حدثني جدي الحادي عشر قال: هلآ هلآ يا ولدي الغُنا بقى هملة سااااكت، والناس خلوهو قطع الرحط. هسع زمان العريس اكان أصحابو جو العرس متأخرين يرقصُولُن العروس، والمابيغنولا غنوة سايق التراتر لا رقصت لا بتعرف الرقيص. في الآول، العروس بيدوها منديل في إيدا، و اوّل الغنايات يقولن: سايق التراتر بمنديلو اشّر، أها عاد هي تِنفنس وهآك يا تأشير بالمنديل. الزمن اكان زين يا ولدي. دحين إنتو هسع بتغنو للحديد باقي انا غناكم اللِيل الليّلة ده ما بخبرو. قلت ليهو، يعني يا جدي زمان كان بقيت شغال مُحرات. يعني بتسوق التراتر وتحرت للناس الجكس بينمرو عليك؟؟؟ قال لي: بالحيل يا ولدي. عليك امان الله يتلمن فوقك زي النحل.
أها يا جماعة، انا زي جدي ده غناكم البتغنوهو لحاج الهمر وبت عِلوي ماني خابرو، لكن الخابرو بقولو ليكم. الناس العارفين حق الليلة اليجيبوهو لينا.
رمضان كريم...
08-08-2011, 02:16 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
النعام آدم عندو غنوة بيقول فيها: شِتيلة قُريرا الفجر نبحن بوابيرا. فيها مقطع بيغني فيهو لسايق الكومر، لكن الظاهر زعلآن مِنو بالحيل عشان ختف محبوبتو، الكانت شغالة مُدرسة ونقلوها. طريقة الترحيل في المناطق ديك كانت بالدوآب، والحديدة الوحيدة الموجودة هي الكومر لتنقل المفتشين الزراعيين. طبعاً المُدرسة لمكانتها الرفيعة جابولآ الكومر مما جعل النعام يفك غبينتو في الكومر قائلاً: ربنا مالك الممالك يحرق الكومر الشالك.
08-08-2011, 02:52 AM
خالد العبيد خالد العبيد
تاريخ التسجيل: 05-07-2003
مجموع المشاركات: 21983
في عطبرة عندنا اغنية من الأغاني الخفيفة بتاعت البنات، بتقول: تنسانا، تنسانا يا علي لييييه تنسانا. فيها مقطع الفنانة بتقول: ركز العجلة برا الكورس: يا علي ليييه تنسانا. الفنانة: وبفوقا المجلة. الكورس: يا علي ليييه تنسانا. رغم إنو العجلة ما بتقدر تردف فوقا الحبيبة، لكن برضو حديدة مجدتها الأغاني. بعدين المجلة دي كانت نوع من الجنصصة، يعني في الزمن دآك لآزم تكون بتقرأ ومثقف. مجلة الإذآعة والتلفزيون كانت شئ ضروري، وكذلك المجلآت الوافدة من الخارج مثل، الموعد وسمر، وللبنات مجلة حواء...
08-08-2011, 08:19 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
سايق الفيات غنوة حديدة وهي تعتبر من أجمل أغاني الحديد السودانية. في نهاية الأغنية يقول العبادي عليه رحمة الله: ما نفرن تقول سابق الكلام إلفة عطشان قلت ليهن و صحت البلفة مافيش كاس قريب قالن لى دون كلفة تشرب بى كفوفنا لما تتكفى.
الزمن دآك كان زمن جميل ما فيهو كيزان. هسّع البنات ديل لو كان معاهن كوز كان طيرا ليهو في راسو. والله صحي...
