|
|
 زواج (متعة) ..!!
|
(*)
سأله الحضور رأيه , كان هو والد العريس لكنه أتى معهم مغلوباً على أمره
لم يصدق أنهم قد إستشاروه أخيراً , كررها الرجل مرة ثانية :
إيه رأيك ياحاج (الأسد) ..؟
أخرجه السؤال من حالة التوهان والشرود التي كانت قد داهمت عقله منذ تحرك (الحافلة)
الصغيرة التي تقله وبعض أهل الحي (ووجهاءه) متجهين صوب منزل أهل العروس , عروس إبنه
المقبلة , ما أن ردد الرجل سؤاله للمرة الثانية حتى تنبه حاج (الأسد) إلى أن الجميع كانوا
بإنتظار رأيه فيما أتفقوا حوله ..
كانت عمامته متكورة على رأسه , الأشيب الذي إعتاد على حلاقته عن آخره , فماله ولتصفيف شعره
بعد أن إشتعل شيباً , مد يده اليمني نحو عمامته , وحملها بكاملها عن رأسه دون أن يحل ربطها ,
وأعادها كما كانت ثم قال :
والله إن درتوا رأي صحيح ؟
ده زواج (متعة) سااااي ..!
|
|
 
|
|
|
|
|
|
|
 Re: زواج (متعة) ..!! (Re: كمال علي الزين)
|
كيو كل سنة وانت طيب وعيدك سعيد إن شاء الله
ياخي رسلت ليك رسالة بمناسبة العيد وإتصلت عليك مليون مرة
وما جاني منك رد تكون غيرت رقم جوالك ؟؟
مش مشكلة متابع معاك زواج المتعة ده
| |
|
|
|
|
|
|
|
|
 Re: زواج (متعة) ..!! (Re: هاشم أحمد خلف الله)
|
Quote: كيو كل سنة وانت طيب وعيدك سعيد إن شاء الله
ياخي رسلت ليك رسالة بمناسبة العيد وإتصلت عليك مليون مرة
وما جاني منك رد تكون غيرت رقم جوالك ؟؟
مش مشكلة متابع معاك زواج المتعة ده |
سلامات ياصديقي وكل سنة وإنتا طيب ,..
ماجاتني منك رسالة , والتلفونات بنردها الليلة ...
ليك وحشة والله ياصديقي ..
العيد كان فترة بيات شديد ..
محبتي ..
| |
|
|
|
|
|
|
|
|
|
Re: زواج (متعة) ..!! (Re: كمال علي الزين)
|
(*)
تعود أن يلقي بكلماته هكذا , حاج (الأسد) كان لا يأبه بأحد ,..
إعترض على تزويج إبنه العاطل , لكنهم لم يأخذوا إعتراضه بجدية ,..
ربما لأنهم تعودوا أن يعترض على كل أمر ويفعلوه رغم إعتراضه , ..
لكن الأمر يختلف اليوم فهؤلاء أنسباء جدد , ولا يعرفون كيف تجرى الأمور بينهم ,..
قاطعه أحدهم :
أسكت ياحاج (الأسد) ده عمل خير وربنا بتموا , ده بدل ماتقول (مبروك) الله يكسفك ياشيخ ..!
رد حاج (الأسد) :
والله سألتوني رأي وقلتو , علا كمان نادوا لي العروس الخاربة أكلما ..
أسكتوهو مرة أخرى :
ياحاج عاوز بيها شنو ؟
كفاية الإحراج الدخلتنا فوقو بي كلامك ده ..
رد حاج (الأسد) وهو يرفع عمامته عن رأسه حتى تبدو صلعته ثم يعود إلى وضعها :
لا والله بس بدور أسألا سؤال وحيد وتاني حرم ماعندي معاكم كلام ..!
(عدل بواسطة كمال علي الزين on 10-07-2008, 11:59 AM)
| |
|
|
|
|
|
|
|
|
|
Re: زواج (متعة) ..!! (Re: كمال علي الزين)
|
(*)
تحت إلحاح حاج (الأسد) , أرسل القوم في طلب (عروس) إبنه المرتقبة ,..
جاءت وهي تغطي وجهها بالكامل , سألها :
سموك منو يا المبروكة ..؟
أجابته من خلف نقابها :
إسمي (حنان) يا عمو ..
رد وهو يتبسم :
ياحنان ياحنة والله إسم سمح , إنشاء الله تكوني سمحة زي إسمك ..
