دعواتكم لزميلنا المفكر د.الباقر العفيف بالشفاء العاجل
|
|
 قصة جاسوس سوداني روّع السفارات العربيـة بامريـكا..USA
|
بدايــة القصة وسبب الإكتشاف المذهل الذي سجلته براءة اختراع خاصة بي
عن مجموعة من السودانيين الذين يذهبون للغرب الامريكي تحت غطاء ودعاوي مختلفة
ونحسبهم هينين وحقوقهم منتهكة ساكت وهم في الاصل رجال اشداء اقوياء دهاء ماكرين
بعضهم عضو في الماسونية وبعضهم جواسيس وبعضهم جنرالات بالجيش الغربي وبعضهم
سحرة ومفككين للطلاسم ومعالجين بالارواح.. وبعضهم هو المسيخ الدجال بذات نفسه ذهب هناك
لكي يستقوي فقط ..
كل ذلك تجدون بدايته هنا...
نادو لِي( عَشِّي )
وهنا انا سوف اعود بكم للوراء.. ذاكرة الايام او حدث في مثل هذا ايوم
لتعرفوا كيف ابتدأت الحكاية ونسير معها خطوة بخطوة حتي يومنا هذا..
د. حيدر فاروق .. الاخ الغيــر شقيق لـ د. نبيل فاروق
|
|
 
|
|
|
|
|
|
|
 Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
بدأت المهمة صعبة جداً علي الليوتينانت همشري بانديورا وهو يخطو خارج مطار الخرطوم ..
فكيف له أن يجد في هذا البلد شخص بالمواصفات التي طلبها منه رؤساءه في جهاز ( السي اي ايه)
ليكون عميلاً مزدوجاً بل كيف في الأساس سيعرف ان كان يجيد تجليد العناقريب وحفر الابيار ام لا؟!
تزاحمت الافكار حول راسه وهو يرقب المارة بعيني صقر من خلف نظارته السوداء والركشة تطوي به الحفر والمطبات وبرك المياه وسائقها غير مكترث وهو يردد خلف الفنان المغمور ( ناس الخرطوم بينحبو .. يقعوا للزول في قلبه )
وعندما قال الفنان - دي البداية من الكبري ......... - كانت الرقشة قد وصلت بباندويرا لمنطقة بري .. فطلب من السائق التوقف ونفحه خمسة جنيهات كاملة اضطر لان يكملها لثمانية تحت ضغط السائق ..ثم توكأ على فطنته وذهب لإنجاز مهمته المتلخصة في تجنيد جاسوس بمواصفات خاصة ،،،
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
بشري .. بشري يا صابرين .. شلوفتك فيها اللبن.. اقصد خشمك منه اللبن
- شوف يا بندورا.. من دربك دا تجغم كباية قهوتك وتسعل من البصات الماشة حجر الطير
رد عليه : كدي براحة نفسك ما ينقطع حجر طير شنو وبص شنو القصة شنو؟
- والله يا اخينا همشري انت وقت قلت لي جلاّد عناقريب وعاينت لعجيزتك واقعة من بنبري اتذكرت شيخنا الامام طوالي
اصلن يىخ في واحد بيجي البندر هنا كل كم اسبوع كدة يتسوق ويقضي مقاضيه ويرجع حلتو.. ووقت يجي بي هنا بيكرّب لي
البنابر دي ويجلد لو في واحد جديد ويأخد النصيب ويتخارج ..ومرة كدة بينضم معاي قال لي انه بيزرع في حواشة عمه
حتي ضوقني منها ويكة لايوقة جنس لواقة.. وشطتهم الا النووي الفجروهو..
- اها والدين كيف؟
ما تصبر ما تستعجل.. شيخنا الامام دا وقت يجي هنا صدف صدف بتصادف الصلاة شايف الكومسنجية والسواقيين طوالي بيقدموهو يصلي بيهم .. وزول قراي وتلاوته سمحة .. حتي مرات مرات بيخطب فيهم وقت يشوف لو شيتن عوجة والا بت مخشلعة ولابسة ماكويس .. وكمان امانة ما حسو عالي ونضام وقت يشوف ليهو مرة متردية والا نطيحة بتحارب شرع الله طوالي يذخر لسانة وهاك يا #####و كلام #####@% #### وو غايتو دا البعرفو عنو
- صاح بانديورا.. لا لا لا دا زولي تب .. دا البفتش ليهو انا في مجاهل افريقيا وادغالها هذه المحرجة
هذا ما سعيت اليه.. اذنك يا صابرين انا متخارج حجر الطير او امضي حقباً في طريقي حتي اظفر به
- طيب كمل جبنتك دي يا بندورا..
لا لا اشربيها انتي انا متخارج..
- يا اخوي متخارج شنو كدي جيب حق الجبنة دي بعد اتخارج.. خواجة مستنكح ..
ونواصل مع الليوتينانت همشري بانديورا رحلته الي حجر الطير ..
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
وجد الليوتينانت همشري بانديورا لوري متهالك .. غطت جوانبه بالخيش وحُمل بالجريد ..فأقلاه لمنطقة
حجر الطير .. فطفق يسأل الناس عن الشيخ الامام وهم يشيرون عليه بالذهاب شمالاً .. فتوغل بالشمال حتي
وصل الي دكان حمودة ود الجاغور ...
وكان حمودة ود الجاغور من وجهاء واعيان الحلة المحدودة المنازل والسكان .. تقع على طريق الاسفلت الضيق الواصل ما بين الخرطوم بحري حتي الدامر ..وود الجاغور بالاضافة لدكانه الممتلئ بكل شئ من البندول وحتي الفسيخ .. ومن حبال العناقريب وحتي بوهيات المهندس .. ومن جواويل البصل الاحمر وحتي مرقة ماجي كان بالاضافة لذلك يتميز بقصر القامة البيّن والكرش المتسعة وانتفاخ الجضوم يزين هامته صلعة صلعاء لا شبهة بها .. وهو بشوش هشوش يحب الضيفان ويرحب بهم بطريقته الخاصة ..
مرحبوووو مرحبووو يحبابو الخواجة آنست وشرفت نكرم مقامك ..!!
صاح ووهو يري الخواجة همشري يدلف لدكانه
- لو عندك ميرندا ساااقطة وقزازتها نازّة تكون ماقصرت ..
والله حظك كعب تصدق الكهرباء قاطعة ليها سبعة ايام..علا ممكن اديك كورية روب لو عايز..
-لا شكراً .. لو سمحت يا ...
- ود الجاغور .. محسوبك حمودة ود الجاغور
- اتشرفنا يا جاغوار محسوبك ..
فقاطعه ود الجاغور .. همشري باندورا .. صاح .. إإإإي بعرفك هي هههههه ما إياكا البتفتش ليك عن جاسوس
يشتغل معاكم في امريكا؟!
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
مظبوط كلامك يا جاغوار.. إلا عرفت كيف سعادتك؟؟
هئ هئ هئ أنا حمودة ود الجاغور والاجر على الله عارف يا خواجة مستكاوي.. إن طارت حمامة في السودان دا
بعرفها ليك ركت وين .. أمال قايل شنو انت ردارات دا عصر الردارات يا خواجة
كان كدة طمنتي يا جاغوار بتعرف واحد اسمه شيخ امام كدة حفّار ابيار ومزارع و...
ود الجاغور مقاطعاً :
وبيحّومر الازيار وبيجلد العناقريب ويدبغ الجلود ويأذن ويؤم الناس و..
الخواجة مقاطعاً:
Yes Yes..Yesssssss هسع وين الزول دا
- سارح لو بي بهمات ..
بانديورا : What??
- قلت لك سارح لو بي بهم ..
- كويس يعني شنو سارح لو بي بغم؟ .. يعني بيرعى ليهو في غنم بي هنوووك
بانديورا : Oooh that is wonderful وكمان رعاوي ..
يس يا خواجة ايوة كمان كاوبوي عليك امان الله العتود ان بقي شنو وشنو يطبو ليك من كراعو لمن يقول
الحقيني يا العافية ..
امممم طيب بلقاهو وين شيخ امام ؟
تفاجأ ود الجاغور باستعجال الخواجة وهو الذي كان يمني نفسه بنقاش طويل عريض يتناول الازمة المالية العالمية
واثرها في دكانه وجشع الراسمالية العالمية الامبرالية وكيف زادت اسعار الحطب حتي التجا الي استعمال الغاز
النار باااردة ولا بتنجض الاكل سمح حسب قول طيبة ام ولادو..
فقال له وهو يكتم صرخته..
دقيقة دقيقة قبال اوريك محلو وين .. انت يا خواجة قايل الدنيا دي مهدية ساي والا شنو.. نحن هنا ناس بيزنس مان يعني تيك اوووي .. بمعني تاني help yourself فهمتك .. شئ منك وشئ مني تبادل مصالح وكدة
عاوزو في شنو ؟؟
ما انت عارف يا الجغر .. انا عاوزوا جاسوس
عارفك عاوزو عميل لكن عميل وين و؟ ولي شنو؟ وتبع منو ؟ وتزرعوهو وين لانو ود الهدية دا إن كتلتوهو ما بيمشي باكستان ..
- باكستان شنو يا الجغراي يآخ بن لادن واتلحس تاني باكستان مافي نحن عندنا نقاط ومحطات اخري مهمة في السفارة السعودية وسوريا ودولة جنوب السودان وليبيا وطاكجستان و....
قاطعه ود الجاغور
أهاااااا فهمتك فهمتك يعني عاوزين زول فهلوي يلعب ليكم بلياتشو واي حبل ممكن يتشعبط فيهو..
- نعم نعم يا الجغور .. واهم شئ نركز على خلفية انه ديني وامام وكدة
- خلاص يا خواجة همشري بوريك ليهو علا بالمناسبة دي قول لي انتو بتتخارجو من العراق بتين ؟؟
( ###### ) كان رد الخواجة بانديورا في سره لود الجاغور لكنه قال له:
وهسع دخل العراق شنو بالموضوع دا يا ود الجاغور؟
- كيفن مافي علاقة يا خواجة ؟ ههههههه والله انت اتاريك داقس خلاس يا حبيبنا الخواجة المواضيع كلها مرتبطة ببعض ومنبع راسها فرد حبل زي ما قال شيخنا الامام ممكن يجلّد ليك عنقريب براس حبل واااحد ما يسلمك قعرو الا في الكراب حتي بالأمارة قال لينا الحلة دي كلها بتشرب من بيرة واحدة لانو العين الساقياها فرد واحدة ..ومصداقاً لي كلامو تيس الخلاء اخو تيس عبد المعروف هو العشر غنم الحلة دي كلها عشان كدة الغنم اللافة قدامك دي كلها بنات اخوات وبنات اعمام.. امال قايلها ايه انت ..القصة متصلة يا خواجة وحكاية كل غنماية معلقة من عصباتها دي غلط .. شنو هو مهدية ساكت
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
Quote: لكن بفضل تدريباتي على الصبر والاحتساب في سبيل القضية والمهمة والـusa فقد كظمت غيظي وسكتت ..
|
| Quote: تاني ان لحقت هابشت مونيكا لوينسكي دي فود الجاغور بيجي يمطرقك فوق اضنيك العراض ديل |
| Quote: ونواصل غداً مع همشري ولقاءه بالشيخ امام |
هسا بالله الواحد يقول شنو
الله يسامحك والدنيا رمضان يا حيدر
نلوك الصبر زي الليل همشري دا
يمكن نطلعلنا بقضية
نحولا عبر ود الجاغوار وحبيبته لوينسكي
يا الجيلي
| |
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: بله محمد الفاضل)
|
ألحق يا النجيض قُبال ما القصة تتم ، قلت : " وهنا سوف أعود بكم للوراء ذاكرة ( بتاء التأنيث ) لكم الأيام ....) أفو آود الزين بقيت تنتحل القصص البكتبنهن النسوان ولّ في اتفاق بينكم !!
قلت حجر الطير " تقع على الأسفلت الضيّق الواصل ما بين الخرطوم وبحري حتى الدامر " شكيت علي الله ، الخواجة ما ودرتو حجر الطير دي غرب النيل ، أكيد الزول القابلو دا مو الامام صاحبنا المطلوب وأكيد الخواجة دا حا يترفد ، وقّف الخواجة دا لغاية هنا وارفدو وشوفلو مدرسة في البندر يدرس فيها انقليزي وخلي الريس يرسل واحد أنصح منو عشان القصة تستقيم شوية !!
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: سيف النصر محي الدين)
|
الاعزاء ..
محمد الجيلي
عفراء سند
سفيان نابري
بلة محمد الفاضل
مولانا هاشم الامام
سيف النصر محي الدين
رمضان كريم تصوموا وتفطروا بخير..
Quote: وهنا سوف أعود بكم للوراء ذاكرة ( بتاء التأنيث ) لكم الأيام ....) أفو آود الزين بقيت تنتحل القصص البكتبنهن النسوان ولّ في اتفاق بينكم !!
|
يا شيخنا هاشم الامام الجملة تُقرأ هكذا ..
وهنا انا سوف اعود بكم للوراء.. ذاكرة الايام او حدث في مثل هذا ايوم
مالك النقطتين الفاصلة بين كلمة للوراء وذاكرة ديل ما بتشوفهن .. ذاكرة الايام برنامج في قناة الجزيرة مثله ومثل حدث مثل هذا اليوم.. والمعني واضح .. حاول انعش قرايتك قبال تتسرع..
بالنسبة لحجر الطير وما ادراك.. نسينا الظاهر نضيف ليك خلو الطرف المعتاد
(( كل الاحداث والاشخاص والاماكن في هذه القصة خيالية ومن نجر المؤلف .. اي تشابه بينها وبين احداث او اشخاص او اماكن بالواقع هو مجرد صدفة محضة .. ))
لكن برضو بنعتمدو ليك اعتراض مكتوب ..:):)
د. سيف النصر .. خليك محضر خير :):)
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
عند تسلل الليوتينانت همشري بانديورا من خلف الشيخ امام كان هذا الاخير يعيش احلام يقظته الخاصة المتعلقة بمغامراته مع نساء بني الاصفر والبطولة التي سيحققها وغنمه سارحة بالسهلة..
وضع بانديورا يديه الناعمتين برفق على اعين شيخ امام الخشنة وهو يقول بانجليزية قويمة:
حزر فزر انا مييين ؟؟!
رد شيخ امام : Beyonce
- كضباً كاضب .. حزر تاني..!!
شيخ امام : Kim Kardashian
- كضباً كاضب .. حزر تاني ..!!
شيخ امام : Jennifer Lopez
فصاح الخواجة همشري وهو يبعد يديه التي كادت ان تتقرح من خشونة اجفان الشيخ امام:
ياخوي شنو؟! انت كل مرة ماشي لي للتقيل وراء .. معاك ياخوي الليوتينانت همشري بانديورا من الـ U.S.
