|
|
|
 Re: ويبقي العود ما بقي اللحاء.... (Re: خالد الحاج)
|
الاخ الحبيب بن العم خالد الحاج
شكرا علي حذف ذلك البوست
اما عن نفسي اولا اعتذر لاي عضو مسسته بسوء
ثانيا نمد ايدينا بيضاء من غير سوء للجميع
وياريت تكمل نعروفك وتحذف البوست بتاعي كمان اكون شاكر ومقدر
ولا عدمناك اخي
والكبير يظل كبير
مع كل الود
| |
 
|
|
|
|
|
|
|
 Re: ويبقي العود ما بقي اللحاء.... (Re: خالد الحاج)
|
بس انت كدا يا خالد... بتعاقب كل الناس بدون استثناء..حالة البورد السبب فيها اشخاص يعدون علي اصابع اليد الواحدة وانا في اعتقادي انها حالة تعكس تواجدنا اينما حللنا في السودان او خارجة.....والمشتركين اكتر من خمسمائة شخص....والقراء يفوقو الالف شخص.. ديل كلهم تضرب بهم عرض الحائط.... وتروح... لا يا خالد... انت اكبر من كدا...... هدئ نفسك وروق شوية........
الليلة يا سيدي الحسن ما اطلع واحد من ناس الاصابعين القلتهم انا ديل
| |
|
|
|
|
|
|
|
|
|
Re: ويبقي العود ما بقي اللحاء.... (Re: خالد الحاج)
|
أبا حباب وجعفر
ما فهمنا حاجة . يعنى ماشى وللا شنو
طيب أنا وبكرى والباقين قاعدين نعمل شنو
أوعى يكون هذا ما تقصده . لا ترحل أنت ولا يرحل أى من الباقين لأن
أى خلاف مهما كان سيكون داخليا . إنتو الغربة عمات فيكم وللا شنو .
ما عارفين إنه المشاكل دايما دليل صحة وعافية . وأمال نحن الكبار ناس عمك ملاسى وهوبفل
وخالاتك ناس دوم والتومة ( التومة دى جارتنا فى الخرتوم زى ما تقول أختك بيان ) يعنى قاعدين نعمل شنو ؟
وبعدين لازم يكون فى شوية مشاكل لكن من هنا لى قدام أى مشاكل تحصل ما دايرين يكون فيها
تجريح . وأنه كل زول يعمل بى أصله . دى ذاتها ما كان مفروض نغفرها لكل من كان له دور فيها
وأنا موش أجاويد لكن لأنه لم أقل شيئا قبلها لأنه كنت موهوم بيها وشفتها كبيرة فى حق أنفسنا
وقدرت ما كتبت مسحت . وكتر خير الأخوان الكتبه جميعهم ما قصروا كان صبروا واللا حنسوا واللا
لاموا واللا عديل إتخذوا موقف رجولى .
فيا خالد بالله عليك إن كان ما قصدت أنت هو ما أنا أكتب فيه . فأرجو اللآ يتم لأنه سيجر إلى
مشاكل ولوم من أخوان لأخوان ولن تنتهى القصة وأنت أكبر من إنه نوضح لك المسألة . وقد كنت
شيخ العرب فى الحتة .
سلام أخيك صديق والخال ملاسى
| |
|
|
|
|
|
|
|
|
|
Re: ويبقي العود ما بقي اللحاء.... (Re: خالد الحاج)
|
ياخال
مساء الخيرات
Quote:
أن، سبع ضحكات وضيئة
تطفئ سبع آهات عجاف
ونجتاز المهالك
|
يعنى نفهم خلاس انو الرحمابى روح
والله خسارة
وبالمثل اشد على ساعدك ياخال واقول ليك هكذا عرفتك
وامض فى طريقك لتتحفنا اكثر واكثر
سؤالى مرة اخرى
لماذا يغيب عنا الرحمابى (او بالاحرى قرر الذهاب , وهو يكتب الابيات اعلاه المنتقاة من وحى القرآن)
التحية لك مجددة
بكرى
| |
|
|
|
|
|
|
|
|
|
Re: ويبقي العود ما بقي اللحاء.... (Re: سمندلاوى)
|
المهندس الأديب/ خالد الحاج
اظنك عرفت من السيدة الفاضلة زوجتك أنني هاتفتك. ولسوء حظي كنت أنت ساعتها خارج الدار‘ فلم أحظ بشرف التحدث اليك وربما اقامة جسر التعارف بصورة افضل. حدث ذلك مباشرة عقب قراءتي اعلانك الرحيل عن ساحة-أقول دون مجاملة-أنت أحد أبرز فرسانها.
