|
Re: قصتي مع المدرب العالمي الذى كاد ان يكون سببا في طردي من كلية الحقو (Re: الطيب شيقوق)
|
بعد تناول الافطار والشاي والقهوة قام المدرب العالمي مخاطبا الجماهير ( طبعا النسوان واقفات وراء صريف القش المعمول حوش للديوان و بعاينن برقراق القش ) مبينا لهم ان إستراتيجيته التدريبية ترتكز على المحاور الاتية :-
اولا : ان يأخد جولة داخل القرية للوقوف على معالمها ومن ثم التحرك الى ميدان التدريب للتأكد مما إذا كان مستوفيا للمعايير المطلوبة . ثانيا : عقد لقاء تنويري مع فريق القرية الرياضي يطلعهم فيه على خططه و إستراتيجياته التدريبية . ثالثا : إجراء مباراة ودية بين فريق قرية السريفة الذى تعاقد لتدريبه وفريق قرية البردانة الرياضي حتى يتمكن من معرفة مواطن القوة والضعف في فريق قرية السريفة ومن ثم الاتجاه لاصلاح مراكز الضعف فيه . ثالثا : مشاهدة فرق الاشبال بالقرية للتعرف على ما يملكون من مهارات يمكن ان يغذى بها الفريق الاول مستقبلا .
رابعا : مراجعة الموقف المالي للفريق والبحث عن موارد جديدة يمكن ان تزيد من إيراداته . هلا هلا بعد إجراء بعض التدريبات لفريق كرة القدم قرر المدرب العالمي السفر للخرطوم مع اخينا الملازم أحمد الجراى .
نواصل
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: الطيب شيقوق)
|
كنت آنذاك طالبا في السنة الثالثة بكلية الحقوق جامعة الخرطوم و ساكنا في داخلية فلسطين التى يفصل بينها وكلية الحقوق شارع الجامعة .
كان صديقي الملازم وقتها احمد الجراي يزورني في الداخلية احيانا وهو لابس كاجوال لأن العساكر كانوا وقتها يتحفظون من دخول الحرم الجامعي بملابسهم العسكرية . كانت الساعة السادسة مساء عندما كنت جالسا مع بعض الزملاء على النجيلة ونحن نرتشف شاى المغربية من البوفيه الذى يتوسط ثلاث داخليات . وبينما كنا جالسين بالعراريق والسراويل الطويلة أتاني احد الزملاء مهرولا وأبلغني بوجود ضيفين في عنبري احدهم سوداني والثاني ليس بسوداني ولكنه من الدول العربية . كرطعت الكباية سريع وإستأذنت الزملاء ثم توجهت الى العنبر . وجدت صديقي احمد ومعه ذلك الضيف . رحبت بهما ونزلت للبوفيه لاحضار شاى إليهما ثم عدت وبدأت حديثي مع الاخ الملازم احمد الذى عرفني بالضيف المرافق له ثم رحت متسائلا عن احول اهلنا في الدندر وكيف الخريف معاهم وكيف حال البهائم شبعانة ولا ضارباها السوفة ؟
كان الضيف الاجنبي يتلفت يمين وشمال غير آبه بما يدور بيننا من حكي وبعد ذلك طلبت من الاثنين ان يذهبا معي لكافتيريا النشاط لتناول بعض المشروبات الراقية وكدا .
ذهبنا الى كافتيريا النشاط وكان ضيفنا الوجيه متهندم هندمة شغلت ابصار الجكس الجامعي .
طلبنا الحاجات الباردة والايسكريمات وكدا . كان المدرب العالمي بتونس معانا بصوت منخفض أكان ما رخيت اضانك ما بتسمعو ذاتو يبدو دا لزوم البرستيتش وكدا والطلبة والطالبات بعاينوا لينا ساااااااااااااى .
بعد إنتهت الجلسة التفاكرية هذه قررنا العودة الى الداخلية لتناول وجبة العشاء في الصفرة الما خمج . طبعا زمان لو جوك عشرة ضيوف ممكن تخمهم كلوووووووولهم وتتلهم بيهم صفرة الجامعة وكل طالب بخمش ليهو صينية وبتلهم بيها الاطعمة ويختار البعجبو من الارزاز والشعيريات والالبان والطحنيات والكبود . الحاجات الوحيدة الما شفتها في الصفرة كبدة الابل النية والعتي .
يا زول المدرب العالمي خمش ليك الصينية ودبل ليك من كل صنف وقام سألني قال لي الاكل دا كدا كل يوم وفي كل وجبة ؟ قلت ليهو نعم . قال لي بتدفعوا عليهو ؟ قلت ليهو لا ابدا دا كلو ملح ساااااااااااى . ملح إزاى – يعني مجانا . الراجل اتكيف كيف ما عادي . اكلنا زيييييييييين ومشينا الداخلية لزوم الراحة وكدا .
بعد شبعنا ونسة مع المدرب العالمي عن الدندر وكدا والصعاب التي واجهته في الرحلة الى قرية السريفة وطلوع الخيران ( قام الاخ الملازم احمد بطلب السماح لهما بالمغادرة ولكن المدرب العالمي قاطعه قائلا ( يا اخي احمد اعذرني انا تاني ما بقدر ارجع بلدكم وبحاول اقعد مع الطيب دا هنا في الجامعة لحدى اجد لي فريق رياضي خرطومي لتدريبه ) الاخ احمد ألحّ عليه بالذهاب معه لمكان اقامته لمزيد من التفاكر حول الموضوع ولكن دون جدوى.
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: الطيب شيقوق)
|
المدرب حرن طب من المشيّة مع اخينا الملازم احمد وقد اصرّ على الاقامة معي في الجامعة . بالجد كدا اصرار المدرب العالمي على البقاء معي في الداخلية ازعجني جدا .
الطالب في الداخلية مخصص ليهو سرير واحد ولو انا اتحملتو وقبلت بمبيتو معاى لاكثر من يوم قد يسبب مضايقة للزملاء الذين يسكنون معى في العنبر. العنبر مخصص لأربعة طلبة فقط والسراير معدة بنظام طابقين ( سرير دور ارضى وسرير آخر يعلو السرير الارضي ) . طبعا نوع السراير دا مزعج جدا لانو اكان ربنا قسم ليك تسكن مع واحد بتقلّب كتير عينك ما بتغمض للصباح وكان كمان بقى زول بجوعر مع الشخير وا شقاوتك .
