|
|
 اللهم لك الحمد..نجونا نجونا .. الكرامة واجبة
|
صحيت من النوم عادي جداً...
أصبحنا وأصبح الملك لله..
فتاح يا عليم رزاق يا كريم..
يلا يا أولاد..أي واحد يقوم
يتسوك ويصلي عشان ما تتأخروا على المدارس..
انهمكنا أنا والمدام في "قلع" العيال من السراير..
المهم..صلينا ..وبقينا مارقين..
نزلنا ,, وكالعادة الحمد لله وصلت الأولاد
كل إلى مدرسته/ ها ..
ومن هناك .. مشيت المكتب في طريقي طبعاً
"دقيت الكرت والبصمة" نظام حضور مبكر وكدا..
قال يعني عشان الود يرجع البيت "يتروش"
يعني ياخد دوش ويلبس "الرسمي" ويرجع المكتب..
حلو؟؟
وصلت البيت..
شغلت "سخان الموية".. ودخلت أوضتي أشيل "البشكير"
وجيت راجع بكل هدوء..الحمام..
تحسست درجة حرارة الماء..كله تمام التمام..
فتحت الموية.. برضو مية مية..
صابون وشامبو..كله جاااااهز...
أخدت "ترويشة" أولية كدا..
وبينما كان راسي "مجلبط" بالشامبو
سمعت كركرة غريبة صادرة من السخان..
المهم..قشيت الشامبو شوية كدا..
وفتحت عين واااااحدة بس..عاينت بيها ناحية السخان..
ألقى الشي زي طالع منه دخان..
أنا أخو السمحات..لفحت ليكم البشكير
وفللللي على خارج الحمام.. يا مراة هوي..
أخدو ساتر..السخان دا شكلو عايز..
- عايز شنو؟؟ مالك؟؟
- ياخ قلت ليك شيلي بتك دي وزحوا بعيد.. لأنو..
(طرااااااااااااخ..) ..توف توووووووووووووف..
وهاك يا دخان .. وريحة البيت بقت بمبان بمبان..
أها الوكت داك أخوكم تحت الدخان جرى على مكان
تأمين الكهرباء.. ربنا ألهمني..
طق طق طق طق..فصلت ليك الكهرباء..
المراة وبتها في البلكونة....
نجونا.. نجونا...
الحمد لله..
|
|
  
|
|
|
|
|
|
|
|
Re: اللهم لك الحمد..نجونا نجونا .. الكرامة واجبة (Re: أبوعبيدة محمد الأمين)
|
حبيبنا محمود مصطفى محمود ..
حمداً لله على سلامتك وسلامة اسرتك ..
ربنا ستر ولطف ...
نسال الله لك ولاسرتك الحفظ من كل سوء وشر ..
الناس ماعندها شغلة غير جريت عريان وجريت ميطي وناسين (الكرامة واجبة )..
وحضورنا فرض عين ..واذا حضرنا سقط عن الباقين ..
واذا حضروا لم يسقط عنا ولا ينتهى بالغياب الطارئ ..
تحياتي ياحبيب ..
| |
|
|
|
|
|
|
|
|
|
Re: اللهم لك الحمد..نجونا نجونا .. الكرامة واجبة (Re: أبوعبيدة محمد الأمين)
|
الأخ الحبيب أبو عبيدة..
والله من ناحية بوظان الأعصاب..فدونك الجرية الــ (أم فكو) دي..
لكن من خلال هذه الخلعة الجامدة
أستطيع أقول إنه الخلعة براها كدا ممكن تساهم
في "كتلة" الزول بنسبة 50% ..والباقي إن تمت المعدودة
ياهو ناس كهرباء وموية ساخنة واختناق..وكدي..
يا زول جات سليمة تب الحمد لله..والكرامة فعلاً واجبة..
أشكر شعورك الطيب..
..
| |
|
|
|
|
|
|
|
|
|
Re: اللهم لك الحمد..نجونا نجونا .. الكرامة واجبة (Re: اساسي)
|
أووووهـ أساسي ولَّ أنا غلطان؟؟
كيفك؟؟
إنت طبعاً لأنك "مدير" دوامك بيكون بعد تسعة صباحاً وكدا..
