nasruddin Al Basheer)
|
الاخ الفاضل
محمد البشري
لك ولكل السودانين المقيمين فى المنطقة الشرقية وبالاخص امارة الفجيرة
عاطر التحايا والاشواق المنتشرة مع اطلالة هذا المساء الصافى من نثرات
الجو المكهرب بالرطوبة ..
بما اننى مقيم منذ فترة طويلة بالامارات فقد طرح الاخ العزيز محمد
موضوع فى غاية الاهمية لما يمثله اهتمام اجتماعي وثقافى لنا فى المنطقة
الشرقية ولنا وقفه فى هذا الموضوع ..
يوجد فى المنطقة نادي سوداني منذ الاذل ولا يتعدي الاعضاء فيه بعدد الاصابع .
احجام العدد الكبير من ابناء الجالية السودانية فى المنطقة الشرقية
(خورفكان ، كلباء ، دبا الحصن) وما جاورها من مناطق اخري الانتماء
للنادي .
علاقة بعض ابناء الجالية السودانية بالنادي علاقة محدودة بوصول وفد
القنصلية وبعض المناسبات الخاصة .
التكتكلات والشلليات سبب اساسي بالرغم من الفئة العمرية لهؤلاء الشباب .
بعض ابناء الجالية يسأل ماذا قدم لنا النادي ؟
كيف يقدم لك النادي خدماته وانت فى احجام عنه !!!
اما آن الاوان للتكاتف والتآزر لنرفع من شأن النادي السوداني ؟؟
وللحديث بقية ..
| |
|
|
|
|
|
|
|
|
|
Re: إتمسح أنت في الشارقة..!! (Re: عيدروس حجر)
|
حباب عيدروس
كيفك و كيف الخور و الساحل الشرقي
و كيف النادي
و الله مفتقدكم جدا
حديثك موضوعي و مهم , لكن تفتكر دا المكان المناسب لنقاشه
بورداب المنطقة الشرقية كانوا اربعة فقط , و انا فارقتكم بقيتوا تلاتة
أعتقد ان جذب اعضاء الجالية للدار و النشاط الإجتماعي محتاج لمجهود كبير منكم-على ارض الواقع , أتمنى ليكم التوفيق
و لا اقوليك
ناس المؤتمر الوطني أكيد حيكون عندهم برنامج قوي عشان الإنتخابات , حقوا تملحوهم
خليهم يلموا الناس و يقوموا بالمجهود كلوا و إنتوا اقطفوا ثمار تعبهم
عادي مافيها حاجة, ما هم بيعملوا كدا برضو
تشكر يا عمك
| |
|
|
|
|
|
|
|
|
|
Re: إتمسح أنت في الشارقة..!! (Re: Nasruddin Al Basheer)
|
هسي يا نصر الدين الواحد ما يرد ليك تقول عليه موهوم و متفلهم
مرحب بيك و سعيد بمعرفتك
Quote: يظهر الفكي بتاعك قوي قاموا
نقلوك كية على العريس ناذر.. |
ما تتخيل انا حاولت أتخارج من موضوع النقل دا كيف, لكن للاسف ما إتوفقت
من تعليقك يبدو إنك إتكويت من الموضوع دا , و من تفسير الناس الغلط لحكاية إنك تسلم. أنا أعتقد إنه سوء الفهم بيلعب دور كبير في الموضوع , كتير من الشباب لما تناقشنا في الموضوع دا الواحد بيقوليك إنه خايف لو سلم يتفهم غلط -زي ما قلت- و في البيقوليك ممكن اسلم و ما يترد علي فما بدخل نفسي في إحراج,
عن نفسي إتعودت على قول السلام عليكم و الحمدلله ما حصل حد أحرجني و حتى لو حصل ما حا أتخلى عنه
مرة تانية
شكرا ليك اخ نصر الدين و سعيد جدا بمعرفتك
| |
|
|
|
|
|
|
|
|
|
Re: إتمسح أنت في الشارقة..!! (Re: عبدالكريم الامين احمد)
|
محمد البشري اولاً مشتاقين كتير وين كنت المدة دي كلها !! وبعدين والله ما رضيناها ليك , إنت عارف