قاطعوه كعادتهم :
ياحاج (الأسد) ده سؤالك مع الرجال , ياخي خجلتا البنية , ماتضيع زمنا ساي
في الفارغة خلينا نشوف الجماعة قولهم شنو في طلبنا ؟
رد حاج (الأسد) :
والله أنا ماني زول فارغة لكن عاوز أختصرلكم الزمن ..
سألوه :
أها وتختصر لينا الزمن كيف ..؟
حاج (الأسد) :
بدور أسألي سؤال وحيد بقولكم ..وبعديها ماعندي معاكم حديس ..
ردوا بصوت واحد :
أسألا عليك الله وريحنا ..
إتجه نحوها ودنا منها وقال هامساً :
إنتي يابت بدور أسألك ..
ردت (حنان) :
أسأل ياعمو ..
سألها بصوت حاد :
إنتي يابت وليدي ده (عاشقاهو) ..؟
| |
|
|
|
|
|
|
|
|
|
Re: زواج (متعة) ..!! (Re: كمال علي الزين)
|
(*)
صاحوا بوجهه مرة أخرى محتجون على السؤال , وأنتهره حاج (مصطفى) :
بالله عليك شوف الراجل المابختشي ده , ده سؤال تسألو للبنية ..؟
رد حاج (الأسد):
يازول مالك والله سؤال كفو وفي محلو , الوليد عاطل وخيبان وسجيمان ,..
والبنية وشها ماشفناهو , ماهو يا إما قبيحة ومظعمطة يا إما عاشقة الجنا ساي ..
والله كان شينة ما بندورا لكن كان عاشقاهو عرسولهم ساي ..
أسكته حاج (مصطفى) :
أسكت آ زول والله إت ماعندك راي ..
حاج (الأسد) :
كيفن ماعندي راي الجنا جناي , وعاطل وخيبان بعدين بتدورا
تأكلوهم إنتو ما واقعين في عبي ده ..؟
ثم توجه للعروس مرة أخرى :
إت يابت عارفاهو شغال شنو الوليد ده ؟
أجابته :
لا عب كورة ..ياعمو .
أجابها :
والله يطرشني ماسمعتا بيهو شغال , لاعب كورة كيفن , بدوهو عليها ماهية ..؟
أجابت:
لأ لكن بعدين ممكن يشتروهو بي قروش كويسة ..
حاج (الأسد) :
وحات الله .. ده أديهو ليهم مجان وأدفعلهم فرق ..ده طول اليوم يأكل زي التور , ..
شي (طحنية) وشي (لبن) وشي .. غايتو الله يقدرني ..
قالت العروس موضحة :
أيوة ياعمو ماهو لازم ياكل عشان يكون عندو (لياقة) كويسة للكورة ..
رد حاج (الأسد) :
لياقة ؟ لياقة دي شنو يابنية .. إسمها (مروة) ودي مابسوها بي (طحنية)
دي بسووها بي (مديدة) ألت دخن بي سمن , ..
قال لياقة قال ..!!
| |
|
|
|
|
|
|
|
|
|
Re: زواج (متعة) ..!! (Re: najma)
|
Quote: لياقة ؟ لياقة دي شنو يابنية .. إسمها (مروة) ودي مابسوها بي (طحنية)
دي بسووها بي (مديدة) ألت دخن بي سمن , ..
قال لياقة قال ..!! |
كنا في واحد من الاعياد لاعبين مع القرية المجاورة لينا .. اها مدرب فريق قريتنا خالا لينا .. قال احسن حاجة تعملوا بيها لياقة (المريسة) سمعنا كلاموا وقيلنا .. وعينك ماتشوف الا النور .. الكورة استمرت ربع ساعة لاغير ........
ودالزين كل سنة وانت طيب
| |
|
|
|
|
|
|
|
|
|
Re: زواج (متعة) ..!! (Re: ادريس خليفة علم الهدي)
|
Quote: كنا في واحد من الاعياد لاعبين مع القرية المجاورة لينا .. اها مدرب فريق قريتنا خالا لينا .. قال احسن حاجة تعملوا بيها لياقة (المريسة) سمعنا كلاموا وقيلنا .. وعينك ماتشوف الا النور .. الكورة استمرت ربع ساعة لاغير ........
ودالزين كل سنة وانت طيب |
إزيك يا إدريس .. خالك ده سواها ظاهرة ..
(المريسة) دي فطور بس , لا غدا ولا عشا ولا بتعمل (مروة) ,..
