هجو..حبابك يا صديقي كتر خيرك على نفاج الوفاء هذا.. و بعد.. اول مرة سمعت النور الجيلاني..و انا تلميذ في مدرسة الدويم النموذجية ..وقتها كانت كداروية..! و ايامي الأخيرة ، و انا مغادر السودان..عزمتني الجكسوية.. حفلة وداع في واحدة من حدايق قاعة الصداقة..و لم تخطرني بالفنان في تلك الحفلة العجيبة..و كان هو النور الجيلاني..!! حتى هذه اللحظة (اغالط نفسي في اصرار) انو السودان ياهو السودان الشافوا نور الجيلاني هذا..في تلك الحفلة.. بكل انسانية طلب من الحضور الدعاء بالشفاء لأستاذنا و استاذ الأجيال المختلف/المفارق.. خضر بشير..و غنى بعض من اغنياته..و اسمع اغنيات خضر بصوته..و بيني و بين نفسي ارفض ان يردد اغنياته فنان(حتى لو كان مكاشفي أو محمد).. ما عدا النور الجيلاني..لأنه اكثر من يقنعني بان يكون اكثر قربا من وجدانيات خضر بشير الفارقة..!! في تلك الحفلة.. الجكسوية بكل عفوية قالت لي: الراجل ده العاجبو شنو في خضر بشير..!!..تخيل..! و بكل نقة و زنلطحية المثقفاتية اياها.. اندحت ليك في الجكسوية لمن آمنت عدييل..قلت ليها بالعربي البسيط.. خضر بشير خال النور الجيلاني..و قلت ليها خضر بشير اول فنان سوداني استخدم آلة المندليين..و كان النور الجيلاني اول فنان سوداني يقوم يستخدم المندلين اليوناني بصورة منفردة..!! ايام الإستفتاء في يوليو الماضي.. كتبت بعض الكتابة الغريبة..و كنت اقول فيها لي ..كسوداني عادي.. تاني اقدر اسمع النور الجيلاني..و هو اكتر فنان من الخرتوم..غنى للجنوب.. من مسافر جوبا..فيفيان..ميرى..و غيرها من اغنيات كانت تتناول..المفارق و تجعل منه ثقافة شعبية تمشي بين الناس..و لأن الشعب السوداني حتى اليوم مذهول من حكاية الإنفصال دي..و لكن لو داير يتألم اكتر عشان يعرف حاجة.. خليهو يمسع جنوبيات النور الجيلاني.. على بالحلال مناحات لغاية القيامة العصر..!!
حينما غنى النور الجيلاني اغنية عبد الكريم الكابلي (يا هاجر)..اكبر الذوق السوداني قيمة التجاوز التي قدمها النور الجيلاني.. لأن طريقة المعالجة كانت تحدي كبير للغاية..و نجح فيها النور..و كنا نتمنى أن يكون كل مقلد مثل النور الجيلاني في تلك الأغنية العجيبة.. لأنو ح نكون كسبنا الحسنتين: حسنة التجديد..و حسنة الحفاظ على القديم..! في سنة 1988 حضرت حفلة للنور الجيلاني.. في سنما مدينة الدلنج..و ادهشتني احد البرقيات المذاعة..و التي كانت تقول (تحية من رابطة معجبات الفنان النور الجيلاني بقعر الحجر)..و قعر الحجر حي في مدينة الدلنج..و هو الحي الذي ترعرعت فيه امبلينا السنوسي قبل ذهابها الى الأبيض..و فيها الفردة التالتة للثنائي ميرغني المأمون و احمد حسن جمعة (هل تصدق كانوا تلاتة و تالتهم في الدلنج..و ابنائه فنانين..احدهم افضل من يقلد الكابلي و عزف معه..و الأخر افضل من يغني اغنيات عثمان حسين..!!).. في حفلة الدلنج تلك..تاني يوم اذكر كنا قاعدين لينا في تحت شجردة نيم..وواحد صاحبنا قاعد يدندن بالعود..فجأة وقف عندنا زول اصلع..و ظبط لينا العود..و كان هو الأستاذ سيلمان زين العابدين (عازف الماندلين في فرقة النور الجيلاني)..ياخي صحبنا لمن عرف قمة ذلك الزول الطيب..خت العود في متحف..و كل ما تجي تهبشو يقول ليك وين يا حبيب ..ده عود ظبطو ألأستاذ سليمان زين العابدين..!!