صحيح بيحصل أن نستضيف بعض الاصدقاء والاهل الذين يأتون بين الفينة والاخرى ويمكن للطالب الحصول على سرير فاضي بسبب غياب صاحبه ومرات بتكون في مراتب زائدة ممكن تخمش ليك واحد وترميهو في البلاط وتنوم . بس الشغلانية دي ممكن ليوم او يومين او حتى اسبوع اما ان يأتيك واحد وكمان غريب وبعد غريب كمان اجنبي وبعد اجنبي كمان مدرب عالمي فهذا محتاج لأن تقيف ليهو الف احمر عشان تستر حالك معاهو .
المهم في اليوم الاول نوّمتو في سريري وذهبت للمبيت مع بعض الزملاء . ولما جيت الصباح بدري للعنبر لقيت المدرب العالمي ما موجود وسألت منو الزملاء وقالوا لي زولك مشى على الصفرة عدل لزوم شراب الشاي . بيني وبين نفسي قلت عييييييييييك الزول لقى البلد مخرّف وعايز يستكين معاي طااااااااااااب . انتظرتو لحدى ما جاني راجع وحكى لي بأنه مستعجل وطالع بدري يدوّر ليهو لشغل في الخرطوم ويجيني راجع المساء قلت ليهو خير . قال لي اليوم المساء ما ترتبط بأي حاجة انا عازمك مع زملائك المعاك في العنبر في فندق راقي جدا على شاطئي النيل . قلت ليهو خير بحاول ابلغهم بالدعوة واوريك بعد ترجع . يا زول انا فرحت فرحة ما عادية قلت الزول دا باقي لي متروس فلوس ودعواهو للاخوان دي بتخليهم يقبلوا إقامتو معاى لاي فترة .
المدرب العالمي إتلبس سمح وإتعطر سمح وطبق حقيبتو وإتلهم المدينة .
نعم لقد غادرنا المدرب العالمي في صبيحة ذلك اليوم وترك بعضا من لوازمه الشخصية في عنبرنا بالداخلية . لم يعد الينا في مساء ذلك اليوم ولم ندر الى اين كان متجها ولم تكن ثمة وسيلة للاتصال به للاستفسار عن مكانه او متى سيعود الينا . تملكنى شيئ من القلق على المدرب العالمي ( انسان ضيف وضيف غريب وضيف اجنبي ومدرب عالمي يا رب احفظه من كل شر) هكذا كان لسان حالي يقول .
لم يعد الينا في صبيحة اليوم الثاني وقد تملكتنى الحيرة . هل اذهب للشرطة للتبليغ عنه ؟ لا لا احسن الصبر الراجل دا يمكن يكون عنده اهل او علاقات في الخرطوم فربما يكون مع أي من معارفه . دعنى انتظر حتى مساء ذلك اليوم . تحركت في ذلك الصباح للمحاضرات في الكلية التي يفصل بينها وداخليتنا شارع الجامعة كما اسلفت . كنت شارد البال قلقا على ضيفي . كانت كيستي الطالبة معنا تحكي لي ولم يكن تفاعلي معها بالطريقة المألوفة لديها . بدأت عيونها ترسل اشارات حيرة وإستغراب ( مالك يا الطيب حاسي بيك اليوم ليس بطيب الامس شنو الحصل ؟ بعتني ؟ بدلتني ؟ سمعت ولا جابوا ليك؟ دا كلو ما حصل يا أميرة - انت حاشاك البيع - الحاصل اني منزعج من ضيف غريب واجنبي جاني في الداخلية وترك موجوداته الشخصية في عنبرنا وطلع ولم يعد الينا حتى الان .
قالت لي ما تقلق ياخ بيكون مع احد معارفه .
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: الطيب شيقوق)
|
Quote: البرق شغال وشغال وجاب ليهو سحابة سوداء خاميها من قدام ومتلهّم بيها قرى الدندر . والمدرب نائم يشخر ساى . بعد نص ساعة تسمع الزنك طق طق ( بفتح الطاء وتسكين القاف ) بداية المطرة وبعد شوية الطق طق زادت حجما وإنهمارا و عملت صخب و ضجيج شديييييييييييد ويبدو مع الموية ذاتا في حبات برد عندما تقع في الزنك وكأنو حجر شتروا بيهو الزنكي مما زاد من انزعاج وقلق المدرب العالمي. غزارة صبيب المطرة جعلت سقف الديوان يمتلئ موية وبدأ يصب داخل الديوان . المدرب قام منزعجا من النقيط بتاع الموية على سريره وصار محل ينزوى في الديوان الموية لاحقاهو تنقط فيهو وكمان طلع من الناموسية الباعوض يقرص وينوني ليهو في اضنيهو . المسكين غلبو النوم وظل صاحيا مرهقا وحزينا للصباح . |
عرفت كيف الكلام دا كلو كت وين الساعة ديك
عاوزين المصدر
__________ العيد مبارك علينا عليكم وكل سنة طيبين طيبين
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: الطيب شيقوق)
|
انتهت فترة الدراسة وعدت الى الداخلية . تناولنا وجبة الغداء وإتلهمت سريري . وكلما تصاف عيوني عفش المدرب العالمي في العنبر يعاودنى القلق مرة اخرى . تحركت وقت العصرية الى الميدان الشرقي للجامعة حيث تقام مبارة بين فريق طلاب كلية الاداب وطلاب كلية الاقتصاد . أنتهت المبارة بفوز فريق كلية الاداب .
عدت للداخلية وتاني عيني وقعت في عفش المدرب العالمي وتاني الهواجس عادت . أمسكت بكتاب وبدأت اتصفح فيه وفي تلك الحظة جاءني الملازم احمد ابراهيم الجراي لزوم السلام على المدرب العالمي - اخبرته أنه خرج منا قبل يومين تاركا بعضا من موجوداته معنا في العنبر ولم ندر اين ذهب ولا كيف نتصل به لنمطئن على حالته .
أحمد قال لي ما تنزعج ياخ المدرب دا غالبا يكون ذهب لأحد اصدقائه في جزيرة توتي . أتونسنا انا والاخ الملازم احمد حتى الساعة العاشرة مساء . بعد ذلك قرر الاخ احمد الذهاب الى مسكنه في بري ودعته وعدت للنوم .
