|
|
 نص مسرحي مهدى لكل المهتمين وخاصة الفنان المبدع السني دفع الله
|
تباعا هنا سأنشر نصا مسرحيا وأهديه لأي فرقة مسرحية سودانية في أي مكان في العالم. للجميع الحق في تنفيذ هذا النص مسرحيا دون الرجوع للكاتب.
وشكرا.
طلب هجرة الي جمهورية
ام كردوس
( نص مسرحي )
حامد بدوي
[email protected]
الشخصيات
حيث ان هذا النص يعمل علي ثلاثة مستويات هي : الواقع ـ الواقع المتخيل ـ وواقع فنتازي ، فان هذا قد فرض تنوعاً في العرض حيث نجد لوحات تظهر الاشخاص سلويت او مجرد ظلال ولوحات تظهرهم بلبس موحد يخفي شخصية الممثل " أبرول كامل مع غطاء للرأس والوجه " ولوحات أخرى واقعية يظهر فيها الممثلون بلبس عادي.
اذن فهناك فرصة لان يؤدي الممثل الواحد أكثر من دور فيستطيع بعض الممثلين تمثيل دور ثلاثة شخصيات وبعضهم شخصين والبعض الاخر شخصية واحدة .
للشخصيات :
1- جميلة
2- حماد
3- أستاذ التاريخ
4- عسكري النظام العام
5- مدير المدرسة
6- ممثل قرية أم كردوس
7- ممثل قرية أم طربوس
8- ممثل قرية أم فانوس
9- عبد الجليل
10- المغترب
11- المخبول
12- استاذ الجغرافيا
13- السلطان كسفورو
14- العجوز حميرة
الفصل الاول
اللوحة الأولى
( ترفع الستارة عن سور مدرسة من الخارج – يظهر باب المدرسة – فوق باب المدرسة لوحة مكتوب عليها بخط واضح للمشاهد: "مدرسة بني سوحان – مدرسة بني جمعان – مدرسة بني مروان" وكل إسم من الأسماء الثلاث مكتوب بلون مختلف ومشطوب بعلامة × بالقرب من الباب تجلس جميلة على بنبر وأمامها عدة الشاي – يدخل حماد)
حماد: (أثناء جلوسه على أحد البنابر) صباح الخير سيدتي الجميلة
جميلة: أولا أنا إسمي جميلة وبس.
حماد: وتانيا؟
جميلة: تانيا أهلا بحماد فراش مكتب المدير
حماد: إفرشوكي لي عجلات البلدوزر. وأسمعي هنا، يعني لمن أستاذ التاريخ يقول ليكي سيدتي
الجميلة ما قاعدة تدقي جرس؟
جميلة أيوة، أستاذ التاريخ بقولها فوق فهم .. قال إسم مسرحية من فلم ولا فلم من مسرحية ما
عارفة. وات مع شنو يا قريعتي راحت؟
حماد: برضو قريعتي راحت أخير من كفتيرتي شالها عسكري النظام العام.
جميلة: نظام عام بتاع شنو؟ بعد كدة مافي عسكري يقدر يشيل كفتيرتي. خلاص، الأستاذ قال دي وسيلة
إنتاج وملكية خاسة.
حماد: جميلة، تقدري تفهميني معنى وسيلة إنتاج وملكية خاسة؟
جميلة: أفهمك وأجري على الله، ما أنا جابوني هنا فهامة لجنابك. أولا يا سيدي وسيلة إنتاج يعني
الزول بنتج فوكه فايدة. وخاسة يعني فايدة ضعيفة، تويانة.
حماد: سيدتي الجميلة
جميلة: يسس
حماد: يسد نيتك
جميلة: يسد يا يابا ... (فجأة تبتر جملتها وتتلفت بخوف) سجمي، النظام العام ..(تخطف الكفتيرة
وتركض مسرعة لتخرج من الناحية اليمنى.... تعود وهي تلهث من الناحية اليسرى) العسكري
ما قطع قلبي! أنا قايلاهم ديل النظام العام، الحمدلله طلعوا ديل بتاعين الإلزامية.
حماد: (يهب واقفا بذعر) الإلزامية .. الله لا تبارك فيك يا جميلة .. وجايباهم لحد عندي ! (يركض
خارجا من الناحية اليسرى... يعود بعد قليل من الناحية اليمنى وهو يلهث.. يتوجه للمشاهدين..) يا جماعة الواحد في بلدو يقبى زي ناس العمرة الزايغين؟ كل ما يشوف ليه عسكري يفتح؟ بس إظهر عسكري واحد والشارع كلو يفتح .. الفارش بضاعة والطابي جكس وستات الشاي والشحادين والنشالين .. كلو شتات..
جميلة: حماد! شنو شتات ويفتح .. إت الأستاذ ما قال ليك تخلي كلام الشماشة دا؟ ات داير تفضحنا
قدام المغتربين؟
حماد: يا فارة دا ما إسمو كلام الشماشة. دا إسمو الرندوك
جميلة: ياخي إتكلم زي خلق الله .. يفتح يعني شنو؟ ما تقول يفز.
حماد: يفز ... ويفز دي ما راندوك؟ ( يدخل أستاذ التاريخ في طريقه لباب المدرسة وهو يحمل
كتبا في يده)
الأستاذ: يفز أصلها يفوز والمقصود يفوز بحياته أي يهرب من الخطر. وتحرفت من يفوز إلى يفز.
(تتابع جميلة كل كلمة يقولها الأستاذ بوله وحب ظاهر)
حماد: (بتعالم زائف) وزي ما تحرفت من يفوز لي يفز فقد ترندكت إلى يفتح، بمعنى يوسع أي يفتح
الفضاء المكاني باتجاه الإتساع والشتات.
الأستاذ: حماد إت بتجيب الكلام الغريب دا من وين؟
حماد: من الحنان ... ولو الحنك بجيب الحنان أن مستعد أقبى الشيخ الشعراوي زاتو. (يعود
للتعالم) وبالمناسبة يا أستاذ، لو عاوز درس عصر في الرندكة، أنا مستعد.
الأستاذ: (منتهرا) حماد .. ما تس ... تس ... تستأ ... تستز
حماد: إت عاوز تقول شنو ؟
الأستاذ: عاوز أقول ما تعمل لي فيها أستاذ.
حماد: بسيطة .. تقول بلاش تركب مكنة أستاذ بدل تستس كدا. ولا إيه رايك يا جميلة؟
جميلة: (تكون جميلة تائهة وهي تتأمل الأستاذ) .. آه؟ قت شنو؟
حماد: (بأسف حقيقي) ... مسكينة
الأستاذ: جميلة مالا؟ شاعرة بي حاجة؟
حماد: أيوه يا أستاذ، مسكينة عندها وجع في القلب
الأستاذ: قلب شنو إت كمان! وبعدين أمراض القلب ما بتجي للشباب الحلوين. دي بتكون غازات ..
أيوه غازات. (يلتفت لجميلة) أنا حأجيب ليك حبوب غازات معاي بعدين. (يخرج داخلا من باب
المدرسة)
حماد: (يغني) ما قلنا ليك الحب .... "الأغنية" ما تخليك أصلية وتطلعي من الوهمة دي وتنقشي
الناس البريدوكي جد!
جميلة: حماد، خليني في حالي. أنا ما ناقصاك أت كمان.
حماد: جميلة، أنا بتكلم جد.
جميلة: (بغضب) ممكن تقفل؟
حماد: (مستسلما) حاضر. الشاي الدسيس بالله.
جميلة : ( تنهمك في عمل الشاي ) قول لي يا استاذ حماد ؟ جماعتك ديل ، ما اتفقوا ليهم علي
اسم للمدرسة لي هسع ؟ضر؟
حماد : ولا حيتفقوا . المدير دا زول هارش . خوفوا الاكبر. وكل ما جاه واحد نافخ عمتو وخانق
رقبتة بي شال هرش منه. وكل ما جاه وفد ودق ليه جرس في المكتب هرش منه. في الأول جاه
وفد بني سوحان، دقوا جرس، المدير هرش وسمي المدرسة مدرسة بني سوحان. بعدين جوهو ناس
بني جمعان. دقو جرس والمدير هرش وكتب مدرسة بني جمعان وبعدها سمعو بني مروان، برضو
.رسلو وفد وبرضو المدير هرش وشط بني جمعان ، وكتب بني مروان ، وبعدين جو العرب وجو
الحلب وجو الجانقي والحكاية جاطت.
جميلة : اسمع يا حماد، انا امبارح جاتني فكرة، امكن تحل ليكم مشكلتكم ؟.
حماد : اسمعي اتي يا جميلة .... يا جميلة ومستحيلة (يرفع صوته بالغناء عاليا) ما انت
داااااااااااايماً ...
جميلة : ( صارخة فوق صراخه ) حمآآآآآآآد
حماد : يا اخي إنت مالك ومال المشاكل؟ إت عليك بس تقومي من الصباح تتزوقي وتجي تنوري لينا
باب المدرسة. خلي المشاكل وحلها للناس الشينين ديل ..الله زاتو خلقهم شينين ويشبهو
المشاكل.
جميلة : يا خي اسمع، انتو مش عاوزين مشكلتكم تنحل؟
حماد : لا مش عاوزين انحلال! الله أكبر ... الله أكبر ..
جميلة : (بضيق) يا سلام ..يا خي اسمع، انا جادة ومستعدة امشي اقول فكرتي دي لي مجلس الاساتذة
واجري علي الله.
حماد : (بتعال مصطنع) طيب، طيب، كدي سمعيني في الاول فكرتك دي، وبعدين اشوف .. واقرر، اذا
كانت بتستاهل يعرضوها للمدير ولا لا.
جميلة  تقلده) سمعيني واشوف واقرر! ات قايل روحك شنو؟ والله يا هو الفضل!
حماد : انا باب مكتب المدير والحاجة الما دايرها تدخل للمدير ما بتدخل.
جميلة : (باستنكار) باب؟ ... تمثل روحك بالباب؟.
حماد : باب ومفتاحه عندك.باب مفتاحو كلمة حلوة من زول حلو
جميلة : كلمة؟ افتح يا سمسم .
حماد :اوعك تقولي افتح، بقوم بفتح فللي ...يا فارة لمن تقولي لي حماد افتح معناها الالزامية
جات.
جميلة : طيب لو الكلام الحلو شطب، نعمل لايك شنو؟
حماد : بس جا عندي انا وشطب؟
جميلة : تقصد شنو؟
حماد : اقصد في ناس الكلام الحلو ليهم ما بشطب.
جميلة : ( محذرة ) حماد!
حماد : حاضر، حاضر بطلنا السيرة دي، يا الله قولي فكرتك يا البصيرة ام حمد .
