|
Re: أضبط: زوجتك تتبع تحركاتك سرا عن طريق تلفونك (Re: yasir Abdelgadir)
|
Quote: الحل أن ترمي موبايلك الحديث في أقرب زبالة ...بعد أن إتضح أنه يعمل كمخبر سري أو بالعربي ( ك لب أمن ) لصالح زوجتك
وترجع لايام العنيد والدمع |
قبل ما ترميهو فى الزبالة تستعملو لمدة شهرين متتابعين ومن حلقة تحفيظ لحلقة ذكر ومن مسجد لى مسجد قيام ليل وتهجد وبعد داك ترميهوا ويا ليلى ليلك جن معشوقك اوه وأن ويغنى المغنى وكل على ليلاه! وبعد ىداك الريكورد والتراكر شاهد! جنى
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: jini)
|
Quote: بعد أن إتضح أنه يعمل كمخبر سري أو بالعربي ( ك لب أمن ) لصالح زوجتك |
هو اصله يكون في اسرار و خينات و كسير تلفونات ليه
الراجل كان ما عجبته زوجته ما يطلقه و يشوف البمشي يتونس معاها بالتلفونات دي
يطلقا و يجهجه اولادوا و يخرب بيتو لكن اخير مليون مرة و اشرف ليهو يكون صريح و يقول ليها انتي ما عا########ي من انه يكون خائن
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: MOHAMMED ELSHEIKH)
|
Quote: هو اصله يكون في اسرار و خينات و كسير تلفونات ليه
الراجل كان ما عجبته زوجته ما يطلقه و يشوف البمشي يتونس معاها بالتلفونات دي
يطلقا و يجهجه اولادوا و يخرب بيتو لكن اخير مليون مرة و اشرف ليهو يكون صريح و يقول ليها انتي ما عا########ي من انه يكون خائن |
لا حولا انتى بى جدك زعلتى! المشكلة ما فى الونسة يا تسنيم المشكة التحركات واللوكيشن!
الراجل كان ما عجبته زوجته ما يطلقه و يشوف البمشي يتونس معاها بالتلفونات دي والحل الطلاق! التعدد موش حل! الليلة انا كايسو معاك جنى
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: سناء عبد السيد)
|
كدي عن إذنكم أشوف سناء دي
Quote: هو اصله يكون في اسرار و خينات و كسير تلفونات ليه
الراجل كان ما عجبته زوجته ما يطلقه و يشوف البمشي يتونس معاها بالتلفونات دي |
لاحولااااااااااااا
Quote: يطلقا و يجهجه اولادوا و يخرب بيتو لكن اخير مليون مرة و اشرف ليهو يكون صريح و يقول ليها انتي ما عا########ي من انه يكون خا |
براحة...كدي ...واحدة واحدة
إنتي قفزتي بالزانة قفزة كبيرة جدا
جاييك راجع...بالراحة
جني ياخ شوف لينا الموضوع دا لحدي ما نرجع
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: jini)
|
جني يا صديق...وين الحي بيك
Quote: قبل ما ترميهو فى الزبالة تستعملو لمدة شهرين متتابعين ومن حلقة تحفيظ لحلقة ذكر ومن مسجد لى مسجد قيام ليل وتهجد وبعد داك ترميهوا ويا ليلى ليلك جن معشوقك اوه وأن ويغنى المغنى وكل على ليلاه! وبعد ىداك الريكورد والتراكر شاهد! |
وبالدليل والبرهان.....شاهد شاف كل حاجة
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: yasir Abdelgadir)
|
الاخت سناء
سلامات مرة تانية
ياخي الناس ديل قالوا عندهم برنامج لمراقبة الازواج....إذا الزوجات مافي حوجة ليهو ...يقولوا ماعايزينوا او ما يستعملوهوا
والموضوع درجات...ماحصرا خيانة بالمعني المفهوم...بالرغم من انو دي درجة من الدرجات...لكنها ممكن تجي في الاخر...بعدين ممكن تكون في خيانات من نوع تاني...يعني خيانات في عزومة...أو في حفلة...وممكن تكون خيانات حميدة....أو ممكن ساكت يكون مشي لي امو...مش في زوجات ما بيحبوا الراجل يمشي لي امو...اها تقوم تطلقوا طوالي كدا...بعدين زي ماقال ليك جني....يمكن متزوج تاني ....يعني لا خيانة ولا يحزنون..