اليوم..و في دار الغربة القاسية..ابنتى الآنسة شروق (ثمانية سنين)..كلما نزاحمها في الكمبيوتر و نقول ليها دايرين نسمع غنا سودانية.. حافظة اتنين: النور الجيلاني و سميرة دنيا..!! سميرة دنيا لأنو كان عندنا ليها فيديو..و قلت ليها دي قريبة ابكر ادم اسماعيل.. اها لغاية الليلة بتقول ليك دي آنتي سميرة..! اما النور..ففكرتها عجيب خلاص..و قالت لي ده الفنان السوداني الوحيد العندو استايل..لأنو يوم واحد ما شافت ليها فنا سوداني بيلبس ليهو برنيطة..!!
كبر
12-22-2011, 01:32 PM
Kabar Kabar
تاريخ التسجيل: 11-26-2002
مجموع المشاركات: 18537
و دي هدية لصديقنا شهاب.. الغنية قديمة..و من اول اعمال النور الجيلاني..و الفيرشن الهنا بؤكد انو النور الجيلاني زول عندو قدرة مذهلة للمواكبة..! لدي اصدقاء و صديقات من زائير..زامبيا..الكنغو..الجابون..النيجر..زمبابيوي..و انجولا..و قاعد اطلع بيهم العالي زي السلامو عليكم..و اقول ليهم ده اخر فيرشن للجالوبة..! الغريبة ناس زائير اكتر ناس شالت فيهم المكنة دي..!!
النور عجيب و الأغنية بتاعة الجالوا الجابه كبر أخوى دى ياما ناس وقفت فيها برأس اصابعين كرعينهم (زمان كانت كرعين) يا كبر حكايات قعر حجر حلوة ياخ و الله حلاة شديده ولو فى حلة اخذت بانفاس روحي ياها قعر حجركم دى و ونسات بيت (بلية) و الكتب العجيبة و لاحقاً مكتبة نزار جلاب و هو هناك المافي شنو يا كبر!!! المهم النور الجيلاني روح تستدعى النستلوجى الشعبي البسيط و الإنسان في تكوينه البدائي ما قبل بطش السوق الرأسمالي و الإستعمار الكونيالي ، صوت حكمة رومانيه قديمة و حضارات اغريقية خالدة و كلهن أخدن رضاعتهم من أرض الحضارات للإنسان الأول في مدينة الحديد . نور الجيلاني التجسيد و المجسم للأنسان الذي يعطي و لا يبقي شي ولا يمن و لا ينتظر مكرمة أحد فهو في علالي العرفان الظاهراني سابح في سماءوات غير التي يعش معنا فيها ، يعنيه من امرنا أن يشذب روحنا و لا يعنيه جحودنا و نكراننا و ظلمنا الإنساني و هو في غنى منه . ثمة أمر أريد أن اللفت له نظر الناس هنا هو الرباط المقدس لعوالم الفنان الفاني في معناه و مغناها وسابح في عوالمه ... أشهد أماممك أن رباط ربط بين خضر بشير (فنان السماوات و الارض) وبين النور الجيلاني و بين محمود عبد العزيز ، لذا لهم عالمهم الخاص الذي يعيشون فيه و يشقون من اجله وهم في رضى تام.
ياخ شكراً ليك يا هجو يا صديقي وشكراً لكم كلكم فرد وفرده وشكراً لشقيقي القص كبر.
و ليكم :-
12-22-2011, 03:51 PM
فاروق عثمان فاروق عثمان
تاريخ التسجيل: 10-22-2010
مجموع المشاركات: 2017
هل تعلم أخى ..أن محمد نور الجيلانى ، هو زميل الدراسة .. كنا معاً قرابة السنتين فى مدرسة الأقباط بالخرطوم بحرى منذ عام 1962 .. بالفعل .. لا يمكن أن ننسى تلك الأيام الجميلة ..
