|
أمرين أحلاهما مر .... أخلع زوجي أم أقتله .... يا سيادة الرئيس ؟؟؟
|
من مفارقات القدر أن أسمع مؤخرا أن هناك لجنة أراضي قادمة إلى الإمارات
ضمن خطةإسكانية وذلك من خلال أحاديث جانبية ، وليس من مصدر موثوق به،
أوجهة رسمية، فكم من لجان جاءت ووزعت ثم ذهبت دون أن نسمع عنهاشيئا
ربما لأننا لسنا مواطنين من الدرجة الأولى ،أولأننا لسنامن الصفوة
المقربين من أصحاب اليد العليا، أو الكلمة المسموعة.
عموما وصلت اللجنة بكامل عدتها وعتادها وجنودها المدججين بالملفات
ودفاتر الإيصالات ، المسلحين بالوجوه العابسة ، والنظرات التي تحمل
ألف معنى ومعنى فتساقط عليها البسطاء من ذوي الدخل المحدود، والأغنياء
من ذوي الدخل غير المحدود رجالا ونساء شيبا وشبابالدرجة أن الشرطة اضطرت
للتدخل لوقف الفوضى والهرج والمرج في إحدى الإمارات الأمر الذي يدل على
أن أغلب الناس لا يملكون شبرا يأويهم حينما تكون العودة قسرية، إذ لا
مجال للعودة الطوعية بعد أن أصبح المستقبل مجهولا بالنسبة للذين يفكرون
في حسن الخاتمة وسط أحباءهم وأقربائهم، أما الذين يخشون شماتة الأصدقاء
قبل الأعداء عشان (لا بيت ولا فلوس)!! فسلكوا طريقا آخر وهو البقاء حيث
هم على الرغم من مخالفتهم لقوانين الهجرة والإقامة.
ذهبت ضمن الذاهبين إلى معركة الكرامة للحصول على قطع أرض في الوادي
الأصفر حيث (لا خضرة ولا ماء) ولكن كما يقولون (رضيت بالهم والهم مش راضي)
ولكن للأسف فقج عدت إلى أدراجي وأنا أجرر أذيال الخيبة ومعي العشرات
من السيدات اللواتي كن يحلمن(بعشة صغيرة) على ضواحي العاصمة على الوادي الأصفر
لكن أتت الرياح بما لا تشتهي سفني وليس سفن ثورة الإنقاذ التي يداعب سفنها الموج
الأزرق وهي تمخر في عباب البحر دائما وأبدا(أصبروا شوية علي عشان أكمل ليكم الحكاية)
عندما علمت من (تحت لتحت )أن ليس للنساء نصيب في هذه الفتة المحلولة
وأن الوادي (للرجال فقط) تقدمت نحو أحد أعضاء اللجنة القادمين من أرض
السبعمائة وخمسين ميل مربع لأسأله عن صحة الحكاية والرواية، ولكن ما أن
رآني حتى انتفض كالأسد الجريح على الرغم من أني كنت في كامل حشمتي (إسكيرت
طويل يجر في الأرض، طرحة دمورية من النوع التقيل، جزمة ولا مؤاخذة مقفولة
وشراب أسود)غير أن هذا الرجل هب وانتفض بلا سبب وقال لي
(ماشة وين خليك مكانك مع النسوان هناك نحنابنجيك في محلك)
(فعدت إلى مقعدي الخالي حزينة إذ تهزأت)وحملت باقات أوراقي
وعدت بها متلفعة بالحزن والصمت ) ولكن ليس من عادتي الخنوع ففكرت في مقابلة الضابط المرافق للجنة وهو يجلس في غرفة أخرى في كامل زينته وهيأته (لابس رسمي نجوم
ذهبية تلمع على كتفه المكتنز، نظرة حادة توقع الحدية من السماء) سألته عن صحة تلك
الإشاعة فسارع بتأكيدهابنوع من الحقد و اللامبالاة بقوله (المرة) لا يجوز لهاالتملك
إلا إذا كانت مطلقة،أو أرملة، ولا بد من أثبات ذلك ،، فخطرت على بالي فكرة خبيثة
(إما أن أقتل زوجي الحبيب فداء للوادي الأصفر ، وإما أن أخلعه كما أخلع ملابسي
(للسباحة ضد التيار) وقبل أن تختمر الفكرة المجنونة في رأسي سألت أحد أعضاء
اللجنة القادمة من أرض المليون ميل الإ ربع مربع بقولي:" طالما أن المرة
ليس من حقها التملك، وطالما هي (مرة) بكل ما تحمل الكلمة من معان
لماذا تطالبونها بدفع الضرائب، والزكاة، والخدمات التي لا نعرف سرها
الباتع حتى هذه اللحظة" بالطبع لم أجد إجابة حيث أفادني ذلك الشخص بأن الضرائب
وما شابهها من جبايات ليست من إختصاصه، فغلى الدم في عروقي ومنذ تلك اللحظة
السوداء التي تأكدت فيها أنني مجرد (مرة) لا راحت ولا جات قررت محاربة كل أشكال التمييز ضد النساء سرا وعلانية، وملاحقة كل من يمارس أي نوع من أنواع العنف،
أو الإضهاد ضد المرأة شارع .. شارع .. بيت .. بيت .. زنقة .. زنقة.. مين أنتم ؟؟؟
إلى الأمام .. ثورة .. ثورة ...