جميلة : فكرتي بسيطة، مش كل قبيلة من القبايل التلاتة الكبيرة مصرة انه المدرسة تتسمي باسمها؟
(تتقدم من اللوحة وتاخذ مؤشرا وتشرح) طيب نقوم ناخذ الحرف الاول من اسم كل قبيلة طبعاً
الاسم البعد بني، لانها مشتركة في التلاتة، يعني من بني سوحان ناخذ السين ومن بني جمعان
ناخذ الجيم، ومن بني مروان ناخذ شنو؟
حماد : ناخذ الميم.
جميلة : شاطر يا باب المدير. ونخلي بني في محلها، ونضيف للاسم الجديد الالف والنون الموجودة في
اسماء القبائل التلاتة
حماد : يعني تقبي المدرسة اسمها ... بني س ج م ( يصمت برهة مفكراً .... ثم باندهاش) بني
سجمان. بني سجمان؟ ( ينفجر ضاحكاً) بني سجمان يا سجمانة؟ . (يضحك اكثر)
جميلة : عايز الجد؟... انا ذاتي ما فكرت فيها كدا .... يعني ما قصدت اسم بني سجمان، عارف اختك
في حكاية القراية والكتابة دي ما بالحيل. لكن هسع انا مصرة علي فكرتي اكثر من الاول. في
ذمتك ناسك ديل غير اسم بني سجمان بناسبهم شنو؟
حماد : يا زولة اتي عايزة المدير اكرشك من باب المدرسة ؟
جميلة : يكرشني ولا يخليني، كوم رجال، جلاليب وعمم وشالات وبناطلين وبدل، متعلمين
وأميين، شيوخ وافندية، عرب وعجم، حمر وزرق، كل ديل اربعة شهور اجتماعات ولت وعجن وما
قادرين يتفقوا ليهم علي اسم مناسب للمدرسة، ناس زي ديل تسميهم شنو غير بني سجمان؟
( فجأة يدخل عسكري النظام العام يهجم علي عدة جميلة ويأخذ الكفتيرة ويخرج . جميلة تركض وهي تصرخ ) اديني كفتيرتي يا زول، سيب وسيلة اللانتاج دي في محلها، يا زول احسن ليك دي وسيلة انتاج خاصة .. موسيقي إظلام .
نهاية اللوحة الأولى
|
|
 
|
|
|
|
|
|
|
|
Re: نص مسرحي مهدى لكل المهتمين وخاصة الفنان المبدع السني دفع الله (Re: حامد بدوي بشير)
|
( ترفع الستارة عن عمق الخشبة، ضو خافت وخلفي يظهر الأشخاص سلويت، مجرد ظلال... مكتب مدير المدرسة " مكتب وطاولة اجتماعات علي جانبيها كراسي " يبدو ان الاجتماع قد بدأ قبل فترة من رفع الستارة.
صوت المدير :رجاءاً يا جماعة اختصروا الحديث، انا بفضل اقتراحات محددة لاسم المدرسة عشان ما
ندخل في مطاولات ساكت، الفرصة عند اخونا ممثل قرية ان كردوس.
صوت ممثل ام كردوس :نشكر السيد المدير ألا دأوتها نهنو، وهذا المدرسة (فجأة يهجر اللغة الفصحي)
يا جماأة بالاربي كدة، أم كردوس دا اكبر خرية عشان كدة أرجو من الاخوان
الموافخة بالاجمأ السكوتي ألا اسم مدرسة ام كردوس الثانوية.
صوت ممثل ام فانوس مقاطعاً دون إستإذان المدير) دا كلام فارغ، دا تغول علي حقوقنا أنحنا
أهالي أم فانوس، شوف يا سيادة المدير انا بقترح اسم المدرسة دا يتعمل
بالقرعة علي اسامي القري كلها ، يعني شختك بختك وبس .
صوت ممثل ام طربوس متهجما) اسمع يا اللخو بتاع ام كردوس. كلامك دا دت مانا دايرنا. اتو كل
حاجة خاطنها في ام كردوس، كن مستشفي، كن نقطة بوليس، كن اي شي، خباركو ؟
لازم يكون فيه توزيع عادل للهناي ! الاسموا شنو ... والمدرسة دي علي
اليمين الا اسموها مدرسة ام طربوس.
ممثل ام كردوسغاضبا) انت بالذات يا بتأ ام تربوس ما تفتهي خشمك، انتو ذاتكم ما من منتقتنا
دا انتو نازهين بس. دي بلدنا وانهنا مخيرين فيه.
أم طربوس: والله زين. واتا ذاتك جاي من يين ؟
( تتعالي أصوات ممثلي القرى وتشتبك، الجميع يزعقون في وقت واحد. فوضي صراخ، اصوات حادة، تسمع من بين الضجة كلمات { عرب، جلابة، غرابة، جانقي، عبيد، حلب } واضحة، يعلو صوت المدير فوق الضجة)
صوت المدير: هدوء، هدوء يا جماعة مش كدة صلوا علي النبي، يا جماعة عيب ما ممكن كدة، من
فضلكم .......
( اظلام ـ ستارة )
نهاية اللوحة الثانية
| |
|
|
|
|
|
|
|
|
|
Re: نص مسرحي مهدى لكل المهتمين وخاصة الفنان المبدع السني دفع الله (Re: حامد بدوي بشير)
|
اللوحة الثالثة
(مقدمة الخشبة ـ إضاءة كاملة. وضوح. جميلة علي بنبرها وامامها ادوات الشاي، خلفها اللوحة القديمة. فوق اللوحة القديمة لوحة جديدة مكتوب عليها بخط واضح مقروءة للمشاهدين: "مدرسة آم كردوس ، ام فانوس ، ام طربوس الثانوية
كل اسم مشطوب بلون مختلف عن الاخر، يدخل حماد. يبدو مهموما ً فارقه المرح)
حماد :جميلة ازيك ( يجلس باعياء علي احد البنابر )
جميلة: هلا وسهلا ( تنظر اليه ) يا ساتر مالك الليله مادي قدومك شبر من صباحات الرحمن ؟
قالوا ليك انحنا ناقصين غم؟
حماد : يا اخي والله الواحد تعب عديل كدة ، خلاص غلبنا النسويه.
جميلة : يا زول مالك ؟ في شنو؟
حماد : يعني ما عارفة، ما مشكلة المدرسة الابت تنحل دي .
جميلة : وات مالك ؟ مدرسة ابوك ؟
حماد : صحي والله … الايدو في الموية ما زي الايدو في النار .
جميلة : يا ولد قول كلام تاني غير دا …. هسع انا دي ايدي من الصباح للعشية شغالة في شنو غير
النار ؟ انا بسأل ات مالك ومال اسم المدرسة ؟ ات المدير ؟
حماد : ات اظنك ما ناقشة . يا استاذة انا تعييني في وظيفة فراش رسمياً مربوط ببداية الدراسة
والمدرسة ما ممكن تبدا كان ما انتهت ازمة اسم المدرسة ، فهمت ؟ يعني انا شغال وما
شغال. وبعدين يعني بيزنس تك.
جميلة : شنو يعني بزبز تك ؟
حماد : يعني الواحد مآمن .
جميلة : يعني شنو مآمن ؟
حماد : يعني الصهريج فاضي ، سخانة .
جميلة : يا الله .. سخانة يعني شنو يا حماد ؟
حماد : يعني بي رندوك الجلاكين، اباطه والنجم .. مفلس .
جميلة : يخس عليك يا حماد ، مفلس واختك موجودة ؟ انحنا ما أخوان؟
حماد : (يعود للهزل) شفتي الاخوة دي هي البتجنني، انا ما عايز معاك اخوة، ات بس لو تفتحي شوية
كان عرفتي انك اهم من الاخوات ومن اي زول
جميلة : ( محذرة ) حماد ، خلاص قمت لي جنك
حماد : (بيأس) خلاص ، خلاص ، انسي. انا عارف حظي ، حتى لمن لقيت وظيفة، طلعت فيها مشكلة اصعب
من مشكلة فلسطين.
جميلة : والحل ؟
حماد : لازم تنحل مشكلة المدرسة عشان تبدا الدراسة ، عشان حماد يستلم ماهية.
جميلة : (بعد برهة من التفكير) اسمع … ات خالك حسين مش زابط في الحامية ؟
حماد : ايوة ، مالو ؟
جميلة : من دربك دا تمشي عليه طوالي ، تكلمو بي مشكلة المدرسة وتقنعو يعمل انقلاب. يحتل ام
كردوس كلها بالعساكر ويحتل المدرسة ، ويعمل حظر تجول ، وكحظر كلام وحظر اي حاجة ،
بعدين يطلع قرار ويقطع ليه اسم للمدرسة من راسه ، الارضي ارضي والمايرضي يطق راسه في
السما .
حماد : والله اتي يالبصيرة ام حمد ! حلولك كلها غريبة .
جميلة : هي لكين ما في حل تاني …. المدرسة حالها واقف والاولاد بدون قراية ، والمدرسين بدون شغل
وحماد بدون ماهية ، دي حاله اخير منها الانقلاب .
حماد : غايته الليلة في اخر فرصة، الوزارة جابت جواب للمدير وكلفت هيئة التدريس عشان تختار
اسم للمدرسة، طبعاً كالعادة (يغير صوته) بدون اثارة اي حساسية قبلية او عنصرية او
حزبية او دينية .. أو .. أو ..أو ..
جميلة : اسم زي دا في بلد زي دي يجيبوه من وين؟ من الصين؟ انا غايته ما شايفة لي حل غير
الانقلاب؟
حماد : يابت ما تبقي ضهب. الاختلاف لحدي الان بالكلام دايرة تدخلي فيه العساكر عشان يبقي بال.
(اشارة تدل علي السلاح)؟ا
جميلة : لكين كان الناس ما دايرين يتفقوا بي اخوي واخوك ؟
(يدخل استاذ التاريخ عابراً من باب المدرسة الي خارج الخشبة).
الاستاذ : ما مهم الناس اتفقوا ولا مطلوب. المهم اولا انو الاختلاف ما يكون نابع من مسائل شخصية،
وتانياً ان يقننو .. (كمن يفيق الي نفسه ويدرك المفارقة بين المقال والمقام) هية اتو
بتتكلمو في شنو؟ بتتكلموا في السياسة؟
حماد : سياسة شنو يا استاذ ؟ انحنا شبة سياسة ؟ بنتكلم في مشكلة المدرسة الفقر دي .
الاستاذ :انشاء الله الليلة نصل لي حل. بالمناسبة يا جميلة جبت ليك حبوب الفحم، تبلعي حبة بعد
الاكل حتريحك من الغازات. (يكتم حماد ضحكته بيده، يخرج الاستاذ دون ان يلاحظ).
جميلة : (مستغرقة في هب الجمر) انت عارف يا حماد ما دام تكلو حل المشكلة علي المدرسين، انشاء
الله استاذ التاريخ يلاقي حل .
حماد : ولي شنو يعني استاذ التاريخ هو البلقي الحل ؟
جميلة : ( تنقر بسبابتها علي راسها ) مخ .
