دعواتكم لزميلنا المفكر د.الباقر العفيف بالشفاء العاجل
|
|
 هترشــات ...
|
طبعا لا حظتو للأيقونة دي  مع الزرزرة الحايمة اليومين دي للإحتياط مفروض تلصقها اول شي حتى لو ما ناقله
ياخوي الدنيا ما معروفة يطلع واحد كدا ولا كدا هنا ولا هناك راودته نفس فكرتك دي راح كاتب زيها , عمك قوقل دا ما بجامل ولا بفرز
و الشباب يعجبوك في التشهير و شيل الحال و قالوا السترة و الفضيحة متباريات
الله يرحمك يا حاجة ستنا طوالي كان بتردد العبارة دي , حاجة ستنا دي كانت جارتنا في الحلة مرة تمام شخصيتها قوية جدا
عندها ما شاء الله كان عشرة ولا حداشر ما مذكر من ولد لي بت
كان عندها كلمة في الحلة تمشي على اتخن شنب زي ما بقولوا
المرحوم التجاني الزين رغم إنو كان صعب و راسو حجر ما قدر يقول ليها حاجة لمن حلفت عليه يرضى من ولدو الريح و يعافيه و يمشي العقد بتاعه
اصلو عمك التجاني كان داير الريح ياخد الشفة بت نور الدايم ود خالته و جاره في نفس الوقت
لكن الريح كان داير نور الشام بت عبد الوهاب سيد الدكان , و علي التعتره عمك التجاني عندو مشاكل مع عبد الوهاب في موضوع التعاون و السكر و كدا
بمناسبة التعاون و السكر دي الزمن داك كان نظام الجمعية و التعاون و السكر بالصرفة شغال
اذكر كل اربعاء بشيل الجردل و الكرت و امشي الجمعية من الساعة تلاتة عشان تحجز في الصف
طبعا دا كان اجمل برنامج لأنو على بال ما تفتح الجمعية بعد صلاة العصر بنكون مدورين البلي
واجمل شي لما بنات الحور يجن ماشات الدرس بنوقف البلي و نقهي زين تلقانا فاتحين خشمنا
بنات الحور ديل انا ماحدستكم بيهن مش؟
ياخي ديل مبالغة بنات حاجة النية إتنين تومات ممتحنات السنوي العام أظن كانن و اختهن السغيرة في اولى
يا بوووووووووي بنات زي الورد بيض و طوال سمحات سماحة يجن ماشات يتقدلن في الشارع يوقفن الحركة
أها امهن حاجة النية دي كانت صعبة شديد و ما بترضى في بناتها الحبة
الله يقدرك تقع في يدها تكون غلطت ولا شاغلت واحدة فيهن بعد ما تنهزرك كويس تجرك من أضانك وعلى بيتكم طوالي
و تقعد تردح " بتلدوهم و تطلقوهم في الشوارع زي الغنم","نربي ليكم إحنا" كان عندها لسان اجارك الله متبري منها
لا يفوقها سلاطة إلا عمك عباس الكوتش
دا كمان حكاية تانية على سلاطة لسانه كان الله يكرم السامعين ما مية مية و رياد بطريقة عجيبة جدا
في الكوتشينة بدل يلعب مع الجلاكين دفعته تلقاه من المغرب حاجز في طربيزة الشباب
الطرابيز و الكوتشينة المدورة دي في النادي طبعا , اها النادي دا قصتو قصة
قاليك اصلا كان روضة بنوها ناس الجمعية في ميدان في نص الحلة
الشباب كانو معترضين على بنا الروضة في ميدانهم على اساس بلعبوا فيه الكورة في العصريات و حاجات تانية بالليل
لكن في النهاية اعمامك مشوا كلامهم
الروضة ما نجحت في الأول ما كان في مدرسة متفرغة تمسكها ولمن في النهاية اتفقوا و عينوا حرم بت ست النور الناظرة ما لقوا شفع كفاية
المهم مشروع الروضة ما نجح فقلبوها نادي وكدا
نكمل مرة تانية إن الله هون
أبوحتوت
3- نيسان - 2008
|
|
 
|
|
|
|
|
|
|
 Re: هترشــات ... (Re: محمد البشرى الخضر)
|
Quote: بنوقف البلي و نقهي زين تلقانا فاتحين خشمنا
|
بالله انت من ومن البلي بتقهي؟ امال اسي كيف؟
Quote: ما مية مية و رياد بطريقة عجيبة جدا
|
ممكن توضح اكتر؟
| Quote: نكمل مرة تانية إن الله هون |
مع اني ما طلعت منك باي شي مفيد لكن متابعييين
| |
|
|
|
|
|
|
|
|
 Re: هترشــات ... (Re: waleed dawash)
|
ود داواش إزيك ياخ
وين مختفي الوصيفاب ديل سووا ليهم ريش و محتاجين قطعية وكدا
المهم ابوي
بالنسبة لأسئلتك التعسفية دي كدي ارفع راسك فوق تلقى مكتوب منقول
دي واحدة و التانية
ياخوي بوست إسمه هترشات متوقع تطلع منو بشنو يعني؟
وين ما شفناك في مولد سوركتي عبد الكريم
| |
|
|
|
|
|
|
|
|
|
Re: هترشــات ... (Re: محمد البشرى الخضر)
|
المهم عمك عمر سيد الدكان ماكان بخلي زول يقعد جنب العمود قال شنو ....؟ بتجيبوا الفقر من الصباح قام كبه زيت مكنة في العمود .....طبعا الكلام ده ماعجب عمك ادريس بشير المحسي المتمدن عشان العمود جم بيته وهو بيته ده انضف بيت في الحلة .....