Army وجاييك هنا لغرض معين ..
وبكرم اصيل وطبع نبيل قاطعه شيخ امام .. دقيقة يازول كدي في الاول نكرم مقامك بعدين نشوف غرضك
نكرمك بكباية ليمون ؟!
- شكراً عندي حوامض..
طيب كباية شاي !!
مشكور شربتها مع ود الجاغور هسسسع دي
- خلاص اذن نصلي لي بيك ركعتين .. والجود بالموجود ..!!
فحسم الخواجة همشري الموضوع ودخل توووش:
شوف يا شيخ اما صراحة انا جايي قاطع بحار ووهاد ودا كلو في شان اقابل ها الوجه الصبوح والبسمة الوضيئة
ويا شيخ امام انت عارف طبعاً انه العالم حالياً وتحت ادارة طويل العمر ريغان امد الله في ايامه اصبح العالم قطب واحد لا يقبل المناصفةولا يرضي بالديكتاتوريات وانتهاكات حقوق الغير واليو اس ايه نصبها العالم اليوم حاي حمي الديمقراطية والحريات في العالم وفي سبيل مكافحة اي شكل من اشكال انتهاك حقوق الانسان نحن بنمد في شبكة بطول العالم وعرضه لمراقبة واستقصاء وتنظيم وعرض وتحليل المعلومات من اجل الفعل الهادف في سبيل قضيتنا
ونحن بصراحة يا شيخ اما احسن منك ما بنلقي .. وسألنا منك ومن اخلاقك وكرمك ومن اصلك وفصلك واحسن منك ما بنلقي .. دحين نحن طالبين منك تقرب مننا وتشتغل معانا في السي اي ايه ..!!
اندهش الشيخ امام وانعقد لسانه لحظات .. فكيف لهذا الكافر الفاجر الضلالي ان يأتي بكل بساطة لهذه الارض الطاهرة ثم يطلب معه العمل جاسوس لدولة الكفر والعدوان .. وبعد ان تمالك اعصابه اجابه بعاصفة :
إنت يا خواجة يا مبرص يا معفن ####### قايلنانحن يا ##### والله ##### و###@% .. #### & ###### هذا البقر المطلوق
##### متردية ونطيحة ##### وكمان ما تنسي ما اكل السبع وما ولغ الكـلــب #### قايل شنو الشعر الاصفر
والله المحذق والمضيق.. ###### يا عفن انت السروال##### بلا بنطلون معاك ##### هو زاااتو باسها بوسة ابو######
وســـخــان ###### %%% &&&&@@@ ايوة نحن كدة وسوف نؤذن ليكم من فوق سطح البيت الابيض .. ##عامر بن الجراح وعبد الله بن رواحة ... #####اخدو ليكم جكة وبتشوفوا... ##### هذا الكافر الفاسق...لاب لاب لاب لاب
واستمر الشيخ امام في ثورته..
بينما ضجت عينا الليوتينانت همشري بانديورا بالضحك والتمعت وهو يتكئ على جذع شجرة قريبة ويخرج زجاجة ويسكي من بين طيات ملابسه ويجغم منها وهو يتابع سيل الشتائم المتدفق من فم الشيخ امام وهو يضحك..
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: Kostawi)
|
مرحبتين دكتورة نجاة ورمضان كريم.. وحمد لله سلامة ومشتاقين :)
((تعرف لو الزول شحذ خيالو ممكن يطلع من كل كذبة في هذا المنبر في شان زول قصة سمحة ذي حقتك دي.. ))
الجماعة حيرونا يا دكتورة من قبال رمضان وهم شغالين انت وانا صاحبي وصاحبك وماسكين الورق فوق
تعايني الواطة غير دوهات وترايس مافيها شئ.. قلنا كدي نجدع ليهم دامة والا شايب كان يفكو اللعب شوية
كوستاوي
الكلمة دي غلط, مفروض تكون منصوبة ما مرفوعة.
أعد
انت الغلط الكلمة دي بالذات في محل رفع نائب فاعل بعد أن غيب الفاعل الحقيقي في حادثة نصب بنائب المفعول
ويمكنك ان ترجع لكتاب سيبويه الناصيب والمجاهيل في نوائب الدهر والافاعيل صفحة 652 الفصل العاشر فقرة 13
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
عندما ثار الشيخ امام وكال الشتائم للنظام العالمي الجديد وللمجتمع الغربي والحكومة الامريكية وهاج وماج وتطرف في اقواله عندها فقط اطمأن الليوتنانت همشري بانديورا لنجاح مهمته ..فقد كان الشك يساوره عندما قابله الشيخ امام بكرم ولطف اول مرة وعرض عليه ان يُضيفه بكوب شاي او ركعتين صلاة وخف من فشل مهمته.. اما الآن فهو على يقين من نجاحه .. لذا راح يجغم من زجاجته وينتظر ان يثوب الشيخ لرشده من غضبته هذا..
لم ينتظر طويلاً فقد ناظره الشيخ وهو يتساءل عما يشرب هذا المبرص..
- شوية ويسكي قزازة خاتيها معاي للحظات البهجة ..!!
-الويسكي دا دحين ماهو خمرة وحرام؟؟!
فرد الخواجة همشري:
حرام شنو يا ابوي الشيخ .. حرام العرقي حقكم البيهرد المصاريين وحرام مريستكم العفنانة الوســخانـة
الويسكي دا دا معتق يا شيخنا بيصنعوهو في بيئة زي الدواء ..شفت لك دواء حرام؟!
- لا ماشفت بس ما اسكر كثيره فقليله حرا
-يا شيييخ قلنا دي ما هي خمرة دا فرح وبهجة الحياة ودواء الكآبة ولاحزان كدي اخد لك بُقة بُقتين وان لقيتو حرام قول
يقترب الشيخ امام بعد تردد لم يدوم طويلاً ويتناول الزجاجة من الخواجة همشري ويكرررع جُغمتين متخمتين مشبعتين ثم يعقبهن بثالثة حتي يوتر في شرابه .. ثم يناظر للخواجة بانديورا ويبتسم .. فيبادله هذا ابتسامة بابتسامة وقد ضمن الشيخ في جيبه .. فقد عرف منذ البدء ان هياج وثورة الشيخ امام لم تكن حقيقية الا من كونها الم وعجز وحرة على ما لم يستطيع الشيخ امام إداركه ...
وقد تكلم الليوتنانت همشري بانديورا عن تلك اللحظة في مذكراته ( تايغر تائه في صحراء النيل ) فقال في صفحة 278 من المذكرات :
(ادركت منذ البدء ان ثورة الشيخ امام واعتراضه انما هو ثورة محروم وجائع للملذات التي لم يستطيع ان ينالها او يحققها ، وبالقليل من الفراسة الشخصية ودراسات علم النفس التي نهلنا منها اثناء تدريبنا وتاهلينا في العمل الاستخباراتي التقطت اشارات معينة بعيني الخبير ان ثورة الشيخ امام هذه يمكن ان نطلق عليها المثل السوداني - الكديس وقت ما حصل اللحمة قال عـفـنة - .. والكديس هو القط او الهر باللهجة السودانية المحلية .. وقد سألت ود الجغور في رحلة لاحقة عن قصة هذا المثل فحدثني بقصته حيث قال ..
انه التبري بت ود سيد احمد سمعت ذات عصر باكر دق نوبة ود سلمان الجزار .. وهي كانت عادة لديهم حيث لم يكن بطري ولا كشف صحي على الذبائح لا يحزنون فيعمد ود سلمان الجزار لدق النوبة عندما يريد ان يذبح تور او عجل ويحوم به بشوارع الحلة وفيراهو الجميع ويتاكدو من صحته وقوته وبعضهم يسيل لعابهم على حتة لحمة معينة منه وهو يخطو بقدميه امامه فيبادرون منذ الصباح الباكر لاخذ نصيبهم من اللحمة.. وقال لي ود الجغور ان التبري بت ود سيد احمد عمدت من صباحاً بدري لجزارة ود سلمان وتدافعت مع الرجال وشادت النساء حتي اخذت نصيبها من لحمة ذلك العجل (ربع كيلو كامل) دفعت مقابلها لود الربيع الذي يستلم القروش بالجزارة طرادة خضراء كانت تصُرها بطرف ثوبها ففردها ود الربيع وتأكد من وجود جميع الارقام بحوافها وامعن نظراته في الصورة التي تتوسطها للسيد الرئيس بكامل بهائه وعمته التي اعتني بلفها حول راسه الماكن ثم بعد ان اطمئن ود الربيع قال.. هيييييع اب عاجن دراج المحن .. واخذ نصيب الربع كيلو واعاد اليها مبلغ خمسة عشر قرشاً .. اخذت منها التبري شلناً كاملاً اعطته ابو الرقيع الذي يفرش خضاره بمسطبة الجزارة واخذت مقابل الشلن كوم بامبي .. وكوم طماطم .. وكوم بصل .. فهاودها ابو الرقيع بحفنة من قرون الشطة زيادة فوق البيعة لانها لم تساومه اليوم كثيراً .. يقول ود الجاغور وعند عودة التبري بت ود سيد احمد لمنزلها عمدت مباشرة الي خيشة فلفت فيها كيمان الخضار بعد ان ابعدت البصل ووضعته تحت الزير ثم اخذت ربع الكيلو بتاع اللحمة ووضعته بكورا في المشعليب .. وكانت كديستهم تراقب ما تفعل التبري وهي تتمني ان تدقس التبري وتنسي اللحمة في الكورية بعنقريب المطبخ .. لكن عند وضعه بالمشعليب.. تناومت الكديسة وهي تقول.. ( هاا هو زاااتو اللحم دا عـفـن) وذهبت مثلاً من ذلك الحين حسب كلام ود الجغور ...واليوم ادركت ان الشيخ امام يفتقد مباهج ومفاتن حياة الغرب ومرحها وانسها وما ثورته الا لسان حال كديسة التبري بت ود سيد احمد.. وصدق حدسي .. فما ان جغم كاسين من زجاجة الويسكي المتوسطة الجودة حتي طفق يكلمني عن العدالة والديمقراطية والحرية المفقودة في بلادهم وفي ديار المسلمين وكيف ان رسول الاسلام والدين الاسلامي اول ما جاء لتحرير المراة وحفظ حقوق الانسان ووضع هذه القوانين قبل الغرب بالف وخمسمائة سنة على الاقل وكيف انه وضع قوانين الحرب والاسري قبل قرون وحفظ المرأة وحررها ووضع العدالة الاجتماعية وفرض الزكاة وحث على الصدقة ...وووو
وكلما زاد في كلامه ليقارن بين الاسلام والغرب كمعادلة بين طرفين مختلفين ادرك بان الشرك قبض ) انتهي كلام الليوتنانت همشري ..
وفعلاً لم تكد تمضي لحظات اخري بين اخذ وعطاء وشد وجذب بين الشيخ امام والليوتنانت همشري بانديورا
وبالكثير من الترغيب من الليوتنانت والكثير من المطالب والرغبات من الشيخ امام
ولم تكد تمضي ساعة زمن اخري وبعد ان صلي الشيخ امام ركعتين صلاة استخارة لربه ليهديه الي قبول هذه الوظيفة
الا ونجد الشيخ امام يقف وكلتا يديه على صدره وعيونه تغرق في الدموع وصوته يتحشرج وهو يتغني ويهتف بصوت عالي:
Oh, say can you see, by the dawn's early light,
What so proudly we hailed at the twilight's last gleaming?
Whose broad stripes and bright stars, through the perilous fight,
O'er the ramparts we watched, were so gallantly streaming?
And the rockets' red glare, the bombs bursting in air,
Gave proof through the night that our flag was still there.
O say, does that star-spangled banner yet wave
O'er the land of the free and the home of the brave?
On the shore, dimly seen through the mists of the deep,
Where the foe's haughty host in dread silence reposes,
What is that which the breeze, o'er the towering steep,
As it fitfully blows, now conceals, now discloses?
Now it catches the gleam of the morning's first beam,
In full glory reflected now shines on the stream:
'Tis the star-spangled banner! O long may it wave
O'er the land of the free and the home of the brave.
And where is that band who so vauntingly swore
That the havoc of war and the battle's confusion
A home and a country should leave us no more?
Their blood has wiped out their foul footstep's pollution.
No refuge could save the hireling and slave
From the terror of flight, or the gloom of the grave:
And the star-spangled banner in triumph doth wave
O'er the land of the free and the home of the brave.
Oh! thus be it ever, when freemen shall stand
Between their loved homes and the war's desolation!
Blest with victory and peace, may the heaven-rescued land
Praise the Power that hath made and preserved us a nation.
Then conquer we must, for our cause it is just,
And this be our motto: "In God is our trust."
And the star-spangled banner forever shall wave
O'er the land of the free and the home of the brave!
(عدل بواسطة HAIDER ALZAIN on 08-07-2011, 10:19 AM)
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
عندما حمل الشيخ امام عصاه وهش بها غنمه وقفل راجعاص للحلة كان يعلم يقيناص ان هذه
ىخر مرة سيهش بها هذه الغنيمات فهو ذاهب لا محالة لبلاد العم سام .. وعندما يتذكر بلاد العم سام
يتبسم ويتمطق ولا زال طعم الجغيمات التي اخذها من قزازة همشري يحوزق في سقف حلقه... فيهتف
أوعدنا ياااااارب ..!!
اما الخواجة همشري فكان يسير بجانبه وهو يضع آخر اللمسات بذهنه في كيفية خروج شيخ امام من هذا البلد دون ان يثير شبهات الحكومة الفاسدة بالسودان والا اضطر ان يدفع اضعاف مضاعفة.. فهنا لا شئ ممنوع ولا شئ مستحيل كما يعلم همشري فحتي الانسان يُباع ويُشتري على قارعة الطريق مايهم هو الكاش وكم تدفع .. وهو بالتاكيد لم يكن يريد ان يدفع الكثير فما وفره من نثريات الرحلة التي صدق له بها العم سام يادوب تكفيه فطور كااارب بسوق الناقة والباقي يوفروا عشان يعمل كونيكت بالقاهرة ينقط بيهو للراقصة لواحظ.. لذا لابد ان ينحت راسه ويشحذ ذهنه
لطلع بخطة ذكية يخرج بها شيخ امام من السودان دون ان يثير شكوك احد من المسئولين المتبطلين بالخرطوم مابين وزاراتها ومطارها وكل همهم مقابضة الصادرين والواردين لاخذ الفيها نصيب..
