يبدو أن كل حديث عن الحرب الدائرة في الدمازين (حول من المحق ومن المخطئ) -ترف. إذا ما فكرت في من لم يخبروا في حياتهم ذل النزوح.
أنا سمعت أن التاريخ يكرر نفسه..لكنني ما ظننت أنه سيكررها حتى تفاصيلها الصغيرة فكأني وأنا في العقد الأول من الالفينيات، أعود إلى أوائل التسعينيات. يا سبحان الله وكأني ركبت كبسولة الزمن!!
عادت إلى ذاكرة سمعي ذات النداءات الأولى: الكرمك وقيسان الكرمك وقيسان شدة ما كانت الحكومة تذكرهما (سيطرنا علي الكرمك وقيسان) (قوات العدو تحتل الكرمك وقيسان). همشكوريب وكل ذلك
ثم...نداءات الدفاع الشعبي (وهي أيضا جسم مسلح عسكري كان يجب أن يحل بموجب نيفاشا..ما علينا) ولبسنا الكاكي يالله ...1995 من جديد. أقول لكم نفس التفاصيل..نفس أزمة المياة وانقطاعها لأيام متواصلة، وأنا "أعتل" جرادل المياه من الطابق الأول وأصعد الدرج حتى الطابق الرابع، حيث كنت أسكن في أول "تجارب" المهندسة وداد "النحلة" في المعمار (!!!!) نفس أزمة السكر، هو ذاته شحيحا وعزيزا، وأزمة الغاز. لا ينقصني سوى رؤية طوابير البنزين لأوقن تماما أن الزمان قد استدار وعاد إلى نقطة بداية ما وها هي الحكومة تغلق الصحف الواحدة تلو الاخرى ولعلها تعيد اصدار صحيفة الانقاذ الوطني اعلان الطوارئ وحكم عسكري والخطابات العنترية ذاتها..نفسها
بي رغبة إذا أن اعدل عن قراري من دخول كلية الاداب وأن أدرس المسرح بي رغبة ملحة أن أخبر الزبير طه أن لا يركب الطائرة بعد عودته من القاهرة وأن مؤامرة تدبر له، فقط لأرى نتائج هذا التغيير (تجربة فيزيائية لا أكثر) أو أن أرسل رسالة إلى الترابي أن يحذر علي عثمان (للمتعة لا أكثر) وأن أجلس مع ابن عمي عثمان النجومي ثم اطلعه على مال الحال، أستعرض له رفاق الأمس، كيف أضحوا قططا بدينة تلعق النعمة عن شواربها
يقولون أن العاقل من اتعظ بغيره والشقي من اتعظ بنفسه هسي الحكومة دي يقولو عليها شنو؟
قالت من قبل الحسم العسكري..ثم بان وظهر جليا أن الحلول العسكرية لا تحسم ولا يحزنون ستساق هذه الحكومة إلى حرب استنزافية لا طاقة لها بها. التوقيت سيء حقيقة. مقبلون على موسم زراعي سيتعطل، وارتفاع الاسعار وعجز بالميزانية وتقلص الصادرات. مع ثورات بالجوار...ليس أذكى الحلول بصراحة
لعل السؤال الذي سأله المكاشفي خضر هنا هو أهم سؤال (ليه نيفاشا من البداية؟)
ارى أن البعض يقول هنا : مهما كان! هيبة الدولة وبسط نفوذها أن مجرد التطرق لمثل هذا الأمر ثانية بعد عشرين عاما هو إدانة للحكومةوأدعى لعدم الوقوف معها. فمنذ أن أذنت فوق رؤوسنا في يونيو 89 ببسط السلطة وقطع يد المارقين وصد المتربصين.ما رأينا شيئا من ذلك
كديه يا حكومة عايني لروحك حبتين في ال 20 سنة شالو منك حلايب وفي سابقة لم يسمع بها السوداني طوال تاريخه منذ المهدية..ضربوا بورتسودان والمتمردبن دقوا ابواب عاصمتك دارفور ليست بيدك ولا جنوب كردفان ولن تصفوا لك الدمازين
وأهو المتربصين والمارقين شالو منك الجنوب ومشو والأثيوبين يزازو في الفشقة ويغازلون القضارف زي ما دايرين ويرجعو ولأنك يا حكومة يا سلام عليك ما عندك قشة مرة مع زول جبتيهم كقوات دولية في الحدود علي ابيي المصريين يشيلو حلايب، تقولي ومال؟و مادايرين الفين فدان في أحسن موقع في السودان؟ حلايب؟ حلايب شنو ياخ...ما بينا حلايبات؟
انا بس بقول يا حكومة مش يمكن يعني يمكن...ألشغلانة دي ما شغلانتك (بالذات حكايةهيبة الدولة وبسط النفوذ ما اختصاصك) وحقو تخلليها لزول تاني عسى ولعل