علي العموم مع توفر الثقة...أقترح عمل بلوك للapp. دا......كبادرة حسن نية
وأتوقع من غالبية الزوجات الا يستخدمنه....
تحياتي
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: سناء عبد السيد)
|
Quote: والموضوع درجات...ماحصرا خيانة بالمعني المفهوم...بالرغم من انو دي درجة من الدرجات...لكنها ممكن تجي في الاخر...بعدين ممكن تكون في خيانات من نوع تاني...يعني خيانات في عزومة...أو في حفلة...وممكن تكون خيانات حميدة |
خيانة حميدة؟؟ كمان بقيتوا تلونوا في الحاجات ..الخيانة ياها الخيانة ..يعني لمن زوجتك تقول ليك ما تمشي تلعب كوتشينة معناها ما تمشي تلعب كوتشينة و لمن تقول ليك ما تتكلم مع ناس معينين معناها ما تتكلم معاهم.. ما تمشي العزومة الفلانية معناها ما تمشي العزومة الفلانية ما تتلفت كتير و انت سايق معناها ما تتلفت كتير و انت سايق الكلام واضح
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: yasir Abdelgadir)
|
وفي الخيانة البيضاء:يا سناء وهي إنك بعد الدوام تمشي تحضر المباراة في الاستاد...ولما تنتهي المباراة تلقي ليك زي ستين مس كول...وتعرف إنو بدل ماتمشي البيت...لازم تمشي بيت أبوها...وتعتل اي العيال نايمين...ولا كلمة في العربية..
بعدين ...في مسلسل اليومين ديل إسمو برشلونة وريال مدريد....مرتين في الاسبوع
يبقي الله يعين علي العتالة
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: yasir Abdelgadir)
|
Quote: الموضوع ده ابسط من كده..لما يضربوا ليك تلفون يسالوك انت وين؟ تقول الحقيقة من غير لف و دوران. لو حكومتك قالت ما فى لعب كتشينة مع الاصحاب ...الكلام ده واضح...ما فى كتشينه. و لكده ما فى واحده بتحتاج تستعمل الحجات الصعبة دى!!!! |
ذكرتيني الزول القال: الما بسمع كلام مرتو ما راجل.
نحن غايتو ما قاعدين نبيت العدة للصباح هه لكن شوف عيني في برنامج نزلوهو الرجالة إسمو Fake Location يقول للمدام إنك في المسجد حتى لو كنت البطل في برنامج افراح افراح.
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: Elawad Eltayeb)
|
سلامات العوض
Quote: نحن غايتو ما قاعدين نبيت العدة للصباح هه |
واحد صديقي نصحني وقال لي : أوعك تتجوعل يوم وتغسل ليها العدة...عندما سألتو عن السبب...قال لي يوم كانت عيانة وحنيت عليها قلت أساعدها حتي لو أغسل ليها العدة....قال لي وحياتك من ديك وعيك...كل يوم غسيل العدة بقت من مهامي اليومية
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: yasir Abdelgadir)
|
Quote: واحد صديقي نصحني وقال لي : أوعك تتجوعل يوم وتغسل ليها العدة...عندما سألتو عن السبب...قال لي يوم كانت عيانة وحنيت عليها قلت أساعدها حتي لو أغسل ليها العدة....قال لي وحياتك من ديك وعيك...كل يوم غسيل العدة بقت من مهامي اليومية |
صاحبك المسكين ده قول ليهو يوم كده شوف أحسن وأعغلى طقم للمدام... وأعمل نفسك ما شايف وأرميهو الدلجة، تاني لو هوبت جمب المطبخ ساكت بدوك كرت أحمر.