لم يمض فترة طويلة على وجودي في هذا المنبر، ولكني وجدت بين قاطنيه أهلي وعشيرتي- يستوي في ذلك من كتب في اتجاه الريح التي تقود خطواتي أو الآخر الذي يسبح في كل عبارة له عكس أفكاري ورؤاي. كلنا في خاتمة المطاف أبناء وبنات بلد واحد‘ يدعي كل مناأنه الأقرب في أقواله وأفعاله الى تراب ذاك البلد. نختصم لكن دون اسفاف أو فجور في الخصومة.
ومن المؤسف -وأنا أتحدث كقارئ- أن يفاجئني اعلانك المغادرة وأنت أحد أكثر من لفتوا انتباهي نشاطا ومهارة في التصدي أو الرد بأدب جم على الخصم(وهي خصومة أفكار واختلاف أذواق). ولا أظن أحدا -خاصة ربان السفينة بكري أبوبكر- يأذن لك بالمغادرة ونحن نؤم أكثر المحافل شفافية..ساحة التدرب على الحوار. وقديماقالوا: نصف رأيك عند أخيك! وأظنه الامام الشافعي الذي قال: رأيي صواب يحتمل الخطأ، ورأي غيري خطأ يحتمل الصواب!!
نحن (السودانيون) يا خالدعيوبنا كثيرة، لكننا نعتز ونباهي بأننا أمة فريدة في عفة وصفاء النفس وفي المقدرة على تخطي المرارات. وهذه محمدة شهد لنا بها الخصوم. وبلغة العسكر: مكانك..قف!!!
أخوك/ فضيلي جماع
| |
|
|
|
|
|
|
|
|
|
Re: ويبقي العود ما بقي اللحاء.... (Re: 3mk-Tango)
|
الاخ خالد ابا
لم يسبق ان التقينا في بوست
لكن التقينا في اسبوع دارفور
وبصماتك واضحة في كل حرف كتب في هذا الاسبوع
كلمة واحدة ان المحافظة على هذة الشمعة لتظل مضيئة تحتاجك كما تحتاج الى الشرفاء من امثالك
انها مسؤولية ان نتصدى للظلام والجهل
وان نصبر على المر والمؤلم
ولو لا ذلك ما انقدحت شرارة المعرفة
| |
|
|
|
|
|
|
|
|
|
Re: ويبقي العود ما بقي اللحاء.... (Re: خالد الحاج)
|
خالد
وكما عهدناك..
حكيما"...حكيما"...حكيما"
من يوم دخلت البورد
وانا ابعد نفسي عن كل ما لا يعجبنى...