ليت الفنان نور يقرأ هذه الكلمات لأذكره بالأساتذه فيصل وأستاذ يعقوب وأخوه فايز والأستاذ صديق .. وأقول له .. هل تتذكر عاطف ارجانوس هو نفسه كاتب الكلمات (ارنست) .. والشكر مرة أخرى لك يا أخى هجو .. أنا أحب أغنيته يا مسافر جوبا .. يا حليل الزمن الروّح .. عمكم ارنست
12-22-2011, 09:23 PM
سلمى الشيخ سلامة سلمى الشيخ سلامة
تاريخ التسجيل: 12-14-2003
مجموع المشاركات: 10754
الشكر وكل الشكر على معايدتك الكريمة .. وكل سنة وانت طيبة يا سلمى.. ويارب يجعل أيامك كلها سعادة وهناء .. وها نحن على أعتاب العام الجديد 2012 .. الرب قادر أن يحقق لك كل أمانيك يارب ..
أخوك ارنست
12-22-2011, 10:59 PM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
عدد البوستات: 3323 تاريخ التسجيل: 14-01-2005 محل الاقامة: كاليفورنيا، أمريكا : عنوان مكتبتى بسودانيزاونلاين دوت كم : FaceBook Page: Skype Name: اكلات مفضلة: الاسم الحقيقى: الصادق اسماعيل احمد التلفون: 13813723799 الجامعة/المعهد: الحالة الاجتماعية: Married العنوان الدائم:
الفنان المفضل: النور الجيلاني اللون السياسى: السودان الجديد النوع: Male الهوايات المفضلة: القراءة الموسيقي الرقص الوظيفة: أربي الأمل تاريخ الميلاد: اكتوبر 1967 درست المرحلة الابتدائية فى ......و سنة....: درست المرحلة الثانوية فى ......و سنة....: درست المرحلة المتوسطة فى ......و سنة....: شاعرك المفضل: محمود درويش عدد الاطفال: معلومات اضافية: مكان العمل: مكان الميلاد فى السودان: النهود، كردفان
الزمان كان سبعينات القرن الماضي، شمبات كانت في عز شبابها ومساهمتها الثرة في الثقافة والغناء والكورة، جرائد الخرطوم كتبت حينها (الخرطوم ترقص على انغام مدلينا) عبارة رسخت في ذهني وكأني أقرأها الآن.
صديقي احمد على بابكر يدعوني لسماع النور على مسجل ريل، نحن في تالتة ابتدائي، وكنا في الكشافة، أتاني هامساً (أنا عارف بيت النور الجيلاني يلاكا نمشي) كنا في زمن لا تمتلك فيه حتى شجاعة ان تطلب من ابيك ان يعطيك الإذن لزيارة كهذه، قلت له (لا استطيع) كرر الدعوة ونحن في الإجازة القصيرة في السنة الرابعة الإبتدائية، وكانت الدعوة ومعها (خطته الجهنمية)، العذر كان حاضراً (عندنا كشافة في المدرسة الشرقية) ارتدينا ملابس الكشافة وربطنا المنديل وألصقنا (التندرفوت) أو هكذا كنا نسميه، وأمتطينا (الكبك) وتوجهنا لبيت النور الجيلاني.
رحب بنا (لن انسي ابتسامته ما حييت، وقال لينا (دايرين منو) تلعثمت ولكن احمد تجرأ وقال نحن جينا دايرينك تغنى لينا، ضحك ضحكة صافية وقال (كلمتوا اهلكم، قلنا ليهو (لا) قال لينا عيب تكضبوا، لكن خلاص هسه امشو عشان ما تتأخروا وأنا (حأقدمكم، ومشى معانا مشوار كان الحديث عن الكشافة، وأحمد قال ليهو (أنا والصادق حافظين غناك كلو) قال لينا غنوا فغنينا (كداروية) فضحك ولحظتها تبدت اطراف الحي فودعنا ولكنا لم نودعه بل أودعناه في قلوبنا وإلى الأبد.
كان حينهايغني بدون المندلين، ولكننا كنا في شمبات الغربية الابتدائية نستعين بسليمان زين العابدين ومندلينه في مشاركات المدرسة في مسابقات المدارس. فكنا نري ونسمع المندلين في البروفات، وحين انضم سليمان للنور ازدادت دهشتنا ولم تنته حتى الآن.