ياخي ما تخلونا نكشف الأسرار تعالوا نعمل لينا بورض برانا هه
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: jini)
|
سلام يا شباب متجمعين عند النبي(ص)قول آمين.
Quote: وتخت الايفون جنب المسجد وتعمل دايفرت للعنيد وتطلع لسانك كرفتة عشان يامنوا ويتاكدوا! جنى |
عارف يا جني وبكده نكون ابتكرنا وظيفه جديده للامام او حارس المسجد انه يبقى (مساك تلفونات)(ههههههه) ويحصل على(اوفر تايم) والا فمن يضمن بان يجد تلفونه في مكانه بلا حرسه؟؟ دي الايفون و الاجر على الله!!
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: بله محمد الفاضل)
|
بلة الفاضل سلامات
Quote: والله المرأة راداراتا أجدع من أي ابتكار وينك يا صاح دي عندها الحاسة العشرمية وفي الحتة دي بالذات |
يعني لو خيط ساكت علق في جلابيتك من باب المسجد...دا حيكون موضوع طويل جدا...والعجب لو لونه أحمر ولا زهري...الادلة الجنائية حتظهر براعتها علي طول
تحياتي
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: عبدالعزيز الفاضلابى)
|
الحمد لله الواحد شااااااطر بعد الشغل البيت...والله يكفينا شر الاي...والباد... والحاجة السمحة زولتي مسكينة و"مكجنة"سودانيز اونلاين دة..عشان كدة امااااان لو مشينا برشلونة والريال... انت يا ياسر بتمشي تبحت وتجيب الكلام البجيب الكلام...شكيتك علي "ولادتك"يا دكتور..(علي قول خالتي الروضة الله يرحمها).. يا زول دة كلام من قولة تيت جاب طلاق..وفرتقة..سناء شايتة "ضفاري"..ياخي انا بجاي خفت من كلامها... تحياتي
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: fadlabi)
|
سلام الأخ ياسر و كل ضيوف البوست..
غايتو الحمدلله العرفنا سودانيز دي بعد الواحد ما اتزوج و استقر في حياته و تبادل الفهم مع شريكه كويس كان جهجهتونا بكمية الظن و الشك الممكن تجيبها نوع ونستكم دي، و كان يمكن قنعتونا و الا قنعتوا رجالنا من فكرة الزواج أصلاً.. يا أخوانا هي العلاقة الزوجية ربنا قال أساسها المودة و الرحمة.. زي ونستكم دي و إن كنت مقتنعة انو معظمها هزار.. لكن بتخلي الما متزوج يعتبر الزواج دا حرب.. بكل قواعد الحرب من الخدعة و الجاسوسية و أنواع الأسلحة و التكتيك! و بالتالي في شباب كتار ممكن يبدأوا حياة الزوجية - لو قرروا بعد نوع الكلام دا يرضخوا لضغوط المجتمع و الفطرة- و هم مجهزين عدة و عتاد من الأفكار و الأحكام المسبقة!
طيب.. هل من الصعوبة انو الزوجين كل واحد يخت نفسو مكان شريكه و يتعامل معاه زي ما بيحب هو/هي أن يعامل؟ ..
مرة بتناقش مع واحدة صاحبتي.. قلت ليها، عامليهو زي ما بتحبي انو يعاملك.. قالت لي ، ليه ما يبدأ هو؟! و دا نوع التفكير اللي لا بيودي و لا بيجيب.. حتفضل كل الأفكار و الأفعال السلبية تعيد و تكرر نفسها من الجانبين أبدأ بنفسك.. لو كنت زوج أو زوجة.. و خليك صبور/ة.. حتلقى السبت القدمتو جاء وراه أحد.. و أيام الأسبوع كلها حتبقى حقتكم انتو الاتنين.. بعدين هل الراجل البيخون زوجته بيقدر ينوم؟ ما خوف من التحقيق.. لأ خوف من الخيانة نفسها.. مش بيقولوا لو ساء فعل المرء ساءت ظنونه..و برضو بيقولوا (What goes around comes around)
.. من حق كل شريك على شريكه يعرف مكانه وين ما أمكن.. لو احتاجت ليهو أو احتاج ليها هو لأي طاريء (الدنيا ما معروفة) و من حق كل واحد فيهم انو يحفظ للتاني غيبتو.. بأقواله و أفعاله.. أو افعل/ي ما شئت.. كما تدين/ي تدان/ي
لو الرقابة ما بقت من ضمير الواحد كل تكنولوجيا الدنيا ما حتوفر الاحساس بالأمان!