(موسيقى – إظلام – ستارة
نهاية اللوحة الثالثة
| |
|
|
|
|
|
|
|
|
|
Re: نص مسرحي مهدى لكل المهتمين وخاصة الفنان المبدع السني دفع الله (Re: حامد بدوي بشير)
|
اللوحة الرابعة
(مقدمة الخشبة ـ إضاءة كاملة. وضوح. جميلة علي بنبرها وامامها ادوات الشاي، خلفها اللوحة القديمة. فوق اللوحة القديمة لوحة جديدة مكتوب عليها بخط واضح مقروءة للمشاهدين: "مدرسة آم كردوس ، ام فانوس ، ام طربوس الثانوية
كل اسم مشطوب بلون مختلف عن الاخر،
( يدخل عبد الجليل ـ رجل طويل نحيف في حوالي الخامسة والاربعين من العمر ، يرتدي زي افرنجي مهترئ ـ ينتعل سفنجة ـ يمسك بيده اليمني بيضة دجاجة وباليسري قالب طوب احمر ـ يجلس علي بنبر بدون سلام ويستغرق في اصلاح سفنجته ) .
عبد الجليل : ( دون ان ينظر الي جميلة ) شاي لو سمحت
جميلة : ( تهب واقفة باهتمام ودهشة وهي تتفرس في عبد الجليل ، تدور حوله وهو لا يزال
مستغرقاً تماماً في عملية إصلاح السفنجة ) ، اسمع … ات ما سيد عبد الجليل بتاع
الضرايب ؟
عبد الجليل : ( يجفل مرتعبا ً ) انت منو ؟ وتعرفيني من وين ؟.
جميلة : ات ما عرفتني ، انا جميلة .. جميلة بت أم نفل .. ام نفل الغسالة .
حماد : وشنق ما شين ( washing machine) يا سيد
( عبد الجليل يحدق في حماد مرة وفي جميلة اخري غير متذكر )
عبد الجليل : (يشرق وجهه بالذكري ) ايوا ... ايوا ... اذكرتها .. كانت عندها شافعة وسخانة
كدة بتجي معاها آ .. اوعي تكوني انت ؟
جميلة : ايوا ... يا سيد عبد الجليل ، انا شافعة ام نفل الوسخانة. ذاتا.
عبد الجليل : سبحان الله ! .. ما شاء الله بقيتي عروس .. امك ازيها ؟
جميلة : امي الله يرحمها ، ماتت .
عبد الجليل : الله يرحمها ... البركة فيك .
جميلة : اتفضل يا السيد عبد الجليل ( يجلسان ) .. لكن لا مؤاخذة يا سيد عبد الجليل انت مالك ؟
عبد الجليل : الزمن .. الزمن يا بتي الزمن .
(تنهض جميلة لتقدم له الشاي ، قتمر بالقرب من البيضة)
عبد الجليل : ( يصرخ بانزعاج ) اعملي حسابك .. أوعك ، العربية
جميلة : ( باستغراب ) العربية ؟ عربية شنو ؟ وينة العربية ؟
عبد الجليل يرفع البيضة حتى يراها المشاهدون ) ما ياها دي العربية.. ات ما بتشوفي؟ ..
عربيتي الكريبسيدا البيضا التي تحولت الي بيضة .
جميلة : يعني كيف ؟
حماد : يعني جنريتر ، جنريتر يا جميلة .
عبد الجليل : لا يا ابني مش جنريتر ، عربية كريسيدا .. اسمعو انا حااحكي ليكم الحكاية كله
العام طوالي، لم فيني صنف غريب من المخلوقات ، اسمهم السماسرة ، (يلتفت حوالية
ويحاول ان يخفض صوته) ، ديل بشمو ضحيتهم شم ، لمن تكون ملخبط ويائس ومحتاج
لكاش، بعرفو كيف يلمو فيك ، بشموك شم .
(بلتفت لي جميلة) عشان شايك الظريف دا . الحكاية بدت بعد ما شالوني للصالح
حماد : اشموك ليه ات عملت ليهم شنو ؟
عبد الجليل : يا ابني اشموك ..زي الكديسة ، بتعرف مكان الفارة بحاسة الشم .
حماد : ها ، فهمت .. يعني بطايوقم ، بعرفوا الزول الفارة من الزول التفتيحة لكن بشموك ليه ؟
ات عملت ليهم شنو ؟
عبد الجليل : يا ابني انت حكايتك شنو؟ وبعدين كيف الزول يبقي فارة ؟
حماد : مش اسهل من الكريسيدا تبقي بيضة ؟
جميلة : ( منتهرة ) حماد ، خلي عندك زوق يا اخي . ( تتلفت لعبد الجليل ) كمل يا سيد عبد
الجليل .
عبد الجليل : ديل ناس سحرة ، يجيك الواحد لابس جلابية وطاقية بلون الجلابية ، وما عندهم مستحيل ، عايز كاش ؟ عندك مقدم ؟ عندك شيك ممقنط ؟ عندك رهن عقاري ؟ ما عنك اي حاجة ؟ برضو ما في مشكلة . يجيبو ليك مرابي يدفع ليك مبلغ مقدم ويشترو لويك بضاعة ، اي بضاعة ... لساتك ، صابون ، زيت ، عدس ، وبضعف تمنا وبعدين يكسروها ليك وبنصف تمنا ، المشكلة انه لمن المرابي ياخذ المقدم بتاعو زايد فايدته وهم ياخذو حق سمسرتهم ، ما يفضل ليك حاجة ، وتكون مطالب بقيمة البضاعة كاملة .
جميلة : لا اسمح لي يا سيد عبد الجليل ، الزول البعمل كدة بكون دخل نفسو باره في الشرك .
حماد : يعني زول زي دا ، يا هو البقولو عليه فارة .
عبد الجليل : ما المشكلة إنك بتكون مزنوق وبعدين الناس ديل عندهم مقدرة علي الاقناع ما عادية ، مثلاً اذا شمو انك محتاجة لي كاش ، يلمو فيكي وبسهولة يقنعوك تقايضي كفتيرتك دي ببراد صغير وتاخذي الفرق كاش ، لكن الفرق بتبخر لانه الجزء الاكبر منه بمشي لي جيوبهم هم وات تبقي مزنوقة في حالتك. وبي كدة يقدرو يجوك تاني ويقنعوك تقايضي البراد بي كباية وتاخدي الفرق. وبعدين الكباية بي ملعقة ، .... لحدي ما تلقي كفتيرتك دي تحولت لي بقة شاي او سفة سكر .
( يدخل المغترب ـ يجلس ـ يطلب شاي ـ يضع يده علي خده ساهماً ، يواصل عبد الجليل حكايته ) .
يواصل عبدالجليل الكلام:
دا بالضبط الحصل لي عربيتي الكريسيدا ، اقنعوني اقايضا بكوريلا وآخذ قرشين اتبخرت القرشين وعادت الازمة ، فقايضت الكولايلا برقشة ، والرقشة بموتر والموتر بعجلة والعجلة بجدادة والجدادة ببيضة ، ومن اليوم داك ما نزلت منها ، سايقا ليل نهار .)
جميلة : ( متأثرة حد البكاء ) مسكين يا سيد عبد الجليل ، والله ما تستاهل ، طيب ، البيضة
وعرفنا قصتا ، .... الطوبة شنو ؟
عبد الجليل : دا بيتي الشافته عيبنيك ، دخل في نفس الدورة الشريرة ، تحول لقطعة ارض ، تحولت لكشك ، تحول لطبلية ، لي كارو ، لي الف طوبة ، لي طوبة واحدة ، ومن اليوم داك انا ما طلعت منه ... ايوه ، خايف من السماسرة يقوموا كمان يبيعونا باقي البيت وباقي العربية ، نمشي وين يعني ، الواحد لازم يكون حريص .
المغترب : والله الواحد ما بقدر يكون حريص في ها البلد ، أنا نفسي صار علي شيء قريب من هذا اللي صار عليك ، معاي سيارة نيسان سفاري جديدة شريتها من جدة بالتقسيط ، قلت اجي هنا وابيعها بالكاش ، ولي شهر اليوم ما قادر ابيعها ، كاني ياخي جايب لي جنا حرام ! لفيت كل الدلالات ، الليي يقول لك لو كانت لاندكروزر ، واللي يقول لو كانت جاز ، واللي يقول لك لو كانت كاشفة واللي يقول لك لو كانت بيضا.. الين كرهت اليوم اللي شريتها فيه ... وحين تعبت واجازتي خلصت ، صارو الجماعة يعرضون عروضهم هديك الغريبة . مرة بيجو قديمة زايد ثلاجة ، مرة كوريلا زايد كارو ، مرة جرار زايد غنماية امريكية ، اقول لهم ابغي كاش يضحكو علي ، قلت ما بدي.
حماد : منو الما بدي ، ات عايز يدوك شنو ؟
المغترب : انا ما بدي مغايضة .
حماد : اتو بتطلعو بلاد برة ، عشان تبقوا عجم ، تقول انا ما بدي وهو ما بدي وهي ما بتدي وهم
ما بدو.
المغترب : لا يا شيخ ، تقول انا ما بدي ، وهو مابدو ، وهم ما بدهم
حماد : علي الايمان دا اغرب راندوك اسمعوا ، وهسع ناوي تعمل شنو ؟
المغترب: ناوي اسوق ها السيارة النحس واقفز بيها من فوق كبري شمبات
حماد: والله ياخي السمك بدو.
(يخرج المغترب بعد ان يشرب الشاي) يدخل المخبول ممسكاً بمقود سيارة ويصدر من فمه صوت سيارة
المخبول: (يتقدم من المشاهدين) اففف ، بييب، سيك (يتوقف ويتفرس في المشاهدين، يدير راسه للخلف ويتراجع كانه يتراجع بسيارة) سيك (يتوقف) افففم بييييب، بيب يا ولد. ات اطرش؟ كبيت موية للحافلة دي الليلة؟. يا سلام يا ااخي مخك زي الزلط. عشرين مرة قلنا اهم حاجة للعربية الزيت والموية والموية عشان السمك ما يموت ولا مش يا جماعة ؟ اصلو انا عشان اعمرها رهنتها للبنك. البنك حجز الحافلة ودخلني السجن، بس اخوكم اصلوا ما كضب. مسكت البنك من رقبتو وحشرتو في الزنزانة ودورت حافلتي وطلعت اففففم ..بيب .. بيب (يستدير خارجاً).
(يمسك عبد الجليل الطوبة بيد والبضة بيد، يرفعها عاليا وتبظر اليها، ثم ينفغجر باكياً مقعياً علي الارض، يعود المخبول ينظر اليه يفرح ويطلق ضحكة عالية).
المخبول : طيب ما ياهو دا الدنيا بخير. لسع في ناس قادرين يبكو (يزيح عبد الجليل بيده
جانباً) ادينا فرصة معاك يا اخ.(يجلس بجانبه وينضم اليه في البكاء).