خارج النص:-
العديد من الصحفيين الذين لا يملكون باس ويردات يوجهون سؤالا مباشرا إلى نقيب الصحفيين
عن مصير الدفعة الثانية من الأراضي التي يستحقونها بجدارة (فمنهم من قضى نحبه ومنهم من
ينتظر، وما بدلوا تبديلا).
وفتكم بعافية
ملحوظة طالعة مشوار ضروري وبرجع ليكم بس تأكدوا إنه لا زلنا في عصر
الحريم و(المرة) كان فاس ما بتكسر الراس !!
|
|
|
|
|
|
|
|
Re: أمرين أحلاهما مر .... أخلع زوجي أم أقتله .... يا سيادة الرئيس ؟؟؟ (Re: عواطف ادريس اسماعيل)
|
ومنذ تلك اللحظة
السوداء التي تأكدت فيها أنني مجرد (مرة) لا راحت ولا جات قررت محاربة كل أشكال
التمييز ضد النساء سرا وعلانية، وملاحقة كل من يمارس أي نوع من أنواع العنف،
أو الإضهاد ضد المرأة شارع .. شارع .. بيت .. بيت .. زنقة .. زنقة.. مين أنتم ؟؟؟
إلى الأمام .. ثورة .. ثورة ...
سلام يا استاذة عواطف،الحمد لله انك اتأكدتى من ذلك بنفسك،الموضوع دا نحن اتأكدنا منو من كم وعشرين سنة كدا،المهم لو عندك قريشات وعاوز تسكنى فى الاطراف ما تتعبى روحك معاهم اشترى ياخى ديل شالوا اكتر المواقع الحية فى السودان وقسموا كل الفضل لناسهم وبرضوا عاوزين يصعبوها على البسطاء وكمان فيها تميز للنساء سبحان الله.
| |
|
|
|
|
|
|
Re: أمرين أحلاهما مر .... أخلع زوجي أم أقتله .... يا سيادة الرئيس ؟؟؟ (Re: Abdlaziz Eisa)
|
اهليييين بام المجاهد وبركة بالعودة
لا والله انتي صفوة ونص والحمد لله الظهرتي مع ساكواها
Quote: أمرين أحلاهما مر .... أخلع زوجي أم أقتله |
عندي ليك امرا تالت ما مر لكن حااامض
(خلليه) بدل ما انتي آآعدة كدا من غير شغلة ولا مشغلة اُعدي خللي في جوزك لغاية لما يبانلو صاحب او تبانلك قطعة ارض ان شاء الله في الوادي الفوشيا .. انتي مااالك البوديك تدخلي يدك في الجحور دي شنو لمّان تقرصي !!!
| |
|
|
|
|
|
|
Re: أمرين أحلاهما مر .... أخلع زوجي أم أقتله .... يا سيادة الرئيس ؟؟؟ (Re: امير عوض الجمري)
|
الوادي الاخضر ... الموت الاحمر
اما علمتي ذلك من قبل يا بنت إدريس ...
إنتو الإمارات دي فيها ناس بسكوا الوادي الاخضر ؟
نان ناس السعودية والجوه البلد الكادحين ديلكـ يسكوا وين ؟؟؟
الإمارات والسعودية ضياع عمر ...
وانتي بتكابسي براكـ مالكـ؟ ما يمشي معاك أبو اولادك دا .. والا بتابع في مبارة برشلونة وديفورتيفو لاكرونيا ؟
المغتربين بقوا بدل السفنجة العالية الملونة ومعجون السيجنال الكبير
والبشكير الملون بقوا بس يشيلوا معاهـــم ( كرت الجزيرة الرياضية) ... وحليل زمن الصبا ...