قام شنو طرد عمتك الرضية الكانت بتفرش الفول والنبق والتسالي جم العمود.....
طبعا هي كمان عندها بت لمبة بس ذي تومات عمتك النية.....اتاريها عارفه انوا صالح ولد عمك ادريس مجكس البت ......قامت قالت ليها اكان تحبي ليكي سكران من انداية مستورة ماعندي مانع لكن الرطاني ود ال......! ده اوعك تتكلمي معاه.
عمك اونور سيد الماسورة يشخط الحساب بتاع الموية في الحيطة وبدون اسماء وبنفس الطبشيرة يسجل ليك اسامي الحلة كلها وعارف عمود كل واحد ....يقوم مامون الاطرش يوم 29 من الشهر يجي بالليل يغسل ليك كشك الموية كله ومايخلي ليك ولا سطر واحد .....انقر الصباح مالقوا عمك اونور بقي جنريتر .
واصل هترشتك ياابو حتوت
| |
|
|
|
|
|
|
|
|
 Re: هترشــات ... (Re: haroon diyab)
|
هارون يا عمك
ياخي إنت قديم قدم من زمن كشك الموية يا حليلك
ياخي زمان كسرو بعد موية الحكومة خشت الحلة و قلبوه محل عشا بتاعع فول و كوارع لكن ما نجح
لأنو بعيد شوية و الناس اتعودت على كوارع خالتك سكينة سمعنا بعد داك اجروه ناس علي الميكانيكي
بقو يخزنو فيه العدة و المكنات المفكوكة وكدا
لي قدام بحكي قصة علي أصلها غريبة شوية
| |
|
|
|
|
|
|
|
|
|
Re: هترشــات ... (Re: محمد البشرى الخضر)
|
ودالبشرى سلامات
يعنى هسه الواحد لو عندو هترشة يجى يهترشا ليك هنا
وتتحمل انت مسؤليه كل البيحصل ولا كمان تجى تقول لينا احرفتو البوست عن مجراه
انا سؤالى لانى عندى هترشات والله كتيرة خلاص وخاصه عن الخارج الذى لاينم على الداخل
وعن كيف فى كلمتين تكشف عن ماخبئه قلبك من حنين  وبالمناسبه الكلمتين ديل ممكن مايكونو شكرا
تسلم ودالبشرى يارب ...
| |
|
|
|
|
|
|
|
|
|
Re: هترشــات ... (Re: محمد البشرى الخضر)
|
واسي لو مشيت هناك ومالقيتو فجأة كده تسوي شنو؟؟
تسوقو وتجيبو معاك
ولو معاك اتغاتت عليك وسابو هناك تسوي شنوووو؟؟
تمشي هناك تجيبو ...و....تجي
ولو هناك لقيتو مشى تجي كييييييييييييف؟
_
| |
|
|
|
|
|
|
|
|
 Re: هترشــات ... (Re: تماضر الخنساء حمزه)
|
من الأول إنتي تعملي حسابك و ما تمشي يدك فاضية
على الأقل تكوني شايلة الموبايل و عندك رصيد إن شاء الله قدر المس كول
تعرفي بمناسبة المسكول ديل ذكرتيني عماد النوراني - من شلة الكوتشينة - قاليك عندو مسكول حريفة كيف لمن يحيرك
قدر ما حاولنا نقبضو ونفتح الخط ما قدرنا ياخي حريف حرفنة
و في الكوتشينة زاتها حريف النوع البكون حاسب ليك ورق الطربيزة كلو و عندو خمسين سغيلة كيف
النوع البكورك و يشيل حالك النادي كلو بعرفك إتجريت
المهم يا تماضر
إنتي سعر البامبرز زادوه ولا كيف؟
| |
|
|
|
|
|
|
|
|
|
Re: هترشــات ... (Re: محمد البشرى الخضر)
|
أنا أصلا وكت مشيت يدي ماكانت معاي
مع انو الموبايل كنت شايلاهو في يدي..