أسواء شئي أن يصيبك الأذي من أقرب الناس إليك , أكيد في حاجة غلط , يعني ممكن مثلاً أن تكون بتحلم
أو بتمشي مغمض العينين !! والله شئ يحير عموماً أغفر لي تكهناتي لاني بصراحة ما قادر اتصور الشئ
الحاصل معاك ده هناك ؟؟؟
| |
|
|
|
|
|
|
|
|
|
Re: إتمسح أنت في الشارقة..!! (Re: عبدالكريم الامين احمد)
|
و الله يا كيكي معلم
فعلا بعد الكلام عن الشارقة كنت عاوز اتكلم عن المسح
و الغياب و الله بس ظروف الإنتقال و كنت لسة ما وصلت الخط في البيت و كدا
كنت بتابع في المكتب لكن مافي عربي و النصيحة الكتابة بالماوس سخيفة- يا دوب عذرت دكتور مصطفى
متابع و بشدة لبوست المساحة و عندي فيه كلام كتير جاييك ليه إن شاء الله
و الفيرشن الجديد من اليوم الحار عندي النية اكسر إحتكار ناسكم ليه و حا نستلمه مع ناس التسعينات - بعد إذنكم
بالنسبة لموضوع البوست
يا ترى في الدزحة عندكم و همة التجاهل و المسح دي برضه
من شكل مجتمع البورداب الصغير و ترابطه اعتقد ان الجالية في خير حال
تحياتي لك و لبورداب الدوحة و أرجو إنك تبلغ تحياتي و سلاماتي لأم حاتم
و بعدين يا خي معتز دا مالو؟
| |
|
|
|
|
|
|
|
|
|
Re: إتمسح أنت في الشارقة..!! (Re: محمد البشرى الخضر)
|
ود البشرى يا حبيب
اخش ليك طوالي
انا اول من جيت البلد دي شابك ليك الناس سلام عليكم سلام عليكم
لقيت ليك في ناس ترد على بحرارة وفي ناس التقول شاحدهم سلام وفي ناس يمسحوني عديل
اها طوالي قمت طبقت ليك نظرية اللمينز للسلام
قبل ما اسلم على اي زول اقوم اكحله بي نظرة سريعة واقراه
( طبعا النظرة السريعة والقراية دي عايزة عين رباطابي ومخ منصوري )
اها اذا لقيتو زول متفلهم وشايف نفسه وعامل فيها الله ما خلق غيرو
امسح ليك حنانو واديها شوية فلهمة واحسسه انو ما يسوي عندي مليم
وكان لقيتو زول يجي منو واخو اخوان زيي دينزل واشنطون و ود البشرى
اسلم عليه وما عندي مانع بالاحضان كمان
شفت كيف طريقة اللميز للسلام
جربها بالكاتشب
لذيذة خلاس
| |
|
|
|
|
|
|
|
|
|
Re: إتمسح أنت في الشارقة..!! (Re: الأمين عثمان صديق محمد)
|
بالله يا الأمين إنت بي جاي
ياخي دا خبر بمليون (دولار)
كدا البزنس يا دوب حا يحلو
في الفترة الكنت بعيد فيها دي جهزت ليك كمية من المشاريع
أفضى لي و تعال بي رواقة
و حقنا برة
نرجع للموضوع
الليمنز للسلام إبداع
لكن فيه ثغرة خطيرة, إنو بيعتمد على النظرة و القراية و دي حكاية تقديرية تقبل الصواب و الخطأ
يعني يا عمك لو تقديرك طلع غلط , مش حتكون فاقمت الوضع زيادة
أخبار البزنس شنو , ما أقنعت قيتس يرخي يدو شوية
بعدين ياخي داير أقول ليك حاجة لكن ما تفهمني غلط, دنزل واشنطن دا ما زول حارة و بياع
ما شفتو عمل شنو في "تريننج داي"
| |
|
|
|
|
|
|
|
|
|
Re: إتمسح أنت في الشارقة..!! (Re: محمد البشرى الخضر)
|
السلام عليكم
أخي محمد
لك التحية
ومبروك كية ناذر
وعقبال ما تصير سوداني شرقواي قديم تمسح السودانيين الجديدين المضبهين
.....