غــُربة فشنكـ يا مدام عواطف ...
| |
|
|
|
|
|
|
Re: أمرين أحلاهما مر .... أخلع زوجي أم أقتله .... يا سيادة الرئيس ؟؟؟ (Re: Hisham Ibrahim)
|
ود إبراهيم
يسعد مساك
أولا منو القال
ليك غربتنا فنشك
نحنا كان هدفناإنه
ندخل في أي خطة إسكانية
بفلوسنا مش مجاني
وبعدين أبو الأولاد أول
ما شاف الزحمة والكبسيبة
قال لي دة كلام فارغ
لكن أنا عنيدة قلت
الناس ديل لازم ألحق
حدهم .. وبعدين يا حدق
الوادي الأخضر دة بكرة
هتشوفو زمان عرضوا علينا
في الصالحة قطع بي مليون
رفضنا دلوقت ب80 مليون
تقول لي حارة حارة
بيت بيت ؟
ياخي صحصح معانا شوية
| |
|
|
|
|
|
|
Re: أمرين أحلاهما مر .... أخلع زوجي أم أقتله .... يا سيادة الرئيس ؟؟؟ (Re: بله محمد الفاضل)
|
تحياتي للسيدة عواطف ولكتابتها الساخرة الموجعة لكن الموضوع ليس كما فهمه البعض وجرى تسيسه كالعادة، يعني حتى لو كانت السيدة عواطف مؤتمر وطني فلن تنال من البر شيئا لأنها (مرة)...والحكمة في عدم منح المرأة هو منع الازدواج في المنح...لأن القطعة السكنية تمنح للأسرة حتى وإن جرى تسجيلها باسم الرجل...والدليل على ذلك أن الرجل لا يمكنه بيع القطعة إلا بعد موافقة الزوجة..لا أدري حقيقة إن كان هذا الشرط يسرى على جميع اشكال القطع أم لا...و تجربتي الشخصية انني اشتريت قطعة ولم تكتمل إجراءات البيع من قبل البائع إلا بعد حضور زوجته شخصيا وتوقيعها بالموافقة على البيع... لكن هذا الشرط نفسه يحمل في طياته الكثير من المشاكل، لأنه يحدث خللا في تركيبة الأسرة خصوصا عند حدوث خلاف بين الطرفين الزوج والزوجة حول موضوع البيع، خلاف قد يصل إلى الطلاق إذا رفضت الزوجة للبيع، ونكون في هذه الحالة بدلا من أن نحمي حقوق المرأة فاننا ننسف الأسرة كلها.
الموضوع يحتاج فعلا لنقاش جاد بعيدا عن السياسة ويحتاج إلى رأي قانوني واجتماعي
اما بخصوص ابو العيال لا تخلعيه ولا تقتليه بل بيعيه..من باع يبيع..فقد قرأت أن زوجة في مصر باعت زوجها لإمرأة أخرى مقابل مبلغ كبير...وبدلا من يطير ابو العيال لإمرأة أخرى (بلوشي) وتطير قطعة الأرض، يجب عرضه للبيع الآن حالا وفورا..بس ان شاء الله ما يكون من جيلنا عاوز سمكرة وبويه ولساتك وتعديل شاسيه وسعره ما يجيب قطعة ارض حتى لو كانت في وادي النطرون
| |
|
|
|
|
|
|
Re: أمرين أحلاهما مر .... أخلع زوجي أم أقتله .... يا سيادة الرئيس ؟؟؟ (Re: عواطف ادريس اسماعيل)
|
عواطف إدريس إسماعيل لا تخلعي زوجك أو تقتليه أو تلقيه في غيابت الجب حتى فلن تطولي الوادي الأخضر ولا الشاي الأخضر إبتداء وأيضاً لا تغرنك المسميات فهؤلاء ثلة إحترفت البيع ووصل بها الأمر أن بعت حته من الوطن عشان كده عادي يبيعو ليك فول بالجبنه وفول بالزيت وفول ساده مش حسب طلبك كزبون بي مزاجهم وفي النهاية تمشي البيت تلقي الفول ما فول والزيت ما زيت والجبنه برضو ما جبنه البته. قريبي المغترب زيكم منذ أن كان يافعاً حتى أصبح نسياً منسيا - رد الله غربتكم سالمين غانمين - قدر يلم ليهو شوية دراهم by hook or by crook وجاء من أقصي المدينة يسعى قال داير ليهو بيت ريدي ميد ولمن قصر الملح قال قطعة أرض المهم بحثنا وجندنا السماسره في العاصمة القومية وهاك يا مسكولات لا يراعي أصحابها فروق التوقيت يجيك مسكول 12 pm ويجيك واحد بعد موعد الحرامي أيام أن كانت المهنة محصورة في نط الحيط