احتجت للكتابة بالصيغة الجندرية لأني محتاجة أوضح اني بحمل المسؤولية نفسها للطرفين..
سامحونا على النقة الكتيرة و تناول الموضوع بشيء من الجدية قد لا تتناسب مع روح الفكاهة في البوست تحياتي و احترامي للجميع
..
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: Ahmed El Gasim)
|
أحمد القاسم
Quote: شكيتك علي "ولادتك"يا دكتور..(علي قول خالتي الروضة الله يرحمها).. يا زول دة كلام من قولة تيت جاب طلاق..وفرتقة |
الكلام دا قبل الفيلم ما يبدا ذاتو
Quote: الحمد لله الواحد شااااااطر بعد الشغل البيت...والله يكفينا شر الاي...والباد |
وبعد تخلص شغل البيت ...المذاكرة والنوم عديل...كدة بتجيب النمرة الكاملة ...
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: سناء عبد السيد)
|
Quote: Quote: الاخت المحترمة : سناء
عايز أرد ليك ...بس بعد مايخلص الدوام...وأشرب كباية شاي مظبوطة..لانو البريك صغير ومايكفي....أوك؟؟
الأخ المحترم ياسر تسلم على اهتمامك بالرد.. أخد راحتك مافي مشكلة :) |
يا ياسر حدد ياخ..............ياتو سناء؟ عربى ولا انقليزى؟
======= وش كيف ماعارف.....بس اكيد بيضحك
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: yasir Abdelgadir)
|
Quote:
يا زكريا....ماعذبتنا
|
هههه هسه العذب التانيين منو؟ ده شنو البوست الهواء الجايبو ده؟ والله العزابه اتاريهم فى نعيم يعنى تانى كشاتين الا بالدس هو العرس البدون خيانات زى دى حلاتو شنو انا غايتو مكنتى دايماً مقسمه...........عندنا اجتماع وما كضب ......ما صحي الشله بتجتمع كن ويستى ولا كن حريق
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: محمد زكريا)
|
الاخت الفاضلة سناء خالد:
Quote: سلام الأخ ياسر و كل ضيوف البوست..
غايتو الحمدلله العرفنا سودانيز دي بعد الواحد ما اتزوج و استقر في حياته و تبادل الفهم مع شريكه كويس كان جهجهتونا بكمية الظن و الشك الممكن تجيبها نوع ونستكم دي، و كان يمكن قنعتونا و الا قنعتوا رجالنا من فكرة الزواج أصلاً.. |
أعتقد أن الزواج الذي يسبقه توافق و إنسجام... ممكن يؤدي إلي علاقة حب متينة..توفرأرضية صلبة في العلاقة الزوجية...
Quote: يا أخوانا هي العلاقة الزوجية ربنا قال أساسها المودة و الرحمة.. زي ونستكم دي و إن كنت مقتنعة انو معظمها هزار.. لكن بتخلي الما متزوج يعتبر الزواج دا حرب.. بكل قواعد الحرب من الخدعة و الجاسوسية و أنواع الأسلحة و التكتيك! و بالتالي في شباب كتار ممكن يبدأوا حياة الزوجية - لو قرروا بعد نوع الكلام دا يرضخوا لضغوط المجتمع و الفطرة- و هم مجهزين عدة و عتاد من الأفكار و الأحكام المسبقة |
!