الساعة 12 ليلا سمعت حد ينقر على الباب ... من هذا يا ترى ؟
فتحت الباب وكان العائد الينا - والحمد لله - هو المدرب العالمي . عاد الينا وكان يحمل مظروفا منتفخا .
أين ذهبت اخي محمد؟ لقد اقلقني تأخيرك
آسف أخي الطيب فقد كنت ابحث عن فريق رياضي لتدريب لعيبته وقد حصلت على اكثر من عرض لكنها غير مجدية .
افرغ المظروف في سريري وكانت محتوياته عبارة عن صور فوتوغرافية لبعض العوائل المعروفة في الخرطوم وامدرمان وبحري وخطابات كثيرة جدا تعمد فتحها امامي وكانت اغلبها رسائل عاطفية وخطابات من طلاب يدرسون بالخارج لذويهم في السودان .
من اين لك بهذه الخطابات اخي محمد؟
عليك ان تقرأ وتتصفح وتستمتع بس اما من اين لي بها ..... سكت وكأنه يريد ان يقول لي هذا ليس من شأنك .
لكن دى اسرار وحاجات خاصة بأسر وعائلات وطلبة يدرسون بالخارج كيف لي الاستمتاع بتقصي اسرار الناس يا محمد ؟
لا تنزعج اخي الطيب طول بالك وحتشوف ألف خير - كان ذلك هو رد المدرب العالمي .
قام المدرب العالمي بوضع ذلك المظروف داخل دولاب ملابسي .
سحبت له المرتبة من السرير وطرحتها له ارضا لينام عليها وافترشت البطانية على السرير ووضعت المخدة تحت راسي ونمت سريعا من شدة التعب .
الواطة اصبحت و صلينا الصبح وبعد شروق الشمس ذهبنا الاثنان الى الصفرة لتناول الشاي .
اثناء ما كنت بجهز في نفسي للخروج للكلية قال لي انه مصمم للذهاب لمدينة بحري بحثا عن فرق رياضية محتاجة لخبير تدريب رياضي .
خرج قبلي تاركا جميع لوازمه في عنبرنا بما فيها المظاريف التي اودعها داخل دولاب ملابسي .
تحركت انا للكلية وفي بالي الكثير من التساؤلات ....
عاد الينا المدرب العالمي في وقت متاخر جدا حاملا ايضا مجموعة من المظاريف والخطابات البريدية وكميـــــــة من الورق الابيض في حجم A4 .
كان المدرب العالمي قد لاحظ ان مذاكرتي للمواد الاكاديمية تعتمد على القراءة والكتابة في آن واحد وعادة ما استعمل ورق ابيض مستعمل ( يعني بكتب على ظهر اوراق مستعملة لتركيز المعلومة ) . قام اهداني باكتتين من الورق الذى احضره معه . يا زول انا فرحت طب بالهدية لاننا اوشكنا ان ننتهي من الامتحانات ومن ثم السفر للاهل لقضاء الاجازة بالدندر . فالورق من طراز a4 ممكن ان اهديه لشيخ الوالدة بقريتي البردانة (الشريف عبد الله ود الخليفة) التي إعتادت زيارته قبل نتيجة الامتحانات عشان يكشحا بفاتحة مهولة تعمي ابصار الاستاذة الذين يقومون بتصحيح الامتحانات . فالورق من طراز a4 يستعمل من قبل مشائخنا وجميع مشائخ الصوفية لكتابة البخرات والحجبات . البخرة عبارة عن ورقة يتكب عليها الشيخ آيات قرآنية وتطبّق في شكل مكعبات وتعطى للمريض او المعيون عشان يمشي يولع النار في المبخرة ويرمي عليها البخرة بتاعة الفكي ويغطي نفسه ببطانية والدخان عاكل جواها نامن تقح قح قح قح من اثر الدخان بعد داك بقولوا الشيطان بيطير منك طوالي .
استلمت الورق من المدرب العالمي . بعد داك المدرب العالمي تاني إتلهم الدولاب ووضع المظاريف التي احضرها مع مظاريف اليوم الاول . وبعد الناس ناموا قام فتح المظاريف امامي وكانت ايضا تحمل صور ورسائل من الخارج الى بعض الاسر في السودان .
يا ربي المدرب العالمي دا بجيب الحاجات دي من وين وعايز يعمل بيها شنو ؟
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: Kostawi)
|
Quote: طيب إنتو لو ما عندكم زيتون و عضات زي دي الجابكم تزاحمونا في الخرطوم شنو و تسكنوا مجاني و تاكلوا أكلنا مجاني و كمان تعزموا الأجانب ياكلو مجان |
اخخخخخخخخ دي الانقاذ ياخ مافي حكومة ورتنا انكم منغنغين غيرها - اتاريكم الزمن دا كلو تنغنغوا على حسابنا؟
Quote: ما تخليكم في خيرانكم المطينة دي بعيد مننا
نحن حبينا في النجيلة و بلنا في البلاط تقول لي زنكي بنقط! و لعوت! |
هههههههههههههههههههها كتلتني بضجكة يا مسنووووووووووووووح
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: الطيب شيقوق)
|
إستمر المدرب الاجنبي مواصلا في سيناريوهات خمش المظاريف البريدية لفترة اسبوع تقريبا .
المفجأة ان طالعتنا بعض الصحف في صبيحة يوم من الايام وهي تحمل عناوين عريضة على صفحاتها الاولى مع صورة المدرب العالمي معروضة عليها وهي تقول :
الصورة أعلاه لمواطن اجنبي من دولة شقيقة تعامل مع مجموعة من السودانيين بأسماء مختلفة منها ( محمد مجدى و منصور سراج واحمد زيدان) وفي تفاصيل الخبر يقول : هذا الشخص يحمل مفتاح سحري يستطيع ان يفتح به كل صناديق بريد الخرطوم ليسرق كل محتوياتها كما انه إحتال على الكثير من الاسر ونهب منها مصوغات ذهبية واموال نقدية وقد تم القبض عليه في شرطة القسم الاوسط الخرطوم فعلى من تعامل معه او عرفه عن قرب الاتصال بشرطة القسم الشرقي بالخرطوم فورا . تخيلوا وانا في جو إمتحانات صعبة جدا افاجأ بهذه الكارثة . كل من إطلع على الصحف وقرأ هذا النبأ من أصدقائي الذين شاهدوا المدرب معي اتاني مندهشا وهو يطلب مزيد من الايضاحات حول كيفية تعرفي به وكيف اتاني للداخلية . بالجد اصبت بحالة من الهستيريا ولم ادر ماذا افعل .