حماد : اليوم العالمي للجنريترز (يلتفت الي جميلة) ات عارفة انحن قايلين روحنا عندنا مشكلة
برانا .. لكن اظنها الحكاية عامة
( موسيقي ـ اظلام ـ ستارة )
نهاية اللوحة الرابعة
| |
|
|
|
|
|
|
|
|
|
Re: نص مسرحي مهدى لكل المهتمين وخاصة الفنان المبدع السني دفع الله (Re: حامد بدوي بشير)
|
اللوحة الخامسة
(ترفع الستارة ـ اضاءة ـ موسيقي ـ مكتب مدير المدرسة ـ المدير خلف مكتبه وعلي جانبي طاولة الاجتماعات يجلس الاساتذة)
المدير : بسم الله الرحمن الرحيم، نبدا اجتماعنا، طبعاً الازمة مش عاوزة شرح، والوزارة رسلت جواب كلفتنا بمهمة اختيار اسم المدرسة مع التحذير من اثارة الحساسيات المعروفة، انا عاوز اقتراحات محددة. (يرفع استاذ الجغرافيا يده)
استاذ الجغرافيا : بسم الله، والحمد لله، والصلاة والسلام علي رسول الله انا رئيس شعبة الجغرافيا. ونتيجة لاجتماع ممثلي القري اقتنعت بفشل التسمية علي اساس جغرافي. لذا اقترح تسمية هذه المدرسة بمدرسة السلطان كسوفرو الثانوية، اي علي اساس تاريخي، فالسلطان كسوفرو هو اخر سلاطين هذه المنطقة .
المدير : تفضل، يا رئيس شعبة التاريخ.
استاذ التاريخ : شكراً، اولاً انا كنت بتوقع من
استاذ العربية : (مقاطعاً) أبداً باسم الله وتكلم بالفصحي يا اخ العرب
استاذ التاريخ : شكراً علي الملاحظة يا اخ النوير
استاذ العربية : النوير ؟
استاذ التاريخ : ولماذا العرب؟
استاذ العربية : هكذا تقول العرب.
استاذ التاريخ : وهكذا تقول النوير.
استاذ العربية : انت انسان لا فائدة من مناقشته.
استاذ التاريخ : شكراً علي الاطراء يا اخ الداجو لكن قلي بصفتك عالم عربية قديمة كيف تكون فعلاً علي وزن تستفعل من كلمة استاذ؟
المدير : يا اساتذة خلونا في موضوعنا (يبدأ استاذ العربية يتس تس طوال الجلسة).
استاذ التاريخ : يا سادة، كيف نبعد الاساس الجغرافي لتسمية المدرسة؟ فالناس والاشياء في كل العالم بتنتمي للجغرافيا. يعني العايش في مصر مصري والعايش في قبرص قبرصي والعايش في ارض الصومال صومالي. وفي البلد الواحد تلقي الناس والاشياء بتتسمي تبعاًَ للجغرافيا. في مصر تلقي الصعيدي والطنطاوي والشرقاوي وفي السعودية تلاقي الحجازي والنجدي والتهامي، الا عندنا هنا، الناس والاشياء مسمية علي اساس غريب جداً، اساس لوني. فتلقي النيل الابيض والنيل الازرق وحمرة الشيخ والابيض والمسيرية الزرق. او تلاقي المدن مسمية علي اشياء زايلة ، غير خالدة ... بارة ، ودي معناها بقرة. كوستي، خواجة مات ليه مية سنة الغابة اللعوتة الشجرة. وكمان الطينة الزرقة
المدير :ارجو الاختصار يا استاذ .
استاذ التاريخ : نمشي لاسم السلطان كوسوفرو، دا سلطان كان مريض نفسيا، اجبر شعبه علي الحفر حول جبل ام كردوس لسنوات عشان يرحلوا الجبل من مكانه لانه مكانوا ما عاجب السلطان انا اقترح تسمية المدرسة علي اسم الجبل الذي هزم هذا الطاغية وتخليداً لذكري من ماتوا في المحاولة العقيمة.
استاذ الجغرافيا :ايها السادة انا ابن هذه المنطقة والسلطان كوسوفرو مناضل وطني ومجاهد كبير، واعداء الدين والوطن هم الذين يحاولون تشوية صورته.
استاذ التاريخ : ايها السادة، هذا طاغية معروف في التاريخ، سلم الناس امرهم له قسراً في حياته فلماذا نسلم له نحن بعد ان مات ؟ ايها السادة الموت لا يغسل الذنوب ولا يمنح المجرمين قداسة ليسقط كل الطغاة الاموات.
استاذ الجغرافيا يرفع صوته عالياً) عاش السلطان كوسوفرو.
المدير : ايها السادة ارجو الا تتحولوا بالنقاش الي مواضيع فرعية لقد سمعنا اقتراحيكما ـ الفرصة الان لاستاذ الرياضيات .
استاذ الرياضيات:انا عندي اقتراح بسيط جداً، وعملي في نفس الوقت فهذه المدرسة هي رقم ثلاثة في المحافظة، حسنا منعاً لاثارة اي نوع من الحساسيات اقترح تسميتها علي اساس دقتل فتصير المدرسة الثانوية الثالثة.
المدير :أعتقد مافي داعي لمزيد من النقاش، عندنا الان ثلاثة اقتراحات الاول مدرسة السلطان كسوفرو (يصفق استاذ الجغرافيا) والثاني مدرسة الجبل، والثالث المدرسة الثالثة ، نجري التصويت علي كدة، ارجو ممن يؤيد السلطان ان يرفع يده (يرفع استاذ الجغرافيا يده) طيب ارجو ممن يؤيد الجبل ان يرفع يده (يرفع استاذ التاريخ يده). اه طيب ارجو ممن يؤيد المدرسة الثالثة ان يرفع يده (يرفع استاذ الرياضيات يده ويلتفت المدير لاستاذ اللغة العربية) وماذا عنك يا اخ العرب؟
استاذ اللغة العربية : لو لم تقفل باب النقاش والاقتراحات لاقترحت عليكم بان تسمي هذه المدرسة مدرسة ابو الاسود الدؤلي، لكن حيث انه لا مجال لذلك، فاني امتنع عن التصويت، تس تس
المدير : وانت يا اخ الفنون؟
استاذ الفنون : انا مشوش التفكير الان، ولا استطيع ان اقرر، لذا سامتنع عن التصويت.
المدير : واضح ان الاصوات متساوية، هذا يعني ان صوتي انا هو الذي سيرجح الاقتراح ساعلمكم بقراري في نهاية اليوم، الان يرفع الاجتماع حتى اخر اليوم الدراسي.
(موسيقي ـ تخفت الاضاءة ـ يخرج الجميع ما عدا استاذ التاريخ وأستاذ الجغرافيا) .
استاذ الجغرافيا : انت شنو حكايتك يا استاذ؟ كانه في تار بينك وبين جدي السلطان كوسوفرو !!!
استاذ التاريخ : انا في تار بيني وبين كل الطغاة ، وبعدين يا اخي، شنو حكاية جدي دي، دا شخصية تاريخية، ما ملك زول، دا ملك للتاريخ، واثره كشخصية تاريخية واصل لكل الشعب.
استاذ الجغرافية:انت بترضي اقول علي جدودك همباتة ولصوص وقطاع طرق وتجار رقيق ؟ بترضي؟
أستاذ التاريخ: برضى.
أستاذ الجغرافيا: بعدين يا خي ديل ناس ماتوا وانتهو
استاذ التاريخ : الموت يا استاذ لا يغسل الذنوب، فمن مات طاغية فهو طاغية ومن مات همباتي فهو همباتي ومن مات تاجر رقيق فهو تاجر رقيق الي يوم القيامة .. بل بالعكس تماماً .. الذي يموت يفقد فرصتو ليتحول, ليصير احسن ، يفقد فرصتوا في ان يغسل ذنوبو
استاذ الجغرافيا : انا معاك، مافي زول يقدر يحسن صورته او يمسح ذنوبو بعد ما مات، لكن جدك يظل جدك، ولوكان طاغية او همباتي ما بتنفي انه جدك، كوسوفور جدي.
استاذ التاريخ : كونو جدك ما ينفي انه كان طاغية
استاذ الجغرافيا: خليهو في حالو يا اخي .. راجل مات وقابل ربه .. وبعدين يا اخي ما يا هو ات جدك الهمباتي بغنوا ليه في الراديو والتلفزيون لحدي هسع ... خيولو مشتات للكسب والجيب .. الكسب والجيب دا ما نهب مسلح !!!والغريبة ، يجيك واحد صوتو زي الرعد يهدر في الراديو .. ( الهمباتة ) كأنو الهمباتة ديل صحابة ما لصوص إبل!
استاذ التاريخ : انا ضد كل دا، ضد تمجيد الهمباتة وقطاع الطرق ولوردات الحروب القبلية، وضد غنانا المتخلف الذي يمجد هؤلاء .... وضد جدك كوسوفرو ( يضحكان ) لكن ، تعرف يا استاذ انا في حاجة محيراني في اسطورة جدك دا ، اسطورة هذا السلطان بتقول انه كان طاغية ومكروه لدرجة ان شعبه قد تامر عليه وتخلص منه بمكيدة التيتل. عارفا إنت طبعا. ركبوه فوق تيتل متوحش عنيف وربطوه تمام وفكو التيتل. التيتل جرى بيهو ودقش بيهو الغابة ومزق جسده بفروع الاشجار، لكن نفس الاسطورة تقول بان شعب الداجو كلة جرى ورا التيتل، وكلما وجدوا جزءً من جسد السلطان دفنوه ووبنو حلة إستقر فيها بعضهم. وهكذا توزعت قراهم علي خط مسار التيتل من دار فور لي سولية في عمق تشاد، طيب ، اذا كانوا بكرهوه ، ليه جروا وراه؟ ..(كمن يحدث نفسه) هذه هي معضلة اسطورة السلطان كوسوفرو, كانوا يكرهونه لدرجة انهم اوثقواه علي ظهر تيتل متوحش، وكانوا يحبونه لدرجة انهم ركضوا جميعاً خلف التيتل من دار الداجو حتى سوليه في تشاد، هل يركض الشعب خلف طاغية مخلوع؟ .. نعم قد يحدث ذلك، ضيعناك يا عبود، كانوا نوعا من الركض خلف الطاغية ... وعايد عايد ...
( يخرج استاذ الجغرافيا وهو يهز راسه في استغراب )
ليتني اعرف الحقيقة المراجع معدومة واساسها حكايات شفافية، لا شيئ اكيد في التاريخ او الاسطورة، كيف نعرف الحقيقة؟ فقط لو استطيع ان اقابله الان .. أن أراه ... أراه ..( ينكفيء الاستاذ فوق طاولة الاجتماعات ، مريحاً راسه علي ساعده وهو يردد "أراه" ). برهة قليلة وتدخل)
جميلةتحمل بيدها صينية عليها كبابي نعناع )
جميلة بصوت حنون ) يا استاذ .. يا استاذ جبت ليك النعناع.