انت زاتك وكت حولت ليهم المصاريف في شكل رصيد
ماكان في داعي توري النوراني القصة دي مع انو سحب الجوكر
وحيّر الحلة كلهاأسي حق المسكول ماعندهم..
بس حريفين كيف..اتخيّل الزولة ديك بعد اتشاكلت مع خطيبها وباعت الشريحة
الاشتراها منو؟؟النوراني اتخيل؟
| |
|
|
|
|
|
|
|
|
|
Re: هترشــات ... (Re: تماضر الخنساء حمزه)
|
زعلتيني يا تماضر من امس
كيف تخلو النوراني يشتري الشريحة إنتي ما عارفاه مستهبل
نسيتي يوم شال عربية فضل المرجي السيهان بيرد قال داير يجربها عشان يشتريها غتس بيها سبعة يوم
في النهاية قال ما دايرها
فضل المرجي لقى البلوفة فوتت و الكربريتر قفل و الله ستر من سير الكتينة شوية كان فوت التايم
و المصيبة نزار و دناس صغيرون كان دايرها وجادي قروشو جاهزة بعد الحصل عليها ابى يشتريها
قالو بعد داك ودوها الدلالة ادوهم بدلها تلاجة و فقاسة بيض ومكنة تصوير قديمة لكن شغالة
اها المكنة دي باعوها لوليد سيد المكتبة دخل فيها كان عشرة ولا خمستاشر الف ما مذكر لكن حرقت تش
بالله ايام الإمتحانات دي تلقي الطلبة ديل بالصف انا ايامي الكنت في المنطقة الصناعية كنت المسا بقيف ليه فيها
ياخي من وراها حنكنا جنس حنك اظن بنات سنة تالتة كان ما كلهن إمكن تلات ارباعهن عرفناهن من ورا المكنة وتصوير المذكرات
الغريبة ولا واحدة ما خشت فيهن الجامعة
العرسوها وقعدت في البيت و العادت و برضو عرسوها لكن كان ما اخاف الكضب سعدية بت عمك آدم
سواق البنك قرت ناضجين ولا حاجة كدا بالمسا وابوها شاف ليها شغل في البنك معاه
سعدية دي يا سلام عليها لي أسي بذكرها بلبس المدرسة بت تمام خلقة واخلاق بالله تجي ماشة في الشارع عينها ما بترفعها
لكن حظها كعب ما عرست لي اسي مع انها والله زينة و مرة مافي زيها لكن تقولي شنو القسمة
الغريبة حنان الحلبية راس الهوس ديك اكتر واحدة خفيفة و نازلة طالعة مع الشباب عرست من الثانوي
و عريسها الغريبة من الحلة الجمبنا و عارف حالها
قالوا كتبته سافرت ليه الجزيرة مخصوص جابت المصيبة ولا الشنو ماعارف و شربتها ليه في البيبسي
المهم
السنة دي الشتا اتأخر ليه؟
| |
|
|
|
|
|
|
|
|
|
Re: هترشــات ... (Re: محمد البشرى الخضر)
|
يعني افهم من كدا يا عمك خليت أدب الجرجير (من جرجرة ) وقلبت هتشير (من هترشة) ..
اللهم لا تمحنا لا تبلينا..
أها وصدقا لي كلامك بتاع صرفة السكر من التعاون دا ..
برضو نحن كنا بنشيل مواعينا ونمش نقيف هناك
بس الفرق انو دكان امحمد ود احمد ماكان بجن بدربو بنيات .. لا سمحات ولا شينات ..
لكن كان في عمك ود التوم ..
Quote:
دا كمان حكاية تانية
|
ياخ اخلاقو معلقة في نخرتو
لو قلت ليهو السلام عليكم وما قلت معاها ورحمة الله تعالي وبركاتو الله يمرقك ساي ..
يباريك لحدي ما تصل محل ماش ويشبكك ...