المهم اتمحنّت جنس محنة واتصلت ببعض الاخوة من الطلاب النجاض . الجميع كان رايهم أن اذهب لقسم الشرطة واروي لهم قصة علاقة المدرب العالمي معاى دي كيف بدت واين انتهت ؟ وكمان قالوا لي شيل معاك المظاريف البريدية كمعروضات وبعض الطلاب الفيهم فائدة قالوا لي ابشر بالخير نحن بنشهد ليك بشرط يجي الملازم احمد الجراي عشان تكون شهاداتنا سكين في ودكة ( سمعتوا بي سكين في ودكة دي ؟) . يعني شهادة مسبكّة .
يا زول بيني وبين نفسي قلت كلام اسلم نفسي للشرطة دي دا كلام ني بالحيل وكلام اولاد بندر سااااى وديل حيورطنى احسن افكر لي في درب تاني للمخارجة .
انقروا عملت شنو ؟
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: الطيب شيقوق)
|
مــولانـا ود شـيـقـوق
ســلام ومـتابـعـة
بـس مـسـؤل من الـخـيـر الكلام دا كان سـنـة كـم؟
الـداخـلـيات الـبتتـكلم عـلـيـها دى أسـماءهـا أيـامـنا كانـت مـخـتـلـفـة. وكل الداخـلـيات كانت تـسـمى بأسـماء الأنـهـار. الورانيات الأثـنين كان أسـمـهـم الـدنـدر والـرهـد واللا الزراف. بعـدين الـجـنب مـيـدان الباســكـت كان إسـمـهـا الـقانـون, والـسـر أنها كانت كلـيـة القانـون لغـايـة سـنة 1966 بعـديـن بقـت مـكتب عـمـيـد وشـئون الطلاب والمكتـب التنفيذى لإتـحاد طـلاب جـامـعـة الـخـرطـوم.
Quote: ذهبنا الى كافتيريا النشاط طلبنا الحاجات الباردة والايسكريمات وكدا . |
نـحـن زى دا مـاسـمـعـنا بـيـة يامـولانا. عـلى أيـامـنا كان الشـائ والـقـهوة والليـمون. والـبـيـبسـى كـولا والمـيرانـدا والفانـتا والبـيزيانـوس. ومـرة مـرة عـمك السـر يـعـمل كاكاو. ودا كان يـوم الـجمـاعـة يـسـوقـوا الـخـلـطات بتاعـتـهـم وبـعـديـن يـمـشـوا يـزبـلـوا ودى كلـمة يـدعـى كـل مـن جـعـفـر عـباس أبـوالجـعـافـر ودكـتور نـورالـديـن سـاتى أنـو هـو الناجـرا. والـسـبب يامـولانـا أنـو الجـماعـة بـعـد مـايشـتروا للخلطات (بكلامـكـم الـجـكـس) يمشـوا يقـعـدوا على سـور زريبة مسـتشـفى مصـلحة البيطـرى (مكان شـعـبة المعمار (لغاية 1980 لامن سافرت من السودان) وكانت حـائط طيـن يـزبل كل عام فى إنـتظار الخـريـف. بعديـن تكـتـمل الـزبالـة بروائح مخلفات الخـرفان والبقـر والغـنـم والحـمـير الله يكرمك. وكان يسمى أيضـا حائط المبكـى عـشـان مرات الواحد يجى يلقى الخـلطة بتاعـته مـع زول تانـى وماتديـه حـتى السـلام. وكان أيضـاالمكان المفـضـل للشـواكـيـش من أى مـن الطـرفـيـن وهـاك يـابـكـا وهـاك يـانـحـيـبّّ!!! أفــــو!!!
الـمـهم يازول الـبـوفـية الـفاهـم كان كـشـك قـدام داخـلـية الـحـقـوق تـحـت شـجـرة اللـبـخ الكبيرة. وكان فيه عـصـير منـقـة فـاهـم. أيام الطـمسـة الـحلمـنـتـيـشـية كان عـندى فيـه قـصـيـدة حـلمـنـتيـشـيـة نـشـرناهـا فى مجـلـتـنا الـحائطـيـة الكاريكـتيـريـة الحلمنـتيشـية ســلامـات اللـى أسـسـهـا قـبلنا بسـنيـن بروفيسـور محـمـد عـبدالله الريـح (حساس) وخـلفه دكتـور عـثمان عـبدالمجـيـد (عـصـمصـم) ودكـتور محـمد بشـير حامـد وبروفيـسـور طـه أميـر والوليـد نـصـر الـحاج عـلـى ومـرات مـرات كنـت بسـاهـم.
أهـا يوم بتـذكـر ليك الـقصـيـدة بتاعـة الخـلـطـة وعـصـير المنـقـة والـتـمباك والمـدافـرة بـتاعـة خـمـسـة خالطـيـن ليـهـم واحـدة وكـتبتـهـا بلـسـان أخـونا الحـسـه بـقى زول مـهـم الله يـطـراه بالخـيـر.
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: عبدالرحمن إبراهيم محمد)
|
البروف عبد الرحمن إبراهيم
ألف مرحب بيك وشكرا للمتابعة
Quote: بـس مـسـؤل من الـخـيـر الكلام دا كان سـنـة كـم؟ |
الكلام كان سنة 81 -82 من القرن الماضي
Quote: الـداخـلـيات الـبتتـكلم عـلـيـها دى أسـماءهـا أيـامـنا كانـت مـخـتـلـفـة. وكل الداخـلـيات كانت تـسـمى بأسـماء الأنـهـار. الورانيات الأثـنين كان أسـمـهـم الـدنـدر والـرهـد واللا الزراف. بعـدين الـجـنب مـيـدان الباســكـت كان إسـمـهـا الـقانـون, والـسـر أنها كانت كلـيـة القانـون لغـايـة سـنة 1966 بعـديـن بقـت مـكتب عـمـيـد وشـئون الطلاب والمكتـب التنفيذى لإتـحاد طـلاب جـامـعـة الـخـرطـوم. |
صحيح يا بروف كل الداخليات سميت باسماء انهار بس في ترهاقا وفلسطين - ترهاقا لطلاب الهندسة وفلسطين دي لخليط من طلبة الكليات - فلسطين وبحر العرب مواجهات كلية القانون الفاصل بينهم هو شارع الجامعة .