08-08-2011, 08:32 AM
نادر النور آدم نادر النور آدم
تاريخ التسجيل: 04-29-2010
مجموع المشاركات: 1126
Quote: شتيلة قرير شتيلة قريرا الفجر نبحن بوابيرا حليل تغريد عصافيرا بلاها أصبحنا في حيرة حرام نقلك من الجيرة انتي يازهرتنا النضيرة دهب زادوه تجميرا لفة خاتم ضميرا شبيهة البدر المنيرة ليك تاجوج ماها سيرة نازلة العقلات ضفيرة تداعب رمان صديرا نظرتك قاسي تفسيرا فيها انذارات خطيرة ست الكل يا أميرة روحي كفاها تدميرا ضاقت وغلبت بصيرا خلاص اتحقق مصيرا يا صلاح أم شديرةتعود ونشم من عبيرا فراقكم زادني تعكيرا وبلاك ما عندي تفكيرا جدي البرعن أراكن سبيبك ولا ليل ساكن إنت طبيبي بس لكن رحل كت في القرير ساكن يفوح المسك من فاه مضمر واحسرتاه الفريع الهتف نداه تموع تتنى ما لاه عيني ما رأت نومة بقت لك سبب الحكومة تفضلي نوري يالتومة قريرنا معاكي شن لومة ربنا مالك الممالك يحرق الكومر الشالك ياظبية جنان مالك فارقت القرير مالك شبيهة الصيد في البوادي محكم عودك النادي فاطرك برقو عبادي الرزق يا جاهلة جبادي فراقك قاسي ألمني سواد عينيكي جنني على الأحباب ماب تحني فقد عقلي بقيت أغني ليك برسل تحياتي بضمنه موتي وحياتي أتكرن وأمشي فلاتي عليك يازهرة الشاطي فريع المحلب القايد عشانو أقاسي الشدايد سهامو رماني أوف صايد ألمي الراح جاني عايد بصلي وبعبد الباري أقيم ليلي وأصوم نهاري عشان الشاغلة أفكاري الشلوخة قضيب الكباري حليل الروقة والبسمة حليل الضامرة منقسمة شلوخ خديها مترسمة قامت وكل شي قسمة _______________ ترى من شاعر هذا النص؟ وشكرا للاخ معاوية
سلآم خالد العبيد، ورمضان كريم. ما لقيتلك تسجيل للنعام آدم للأغنية وتحصلت علي هذا المقطع، أرجو يعجبك. النعآم عليه رحمة الله فنان ذو إمكانيات عالية جداً في عزف الطنبور، فهو يعرف دروب سلوكه سلكة سلكة وزنقة زنقة. أضف إلي ذلك صوته المميز، والذي يستعمله عتاولة الفن للطلعة بالأغنية في بعض المقاطع التي تستوجب الطلوع. النعام آدم هو الفنان الوحيد الذي يغني الأغنية من أولها لأخرها بطبقة هذا الصوت. يعني بيطلع بيهو وينزل بيهو في آن واحد. شاعر النص الرائع هو المرحوم حسن الدابي...
08-08-2011, 10:28 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
أغاني البصات طبعاً كتيرة جداً، ونحن بنقول للبص الباظ، لكن المصريين بيقولوا ليهو الأتوبيس (ما عارف جابوها من وين التسمية دي!!!؟) وآحدة من أغانينا الخفيفة إستعرنا فيها كلمة الأتوبيس من المصريين بتقول: يا السايق الأتوبيس يا الشلت مني عريس بالله رجعو لي، هنا، هنا اعيش معاهو سعيد.
ظبية الباظ السريع وآحدة من أجمل أغاني الحديد. الزول الكتب القصيدة دي كان يفترض ينزل في قرية (نعيمة) يلحق شغلو لكن الزولة طرطشتو وخلتو ينزل في (ربك). كتير جداً الباظات بتخلي الناس يبدعو. الشاعر إسمو حسن أكرت.
يا ظبية البص السريع همت بيك وخايف اضيع قام من الخرطوم للجبل في دقايق حالا وصل همت بيك وخايف اضيع يا إلهي كيف العمل لو نزلت و ضاع الامل همت بيك وخايف اضيع قمنا تاني و فرم الرمال للقطينة جنة بلال قمت ليك ازحت الستار ضوه وجهك وزاد النضار همت بيك وخايف اضيع في نعيمه ابيت النزول شفت سفرك عايز يطول همت بيك وخايف اضيع سبت عملي تركت الفصول اصلو حسنك يسبي العقول همت بيك وخايف اضيع بعد ساعه وصلنا الدويم اشهد الله الباري العليم لو نزلت قلب السليم كان تقطع و اصابه ضيم همت بيك وخايف اضيع جينا للكوه و الكنوز قلبي يرجف و غلبو الركوز همت بيك وخايف اضيع لو نزلت هنا كان يجوز يمضي عمري و اصبح عجوز همت بيك وخايف اضيع في الملاحه تعرفت بي و في المرابيع زاد العلي كل قلوب الناس ليك تميل انت ايه و شبهك قليل في جزيرة ابا والامام تم بيني و بينك كلام همت بيك وخايف اضيع كان تعارف و اصبح غرام صار موده و هوي و انسجام همت بيك وخايف اضيع في ربك رحلتنا انتهتو رفعت ايدك لي لوحت و لما ايدك لي لوحت دون ما اشعر عيني بكت ليله هوي يا ليل ليله هوي...