والاساسيات الذكرتها فوق دي إذا توفرت بتؤدي إلي بناء جدار ثقة قوي جدا بين الشريكين...لا يستطيع أقوي سلاح أن ينال منه..دعك من الاسلحة التكنلوجية الخفيفة دي
يبقي لو كل زوجة مقتنعة بمتانة العلاقة بينها وبين زوجها....عليها أن تبادر بمنحه الثقة اللازمة...ومعها ما يحتاج من بهار لانضاج ثمرة الحب داخل المنزل....ولتستعد لقطف الثمرة مع الزوج الذي لن يجد طعما أروع من هذه الثمرة , مهما بحث ...
أتوقع من كل زوجة .. أن تبحث عن هذا البهار الذي يحبه زوجها...حتي تنضج الطبخة وتصبح أشهي...وحينها لن يتوجه لاي مطعم اخر....لانه لا يوجد ما يفتقده.
أشكر وأثمن لك مداخلتك الثرة
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: yasir Abdelgadir)
|
معلومة مهمة جدا: الراجل صاحب الايفونات دا طلع ذكي جدا...فبعد فترة وجيزة من إعلان خدمة تتبع الازواج ..إنتهت كل البضاعة الموجودة في السوق من الايفونات...بل وأصبحت بعض الشركات المخدمة تطرح عددية محدودة كل يوم سبت من الاسبوع .لا بل وصارت هناك زحمة شديدة وشكل ووساطات...بالرغم من السعر الخيالي للايفون...
الظاهر أن هناك أزمة ثقة حقيقية
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: yasir Abdelgadir)
|
الاخت الكريمة سناء عبد السيد
Quote: يعني لمن زوجتك تقول ليك ما تمشي تلعب كوتشينة معناها ما تمشي تلعب كوتشينة و لمن تقول ليك ما تتكلم مع ناس معينين معناها ما تتكلم معاهم.. ما تمشي العزومة الفلانية معناها ما تمشي العزومة الفلانية ما تتلفت كتير و انت سايق معناها ما تتلفت كتير و انت سايق الكلام واضح |
رد عبدالله كسلا
Quote: لكن يا سناء دي ما بالغتي فوقا دي !!
دي زوجة وله صول في حصة كديت |
ماذكرتيه هنا لا يمثل كديت فقط كما قال أخونا ...... بل يمثل خدمة إلزامية عديييل....وعليه فإن الزوج في هذه الحالة سيقوم بعملية قد السلك يوميا (أسألي منها ناس الخدمة الالزامية)...فكل مرغوب ممنوع يا سيدتي.. هلا فكرت قبلا بأن هذا الزوج (والحبيب )..يحتاج لبعض ال entertainment بعض ضغط العمل اليومي والواجبات المنزلية ...ولعل الغالبية تتفق في أن معظم الرجال يحبذون مباريات كرة القدم...أو الكوتشينة...إذن لابأس من بعض الوقت حتي يعود الزوج أكثر حيوية...وتنتفي بذا الحاجة للقلق والتوتر...وتبور بضاعة الراجل صاحب شركة الايفونات هذا...