خلينا في (المديدة) و(العصيدة) و(الثمن) دراءاً للشبهات ..
وإنتا طيب ياصديقي ..
محبتي ..
| |
|
|
|
|
|
|
|
|
|
Re: زواج (متعة) ..!! (Re: كمال علي الزين)
|
الاخ كمال
بصراحة الواحد بقا يخاف عديل قبل ما يفتح البوستات بتاعتك، السبب الرئيسي انو الزول ما بيقدر يطلع من البوست قبل ما يخلصوا ويقراهو كاملا، وبعض المرات يقعد يضغط على Refresh كل دقيقتين، عسى وعل يكون في اضافة
شكرا ليك وبالتوفيق
| |
|
|
|
|
|
|
|
|
|
Re: زواج (متعة) ..!! (Re: Tariq Villamosh)
|
Quote: الاخ كمال
بصراحة الواحد بقا يخاف عديل قبل ما يفتح البوستات بتاعتك، السبب الرئيسي انو الزول ما بيقدر يطلع من البوست قبل ما يخلصوا ويقراهو كاملا، وبعض المرات يقعد يضغط على Refresh كل دقيقتين، عسى وعل يكون في اضافة
شكرا ليك وبالتوفيق |
مرحبتين صديقي طارق
شكراً على لطف كلماتك
محبتي
| |
|
|
|
|
|
|
|
|
|
Re: زواج (متعة) ..!! (Re: ممدوح أبارو)
|
Quote: يازول هوي ا تقعد تشبكنا
شكراً ومحبتي وبطيخ(حلوة الصيغة دي؟)
أقعد في الواطة دي وتم لينا النضم
|
ممدوح ..كل سنة وإنتا طيب ياصاحب
يازول حا نواصل ,مع عمك حاج (الأسد)
وحكاياتو ..
محبتي
| |
|
|
|
|
|
|
|
|
|
Re: زواج (متعة) ..!! (Re: كمال علي الزين)
|
(*)
تحت إصرار حاج (الأسد) أتت العروس وكشفت عن وجهها ليراها ,..
ما أن وقعت عيناه الصغيرتان على وجهها حتى صاح :
شنات العدو
شنات العدو
جرم البنية تشبه (علي سيد الدكان) , لكن الوش ماغريب علي ,
وقال موجهاً حديثه لإبنه العريس:
إتا يا(جنا) البنية دي مياها الكانت لافا معاك في الخرطوم أيامي الراقد في الإستبتالية ؟
والله إبقا لي ياها ..
أسكته إبنه :
مالك يا(حاج ) ومالا دي ماياها ياخ ..
وأمسك به من يده وهو يتوجه به نحو الباب , ..
لكن (حاج الأسد) واصل حديثه :
والله ياجنا ظنيتا ياه , لكن الجابرك شنو على الشنا دي ..؟
أخذه إبنه وركبوا (الحافلة) وتوجهوا عائدين وسط غناء وزغاريد ركاب الحافلة من الحريم ..!!
| |
|
|
|
|
|
|
|
|
|
Re: زواج (متعة) ..!! (Re: كمال علي الزين)
|
(*)
ما أن وصل موكب أهل العريس حتى رن جرس الهاتف , ..
كانت العروس , وكانت غاضبة من تصرف حاج (الأسد) وتهكمه :
إنتا يا(حمادة) أبوك الراسو زي (التبشة) ده مالو سخيف كده ؟
رد حمادة:
عاجبني أبوك الكلو إضنين ده , أبوي ماليهو حق , لكن كمان برضو إنتي البخليك تفتحي
وشك ده قدامو شنو ؟
العروس:
هي ما لكن هو كان مافتحتا وشي كان ما ماشي ؟
حمادة غاضباً :
إنتي مالك إنشاء الله عنهو مامشى , لكن والله بالمناسبة كلامو صاح ياخي إنتي الخالق الناطق
(على ) بتاع الدكان , ..
العروس:
علي بتاع الدكان ده منو , أوعا يكون شين بس بزعل منك يا(حمادة) ..
العريس :
والله وشك وشو بيشبهوا بعض أنا ذنبي شنو , لكن بالمناسبة وحشتيني والله ,..
العروس :
وإنتا كمان يا(حمادة) , أها بكرة كيف , نتلاقي في الخرطوم ؟
| |
|
|
|
|
|
|
|
|
|
Re: زواج (متعة) ..!! (Re: كمال علي الزين)
|
(*)
كان (حمادة) حارس مرمى لابأس به , ترك كل شئ وتفرغ لكرة القدم ,..