وعند انتظارهم لمرور الحافلات لقطع شارع الزلط باتجاه دكان ود الجاغور مرت بهم قافلة الحافلات وقد علقت على جوانبها بلافتات دمورية خطت بخط حسن ومجوّد مكتوب بها
: ( قافلة المساعدات الانسانية للمتضررين من انكسار ترعة الامن الغذائي بمحلية البيادق وتهديم منازلهم بعد بني ولد عم الوالي قصره في مجري السيل الرئيس للحلة واتحول السيل للترعة ..
وان ينصركم الله فلا غالب لكم .. اللجنة الشعبية لدرء اثار الكوارث الحكومية ... فرع المنظمة الاسلامية للتبرير والدفاع ) ..
هنا صاح الخواجة همشري كما صاحت حاجة مليكة قبلاً
لقد وجدتُها .. لقد وجدتُها .. لقد وجدتُها .. عرفت كيف اخرجك من هنا الي امريكا عِدل يا شيخ امام وباقل الخسائر
وقطع شارع الزلط باتجاه دكان ود الجاغور وعينيه تلتمعان
ونواصل داً مع افكار الخواجة اليوتنانت همشري بانديورا الالمعية
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: Hashim Elemam)
|
مرحب يا هاني عربي
شكرا للمتابعة .. ونواصل
مرحب بمولانا هاشم الامام
| Quote: يا خوي مالك بتتكا علي راحتك البوست دا مشى الصفحة التانية حكايتك شنو ماتملينا القصة أناديلك عشِّي ولّ شنو ! |
حيرقّان يا مولانا الحيرقان ضبحنا ضبيح الليلة.. مافي فرقة الزول يفضفض ويحكي القصص دي كلو كلو..
غايتو اصلو ما بنصحك تتسحر بي فول وتقطع عليهو فحل بصل وتديهو شطة خدراء وجرجير وتكب عليهو زيت سمم
إن كان ولابد بنصحك انه الفول تمصر فيهو ليمونة وتهرس عليهو فصين بتاعين توم مع الشمار والشطة حمراء حتي تتسحر بيهو وابعد من الجبنة.. وبعد كدة تختمها بكباية شاي وتدنكل السفة وتتمدد على جنبك الايمن لانه النوم على الميامن من السنة :)
تحياتي
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
لوووول يا حيدر لعب شنو البفكو
الزول يقعد ليك بمسك الكيبورد دا يجننو فتل وشتل
فلان العلاني انت بتدق مرتك وتعمل لينا فيها هنا بتاع حقوق انسان
اها فلان الفلاني دا بيكون ما معرس ذاتو ولكن الفتال ممكن يقوليك كيف ما معرس انا حضرت عرسو
وكان جايب ترباس وغنى يار يت وكسرها بي يا عديلة يا بيضاء
ويمكن يمشي قوقول يجب صورة عرس
يخلي ليك فلان دا خشمو ملح ملح كيف يثبت انه ما حصل عرس
الكذبة بتتحبك بسرعة الزول في الطباعة شوبة شوية
وممكن يقوليك عندي شهود ناس جدة قالو مرة لما دقا زوجته مشت عند ناس فلان(اي اسم ما فارق هو الكذب بقروش)
يجي صاحبنا دا يحلف انه في حياتو ما مرق من السودان وجدة دي ما حصل جا جنبها..
لكن في النهاية منو ابصدقو ومرتو مشت لناس فلان الفلاني بجدة؟
يلا طوالي الكلام ينتشر بواسطة كل ادوات الشمار الشامل
يلا خطيبتوتسمع اها تجي تجدع ليه الدبلة في وشو وتقوليه تغشني وتقولي ما معرس وانت معرس وجبتا ترباس
غنى يا ريت وكسرها بيا عديلة يا بيضا واسع تقولي نعرس نجيب ساوند سستم لانه مافي قروش فنان
بهناك الحاج والحاجة يصلهم الشمار بالتلفون من ضهاري فيجي
يمة ناس سوداينز قالو الزول دا عرس انتي ما سمعتي؟
الام تقوليه بري يا يابا عرس كيفين؟؟؟؟؟
يقوليها ياخي كمان دقا مرتو ودوها لناس فلان الفلاني في جدة
الام تقوليه يطرشني والله..
الخ الخ الى كيف تصنع اكاذيب البورد
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: د.نجاة محمود)
|
إنت البوديك تاكل الفول والبصل والتوم في الحر دا شنو ، السيريال باللبن البرد المسكّر مالو ، وعصير التروبيكان مالو ، والفواكه مالَ ،تطير عيشتكن قدر ما يرفعوكن لا فوق تجو متخرتين ، ماك دايرلك كسرة بايتة بملاح أُم تكشو .
ياخوي عندي ليك قصة عن الجاسوس دا منجورة نجر صاح مُش زي حقتك دي المسويها من خشب الصناديق وأدوات نجارة قديمة شي قدوم مو مطرّق وشي منشار سنونو معوجات ومكسرات وشي فارة مصقِرة . ألكع تم قصتك دي عشان نديها فرصة تنقري قبال ما أنشر قصتي ألكع .
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: Hashim Elemam)
|
| Quote: يا حيدر الزين البوست دا بطش وتاني ما بتلقاهو أحسن تتم قصتك وللا قولي رافد . |
يامولانا .. شكلنا مداخلاتنا مع بعض.. انا بتم في القصة رغم نصيحتك المهببة القلتها لي امس..
يآخ تقول لي اتسحر بكستر.. اتسحرت بكستر ولبن رائب بشوية رغيفات الليلة التتفتف والنخّام ما يدي الدرب
وبعدين اي شئ مقبولة لينا نحن سواقين الدفارات في البلد السخنة دي الا البصاق والنخّام.. كل مرة فاتح الشباك وشافط هواء سخن ومالي ليك قزاز العربات الوراي موية..
غايتو دي ىخر مرة اسمع كلامك واتسحر بي كستر.. اخير الزول يرجع لسحور الفول .. والا يجهز ليهو كوارع من بدري كدي نجربها في السحور يمكن بكرة يمكن نعمل لينا قلبة قلبتين بتاعين بطيخ بالدفار دا..
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: ناصر احمد الامين)
|
مايحمده اليوتنانت همشري بانديورا في شيخ امام هو ذكاءه والمعيته وسرعة بديهته وتصرفه فهو كما قال كثيراً ولد ليكون جاسوس بالفطرة ...
فما كان على الخواجة همشري سوى ان يُشير لشيخ امام بما يريده بصورة عامة فيؤدي هذا الاخير المطلوب منه بكفاءة عالية مع القيام بتظبيط السيناريو والتفاصيل الدقيقة ويغني بانديورا مشقة التفكير فيها.. وهذا ما اتبعه شيخ امام وهو يدلف المكاتب بالخرطوم لتذليل صعاب خروجه دون ان يدفع مليم واحد حتي كانت المحطة الاخيرة وهو يهمس للمسئول الكبير ويقول :
- شوف يا شيخنا والله كلامي دا احسن منه ما بتلقي.. وبراك شايف شوال الدقيق بقي في السوق بي كم!!
- الله يهديك يا شيخ امام بس .. انت قائل الخواجات ديل داقسين ليك لدرجة لمن يصدقوا مكنتك دي..
ثم يآخ قمح ريجان دا بقي صراحة ما مرغوب بالسوق والكوتة يا الله وآمين تغطي ترحيلها وانت اكيد عاوز مسحة شنب
-يا سعادتك بيقولوا رزق قليل دائم خيرٌ من كثير منقطع ..ووجودي هناك كمزارع اولاً ووكيل مسؤول للمنظمة الاغاثية
وموظف بالقنصيلة وملحق ديني بالجالية وامام للمسلمين وغواصة وبصاص ليكم في كل منظمات المجتمع المدني والسفارات والطواقم الطبية ورسيبشن للشقق السكنية وموزع معتمد للصحف والجرائد دا كلو بيديني زخم زي ما انت عارف يا سعادتك وممكن اتحول ليكم للعميل 007 امام بوند او اقلاها ابقي انديانا جونز الجديد..!!
- والله حنكك سنين يا شيخ اما.. لكن بيني وبينك نحن اهم شئ عندنا زي ما قلت ليك العقيد المجنون دا عاوزين نلجمو شوية ودي طبعاً مهمة ثانوية ليك عشان نكف بيها عين الجماعة ديل لو سألوا منك اهم شئ انك تظبط شغل الكوتات زي ما اتفق ودا عبر جلابيتك اللابسها بتاع منظمات الاغاثة.. والبيشكك فوقك تلبس ليهو عمة الامام والخطيب بتاع المسلمين وتسلقوا بعشرة احاديث وكم اية من عينة إذا جاءكم فاسق بنبأ .. وهلمجرا
- خت في بطنك بطيخة صيفية ووقع الورقة دي خلنا نتخارج النششوف رزقنا ورزقكم في بلاد الخواجات عليهم وعلى من ولاهم لعنة الله الكفرة الفجرة..هههههههههههه
فرد سعادتو ضحكة شيخ امام الثعلبية الخافتة بضحكة اخري مترعة تفيض بالسلطة والسطوة ..
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
كان امر زراعة الشيخ امام وسط المجتمع السوداني والعربي الامريكي واعطاءه زخم في غاية البساطة حسب ما اورده اليوتنانت همشري بانديورا في مذكراته - تايغر امريكي تائه في صحراء النيل - حيث قال في الفصل الثاني صفحة 523:
((الشعب السوداني ذو طبيعة طيبانة وداقسة واي مكنة بتقسم فيهم ان شاء الله مكنة فيستو مسيحة تلاتة مرات .. والشعب السوداني مع دقستو وضهبانو دا عاملين ليك فيها اشفت ناس وتفاتيح وواقعين من السماء .. ومن هنا سمينتهم بتتوكل.. والمسؤولين السودانيين ادقس من شعبهم واعبط واهبل .. فزيادة على الصفات المكتسبة بالوراثة من شعبهم اضافوا عليها وههم السلطة المطلقة والقدرة على تحقيق المعجزات - ولعل اكثر ما يضحكني حتي الآن ادعاءهم بانهم سوف يؤذنون من على سطح البيت الابيض هههههه - ما علينا المسؤول السوداني رخيص وسعره في متناول يد الجميع من الدول فقط اذا عرفت كيف تضخمه وتنفخه ويمكن لأي صبي او فتاة امريكي ان يشتري اكبر مسؤول سوداني فقط بمصروفه الشهري وعدد من مجلات بلاي بوي .. ولعل ما يثبت صدق حديثي هو ما تم ذكره ابان العملية الظافرة عند نقل اليهود الفلاشا عبر السودان لوطنهم بأن احد كبار المسؤولين كانت رشوته في العملية عجلة رالي لأبنه ( فقط ) ولاشئ غيرها ..او يمكنك شراء المسؤول السوداني عبر ايهامه بانه رجل امريكا الاول واننا ندعمه ونري فيه البديل الاوفق لخدمة مصالح الامة السودان والعالم الحر وامريكا بالطبع فلن يصبر حتي يحمل جميع ملفات مخابرات بلاده واوراقها السرية ويهرول الينا وكرشه ترتج ليسلمها الينا بين طيات السحاب وهو يحمد ربه كثيراً ان وفقه وجعله في موقع يسمح له بتقديم هذه الخدمة لنا..
اما مجتمع السودانيين الذين يعيشون بالخارج وخاصة لدينا بالغرب فهؤلاء اظرط واضل سبيلا .. فبالاضافة لما ورثوه من سيئات الشعب السوداني التي تجري في جيناتهم فقد اضيف اليها الانبهار والانشداه والدهشة فتجد بعضهم يعيش لعقود بالغرب ومازال للآن فاغراً فاهه والذباب ينوني داخله وهو يهتف للراية المرصعة بالنجوم .. وبعضهم حصل له انفصام بالشخصية فإتخذ كهف من كهوف تورا بورا في قلب واشنطن .. والاهم من هؤلاء وهؤلاء اولئك المقتنعين باسطورة اننا نعرف مقدرا تنفس اي فرد ولا يغلبنا شئ ويمكننا ان حسب عدد مرات دخولك للحمام.. هؤلاء العائشون في عقلية - التامين يا زميل - هم احباؤنا واول مروج لدعاية تفوقنا ومخلب قطنا الاعلامي ومنهم نتخذ الميم عين ومنهم نتخذ الدقوسة وبهم نسمو على بقية الشعب السوداني الفضل .. فنحن الحضارة ونحن المجد ونحن التفوق ونحن الديمقراطية ونحن الحقوق ونحن المدنية ونحن المؤسسية ونحن الكل في الكل حسب وجهة نظرهم ونشجعهم نحن بالترويج لها .. ولو عبر التقاط صورة صغيرة مقاس 4×4 ...
اما امثال شيخ امام عميلي الذكي اللماح فهو الشفت والمقرم ناقش الحركات دي بالسليقة ساي .. فشغله في الزراعة و حفر الابيار وفتل الحبال اكيد علمه التاني في التفكير والاستيعاب بمرونة لذا امثاله ينجحون في مهماتنا المعقدة ولذا كنت حريص على ان يكون عميلي قد مارس هذه المهن في مواصفاتي .. وكان بالطبع من السهولة ان نستخرج له تأشيرة دخول كمزارع الي امريكا جاء من احراش السودان وادغاله لانقاذ زراعة القمح التي عانت انتكاسة كبيرة في امريكا خاصة وانه مولانا رونالد ريغان ربنا يحفظه قمحه طلع فشنك واي كلام وقد اصابته الكثير من الامراض عقب قراره بوقف تصديره للاتحاد السوفيتي فعمد هؤلاء الشيوعيين الاشرار على بث الحشرات والافات للاضرار به لكن كلي على ثقة بانه شيخ امام سوف يستطيع باول مهمة له ان يكشف هذه الشبكة .. ومكافأة له سوف نعطيه كوتتين من قمح ريغان تصدر في صورة اغاثة للجفاف والتصحر بغرب السودان فيلتهم هو كوتة ويعطي المسؤول الذي سهل خروجه كوتة )) انتهي كلام همشري..
اما شيخ اما فقد كان يدون في هذه اللحظات هو كذلك مذكراته الموسومة بعنوان ( صلاة جنازة في المحراب الامريكي )
نستعرض بعض ما قاله فيها وعن رحلته الاولي الي امريكا وماهي الافكار التي راودت راسه وهو في طريقه الي امريكا وماذا فعل في مهمته الاولي..
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: ناصر احمد الامين)
|
مرحبتين يا ناصر احمد الامين..
والغريق قدام شايف شيخنا هاشم الامام دا مستعجل شديد شكلو عندو قصة كدة عاوز يفكها
وشكلي بكلفت الباقي سريع سريع عشان نسمع حكوة مولانا
سلاما يا دكتورة نجاة ..