Quote: نـحـن زى دا مـاسـمـعـنا بـيـة يامـولانا. عـلى أيـامـنا كان الشـائ والـقـهوة والليـمون. والـبـيـبسـى كـولا والمـيرانـدا والفانـتا والبـيزيانـوس. |
يا ريس زمنكم الكمبيوتر قالوا بعرف كل شىء لكنو ما عرف الحلا
Quote: وكان يسمى أيضـا حائط المبكـى عـشـان مرات الواحد يجى يلقى الخـلطة بتاعـته مـع زول تانـى وماتديـه حـتى السـلام. وكان أيضـاالمكان المفـضـل للشـواكـيـش من أى مـن الطـرفـيـن وهـاك يـابـكـا وهـاك يـانـحـيـبّّ!!! أفــــو!!! |
هههههههههههها اولاد الضهاري يا بروف ما بقربوا للمحلات البتكرطع الريق دي ، بخلطوا في السهلة ساى سدا للذرائع شفت كيف؟
Quote: الـمـهم يازول الـبـوفـية الـفاهـم كان كـشـك قـدام داخـلـية الـحـقـوق تـحـت شـجـرة اللـبـخ الكبيرة. وكان فيه عـصـير منـقـة فـاهـم. أيام الطـمسـة الـحلمـنـتـيـشـية كان عـندى فيـه قـصـيـدة حـلمـنـتيـشـيـة نـشـرناهـا فى مجـلـتـنا الـحائطـيـة الكاريكـتيـريـة الحلمنـتيشـية ســلامـات اللـى أسـسـهـا قـبلنا بسـنيـن بروفيسـور محـمـد عـبدالله الريـح (حساس) وخـلفه دكتـور عـثمان عـبدالمجـيـد (عـصـمصـم) ودكـتور محـمد بشـير حامـد وبروفيـسـور طـه أميـر والوليـد نـصـر الـحاج عـلـى ومـرات مـرات كنـت بسـاهـم. |
لله درهم - اعتقد من هولاء من قضى نحبه - هل الوليد ابن البروف نصر الحاج على مدير جامعة الخرطوم سابقا؟
Quote: أهـا يوم بتـذكـر ليك الـقصـيـدة بتاعـة الخـلـطـة وعـصـير المنـقـة والـتـمباك والمـدافـرة بـتاعـة خـمـسـة خالطـيـن ليـهـم واحـدة وكـتبتـهـا بلـسـان أخـونا الحـسـه بـقى زول مـهـم الله يـطـراه بالخـيـر. |
أكرمنا بالقصيدة دي يا بروف إن كانت عالقة في الذاكرة او في احدى ملفاتك
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: الطيب شيقوق)
|
في الحقيقة كان للمرحوم الراحل مولانا الباشمهندس محمد احمد حجاز - طيب الله ثراه - دور لا ينسى .
طيب من هو الراحل محمد أحمد الحجاز هذا؟
رجل قيادي إسلامي اصوله في بربر ولكنه ولد وترعرع في مدينة سنجة . كان رئيس إتحاد الطلاب المسلمين في لندن . أكمل دراسة الماجستير في الهندسة المدنية هناك ثم عاد للسودان للعمل في سكك حديد السودان ومنها إنتقل للعمل كشريك تجاري للرجل المثير للجدل محمد عبد الله جار النبي الذى آلت إليه كل أصول شركة شفرون عندما قررت الاخيرة ترك التنقيب عن النفط في السودان في أعقاب تطبيق الشريعة في السودان . كان الشريكان ( حجاز وجار النبي) يعملان معا في تجارة البن بين السودان وأوغندا عن طريق البواخر النيلية .
للراحل الحجاز علاقة بأسرة شيقوق وكان ويزورنا عادة خلال المناسبات . وفي اثناء تجواله يوما ما وسط اهله ناس شيقوق صادفت عيناه إحدى حسناواتنا وقرر ان يتزوجها .
صحيح كان حجاز متزوجا قبل ذلك ولكنه راى ان العلاقة البيننا وبينهم تحتاج لمزيد من التمتين !! من خلال الزواج لذا قرر الزواج من بنت عمتنا هذه .
غايتو اليوم داك ناس شيقوق بقوا كويمات كويمات ينخسوا في الواطة بالقش لزوم الشورة . الحقيقة المتقدم اليهم ليس بالرجل الساهل كان كلما يزورنا بقول لي ارح يا الطيب نمر على الاهل بيت بيت . واشهد انه كان لا يمر والا جيوبه مليانة ضحاكات كان بيعصر بيده اليمنى دون ان تعرفه اليسرى للعجزة والمحتاجين .
المهم تم الزواج و كنت انا وقتئذ في المرحلة الثالثة في جامعة الخرطوم 1982 م وكنت كثير التواصل معه وتوطدت علاقتي به واستمرت هكذا الى ان وافته المنية فجأة في العام المنصرم بكمبالا عندما سافر اليها - أي كمبالا - بعد انقطاع منها لاكثر من 20 عاما .
كنت اعلم ان للمرحوم الباشمهندس حجاز علاقات بالكثيرين من صناع القرار.اتصلت به وابلغتة بموضوع المدرب العالمي وما نشرته عنه الصحف وظروف الامتحانات وعلى الفور طلب منى مقابلته في موقع معين صبيحة اليوم التالي وقد كان. .
التقيته وركبت معه في السيارة والمعروضات ( المظاريف في يدي) وتحرك بي الى اين ؟ ما كنت ادري .
نواصل
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: الطيب شيقوق)
|
مـولاناســلام
Quote: لله درهم - اعتقد من هولاء من قضى نحبه - هل الوليد ابن البروف نصر الحاج على مدير جامعة الخرطوم سابقا؟ |
لا يـاخ الله يـطـول فـى أعـمارهـم!