والجري دا ما حقي ، المهم بإختصار الراجل لقي ليهو مخطط (أكيد إجرامي) ودرجة أولي زي ما مكتوب في الأوراق ولمن مشينا شفنا الموقع على الطبيعة رأينا ما لا عين رأت شجر طندب يابس وشئ من سنامكا وبعض الحجارة أها تحت تحت عرفنا أن المسافة من هذا المخطط الجديد مشروع بيت الزول قريبي دا بينها وبينا قريتنا الكائنة جكه صغيرونه إذا تسلح صاحبها بقزازة موية نص لتر بس. شوفي يا بت الحلال وإني لكي من الناصحين أكثري من الدعاء وقيام الليل وأسألي الله أن يبني لكي بيتاً في الجنة يمكن تكوني جارة أسيا زوجة فرعون ، وخليكم في غربتكم دي زي الكدايس كلما يرموكم على ضهركم تجو متلبين على كرعينكم البلد كعبه خلاص أو عشان نكون أكثر صدقاً البلد كانت هناك. نحنا لسه أمة يمشي بينها وفيها ومنها حاجت على شاكلة المرا كان بقت فاس ما بتشق الراس لذلك لم يكن مستغرب العبوس والهيجان والغليان كلما تعلق الامر بحقوق مواطن دي أمه بقت تكون صاره لي صحن البوش قداما أو ساندوتش البيف برجر سواء بسواء ما دايرهم يصروا ليك إنتي وكمان نوعك فيميل قلتي لي الوادي رجالي فقط زيو وزي الترزي والله حتى الترزي الرجالي مرات بكف التوب النسائي أو يرتق السوسته وهلم == الراجل ما تكتليهو لأنك لو فعلتي - لا سمح الله - حا يكون مات فطيس سااااكت وبي كده لا تطولي بلح الشام ولا صكوك الوادي الفوشي وبرضو الخلع في الضروس كعب وإن كنتي فاعلة فقولي ليهو وووووه أها نوع من الخلعه برضو وتكوني أرضيتي ضميرك وفي الحالتين أنسي موضوع الأرض
| |
|
|
|
|
|
|
Re: أمرين أحلاهما مر .... أخلع زوجي أم أقتله .... يا سيادة الرئيس ؟؟؟ (Re: الصادق صديق سلمان)
|
Quote: أمرين أحلاهما مر .... أخلع زوجي أم أقتله .... يا سيادة الرئيس ؟؟؟ |
انا في رأيي تسويهن اللتنين وتريحي روحك !!!..
يازولة يازميلة يافاضلة وين انتي الزمن دا كلو ؟؟
الف حمد لله على السلامة
بمناسبة اراضي الصحفيين دي جونا في الجريدة زملاء هم يخدمون تحتهم يعني اذرع لهم هنا وقالوا في اراضي للصحفيين في السودان وماادراك ما السودان !!
المهم اوضحت لهم انني انا اجنبي الهوية ولكني سوداني الهوى قاموا قالوا لابد من اثبات سودانيتك وبعدين لازم كما في مقدم كم مليون كدا ماعارف وبعدين نشوف ّّّ!!!!..
المهم الكلام دا ليهو اكثر من سنة الان وتاني لامن شاف ولا من دري !!..
وربنا يكون في العون ياعزيزتي ومجددا نورتي البورد تحياتي لكافة اصدقائي ومعارفي هناك دون استثناء ولك المودة خالصة خضر
| |
|
|
|
|
|
|
Re: أمرين أحلاهما مر .... أخلع زوجي أم أقتله .... يا سيادة الرئيس ؟؟؟ (Re: خضر عطا المنان)
|
العزيزه عواطف.....الفيلم ده دخلناه قبالكم ،جونا للجماعه ديل ذااااتهم وامتلا (ماس أفنيو ) بحشود لم تشهدها واشنطن دي سي من قبل وأختك دكت الحصص ومشينا اللوترابي شايل الاسايلابي وهاك يا قعده وبعد ما ربك سهل وادونا قطعة السجم دي وحاتك يا حبيبه قالو ليك كان ربطو فيها حمار ما يقعد ( حسب راي وكيلنا في السودان) وقالها بي صريح العباره ( غايتو تلاتين اربعين سنه كده بتقدر نحدد مكانها!!!!.طبعاً من اليوم داك ما قادره أسأله منها خاصه لمن أتذكر نبرة السخريه والتهكم ألفي صوته،عواطف ده تكريم للنسوان أنا بشوفه خلي الرجال يمشوا ويقيفوا في الصفوف ويدفعوا القروش ويسجلو ويتعبوا وفي النهايه ...........