لكن "قومة" الصباحية البدري دي فيها "سقيطة" كدا بتحتاج السخان
نحن ناس غلابة ساي.. بنقوم الصباح بدري..نصحي أولادنا ..
موش زيكم إنتو المدراء ديل.. بناتكم في المدارس العالمية
وبتصحيهم الشغالة..وبيجيهم الترحيل لحدي الباب..
وأما بنعمة ربك فحدث..
المهم يا زول ما مشكلة..
لكن بيني وبينك كدا..(ما تكلم زول أوكي؟؟) أخوك اكتشف حكاية السخان
دي "بمحض الصدفة".. ولو ما "طرشق"..أصلي ما كنت ناوي أسيبو حتى في الصيف..
لوووووول..
تحياتي يا زول..ونلقاك في "الفرحة القريبة"..
..
| |
|
|
|
|
|
|
|
|
 Re: اللهم لك الحمد..نجونا نجونا .. الكرامة واجبة (Re: اساسي)
|
حمد لله على السلامة يا عمك و العيال
Quote:
واحد صاحبنا "مهوِّد" كدا..حكيت ليهو القصة..
قال لي:
- لكن إنت بالغت والله يا محمود..عريان عديل؟؟
غايتو أكلتها في حناني ساااااااي...
وحدثت نفسي: "عاد آآجماعة الزول بيستحمى بي هدومو؟؟"
..والله كان بالغت ما عارف..
|
البيرمشن بتاع (الخلع) دا حدو باب الحمام يا حبيب ..
الا كان بقيت سمكة معليش .. فكل البحر مسبح
------
الكرامة بالله خليها اسبوعين ثقافيين ..
واحد للخُلعة .. و التاني للخلعة
(بضم الخاء و فتحها على الترتيب)
و التانية كفارة تجاوز المقيات المكاني لخلع الملابس
| |
|
|
|
|
|
|
|
|
|
Re: اللهم لك الحمد..نجونا نجونا .. الكرامة واجبة (Re: طارق جبريل)
|
Quote:
ألقى الشي زي طالع منه دخان..
أنا أخو السمحات..لفحت ليكم البشكير
وفللللي على خارج الحمام.. يا مراة هوي..
|
و عيونك أم شامبو و صابون فتحن كيف !!!؟
يا عربي و الله سلامة كبيرة
قدر و لطف .
و الله انا بقرأ انخلعته.
الناس دى شد ليهم عدسي العدسي بنفع معاهم .
ــــــــــــــــــــــــــــــــــــــــــــــ
بخصوص صاحبك القال ليك طلعته عريان داك
عندي و احده قويه جدن جدن ممكن اشارك بيها؟
| |
|
|
|
|
|
|
|
|
|
Re: اللهم لك الحمد..نجونا نجونا .. الكرامة واجبة (Re: ولياب)
|
هَيْ يا ولياب...
Quote:
لي ديشليون سنة في المملكة أول مرة أسمع أنو بيشغلو( سخان موية ) في جدة ، يا خي جدة دي دايرة (Chillers) عديل وعلى مدار السنة .
|
مالك داير تكسلني من تحريك إجراءات التعويض؟؟
غايتو كتر خيرك في حمدلة السلامة..
لكن الفيك إتعرفتْ..
محبتي يا زول يا حبوب..
..
| |
|
|
|
|
|
|
|
|
|
Re: اللهم لك الحمد..نجونا نجونا .. الكرامة واجبة (Re: أمجد الزين)
|
هوووووووووووي يا أمجد الزين..
Quote:
ذكرتنى بالمثل ناس تخاف ما تختشيش
|
يا أمجد المثل داك أظنو..(الإختشوا ماتوا..)
تلخبت لينا في الأمثال كدا..الحالة ما طرشق فيك سخان..
بركة غاتيو الما ذكرك المثل بتاع البشكير التقيل البقلها ياتو...
شكراً ليك والله..
..
| |
|
|
|
|
|
|
|
|
|
Re: اللهم لك الحمد..نجونا نجونا .. الكرامة واجبة (Re: khaleel)
|
خليل العازة...يا صاحب..