ولم افكر مرة بترك هذا الوطن
الا الان
ما حردانة
ولا دايرة حنيس
لكن
الرحمابى كان ما جاء... رد على البوست دة
انا تانى ما داخلة
| |
|
|
|
|
|
|
|
|
|
Re: ويبقي العود ما بقي اللحاء.... (Re: Hussein Mallasi)
|
خالد يا ابا يا رسول المحبة
تفارق كيييييف تخلينا ؟؟؟؟
انا والله ما شفت بوست الزعل حقك
وبحمد الله اني جيت متأخر
يازول ما تبوظ اعصابنا تاني
هو الفراق دا ساااهل كدى ؟
"ولصحبك عليك حق" يا خالد ونحن صحبك وأهلك
والضفر ما بيطلع من لحمو
------
ملاسي
عليه العوض ومنو العوض
| |
|
|
|
|
|
|
|
|
|
Re: ويبقي العود ما بقي اللحاء.... (Re: خالد الحاج)
|
عموم الأهل والأحباب
خالد مقيم فينا "ما أقام عسيب"
والرحمابى لن يغادرنا أبدا، إلا أن تغادر الشمس مدارها
ولننشر المحبة بيننا، وليكن العقل محركا للأرواح ووقودا للأفعال
لحظتها سوف "تهون القواسى" وتتأسس عوالم تحتشد بحيوات خضراء وطيبة
ولنختلف ما شاء لنا الإختلاف
ولكن لنزيح العداوة والشطط جانبا، ووفى كل ومضة نفور، نتذكر أننا سودانيون، صفوة أمم الأرض وأخيرهم، على الرغم من كل ما يشوبنا الآن، لكننا والله ، نبقى الأحسن والأعلى فى كل شئ، فقد راينا وعايشنا كل أهل الأرض، من أقصى جليدها شمالا الى "قهبونة" إستوائها جنوبا، ومن صفرتها شرقا الى حمرتها غربا، ولم نجد والله من هم أحسن منا، فى أى شئ وكل شئ
لنختلف
ولكن
لنعلن الود شعارا
أبوذر
| |
|
|
|
|
|
|
|
|
|
Re: ويبقي العود ما بقي اللحاء.... (Re: AlRa7mabi)
|
الرحمابي
تعرف انا لو قدرت كتبت زي كلامك بتاع الانسحاب دا بنشره كرواية واعتزل الادب انا ما عارف انتو قريتو وين ولا اهلكم كان بيقولوا ليكم شنو .. طبعا ما حاسد ولا بغران بس معجب جدا وكمان شوف زي عزب كلام المطر دا دا كلام بيقولوا زول اتربي بالويكة والكسرة الاكلناها دي .. الله يديكم العافية ويحفظكم ويا خالد عليك الله كل يوم بوست زي دا تستفذ لينا فيه زي العمالقة ديل ويتحفونا بمثل هذا الكلام الملائكي دا ... شوف الناس الراقية لما تجي تمشي بتصاحبها كلمات مموسقة ومدوزنة وموسيقي رومانسية موش زي ناس نحنا الواحد يمشي وهو مغبر وملابسه اتقطعت من شكلة لسع ما انتهي منها ... غايتو كل زول بياخد نصيبه في الدنيا دي ... بعدين انتو التلاتة تمشو وين ؟؟ وانا حازعل منه تاني؟ والحينصحني منو تاني يقول لي يا اساسي روق واحلي
وان شاء الله الدار عامرة بيكم التلاتة هو في منو غيركم ؟؟
| |
|
|
|
|
|
|
|
|
|
Re: ويبقي العود ما بقي اللحاء.... (Re: اساسي)
|
يا شباب
خالد كتب
Quote: أعتذر لكل من كتب في البوست السابق ولم أستأذنه
في الحذف..ولكل من لم أرد عليه..
ونأمل في بورد أجمل أروع أطيب أفيد. |
هنا يعتذر خالد للاخوان والاخوات المتداخلين في البوست الذي قام بحذفه
وتم الحذف بناء على اقتراح من بعض هؤلاء ومن بينهم الاخ الرحمابي
واذكر انه كتب للرحمابي هذه العبارة : لك هذا
ويعني حذف البوست
على ان يبقى الرحمابي
التحية لخالد وللرحمابي
وهما باقيان ما بقيت الروح الانسانية العامرة في قلبيهما
وما بقيت محبتكم لهما
ولأننا جميعا لم ننس الالفة
اذن فلا رحيل
| |
|
|
|
|
|
|
|
|
|
Re: ويبقي العود ما بقي اللحاء.... (Re: THE RAIN)
|
الأخ العزيز المهندس خالد الحاج
تحياتي و مودتي
فهمت من البوست أنه نفس كلام الرحمابي الذي أنزله في بوستك السابق.