بروفيسـور محـمد عـبدالله الريـح (حساس مـحمد حسـاس)
ودكتـور عـثمان عـبدالمجـيـد (عـصـمصـم) مـدير إدارة المـؤتـمـرات بالخـارجـية القـطـريـة عـلى ماأعـتـقـد
ودكـتور محـمد بشـير حامـد أسـتاذ علـوم سـياسـية فى إحـدى الجامعات الأميريكيـة
وبروفيسـور طـه أميـر أسـتاذ عـلـم نفـس فى جـامعـة العـيـن بـالأمأرات
Quote: صحيح يا بروف كل الداخليات سميت باسماء انهار بس في ترهاقا وفلسطين - ترهاقا لطلاب الهندسة وفلسطين دي لخليط من طلبة الكليات - فلسطين وبحر العرب مواجهات كلية القانون الفاصل بينهم هو شارع الجامعة . |
والوليـد نـصـر الـحاج عـلى (إبـن أول مـدير لـجامـعة الخرطـوم) صـديـق عـزيز مـن الخـرطـوم الثانوية وكـنا رووم مـيـتـس فى داخـلـيـة إمـتـداد السـوبـاط وهـو الآن مديـر شـركـة فـى دبـى وكان معـانا فى الـحـجـرة دكـتورنورالدين سـاتى ودكـتور محمد سـعـد ودكتور عـمر سـلـطان. وكانـت داخـلـية الـبرالـمه بـى دبـل بـيـدز وعـادة فـيـهـا سـتـه.
بـعـديـن سـكـنت فـى الـقاش سـنتيـن مـع المصـباح عـبدالله سـعـيـد عـمارة. ثـم فـى بـحـر الـزراف مـع السـيد عـلى محمود مدير الاسـواق الحـرة ثم الـمعـارض زمان والسـفـير أبـوزيـد الحـسـن والسـفـيـر عـطاالله أحـمـد البـشـيـر.
فـلـسـطـيـن دى ياتـا؟ الـجـنـب مـيـدان الـسـلـة واللا الـورا؟ لـغاية 1980 ماكان فى فـلسـطيـن
ترهـاقـا جـنب مـتـحـف الـتاريـخ الطبـيـعـى بـتاع بروفـيسـور محـمـد عـبدالله الريـح (حسـاس مـحـمـد حسـاس ود الـريـح) مـش كـدا.
يـأخـى الـذكـريـات دى حـاجـة جـميلة.
Quote: أكرمنا بالقصيدة دي يا بروف إن كانت عالقة في الذاكرة او في احدى ملفاتك |
الِـقـصـيـدة أنـا مأحأفـظـا بـعـد كل هـذه المـدة لكـن عـنـدى فى الـسـودان. مـطـلعـهـا بقـول
قألـت الـخـلـطـة سـلام يـارفـاق فـأنـبـهـطـنا لـيـس مـنا من أفـاق وتـدافـعـنا وضـيـقـنا الـخـناق قـال بـحـبـوح ضـليـع فـى النـفاق: "يـازمـيـلـة يـاعـظـيـمـة أيـن أنـت؟ كـم سـألـنا وأسـتـشـرنا كل بـنـت! فـلـماذا لـيـك مـدة مـابـنت؟" فـاشـمـخـرَّ الـكلُ مـن وقـع الـكذب وزمـيـلٍ فى التـعارف ألـمعـىٍ وذرب وغـضـبـنا مـنه مـن قـفـل الـدرب ؟؟؟ ؟؟؟ .... وأسـتـفـزانا بـدعـوه للنـشـاط وقـد خـبرنا سـحـره فى الإخـتـلاط فـغـضـبنا كـلنـا وتـلـظى بـعـضـنا ثـم إسـتشـاط ؟؟؟ ؟؟؟ ؟؟؟ .... وفـجـأة تـذكـرت أنى أحـمـل المفـتاح خـمس أقـراش وعـشـرون صـحـاح فـهـى زادى مـنذ عـام كل صـباح إن تـكـن أبـونـيـهـا فاللغـيـر الـتذاكـر يـدفـعـون فالإكـسـجـيـنـج نادر ؟؟؟ ؟؟؟ .... وأنـطلـقـنا بـعـدهـا صـوب الـحـقـوق خـمـس أشـيايـى وتـعـريـفـه نشـوق وكأس مـنـقـه فى صـفار كالشـروق ؟؟؟ ؟؟؟ .... نـحـن عـالـجـنا الشـاى والـسـفـه بـحـرافـه ونـص الـمـنـقـة مـتـروك ظـرافـة يـاجـماعـة دا حـرام دى هـيافـه ؟؟؟ ؟؟؟ ...
والله يـا مـولانـا دا الإتـذكـرتـو الـقـصـيـدة طـويـلـة
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: عبدالرحمن إبراهيم محمد)
|
Quote: والوليـد نـصـر الـحاج عـلى (إبـن أول مـدير لـجامـعة الخرطـوم) صـديـق عـزيز مـن الخـرطـوم الثانوية وكـنا رووم مـيـتـس فى داخـلـيـة إمـتـداد السـوبـاط وهـو الآن مديـر شـركـة فـى دبـى وكان معـانا فى الـحـجـرة دكـتورنورالدين سـاتى ودكـتور محمد سـعـد ودكتور عـمر سـلـطان. وكانـت داخـلـية الـبرالـمه بـى دبـل بـيـدز وعـادة فـيـهـا سـتـه. |
بالتاكيد بيكون منزل الوليد احد محطاتك لدى زياراتك الى دبي في مهامك الرسمية .