الولادة النية الخايسة
سلام الله ما بتعرفوهو
اليهود
الكفار
الملحدين
انت ود منو آجنة ...؟؟
اهامرة عمك التوم دا كان واقف معانا في صف صرفة السكر
وقوم يا عبد الماجد لزو ..
وتعال شوف ..
آآآ بتلزني انا يا عديم التربية
الشحم اللخليك تشخر
ولادة السجم
ولادة الفقر
يخسي علي تربايتكم
اها الجماعة قدر ما شالوا وختوا حلف يمين ستين ما يخلي الجنا الخايب دا ..
واحد من الجماعة قال ليهو كدا يا عم ود التوم استهدي بالله وأقعد في بطن الواطة وقول بسم الله
قال ليهو ما بقعد قاعدين في فراشك
قال ليهو سمح ما تقعد أقيف
قال ما بقيف
طلق لا اقيف لا اقعد ..
| |
|
|
|
|
|
|
|
|
 Re: هترشــات ... (Re: طلحة عبدالله)
|
طلحة تنظير يا عمك
عمك ود التوم دا زكرني الصادق الجيلي جارنا
برضو عندو نفس الحماقة دي مرة جا راجع من الإستاد كداري رغم انو دافع شيرنق الحافلة
عشان نقاش في كرسي و ما كرسي مع إيهاب الضو
إيهاب دا برضو فردتنا حلبي وجيه و عاجباه روحو النوع البقشر ليك من بدري و يتكل قدام بقالة الكردة
في طريق بنات المدرسة , و بكاي بكا يكون بتكلم معاك في أمانة الله و بيحكي ليك فجاة كدة تلقاه صن و فتح خشمه
طوالي تعرف إنو في بلومة جات قاطعة و اللذيذة إنو حنكو بيش النوع التلقاه يرجف قدام الحاجة وعرقان ويتمتم بس نافعاه وجاهتو
دي الحتة الكان سنهوري بشتغلو بيها ودايما بقول ليه انا القى وجاهتك دي يمين جكس الحلة دا كلو اسجلو
سنهوري دا بقى ظريف بشكل النوع الما ممكن تمل الونسه معاه ابدا و حنكه سنين كيف بس النصيحة شناتو مُرة
لكن روحو حلوة و ماخد الموضوع عادي باعتباره حظ وكدة
سنهوري كان مدشدش في سهام بت قاسم الترزي لكن ابت تديه مدخل كلوكلو قدر ما حاول مافي طريقة حتى كلم ليها صاحبتها نجوى برضو ما نفع
نجوى دي إستغلالية جدا قشطت ليك سنهوري كل مرة عوازيم و موصلها مشاويرها كلها و بتاع و هي سارحة بيه و شابكاه الموضوع ماشي كويس
في النهاية اتضح انو نجوى ما فتحت الموضوع معاها من أصله اليوم داك سنهوري دور معاها شكلة ليها ضل
قصة الشكلة دي بحكيها ليك لي قدام - إن الله هون
يا عمك
ياخ الفلبينيات ديل فيهن واحدات سماحتن قاطعة عديل كدة
| |
|
|
|
|
|
|
|
|
 Re: هترشــات ... (Re: كمال سالم)
|
كمال سالم يا عمك
ياخي ما تظلموا البنية ساكت ياخ ماقالت هي نست تكتب الكلمة ام اربعة حروف ديك
ولما لقت الناس هاجوا فيها حبت تلقنهم درس وكدا بس للاسف اغلب الجماعة اظنهم في المرحلة الحمارية فما استوعبوا الدرس وكدا
ما علينا
الكلمة ام حروفا اربعة دي تكون شنو يا عمك
وليه طبق البيض فيه تلتين حبة؟
| |
|
|
|
|
|
|
|
|
|
Re: هترشــات ... (Re: محمد البشرى الخضر)
|
يا عمك
انا من ما لقيتك خاشي النت 6 صباحا يوم السبت
قلت ربنا يجيب العواقب سليمة( هي الامارات الشمالية فيخا سيد لبن)
Quote: طبعا دا كان اجمل برنامج لأنو على بال ما تفتح الجمعية بعد صلاة العصر بنكون مدورين البلي
واجمل شي لما بنات الحور يجن ماشات الدرس بنوقف البلي و نقهي زين تلقانا فاتحين خشمنا
بنات الحور ديل انا ماحدستكم بيهن مش؟ |
انا شفت اولاد علي زمننا حارسين التغاون معاهم جوز رويال بلاستيك