Quote: يلا طوالي الكلام ينتشر بواسطة كل ادوات الشمار الشامل
يلا خطيبتوتسمع اها تجي تجدع ليه الدبلة في وشو وتقوليه تغشني وتقولي ما معرس وانت معرس وجبتا ترباس
غنى يا ريت وكسرها بيا عديلة يا بيضا واسع تقولي نعرس نجيب ساوند سستم لانه مافي قروش فنان
بهناك الحاج والحاجة يصلهم الشمار بالتلفون من ضهاري فيجي
يمة ناس سوداينز قالو الزول دا عرس انتي ما سمعتي؟
الام تقوليه بري يا يابا عرس كيفين؟؟؟؟؟
يقوليها ياخي كمان دقا مرتو ودوها لناس فلان الفلاني في جدة
الام تقوليه يطرشني والله..
|
كويس الماطلع عندو ولاد منها كمان ... لووووول
غايتو تسرع الخطيبة في جدعة الدبلة دي بالغت .. كان هو يثبت ليها بشئ واحد
انه يكلم بكري يديها باسوورد هنا ويقول ليها شاركي شهر واحد بس وبعدين ازعلي مني
ان ماجات بعد شهر لامها وقالت ليها
يمة انا ناس سودانيز مرقوني راجل عندي شنب ودقن ومعرسة مرتين ومطلقة واحدة :)
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: خالد العطا)
|
مرحب الحبيب خالد العطا..
الله اكرم وتصوم وتفطر بخيـر ياملك
خليك معانا الحكاية قربت .. كدي نشوف اول نهاية شيخنا هاشم الامام دا شايفو فاتل ليهو سلبة طويلة وكل مرة شغال لي كعبيل .. :)
ــــــــــ
ياهاشم الامام رايك شنو اجنب ليك الدفار دا في السندة الجاية.. واخليك تجينا كاسح بالبطاح بتاعك نشوف قصتك شن نفرها وبنتفق يا حبيب اصلن بيني وبينك نهاية الاسبوع قرت وتاني ما بتشوفني الا السبت فنجنب ليك الدفار من هسع ان شاء الله نلقط باقي البطيخ بي بوكسي ما فارق
تحياتي
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
امانة ما وقع راجل .. ابتسم شيخ امام وهو يخطو اولى خطواته بالاراضي الامريكية الحرة المقدسة..
فشيخ اما رغم ما حاول ان يحيط نفسه به من هالة انه تفتيحة ومقرم وزول نجيض لكن نقطة ضعفه كانت على الدوام تتمثل في النساء.. واذا كانت نساء امثال حاجة مليكة ( او صابرين كما تحب ان تطلق على نفسها ) تجهجه وتخليهو يجلّد خمسة بنابر ويكرّب تلتاشر مقابل كباية كركدي او زنجبيل ومع مقاطع متفرقة وغير مستمرة من التلفزيون التي تحرص حاجة مليكة على تشغيلة بصوت صامت بينما تفوّر القهوة لزبائنها .. فمبالك بنساء بني الاصفر والاشقر وهن يتنقلن كالحوريات شبه كاسيات امامه الان .. نساء مفكوكات من الكيس هسسسسسع دي كما يقول ..
فإذا كانن امثال حاجة مليكة بيخلنو يجلد البنابر.. ويصلح السراير ويسرح معاهن بخيالو وهو ساكي البهم.. فبمقدوره مع هؤلاء الحوريات ان يصنع يكتشف الذرة ويعيد ترتيب الاشياء ويكتشف فعلاً جنس اخر من جنس النساء وليس مثل حاجة مليكة التي لم يجد لها شبيهاً الا في الانعام والبهايم التي بها منافع مقارنة بهؤلاء.. فحاجة مليكة وامثالها هن انعام الاحمال وربنا قال في محكم تنزيله (وَالأَنْعَامَ خَلَقَهَا لَكُمْ فِيهَا دِفْءٌ وَمَنَافِعُ وَمِنْهَا تَأْكُلُونَ (5) وَلَكُمْ فِيهَا جَمَالٌ حِينَ تُرِيحُونَ وَحِينَ تَسْرَحُونَ (6) وَتَحْمِلُ أَثْقَالَكُمْ إِلَى بَلَدٍ لَّمْ تَكُونُواْ بَالِغِيهِ إِلاَّ بِشِقِّ الأَنفُسِ إِنَّ رَبَّكُمْ لَرَؤُوفٌ رَّحِيمٌ (7))
واليوم استطاع ان يفهم هذه الاية على وجهها الاكمل .. فالدفْ والمنافع وانعام الاحمال والمراتب والمخدات عرف اين توجد..
والانعام حيث الجمال والراحة والسرحان والتوهان والتبصر والتدبر في حكمة الله وخلقه للجمال والروح الخفيفة عرف مكان وجودها بين نساء بني الاحمر..
ومنها عافت نفسه وعاهدها ان لا يقرب من هذا اليوم اي متردية او نطيحة او ما ياكل السبع ..بل عاهد نفسه على ان يوضح للعالم اجمع حكمة الاية في تححريم اكل الميتة والمنخنقة والمتردية والنطيحة..
وانه حكمة القرآن باقية وصالحة لكل زمان ومكان.. فطرّق لسانه واثبت جنانه وخطا اولي خطواته بواشنطون مقتحماً لياليها الثقافية وامسياتها الترفيهية وصحفها ونشراتها وخطبها واعيادها منذراص ومتوعداً من مغبة الاكل من الميتة والمنخنقة وما اكل السبع وحذر كذلك من السير خلف المتردية والنطيحة حتي لا تتردأ اخلاق القوم او يناطح بعضهم بعض بديار الغربة.. ومازال سائراً على هذا النهج حتي نُصب اماماً وعين شيخاً وهو ما كان يرجوه وخطط له طويلاً مع الخواجة همشري وقد بلغه بفضل مثابرته وطول لسانه وعدم تورعه عن خوض اي معترك باشهر قليلة.. فإكتملت ملامح وجه واحد من وجوهه وبقيت ملامح الاوجه الثانية التي عمل عليها ايضا بنفس المثابرة والعزم وقوة الشكيمة ..
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
بعد انقضاء الصلاة استغفر شيخ امام كثيراً وسبح الله كثيراً وكبره وحمده ثم جهر لربه بالدعاء واسر اسرارا..
وتحول بعدها ليمينه فقبل يدي ملك ملوك العرب وشاهنشاه افريقيا وزعيم العالم الاوحد والقي على مسامعه قصيدة عصماء يتقازم امامها المتنبي في مديحه لسيف الدولة بن حمدان وتتققاصر ابيات ابن ابي سلمي في ذكر فضائل هرم بن سنان
كيف لا وهذا الفارس مناهض الاستعمار ومروض الامبريالية العالمية والواقف امام قوي البغي والاستكبار حفيد عمر المختار اسد الله البضرع الجهجه لجيوش ايطاليا وزعزع ..
احترقت بعد هذه القصيدة سلكين من اسلاك جننيتر العقيد الكنتاكي وفطّ دائرة كهربائية كاملة وتذكر سـخـرية الاميــر صقر العروبة وولي العهد وابن ملك جزيرة العرب منه اثناء احدي ولائم اجتماعاتهم التعارفية بالجامعة..
وكان الامير قد مارس عليه نوع من الندالة والطعاسة عندما كانوا بمائدة غداء فخمة اعدت لهم في افخر المطاعم الشامية واثناء تناولهم للبطيخ طفق الامير يرمي بقايا وبذر ما ياكله من بطيخ بصينية الغداء امام العقيــد محمر الكنتاكي مما سبب بالغ الحرج للعقيــد امام شعبه من الجرذان وحارساته العائشات وامام شعوب العالم الغير محررة ممن يعتبرونه قدوة لهم فقد ظنوا - وهم مخطئون - ان العقيد نهمٌ شره اكول .. وانه لايوجد بطيخ في دولة المجد التي بناها حجر حجر وزاوية زاوية مما ينعكس بالتأكيد بسمعة سيئة على دولته وشعبه وعليه ..فحقد من حينها على هذا الامير المتطنقع ونوى به شراً..
وكان وجود الشيخ امام وما القاه من شعر ثم امامته للصلاة وخلفيته الزراعيــة خاصة بمزارع البطيخ بابو حراز التي عرف نفسه بها للعقيــد اكبر الاثر في اثارة احقاد العقيــد مرة اخري تجاه الامير صقر العروبة ..
فكانت فرصة اتت للعقيـد على طبق من ( حبحب ) فعرض عليه هذا الاخير منصب رفيع بسفارتهم باليو اس ايه كملحق تجاري متخصص في زراعة وتوريد وتصدير ومعالجة بذور البطيخ او الحبحب كما يطلقون عليه في ديار الاميــر ووعده بكآفة التسهيلات وتذليل الصعاب في حال قبوله بهذا المنصب بالسفارة على ان يضع نصب عينيه ان مهمته الاساسية هي في طعس خياشيم الاميــر برمال صحراء نجد وان يكون على اهبة الاستعداد فلحظة الانتقام قادمة لا محالة والحقيقة قادمة .. الي الامام .. الي الامام .. الي الامام .. كما قال له محمر الكنتاكي لحظتها ..
فوافق الشيخ امام دون تردد ودخل بقلب قوي مجال الدبلوماسية وعلق على صدره من حينها سلك دبلوماسي يشده متي ما اراد ان يدخل سفارة دولة عربية ما .. واصبح مرتاد سفارات يُشار له بالبنان بعد ان كان يسرح بالغنم ويفتل الحبال قبل شهرين فقط في بلاد بعيــدة تُسمي السودان الشقيق...
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: Hashim Elemam)
|
فدوي الشريف .. رمضانك
راجيك .. ما تتاخري
مولانا هاشم الامام
| Quote: قلتليك أُكل سيريال |
سيريال نمبر
يعني الشئ ماهو كستر ؟! قااااادر الله في حكمه .. وانا اغالط في بتاع بقالة المحطة اقوله دا كستر سيريال اصفر..
وهو يقول لي ايش كلام صديق.. ماعلينا لو كان سيريال والا كستر ما ظبط.. والكوارع اسحن منها مافي لغاية هسع
من الصباح مدور الدفار مبسوووط مع شريط ود اليمني .. لا تتفتف ولا توِخّم ولا عطش..
| Quote: يا حيدر الزين أنا ما مستعجل علي راحتك وكت ما تنتهي أنا ببدا بس إن شاء الله قبل العشر الأواخر ، |
شوف انا كفاني لغاية هنا.. بقيف وبعد رمضان لو ربنا حيانا بنجي نفتح الفص التاني من قصة الجاسوس الرعديد دا
فانت شوت قصتك هسع وخلنا نتابع معاك.. حتن بعدين نجي لقصة زولي مع السفارات
عرض جادي
تحياتي
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: منتصرمحمد زكى)
|
مرحبتين حبيبنا منتصر..
اخبار دكتور معاوية شنو؟! ما وافقوا يدخلوهو معهد صحي.. :)
| Quote: متابعين لكن بصعوبة .. الخيوط ما عايزة تتلمة |
بي تتلمة تب.. شيل الصبر بس.. يمر بطاح عمنا هاشم الامام دا وانا اشغل ليك الدفار
واولع فيهو شريط التومات ايمان واماني باغنية ( طول مفارق حييو .. يا اخواننا كيف وازييو)
وتظبط معاك العملية..
| |
|
|
|
|
|
|
|
|
 Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
شيخنا هاشم الامام
شايف البطاح بتاعك جنبوهو على طرف وسحبو الرخصة وقلعو نمراتو..
دا كلام دا يا شيخنا .. في ظل التوترات الامنيــة دي والبلد مليانة عملاء والحرب الباردة مدورة
وسعادة العقيد المجنون يطارد في الجرذان والفئران جحر جحر.. وطاغيـة سوريا يبيد في الجراثيم
وشغال بف بف ساي.. وانت يا شيخنا عاوز تجي لافي ليك ببطاح مسروق ومهرّب وكمان مركب ليهو نمرة
عسكرية ؟!
زول يهرّب بطاح يركب ليهو نمرة عسكرية.. دي ما ياها تعالوا خموني زاااتها
عموماً الجاتك في بطاحك سامحتك .. وكان عندك لفة حبال والا عنقريباً مجلد عاوز توصلوا كوستي
دفارنا بيشيل الف عنقريب لو النفوس اتطايبت ..
ولو عندك شوال ويكة والا تيراب رجلة عاوزين يمشن الشمالية برضو اتفضل.. علا ابعد لينا
الشاكوش والزومبة والسُلاب بتاعنك ديل من دفارنا.. حفارين ابيار ما عاوزين
نمشي نغير زيت وبطارية ونشوف الكفارات بتوصلنا وين .. ونجي نديها مشوار مشوارين
بالدفيفير دا
| |
|
|
|
|
|
|
|
|
 Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
اختفى الشيخ هاشم الامام !!!!
انه من المعيب والمخجل بحق إذا كان قد اوقف حسابه بسبب كتابته في البوست السابق
معيب جداً ومخجل... فالايقاف والحظر عمره ما حايكون سبب لتغيير مفاهيم او سلوك
والعقوبة ليست الحل .. العلاج يكمن في المحاورة وتحمل الاذي حتي نقنع الخصم
اما المطالبة باقصاء الاخر فهي قمة العجز واعلان للهزيمة ..
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
طبعاً الفهمتو الىن انه شيخنا هاشم الامام تم ايقاف حسابو بسبب مراعاة مشاعـر الفتي الجنوبي المدلل
دينق ..
والامر كله وفي الاخر هي قراءة انه اتكلم بعنصريــة عن دينق عندما اورد قصة صباح الخيــر عب العمدة
والنذير حجازي ما قصر نهائياً شال العصاية وقرأ مغمض وقعد يفسر انه صباح الخير المقصود هو دينق بذات عينه وانه هاشم الامام قاصد دينق ودي عنصرية بغيضة
ولو سألتو لييييه فسرت كلام هاشم الامام بانه المقصود دينق في حين انه الكلام وارد في صياغ قصة بيكتبها هاشم الامام رداً على الكلام المكتوب هنا دا ومجاراة ليه في قصة الجاسوس حايكون تبرير النذير حجازي واااحد:
لانه دينق زميــل جنوبي .. وعايش في امريكا .. وهو عسكري في الجيش الامريكي ..