Quote: بـعـديـن سـكـنت فـى الـقاش سـنتيـن مـع المصـباح عـبدالله سـعـيـد عـمارة. ثـم فـى بـحـر الـزراف مـع السـيد عـلى محمود مدير الاسـواق الحـرة ثم الـمعـارض زمان والسـفـير أبـوزيـد الحـسـن والسـفـيـر عـطاالله أحـمـد البـشـيـر. |
سبحان الله وانا ايضا سكنت في القاش لمدة عامين
Quote: فـلـسـطـيـن دى ياتـا؟ الـجـنـب مـيـدان الـسـلـة واللا الـورا؟ لـغاية 1980 ماكان فى فـلسـطيـن |
فلسطين نعم هي الجنب ميدان السلة
Quote: ترهـاقـا جـنب مـتـحـف الـتاريـخ الطبـيـعـى بـتاع بروفـيسـور محـمـد عـبدالله الريـح (حسـاس مـحـمـد حسـاس ود الـريـح) مـش كـدا. |
قصاد اكاديمية السودان للعلوم الادارية
Quote: قألـت الـخـلـطـة سـلام يـارفـاق فـأنـبـهـطـنا لـيـس مـنا من أفـاق وتـدافـعـنا وضـيـقـنا الـخـناق قـال بـحـبـوح ضـليـع فـى النـفاق: "يـازمـيـلـة يـاعـظـيـمـة أيـن أنـت؟ كـم سـألـنا وأسـتـشـرنا كل بـنـت! فـلـماذا لـيـك مـدة مـابـنت؟" فـاشـمـخـرَّ الـكلُ مـن وقـع الـكذب وزمـيـلٍ فى التـعارف ألـمعـىٍ وذرب وغـضـبـنا مـنه مـن قـفـل الـدرب ؟؟؟ ؟؟؟ .... وأسـتـفـزانا بـدعـوه للنـشـاط وقـد خـبرنا سـحـره فى الإخـتـلاط فـغـضـبنا كـلنـا وتـلـظى بـعـضـنا ثـم إسـتشـاط ؟؟؟ ؟؟؟ ؟؟؟ .... وفـجـأة تـذكـرت أنى أحـمـل المفـتاح خـمس أقـراش وعـشـرون صـحـاح فـهـى زادى مـنذ عـام كل صـباح إن تـكـن أبـونـيـهـا فاللغـيـر الـتذاكـر يـدفـعـون فالإكـسـجـيـنـج نادر ؟؟؟ ؟؟؟ .... وأنـطلـقـنا بـعـدهـا صـوب الـحـقـوق خـمـس أشـيايـى وتـعـريـفـه نشـوق وكأس مـنـقـه فى صـفار كالشـروق ؟؟؟ ؟؟؟ .... نـحـن عـالـجـنا الشـاى والـسـفـه بـحـرافـه ونـص الـمـنـقـة مـتـروك ظـرافـة يـاجـماعـة دا حـرام دى هـيافـه |
ههها اكرمت يا زعيم
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: الطيب شيقوق)
|
زولك توووووووووووووش دخل بي مكتب مدير عام جهاز الاستخبارات في عهد مايو . حيا بعض بحرارة وانا اعاين ساااااااااااى - جابوا لينا الحاجة الباردة والشاي الما خمج وطوالي حجاز فاتح سعادة اللواء بالقول ( مش عندكم واحد مجرم اعلنتم عنه في الجرايد؟
اجابه سعادة اللواء نعم هو شخص مجرم وللاسف من دولة عربية شقيقة .
طيب سعادتك انتو مش قلتو اى حد تعامل معاهو يجيكم ؟
ايوا نعم الاعلان الصحفي كان يقول هكذا يا باشمهندس .
طيب سعادتك خودكم هذا المجرم فقد كان من المتعاملين معه والدليل خودكم هذه المظاريف البريدية خمشا من يدي وسلمه إياها. علمت ان الحديث فيه نوع من المزحة المقصود بها التخويف لذا كنت متماسكا جدا ومطمئنا جدا .
تداخلت انا اثناء دردشتهما وقلت ليهم يا اخونا ارجوكم خلوني أكمل الامتحانات وبعد داك ودوني المشنقة .
بعد لحظة سعادة المدير رفع تلفونه وتحدث مع مدير شرطة القسم الاوسط وحكى ليهو بقصتي وطلب منه إستلام المعروضات وتمكيني من مقابلة المدرب العالمي في مكان حبسه للتحدث معه ومن ثم اطلاق سراحي فورا .
بالفعل ذهبت لوحدي للقسم الشرقي وسلمتهم المعروضات وسمح لي بمقابلة المدرب العالمي ......
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: عثمان كباشي)
|
قريبي ود الكباشي
Quote: تعرف يا قريبي تنفع كاتب سيناريو لمسلسلات سمينة خاصة مكان القفلات أو قصص بوليسية د بالمناسبة أنا جاد فيما أقول د فكل العناصر متوفرة خاصة وجود القصة الأصلية والمقدرة على الحبك وطبعا لابد من إعطاء الكريدت هنا لأجواء حلالنا وبوادينا وحتى مدننا وثقافة الحكي المطرز بالتجارب الحقيقية |
ياخ دي ونسة ساي لكن وقائعها حقيقية 100% بس مرات بديها ليك حبة بهارات وكدا لزوم إسعاد اولاد البنادر .
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: الطيب شيقوق)
|
Quote: ( قام الاخ الملازم احمد بطلب السماح لهما بالمغادرة ولكن المدرب العالمي قاطعه قائلا ( يا اخي احمد اعذرني انا تاني ما بقدر ارجع بلدكم وبحاول اقعد مع الطيب دا هنا في الجامعة لحدى اجد لي فريق رياضي خرطومي لتدريبه ) |
هههههههه مره اضحك ومره تغلبني القراية
Quote: الكاتب الروائي لازم يكون شحتاف شفت كيف؟ |
وهو كذلك ... دي مباراة مدربين لازم يكون ما ليها نهايه شحتفهم كويس مره دقها في العارضة ومره طلعها كورنر يعني قريبي المستشار ود البوب بدل ما ياسس فريق (الزمالك بالشعبية ) ما كان رسلناهو ليكم كان محتاجين مدربين على الاقل كان تكون عندنا سعية كاربة وخير وافر ونعمل تكامل بينا وبينكم ... . . .