(الاستاذ لا يرد ولا يتحرك، تجلس جميلة علي الكرسي المقابل له .. تتثائب يدخل حماد)
حماد : دا شنو ؟ ... قاعدة هنا مالك؟
جميلة : مالك يا زول. جبت النعناع ... (تتثأب) للاستاذ زي كل يوم ... (تتثأب) لقيته نام ... (تتثأب)
حماد : ( يتثأب ) معقول نام ... (يتثأب ) بعد العكة ( يكمل حديثه بعد ان يجلس ومن خلال تثاؤبه ) العكة دي كلها (تكون جميلة اثناء حديثة قد انكفات ونامت هي الاخري) هيه (يتثاءب) جميل ... ( يسند راسه علي الطاولة), جمييييييييل.. (ينام)
( صمت كامل وتخفت الاضاءة تدريجياً حتى الاظلام الكامل وستارة ) .
( نهاية الفصل الاول )
| |
|
|
|
|
|
|
|
|
|
Re: نص مسرحي مهدى لكل المهتمين وخاصة الفنان المبدع السني دفع الله (Re: حامد بدوي بشير)
|
الفنانة صاحبتي عاشة,
الفنانة البعيدة عنا مكانا فقط، تماضر
زعلكم عسل.
ولو عارف كدا، كنت نزلت البوست دا من زمان.
على الأقل خلى تماضر تتذكرنا بعد ما نستنا ولو بالزعل مننا.
وعموما الموضوع ما فيه قلع ولا حاجة. أنا قلت هذا النص مباح لكل من يرى أنه يستحق أن يعالج مسرحيا من المهتمين. وانتو طبعا في أول القائمة. والنص عندكم قبل أي زول. فقط أنا عايز أطلع من هوس الملكية الفكرية الجانا جديد دا وأتيح لهذا النص كل الحرية والكينونة المستقلة بعيدا عني. فأنا لم أعد أحبه
| |
|
|
|
|
|
|
|
|
|
Re: نص مسرحي مهدى لكل المهتمين وخاصة الفنان المبدع السني دفع الله (Re: حامد بدوي بشير)
|
الفصل الثاني
اللوحة الاولي
( عمق الخشبة ترفع الستارة ، ضوء خافت، اصوات صهيل خيول ووقع حوافرها، صرخات فرسان، تزداد الاضاءة تدريجياً، استاذ التاريخ وجميلة ينامون منكفئين علي كاولة الاجتماعات كما في نهاية الفصل الاول، كل الشخصيات في هذه اللوحة ما عدي الثلاثة المذكورين، يظهرون بابرول كامل مع غطاء للرأس لايبدو منهم سوي الوجه، علي المكتب يجلس شخص يرتدي اللون الاسود مديرا ظهره للجمهور وعلى ظهره لوحة مكتوب عليها بخط مقرؤ للمشاهد كلمة: (المسؤول)، حول الاستاذ ورفيقه يقف رئيس الحرس بلباس برتقالي وثلاثة من رجاله بلباس احمر. الحرس يحملون السيوف والحراب والدرق. في مقدمة الخشبة يقف حاجبان بلباس اخضر، يصالبان حربتين. يصحو الاستاذ وجميلة وحماد واحدا بعد الاخر ... يتلفتون حولهم باندهاش)
الاستاذ : دا شنو دا؟
جميلة : بسم الله الرحمن الرحيم انحن وين؟
حماد : اقول ليكم حاجة، ... اقروا اية الكرسي، مكتب المديور دا مسكون واعملوا حسابكم من الازرق دا علي اليمين دا هو الكلكي البقولوا زاتو
( ينهض ثلاثتهم نصف قيام )
قائد الحرس : ( صارخاً ) لا تتحركوا
( يتجمد المشهد في عمق الخشبة تماماً، كل في وضعه عند صراخ قائد الحرس ، يدخل الصحفي الي مقدمة الخشبة قادما من مقاعد الجمهور بلباس ابيض، علي ظهره لوحة مكتوب عليها (الصفي) وبيده دفتر وقلم، يقف امام الحاجبين موليا ظهره للجمهو ر)
الصحفي : اتسمحان لي بالدخول ؟.
( يهز الحاجبان راسيهما ببطء وبدون كلمات بمعني ل)
- انا الصحفي، الا تريان ( يستدير ليريهما اللوحة علي ظهره)، لا تخشيا شيئا، سيكون كل شيء علي ما يرام.
- سيكون الجميع مقتبطين حين ينشر غداً الحوار الذي ساجريه مع المسؤول بالداخل (صمت).
- انا احب الحراس والحجاب والسكرتيرات ومديري مكاتب المسؤولين ... انهم الدليل علي اننا امة متحضرة. (صمت).
- سوف اشيد بكما في افتتاحية موضوعي غداً بالصحيفة.
(صمت من قبل الحاجبين)
- ألا تفهمان ؟ انا جزء مما يجري هنا. انكما تمنعاني من اداء دوري. (يستمر الصمت)
- لماذا تجمدان المشهد بهذا الصمت العنيد
(يستدير الصحفي لجمهور)
- يا اخواني ما تشوفو البجم ديل، بالطريقة دي ما حيكون فيه فصل تاني من المسرحية.
(يدخل المحقق قادماً من مقاعد الجمهور وعليه لباس فضي. علي ظهره لوحة مكتوب عليها كلمة "المحقق").
- اهلا سيدي المحقق، جيد انك جئت الان، خذني معك الي الداخل.ساجري حواراً مع المسؤول حول هذا الحدث الفريد. يبدو ان الامر يحتاج لواسطة.
المحقق : هذا ممنوع كما تري.
الصحفي : (متوسلا) ارجوك سيدي، بقائي في عملي يتوقف علي اجراء هذا الحوار.
المحقق : وبقاء هذين (يشير للحاجبين) يتوقف علي قيامهما بمنع الناس من الدخول.
الصحفي : سيدي، ثمة صورة محددة الابعاد، يجب ان تظهر حول هذا الحديث وتصل الي الجمهور، انا الذي يرسم هذه الصورة بالابعاد المطلوبة، والا نكون قد تركنا الجمهور حراً ليرسم الصورة التي يرغب فيها وغالباً ما يرغب الجمهور في صور، مخيفة ... و ... فاضحة... و..... سياسية .
المحقق : (يطرق مفكراً لبرهة ثم يلتفت للحاجبين) دعوه يدخل، ربما يكون مفيداً
الصحفي : شكراً لكم جميعاً انتم لطفاء حقاً
(ينطلق الصحفي داخلاً وراء المحقق، ينتهي تجمد الشخوص في عمق الخشبة)
الاستاذ : دا واحد مختلف شوية. خلينا نسأله ... (يرفع صوته مخاطباً الصحفي). يا شاب ... لو سمحت ....
الصحفي: لو سمحت انت. أنا لم اجئ إلى هنا للتحدث اليك
الاستاذ : يا اخي عاوز ين نسألك، مجرد سؤال،
الصحفي : خطأ انا الذي يسأل ومسؤول عن صياغة الاسئلة، واسئلتي معدة سلفاً لتوجه للمسئول وليس للمتهم
الاستاذ : ( باستغراب ) متهم ؟ منو المتهم ؟
الصحفي : انت بالطبع، (يلتفت للمحقق) انه لا يدري حتى انه المتهم .
الاستاذ: لنفترض انني المتهم ، فلماذا لا تسألني انا المتهم.
جميلة وحماد : (معاً) يا اخي بس فهنا بالعربي الحكاية شنو؟
الصحفي : يجب ان تفهموا جميعاً، انا هنا لاوجه اسئلة، والاسئلة دائماً توجه للمسئول. السؤال يوجه للمسؤول والاتهام يوخه للمتهم، هذه هي القاعدة، وليس من شاني توجيه الاتهامات، هذه مسؤولية السيد المحقق.
الاستاذ : انت بهذا ترسم للجمهور صورة ناقصة ومشوهة
الصحفي : يا سيدي ان مهمتي هي تغطية الاحداث عن أعين الجمهور الفضولي، نقطي الحدث من كل جوانبه، ثم بعد ذلك نكشف منه ما يريد المسئول ان يكشفه للجمهور، الا تشاهد التلفزيون؟
الاستاذ : لدينا هناك لا تسير الامور بهذه الطريوقة، فالصحافة حرة.
الصحفي : دا علي انا ... بالله .. (ينصرف الصحفي من الاستاذ الي المسؤول). هلا تفضلتم، يا سيدي باعطائنا صورة لما حدث؟
(لا يزال المسؤول مديراً ظهره للجمهور. يبدو مشغولاً باوراق في يده. يرفع دون ان يستدير جهاز تسجيل من الارض ويضعه علي المكتب، يضغط علي مفتاح التشغل ويعود الي التحديق في ارواقه. ينطلق من جهاز التسجيل صوت الي ومحايد )
صوت الاله : التقط جهاز مراقبة الاحياء اشارة عالية التردد وبتحليلها اتضح ان احد الاحياء قد طور في نفسه رغبة ثقيلة في معرفة أمر يتعلق بما جري في حياتنا قبل الموت وفي نفس الوقت تم التقاط اشارة مصاحبة توضح ان هذا الراغب في المعرفة قد بدأ علاقته بما يريد أن يعرف عن طريق إطلاق الأحكام. وكما يعلم جميع الاموات فان اطلاق الاحكام قبل الحصول علي المعرفة، جريمة لا تمر دون عقاب، وقد نجحت اجهزتنا في ايقاظنا كما نجحت في تنويم المتهم واكملت بنجاح تركيب هذا المشهد. انتهي.
الصحفي يكون مشغولاً بالتدوين اثناء تشغيل جهاز التسجيل ثم يلتفت للمحقق) لكن سيدي، ما علاقة هذين بالامر؟ (يشير الي جميلة وحماد).
المحقق : ان استحضار هذين كان مجرد خطأ فني، او قل صعوبة فنية، فقد صعب علي اجهزتنا فصلهما عن المتهم، فهذه الفتاة قد اعتادت ادخال المتهم في احلامها وخيالاتها، والشاب الصغير قد اعتاد هو الاخر، ادخال الفتاة في احلامه وخيالاته، وعندما انمنا المتهم لم ينفصلا عنه، وناما مثله وحيث ان جريمة المتهم تتعلق بذات السلطان كوسوفرو ..
الاستاذ : (يرفع صوته موجها الحديث للمحقق) هل وجودنا هنا له علاقة بالسلطان كوسوفرو؟
المحقق : نعم، لقد اصدرت احكاماً قيمية ضد السلطوان وضد بعض اجدادك الموتي قبل الحصول علي المعرفة علي الرغم من وجود الرغبة في المعرفة ولديك.
الاستاذ : انا اريد مواجهة السلطان نفسه، اريد ان اراه
المحقق: لا نستطيع اجابة طلبك، لان الطلب غير محدد.
الاستاذ : ماذا تعني؟
المحقق : اعني انك لم تحدد الصورة التي تريد ان تري فيها السلطان
الاستاذ : لم افهم.