ولان صبـاح الخيــر عبــد .. وهسع مشي امريكا .. واتوظف في الجيش الامريكي ( بحسب قصة هشم الامام )
هسع بالله البنمط الناس ويلصق في اي جنوبي قصة انه عب منو؟ هاشم الامام والا النذير حجازي والقفة Deng
هاشم الامام لم يقم بكاتبة اسم دينق والقصة لم تدور حوله وهي رداً لكلامي هنا .. قوم البعض بعقليتهم
المنمطاتية واسقاطاتهم يشبكوك دا همز ولمز ودا قاصد فلان والكلام دا اااي هو المقصود بيهو كدة
زي ما صرح مولانا النذير حجازي رضي الله عنه في بوست له بانه ناس الهامش هم من يمتلكون الحق الوحيــد
في وصم الناس بالعنصرية او عدمها وهم الوحيدين البيقدروا يفسروا كلام الزول حتي ولو الزول ما قاصدو
وهم الوحيدين البيمتلكو الحق المطلق في منح صك البراءة للشخص انه داعنم للهامش ام لا وانه لديهم اي كلام واي تعبيـر يصدر من اي انسان ما من الهامش فهو بيحمل بين طياته الفاظ عنصرية مكتوبة بذكاء وبحرفنة وقت تحمل اشارات عنصرية مشفرة وهم البيقدروا يفكو الاكواد دي لانه انكووا بنار العنصرية من زمن ..
ولو جيت سالتو ومن هم الهامش الانت بتقصدهم وعانوا من العنصرية.. حا يقعد يمجج ليك الكلام ويلف ويدور ويدخل بي حمد ويطلع بي خوجلي.. رغم انه في الاخر ومن خلال مشاركاته هو ومفتي الديار العنصرية دينق الهامشي لا يعني عندهم الا الجنوبي والغرباوي ولو كان وزيـر او والي.. فهو من الهامش
او بتعريف ادق لمولاتنا التانية طراجي الهامش عندهم باللون واي زول لونو ما اسود فهو ما من الهامش واي زول لونو فاتح حبتين فدا مركزي جلابي ولو كان عبد القادر سبيل ابن النيل الازرق
شايف كيف
ويجي العرورة دينق بلا خجلة يقول ليك انت عنصري وهو العنصرية شاربها شراب..
التحية لهاشم الامام رغم الاختلاف معه في بعض المواقف ورغم مهاترتي له كثيراً لكن ذلك لا يمنع ان نوجه له تحياتنا
ونقف ضد اقصائه وايقافه ارضاءاً للصبي الجنوبي المدلل Deng
| |
|
|
|
|
|
|
|
|
 Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
فدوى الشريــف طلعت عمرة والا شنو؟!
شابكانا جايينك جاييينك .. ولا حس لا خبر
عمرة مقبولة
بقيت الناس - او على الأصح بقيــة الزويل البيتفاصح بي برة والبوست دا واقف ليهو في حلقو
كبر خيالك شوية ووسع مواعينك او ابقي راجل اتحشر لينا هنا...
غايتو موعودين بعد رمضان لو ربنا حيانا ببوست عنوانو
Yaaaaah ،، Spoiled Child Crying
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
قالو الفاضي يهمز امو..
النشوف العالم دي كابة الجرسة وداقة الثكلي والكوراك من البوست دا مالم..
قدر ما قريته ما لقيت فيهو غيـر زويل تريبالي مشي امريكا في مهمة تجسس وبقي خطير جدا
في داعي هسع يبقي شيخي كمان ويتمشيخ على حسابنا
غايتو يا شيخنا فاتتك حتة العساكر الامريكان الشفوت الشغالين تجنيد في الجواسيس التانيين بالبرظرات واليكر
هيييع والله هسع كانوا جابوا ليك دامة يا شيخنا عمر 17 سنة كدة شعرها اصفر وتنطق الخاء كاف.. تشبكك ( ياشيك اومام يا شيك اومام)
وانت تشيل وتنتف في دقينتك.. وتقول ليها ( اومام مييين وشيك مين يا برظر .. انا الليلةJustin Timberlake ظاااتو )
والا يبقي حالك زي حال محيميد زولنا دا:)
في واحد كدة تربالي من جماعتنا قاعد في حواشتو من ربنا خلقوا مامرق برة نهائي .. يوم العيد الجماعة قالوا يآخ النثقف الزول دا شوية ونسوقوا البندر ياكلو شوية باسطة ويضربولو قزازة بيبسي هيضومة وكدة ونغشيهو السينما الوطنية يزيد ثقافتو بفيلم هندي
والعجيبة كان بقي لاميتاب باتشان..
اها الجماعة حنسو امه وقالوا ليها بس نصل البندر وبنرجعو ليك.. قالت لهم ما بيتبعكم الا تدوني موثق انكم بترجعوهو لي صاغ سليم زي موثق اخوان يوسف لابوهم..
اها بعد جابو موثقهم وامه اقتنعت قالت لهم ودعتكم الله اللذي لا تضيع ودائعه.. قامو الجماعة من دغشاً بدري يتشطفو ويندعكو..
علا الغبشة ابت تروح منهم كلو كلو .. قام جاهم محمود ود التايـة يرقش ويلصف زي صينية النيكل العند بدور بت العطيـة..
سالوهو - ها يا جنا روحت الغبشة دي كيفن ؟
محمود ود التايـة دا كان مشي البندر وقعدلو ( دورين) كاملات مع نسابة اختو احلام .. واكتسب خبرة وثقافة من البندر وجاهو تفتح عقلي شوية ونبتت عندو النباهة.. وطبعاص هو هسع الدليل الليلم زايد كدة كلمتو مسموعة
محمود ود التايــة ابتسم ابتاسمة العارف الفاهم وخاطبهم بلغة قدر عقولهم البسيطة
- اسمعو يا جِنيات هوى عشان تروحو الغبشة دي اول شي جلبطو وشكم وكرعيكم ويديكم بزيت سمسم.. واقيفو في الهواء خلوهو ينشف شوية
حتن بعدين تجو تتشطفو بصابونة الغسيل علا ما تكترو الدعك .. ان اندعكتو شديد فايدة الزيت بتروح
وكان بها الجنيات كلهم بقو يرقشو ويلصفوا .. ولبسو جلاليب العيد وحدرو طويقياتهم وكل واحد فيهم حزّ قريشاتو في تكة السروال
اصلاً محمود ود التاية نبهم انه البندر مليان نشالين وحراميـة..
اها قبال شرقت الشمس مرقوا على الظلط راجين لوري خليفة بتاع الخدار .. انحشروا فيهو ودعوات اماتم لي هسع تطن في اضانهم
يا ولد ما شربت الشاي.. ها يا جنا انت ماشي البندر على لحم بطنك .. يا وليد هوى فك ريقك دا باي شئ ان شاء الله اخدلك لقيمتين من باقي الفاصولياء المفروكة المعلقة في المشعليب.. !!
علا ووين ليهم الوليدات جاريين البندر ياكلوا باسطة ويحضروا فيلم هندي ..
اها اول من وصلوا البندر صاحبنا التريبيلي يتلفت ويصنقع.. قااااادر الله السودان دا امانة ماهو كبييير .. قااادر الله والله السودان واسع وسع ..!! قاااادر الله في خلقو والله السودان دا اتاريهو مليان جنس دكيكانات .. قااادر الله والله هن جنس لواري وعربيات ومواتر علا ما بيلحقن لوري خليفة وقت يعشق خلف ولمبتو تولع.. قااادر الله عاين البرينسة ديك خمسة شنكل ب ح
كلهم قعدو يتحوقلو ويتعوظمو الا محمود ود التايــة التفتيحة.. عاد كيفن البلد ماهي بلدو قاعد فيها اسبوعين كاملات وعارفها شارع شارع وحافظ ناسها.. وكل مرة يسلم على واحد في الشارع ويقولهم - دا صاحبي بالحيل ..
محمود ود التايــة اول شئ قالهم قبال الباسطة لازم الزول يطرى بطنو بالزبادي السااااقط زبادي بالسكر..
اول من كواري الزبادي واتسابقوا في اللهط - يا جنا والله الشئ لبن علا لبن من بقر البندر.. والتاني يلهط ويشبكهم
والله بقر البندر ديل لبانات جنس لبن .. لبنهن ساااقط وجامد - يا محمود عليك الله يىخ ما ناخد لنا بقراية من بقر البندر ديل معانا البلد عشان الناس يضوقوا لبنهن الساقط دا
ويجيبهم محمود بلغة الخبير العارف- لع لع بقر البندر ديل متعودات على المكيفات والكندشة ما بيقدر يعيشن في البلد
اها بعد داك ضربو الباسطة ومحمود كيفن ما ابدع ليهم جابو ربع كيلو حق طحنية وشتتو ليهم فوقها وهو يقول انبسطو استمتعو والله انتو محرومين من نعم كتيرة خلاص.. هسع لو ضقتو البيبسي كولا والا شربتو الليموناضة تقولوا شنو..
وقالوا كدة (ودلفوا ) على السينما .. امممماك فيلم هندي مولع نار.. البطل يقتل خمسة بيدو اليمين وستة بالشمال
ويعاين كدة ويطير من راس العمارة ويقع يقلب العربيـة وقبال تصل العربية الواطة يكون خش جواها انقذ حبيبتو وقتل الخاين وطلع برة حتن العربية تكمل قلبتها
صاحبنا التريبيلي ما شغال بالبطل نهائي.. عاصر يدو فرق كرعيهو ويعاين لحبيبة البطل وهي تغني وترقص وتقول كريشنا بهادر جنقي هي وكل مرة يعصر يدو زيادة.. اها محمود ود التايـة المسلط عاين ليهو كدة وسألو :
علا قول لي يا محيميد اتخيل لميت في الهندية دي وانت قاعد في الحواشة والواطة عصيير كدة وزول مافي بتسوي شنو؟؟
محيميد قالوا: والله اول شئ اهنق هاق هاق هاق هاق وتاني اهنق.. واجري البحر اخد لي عومة وامرق ادردق في الرملة زييين وتاني اقوم اقع البحر واخد لي هنيقة .. وتاني اشيلها في كتفي دا واقع بها حيطان اللوبيا
| |
|
|
|
|
|
|
|
|
 Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
جنا ود رابح
رواية أخرى لقصة تجنيد جاسوس سوداني لأمريكا
( 3 )
عمك ودرابح قال لاحمد أنا وأُمك دي بندورك تحجّجن ، أحمد وافق والخبر انطلق في الحلة والناس انكسرو عليهن يسعلوهن من الخبر ويباركولن ، ما وقفو منهن نامن أحمد ساقُن الخرتوم يسوّيلن البظبورتات والتأشيرة ، وعمك ودرابح يقول لأم أحمد :كلُّ مِنِك إنت آمصنيقير مشيت كلمت مرت العمدة طلقت فوقن الناس ، أم أحمد قالتلو معلّمه الله الخبر طلقتو إنت براك ، مشيت نضمتبو في دكان الزبير والناس شالو .
دكان الزبير دا دكان كبير وقدامو برندة وسيعة والزبير راجل بُدَعي ومِزبلع وأصحابو كل يوم بِجو يقعدو في البرندة دي يتونسو ويلعبو الكوشتينة ويشربو الشاي والقهوة ويقطعو في الماشة والجاية وآخر اليوم يملو حُقَقُن تمباك ويتراوحو علي أهلُن .
طيفور خيالو واسع وزول بصدقو مافي لاكين بعرف للحكي عشان كدي الناس بسمعو ليهو ، قالهن : هاناس سمعتو قصة ودرابح في الطيّارة . قالولو ماسمعناها مالو ؟ قالّهُن الزول قاعد في أمانتي الله في صالة المطار مبسووووط ومقنطر عِمتو . أها ندهوهن يدخلو الطيارة ، بس عمك ودرابح من شاف الطيارة وشاف بابوره تهدر أكان جفل وقعد يجعر آع آع آع آع ما بدور أركب مابدور أركب علي الطلاق الشي دي علا تقع بينا ، ناس المطار كلّهن اتلمو فيهو وهو يجعّر ، أحمد يقولو يابوي الطيارة مابتقع الناس كل يوم بسافروبيها وهو يقولو لا لا لا ماني عافي منك كان ما رجعتني . أم أحمد قالتلو ياراجل فضحتنا زمنك كلو تهاتي بالحج تجي هسع تقول رجعونا متيمنه ما أرجع أكان سافرت براي . قالها نضمتي إنت آمصينيقير علي الطلاق تنضمي تاني علا أرم فوقك اليمين بشوفك من أولادك كبرو طغيت وبقيت تردي علي !
وكت أحمد زهج خلاس نادى عمو واشلبوهو طب العصب ودفسو في باب الطيارة وهو يجعر آع آع آع ويقول لأخوه أصبر آبضينات بجي راجع وبوريك ليهو وأخوهو يكاويهو يقولو لاكين إنت بتجي راجع ! السواقين الليلين الطيارة مسكوهو وهجروهو في الكرسي وجابو عمتو ودرجوهو بيها وهو يجعّر نامن وصل جدّة .
صالح قالو هازول ها عمّت شنو البدرجو بيها أنا ما حجيت عامن أوّل وشفتها الطيّارة علي الطلاق الكرسي فيهو حزام إن ربطو فيهو حمار العمدة ما يفرفر .
علي قالو إنت آ صالح غير العمدة دا ما في زول عندو حاجة سمحة بوشّك داوشنا العمدة العمدة يعني عشان مو نسيبك حرّم حمار الخليفة أسمح وأقوى من حمار العمدة .
صالح : آزول العمدة ما عندو الطين وبوكل بهايمو اللوبة اللخدر .
علي : كدي ! نان الخليفة ما عندو الطين دا مشبّع حيرانو بليلت لوبة ما بشبّع بهايمو قش
.حسين : ها ناس الكلام المسيخ دا خلّو وقولو لي جنا ودرابح دا بعد ما فلس تاني جاب القروش دي من وين .
طيفور : والله سمعت قالو ببيع البنقو .
صالح : هازول بنقو شنو البنقو أكان بغني ماكان غَنى ود ريا حرّم سروالو مقدود .
علي : والله ناس بقولو بزوّر العملة وناس بقولو عندو سُفلي الله أعلم غايتو لاكين الجنا بقى شبعان وريّح أهلو تب .
الزبير : هاناس ها إنتو الواحد أكان الله أداهو ساي ما تريّحو .
طيفور : عليك الله آصالح أكان ما قصيت لينا قصت سفرك للصعيد .
صالح : دي قصة طويلة دايراله يوم بعدلو
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
ونواصل مع صالح :
عارف عبدو ولدي كان شغاّل معاي في أمانِ الله نمشي البحر ونجي متراوحين علي أهلنا ، وبقى علي بت عمو تب أكان يقوم يتجنن علي ويصبح مافي
طيفور : مالو ياكافي البلا
صالح : كتبتو المرة الملعونة دي دايراهو لبتّها .
الطيب : هازول ما تبهت المرة الولد طفش مو داير بت عمو إنت جابرو عليها ساكت .
صالح : مالو مو دايرة ؟
الطيب : شينة !