وكانت نضال عبد الكافي ووردة (دفعات أمامنا) ولكن كنا نستمع لهم مع سليمان والمجموعة كل جمعة مع مام صفية والجد شعبان. وكانت (مذكرات فيل) نشيدنا الشمباتي الوطنى، وعندما أعاد تقديمها النور الجيلاني، كانت تزاحم المرسال ومحمود عبد العزيز فيما يطلبه جمهور الحافلات ومحلات المرطبات عامئذ.
كانت أغاني النور تشعرني بالحنين والحب وبجمال الحياة. بعد لقائي به، قررّ أبي أن يقيم حفل لخالي وزوجته (بنت خالته) في بيتنا في شمبات في الإجازة بين رابعة وخامسة، فقلت له (جيب لينا النور الجيلاني) قال لي كويس، فحسبت أن مصير النور سيكون مصير العجلة والتى وعدني بها إذا (جيت الاول) وفعلت وتأخر وعده عامين، ولكنه أنجز وعد النور في حينه، فأستمتعت بالنور لاول مرة (لايف) وفي (عُقر حوشنا). كانت ليلة لم أنم فيها حتى عانق صوت مصطفي المؤذن صوت النور، وكان (الميكرفون الذي يغني به مصطفي هو أيضاً ميكرفون الجامع (ونحمده سبحانه أن اتاح لنا أن نعيش هذا).
تابعت مسيرة النور وعندما غني يا (هاجر) اعتبرتها اجمل اغنية في تاريخ الفن السوداني. الآن أصبحت مغرماً بالموسيقى فقط لا اهتم للفنان ولا لكلمات الاغنية، ما عدا عندما اسمع النور، احببت بعده صوت (محمود) ولكن النور شئ آخر، لا يدركه إلا المحظوظون.
كنا نذهب لشراء اللبن من نفس المزرعة التى يشترى منها خضر بشير وكان اللبن يُباع تحت شجرة الزونيا، وكنا نلتف حول خضر بشير ونحن صغار (وطقطقة سبحته) تظبط ايقاع الكون وصوت دندنته يضبط ايقاع العصافير، كنا سعيدين لأننا نسمع خضر ونمتلئ جمالاً بغناء النور الجيلاني.
فأجاني محمد احمد ابقرجة ذات مساءً من مساءات أسمرا الشجية وكنا نتكلم عن الفنانين، وقلت له يعجبني في الفنانين السودانيين النور الجيلاني. فحكى لي قصة غريبة، قال أنه كان في (جنوب افريقيا) في مدينة ما ودخل إلى (حانة صغيرة) فإذا به يستمع لصوت النور الجيلاني ينساب من المسجل فأندهش واستمتع بالمفأجأة.
تذكرت النور الجيلاني يوم استقلال الجنوب وعرفت انه سيكون حزيناً وفي سرحاني ذاك اشتقت أن استمع لأغنية (دبلة شنو البدلتي بيها هواي أنا) والمشهورة حينها بي (يا وداد مليون سنة).
ليته اتحفنا بجديد من الغناء، كان من القلائل الذين يعطون للكورس (الشيالين) مقاطع من الأغنية لا يغنيها هو بل الكورس فقط، ليتنا نفرد لهم حيزاً فقد زاملوا النور كثيراً فهم يستحقون ان يذكروا لاسهامهم في هذا الجمال.
تحية لك هجو ولضيوفك
12-23-2011, 05:17 PM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
Quote: رحب بنا (لن انسي ابتسامته ما حييت، وقال لينا (دايرين منو) تلعثمت ولكن احمد تجرأ وقال نحن جينا دايرينك تغنى لينا، ضحك ضحكة صافية وقال (كلمتوا اهلكم، قلنا ليهو (لا) قال لينا عيب تكضبوا، لكن خلاص هسه امشو عشان ما تتأخروا وأنا (حأقدمكم، ومشى معانا مشوار كان الحديث عن الكشافة، وأحمد قال ليهو (أنا والصادق حافظين غناك كلو) قال لينا غنوا فغنينا (كداروية) فضحك ولحظتها تبدت اطراف الحي فودعنا ولكنا لم نودعه بل أودعناه في قلوبنا وإلى الأبد.