المحقق : بمعني هل تريد ان تراه كما كان يري نفسه، او كما كان يراه الاخرون؟ او كما كان هو يريد ان يراه الناس؟ أو كما كان في حقيقته البسيطة ؟
الاستاذ : (يبدو حائراً وغير قادر علي تحديد صورة السلطان التي يريدها) وما الفرق؟ فليحضر في اية صورة المهم ان اراه.
المحقق : هل تتحمل المسئولية؟
الاستاذ : اية مسئولية؟ وما هذا التعقيد؟ ( يتمم لنفسه ) اصلوا حا اشوف إمبراطور اليابان؟
المحقق : لم تقل، هل تتحمل مسئولية الصورة التي سيظهر بها السلطان؟
الاستاذ : (بغضب) نعم يا اخي، عايز اقابلو
(اظلام كامل مفاجئ مع اخر كلمة ينطق بها الاستاذ، أصوات رعود، برق، عويل، اصوات معذبة اضاءة كاملة).
الحاجبان صارخان) السلطان، كوسوفرو الجبار.
يخر الجميع سجوداً ما عدا الاستاذ ورفيقية. يدخل السلطان محمولاً علي محفة، في ثياب فاخرة وفي يده سيف مشرع.
السطان : (زاعقاً بغضب) اضربوا عنق كل من
الاستاذ : (صارخاً بفزع) لا (يتمجد السلطان) لا .. لا اريد هذه الصورة البشعة (اظلام كامل) غيروها
(موسيقي فرحة ـ اصوات اطفال فرحين ـ، اضاءة كاملة)
الحاجبان : ( بفرح ) أبونا السلطان كوسوفر المحبوب.
(يدخل السلطان ماشياً في ثياب زاهية. يتدافع الجميع لتقبيل يده ما عدي الاستاذ ورفيقية)
الاستاذ : (صارخا) لا .. ( يتجمد مشهد السلطان ومن كانوا حوله) لا. لا اريد هذه الصورة الزائفة، اريد الحقيقة البسيطة للسلطان، اريد ان اري الانسان كوسوفرو.
(اظلام كامل ـ مو سيقي حزينة، اضاءة كاملة)
الحاجبان: في (لا مبالاة السلطان وصل)
( يدخل السلطان في ملابس ممزقة. عليه اثار جروح وكدمات، وضمادات. احدي زراعية مبتورة والاخرى مجبرة ومربوطة الي عنقه. لا احد غير الاستاذ ورفيقية ينتبه لوجوده)
المحقق : هذا هو السلطان في حقيقته البسيطة بعد حادثة التيتل، لقد جمعت اجزاؤه استجابة لطلبك. سنعطيك فرصة التحدث اليه بعد التحقيق وقبل اصدار الحكم.
الاستاذ : حسنا، اريد أن اعرف تهمتي علي وجه الدقة. ما هي الجريمة التي تظنون انني قد ارتكبتها؟
المحقق : عفوا ً نحن هنا لا نعرف كلمة الظن هذه، انت هنا في عالم اليقين، لهذا ليس لدينا فصل في السلطات، المحقق هو الذي يصدر الحكم، جريمتك هي اصدار احكام قيمية ضد اجدادك قبل التزود بالمعرفة اليقينية، فانت في هذا اليوم ( يذكر اسم اليوم الحقيقي ) من دورة القمر رقم تسمائة مليون والف واربعمائة واثنان وعشرون، في اجتماع هيئة التدريس بالمدرسة مجهولة الاسم بام كردوس قد وصفت السلطان كوسوفرو بانه طاغية ومريض كما وصفت جدا لك بانه همباتي ومرتكب نهب مسلح. ووصفت جد زميل لك بانه تاجر رقيق. لكن قل لي، ماذا تعنون بالنهب المسلح؟ هل لديكم نهب اعز ل؟
الاستاذ : النهب المسلح هو ان يكون الناهب مسلحاً والمنهوب اعزل ُ
المحقق : مع اني لا افهم كيف يكون الرجل اعزلاً لكن هذا علي اية حال ضد اخلاق الفرسان، الهجوم بالسلاح علي شخص اعزل، هذه احدي بدعكم ولا شك، هل هذا ما تسمونه بالانقلاب؟
الاستاذ : (بانزعاج) لا ، لا ، ارجوك لا تخلط الاشياء.
المحقق : لا يهم، لا يهم، الان نستطيع ان نسمع دفاعك عن نفسك.
الاستاذ : حسنا، دعونا نبلور نقطة اتفاق بيننا، ليكون لنا لغة مشتركة، انا مستقبل بالنسبة لاجدادي، هم ماض بالنسبة لي، هل توافق؟
المحقق: نعم
الاستاذ : هذا الوضع لا يتيح لي ان ارتكب جريمة في حقهم بغض النظر عن وصفي لهم باية اوصاف. فهذا لن يلحق بهم ضرراً شخصيا. الاموات لا يتضررون من اشانة السمعة. لا أعتقد أن احدهم ينوي ان يترشح في الانتخابات القادمة. لكن بالمقابل...
رئيس الحرس مقاطعاً بغضب) سيدي المحقق، هذا الانسان يثير غضبي، إنني اشعر بالغضب، ترى هل نضيف اليه تهماً اخري، مثل .. آ .. آ .. ماذا يسمون احتقار القبائل الاخري ؟
المحقق : تقصد التفرقة العنصرية.
رئيس الحرس : نعم، نعم، الا تراه كيف يتحدث عنا؟
المحقق: لا . لا يمكننا توجيه هذه التهمة لهذا الشخص بالذات، فقد ثبت لنا ان جدته العاشرة لابيه قد جاءت مع جده التاجر الي عاصمة السلطنة، وكانت عظيمة الجمال، وقد رآها السلطان وأعجب بها. وانت تعرف ما كان يحدث في مثل هذه الحالات .. لا تهمة عنصرية، (يلتفت الي الاستاذ) استمر .
الاستاذ : بالمقابل، انتم ماضينا وهذا يعني اننا نتحمل وزر اخطائكم، فانتم جزء من تكويننا، انتم معنا باستمرار وهذا يجعلكم بعكسنا, قادرين علي ارتكاب جرائم في حقنا، فانتم تحت جلودنا.
جميلة : (تهرش جسمها) وانا اقول الاكولة دي من شنو ؟
حماد : يا بت ما تتضهبي، علي الايمان لو الجلكان الضارب طناش دا نقش كلامك، الا تشوفي حاجة.
الاستاذ : حماد اتكلم بي العربي ولا انطم، انحنا ما ناقصين
حماد : يا استاذ امنقا حاجة في الحالات الزي دي الرندكة عشان الفارات ديل يدقسوا وما ينقشو حاجة. رندكو امكن نجازف لينا شوية حقوق إنسان.
الاستاذ ملتفتا للمحقق) اذن انتم تستطيعون الحاق الضرر بنا لانكم ماضينا، اما نحن فلا، وانا اعتقد ان الضرر هو اصل الجريمة واساس العقاب، ومن هنا فانا لا يمكن ان اكون مجرماً في حقكم.
حماد : لو سمحت يا استاذ اديني فرصة مع الناس ديل، ديل ناس كانوا بتاعين فوضي، يعني شرزمة. نهب وقلع وهمبتة. انحنا مالنا ومالهم. (يلتفت للمحقق). خلاص يا سيد اتو سويتو الدايرنو في زمانكم وانحنا بنسوي الدايرنو في زمنا، كل زول حر في زمانه، يا لله، رجعونا حلتنا، ولو عايزين اعتزار، خلاص الاستاذ آسف وسافي التراب.
الاستاذ : حماد أرجوك، الموضوع اكبر من كدة وبعدين انا لسع ما اتكلمت مع السلطان عشان اعرف الحقيقة، وبعدين دي فرصة ما بتتكرر ... انا اول استاذ تاريخ في الدنيا يشاهد التاريخ حي.
المحقق : هل تعترف بالتهمة الموجهة لك ؟
الاستاذ : اعترف باعتناق رأي أري انه مقنع ولا اري انه جريمة فانا لا استطيع عملياً الاضرار بالاجداد الاموات.
المحقق : حسناً، انا اكتفي بهذا القدر.
حماد : يا استاذ بلا تاريخ بلا جغرافيا خلينا نتخارج، افرض الناس ديل سجنوك هنا انحنا نمشي نقول للناس شنو؟ سافر للتاريخ ويرجع بعد سنتين؟
السلطان : حسناً، حيث ان التحقيق قد انتهي، فاري ان البي رغبة المتهم، اتركوني مع الضيف.
(يشرع الجميع في الخروج ما عدي السلطان والاستاذ ورفيقية. يبدأ مع خروجهم اظلام تدريجي يكتمل باكتمال خروجهم. ستارة )
نهاية اللوحة الاولي
| |
|
|
|
|
|
|
|
|
|
Re: نص مسرحي مهدى لكل المهتمين وخاصة الفنان المبدع السني دفع الله (Re: حامد بدوي بشير)
|
Quote: أزيك يا حامد بدوى
والله قريت ليك مسرحية فى المنبر الحر اليوم و عجبتنى جدا ..
.. وقلت أهنيئك على المجهود و الابداع
و برضو قلت أسألك هل انت يا حامد كنت فى مدينة نيالا فى فترة السبعينات ؟
لانى بعرف واحد بنفس الاسم من تلك الفترة .ز
يا خى ولم لم تكن انت بتاع نيالا .. برضو والله مبدع و قد أثارت أعجابى مسرحيتك الرائعة .
وتسلم يا حامد
طبعا انا ما عضو فى المنبر و لكن قارىء
ولك الشكر
معاوية عبد القادر عوض |
الأستاذ معاوية عبدالقادر.
أكون كاذبا ومخاتلا إن لم أقل إنني طربت لثنائك على مسرحيتي. فلك مني كل الشكر وأرجو أن تواصل القراءة حتى آخر لوحة.
للأسف أنا لم أر نيالا في حياتي وأن كان لي منها أصدقاء زملاء دراسة رائعون. وأسطورة أم كردوس هي جزء من ضميرنا الجمعي الآن وقد أخبرني من أثق فيه أن الحفرةالتي عمل فيها شعب أم كردوس في عهد السلطان الطاغية كوسوفرو لا تزال باقية. وأتمنى أن أزور المنطقة يوما.
| |
|
|
|
|
|
|
|
|
|
Re: نص مسرحي مهدى لكل المهتمين وخاصة الفنان المبدع السني دفع الله (Re: حامد بدوي بشير)
|
اللوحة الثانية
(ترفع الستارة عن اضاءة كاملة. الخشبة خالية من الاثاث. حماد وجميلة منهمكان في حديث غير مسموع للمشاهد علي الناحية اليسري من الخشبة. علي الناحية اليمني يقف الاستاذ والسلطان)
السلطان : قل لي ايها الشاب ، اما الذي ورطك في كل هذا ؟
الاستاذ : لقد واجهتنا مشكلة اختيار اسم المدرسة الجديدة في ام كردوس. هذه المشكلة الصغيرة كشفت عن امور مخيفة. لقد كشفت لنا مدي التفكك في كياننا. لقد تشتتنا تماماً الي شعوب وقبائل.