المهم :
لا نرضى أبدا بمغادرة الرحمابي أو مغادرتك للبورد مهما كانت الأسباب ،، بل نحن لدينا أسبابنا لنتمسك بكما و نتشبث بكما.
الله يكضب الشينة
تسلم
| |
|
|
|
|
|
|
|
|
|
Re: ويبقي العود ما بقي اللحاء.... (Re: خالد الحاج)
|
غايتو يا خالد يا خوي بوستك دا مدرسة عديل..
إتخيل كل الناس فهموا انك ماشي في حين انو الموضوع واضح وفيه اقتباسات من مقالات اخرين واعتذار لهم وتوضيح وبداية للصفاء والتصافي.
هذا هو بالضبط مصدر كل سوء الفهم والمشاكل: الناس بتستعجل وما بتقرا الكلام كلو وما بتقراه لاخرو، وبعدين يردوا على الحاجة الفهموها هم، مش الحاجة القاصدها الكاتب!! المهم الحمد لله المرة دي جات سليمة بدون مشاكل، بل بالعكس ح تشوف غلاوتك عند الناس الخافوا تكون ماشي، وأهو زول من مقاس فضيلي جماع جايي يحنسك ما تمشي.
أها ياخوانا شفتو كيف؟؟ كل مشاكلنا عبارة عن تسرع للعداء، اوالرد برد الفعل قبل التامل والتفكير وتقديم حسن الظن والرغبة في النفع العام والاصلاح، وبالتسرع والتهور عديل كده.
لكن يا خالد يا خوي قالوا كان اتنين قالوا ليك راسك مافي المسو: أها إمكن اكون انا الفاهم غلط، ولذلك ارجوك ما تمشي لانك عمدة هذا البورد، ومفتاح استمراره وتجدده!!
المرة الجاية كان كتبت بوست ارجو شرحه بعدة لغات عشان ما أطير ليك شكلة!!
أها انا من مدرسة اخونا عمك تنقو العاقل، صاحب توقيع الامام النفري: كلما اتسعت الفكرة، ضاقت العبارة. ولذلك الباب البجيب المشاكل بقيف منو بعيد ما بدخلو، لكن البورد ما بخلي، بالله؟؟ هل يستطيع الاوغاد انتزاع سعادتنا؟؟ هيهات (بشرى الفاضل). لكن المشاكل شئ طبيعي والناس بتتعلم منها والمجتمع بصلح منها نفسه، ونحن السودانيين بنشتاق ليها ولو ما لقيناها، نخلفها من مافي! والدنيا دي دايرة صبر شوية، وتامل وتحمل وتجمل..
ولكم الود والسلام
| |
|
|
|
|
|
|
|
|
|
Re: ويبقي العود ما بقي اللحاء.... (Re: shiry)
|
الاعزاء
ربنا يحفظكم جميعا
هذا الطيف اصبح حقيقة لا مجازا حتى
وكالسراب
نحلم به وبوصولنا لا برحيلنا
يبقى العود واللحاء
لتكون الخضره
والاتكأة
على هذا الظل الريف
والف لا
لرحيلكم
| |
|
|
|
|
|
|
|
|
|
Re: ويبقي العود ما بقي اللحاء.... (Re: HAMZA SULIMAN)
|
إخوتى الكرام لكم الحب والحب
خالد الحاج أيها الدعامة التى تحملنا جميعا دون كلل أو عناء ما أجملك وأنت تنادى بصوت العقل ودوزنة العود لنغنى جميعا لحن الحب واحترام الاخر فى كورال منسجم الاصوات والنشيد.. لك الحب
الاخ الجميل خلقا واخلاقا الرحمابى
ما أروعك أيها الاديب المؤدب .. إنها لحيظات قلائل تلك التى أسعدنى الحظ بها فى قربك ولكنها أمتددة لتطال ما تبقى من عمر تتواصل فيه الروح .. فكان هنافى البورد لقانا الاول وبمسقط لقانا الذى مازال مستمرا فأرجو أخى أن لا تحرمنا هذا البراع والمداد الذى نستمد منه تهذيب أرواحنا وافكارنا..