صالح : شناته شنو ؟
الطيب : علي الطلاق شناته تعلّم العفّة .
صالح : إنت مساختك دي مابتخليها هسع السعلك من شناته منو . الولد دايرنو يغطي قدحو وتاني أكان داير السماحة الّعرس تاني الراجل محللاتلو أربعة .
طيفور : يا الطيب خلي الزول يتم القصة العرس طاير في السما دا . قول آصالح ماتوّر نفسك مع الزول دا .
صالح : والله مسّخ علي الحديث ، آها قالو لي اِمكن مشى كبوشية واللا المكنية انخمل مع الخدم في الأنادي ، لاكين هو مو زول شربة بس برضي مشيت ومالقيتو هناك ومشيت شندي والله الجنا دا دخلني في جنس وكرات ، آها من هناك مرقتها في الخرتوم ونزلت في دايرت ناس سيدي علي أقوم من الصباح أكوس في بحري وفي الخرتوم عموم وفي أمدرمان والله كتّر خيرو علي ود الخليفة من سِمِمع بي جاني وساقني بيتو وكلّم البواليش كلهم يفتشو علي عبدو ولدي ، عاد علي مو ظابط في البوليس والبواليس ما قصرو فتشوهو سما أرض مالقوهو ، آها من هناك مشيت مدني وعاد موصفلي بيت ود الفكي والراجل كتّر خيرو ما بقصّر معاي وبت عمو بت الشيخ مرتن فنجرية علي الطلاق تجيب الصينية ورا الصينية والقهوة والشاي عاد مي مشحودة مي بت قبايل . الجنا المسنوح مالقيتو في مدني ومشيت مكوار وبرضي مالقيتو ومن هناك مشيت الصعيد الجوّاني .
طيفور : ولقيتو في الدبازين آصالح ؟
صالح : هازول دبازين شنو الزول لقيتو متملك الحبشة ، علي الطلاق أكان اتأخرت شوية ماكان لميت فيهو .
الطيب : هسع أكان خليتو مشى الحبشة شاف رزقو ماكان أخيرلو من قلع البصل دا لاكين مرمي الله مابترفع .
صالح : هازول إنت ماشفت البلود ديك علي الطلاق الناس هناك الواحد ينقلب مرفعين .
طيفور : مرفعين ! دا كلام شنو دا ! إنت آصالح خرّفت واللا شنو !
صالح : والله أنا براي ماشفت حاجة زي دي لاكين كلمني حامد ، الجنا عايش في الصعيد زمنو كلو . ونحن ماشين بعيد مالنا ماتسعلو عبد القيوم دا زمنو كلو ما عداه في الصعيد وعندو قصصن ماليها حد .
عبد القيوم : والله أنا الصعيد الجواني دا ما مشيتلو كتير حوامتي كلها من مدني وضهاري مدني ولاعن مكوار .
عمك عبد القيوم كضااااااب لاكين ونّاس .
طيفور : دحين آعمي عبد القيوم مشيت الصعيد من رجعتك ديك .
عبد القيوم : كيفن مامشيت عامن أوًل ما ركبت من هنا مع أبسقرة في لوريهو علي الطلاق ختاني في موقف اللواري في مدني لا قرش لا تعريفة ، ومن هناك ركبت اللوري و نزلنت قدام إنداية بت العربي في حوش أبّكر ، علي الطلاق المرة دي كريمة كرم حرّم فرّشت لينا وضبحت لينا عنبلوك والمريسة دي حرّم بالصفيحة وعلّقت لينا لجمالن .
الطيب : إنت هسع ماقلت جيت باللوري العلوقة شنو !
طيفور : هازول إنت المساخة دي مابتخليها ماتخلي الزول يونسنا .
آها عبد القيوم قطع قصتو وقال ماشي الجزيرة يجيبلو قش لبهايمو يعشيهن وركب حمارو وراح .
علي : إنت آصالح الولد دا ما ودبت للخليفة يفك منو الكتابة دي مالك علي الطلاق عندو قدح البياكل فيهو تاني ما يرفع راسو والعجب الفكي الرقيق خيت الشّلة والله ينادو للمجنون قبال ما يصلو يفيق .هسع مك شايف بنتاتن واحدة بعرّسو فوقه مافي ّ
صالح : هازول ها هو أكان ما الفكي أنا كان لميت فيهو .
دخل سرالختم ودالخليفة وسلّم ، طيفور قالو دا شنو آود الخليفة القلتو لعمتك فاطنة دا !
سرالختم : قلتله شنو ؟
طيفور : سمع أضاني دي قالت لأخوها الفكي : الجنا ود أخوك دا جا يدينلو مني قروش وأنا ماني دايرة آديّنو عشان أصلو مابحلني ديني . قتلو أنا مستعجلة ماشه الصلاة في الخلوة . قال لي هسع إنت بتصلي ليشنو ، حرّم لا تدخلي جنّة ولا نار ! قُتّلو خباري لا بدخل جنّة ولا نار ! قالي هسع أكان دخلت الجنّة ولقيتي السيد علي وسلمان راجل العوضية وحسن ود حسونة والقراي والشيخ الجعلي راجل كدباس بتدخلي فوقُن ؟ قُتّلو : بري ! قال لي آها أكان ودوك النار ولقيتي ناظر الجعليين حاج محمد ومجدوب شيخ الخط ود ضبعة العمدة وابجديري عمدت كلي بتدخلي فوقُن قُتلو :بري ! قال لي آها كلامي ما مشى وجا في محلو ، آها الفكي زعل زعل شديد وقال لها : الِصبُر الخبيث نامن أشوفو ، دحين أوعك تقرب الخلوة اليومين ديل .
الجماعة كلهم اتفرّقو والزبير قفل دكانو ومشى الخلوة يصلي ، والخلوة دي مسرح كبير للقصص نرجع ليهو بعدين .
وللقصة بقيّة
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
جنا ودرابح
هاشم الإمام
كل الشخصيات والأحداث في هذه الأقصوصة منجورة نجر لاكن ممكن تلقاها في الواقع ، ما تعمل فيها حريف وتقول لي دي قاصد بيها فلان وللا عِلان فِهمتو يا متلقين الحجج .
..............................
( 1 )
عمك " ود رابح " راجلاً مربوع ونحيف ، عِلا قوي و إيديهو خشنات وكرعيهو مشققات من الحش ومسك الملود وجر الواسوق ، وشو مليح عِلا جايبلو سواد من الشقاوة والجري في الشمش ، فقران وحالتو تحنّن ، ساكن هو ومرتو ووليداتو في غرفة طين ضيقة فيها أربعة طاقات وقدامه راكوبة ، عندو غنمايتين وعنبلوك تحت البلوغ يلبلب اليوم كلو ، ودحشة خدرة لفّاخة مرّة مرّة بنقُل بيها التُّراب ، وكمان عندو تلاتة جدادات مظعمتات وديكاً ريشو منتوف ؛ لأنو عمك ود رابح ما عندو ميزانية ليهن و طالقن في الحلة ساكت مضايقات جداد الناس وعلوّل ِديَكْت الحلة ما تشوفن العوا تقوم .
عمك ود رابح راجل بسيط و من الله ما خلقو ما طلع من الحلة ، مابيعرف كلام ناس البندر ولا بيفهمو ، مرّه واحد من الجنيات الساكنين في الخرتوم لقاهو مشنقل فوق عنقريبو قدام الراكوبة ، سلّم عليهو وقالو " صباح الخير " سكت وما ردّ عليهو السلام ، وكل مرّة يلاقيهو يقولو " صباح الخير " ما يرد عليهو السلام ، مرّه عمّك زهج من الولد دا خلاس وقالو : ها جنا ود رحمة الله إنت حاقر بي ولّ شنو ، علي الطلاق " صباح الخير " دا عبّاً لناس العُمدة ، شتم العمدة قام العمدة طردو من بيتو ، عاد مشى الخرتوم واشتغل مع خواجة ، وسمعنا قالو الخواجة ساقو معاهو اِمريكا ، علي الطلاق المنيكيد دا شِدّت الله ما ادّاهو اشتغل ظابط في الديش الأمريكي ذاتو .أها والله أسمعك تاني آلمطرطش تقول لي" صباح الخير " عِلا ألقطك بالعصا دي فوق راسك الغليد المشعِّف دا .
عمك ودرابح فيهو خفة وما بِختا من رواشة شويّة مرّة جدي الفكي عندو عبور ( نعجة شابة ) أكلتلها قشة وقِبضت ، جدي قال لأحمد جنا ودرابح : أجِر نادي أبوك خلي يجي يحلل العبور دي ، عمك جا وضبح العبور جخ عِلا حرجمَ ، جا جدي وعاين للعبور وقال لود رابح : ضبحتها من حنكاته آلنجيض شيل الفطيسة أرميها برّة ، ودرابح خاف وقال للفكي :" والله آسيدنا الخويسة كتيلة والجنا زعبني " يعني السكين ما مطرّقة والولد لخمني ، فذهبت مثلاً لمن يُستعجل لعمل شيء فلا يحسنه .
أها وكت الحكومة سوّت المدرسة في الحِلّة ناس اللجنة قالو لودرابح دخّل ولدك أحمد دا المدرسة إمكن ينجح ويتوظّف ينفعك وينفع أخوانو وأخواتو ديل ، وفعلاً دخل أحمد المدرسة وطلع نجيضاً ما بصاقع ، يجي أللوّل طوالي نامن دخل المدرسة المتوسطة ، ولامن دخل المدرسة المتوسطة بقى يساعد أبوه في الاجازات الكبيرة ، علوّت ما يبطِّل من المدرسة يشتري الليمون بالجملة من جنينة العمدة ويبيعو في سويق الديم ( ديم القراي ) يشتري هدوم المدرسة ويضمن مصاريفو .
في آخر المتوسطة أحمد بدا يسمعلو طراطيش كلامن مو فارزو ولُو عارف شِن نفرو زي : ناس الهامش وناس المركز ، وثقافة الهامش وثقافة المركز والحداثة وما بعد الحداثة ، و جنس الشغاليت دي لامن دخل الثانوي في أتبرة .أها زي الكلام الكبار دا كتر في الثانوي وشعر إنو ناسو جايبِلهُن فلهمة علي الطلبة وعاملين فيها مثقفين والحكاية دي عجبتو بلحيل والجماعة ما قصرو ملولو راسو بجنس كلام : الطبقة العاملة والاشتراكية والبروليتاريا وهلم جرا وكمان ملولو قلبو حقد على المجتمع وعلى الأغنياء . باختصار كدا نامن الزول دا دخل الجامعة بقى من الرفاق وقبادي في الحركة الطلابيّة .
وفي الجامعة اتسعت علاقاتو وبقى يمشي الرحلات مع أولاد الخرتوم وبنات الخرتوم الحناكيش وفترت علاقتو بالحلة وناس الحلة وخلّا كلام ناس الحلة وبقى يعوج خشمو و يقول لك : " لاكين ما بالغت يا جلال " ،و " أديو في حنانو " ومرّه مرّه يحشرلو كلمه كلمتين انقليزي ، وكمان بقى يجغّم البيرة الساقطة ويحضر حفلات العجكو .
اِبق معنا للقصة بقيّة
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
هاشم الإمام
( 2 )
بعد أحمد ما اتخرّج من الجامعة اتوظّف وربطلو راتب معلوم لِأبوهو ، وبقى أبوهو يصدّر المجالس ويقولك أحمد ولدي قال ، وأُمو تعاين لبنات العمدة دايرة تخطبلو منهن واحدة ، وأحمد ما جايب خبر ولا عندو شغلة بالعرس مندمج في العمل السياسي السّري نامن بقى قيادي معروف وعضو لجنة مركزية وبقى عندو اتّصال بالسفارة يقبض منها راتب شهري وقزازة فوتكا كل أسبوعين .
أحمد رطّب ، وسِمِنْ ، ووشو نوّر ، ولونو فتح ، واتعلّم علي شراب الخمرة النضيفة ، أخدلو سنين يتمرّغ في النعمة دي لامن الاتحاد السوفيتي سقط واتشلّع ، وراحت عليهو لا راتب لا فوتكا ، وراسو انقطع وبقى علي راتب الحكومة براهو ، ودا ذاتو انقطع بعد شويّة عشان رفدوهو وحوّلوه للصالح العام ، لا حول ولا قوّة إلا بالله الصالح العام دا تطير عيشتو بقدر يعيش الناس ديل كلهم !
عمك ودرابح رجع لمشهادو البعرفو من زمان ، وناس الحلة شمتانين عليهو وقالو يستاهل عشان اتفلهم ، وبقى يسلّم من تحت نخريهو ، وأحمد تعب خلاس وبنطلونو انقد عِلا برضو حامد الله الما قبضوهو وودوهو بيوت الأشباح ، أصحاب أحمد مرّه مرّه بينفحو بنص عرقي يفكبو القرفه وينسىابو الواقع شوية .
في مرّة من المرات أحمد كان قاعد في القهوة بشربلو في شاي وبتأمل في خلق الله الجارية دي ومي عارفة ماشه وين والجري دا مودّيها وين ، وفجأة سمع صوت خواجة يقولو : هاي ، ردّ أحمد الهاي بأحسن منها ، الخواجة سألو عن بعض الأماكن في الخرطوم أها أحمد جاوبو بانقليزية كاربة ومُعربة لامن الخواجة اندهش وكمان أحمد مسك فيهو لامن شرّبو جَبَنَة وبقت بيناتن عرفة وبقو يتلاقو في القهوة دي كل مرّة واتوثقت عرفتن وبقت صداقة والخواجة قال لأحمد إنو سبب جيتو للسودان هو البحث عن فرص للاستثمار وأحمد أصلاً قاري اقتصاد عشان كدي كب ّ للخواجة معلومات تقيلة والخواجة انبسط و بقى يصرفو ، وأثناء المدّة دي جمع عن أحمد ، بمساعدة مكتب الاستخبارات في السفارة الأمريكيّة ، معلومات كتيرة وأصبح أحمد كتاب مفتوح قدامو .
الخواجة مكلّف بتجنيد سوداني شمالي ل سي آي اي بمواصفات كلّها موجودة في أحمد فهو ما شاء الله متعلّم ، وسياسي ، وعندو خبرة في العمالة و التعامل مع السفارات الأجنبية ، وزي السياسيين ديل العندهم أسياد في الخارج إذا فقدو السيد دا ما بقدرو يعيشو بدون سيد ، وكمان محتاج وجربان وعلي الحديدة . الخواجة مالقى صعوبة في تجنيد أحمد خاصة أغراهو بإنو الغرض من العمل دا محاربة الأصولية الإسلامية وعاد أحمد كراهتو حاجة اسمها " الكيزان " ودي فرصة يرد الصاع صاعين و بأحدث التكنلوجيا مش عكاكيز وسيخ وجامع البركس وحاجات متخلفة زي دي .