السلطان : ولماذا اعترضت علي اطلاق اسمي علي المدرسة؟ فانان جزء هام من تاريخ المنطقة وانا عامل توحيد لاهل المنطقة.
الاستاذ : اعترضت لاني كنت اعرف انك كنت طاغية.
السلطان : يا ابني انا كنت سلطاناً ، ليس رئيس برلمان
الاستاذ : هل هذا يعني ان كل سلطان طاغية بالضرورة ؟.
السلطان : علي اي حال ليس بي الميلاد، كما انه ليس بيده ان يصير طاغية
الاستاذ : لم افهم
السلطان : يا ابني ان التجبر واوهام العظمة والطغيان، كل هذه امراض مثل الانفونزا والملاريا، اذا تعرض الانسان لعواملها اصابته سواء كان سلطانا او عسكري نظام عام، لكن التاريخ لا يذكر سوي الشراتي، هذه هي مشكلتنا معكم.
الاستاذ : لكن يمكن للسلطان ان يكون يقظاً ودقيقاً وعادلاًَ
السلطان : مستحيل .. العدل مستحيل، وهذا يعني ان الحكم مستحيل ايضاً
الاستاذ : كيف ؟
السلطان : ان الحاكم لا يستطيع عملياً ممارسة كل السلطة، لابد له من تفويض سلطاته لاناس اخرين. هؤلاء هم الذين يرسمون صورة الطاغتية ليصيروا هم طغاة صغار في ظلها.
جميلة : (تتقدم نحوهما يتبعها حماد) انا سمعت سيرة عسكري النظام العام، هم حتى للاخرة وصلوا؟
السلطان : (موجهاً حديثة للاستاذ) اتدري ان نساء أم كردوس صرن اجمل بعد موتي. (يضحك الجميع)
الاستاذ : (موجهاُ حديثة لحماد وجميلة) اتو بتتوسوسو في شنو؟
حماد : يا اخي زهجنا من كلامكم الزي كلام الرادي دا.
جميلة : يا استاذ اتو كان اتكلمتو بالعربي مالكم ؟
الاستاذ : قصدك بالدراجي
حماد : او بالراندوك. لكن يا جميلة ات عندك مشكلة لغات. يا تتعلمي عربية فصحي عشان تفهمي الاستاذ، ويا تتعلمي راندوك عشان تفهميني انا.
جميلة : انا كلامي واحد الدايرني افهمه اتكلم معاي بالعربي
حماد : بس اتي قولي انا مخي تخين وما بفهم لغات، بلا كلامي بلا كلامك.
جميلة : هيه يا حماد اوعك، والله انا انضف من مخي مافية ... انا قدرت احل ليكم مشكلة اسم المدرسة كان ما بس كلام القصير ما بتسمع.
الاستاذ : ( متنبهاً ) نعم؟ نعم؟ اتي حليتي مشكلة اسم المدرسة؟ وليه ما قلت لينا؟
جميلة : قلت للمتفلهم دا قعد يضحك علي ووقت جيت اقول ليك لقيتك نائم بعد داك ما عارفة الحصل شنو لقيت روحي معاكم هنا.
الاستاذ : طيب، طيب ممكن تقولي لي الحل الوصلتي ليه؟
حماد : حل شنو يا استاذ ؟ دي بت ضهب
الاستاذ : لو سمحت يا حماد خلينا نسمع رايا.
جميلة : طيب, طبعاً عندنا في ام كردوس ثلاثة قبائل كبيرة، بني سوحان وبني جمعان وبني مروان. انا قت ناخد الحرف الاول من اسم كل قبيلة. الإسم بعد بني لانها مشتركة في القبائل كلها ونضيف للاسم الجديد الالف والنون لانها برضها مشتركة. بس ما زبطت معاي طلعت كلمة سجمانة كدة
الاستاذ : (مفكراً، يعني الكلمة هي بني .. آ ... آ .. سجمان مش كدة؟)
حماد : ما قلنا ليكم دي بت ضهب .
الاستاذ :طيب، خلينا نعالج المسالة بالراحة
حماد : علي الايمان، دي الدكتور عبد الله الطيب ما يعالجها.
الاستاذ : خلينا نحور في ترتيب الحروف شوية، لو جبنا الالف والنون في البداية تبقي بني انسجم. نقوم نشيل كلمة بني لدلالتها القبلية
جميلة : اهه، بدينا الرطانة .. شنو الجاب الدلالة وسوق ام دفسو ؟
الاستاذ : دقيقة يا جميلة ... تفضل معانا كلمة انسجم ... ودي ممكن نعدل فيها ونطلع منها كلمة مناسبة
جميلة : (ترفع سبابتها بالحاح تلاميذ الاساس) فندي ، فندي ، فندي
الاستاذ :نعم يا جميلة
جميلة : نحول انسجم الي انسجام ، تبقي مدرسة الانسجام الثانوية
الاستاذ : (بانفعال) برافو .. يا سلام يا جميلة ات عبقرية بالسليقة.
جميلة : (بخيبة امل) الحمد لله بعد التعب دة كلو طلعنا سليقة
الاستاذ: دا حل لغوي كان مفروض يتوصل ليه اخونا استاذ اللغة العربية لكن هو فاض لي من ... يا اخ العرب
جميلة : (تسير متبخترة) انا ما قت ليك يا ولد يا حماد كان ما حلوها نسوانا ما بتتحل. اوعك تاني تتهاون بي ولا تتفلهم علي (تتقدم من الجمهور) انا جميلة حلالة المشاكل، في زول عندو مشكلة مكعكلة يا اخوانا ؟ (تلتفت لي حماد) ايه رايك يا حماد افتح لي مكتب لحل المشاكل بالقروش؟
حماد : (ساخراً) برضو فكرة وتعليقي ليكي عليه لافته كبيرة مكتوب عليها "جميلة ام حمد لحل مشاكل البلد" وتقعدي ليكي يومين في الكرسي الدوار وبعد داك تفتشي لي بالحل ليك مشكلتك
جميلة : مشكلة شنو تاني كمان ؟
حماد : كيف؟ ات ناسية ولا ما ناقشة. يومين ويجوكي الجماعة ... دايرين الضرائب، دايرين الزكاة، ودايرين دمغة الجريح ودمعة ام الجريح وترعة كنانة والرهد وعلف خيل السواري ودعم المحلية ودعم المحافظة ودعم الولاية ودعم الحرب ودعم السلام ... لحدي ما تلاقي نفسك مطالبة ملايين. بعدين يشيلوكي يرموكي في السجن. واحاتك مانديلا ما يحصلك. هوي يا بت اطلعي من الوهمة دي أحسن ليك.
السلطان : (لحماد) لا تسخر منها يا ابني. الحل دايماً عند المرأة
حماد : يا حاج قول كلام تاني
السلطان : نعم، المراة هي التي تصلحباستمرارما يفسده الرجل.
حماد : يا سلام امال سوبا دي خربها منو؟ خربها والد حضرتكم؟ ما خربتها مرة.
الاستاذ : لم اتو قع من جلالتكم بالذات هذا الراي عن المرأة فبعد كل فان امراة هي التي دبرت مكيدة التيتل ضدكم وتسببت في خراب ام كردوس
السلطان : حدث ما حدث في سوبا وام كردوس بسبب الرجل اولاً وعندما وصلت الامور الي حافة الكارثة، لجأ الناس للمرأة لتعطيهم افضل شكل للانهيار لتنتقي لهم احسن الكوارث. في سوبا كما في ام كردوس حددت المرأة شكل الانهيار ولكن لم تتسبب فيه
(يدخل المحقق وبيده ورقة يقدمها للسلطان)
المحقق : سيدي لقد اصدرنا حكمنا ضد المتهم، الان نرفعه لجلالتكم للمصادقة عليه او تعديله او الغائه حسب مشيئتكم.
السلطان : (يستلم الورقة يتمعن فيها يستغرق في التفكير برهة. يضحك وهو يهز راسه ثم يرفع راسه ويخاطب المحقق) اترك لي هذا الحكم وسوف اعلمكم بقراري لاحقاً
( يخرج المحقق. يخاطب السلطان الاستاذ ورفيقيه )
اسمحو لي سانسحب لاخلو بنفسي قليلا ( يخرج )
(يجتمع حماد وجميلة علي الاستاذ. كل واحد يمسك بيد من يديه في عاطفة حقيقية وتضامن)
حماد : شد حيلك يا استاذ وكفاية انك ما خفت دافعت عن رايك بشجاعة
جميلة : ( من بين دموعها ) انحن ما حنسيبك يا استاذ .
الاستاذ : ما تخافو اتشجعوا وخلونا نشوف اخر الحكاية
( اظلام تدريجي ـ يكتمل ـ موسيقي ـ ستارة )
نهاية اللوحة الثانية
| |
|
|
|
|
|
|
|
|
|
Re: نص مسرحي مهدى لكل المهتمين وخاصة الفنان المبدع السني دفع الله (Re: حامد بدوي بشير)
|
اللوحة الثالثة والاخيرة
(اضاءة كاملة. مكتب المدير. علي المكتب يجلس السلطان علي طاولة الاجتماعات. يجلس الاستاذ وجميلة وحماد في نفس اماكنهم عندما ناموا)
السلطان : طبعاً يا استاذ التاريخ، تريد ان تعرف بما ذا حكم عليك ؟
( ينتبه الجميع بتشوق وخوف )
لقد حكم عليك بان تصير حاكما مطلق السلطات لنري هل تستطيع ان تهرب من مصيرك كطاغية
الاستاذ : اولاً هذا مستحيل عمليا، ليس في ام كردوس الان حكام
السلطان : لا يا بني اتظن اننا لا نعرف ما يجري هناك؟. ام كردوس من البلاد القليلة في العالم التي يستطيع اي شخص من عامة الشعب ان يصير حاكماً مطلق السلطات
الاستاذ : ولكني لا اريد ؟
السلطان : ستريد بعد ان تتزوق حلاوة المسألة
الاستاذ : الان، انا اقول لك لا اريد
السلطان : ستكون طاغية دموياً لانك مثقف، وهذا اخطر انواع الطغاة لانك لن تستمع لرأي غيرك، وتستطيع تبرير اعمالك لنفسك.
الاستاذ : ( مفزوعاً ) سيدي ارجوك لا اريد ، لقد اخفتني
السلطان : من سلطاتي هنا ان اعفو عنك، ولكن فكر في الامر قليلاً
حماد : (متدخلاً) تعفي عنه بتاع شنو يا حاج، الاستاذ احسن حاكم لام كردوس، انحنا لاقين صاحبنا الاستاذ يبقي حاكم، قال اعفي عنه قال، والله كويس، العدالة لازم تاخذ مجراها.
السلطان : لم نسمع راي الجميلة بعد
جميلة : (مفكرة) الاستاذ يبقي حاكم ام كردوس !!!