Quote: يعني عادي تلافي السوداني في المسجد ولا السوق أو اي مكان عام تعمل فيها ما شايفه و تجليه
و إياك تسلم علي واحد ما بتعرفه و إلا يقول عليك جديد أو ضهب |
بالرغم اني لا أحب نكات القبائل
بس ذكرتني بنكتة الجعلي السألوه عن الغربة
قالهم .... والله الغربة حارة لدرجة انو الواحد هناك
يشوف الشايقي في الشارع
عادي يقوم يمشي يحضنو 
تحياتي ...
........................
وما الناس إلا هالك وأبن هالك *** وذو نسب في الهالكين عريق
| |
|
|
|
|
|
|
|
|
|
Re: إتمسح أنت في الشارقة..!! (Re: الزوول)
|
و عليكم السلام آزوول
ياخي شارقة شنو البتباركها
كفر لي ياخ
قول لي الجعلي بتاع النكتة الأيام دي الغربة بقت باردة
لأنو عينك للشايقي - خليه الشايقي الغريب دا - عينك لأخوك ود امك و ابوك جاي عليك تجليه عادي
تحياتي
| |
|
|
|
|
|
|
|
|
|
Re: إتمسح أنت في الشارقة..!! (Re: محمد البشرى الخضر)
|
اسي انت العملية العملتها دي في زول بعملها
انت يا زول قايل البلد هامله تجي تشيل هدومك وتمشي ساي
اها النقول ليك مبروك عليك الشارقه
وما عاوز اتصل عليك الا اجيك بالدرب وبجيب معاي صاحبي الشيخ
وتعرف انا في زول عرفت انو جاء هنا جريت وواصلته واتصلت عليه وفي السودان ود جيرانا عديييييل كده
وجاتو كم شغله هنا خلصتها ليه وعلي عجل
تعرف صاحبك بقيت اتصل عليه ما برد علي
مسحت اسمو وشطبتو علي طول
| |
|
|
|
|
|
|
|
|
|
Re: إتمسح أنت في الشارقة..!! (Re: abas)
|
Quote: اسي انت العملية العملتها دي في زول بعملها
انت يا زول قايل البلد هامله تجي تشيل هدومك وتمشي ساي
اها النقول ليك مبروك عليك الشارقه |
تعرف زولك ده انا ما رادي ليه رادي ليك انت
وكمان عجبني ليه شديد جداً يعني مسحنا عادي وما داير يمسحوه
ود البشري حدي معاك تنقل تحياتي للاسرة
وربنا يسهل بنجيك بالدرب اصلنا حنان وده طبع ناس الساحل الشرقي
| |
|
|
|
|
|
|
|
|
|
Re: إتمسح أنت في الشارقة..!! (Re: الشيخ إبراهيم الشيخ)
|
سلامات اخوانى فى كل الامارات ووالله حيرتونا عديل كدا يعنى -بعض الاخوان-مصرين ياخدو من المدنية اسوا ما فيها كانهم مابرجعو البلد تانى ودا والله ما عشان الاغتراب لانو ما فى زول بجيهو طبع جديد وهو كبير كدا-اقصد كبير عمر-السبب الاساسى فى كدا التركيبة الداخلية لكل زول وبالجد لسة السودانيين بخير د:سلافا العاقب
| |
|
|
|
|
|
|
|
|
|
Re: إتمسح أنت في الشارقة..!! (Re: abas)
|
آي يا عمك
خير و سيلة للدفاع هي الهجوم
لكن ما مشكلة حقك علينا
و مرحب بيك في أي وقت البيت بيتك
أها إنت كنت في العين , و هناك في عددية كبيرة من السودانيين برضو عندهم البياخة دي ؟
| |
|
|
|
|
|
|
|
|
 Re: إتمسح أنت في الشارقة..!! (Re: محمد البشرى الخضر)
|
الأخ الحبيب ود البشرى
ســـلام
كنت غاتس وين الزمن دا كله..