وكأنني أركب نفس الكبسولة .. ولكن كبسولتي أعادتني لأخريات عهد السلطنة الزرقاء .. لم يستطع المك محمد ودعدلان من إكمال خط دفاعه الأخير لصد جيش الإمبراطورية العثمانية الغازي لدويلات السودان آنذاك بعد أن تفتت السلطنة الزرقاء في أواخر عهده الذي تولاه عقب الملكة القوية نصرة بت عدلان .. في عهده تلقصت حدود السلطنة التي بدأت من سنار عام 1405 حتى سقوطها على يد الأتراك في 1821 م بعد حكم دام 416 عاما .. تفتت السلطنة القوية إلى دويلات إنفصلت كردفان وأصبحت المسبعات .. وإنفرد الملك طمبل وأبناء عمومته من بعده صبير و شاويش بالإنفراد بالشمال والمك نمر وأبناء عمومته بالمتمة وكل سهل كنانة .. ودارفور الكيرا أضحت لوحدها لا ترغب في التعاون مع ودعدلان .. وقبيل لقاء العثمانيون بيوم واحد قتل ودعدلان بوشاية من أمرأة فأصبح الجيش دون قائد مما سهل للعثمانيين كسب المعركة الحاسمة وهروب جيش السلطنة .. ميسون سعيد بعودتك وكتابتك العميقة فالنيل الأزرق هم مشترك .. بالمناسبة إين زهير النجومي !
تحياتي استاذ عادل يا بلدياتي كبسولة زمنك رجعت لزمن، يوعي الغافل...لكن لا حياة لمن تنادي يا ريت لو بكتب بعمق.. أنا عارفة إني بكتب هسي بسطحية شديدة لكن الواحد يقول شنو؟ في اللحظة دي... ممكن الواحد يقول شنو؟ الاف نزحو...وهسي حيرجعو لأنو الوضع استتب...فعلا؟.. دا اخر ما حتسمعيهو عن عقار يا حكومة؟ متأكدة؟ ولا حيفضل المواطنين رهينين قراراتك الغير مدروسة والما بتحسبي نتائجها ما مشكلة نزوح-رجوع-نزوح -رجوع ما مشكلة ممكن حبوبة تفضل تتطلع للسما كل دقيقة، ممكن امي ترهف سمعها لكل صوت وتقول طلقة ولا...؟ ولانو الحكومة ما عندها القدرة تجاوب على سؤال محجوب شريف جاوبني كم تمن الطمأنينة؟
كل الكلام ما عندو معني
طب ليه أكيل للحكومة ومأاسأل ناس الحركة لأنك يا الحكومة لما عملتي الاتفاق دا عملتيهو باسمنا...لأنك إنتي الخلقت الوضع دا فأنا ما عارفة ليه أنا مفروض أدفع تمنو؟
زهير النجومي بخير..ولو إني دائما أراه كـ A big fish in a small pond
كديه يا حكومة عايني لروحك حبتين في ال 20 سنة شالو منك حلايب وفي سابقة لم يسمع بها السوداني طوال تاريخه منذ المهدية..ضربوا بورتسودان والمتمردبن دقوا ابواب عاصمتك دارفور ليست بيدك ولا جنوب كردفان ولن تصفوا لك الدمازين وأهو المتربصين والمارقين شالو منك الجنوب ومشو والأثيوبين يزازو في الفشقة ويغازلون القضارف زي ما دايرين ويرجعو ولأنك يا حكومة يا سلام عليك ما عندك قشة مرة مع زول جبتيهم كقوات دولية في الحدود علي ابيي المصريين يشيلو حلايب، تقولي ومال؟و مادايرين الفين فدان في أحسن موقع في السودان؟ حلايب؟ حلايب شنو ياخ...ما بينا حلايبات؟ انا بس بقول يا حكومة مش يمكن يعني يمكن...ألشغلانة دي ما شغلانتك (بالذات حكايةهيبة الدولة وبسط النفوذ ما اختصاصك) وحقو تخلليها لزول تاني عسى ولعل
عايني من ناحية تانية يا ميسون ح تلاقي الحكومة انجزت علي مستوى استدارة الزمن، من وين يعني كنت ح تلقي حكومة تعيد للشعب ستطاشر سنة من عمرو لي وراء. ستطار سنة يعيد الشعب فيها كلّ حاجاتو الاتخدت و كلو قرارتو الخاطئة. الاتمقلب من دخول الطب يرجع لعلم الاجتماع و الاختار زوجة والاختارت زوج بمواصفات ثورية و مواصفات ماتت بعد الطفل الاول يرجع يشوف واحدة طباخة و ترجع تشوف زول غني و يرجع الترابي للبشير مصحصح اكتر من اول و يقلب البشير و نعيش تجربة الترابي ، يدفس الاسلام في جوبا وجوبا تابى و يضغط الاسلام في جوبا و جوبا تابى و يقسم بي التقطِعو ياجوبا تسلم يا اموت دونها، لا جوبا تسلم لا الترابي يموت لا يفوت و يقعد معانا البشير في المعارضة، والبشير بدون موايد وفوائد ما بواصل و تكون واحد من فوايد كبسولة الزمن اتخلصنا منو. البشير ده سايكك psychic فالقاري لفنجان البلد يدرك ان سطاشر سنة تعيد الترابي و تطفش البشير وتديم الحرب و تطفش السلام و البشير كما معروف دوليا علي قول الكيزان راعي السلام لن يسمح للحرب في تعكير تمبلته و دعته..حال البلد ياهو زاتو ما اختلف برجوع السطاشر سنة دي. الحكاية حظوظ يا ميسون حظوظنا مع البلد دي ح تصطك في كل الاحوال، البلد دايرة اعادة صياغة سطاشر سنة لن يسفيد من الشعب زول غيري لأنو ح ارجع للماستر. المهم الزول الحريف جد بكون عرف ما عندي موضوع من السطر الاول.