08-08-2011, 01:26 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
وبمناسبة رمضان أهدي ليك أغنية القطر الشال معاوية يتفرتق زاوية زاوية
وإنت طيّب، يا نادر وجودك في الدنيا يندر. تصدق زاوية زآوية دي غنوتي المفضلة، ويقال انها قيلت في ود المدير. الكلآم علي عهدة القالو. ملحوظة: زاوية زآوية دي زي زنقة زنقة. والله صحي...
08-09-2011, 01:12 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
سايق البوباي غنوة حديدة سنينة. في معني البوباي قولآن: إنه بص هنغاري الصُنع، والروآية الأُخرىفيات إيطالي. وسايق البوباي ده قالوا شعرو كان سبيبي زي شامي كابور وكان زول وسيم.
يا السايق البوباي إشارة جاي ولا جاي ورّينا سوق جاي جاي غنّاي غرامنا الجاي يا روح غناي وحجاي إن جيتنا أو ما جاي أصلو العشوق رجّاي ورينا سوق جاي جاي سوق لف يمين وشمال رش في طريقنا جمال نميل محل ما مال أصلو الجمال راس مال ورينا سوق جاي جاي أعبر طريق لي طريق الشوق معاك مشوار ما بين فريق وفريق نرعالك ألف جوار ورينا سوق جاي جاي سايق الدلال أنجال درع الحصينة رجال جال طرفو آه لو جال وين نلقى ليهو مجال ورينا سوق جاي جاي فتحنا باب ورباب نحن الوراك أحباب ما لينا فيك أسباب غير كون هواك أرباب ورينا سوق جاي جاي...
08-09-2011, 08:20 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
دو، دو بي اللوري دو، دو بي يا ريتو كان طار بي اللوري.
في الدودوة دي يبدو إستعجال شديد، فالحديد بقدر ماهو يفرّق كذلك يجمع، وياريتو كان طار بي توضح إنو السرعة الجايبة الدودوة دي ما كفاية وياريت اللوري يسرع أكتر من كده. في دودوة وشوق وإلتياع في غنوة اللوري لا يخفى علي المستمع.
08-09-2011, 11:33 AM
ود الخليفه ود الخليفه
تاريخ التسجيل: 07-21-2002
مجموع المشاركات: 3178
ايّ حديدة يا ود الخليفة. طيارة، سيارة، ترتارة، بس مهم تكون مدردقة. جروح قلبي الأبت تبرا تومي شالتو الزهرة. عليك الله شوف الحديد ده دآفر كيف!!!. عليك أمان الله لآمن الغنوة تشوفا رِهاب رِهاب. ود جبرين بيوقع لك الزهرة:
08-09-2011, 12:58 PM
ود الخليفه ود الخليفه
تاريخ التسجيل: 07-21-2002
مجموع المشاركات: 3178
Quote: دا كان زمان يا خوي حسع،حسب سمعي، البنات بقوا بي يردفوهن عاااااااااااااااااادي
بوست جميل ومتابعين معاك
سلآمات يا مكي، ورمضان كــــــــريم. ارجع البصر كرتين يا مكي، ديل بيكونن مواتر.
يا أخي الأغاني برضو مجدت السواقين. والغنايين غنو فوقُن كتير، ومثال لذلك النص الأوردو ود الخليفة فوق. برضو اذكر أُغنية يا سمير قوم بينا علي مهلك. زي ما في ناس دايرين الحديد يطير طيران برضو في ناس دايرين الحديد يمشي الهوينا. يرطن الحديد وكلٍ علي هوآه.
واللآ شوف تُفاح تُفاح بُري والوز العايم علي صدري من الخرتوم ظهرت بحري
يا سمير قوم بينا علي مهلك واللآ علي مهلك مصير الدنيا يوم تهلك
الرحلة وين في جنينة والكأس الداير حولينا وديك شمبات ظهرت لينا.
اللهُمّ إني صايم.
