|
|
 لهذا النضال الاكترونى... والعمل الجميل من المجموعه وكل الفريق
|
بادي المرقه ضُل
وبادي الدنيا دم
باقي الناس سلام
وتواريخم ندم
يمرقنا الحرام ..
لي وادي النِعم
ياخيمنا المقلّع
من عودنا المطرّح
جمعتنا الروائح
والرمله أم صُنان
قطّعت النشيد
وظهّرت القيام
بِ الطوب المسلّح
جسمك طاب منفّح
يتعافى النظام
فِ الخدر الملفّخ
والسريّه نونت
بي صوت النيام
وجمعتنا الروائح
والضُل النريدو
حارساتنّو شُلّه
من كلُّوب
قريضو
شرقانيّه تُجمه
وجمعتنا الروائح
لا ######اً
يسامح سيدو عزّل كيف ؟
لا شدراً يضلل عودو عزّ الصيف
وبايتين بي دموعنا
زيرنا إنشق يابس
تحت المسرحيه
والفنان مكتف في ضهر البلاطه
يا الجلاطه كركك
فش الغموصه لوصه
ونيلك كمشتينو
تخننبو .. المسالك
بال من تحت سالك
نجسنبو الترابه
جنيت ألقاك تشدّي
قدّ المرقه نفّخ
مرقنبو الغلابه
وجمعتنا الروائح
كان البلده نايمه
والنجمات بعيده
عمق النيل خواده
والكنتين تعرفو
بي ريحة الزرائب
واللبانا باعو
لبن الطير ل قبطي
وصدر القيفه مجّك
ل زراعة المقطّي
بي جسمو الجراد
الجامع مفتّح
والهيم فِ السعيّه
في جلد القضيّه
صلاياً ويمدّح
جمعتنا الروائح
جمعتنا الروائح
وجمعتنا الروائح
كان الفاقه في شهوة سرج
تابله .. وحنيكه سنين
قامت بدري
شدت مهرت الغناي
كايسه لي حُضن الدلاليك
فِ النسائب والرزق
وكايسه
في شدر المراغنه .. الضل
وضحيك اليلاقيك
فِ العلامات
والسلامات
والبطون الشوكها يلصف
والبلوغ
وهُن كانوا
عُضلاب الشريق
ليهم خلائف فِ الأزل
كشاكه
ويبيعوا
الترمسه وفانوس
سبر أمبكول
أم عويناتن تدمّع فِ الضلام
ضوء حليبن .. يعرفك
طوال
يختفوا الحبّه
من مناقير الطيور
يعقدوا علي بنياتن .. وليداتن
بدري
ومشلّخين سلم
جلاليبن زبد صفره وطويله
وعمّتن جدّيع
وتسعه ونص صباح
يختولنا الفطور
ديل المحاميد
الرطاناتن حجاب
يختروك للمشي
وبانطونن
يهتّف للرجوع
ديل المحاميد
المناخيرن ختيف للنسمه
والحر .. والجبال
وكانوا بيعادوا الزرقه
جاهلين إحترامن .. والختا
وكانوا مدهونين صعاب
جاتن من خيالاتن
سلامه
قالوا اليعقدوا علي الطريقه
البلده للمدعو الوطن
جابو من الدلكه علبه
ومن سرية الناسخين
شدرهن نوبه للحفل الجميل
ديل المحاميد يمدحوا
بلداً نشوفو
واسعات جروفو .. صابرين نطوفو
نعدلّو قيفو
بالما سياسه .. نكسر هتوفو
والجاب يطفّر خنق الزرافه
والما بيحفر حفرن ظروفو
والسكه لينه .. لسانه ترطن
حُرّاسها لصّو
فصّو وضلوفو
سرقوا المدينه .. والبت سكينه
مرقت مسحّن بالمسطرينه
بنوا فوقها طوفو
بلداً نشوفو
واسعات جروفو
صابرين نطوفو
نعدلّو قيفو .
|
|
 
|
|
|
|
فيس بوك
تويتر
انستقرام
يوتيوب
بنتيريست