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: smart_ana2001)
|
http://www.iphoneislam.com/?p=10458
هل آبل ترصد تحركات مستخدمي اجهزتها؟
Quote: كيف يمكنني الكشف علي الملفات بدون تشغيل البرنامج؟ان هذه الملفات موجوده في المسار التالي /Users//Library/Application Support/MobileSync/Backups. كل مره ستقوم فيها بعمل Sync للآي فون او الآي باد سوف يتم تخزين الملفات هناك, معظمهم سيكون باسماء عشوائية ولكن هناك ملفات اساسية واسمائها ثابته مثل Info.plist و Manifest.mbdb. قم بالعثور علي المجلد الذي يحوي احدث نسخ احتياطية عن طريق ترتيب العرض بطريقة modified dates, ثم قم بفتح الملف Info.plist عن طريق اي محرر نصوص لتري لأي جهاز يتبع هذا الملف (في حالة اذا كنت تكلك اكثر من جهاز مثل آي باد وآي فون وتستخم نفس الجهاز لتوصيلهم). من المفترض ان تري اسم الجهاز. تاكد انها تخص جهازك. الملفات Manifest.mbdb و Manifest.mbdx يحتوون علي قائمة بالاسماء الحقيقة للملفات ممثلة في صورة ارقام وحروف عشوائية. لحسن الحظ اليساندر قام باكتشاف طريقه تمكنه من تحويلها تجدها هنا
- هل يشارك البرنامج تلك المعلومات مع اي جهه؟ لا, جميع البيانات تظل علي جهاز الكمبيوتر الخاص بك. لقد تم اتاحة الكود الذي استخدم في تنفيذ البرنامج للجميع ليتمكن اي شخص من فصحه والتاكد من انه لا يتجسس عليك او تطويره اذا كنت من المطورين. - ماذا يمكنني أن أفعل لإزالة هذه البيانات؟يتم تخزين قاعدة البيانات للأماكن التي تواجدت بها على الآي فون الخاص بك، وكذلك في أي من النسخ الاحتياطية التلقائية التي يتم إجراؤها عند عمل Sync مع الآي تيونز. شيء واحد يمكنك فعله من شأنه أن يساعدك وهو اختيار نسخ احتياطية مشفرة، وبذلك سوف يمنع المستخدمين الآخرين أو البرامج على جهازك من عرض البيانات ، ولكن ستظل هناك نسخة على الجهاز. |
المصدر: http://www.iphoneislam.com/?p=10458#ixzz1KleHDrNP
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: smart_ana2001)
|
ههههههههههههه دي ضحكة شماتة طبعاً شمتااااانة فيكم يا معشر المتزوجون والمتزوجات.. شغالين مع بعض مخبر وحرامي :) غايتو العضو القال رادارات الزوجة احسن من اي تلفون .. اداكم النجيضة
___________ سناء انتي لو بتنصحي تعالي انصحيني انا دي هدية ورضية وبسمع الكلام ولا اعرف التعامل مع الأجهزة الحديثة :)
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: سارة علي)
|
Quote: تايبيه - ، د ب ا - أطلق تايواني برنامجا حاسوبيا صممه لمساعدة الزوجات في اكتشاف خيانة الأزواج، وعشيقاتهم. نقلت صحيفة "أبل ديلي" عن هوانغ كو تاي مصمم البرامج، القول ان برنامجه "اكتشف العشيقة" يستطيع اكتشاف خيانة الزوج عبر رصد اتصالاته. يوضح هوانغ، إن المستخدم سيكتب رقم الهاتف المشتبه به في البرنامج، الذي سيقوم بحساب فترات المكالمات ومرات الاتصال بكل رقم. |
التكنولوجيا في خدمة الزوجات
| |
|
|
|
|
|
|
Re: أضبط: زوجتك تتبع تحركاتك سرا عن طريق تلفونك (Re: PLAYER)
|
Quote: ان هذه الملفات موجوده في المسار التالي /Users//Library/Application Support/MobileSync/Backups. كل مره ستقوم فيها بعمل Sync للآي فون او الآي باد سوف يتم تخزين الملفات هناك, معظمهم سيكون باسماء عشوائية ولكن هناك ملفات اساسية واسمائها ثابته مثل Info.plist و Manifest.mbdb. قم بالعثور علي المجلد الذي يحوي احدث نسخ احتياطية عن طريق ترتيب العرض بطريقة modified dates, ثم قم بفتح الملف Info.plist عن طريق اي محرر نصوص لتري لأي جهاز يتبع هذا الملف (في حالة اذا كنت تكلك اكثر من جهاز مثل آي باد وآي فون وتستخم نفس الجهاز لتوصيلهم). من المفترض ان تري اسم الجهاز. تاكد انها تخص جهازك. الملفات Manifest.mbdb و Manifest.mbdx يحتوون علي قائمة بالاسماء الحقيقة للملفات ممثلة في صورة ارقام وحروف عشوائية. لحسن الحظ اليساندر قام باكتشاف طريقه تمكنه من تحويلها تجدها هنا |
ماهو دا الكلام الاباهو المهدي ذاااااتو
| |
|
|
|
|
|
|
|