تعرف يا عمك نحن هنا في طوكيو عددنا قليل جدا ولما تشوف أي سوداني جديد تطير نحوه وبالاحضان ويقابلك من ناحيته بالترحيب الشديد لأنه بكون عايز واحد ينوره بالبلد الطيرا عجمي دي...ونظرا لبعد اليابان وغلاء تذاكر الطيران وصعوبة الحصول على تأشيرات الدخول فمن النادر وصول السودانيين ويمكن في السنة تلاقي واحد أو اتنين فقط وأغلبهم طلاب الدراسات العليا أو رجال أعمال أو كبار موظفي الدولة او العاملين في المنظمات الدولية.عندنا جالية صغيرة محترمة تمتاز بالمحبة والتواصل. نلتقي كل يوم جمعة في المسجد وفيه ركن صغير نمر عليه بعد الصلاة للسلام وتبادل الأخبار وبعد داك كل واحد يمشي محل شغله.
عدد كل السودانيين في اليابان بين 80 و 90 شخص فقط أغلبهم في طوكيو ومدينة أوساكا.
تحياتي ومودتي.
| |
|
|
|
|
|
|
|
|
|
Re: إتمسح أنت في الشارقة..!! (Re: Gaafar Ismail)
|
أهلا يا عمنافي البطاطس
كنابنرحل يا عمك | Quote: وأغلبهم طلاب الدراسات العليا أو رجال أعمال أو كبار موظفي الدولة او العاملين في المنظمات الدولية |
يمكن يكون دا سبب المسح الحاصل في البلد دي , إنو السودانيين هنا ما داخلين في الجماعة الذكرتهم ديل
لكن السؤال هو هل يتغير طبع الشخص مع تغير مجتكعه و البيئة العايش فيها
يعني انا بعد ما استقر في الشارقة و كدا حا ابقى مساح عظيم و لا لسة حا اكون في مود الفجيرة
بتاعة....
قلت لي في اليابان يا عمك
ما تشوف لي اخوك مساعد ياي و كربريتر بتاع كرولا 82
| |
|
|
|
|
|
|
|
|
 Re: إتمسح أنت في الشارقة..!! (Re: محمد البشرى الخضر)
|
| Quote: أها إنت كنت في العين , و هناك في عددية كبيرة من السودانيين برضو عندهم البياخة دي ؟ |
العين دار الزين
أيوة طبعاً البعض عندهم البياخات دي، لكن ولا بهتم بسلّم إن شا الله يقولو واصلة من الخرطوم بطيارة الخميس
| |
|
|
|
|
|
|
|
|
|
Re: إتمسح أنت في الشارقة..!! (Re: lana mahdi)
|
كانت رحلة من السماء للأرض وبعد عشره سنوات من أميركا إلى السودان عبر الأمارات وفى أميركا ربما تجد من جاء صغيرا وصار أمريكيا أكثر من الأمريكان ولكنه سودانى قح تذهب لأى مدينه وأول واحد يقوم بالواجب لابل زوجته الأمريكيه إذا عرفت أنك سودانى لا بل أكثر وكانت تسابقنى الأشواق إلى عناق خالص لله وقلدة وكرفه أشبع منها قويى ولكنها دبى التى صليت الصبح فى مساجدها وكانت تجذبنى الجلابيه والعمه فإذا بصاحبها يغض الطرف ذلك الذى لم يبلغ كلابا بعد وما زال متكلسا فى نميرته فبكيت ملء جفونى لتلك الشوارد وأخبرت أخى بذلك فقال لى لا تسلم على أحد ولكنى تماديت فى السلام مخبرا لمن أسلم عليه أنى قادم من أميركا فتنطلق سريرة ذلك غير السار متطلعا لخبر أو مؤطمئنا على كف أذى وذهبت بعدها للسودان وشاهدت من كنت أتشوق لرؤيتهم يختفون منى فلا حوله ولا قوة إلا بالله ولكننا ما زلنا نحبهم بعلاتهم لا نود منهم جزاءا ولا شكورا ومن يود التأكد من ذلك فالياتى إلى شمال أميركا ولأى سودانى جاء صغيرا ويخرم أذنه تجملا إنى سودانى آت لتوى من السودان أو من غيره سيعيد لك تاريخ السودان المجيد
وستعرف أن هنالك أناس ما زالوا بخير وحتى لا أعمم فهنالك خواص الخواص بالخليج لهم المجد ولهم الرفعه.................................