08-09-2011, 01:09 PM
ود الخليفه ود الخليفه
تاريخ التسجيل: 07-21-2002
مجموع المشاركات: 3178
Quote: والشيخ عبد الرحيم البرعي قد اجاد في وصف البوكسي في سفره للحج
وكذلك وصف الطائره السعوديه والطائره السودانيه
موش حديد برضو
رحم الله شيوخنا يا ود الخليفة. كما ابدع الشيخ البرعي في البوكسي، ابدع كذلك الشيخ ابو كساوي في وصف الجمل في رائعته قالوا الحجيج قطع. احييك يا ود الخليفة وأنت توثق لهذا الأدب الرائع ومعاك متابعين متابعة لصيقة...
08-10-2011, 07:32 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: طبعن يا ابن خالي تذكر ان منطقتنا غنية بهكذا أغاني حديدية بدأ من يا سواقو ليه شلتو من البيت لمدرستو. و في الباص السريع يوم داك ياحباني جدد قلبي حبي معاك يا حباني. و يوم الرايقة قومتو به في ابوسليم نزلتوبة(دي زي مرقنبو قرنبو) .... جاييك
سلآم يا بن عمتي، ورمضان كريــــــــــم. يوم الرايقة دي اظرط من مرقنبو قرنبو. هاك ود مديني في حديدة بين الجول وكدباس:
باظ الجمعة يومو القام خلآ الدمعة طول العام تبكي وتشكي باالآم
صادفها أسماعين دق بوري حنين خلآ أرض الجول في وحيح وضنين
الزهور حزينة مالآ يبكي جيلها وخدارها
من عينيك يصيب نشاب والباظ داخل الحاجاب
شايلة الريدة كل الريدة والباظ خاشي أبو كبيدة
حلة يونس جاها مرور يا اسماعين صباحك نور
من جاد الله شال إتنين ركبوا للدروس طالبين
شايلة الريدة والإحساس نزلت منو في كدباس
يا ابو السارة جوكم ناس حنين والخشيم وناس...
رآجيك...
08-10-2011, 08:18 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
البابور جاز وآحدة من أغاني رقيص العروس زمان. كانوا بيغنوها مشجعين فريق الأمل عطبرة لمان يكونو لآعبين ضد فريق الشاطي: دوّر بينا البلد دا نحرق الشاطاب بصفيحة جاز.
وبيغنوها في السيرة الكانت زمان جزء من مراسم وأفراح الزواج. بيأجرو مجموعة بصات وتكاسي ويطوفو بيها في البلد. والأغنية دي بيغنوها لسواقين الحديد...
08-10-2011, 08:22 AM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11825
كلماتالمرحوم محمد العوض/ غناء عبد الواحد مديني لي بلادي ماشي زيارة خايف من عذابه وناره ******* من الباوقة تلقى اشارة عاماها البلد بانوارها في حلة نوير وجوارة تلقى الحور جمال ونضارة ******* من الباوقة بمشي مرور اقيف في الجول مع البلور تلقاهو الجمال مسحور وباين فوق جبينن نور ******** من الجول مشيت فتوار الزوق والشباب الحار يا الله الكريم ستار ومن لحاظن أحسن نار ******** بمشي الضيقة واتأمل تلقاهو الشباب الجمل يا اله الكريم استر حاملات في صديرن تل ****** ياود حضري انت براك الزوق والجمال عماك حاملة الغيمة ديمة سماك مكتول ماحرام انساك
08-10-2011, 01:29 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
انتو يا ناس عطبره زمان ما كان عنكم دكاتره ما مزيفين؟
السيهان بيرد دي افتكر اول تعاون كوري سوداني زمن النميري وكانت خاصه بالدكاتره قبل اللادا
نحن يا ود الخليفة دكاترتنا من يومُن مزيفين وبيركبو عجلآت رآلي. العرفنا بالسهان بيرد شنو كمان!!!؟؟؟ يا اخي حسن خليفة الله يرحمو رآكب عجلة رآلي لحدي ما مات، رغم إنو كان زمانو كللللو يغني: سووووق يا سوآق بي شارع السوق يا سوآق...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
معاوية المدير
خالد العبيد
نادر النور آدم
ود الخليفه
mekki
MOHAMMED ELSHEIKH
طارق جبريل
فيس بوك
تويتر
انستقرام
يوتيوب
بنتيريست