Quote:
السخان قديم وتجاوز فترة الضمان الخمسة سنوات
|
غايتو أصحاب الزمن دا...
طواااااااااالي تميل على جهة "غلتان المرحوم"؟؟؟
مفروض تنصر أخاك يا حبيب..حتى لو السخان دا كبَّ موية زي موية الدميرة ديك من الصدأ...
ياخ موش التعويض دا؟؟؟ أها خليناهو...
لكن الفيكم إتعرفت..
تحياتي يا حبيب...وكتر خيرك على الجية السمحة دي..
..
| |
|
|
|
|
|
|
|
|
|
Re: اللهم لك الحمد..نجونا نجونا .. الكرامة واجبة (Re: Elawad)
|
حباب العوض أخوي..
Quote:
حقي في الكرامة عفيت نصه لود القاضي و نصه لود الصايم.
|
طول عمرك زول بتحب الخير
دايماً للغير..
نص لي فايز ونص لمحمد وتاني نصيباً ياكلو الطير؟؟
أهو ربنا فتح علينا ردينا عليك بكلام "مسجوع"
من المستحمي المفجوع..
شكراً لمجيئك يا زول يا أصيل..
..
| |
|
|
|
|
|
|
|
|
|
Re: اللهم لك الحمد..نجونا نجونا .. الكرامة واجبة (Re: nazar hussien)
|
نزار صاحبي الفنان...
Quote:
أرجع تاني الحمام...وأحرم وأطلع...
وقول لي المدام...الجرية الزمان ديك كانت تمرين سعي ساكت
وأعد المحاولة مرة اخري...
|
والله كان برجع الحمام تاني ما عارف..
أول حاجة البشكير دا مخطط ولونو يغلب عليهو اللون الكحلي..
يعني ما ينفع إحرام..
ثم إنتو تعالوا هنا دا..القال ليكم حمامنا دا فاتح في الشارع منو؟؟
الحمام دا في شقة في الدور التالت..
والحضور ما كان منزعجين أبداً من الهروب دا..
الزوجة المخلصة والإبنة الصغيرونة متاب (3 سنوات)..
الزوجة كمان قاعد تحكي بالتلفون لصاحباتها إنه (أبونا جا جاري عريان زي ما الله خلقو)..
عليكم الله عاينو دي...
في زول الله خلقو شايل بشكير مخطط؟؟
ههههههههههههه
..
| |
|
|
|
|
|
|
|
|
|
Re: اللهم لك الحمد..نجونا نجونا .. الكرامة واجبة (Re: سلمى الشيخ سلامة)
|
هَيْ يا سلمى بت أبوي الشيخ..
عليك أمان الله أخوك أكان لاحق أمات طه..
غايتو واحدة من اتنين: يا شية..يا كمان سليقة..
عيلا ربك ستر.. له الحمد كما ينبغي..
قلتي جردل وطشت؟؟
هو نحنا مما خلينا "برود" الترع والكنارات تاني كسبنا عافية؟؟
تسلم إتَّ (دا) يا (حبيب)
سعدت بالمداخلة والحمدلة وكدي..
..
.
| |
|
|
|
|
|
|
| |
Mahmoud Mustafa Mahmoud
عصام دهب
ABUHUSSEIN
محمد عبد الماجد الصايم
أبو ساندرا
محمد علي البصير
أبوعبيدة محمد الأمين
فايزودالقاضي
SHIBKA
محمد عمر الفكي
willeim andrea
اساسي
نجلاء قرافي
عبدالله ود البوش
قيقراوي
طارق جبريل
سفيان بشير نابرى
نجلاء سيد أحمد
ولياب
أمجد الزين
Elawad
khaleel
محمد المسلمي
نيازي مصطفى
ناصر المحسى
ساميه حامد
مجدي عبدالرحيم فضل
جمال الباقر
نورالدين الفحل
وليد عبد اللطيف
يوسف محمد يوسف
نصر الدين عثمان
سلمى الشيخ سلامة
صلاح الدين نزلاوى
محمد جلال عبدالله
فيس بوك
تويتر
انستقرام
يوتيوب
بنتيريست