منصور
| |
|
|
|
|
|
|
|
|
|
Re: إتمسح أنت في الشارقة..!! (Re: munswor almophtah)
|
ياإخوتى السمح عمرو ماببقي كعب
ولو حاول برضو برجع لأصلو
لأن الطبيعة تغلب علي التطبع
حزنت للأخوة الذين قاطعوا الطرف الآخر لسوء تصرفه معهم
وأقول لهم هذا لن يفيد ( مالجرح بميت إيلام )
عليكم بعمل الأفضل ولكم أجرين أجر السلام وأجر تبعات عدم رده
( الكاظمين الغيظ ) وبذلك تسفوهم المل ..
ورغم حبى الشديد للشارقة لأنها كانت مراتع الصبا إلا أننى
للأسف الشديد تعرضت فيها لنفس المواقف.. وخاصة فى السوق المركزى
بتاع الدهب لو سلمتى على واحده هناك !!! تنظر إليك شذرا من راسك لى كرعيك
كأنها صماء بكماء لكنها ما عمياء شايفاك ومابترد عليك..
ربنا ينور بصائرنا وعلى الكاينات يصبرنا
الحمدلله هنا فى مسقط الناس من طرف يسلموا عليك ومن كل الجنسيات
أخى البشرى السلام عليكم ورحمة الله تعالى وبركاته ( أحس إنى أسمعك ترد التحية بأحسن منها )
لك الود والتقدير .
| |
|
|
|
|
|
|
|
|
|
Re: إتمسح أنت في الشارقة..!! (Re: سمية الحسن طلحة)
|
Quote: ياإخوتى السمح عمرو ماببقي كعب
ولو حاول برضو برجع لأصلو
لأن الطبيعة تغلب علي التطبع
حزنت للأخوة الذين قاطعوا الطرف الآخر لسوء تصرفه معهم
وأقول لهم هذا لن يفيد ( مالجرح بميت إيلام )
عليكم بعمل الأفضل ولكم أجرين أجر السلام وأجر تبعات عدم رده
( الكاظمين الغيظ ) وبذلك تسفوهم المل .. |
وإن من البيان لسحرا
جزاك الله خير يا بت طلحة| Quote: السلام عليكم ورحمة الله تعالى وبركاته |
و عليكم السلام و رحمة الله تعالى و بركاته
حبابك و ألف مرحب
| |
|
|
|
|
|
|
|
|
|
Re: إتمسح أنت في الشارقة..!! (Re: محمد البشرى الخضر)
|
Quote: بالله يا الأمين إنت بي جاي
ياخي دا خبر بمليون (دولار)
كدا البزنس يا دوب حا يحلو
في الفترة الكنت بعيد فيها دي جهزت ليك كمية من المشاريع
أفضى لي و تعال بي رواقة
و حقنا برة |
ود البشرى يا حبيب
انا لمن قلت ( البلد دي ) ما قصدي الامارات
انا في الرياض مع صلاح غريبة
وفي النهاية حنا طال عمرك دول مجلس تعاون واحد
يعني ممكن خميس وجمعة اكون معاك او تكون معاي
وايش رايك يا بعدي 
وموضوع البزنس قائم قائم
Quote: لكن فيه ثغرة خطيرة, إنو بيعتمد على النظرة و القراية و دي حكاية تقديرية تقبل الصواب و الخطأ
يعني يا عمك لو تقديرك طلع غلط , مش حتكون فاقمت الوضع زيادة |
ثغرة !!! ما كل الانظمة فيها ثغرات لينكس فيهو ثغرات و الوندوز مقدد
ايش معنى نظامي ما يكون فيهو ثغرة
لكن بيني بينك انا بعرف بقفل البورتات مظبوط سوسيو ما يدخل منها
تصدق وتامن بالله
الليلة دي وقبل شوية في صلاة المغرب حصل معاي موقف وطلعت فيهو ثغرة
طوالي لحقتها وليك وقفلتها
والله يا ود البشرى اتذكرتك واتذكرت بوستك دا وقعدت اضحك براي
وما بحكيها ليك عشان الباندودث Quote: أخبار البزنس شنو , ما أقنعت قيتس يرخي يدو شوية
بعدين ياخي داير أقول ليك حاجة لكن ما تفهمني غلط, دنزل واشنطن دا ما زول حارة و بياع
ما شفتو عمل شنو في "تريننج داي" |
البزنس دا ما قلنا ليك قائم قائم
اها يا معلم ونص بالنص كمان
قصرت معاك
ودنزل واشنطون دا مش لو دورو ما سمح في تريننج دي
لو جاء بالتريننج ذاتو انا عندي كدا 