متوكل سلامات زي في الفيلم ground hog day أو النسخة المصرية: الف مبروك
لكن أفتكر إنو المرة دي حيكون في تحسن في تحسن في سوء الأداء
يعني سكر مافي...زمان كان مربوط بشيء بطولي: الاعداء يتربصون، وإنت بتشرب الشاي مسيخ بتحس مع كل شفطة إنو دي معركة بتديرها مع الامبريالية وأعداء الاسلام هسي طاخ يقولو ليك الرئيس: في ناس بتقدر تشتري سكر وفي ناس ما بتقدر تشتري take it or leave it
نبهني أحدهم لحاجة عميقة في كلام الرئيس بتاع الاغنياء بيشترو السكر دا؟ إنو الكلام دا لو سمعوهو ناس بره حيتخلعو
يعني الغنيان عندكم هو البيشتري السكر؟ ما جاكوزي ولا يخت (وين اليخت الرئاسي؟ زمن ياخ بوركت يا من لبست الحكومة الطاسة وشردت بالقروش) الغنيان هو البيشتري السكر
Quote: عني سكر مافي...زمان كان مربوط بشيء بطولي: الاعداء يتربصون، وإنت بتشرب الشاي مسيخ بتحس مع كل شفطة إنو دي معركة بتديرها مع الامبريالية وأعداء الاسلام هسي طاخ يقولو ليك الرئيس: في ناس بتقدر تشتري سكر وفي ناس ما بتقدر تشتري take it or leave it
نبهني أحدهم لحاجة عميقة في كلام الرئيس بتاع الاغنياء بيشترو السكر دا؟ إنو الكلام دا لو سمعوهو ناس بره حيتخلعو
يعني الغنيان عندكم هو البيشتري السكر؟ ما جاكوزي ولا يخت (وين اليخت الرئاسي؟ زمن ياخ بوركت يا من لبست الحكومة الطاسة وشردت بالقروش) الغنيان هو البيشتري السكر
ميسون .. ياريت تواصلي في كتاباتك السطحية دي !! لكيما لا يأخذنا الجب .. قتلتني الردة من العمق إلى الى السطح .. بالمناسبة ماهي أخبار القشطة و اللارنجة والتين الشوكي ! فزهرة عباد الشمس لم تعد مشرقة هناك لفساد التقاوي و الأنظمة .. أما ثمار الماجو و الجوافة والليمون فتلك ثمار يستهجنها أهل النيل الأزرق .. رحم الله العم عثمان الدقار حين كتب على واجهة بصه سنجة ـ سنار ـ أبوحجار ـ الرصيرص ,, يا ميسون جنونا بالخدار يا ناس يالسكنوك جنوب الفونج .. لا أدري لماذا أشتم عبق الزميل كيكي هنا ... دمت عزيزتي
09-06-2011, 02:11 AM
خالد العبيد خالد العبيد
تاريخ التسجيل: 05-07-2003
مجموع المشاركات: 21983
سلام يا ميسون التاريخ اعاد نفسه بنفس مهازل الكيزان في بدايات حكمهم عاد العنف والمصادرة والقتل لا يستطيعون الحياة الا في ظل الحروب والعنف الحياة الطبيعية ستكشف زيفهم وفسادهم لك الاحترام
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
خالد العبيد
فيس بوك
تويتر
انستقرام
يوتيوب
بنتيريست