حماد : (مقاطعاً) وانا فراش مكتب الحاكم، وات سكرتيرة الحاكم .. ويعني العاوز واسطة للحاكم ما قدامه غير حماد وجميلة .. وتقول لي تعفي عنه، يا حضرة السلطان، لازم تنفز الحكم فوراً. انا لي خمسة شهور سهريجي فاضي.
جميلة : انا بشوف انه الاستاذ يبقي الحاكم. مش عشان الكلام القالوا حماد دا لكين عشان يحل لينا مشاكل ام كردوس المكعكلة دي.
الاستاذ : احلها كيف؟ اذا كان اسم المدرسة قعدنا نلت ونعجن فيه خمسة شهور
جميلة : عشان ما كان فيكم واحد حاكم
السلطان : قولي لنا انت يا جميلة، كيف كنت تتصرفين لو صرت انت الحاكم؟
جميلة : اقول يا استاذ ؟
الاستاذ : قولي مالو نسمع ورانا شنو ؟
جميلة : وما في زول يقول لي سليقة ولا دمعة؟
السلطان وحماد: ( معاً ) قولي يا جملية .
جميلة : اول شيء اطلع قرار افضي بيهو ام كردوس من كل الناس، ما اخلي فيها نفاخ النار، اخليها فاضية زي ما الله خلقها فاضية.
الاستاذ : مش ممكن دي دكتاتورية، مش ممكن
جميلة : ممكن جدا، ولو سمحت ما تقاطع الحاكمة لمن تكون بتتكلم. كل زول نرجعه للحتة الجا منها جدو. الجاي من الربع الخالي نوديه الربع الخالي والجاي من البحيرات نرجعه البحيرات والجاي من واغ الواغ نرجعه ام طرقا عراض ... يعني حيفضل فيها شوية ناس، بس زي النقطة في البحر.
الاستاذ : دا كلام فاضي وخيالي .
جميلة : ما قلنا ما في زول يقاطع الحاكمة .. واول ما البلد تفضي نعمل اعلانات في التلفزيون والجرايد وكل شيء، اعلانات نقول فيها دايرين مهاجرين لاراضي ام كردوس الفاضية، يعني لوتري زي امريكيا، هي امريكا، احسن من ام كردوس في شنو؟
حماد : تفتكري يا جميلة، في زول عاقل كدي، يملا اورنيك الهجرة لام كردوس؟
جميلة : طبعاً ناس ام كردوس زاتم اول من يقدم طلب الهجرة . يكونوا اتعذبوا من الغربة يكونوا اشتاقوا لام كردوس
حماد : يا بت بلا ضهب معاك، اشتاقوا لي شنو فيها ؟
جميلة : يكونوا اشتاقوا للحاجات الما موجودة في بلاد برة، والممنوعة في بلاد برة
حماد : شنو الشي الفي ام كردوس وبرة مافي ؟
جميلة : الفوضي ووسيخ الشوارع بالتسالي وقصب السكر، والبزيغ بسبب وبلا سبب، تلقي الواحد تقول بتوحم طوال اليوم شبط، شبط يبزغ، ديل ناس في بلد بتتحملهم غير ام كردوس ؟
حماد: دا ما سبب كافي عشان يملو ليك ارنيك اللوتري، عندك سبب اقوي؟
جميلة: ايوة عندي. يملو ارانيك اللوتري لانهم بكونوا اشتاقوا للعفانات
حماد : نعم ؟ يا بت ات جنيتي ؟
جملية : اصله يا استاذ حماد بلاد برة اكلها ما فيه عفانات. والجماعة يكونوا خرمو لي عفنة الكول وعفنة التركين والفسيخ وعفنة الكجيك. ما تخاف ناس ام كردوس القدام هم اول من يملا ارانيك اللوتري .
حماد : طيب، نقول انهم ملو الارانيك وجو راجعين، طيب ما حيجو بمشاكلهم القديمة ... ويعني عملت شنو ؟.
جميلة : لا يا استاذ، انا بكون منتظراهم في المطار، وعندي شروط الواحد لازم يوافق عليها عشان اخليه يخش البلد .
حماد : كمان بتتشرطي
الاستاذ : (مقاطعا) لا يا سيدتي، لا تتشرطي ولا تتقطعي، كفاية وكتر خيرك، اولا اخراج الناس من بلدهم وحرمانهم من جنسيتهم محرم بنص الاعلان العالمي لحقوق الانسان
السلطان : لقد خيبت املي الان تماما. انت لن تصلح حاكماً إذا كنت ستبدأ عهدك بمثل هذه التراهات. ساعفوا عنك واعيدك من حيث أتيت .
الاستاذ : شكراً ايها السلطان، لكن لي طلب اخير ارجوك .
السلطان : ما هو طلبك ؟
الاستاذ : اريد تفسيراً مقنعاً لحقيقة تاريخية ، تبدو لي غريبة .
السلطان : وما هي ؟
الاستاذ : لماذا ركض شعب ام كردوس خلف التيتل تاركين ديارهم واموالهم مع انك واسمح لي، كنت طاغية. واذا كانو يحبونك لهذه الدرجة، فلماذا ربطوك علي ظهر التيتل اصلاً ؟
السلطان : هذا سؤال لن يجيبك عليه سوي العجوز حميرة
الاستاذ : ومن هي العجوز حميرة ؟.
السلطان : تلك التي دبرت مكيدة التيتل للتخلص مني، مع اني لا احب رؤيتها، ولكن سادعوها اكراماً لك (يصفق. يدخل حاجب وينحني امامه)
- استدعي العجوز حميرة
( يخرج الحاجب ويعود بعد برهة )
الحاجب : قالت اني ما نمشي إند الراجل الزالمة دي
السلطان غاضباً علي الحاجب) الله يخيبك يا هوان امش كري لي عجوز دا من دنقوسو وجيبي هني
( يبدو حماد مندهشاً ومهتما بهذه اللهجة )
حماد : ابو الزفت شوفوا الراندوك الاصلي، راندوك بتاع القرون الوسطي
( يخرج الحاجب ... ثم يعود وهو يجر العجوز حميرة )
حميرة : ( ثائرة ضد السلطان ) الله ما تخافي يا راجل، شيف الراجل دي اليكم الني !! سوا لينا ام كرنق كرنق. سوي لينا اذاب قبال يوم الهساب، ركبنا في تيتل وقلنا الله ريهانا منو ما نفأ. ومتنا وقلنا الله ريهانا من شقي دنيا. بردو ات ورانا ورانا ، كل شوية تناغمينا ؟
السلطان : اليكم الله دا مرة ولا امام جامئ ؟ مرة ما بفتشي لي كلام ، توا بتين اني ناغمتيكي قبل اليوم دي ؟
حميرة : هسا، قبل اشرين سنة بس، ما ناغمتيني أشان تسأليني من التيتل، كان دكر ولا انتاي ؟
السلطان : والله انا كان ندمان الي حاجة واهدة، ندمان ما قتاتي لي لسانك التويل دي في الدنيا
الاستاذ : يا جماعة ما في لزوم للمشادة دي ... وبعدين اتفاهمو معانا بالعربي بالله .
حماد : يا استاذ، كل ناس وعندهم راندوكم، ومافي راندوك احسن من راندوك، اتكلموا معاك براندوكك ليه؟ شنو الخلي راندوكك احسن من راندوككم؟
حميرة : (موجهة حديثها للاستاذ) أما انت يا ولدي، اهنئك علي رفضك. هذا الرجل الظالم كان يريد ان يأزيك (تبدأ حميرة في الخروج)
الاستاذ : لحظة لو سمحت .
حميرة : (دون ان تتوقف) عد من حيث أتيت
الاستاذ : ليس قبل ان تفسري لي لماذا ركض الشعب خلف التيتل
حميرة : ليس علينا ان نفسر لكم شيئاً ... نحن لم نجد من يفسر لنا
الاستاذ : انا ما ممكن ارجع قبل ما اعرف الحقيقة .
حماد : شوف يا استاذ بلا حقيقة بلا افلاطون، انحنا عايزين نرجع لاهلنا، كفاية جرجرتنا معاك لغاية هنا ولمن دايرين يبقوك حاكم هرشت
الاستاذ : ( بغضب ) يا اخي ما ترجع ، انا ماسكك ؟ وبعدين شنو جرجرتنا دي ؟ انا قدمت ليك دعوة عشان تجي معاي ؟
حماد : يا سلام امال الجابني انا وجميلة هنا شنو ؟ انحنا مالنا ومال الشراتي والتيتل وحميرة والحقيقة ( يقلد الاستاذ في نطقة كلمة الحقيقة )
الاستاذ : دي ما مسؤوليتي
حماد : هوي يا استاذ ... انحنا هنا في الاخرة . لا تمروحني ولا امروحك ، انحنا جينا عشان البت الضهب دي بتفكر فيك ، مش قبيل قالو كدة ؟
الاستاذ : برضو دي ما مسئوليتي
حماد : يا استاذ خليك اصيل ، ات قايلني ما ناقش ؟ تعمل للبت انك ما شاعر بيها عشان تتعلق بيك اكتر
.
الاستاذ : يعني كيف ؟
حماد : يعني لو كنت غازلتها بالمكشوف ، زي باقي خلق الله ، كان عرفت انك زول عادي وطلعت من وهمتها ، وات عارف كدة كويس ، عشان كدة كنت عامل مطنش .
الاستاذ : يا ولد بلاش قلة ادب
حماد : شوف يا استاذ دي الاخرة ، هنا ما في لف ولا دوران ووهمات ، ات لو كاشفت جميلة ، كان عرفت انك خاطب ونستك
الاستاذ : تمام انا خاطب ، عشان كدة ما ممكن يكون في شي بيني وبين جميلة
( تبدأ جميلة في البكاء )
حماد : معليش يا جميلة ، دا الانا من زمان عاوز افهمك ليه ، لكن خفت تفهميني غلط .
جميلة : ( من بين تنهدات البكاء ) برضو كو يس ، انا فقت في الوقت المناسب وعرفت الشاريني من البايعني
حماد : ( يحاول ان يخفف عليها ) يا بت شنو راندوك السماسرة دا ؟ شنو شاريني وبايعني وكاسرني في السوق ؟ ات كريسيدا ؟
السلطان : عفواً يا اولادي لقد نعست . ساخلد الي غفوة قصيرة خمسين او ستين عاماً ، قبل ان " يتثائب " يقع حادث اخر " يتثائب " فيوقظوننا مرة " يتثائب " اخري " ينكفي السلطان علي المكتب وينام ، يبدا الاستاذ وجميلة وحماد في التثاءب "
( اظلام تدريجي ـ موسيقي ـ ستارة )
النهاية
| |
|
|
|
|
|
|
| |
حامد بدوي بشير
طيفور
الزاكى عبد الحميد
عشة بت فاطنة
Tumadir
بكرى ابوبكر
فيس بوك
تويتر
انستقرام
يوتيوب
بنتيريست