الاخ المطر ما أجمل مشاعرك وهى تهطل كالمزن لتروى يباب دواخلنا
حفظكم الله جميعا وحفظنا واياكم
| |
|
|
|
|
|
|
|
|
|
Re: ويبقي العود ما بقي اللحاء.... (Re: عزيز)
|
يعني الاكان حردان الرحمابي؟....مو خالد؟... وخالد شابكنا العود واللحاء ويجي واحد يقول خالد قاعد فيهو زي ما قعد عسيب..... عسيب دا منو؟... معانا في المنبر؟...
انا قايلو خالد الحردان.....وحات الله.....
طلعت انا عودي في الموضوع عود مرا...... الرحمابي عود مرا اوووووعى تقراها بعينك الموجعاك....
وبرضو انت يا الرحمابي غالي وفراقك ما بنحملو
| |
|
|
|
|
|
|
|
|
 Re: ويبقي العود ما بقي اللحاء.... (Re: Elmosley)
|
الأحباء الكرام...
ياه لو تعرفوا مبسوط كيف من البوست ده والناس الفيهو..حتي إنو شيطاني يقول لي
يا زول طنش شوية إستمتع بسؤ الفهم الحصل للناس ده وأسمع ليك كلمتين حلوات
وكيف لما يجي الكلام الجميل من ناس فاضلة ..الأستاذ فضيلي جماع ، أبوجهينة.دكتور الصاوي.
أباذر..رحمابي..سجيمان مرتين وا حلالي، جمال هوب فل،عثمان حمد ، رجاء العباسي ، المسافة ،
أستاذنا موصلي ، صديق ضرار ، معتصم دفع الله ،سمندلاوي ،أسعد ، ملاسي ، خالد تنقو ، مريود علي ، هالة قوتة ، أساسي ، شرير والبرتقالة ، سمبتيكو ، عزيز خطاب الأستاذ حمزة سليمان ، المسافة وكمان شيري ما أسعدني..
شكرا لكم شكرا.ويا جماعة أمش وين أنا أخلي الناس الرائعة دي.
رحمابي ..شكرا لحضورك الجميل.
أستاذنا فضيلي جماع..
أسعدني تلفونك وكلماتك الطيبة وأسعدني وجودك هنا
الصاوي..
يعلم الله يا دكتور كنت جاي حفلة وداعك لكن أحمد الملك
الله يديه العافية مفروض يجيني ونمش سوا ولي أسة منتظرو
| |
|
|
|
|
|
|
|
|
|
Re: ويبقي العود ما بقي اللحاء.... (Re: Elmosley)
|
خالد: الرحمابي
(( سلامنا لأصل الفعل نابعا
من جسد الحبال
ممدودة أكف الجرح إذ..
بنوك - من صياح الديك - يحملون
عبئك الجميل في أثقاله
أساك في صلاة الفجر يغسلون))
تيمما برمل العشق واصلا ومارِق
| |
|
|
|
|
|
|
|
|
|
Re: ويبقي العود ما بقي اللحاء.... (Re: خالد الحاج)
|
الأخ خالد
Quote: أعتذر لكل من كتب في البوست السابق ولم أستأذنه
في الحذف..ولكل من لم أرد عليه..
ونأمل في بورد أجمل أروع أطيب أفيد.