و الغريبة برضو دكان الجمعية في سكة درس العصر
و كم ضيع اول جوز حق السكر( مش السكر)
شكل وهترش
والله مرات يا ود البشري نكون محتاجين لمكان نكورك فيهو ونصرخ
لمن الواحد يامن ذاتوا
| |
|
|
|
|
|
|
|
|
|
Re: هترشــات ... (Re: osman righeem)
|
ود البشرى
ذكرتنى سودانى جديد لنج فى المملكة لقى ليه سعودين ناصبين ليهم خيمة قدام بيتهم ويشربو فى الدلة,,وهو من المحاسبين القدام,,وجاء هنا تعلم اكسل وكتب ليه سيرة ذاتية,,اها لما فتر من اللف على الشركات دخل حى الملز بالغلط كدا ولقى ليه ناس الخيمة ديل,,,ملص جزمتو ودخل عليهم ورفع ايدونو وقال ليهم الفاتحــــــــــة,,,,صدقنى ناسك قربو يجيبو ليه الشرطة,,لكن الله نجدو بسواق الاسرة كان سودانى فشرح لهم الموقف,,,
لما سالوه انت ليش عملت كدا قال مشتهلى ليه عقدة فراش,,,,اها انت مشتهى ليك مشية جمعية ومرقة عصرية..لكن لو هترشت لينا فى الكرة كنت بصدقك ,,,لكن انداح مع بنات النية,,,,
وواحدة من بنات النية مغربة قالت ليك
| |
|
|
|
|
|
|
|
|
 Re: هترشــات ... (Re: abuguta)
|
أبقوتة يا عمك ....
ذكرتني بي سيرة الإغتراب و المغتربين دي أبوعبيدة ود حاجة ستنا - رحمة الله عليها - الحدستكم بيها قبيل
ابو عبيدة دا من زمنو البقرا في المدرسة هموا متين يكبر عشان يغترب السعودية
يقول ليك السعودية بلد الرسول فيها الخير و البركة تنول ومباري ليك اخبار المغتربين و عارف إجراءات العمرة و الجوازات و سعر الريال
سافر نظام عمرة وزوغة واخد ليه ستة سنة و جا راجع مكشوش مدلدل يدينه و شايل ليه كرش و مبادئ صلعة
باع نصيبه في البيت لأخوانه واشترى التكسي البيجو بتاع عمران مخير وكتب عليه حصاد الغربة
عمران بقى لما باع التاكسي اتاريه كان عندو فكرة يعمل ليه بوتيك قدر ظروفك ويشارك فيه فخرية الدلالية
وفعلا مشروعهم مشى كويس بقت هي تسافر سوريا و تجيب البضاعة و الهدوم و الهتش بتاع البنات و الكريمات و الحاجات
وهو ماسك المحل لكن مشكلته عمران ما بتستر و النوع الراسه خفيف اي دامة بضحكة تلعب بيه
بقى يشيل ويدي ليك الجكس في الحاجات شي بالدين و شي هدايا و شي يحلف ما يشيل حقة لغاية ما جاب آخر المحل
فخرية قالت ليه الكلام دا ما ينفع نتحاسب و كل زول يشيل حقه
فعلا فضوا الشراكة عمران شال الدكان و جزء من البضاعة و هي شالت الكاش و اغلب البضاعة
قومي يا فخرية افتحي ليك محل جمب المركز الصحي و زيادة على شغل البوتيك جابت فيه شرايط كست و تلاجة بارد وماكينة شاورمة
يا زول المحل حرق تش و فتحت معاها و روقت و سوت ليها محل تاني بتاع اتصالات و تصوير
قام النعيم بتاع المحلية اتقدم ليها طلب يدها وعشان ابوها متوفي سافر لعمها في كوستي عشان يتقدم وكدا
عمها التوم طبعا سامع بيها روقت و الشغل ماشي كويس معاها قال ليه البت متكلمين فيها ود عمها قال دايرها
طبعا فخرية وامها دار الجلال زعلن زعل شديد و هرجن ما خلن شي وكيف العم وولدو قاعدين السنين دي كلها البت قربت للأربعين ما قالوا دايرنها
وبعدين ود عمها الريح دا زاتو اسغر منها القصة واضحة العم ماداير بعد البت بقت شغالة في السوق و عندها القرش واشترت البيت الكان ماجرنو تمرق من عندهم.