عليم الله انى بكيت لما كتبته يا الصادق ما اجمل ان نحب ما احلى حياتنا الكانت كنت مثلك لكنى كبيرة فى معهد الموسيقى والمسرح يومها العام 83 عدت مساء ذلك اليوم من المعهد انزلنى البص قدام البيت كانت الساعة تجاوزت الثامنة بقليل لم يكن مسموحا لنا ان نخرج حتى فى تلك السن دون مشورة الاهل ...! وجدت خالى عبد الرحمن وخالى فتح الرحمن المتيمان بحب النور الجيلانى مثلى ومثلك قالا بصوت واحد ـ حفلة بالنور الجيلانى قلت ـ لكن لازم ارجع البيت واكلم حفيظ خالى قالا ـ نحنا ما عجبنك ؟ قلت نمشى مشيت وكنت ارتدى بنطلون التدريب وحذاء"كاوتش بتاع التدريب " مشيت معهما ورقصنا الى ان كاد يغمى علينا لم نأبه للعشاء ولا الحضور لكننا كنا فرحين ان النور فى العباسية وفى بيت جيراننا " ناس سعاد الفاتح " كانت حفلة مدهشة حين عدنا وجدنا خالى حفيظ يفور من الغضب قال ـ كنتو وين ؟ قلنا ـ فى حفلة ناس سعاد الفاتح قال موجها الحديث ناحيتى ـ ومشيتى كدا ؟ كان تجى البيت وتغيرى على الاقل قلت له ـ لكن الحفلة ما بتكون انتهت ضحك وقال ـ دا حب عجيب البوديك الحفلة بهدوم التمرين هو ذا النور الجيلانى حبيبى الذى التقيته مرة واحدة كنا "قاطعين الكوبرى النيل الازرق معاى عميرى جايين من وزارة التربية والتعليم فى نهاية الكوبرى حيث تلك اللافتة المكتوب عليها "انزل من الدراجة " وقف عميرى وصاح فجاة ـ النور وقف النور وسالمناه كان يرتدى طاقية من الفرو لونها بنى وشعره ينسدل من خلالها اقلنا من هناك الى الااذاعة ومنذ تلك اللحظة لم التقيه الا يوم احتفال اطلاب بالدفعة الجديدة العام 84 وكان مجيئه نزولا على رغبة الصديق المحب للنور الجيلانى بدرالدين الشين ياخ بحب الزول دا حب الله يحفظه لينا
12-23-2011, 10:54 PM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
سلام لكل المتداخلين وصاحب البوست الرائع ياجماعه ده اسمو شنو توارد خواطر حُسن نية النور الجيلاني الخلت الناس دي من غير رابط تتوافق وتوافق على كل ماجاء في هذا البوست توارد الخواطر القلتو ليكم امس القريبة دي وانا شغال سرحت بعيد جدا في السودان الماهنا وفي ايام خلت وتذكرت النور الجيلاني والذي زاداعجابي به يومها لادبه وحفظه لحقوق الاخرين وكلامه الرفيع المتزن وسهرته مع الرائع صلاح طه في منتصف التسعينات وحاوره صلاح طه حول اغنية في عز الليل ياهاجر وقال بالحرف والذي تذكرته امس وفؤجئت بهذا البوست اليوم قال يااستاذ انت غنيت في عز الليل ياهاجر وغناها الاستاذ الكابلي فلنستمع لهذه الاغنية من النور ولنترك الجهور يحكم بينكما والله النور ده اليوم داك انا ماشفت مؤدب ولا مثقف ولا متواضع زيو في هذا الرد المفحم قال بالحرف الواحد انا في الحقيقة اعجبت بهذه الكلمات والاغنية من الاستاذ الكابلي واستاذنت اخونا الشاعر التيجاني واستاذنت الاخ الكابلي في ان اغني هذه الاعنية اما الاخ كابلي فهو قامة لا استطيع الوصول اليها ولكن كل يغني بلونيته فصفق الجمهور بهذا التواضع الجم والادب قبل سماع الاغنية (مش زي الببغاوات بناعين الزمن ديل يلقطوا في العدادات وماعارفين شاعر الاغنية خليك انو يستاذنوه ويستاذنو الفنان ) لك الله الفنان جدا النور الجيلاني