أحمد بدا ينتعش اقتصادياً ويلبس الجينز ، ويشرب الويسكي ، ويحضر حفلات راس السنة في النادي الأمريكي . أها ما أخد مدة طويلة سفروهو أمريكا في برنامج اعتادت السفارة الأمريكية إعداده لبعض الشخصيات لزيارة الولايات المتحدة للاطلاع على مظاهر التقدم فيها ، وهناك دربوهو تدريب صاح ، ورجع جاسوس كارب ، ومن موقعو وعلاقاتو الجديدة بدا يخدم في أصحابو من قبيلة اليسار ، ويسفرن لاجئين سياسيين لأمريكا ، وكمان الشغلانية دي فتحت عليهو باب واسع من الرزق ، آي ، هُو رزق حرام لاكين هو شغلتو شنو بالحلال والحرام ، المهم الداير التأشيرة لأمريكا يدفع الشي الفلاني ، دا للرجال ، أما النسوان فغالباً ما يقدم ليهن الخدمة دي مجاناً، عاد مو جعلي وأخو بنات ، ودايمن الحساب عليهو، ما سمعت الشايقي قال لأولادو أدفنوني جنب الجعلي دا عشان يوم القيامة يقولهم حرّم الزول دا حسابو علي !
عمك " ود رابح " انبسط تاني وبقت مواد الإغاثة الأمريكية الملفوحة تصلو في الحلة شي ياكلو وشي يبيعو وشي يتصدق بيهو ، وشي يهديهو للعمدة وشدّت العمدة ما انبسط منو عيّنو عضو في المحكمة الأهلية . ودرابح باع الغنيمات وبقى يشرب الشاي هو ووليداتو بلبن العلب علباً كبار مش زي العلب البشوفن في دكان " البشير ود الماحي " ! واللقيمات يومي ما بغبن ، الدقيق عندو متكّل بالشوالات ، وجدي الفكي بقى يرسلو وكت يجو مداحين عشان يجيب الشاي واللقيمات الكبار ، وأم أحمد خلّت العواسة كل يوم وبقت من يوم لآخر تسوي الرز البسمتي بدل الكسرة ، وقالت والله قبال أحمد مايعلمن أكل الرز باللحم مي قايله الرز بياكلوه إلا بالسكر وللا يخلتوهو بالكستر ( وهذا ما عليه حيدر الزين حتى الآن ) وكمان خلّت أكل أم تكشو وأم شعيفة وبقت تفتي في الهامبرقر وأكل الخواجات ، وسوّت لها صحبة مع مرت العمدة .
أحمد سمعتو ساءت وطلع عنو كلام كتير في موضوع التأشيرة دي إلى جانب إنو أحمد ما عندو معرفة عميقة بفكر الجماعات الإسلامية فمعرفته عنها لا تتعدى ما ينشره تنظيم اليسار عنها بقصد تشويه السمعة ، كما أنّ أحكامه تفتقر إلى الموضوعية فهي أحكام مسبقة غير مبنية على معلومات صحيحة ، وقد كانت هذه المعلومات الخاطئة سبباً في ضرب مصنع الشفا الذي سبّب إحراجاً للحكومة الأمريكية .
ومن عبقرية أحمد الأمنية إنو نقل ثقافة الاغتصاب كواحدة من أسلحة محاربة النظام الأصولي في السودان ، وطبعاً المسألة دي مسألة حسّاسة في السودان ولاتفهم إلا في إطار إنو مرة اجتمعوا عليها عدّة ناس ومارسوا معها الجنس عنوة ، بينما في الثقافة الأمريكية يمكن أن يدخل فيها ممارسة الزوج مع زوجته الجنس بغير رضاها ، ومن طبزاتو إنو اقترح أن تأتي الضحية المزعومة إلى وسائل الاعلام لتفضح النظام لاكين الموضوع دا جاب نتائج عكسية لأنّ الشعب السوداني لا يتصور أنّ امرأة عفيفة يمكن أن تقول عن نفسها إنها اُغتُصِبت ! بالمناسبة وين صفيّة ، سمعت قالو سفّروها جوبا ، دا كلام دا واحدات باريس وعريس وكتاب وواحدات قطيّة في جوبا ، الظلم دا بقولو فيهو يامنو .
قالو في واحدة جنوبية مسلمة راجلها من الدبابين الذين استشهد وا في الجنوب وصارت أرملة شهيد ، وجات للرئيس البشير تتوقع أن يكافئها مكافأة كبيرة ، والرئيس أيامو ديك كان يادوب مزوّج السيدة وداد ، الرئيس سلّم عليها وعزّاها وصدّق ليها ب " كُشُك " ، أخدت تصديق الكشك ومرقت زعلانة تتنطن : " والله الجلابة ديل هقارين بشكل واحدات يأرسوهن وواحدات يدوهن " كُسُك " !
وللقصة بقيّة فابق معنا
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
جنا ود رابح
هاشم الإمام( 3 )
عمك ودرابح قال لاحمد أنا وأُمك دي بندورك تحجّجن ، أحمد وافق والخبر انطلق في الحلة والناس انكسرو عليهن يسعلوهن من الخبر ويباركولن ، ما وقفو منهن نامن أحمد ساقُن الخرتوم يسوّيلن البظبورتات والتأشيرة ، وعمك ودرابح يقول لأم أحمد :كلُّ مِنِك إنت آمصنيقير مشيت كلمت مرت العمدة طلقت فوقن الناس ، أم أحمد قالتلو معلّمه الله الخبر طلقتو إنت براك ، مشيت نضمتبو في دكان الزبير والناس شالو .
دكان الزبير دا دكان كبير وقدامو برندة وسيعة والزبير راجل بُدَعي ومِزبلع وأصحابو كل يوم بِجو يقعدو في البرندة دي يتونسو ويلعبو الكوشتينة ويشربو الشاي والقهوة ويقطعو في الماشة والجاية وآخر اليوم يملو حُقَقُن تمباك ويتراوحو علي أهلُن .
طيفور خيالو واسع وزول بصدقو مافي لاكين بعرف للحكي عشان كدي الناس بسمعو ليهو ، قالهن : هاناس سمعتو قصة ودرابح في الطيّارة . قالولو ماسمعناها مالو ؟ قالّهُن الزول قاعد في أمانتي الله في صالة المطار مبسووووط ومقنطر عِمتو . أها ندهوهن يدخلو الطيارة ، بس عمك ودرابح من شاف الطيارة وشاف بابوره تهدر أكان جفل وقعد يجعر آع آع آع آع ما بدور أركب مابدور أركب علي الطلاق الشي دي علا تقع بينا ، ناس المطار كلّهن اتلمو فيهو وهو يجعّر ، أحمد يقولو يابوي الطيارة مابتقع الناس كل يوم بسافروبيها وهو يقولو لا لا لا ماني عافي منك كان ما رجعتني . أم أحمد قالتلو ياراجل فضحتنا زمنك كلو تهاتي بالحج تجي هسع تقول رجعونا متيمنه ما أرجع أكان سافرت براي . قالها نضمتي إنت آمصينيقير علي الطلاق تنضمي تاني علا أرم فوقك اليمين بشوفك من أولادك كبرو طغيت وبقيت تردي علي !
آها أحمد يشيلو يجيبو جنب باب الطيارة ودا يرجع زي الجمل العربي المدخلن المُركب . وكت أحمد زهج خلاس نادى عمو واشلبوهو طب العصب ودفسو في باب الطيارة وهو يجعر آع آع آع ويقول لأخوه أصبر آبضينات بجي راجع وبوريك ليهو وأخوهو يكاويهو يقولو لاكين إنت بتجي
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
راجع ! السواقين الليلين الطيارة مسكوهو وهجروهو في الكرسي وجابو عمتو ودرجوهو بيها وهو يجعّر نامن وصل جدّة .
صالح قالو هازول ها عمّت شنو البدرجو بيها أنا ما حجيت عامن أوّل وشفتها الطيّارة علي الطلاق الكرسي فيهو حزام إن ربطو فيهو حمار العمدة ما يفرفر .
علي قالو إنت آ صالح غير العمدة دا ما في زول عندو حاجة سمحة بوشّك داوشنا العمدة العمدة يعني عشان مو نسيبك حرّم حمار الخليفة أسمح وأقوى من حمار العمدة .
صالح : آزول العمدة ما عندو الطين وبوكل بهايمو اللوبة اللخدر .
علي : كدي ! نان الخليفة ما عندو الطين دا مشبّع حيرانو بليلت لوبة ما بشبّع بهايمو قش
.حسين : ها ناس الكلام المسيخ دا خلّو وقولو لي جنا ودرابح دا بعد ما فلس تاني جاب القروش دي من وين .
طيفور : والله سمعت قالو ببيع البنقو .
صالح : هازول بنقو شنو البنقو أكان بغني ماكان غَنى ود ريا حرّم سروالو مقدود .
علي : والله ناس بقولو بزوّر العملة وناس بقولو عندو سُفلي الله أعلم غايتو لاكين الجنا بقى شبعان وريّح أهلو تب .
الزبير : هاناس ها إنتو الواحد أكان الله أداهو ساي ما تريّحو .
حسين :إنتو قبيييل الجنا دا جنا ود رابح دا رفدو من شغلتو ليشنو ؟
الزبير : مو شويعي .
حسين : والشويعية دي شني البتخلي الزول يرفدو من شغلو .
الزبير : عامن أوّل سعلت منها جنا ودرابح قال لي : علوّل ما نسوي الشويعيّة في البلد دي تاني مافي زول بملك حاجة ، كل شيء حق الحكومة لاكين الحكومة بتعيشك مما جميعو أكلك وشرابك وكسوتك وسكنك ومشهادك كلو .
حسين : والله دا كلام سمِح بلحيل نان الناس ديل مابِنو مالُن ؟ آها والعرس كيف برضو الحكومة بتعرّسلك !
الزبير : والله يا حسين ياخوي أنا قايل كلام العرس دا ياهو الجايبلهن الكلام ، والله كلامن فيهو مابنقلب في اللسان .
حين : عليك الله تقولو شحتفت روحي .
الزبير : قال مافي عرس والنسوان كلّهن يبقن شايعات للرجال يعني الرجال يبقو تيوس في زريبة !
حسين : لا حول ولا قوّة إلا بالله ، دا كلام شنو دا !
الزبير : دا السمعتو منو بأضاني دي ، حتى ضيفو الكان معاهو لما أحمد ينضم ، هو يومي براسو يعني موافق علي كلام أحمد .
حسين : هسع نعاين لبنات عمّن والرجال يجو يسوقوهِن مننا ، لا حرّم إنت آزول ملك نجيض وللا شنو ، على الطلاق البقرب بتول عِلا أدخّلو السكين دي في خرقو .
الزبير :ها زول ها بتول شنو أم كدمات البجو يسوقوها ، الناس ديل جايبلكن أورباويات عيونن خُدددددر وسبيب راسن أصفاااار ونااااعم زي عيش الريف .
حسين : والله أكان شاوروني يجيبولن المصريات علي الطلاق يا البنوت البجيبوهن في المسلسلات ديل ممسّخات علينا نسوانَّ . هسع ناس الفكي راين شنو في الكلام دا حلال وللا حرام .
الزبير : ها زول الناس ديل عندهم راي في الله ذاتو قالو دي خرافة ساكت تقول لي ناس الفكي ! ، والجوامع والخلاوي دي كلّها والقبب بكسروها ويهرسوها في الواطة دي !
حسين : أنا الجوامع والخلاوي ما بعرفن لاكين يلحقو يكسرو قًبة سلمان عِلا وطاتن تصبح، ما سمعتو بالراجل المنكر فيهو قلبو بومة ، ، واكّان دايرين البشتنة ألبصح بِصِح يمشو يهبشو قبة حسن ودحسونة ، ماسمعتو بالراجل النضم فيهو خلّاهو يحيض زي المرة .
طيفور : عليك الله آصالح أكان ما قصيت لينا قصت سفرك للصعيد
صالح : دي قصة طويلة دايراله يوم بعدلو ، عارف عبدو ولدي كان شغاّل معاي في أمانِ الله نمشي البحر ونجي متراوحين علي أهلنا ، وبقى علي بت عمو تب أكان يقوم يتجنن علي ويصبح مافي
طيفور : مالو ياكافي البلا
صالح : كتبتو المرة الملعونة دي دايراهو لبتّها .
الطيب : هازول ما تبهت المرة الولد طفش مو داير بت عمو إنت جابرو عليها ساكت .
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
صالح : مالو مو دايرة ؟
الطيب : شينة !
صالح : شناته شنو ؟
الطيب : علي الطلاق شناته تعلّم العفّة .
صالح : إنت مساختك دي مابتخليها هسع السعلك من شناته منو . الولد دايرنو يغطي قدحو وتاني أكان داير السماحة الّعرس تاني الراجل محللاتلو أربعة .
طيفور : يا الطيب خلي الزول يتم القصة العرس طاير في السما دا . قول آصالح ماتوّر نفسك مع الزول دا .
صالح : والله مسّخ علي الحديث ، آها قالو لي اِمكن مشى كبوشية واللا المكنية انخمل مع ستات الأنادي ، لاكين هو مو زول شربة بس برضي مشيت ومالقيتو هناك ومشيت شندي والله الجنا دا دخلني في جنس وكرات ، آها من هناك مرقتها في الخرتوم ونزلت في دايرت ناس سيدي علي الميرغني أقوم من الصباح أكوس في بحري وفي الخرتوم عموم وفي أمدرمان والله كتّر خيرو علي ود الخليفة من سِمِمع بي جاني وساقني بيتو وكلّم البواليش كلهم يفتشو علي عبدو ولدي ، عاد علي مو ظابط في البوليس والبواليس ما قصرو فتشوهو سما أرض مالقوهو ، آها من هناك مشيت مدني وعاد موصفلي بيت ود الفكي والراجل كتّر خيرو ما بقصّر معاي وبت عمو بت الشيخ مرتن فنجرية علي الطلاق تجيب الصينية ورا الصينية والقهوة والشاي عاد مي مشحودة مي بت قبايل . الجنا المسنوح مالقيتو في مدني ومشيت مكوار وبرضي مالقيتو ومن هناك مشيت الصعيد الجوّاني .
طيفور : يعني لقيتو في الدبازين آصالح ؟
صالح : هازول دبازين شنو الزول لقيتو متملك الحبشة ، علي الطلاق أكان اتأخرت شوية ماكان لميت فيهو .