الحصل شنو بعداك قصة طويلة بتمها ليك لي قدام - إن الله هون
المهم ناس رفاعة قصتهم مع الحمير شنو يا عمك؟
| |
|
|
|
|
|
|
|
|
|
Re: هترشــات ... (Re: osman righeem)
|
عثمان رغيم ياعمك
يا سلام ياخ ذكرتنا سيد اللبن عمك مساعد كان بجي بي حماره من السلمة اظن
كان بوقف الحمار في طرف الشارع ويلف البيوت كلها يدق بيبانها
على بال ما يخلص دق يكون الناس جهزوا حللهم و جكوكهم كان عندو عكاز ماكن في طرفه صامولة حديد
بعد ما يخلص الساعة سبعة سبعة ونص بياخد ليه قعدة في عنقريب الضو سيد الخدار يشرب فيها كباية الشاي مع سفة كاربة و غالبا كان بياخد غمدة كدا
الضو كان بزهج ليك من القصة دي جدا
طوالي شكلتو مدورة مع عمك مساعد كان بقول ليه إنت جاي تقعد هنا عشان تعاين للنساوين و تتفرس فيهن
الضو اصلو فقر و بتاع مشاكل يومو كلو نقة مع الزباين وغلاط في الوزن
كان بجيب الخدار من السوق المركزي و يجي يبيعه في طبليته قدام دكان عبد الوهاب
غالبية زباينه كان نسوان الحلة بجوه زي تمانية و شوية كدة صباحا بعد يكونن مرقن شفع المدرسة
اللمة في طبلية الضو كانت للونسة وتبادل الشمارات اكتر منها للشرا و دا الكان بفور دم الضو
و دايما ما يردد كرهتي في الدنيا لمة النسوان للفارغة و سواقة عبد العظيم
عبد العظيم دا سيد البوكس البأجره الضو بجيب fيه الخدار من السوق الصباح
الزمن داك كان ولد سغير ما نجح في الشهادة و خش البوليس اخدوه في المباحث و حصل فيها وكيل عريف
مرة عمل مشكلة مع واحد من اولاد الجماعة في بنات وما بنات داك حلف قاليه إلا اطيرك من البلد دي
وفعلا يومين مافي بلا امر نقله زالنجي صدر, عبد العظيم اتجرس و رفض النقل و قدم استقالته
اخوانو مغتربين كلهم ما شاء الله و هو قاعد ماسك ليهم البيت و مراعي امهم - ابوهم رحيمه الله اتوفى عبد العظيم دا سغير ما شافه
فاتفقوا عملوا شيرنق و رسلوا اخدوا ليه البوكس دا يسترزق منو و يطلع مصاريفه
المشكلة عبد العظيم ما مقتنع بالقصة دي و لسة حكاية المباحث دي معلقة معاه
فبقى تلقاه سايق مشوار فجأة يخرم و يلف ويطارد ليه عربية مظللة و لا شكلها ما ياهو
واتعرف في السوق بالقصة دي بقوا الزباين بتجنبوا يأجروا عربيته
إلا الضو مجبور عليه حسب الجيرة و الصداقة الكانت بينه و المرحوم
اصلهم كانوا فرد الضو و المرحوم و عبد الباقي الصول النجار
انا ما حكيت ليك فلم النجار دا . لا حولا
اتمو ليك المرة الجاية - إن الله هون
اسمع يا عمك...
التكاسة البتان السغلا ديل ما بقيفو بالليل مالهم
| |
|
|
|
|
|
|
|
|
|
Re: هترشــات ... (Re: محمد البشرى الخضر)
|
أبو حتوت
كيف حالك ولعلك طيب.
هاك هترشة حبوبتنا أم مريوم الما خمج:
كان عمرها آنذاك فوق التسعين سنة وفاهمة وواعية جدا ، ولكنها تتظاهر بالصم والطرش عندما لا تريد سماع ما لا يأتي أو يتفق وهواها ومع ذلك تسمع النملة إذا ما اتجهت إلى "اوقية" السكر المقرر لها أيام أزمات الســكر لأنها"كييفة" قهوة:
قا ليك يا عمك يوم جاها أحد أحفادها وقال ليها يا حبوبة ماسكاني نزلة برد ليها اسبوعين ما مرقت مني..
حبوبة أم مريوم في أحدى لحظات الهترشة ردت عليه وقالت ليه " أمشي لأمك تعمل ليك شوربة فروجة ما طلعها ديك "
| |
|
|
|
|
|
|
|
|
|
Re: هترشــات ... (Re: محمد البشرى الخضر)
|
اليوم من الصبح قافلة معاي و معرج بالجوكرين وقلت نفكها اون لاين
لقيت ليك البورد زي مراحيض ميدان الامم المتحدة وكل واحد مقبقب التاني
و كل واحد مزرزر عيونو و حمدولد مساهر بعمك ود الموج .