اسمع ما تقول اخوك ما ناقش الموضوع
انا شفت الفلم دا واظن كان ممثل فيها دور عسكري فاسد 00 صاح
وللاكيدة هسه قاعد انزل فيهو تورنت
التورنت دا لسه ناس ناذر ما سمعوا بيهو
| |
|
|
|
|
|
|
|
|
|
Re: إتمسح أنت في الشارقة..!! (Re: الأمين عثمان صديق محمد)
|
اللمينز يا عمك
لا ياخ
أنا قفلت على قولة البلد دي
لكن ما مشكلة ما دام| Quote: يعني ممكن خميس وجمعة اكون معاك او تكون معاي |
يعني قلت لي آفة المسح دي عند ناس السعودية برضك, أنا كنت فاكرها ماركة مسجلة لمغتربين الإمارات بس , لكن الله غالب
بالنسبة لموضوع الثغرة يا عمك ما تضايق , و كويس النبهناك ليها و إنت لسة في البيتا قبل اللانش - دي حسابها براه
Quote: ودنزل واشنطون دا مش لو دورو ما سمح في تريننج دي
لو جاء بالتريننج ذاتو انا عندي كدا |
يا خي دي قوة راس منك ساي , عديل عليك إنشاء الله يضوي ليك
بعدين ياخي بالتورنت نزل 300 و لا بايرت اوف ذا كاريبيان او أي حاجة من البوكس اوفيس , خليك معلم
بتاعة....
صلاح غريبة- الرياض كان لاقاك....
أمسحه
| |
|
|
|
|
|
|
|
|
|
Re: إتمسح أنت في الشارقة..!! (Re: محمد البشرى الخضر)
|
أمس مشينا السوق و معاي المدام
طبعا موسم الإجازات و أغلبية الناس بتجهز
آخر مرة شفت فيها كمية العمم و الطواقي المتكولة و السفايف* المشنوقة و السحن الصارة اللاقتني , كانت قبل سنة و نصف في جهاز المغتربين بالإمتداد.
و كالعادة ولا كأن الناس من نفس البلد , مسح شديد و مؤسس
زول يتكلم معاك و لا يعبرك غير بتاع المحل مافي, و دا ذاتو اظنو جابرو أكل العيش
أم حتوت علقت على الحكاية دي و قالت "نسوان الشارقة المفلهمات ديل الواحدة تعاين ليك كويس من فوق لي تحت , و تفرزك سودانية و تشوفك بتعزلي في شنو و لابسة شنو و الحنة المتحنناها كيف وحدها وين , و بعد دا كلو سلام الله ما تديك ليه"
*سفايف : جمع مخارجة لسفة و يراد بها هنا سفة التمباك , و هو منتج دارفوري له تاثير مهدئ للاعصاب و ضابط للمزاج . و قد حرم خليفة المهدي تعاطيه فأطاعه أنصاره و خالفه الشوايقة فأدمنوه نكاية به
| |
|
|
|
|
|
|
|
|
|
Re: إتمسح أنت في الشارقة..!! (Re: محمد البشرى الخضر)
|
بعد شهر و نصف في الشارقة
و صلت لتقسير مريح إلى حد ما للموضوع دا - كالآتي:
إعتبر نفسك في الخرطوم ماشي في السوق العربي أو خشيت كورة للهلال او راكب حافلة او أي حاجة عامة و سط الناس
هل حا تسلم على الامة دي كلها
طبعا لأ
و تِيب
| |
|
|
|
|
|
|
|
|
|
Re: إتمسح أنت في الشارقة..!! (Re: Mohamed Elbashir)
|
مرحب ابو حميد
كيفك و الأسرة الكريمة
الحكاية ما فيها بشتنة ولا حاجة , بس شوية حسرة و أسف على الحال
تخيل بعد العمر دا كلو و حا نرجع لإسلوب المسح بتاع المين رود و كافتريا إقتصاد من تاني
إنتو الوضع كيف عندكم , اعتقد و سط ارض المهاجرين دي من الصعب تتعرف على السوداني من شكله
و ما اظن التمباك متوفر عندكم عشان يساعدكم في الفرز
تحياتي يا عمك للشباب
| |
|
|
|
|
|
|
|
|
|
Re: إتمسح أنت في الشارقة..!! (Re: محمد البشرى الخضر)
|
ود البشرى
Quote: ياخي شارقة شنو البتباركها
كفر لي ياخ |
إنت بس بتكون مسخنة معاك حكاية الإيجارات والباركنج
عشان كنت بتوقف عربيتك في فدان كامل في الفجيرة.