رجاء
راوية
فتحي البحيري
كمال عباس
علاء تمبس
أسعد
بلير
أساسي
سعدو7
ديك الجن
سي جي
ودقاسم
نصار
الطيب بشير
أبو الريش
إبن العم عبد الله جعفر |
رغم انك طنشتني برضو حادخل هنا ( عارف مامقصودة )
أرجو من الإخوة اللذين يودون الإنسحاب أن يفكروا كثيرا قبل هذه الخطوة فمثل من يتسبب في غضبهم لن يصلح للمشاركة في رفع هذه الأمة لذا لاتتركوا لهم الحبل على القارب
| |
|
|
|
|
|
|
|
|
|
Re: ويبقي العود ما بقي اللحاء.... (Re: ali othman)
|
جورج بنيوتي..
وجودك..كلماتك المموسقة. شكرا للفرح
الصاوي..
بالحيل ، فضلت في كذا مناسبة أفتش ليك
وين الدكتور يا جماعة، وعرفت إنك كنت مسافر.
ولازمن يعني لازمن ألتقيك.
علي عثمان..
ما مقصودة والله..بس خالك يظهر الكبر حصل
وأخير رحمابي عين واحدة بس كعبة أنا ماشي بالولف
| |
|
|
|
|
|
|
|
|
|
Re: ويبقي العود ما بقي اللحاء.... (Re: خالد الحاج)
|
..
..
الأحباب جميعاً ( ولا اذكر أسماء هنا ، فلتبقى بالقلب )، كل من بذر بذرة محبة هنا ، له منا الحب والتقدير والإعزاز .. كلماتكم الرقيقة اثلج الصدر وذهبت بالحزن
وإن شاء الله يستمر التواصل والتواد بيننا جميعا .. شكراً
سجيمان
Quote:
يعني الاكان حردان الرحمابي؟
|
ههههههههه .. يا سجيمان أنا ما كنت حردان والله لأنو ما في زول لمس لي طرف
بس أنا قلت الجو العام ( غير صحي ) قلت آخدلي يوم يومين وبعد داك أجي
Quote:
اوووووعى تقراها بعينك الموجعاك....
|
لا المرة دي سليمة ، كنت لابس نضارة
الرحمابي
| |
|
|
|
|
|
|
|
|
|
Re: ويبقي العود ما بقي اللحاء.... (Re: خالد الحاج)
|
الاخ خالد تحياتي الحارة أولا لا أريد أن أطيل يازول راحل ماشي وين كلمنا عشان نمشي معاك ولو زهجت ياخي أخد ليك فترة راحة اسبوع كدة وتعال ثاني تلقانا نحن يانا نحن
على العموم أنا متابع لكثير من كتاباتك واشعر بأنك من ضمن القلائل الذين يمكن أن يستريح الانسان على أكتافهم وهو مرتاح ودون أن يجدحرج في ان يخاطبك دون تكلف ؛ ومرات كثيرة بزهج الواحد من البورد لكن واشعر بأنني بحاجة لهذا الزمن في شئ ثاني وخصوصا المسؤليات كل يوم بتكبر لكن بناخد لينا جمة ونجي تاني
وكلامي هذا لعشمي أن تظل بيننا وياخي نحن بتين جينا عشان ترحل انت ؟
ولو كان عندك مشغوليات تانية ممكن تخلي لينا يوم واحد في آخر الأسبوع وصحيح أنه ماكفاية لكن ممكن نبل الشوق على الأقل
ولك مني أرق التحايا
| |
|
|
|
|
|
|
| |
ASAAD IBRAHIM
سجيمان
Raja
Osman Hamad
Al-Masafaa
معتصم دفع الله
Hussein Mallasi
سمندلاوى
فضيلي جماع
HOPEFUL
THE RAIN
AlRa7mabi
اساسي
ابو جهينة
shiry
HAMZA SULIMAN
عزيز
Elmosley
فتحي البحيري
إيمان أحمد
عشة بت فاطنة
haneena
الجندرية
NGABY AJOOZ
Adil Isaac
انور الطيب
فيس بوك
تويتر
انستقرام
يوتيوب
بنتيريست