قلت ما في حل شوف ليك حته فش فيها خلقك اذكرت هترشاتك جيت قريت البوست
لقيت في نركيز علي سيد اللبن فحللت الموضوع فرويديا فسقط التحليل مطابقا مطابقة النعل للحافر
اي ان متذكر سيد اللبن هم شخص ضاغت به السبل وناخ تحت حمل المسئوليات و تذكر الحنية و الرضاعة
وعدم الهم والمسئولية.
هي الحقيقة من امس الصبح لاني لم اري ليلة امس فلقد مرت وين ما عارف بل شهدت شروق الشمس من نافذة سيارة
المهم بمناسبة سيد اللبن ده والبتان السغلا بتاعين التاكسي الما قاعدين يقيفوا باليل ديل!!!! انت كنت وين باليل
وانا العارفو انهم نهار ليل ما بيقفوا لانهم عندهم نظرتهم الفاحصة تقول لابسين نظارة نسته ديك . بعدين الشكية بس من الريال
(الرجال) لكن الحريم بشكروا فيهم لكن يشتكو من الريحة .
وبمناسبة الريحة دي شم النسيم علي الابواب شوف ليك بيض ملون و سمك مخلل و اتملي تمام وبعدين شم . اسال مجرب و للاسماك في دم كل حر يدا سلفت ودينا مستحق.....
بعدين حكاية الظيط و لو بي ظر... ماشية في البورد واحد يقولك اولاد الميرغني نسب ال المهدي جنس تفاهة وقلة ادب و كما بقولك من اين اتي هؤلاء ؟لكن نقول شنو؟
ناني تقول لي دكان منو وحوش منو هس ذي دكان بكري ده اللمي من كل شجرة ورقة ده متلو شنوا ولا دكان ود البصير و بت مجذوب انا غايتو مرات البورد ده بيذكرني درم كشره في شارع خليفة وراء المطاعم تجي الساعة اتناشر باليل تلقي ليك خرتمية كديسة و الريحة من اول الشارع انا غايتو الليلة حأسأل الكدايس من اين اتيتم يا هؤلاء ............
بعدين ممكن الواحد يعمل زيط في البورد بدون ما يخش في درم الكشرة يعني ممكن اقوليكم عن صاحبي الشغال في امارتل و ساكن في خنور وبيغسل العده باليل وحاجات زي دي أو ممكن افرش عديل كده واقول ابوي مات ويجن البوردابيات يباكني و البشوفو اتخر في التعزية ارسليهو الرابط بالمسنجر واكون عملت لي بوست فيهو كمين مداخله وشاهده خرتمية وبعدين اعمل مطالبة لبكري عشان يفعل خاصية اعرف من قرأ لك
عشان بعد كده احدد ارد الزياره لي منوو اباكي منو
بعدين ترقبوا بوست ( قلت ادب شفع حوش بكري )
اتفشيت شوية برجع البورد اورم تاني و بجيك يا ابو حتوت
| |
|
|
|
|
|
|
|
|
|
Re: هترشــات ... (Re: محمد البشرى الخضر)
|
اقعد هترش ساااااااااااكت
ماعملت ليك مكتبة والاداك بالكوريك يدينا بي معلقة الجنة ....!
شفته عمك صالح لاكان بصوم ولابصلي ....الدرب ساكت جابوا بي قرية قبل صلاة العشاء والدنيا رمضان...
عمك ياعمك شاف الصواني وهو جعان جوعة الكلب ....الجماعة قالوا ليه اتفضل ....نزل من حماره طوالي داير ياكل ....الجماعة قالوا ليه الاكل بعد الصلاة ....صاحبنا فاكر الحكاية اربعة ركعات والسلام ....الامام حكاه ليك بي صلاة تراويح ابو جزء ووكم ....؟ وحاتك تلاتة وعشرين ركعة ....
المهم....
لامن وصلوا الركعة الخمستاشر ماقدر يستحمل ...قطع الصلاة وطلع يلقي الحمار رااااااقد في مكانه قال ليه : الراقدلها شنو ....؟ رقدت فوقك صلاة التراويح التكسر ضلعك .