صدقني حركة المسح دي لو دققت فيها بتلقى الجماعة ديل جايين من أبوظبي
ما بعرف ناس أبوظبي مشكلتهم شنو مع السلام!!!!
لكن كان اتنقلت للشارقة تبقى مصيبة
تحياتي لحتوت وأمه
مشتاقين شديد
| |
|
|
|
|
|
|
|
|
|
Re: إتمسح أنت في الشارقة..!! (Re: Ishraga Haimoura)
|
إشراقة حيمورة ...
عديل كدا
مشتاقين بالأكتر
صاح حكاية الباركنج و غلاء الإيجارات دي سخنت معانا, لكن الحمدلله إتأقلمنا
أبوظبي دي حكايتها براها, مغتربيها من فلهتمهم تقول آل نهيان
الشارقة قد تكون أحسن حالا , لكن الفيروس وصلها على ما يبدو
كيف اخبارك و كيف سلمى
تحياتي لها و للجميع
| |
|
|
|
|
|
|
|
|
|
Re: إتمسح أنت في الشارقة..!! (Re: محمد البشرى الخضر)
|
ود البشرى
حللتم أهلاً ونزليتم سهلاً .. هذه الظاهرة ظاهرة عامة في السودانيين في أبوظبي والشارقة ودبي وعجمان .. إنت السلام دا ما سنة وردوا فرض .. سلم يا أخي على أي سوداني وأمشي .. على الأقل تكون ذكرته بمن حوله .. انا زيك جيت الشارقة من أربع سنوات ولم اتورط في علاقات اجتماعية لأني التمست انكماشاً وتكلفاً في الناس فأصحابي هم من أقابلهم في المسجد أو الدوام وأكثرهم في المنتديات .. للتواصل 0505711513 أو [email protected]
rgds
| |
|
|
|
|
|
|
|
|
|
Re: إتمسح أنت في الشارقة..!! (Re: عبدالرحمن الحلاوي)
|
هلا بالحلاوي
قلت دي ظاهرة عامة, حتى عجمان فيها الوهمة دي
الغريبة الجنسيات التانية ماخدين عننا فكرة حلوة جدا قبل فترة دار نقاش بين مجموعة من الزملاء من جنسيات مختلفة حول السودان فاجمعوا كلهم على أن ما يميز السودانيين في الإمارات هو ترابطهم و العلاقة الإجتماعية المميزة بينهم انا طبعا ما قصرت معاهم و فكيتها فيهم عن اهمية التواصل الإجتماعي عند السودانيين و بالذات في الغربة و التكاتف و القيم المستمدة من الدين الحنيف و كدا, وبيني وبين نفسي بقول الماعارف يقول عدس
سعدنا و تشرفنا بمعرفتك
سلامي و تحياتي
| |
|
|
|
|
|
|
| |
محمد البشرى الخضر
الطاهر ساتي
Nasruddin Al Basheer
عبدالكريم الامين احمد
هاشم أحمد خلف الله
الزوول
abas
الشيخ إبراهيم الشيخ
Gaafar Ismail
lana mahdi
munswor almophtah
Mohamed Elbashir
Ishraga Haimoura
عبدالرحمن الحلاوي
فيس بوك
تويتر
انستقرام
يوتيوب
بنتيريست