الطيب : هسع أكان خليتو مشى الحبشة شاف رزقو ماكان أخيرلو من قلع البصل دا لاكين مرمي الله مابترفع .
صالح : هازول إنت ماشفت البلود ديك علي الطلاق الناس هناك الواحد ينقلب مرفعين .
طيفور : مرفعين ! دا كلام شنو دا ! إنت آصالح خرّفت واللا شنو !
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
صالح : والله أنا براي ماشفت حاجة زي دي لاكين كلمني حامد ، الجنا عايش في الصعيد زمنو كلو . ونحن ماشين بعيد مالنا ماتسعلو عبد القيوم دا زمنو كلو ما عداه في الصعيد وعندو قصصن ماليها حد .
عبد القيوم : والله أنا الصعيد الجواني دا ما مشيتلو كتير حوامتي كلها من مدني وضهاري مدني ولاعن مكوار .
عمك عبد القيوم كضااااااب لاكين ونّاس .
طيفور : دحين آعمي عبد القيوم مشيت الصعيد من رجعتك ديك .
عبد القيوم : كيفن مامشيت عامن أوًل ما ركبت من هنا مع أبسقرة في لوريهو علي الطلاق ختاني في موقف اللواري في مدني لا قرش لا تعريفة ، ومن هناك ركبت اللوري و نزلنت قدام إنداية بت العربي في حوش أبّكر ، علي الطلاق المرة دي كريمة كرم حرّم فرّشت لينا وضبحت لينا عنبلوك والمريسة دي حرّم بالصفيحة وعلّقت لجمالن .
الطيب : إنت هسع ماقلت جيت باللوري العلوقة شنو !
طيفور : هازول إنت المساخة دي مابتخليها ماتخلي الزول يونسنا .
آها عبد القيوم قطع قصتو وقال ماشي الجزيرة يجيبلو قش لبهايمو يعشيهن وركب حمارو وراح .
علي : إنت آصالح الولد دا ما ودبت للخليفة يفك منو الكتابة دي مالك علي الطلاق عندو قدح البياكل فيهو تاني ما يرفع راسو والعجب الفكي الرقيق خيت الشّلة والله ينادو للمجنون قبال ما يصلو يفيق .هسع ماك شايف بناتن واحدة بعرّسو فوقه مافي ّ
صالح : هازول ها هو أكان ما الفكي أنا كان لميت فيهو .
دخل سرالختم ودالخليفة وسلّم ، طيفور قالو دا شنو آود الخليفة القلتو لعمتك فاطنة دا !
سرالختم : قلتله شنو ؟
طيفور : سمع أضاني دي قالت لأخوها الفكي : الجنا ود أخوك دا جا يدينلو مني قروش وأنا ماني دايرة آديّنو عشان أصلو مابحلني ديني . قتلو أنا مستعجلة ماشه الصلاة في الخلوة . قال لي هسع إنت بتصلي ليشنو ، حرّم لا تدخلي جنّة ولا نار ! قُتّلو خباري لا بدخل جنّة ولا نار ! قالي هسع أكان دخلت الجنّة ولقيتي السيد علي وسلمان راجل العوضية وحسن ود حسونة والقراي والشيخ الجعلي راجل كدباس بتدخلي فوقُن ؟ قُتّلو : بري ! قال لي آها أكان ودوك النار ولقيتي ناظر الجعليين حاج محمد ومجدوب شيخ الخط ود ضبعة العمدة وابجديري عمدت كلي بتدخلي فوقُن قُتلو :بري ! قال لي آها كلامي ما مشى وجا في محلو ، آها الفكي زعل زعل شديد وقال لها : الِصبُر الخبيث نامن أشوفو ، دحين أوعك تقرب الخلوة اليومين ديل .
الجماعة كلهم اتفرّقو والزبير قفل دكانو ومشى الخلوة يصلي ، والخلوة دي مسرح كبير للقصص نرجع ليهو بعدين .
ــــــ
وللقصة بقيّة
| |
|
|
|
|
|
|
|
|
|
Re: قصة جاسوس سوداني روّع السفارات العربيـة بامريـكا..USA (Re: HAIDER ALZAIN)
|
جنا ود رابح
هاشم الإمام
( 4 )
الكلام كتّر في أحمد وسمعتو بقت في الواطة لاكين الأمريكان ظريفين بدل ما يرفدوهو نقلوهو واشنطن وسكن في هرندن / فرجينيا وبقى إلى جانب عملو في ترجمة الوثائق العربية ل سي آي ايه مستشار للمعارضة ، وهمزة وصل بينَ وبينْ السي آي اي . أوّل ما أحمد استقر وكرالو شقة وفرََّشه ، فكّر يتصل ب " صباح الخير " ، برضو الراجل بلديهم ، وفتش تلفونو ولقاهو ، اتكلّم معاهو بالتلفون لاكين ردو أكّان ميّت واستقبالو فاتر مو داير زول يذكرو بالعمدة ورعيّت الغنم وقلع البصل وجر الواسوق والزراعة بالسلوكة ، الزول الميسينيح الجربان داك هسع يازول أسكت ساكت بقى سمين وليهو جضيمات وراكب عربية كيف وساكن في شقة كيف وكمان غيّر اسمو لاكين ثقافة الجلابة ومعاملتو مع الجلابة ما بقدر يخليها ، ومقابلتو لِي أحمد رغم إنها باردة لاكين أحمد ما بتاع شمارات قطّعو في حشاهو وطلب منو عنوان البيت عشان يزورو وفعلاً زارو في شقتو ولقى واحد تاني ساكن معاهو مسينيح زيّو ، ودا كمان قصتو براها :
اسمو " ديّومة " طويل وسنونو مكسرات وكِريِّه ، أهلو من توريت تربى في بيت " حاج الطاهر " من هو صغيّر ، حاج الطاهر من ناس " أم دوم " كان تاجر في توريت عِلا بعد حوادث 1955 استقر في الخرتوم . وأبو ديّومة خاف علي ولدو يكتلوهو لأنو شغال مع مندوكورو عشان كدي قال لحاج الطاهر يسوقو معاه الخرتوم ، وفي الخرتوم اشتغل مع حاج الطاهر في الدكان وسكن معاهو في البيت وبقى مسلم وطهّروه واتسجّل في المدرسة الليلية في نادي " الديوم الشرقية " . أها في الخرتوم لاقى كتير من أولاد توريت وبدو يأثرو عليهو ويزعزعو ثقته في حاج الطاهر لامن طلع منو واشتغل في بيت في حي العمارات وشوية شوية بقى يمشي الكنيسة ، كنيسة شارع 15 في سوق العمارات ، ويعجبوك ناس الكنيسة اتوصو بيهو لما اتحسّنت عقيدتو وبقى مسيحي كارب ، ودخلوهو المدرسة وعلّموه الانقليزي وشحنوه حقد على الشماليين وقالولو ديل باعو أهلك في سوق النخاسة بِدوربهن وبتدور بدينن شنو ، ومن هناك ودّوهو مصر وعملولو لجوء سياسي لأمريكا ، صباح الخير وديّومة ونّاسين وبدورو القصص لاكين بس أوعك تجيب الكليمة ديك في خشمك ولو في قصّة ؛ عشان بتعفرتو ومابوعو تاني بيقولو في شنو . أحمد أخد شماراتن ومشى .
ديّومة سكران حيران بوشو غايب من شُغلو ورافدنو ، ماعندو شغلة كتيرة في الحريم ، وصباح الخير عامل فيها دنجوان وبتاع نسوان ، لاكين العارفين حقيقتو قالو بهاتي ساكت مو نجيض في الفراش ، لا بكسر عنقريب ولا برخي كرّاب ! عِلا معترفين ليهو بأنو حنيّن وظريف مع النسوان وايدو دي ما بمدّها عليهن ، قالو طلق مرتو بعد سنة من زواجو وخللاله الدهب والعفش ، وحرًم سلّمه أبوها صاغ سليم لا شق لا طق ! والبت لامن اتزوّجت مرّة تانية الولي قال للمأذون : البت دي ثيّب لاكين بكر ، آها المأذون اتحيّر ما عِرِف يكتب شنو في العقد لامن ضرب تلفون للقاضي سعلو ، شُفت آود الزين آخوي جنس المحن البسوّيها صباح الخير !
الفساد البيسببو نقلو أحمد من الخرتوم لقاهو قدامو وزيادة ، جماعت المعارضة هنا متفقين مع واحد شغال في مكتب محامي متخصص في فبركت قضايا اللجوء السياسي ، ونجر قصص التعذيب لامن سيده ذاتو يصدقه ، تدفع أربعمية وخمسين دولار – ما عارف ما عملوها خمسمائة ليه - يكتبولك عرضحال مايخرش المية والقاضي ما يقدر يقول فيهو بِغِم ، أها أحمد ود عمك ودرابح دخل في الشغلة دي واتولى كمان حسب خبرتو ابتزاز ضحايا اللجوء السياسي ، أي واحد يفرفر أو يعمل ليهو راي خاص أو يتعاون مع الحكومة السودانية أو السفارة السودانية بأي صورة يهددو بالسجن والترحيل ، ولمّ قبيلة اليسار القبيل ساعدن في التأشيرة وسوى بيناتن شبكة اتصال وكمان عملو منظمات مجتمع مدني وهاك يالهط ولحس وسفسفه وبقى نضالن ضد النظام في نشر الأكاذيب . الناس قالولن الكضب على الحكومة ماعندو لزوم الصِح براهو كفاية ما محتاج لزيادة لاكين البتعلّم على الكضب مابخليهو .
جماعت المعارضة ماعجبُن وجود أحمد بيناتن عشان ضايقن في رزقن وعشان معرفتو بالصغيرة والكبيرة عنهن ، آها بدو يسربو الاشاعات بإنو بتاع نسوان وإنو عميل مزدوج وإنو ناس المؤتمرالوطني اشتروهو وهاك يا تقارير عنو لحدي ما الحكاية دي عملت أزمة بين فصائل المعارضة لأنو أحمد طبعاً منسوب لليسار واليسار راس في المعارضة .
أحمد اشتغل شديد في تجنيد سودانيين عشان يرافقو الجيش الامريكي الغازي للعراق وطبعاً علاقات أحمد كلها باليسار وساعد كتيرين منهم جو امريكا عشان كدا أكثر السودانيين العاملين في الجيش الامريكي من الظباط والتراجمة ( نسوان ورجال ) يساريين يليهم الجمهوريين ... آل إمبرياليّة أمريكيّة آل !!
من الناس الشغلو أحمد في منطقة واشنطن وأخد منو وكت ، إمام الجالية ، الزول الإمام دا ماعرفولو مشهاد تب ، قايلن فكي ساكت ومسكين ممكن يغشوهو بكلمتين لاكين الزول دا طلع مقرّم و ناصح و جعلي عكازو مضبب وسكينو في ضراعو ، وقال طريقتو في التعامل في بيتين الشعر ديل :
ولي فرس بالخير للخير ملجم ولي فرس للشر بالشر مسرج
فمن أراد تقويمي فإني مقوّم ومن أراد تعويجي فإني معوّج
طيِب وين " والكاظمين الغيظ والعافين عن الناس " يا شيخنا الإمام ؟!
قال دي درجة هو ما وِصِلَ والما عاجبو مايصلي وراهو .
دا يسولو شنو دا ينادولو عشِّي ولّ شنو !
وطبعاً حكاية الإمامة دي ضخموها الجماعة ساكت لأنو ماهو إمام جامع ولا الجالية عندها إمام ولكن أحياناً يصلي بالسودانيين العيد وفي المناسبات ،وإصرار الجماعة على نعته بالإمام ليس حباً فيه ولا اعترافاً بفضله وإنما لأن السودانيين يفترضون في الأئمة القداسة ويضخمون أخطاءهم فلذلك يسهل تحطيم شخصيته وهذه من واحدة من آراء أحمد الخايبة
اجتمعو وقالو الزول دا لازم يوقفوهو من الكتابة في المواقع اللاكترونية دي بأيتها طريقة ، قالو يخوفوهو بالسجن والترحيل ولأنهم مُن عارفين إنو قديم في البلاد دي ومواطن أمريكي ، بدو يخوفوه بالسجن وحرشو عليهو واحد من السودانيين في نيويورك فاكيها في روحو وقايل يا دنيا مافيكي إلا أنا وهو كوعو من بوعو مابعرفو مؤهلاتو كلها كرفته وكلمتين إنقليزي ملقطن من الشارع غاشي المرضى قال بترجمليهن والله ما عارف يكونو ضحاياه كم لا غايت ديلوكت بسبب ترجمتو التعبانة ، العبيط شابك الزول بشتكيك ، القانون الفدرالي ، الحكومة الفدراليّة ويشيل ويحلف ويزلّف ويقولو بدخلك السجن ولا يومن دا لا شفناهو دخلو السجن ولا غيرو وهو مو عارف زولو الداير يسجنو دا قايلو زي الجماعة العيانين المساكين البجو من الخليج ديل ممكن ينصب عليهو ويلهفلو منو قرشين .
. أحمد قالهم نحن نستعمل معاهو أسلوب أغتيال الشخصية قالولو كيف ؟ بعد مقدمة واستعراض معلومات قالهم :نرميهو من قوس واحدة ، كلما كتبلو مقالة كلنا نهاجمو ونشيع عنو الاشاعات ونكذب ونكذب نامن يصدقونا الناس ونكوّنلو في أذهان الناس صورة نمطية ، و ممكن مرّة مرّة نتهمو بتهم أخلاقية أو نلمّح بيها ، قالوا أحسنت يازميل ومن اليوم داك دي طريقتن ولا دربي ودربك دا ، لاكين علي منو يبلوها ويشربوها علي الريق !
أحمد سافر العراق في مهمة رسمية ومات في انفجار هناك ، والسفارة الأمريكيّة في الخرتوم ما قصّرت مع عمك ود رابح اشترولو بيت في شمبات ، وبقى يقبض معاش أحمد شهرياً من السفارة الأمريكية ، الولدة كدا وللا بلاش حي ينفعك ميّت ينفعك .... تقول لي وطنية ، ملعون أبوكي بلد !
في أوراق أحمد وجدو دفتر فيهو مذكراتو اتولى مكتب ال سي آي إيه نشرها وسنعرضها في الحلقة الخامسة .
ــــــــــ
وللقصة بقية فابقوا معنا
| |
|
|
|
|
|
|
| |
HAIDER ALZAIN
محمد الجيلى
Afraa Sanad
سفيان بشير نابرى
بله محمد الفاضل
Hashim Elemam
سيف النصر محي الدين
Kostawi
Hani Arabi Mohamed
ناصر احمد الامين
فدوى الشريف
منتصرمحمد زكى
فيس بوك
تويتر
انستقرام
يوتيوب
بنتيريست