وبرضو غايتو جنس هترشة.
| |
|
|
|
|
|
|
|
|
|
Re: هترشــات ... (Re: محمد البشرى الخضر)
|
| Quote: قالوا كتبته سافرت ليه الجزيرة مخصوص جابت المصيبة ولا الشنو ماعارف و شربتها ليه في البيبسي |
البشرى في واحدي معاي قالت ليك أجدع لينا العنوان سرييييع بتاع الجزيرة
وسيد الدكان بتاع البيبسي
| |
|
|
|
|
|
|
|
|
|
Re: هترشــات ... (Re: محمد البشرى الخضر)
|
صاحبك ابصلعة بي ضربة حضنقال ماوس واحد طير ليك سته تمانية مراحيط عامة كانت زايطه في البورد وبعدين انا في الجمعية لقيت ليك جابو تلاجة جديدة كلها حليب شئ كامل الدسم و شئ نص كم و شئ بدون وكما في حليب نياق ويا حليلو سيد اللبن وبكره تلقي لبن حمير عشان قالوا بينفع الكتكوت ماهي سوق والزبون دائما علي حق .
حاجة امنة الحلبية كان عندها قفه فماملي سايز فيها كل شئ من الودك الي كافن كافن وبت السودان و براريد وكبابي و جكاكي وكيزان و بخور تيمان يعني بالزبط سودانيزاونلاين دنيا وكلها تجري علي قدم وساق وفي علي قدمين وساقين لمن جاء عصر سيد اللبن بالبوكس.
في بوسن كده بي نص كرت شيلو وديهو اسابيعك . عارفك تكون نقشتو .............
بدون ورم الهلال غلب منو؟
| |
|
|
|
|
|
|
|
|
|
Re: هترشــات ... (Re: محمد البشرى الخضر)
|
والله يا أبو حتحوت وأخوه (للدقة) البوست سمح سماحة ... مرات تجيك لحظة قهر كدا ... وتكون سكران وماشارب ... راسك يودي ويجيب ... أها أنا ما عندي ـ الحين ـ على قول الخليجيين هترشة لكن (مشكلة) ... في بعض المهن زي مهنتنا دي مثلاً ... ترقد بالليل تجيك الأسماء بتاعة ملفات القضايا طايرة ومرات أسيادها يجوك معاها ومرات شكيات ساي في ساعة ونسة... عشوشة ست الشاي ــ مثلاً ــ وقصتها مع ميري ... ونزاعهم في الموقع وميري عندي عشوشة عندها كم تصريف مرات هي ميري ومرات ماريا ومرات شنو كدا مع عارف وبنفس اللحظة هي متعددة الجنسيات فمرة تلقاها (والله يامولانا الحبشية دي حقارةخلاص ) ... ثم وبنهاية الشكية (هي ما تمشي إرتريا حقتها دي ) !!!!
| |
|
|
|
|
|
|
|
|
|
Re: هترشــات ... (Re: محمد البشرى الخضر)
|
اخونا المحامي يشرب قهوة افريقية من ايادي افريقية مش قهوة تركية من انامل فلبينية المهم خلينا في موضوعنا بتاع بوكس البن عشان الشركات الاستثنارية حتجي تزرع علف في السودان وهذا علف غير مخصص للحيوان بل مخصص للسيارات تتصور سوف نصدر بنزين من السكر والقمح والبرسيم يعني بتاع اللبن بدل كان يأخد حزمة برسيم للحمار حيأخد عصير برسيم للبوكس يعني مهما يقول في تطور يرجع للبرسيم لكن المشكلة في بتاع البوكس الي كان بيجيب البرسيم للسوق فيكون موضوعه دود المش منو فيه يعني علي طريقة يبيع ويشرب او يخبز و بقرض
:- اسمع ابوحتوت تأجرو مفروش دفع شهري وعليك فاتورة التلفون
| |
|
|
|
|
|
|
|
|
|
Re: هترشــات ... (Re: محمد البشرى الخضر)
|
ياخي :
تصدق وتآمن بشنو ؟
ولا أقول ليك خليها الحليفة دي
ياخي فكيت لي دبرسة وقهرة كدا
بنج حصين ما زيها
أنت حصين السواري ودوهن وين؟
اكونو عملو بيهن شركة ؟؟
المهم:
ما تتأخر في الجمعية بعد المغارب كويس ؟
بهاء
| |
|
|
|
|
|
|
| |
محمد البشرى الخضر
waleed dawash
Maawya Hussein
haroon diyab
ماجدة عوض خوجلى
طلحة عبدالله
كمال سالم
osman righeem
abuguta
Gaafar Ismail
ممدوح أبارو
Ahmed musa
ناهد علي
Baha Elhadi
فيس بوك
تويتر
انستقرام
يوتيوب
بنتيريست