| |
|
|
|
|
|
|
Re: أمرين أحلاهما مر .... أخلع زوجي أم أقتله .... يا سيادة الرئيس ؟؟؟ (Re: manal eltahir)
|
العزيزة عواطف.. والله يابنتي ماتستاهلي الجهجهةالعرضوك ليها المايتسموش من زمان عرضت عليك التبني رفضتي ، لأنه كنت ساندتك ضد أولادي(الأربعة) وتبني ليك برج في هوا بيتي.. ضاعت الفرصة لأنه حتى الهوا بعناه!
بعدين قلت ليك تعالي بنفسك..صهينتي..الآن طلعت قوانين جديدة قالوا السجل المدني وطالما طلعتي(مرة) معناها you dont qualify
أما الراجل خليه عليك الله بنفعك بعدين لأنه أنا كل ما أأجر غفير يسك الحرامي..يشرد
أنصحك شايفة أصحابك كتار وبكون سوادهم الأعظم ياحكومة يا معارضة وكلهم مفيدين الحكومة يا ......يا أصحابهم وبعرفوا يطلعوا ليك أرض في التل البمبي لو صبرتي ؛أما المعارضة فهم ما عندهم فرصة حكومة لذلك يا سماسرة يا نقاشين وديل يجيبوا الديب من ديله سعرهم بكون اكتر لكن ممكن نعمل استثمار زينا زي المؤسسات الخيرية.
إذا دا كله مانفع تعالي انقهري معانا وفي الإتحاد قوة..ميدان ابو جنزير لسا ما ماقسموه!
في كل الأحوال قلبي معك حتى النصر وغداً لناصره قريب.
| |
|
|
|
|
|
|
Re: أمرين أحلاهما مر .... أخلع زوجي أم أقتله .... يا سيادة الرئيس ؟؟؟ (Re: عبد الدائم سيد أحمد)
|
Quote: زمان عرضوا علينا في الصالحة قطع بي مليون رفضنا دلوقت ب80 مليون |
++ راسك ناشف وما بتسمعي الكلام هسي كان التمانين مليون دي عملت منها اربعة ركشات وقريسين ويجيك الايراد 200 الف يوميا وكفاية اغتراب وجهجهة والقطعة الدايراها في الـGreen Valley - يعني جنبنا وكدا - ما في بيوت الصحفيين كان حتشتريها بي حر مالك - يعني ايراد ثلاثة شهور بس وبعد داك سجليها بي اسمك ولى اسم مجاهد ويسلم ابو مجاهد من السكين وجية المأذون ويا حكومة ابعدي بعيد ... غايتو في ناس كدا الواحد يشتاق ليهم لما يجيهو صداع
| |
|
|
|
|
|
|
Re: أمرين أحلاهما مر .... أخلع زوجي أم أقتله .... يا سيادة الرئيس ؟؟؟ (Re: عواطف ادريس اسماعيل)
|
الاستاذه عواطف تحية وتقديرا حديثك اطلق النار في رجال المهجر والاغتراب قبل نسائهم . ولا ندري اي اسر يتحدث عن احتفاظها ببيتها وواقع مجتمعاتنا يقول انها ابتليت بزواج مسيار ومتعة والرجل المزواج اضحي .. حلو حلا وهلم جرا واين هي هذه الاسر في واقع تعيشه مجتمعاتنا من نسبة طلاق عابت الجهات الرسميه علي نفسها حتي مجرد وجودها فانكرتها او اغمضت عيناها ودفنت رأسها في الرمال كانما ذلك سيصلح حال مجتمعنا المتهالك وعن الوادي الاخضر وعن غيره يحدثونك العجب العجاب يا استاذه عواطف. فهناك من النساء من رأيت ان لهن به ما يفوق المئتين وخمسين قطعه او تزيد .. وهناك من لهن القدره لو رغب طالب ود بدراهم او غيرها في قطعه من حدائق القصر الجمهوري لاتين له بها قبل ان يرتد اليه طرفه وهناك من تمنح الاف الامتار لقيام صناعة ثم يعاد تصحيح الغرض لتصبح بقدرة قادر .. ما شاء الله ان تكون .. ويكون الدفع فيها بالريال والدولار الاستثناء الوحيد إن هولاء النسوه لسن من نوع او كنه الاستاذه عواطف اوحرمنا المصون وما شاكلهن من بناتنا .. فلمثلكن خلقت الصفوف الخلفيه للوقوف بها ..