بالجنبة : صاحبك حجه حج سياحي واخر رفاهية ( ود عز ) .... ربنا يقبل
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: وليد عبد اللطيف)
|
الوليد
انت وين ياخ حجيت ولا شنو؟
Quote: دي مباراة مدربين لازم يكون ما ليها نهايه شحتفهم كويس مره دقها في العارضة ومره طلعها كورنر يعني قريبي المستشار ود البوب بدل ما ياسس فريق (الزمالك بالشعبية ) ما كان رسلناهو ليكم كان محتاجين مدربين على الاقل كان تكون عندنا سعية كاربة وخير وافر ونعمل تكامل بينا وبينكم ... |
ياخ صاحبي دقيت ليهو في السعودية تلفون تعذر - ودقيت ليهو بعد الحجاج بدوا العودة في قطر برضو ما لميت فيهو
دحين وصل ؟
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: صديق الموج)
|
Quote: و بعدين فريقكم دا لو جبتوا ليهو بوشكاش ما بيمشي لي قدام كان اخير ليكم تجيبوا واحد يدربكم حرينة ولا مصيبة زمان
يلا بلا لمة |
Quote: قلت لى مدرب عالمى للسريفه اها و ناس البردانه ما شافوا ريكاردو مالهم؟ خلاص يا الريال والبرشا!! قوم لف ياخى.. احكى لينا قصة عن البل واللا السعون والبخس عشان نصدقك.. قال السريفة قال،،، |
سورى يا ود شيقوق ياخى لكن والله الناس ديل دايرين يكتلونى بى ضحكة
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: الطيب شيقوق)
|
ودالموج وكوستاوى وفيصل خليل, ارفعوا ايديكم لو سمحتوا عن شيخ العرب . الحسادة العليكم شنو ؟ فريق المريخ يدربه المدرب المصرى حسام البدرى وامل عطبرة كان يدربه المصرى احمد سارى والزمالك المصرى يدربه حسن شحاته .....طيب السريفة والبردانة اقل منهم فى شنو ؟ اشمعنى ؟ قولو لى . تعرف ياشيقا الناس ديل خايفين عدييييل كدة من فرق تطلع جديدة فى الكفر وتهدد عرش الهلال والمريخ . مش قلت ليك حسادة منهم ؟ واصل ياصديقى فى مهمتك الرياضية والأنسانية .
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: عمر علي حسن)
|
يا خال
الف سلامة بالعودة وكل عام وانت بالف خير - شفقتناعليك بالحيل
Quote: وعشان الحاجات تبقي كويسه نؤكد للجميع ان وقوع الخال في يد الشرطه وهو طالب سيظهر لكم انه لاخوف علي القرقور قبل ان يصل الي الزيت المغلي |
شفت نصيحة اولاد البندر لي شنو؟ قالوا لي اخمش المعروضات العندك وامشي بلغ ناس القسم الشرقي قول ليهم الزول دا كان معاى فترة طويلة في الداخلية وكان بجيب لي المعروضات دي .
عيييييك يا اولاد البندر شوفوها عند الغافل - اكان سويت دي ابقى حسني مبارك
Quote: ولا بد من المواصله لمزيد من تثقيف اصحاب الشهادات الكازخستانيه |
هههههها يعني اتكلم واشرح ولا شنو يا خال ؟
ياخ القصة طعمها في دغمستا دي بدون شرح
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: الطيب شيقوق)
|
Quote: دحين تابعت كلام وليد المعلم في المؤتمر الصحفي الذى عقد مساء هذا اليوم ولا كنت نائم ياخ؟ |
الطيب
لا زلت عند موقفي من الثورات التي تروي (بالتنقيط) الدموي .. ولا ترد بعد نجاحها واحدا في المليون من الخراب والدم الذي ازهق .. وقد عدت من مصر قبل شهر بعد ان هبطت مطار القاهره ووجدت نفسي في بلد يشكو من كل شيء ويشكو اكثر من الثورة .. ولم أجد مصر فعدت لاهثا مهرولا .. وتابعت متالما حمل المتهم مبارك الي المحكمه علي سرير .. هل شهدت شيئا كهذا طيله امتهانك مهنة القانون .. وتابعت ليبيا وصور دمارها واهتمامها واهتمام العالم المنافق من حولها بموت شخص واحد واغفال موت الالاف ثم اللهث والاحتفاء بالقبض علي اخر دون (اطلاق) فكرة واحدة عما سيئول اليه الحال مع السلاح والذخائر المملوكة علي الشيوع لكل من يريد
ماذا يجدينا لو تكلم المعلم عن سقوط ولي نعمته او عاد لتمجيده .. النتيجه واحده .. وهي انضمام سوريا الي محفل الضياع العربي .. لنتفرغ الي غيرها ..
لا شك اني ساعتزل سماع الاخبار قبل ان اموت بالغبينه .. النوم رحمه يابوي
عمر علي حسن
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: عمر علي حسن)
|
Quote: لا زلت عند موقفي من الثورات التي تروي (بالتنقيط) الدموي .. ولا ترد بعد نجاحها واحدا في المليون من الخراب والدم الذي ازهق .. وقد عدت من مصر قبل شهر بعد ان هبطت مطار القاهره ووجدت نفسي في بلد يشكو من كل شيء ويشكو اكثر من الثورة .. ولم أجد مصر فعدت لاهثا مهرولا .. وتابعت متالما حمل المتهم مبارك الي المحكمه علي سرير .. هل شهدت شيئا كهذا طيله امتهانك مهنة القانون .. وتابعت ليبيا وصور دمارها واهتمامها واهتمام العالم المنافق من حولها بموت شخص واحد واغفال موت الالاف ثم اللهث والاحتفاء بالقبض علي اخر دون (اطلاق) فكرة واحدة عما سيئول اليه الحال مع السلاح والذخائر المملوكة علي الشيوع لكل من يريد |
يا خال عندي راي ، ارى ان الصمت افضل من الافصاح عنه
اللهم ولي من يصلح
| |
|
|
|
|
|
|
Re: قصتي مع المدرب العالمي الذى كاد ان يكون سببا في طردي من كلية الحقو (Re: الطيب شيقوق)
|
الأخ العزيز الطيب الطيب التحايا النواضر
Quote: كانت كيستي الطالبة معنا تحكي لي ولم يكن تفاعلي معها بالطريقة المألوفة لديها . بدأت عيونها ترسل اشارات حيرة وإستغراب ( مالك يا الطيب حاسي بيك اليوم ليس بطيب الامس شنو الحصل ؟ بعتني ؟ بدلتني ؟ سمعت ولا جابوا ليك؟ دا كلو ما حصل يا أميرة - انت حاشاك البيع - الحاصل اني منزعج من ضيف غريب واجنبي جاني في الداخلية وترك موجوداته الشخصية في عنبرنا وطلع ولم يعد الينا حتى الان .
|
ات متأكد إنها جامعة الخرتوم الزمن داك، غايتو العالمي عرفناهو إلا كديستي دي ما راكبه تب
ودي
| |
|
|
|
|
|
|
| |