كان يحلم بأن يلعب للهلال أو المريخ , وهو بالطبع لم يفلح بالدراسة ,..
بعد أن هجر المدارس , أرغمه والده حاج (الأسد) على العمل معه بحرفته (صيد الأسماك) ,
عمل معه مجبراً , لذلك كانا على خلاف دائم , وكثيراً ما يتهرب (حمادة) من مساعدة والده , ..
بعد أيام قلائل من عودتهم من مشوار الخطوبة , أصر عليه حاج (الأسد) بالتركيز على العمل معه :
إتا يازول بتدور تعرس كيفن , أنا ماعندي ليك قدرة , دحين تكرب صلبك وتنزل معاي البحر ,
البنية شينة ومعولقة وما مصدقة , لكن برضو بعدين حا تأكلا شنو ؟ إتا ما ك عارف النسوان الشينات زاتن , بياكلن ولا شنو ؟
| |
|
|
|
|
|
|
|
|
|
Re: زواج (متعة) ..!! (Re: كمال علي الزين)
|
(*)
خرج حاج (الأسد) بعد صلاة الفجر متوجها إلى البحر , قبل أن يخرج أيقظ (حمادة) ليلحق به :
قوم ياخيبان أجهز وحصلني على البحر , أنا برمي الشبكة وبرجاك تجرها معاي , وحرم كان الشبكة
بجرها نفر واحد ماني عاوز أشوف خلقتك , علا مجبور , قوم آ زول أجهز ..
تركه على سريره ومضى ,..
ورمى بشباكه في إنتظار (حمادة) , أشرقت الشمس ولم يظهر (حمادة) , ..
إنتظر حاج (الأسد ) ساعات طوال دون أن يلحق به , غضب غضباً شديداً حين تجاوزت الساعة العاشرة
صباحا ولم يأتي (حمادة) , توجه نحو البيت غاضباً , ..
في تلك الأثناء , (حمادة) قد إستقبل مجموعة من رجال الأعمال والإداريين أتوا بغرض تسجيله لنادي
(الهلال) , كان على رأسهم (لواء) متقاعد ومجموعة من الأثرياء , ..
حاج (الأسد) كان بيته يطل على شارعين , شارع يؤدي إلى البحر وبه باب صغير يستخدمه كلما ذهب إلى العمل , وباب آخر كبير على الشارع الرئيسي , ..
أتى هو لسوء حظ إبنه (حمادة) من الباب الصغير المطل على البحر , ..
ودخل على (حمادة) غاضباً , وجده يتوسط الضيوف , لم يسلم عليهم حاج (الأسد) , ..
وقف بوسطهم غاضباً ونظر إلى إبنه وضيوفه ثم قال :
خلاص لميت لي (الباطلين) الزيك وجيت ؟
| |
|
|
|
|
|
|
|
|
|
Re: زواج (متعة) ..!! (Re: كمال علي الزين)
|
(*)
رمى حاج (الأسد) بكلماته هذه من هنا , وخرج الجماعة غاضبين , ..
لحقهم (حمادة) معتذراً :
ياجماعة الراجل ده أصلو كده , بتكلم ساي , ..
لم يتوقفوا ولم يتراجعوا عن موقفهم , وركبوا سياراتهم , ..
لحق بهم حاج (الأسد) إلى الباب الآخر فوجد مجموعة من السيارات الفارهة , قال معتذراً :
والله آناس محترمين تب , لكن الجنا متعود يلما لي ناس كرور ساي زيو كده , دحين أقبلو إعتذاري
وحرم تفطروا معانا , ..
لم يردوا عليه وتحركوا وباظت الصفقة , ..
قال (حمادة) وهو يراقب سياراتهم وهي تغيب عن الأنظار , مخلفة وراءه غباراً كثيفاً :
أرح يا حاج على البحر والشبكة , أصلوا مرمي الله مابترفع ..!
توجها نحو البحر , وحاج (الأسد) سرعان مانسي مافعله وعاد يتهكم على إبنه..!
| |
|
|
|
|
|
|
| |
كمال علي الزين
هاشم أحمد خلف الله
Fathi Ali Mohammed
ادريس خليفة علم الهدي
ممدوح أبارو
فيس بوك
تويتر
انستقرام
يوتيوب
بنتيريست