فإختلاطكن بالرجال حرام .. واصواتكن عوره وانتن وجب عليكن .. الاحتماء بضل رجل لا بضل حيطه حتي لو كانت من اللبن الاخضر ..فاولي لكن ثم اولي ما جاد به عليكن الرجال.. وعليه وفي رائي الخاص أن تعملي باصلك وتمسكي عليك بابي عيالك.. فاذا من الله عليكي وعلينا بشبر .. هناك بمقابر في الاطراف النائية فهذه نعمة تدعي لها .. إذ وصل الينا انه حتي مقابر فاروق بصدد إعادة تصنيفها وقيل لنا إن علي سكانها عليهم الرحمة اجمعين أن يبحثوا لهم عن مراقد اخري ... ولا اري داعيا استاذتي الكريمة ان تفتحي علينا طاقة قلع وخلع ...الله لا يسيئك. فنحن نقيم في بلاد الاعاجم الذين لا يعرفون الاصول ولا اقدار الرجال . فسنوا من القوانين ما سنو يقولون فيها إن البيت لسيدته .. والتي تقيم مع الرجل بعصمة او بغيرها حتي ولو كان الرجل قد اشتري ذلك البيت من حر ماله قبل ان تدخل في كنفه واخشي ان تسمع نسائنا المستشرقات من سودانيات وغيرهن اللائي اكرمناهن طمعا منا في الفة وموده بسيرة الخلع هذه .. فنبيت وتبيت معنا رجالتنا في الشارع نجتر حديث من كان يقول ولا مؤاخذه (اكان صحت التجاره المره والحماره) ..ولا إمرأة تضئ وحشتنا .. ولا اتان تساعدنا علي اجتراع مرارة الفراق ونندم ندامة الـــكـُسَعيِّ لمَّــا غدت منه مطلقـةً نوارُ
| |
|
|
|
|
|
|
Re: أمرين أحلاهما مر .... أخلع زوجي أم أقتله .... يا سيادة الرئيس ؟؟؟ (Re: محمد مصطفي مجذوب)
|
Quote: واخشي ان تسمع نسائنا المستشرقات من سودانيات وغيرهن اللائي اكرمناهن طمعا منا في الفة وموده بسيرة الخلع هذه .. فنبيت وتبيت معنا رجالتنا في الشارع نجتر حديث من كان يقول ولا مؤاخذه (اكان صحت التجاره المره والحماره) ..ولا إمرأة تضئ وحشتنا .. ولا اتان تساعدنا علي اجتراع مرارة الفراق ونندم ندامة الـــكـُسَعيِّ لمَّــا غدت منه مطلقـةً نوارُ |
ود مجذوب
ألفين سلام ..
صراحة مداخلتك مدهشة لما احتوته من كلام في المليان عشان كدة أنا دة طرفي من الواديى الأخضر
وبعد كدة نشوف لينا بلدا آخر إن شاء الله في بلد الواغ واغ حيث للمرأة حقوق وواجبات
أما حكاية الخلع دي فالشر مننا وبعيد وإن شاء الله لا يحصل فراق ولا ندم، عندنا كم زيكم
عموما شكرا على الطلة الجميلة وما تقطع أخبارك
| |
|
|
|
|
|
|
Re: أمرين أحلاهما مر .... أخلع زوجي أم أقتله .... يا سيادة الرئيس ؟؟؟ (Re: محمد الأمين موسى)
|
Quote: قالوا الوادي الأخضر عامل زي مثلث برمودا البمشي يجيب أخبارو بيجيب خبرو! اشترينا وخايفين
نسأل عن شهادة البحث! |
والله يا حمادة ضحكتني من قلبي يعني بمعنى آخر الداخل مفقود والخارج مولود..
والحمد لله على قولتك مفيش مرتزقةولا علم أخضر في الوادي الأخضر
الحمد لله اللي ما اشتريناعلى قولة الكديسة لما ما قدرت تحصل اللبن قالت ....
أسعد الله كل أيامك وأيام أسرتك الغالية...
| |
|
|
|
|
|
|
|