12-24-2011, 07:17 AM
نادر النور آدم نادر النور آدم
تاريخ التسجيل: 04-29-2010
مجموع المشاركات: 1126
النور الجيلاني احساس سوداني فريد يضمخ كل أيامنا ويعانق كل ذكرياتنا ويهبش في كل الحتات الحنينة جوانا .. نسأل الله أن يحفظه ويمتعه بالصحة والعافية
والاقتباس ادناه حصل في 2006
Quote: الحصل إنه كانت أغنية النور الجيلاني (كدراوية) طالعة في الجو موضة وكدة ونحن كان معانا مندلين والعازف (عصام) معجب بالنور الجيلاني وتعال شوف كدراوية اشتغل فيها بضمير وكنا بنغني فيها مجموعة شباب كان في جماعة رحلة معسكرين جنبنا وصلو عندنا في آخر مقطع في الأغنية يا دوب انتهينا قامو بذوق كدة قالو يا ريت تعيدوا لينا الأغنية ما في مانع ومرة تااااااااااااانية كدراوية وعصام مبسوط انتهينا من كدراوية وغنينا وراها أكتر من أغنية جو جماعة تابعين للجماعة الأوائل بما فيهم العريس والعروس وبعد تبادل الهمسات مع جماعتهم قام العريس طلب مننا كدراوية وتااااااااااني وهكذا أعدنا كدراوية حوالي خمسة مرات (عصام بصراحة خطر في المندلين)
كل سنه وانت طيبين في ربوع السودان الجنوبي والسودان الشمالي النور الجيلاني مع اول عيد والبلد بقت بلدين جانا العيد وفيفيان بعيده جانا العيد وميري وين و ضاعت وين سافرت وين جانا العيد واتوك حاضن التيك جانا العيد وما عندنا باباي جانا العيد لاتودع الخرطوم لا تقوم جوبا حانا العيد لاروح روحك لاروحه جانا العيد ونحن رايحين وتايهين ووطن مجروح
ميري كرسماس
12-24-2011, 08:28 PM
عماد شمت عماد شمت
تاريخ التسجيل: 12-02-2004
مجموع المشاركات: 3857
الذكري المنسيه وصحو الذكري نشوف علي عبد الفتاح في الهلاك الاعلامي ساحات الفداء وقايدو خليل بعد ما تعدي مواسم بيبقي هالك من بعدك الدنيا بقت ماسي في صجو الذكري المنسيه السياسه ودرت الشهدا والبشير في الذكري المنسيه عصفور في لاهاي انا شوقي ليهو في مواسم ما منسيه علي جسب قول فيفيان في لاهاي ابديه الرحله طويله والمسافه بعيده لكن لاهي قريبه قريبه الرحله طويله ياريتو اوكامبو يسويها مع الاعتذار للمتداخلين دي تخريمه مني والاعتذار للاستاذ النور الجيلاني البوست في حب غناء االنور الجيلاني
12-26-2011, 01:24 AM
Haju Muktar Haju Muktar
تاريخ التسجيل: 10-25-2011
مجموع المشاركات: 5149
الذكري من الماضي والامانه من الروح والروح من الذات الالهيه لابتموت لابتفوت بس بتصعدوالصعود باءذن من البارئ وخليل مشي في درب النضال والنضال والفن صنوان والنور الجيلاني نبي السودان من غناهو في بلد مجروح ببحث عن الامانه وهو تايه وعطشان وداير الامان شكرا النور الجيلاني
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Haju Muktar
Kabar
Shihab Karrar
عبدالله ود البوش
سفيان بشير نابرى
فاروق عثمان
Sudany Agouz
سلمى الشيخ سلامة
طارق جبريل
عصام دهب
الصادق اسماعيل
أحمد ابن عوف
أمين محمد سليمان
ELSADIG ALI HASSAN
عادل خياري
نادر النور آدم
بخاري عثمان الامين
mekki
عماد شمت
فيس بوك
تويتر
انستقرام
يوتيوب
بنتيريست