( طواقي الخوف ) .. آخر أوجاع محمد طه القدال ، قليلاً قبل فصد الكبد !

مرحبا Guest
اخر زيارك لك: 03-28-2024, 08:57 PM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف الربع الاول للعام 2011م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
12-28-2010, 07:23 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
( طواقي الخوف ) .. آخر أوجاع محمد طه القدال ، قليلاً قبل فصد الكبد !

    و هكذا ..
    يا أيها الشاعر المستبصر . الوصية في الذمة ، كل زول يشوف مقاس طاقيتو و يلبس ..
    و هكذا يا أيها الفصد الحدادي في الكبد الويحيدة .. مرحى .
    ..
    كنت شهودا علي طرفٍ من مخاض هذا العمل ، و القدال يضرس وجعه كل ليلة ، و يعالج ألا يتداعى ما تبقي من إيماناته ..
    و لمست كيف الشعر يكون موجعاً ، و كيف درجة يكون تفصل عنها و النبوة سبيبة شعر .
    في ليلة بردٍ في البلاد الأجنبية قرأ علينا القدال هذا المسدار و الأنباء تترى بغيرما بشارة ..
    و بصيرته ليلتها تعج بالمحازن .. قال : أهلكتني هذه القصيدة .. أعالجها منذ كم ، و ما تخلقت بعد بما ينبغي ..
    فبقينا نتجنب سؤاله عنها خشية انفراط حزنه المخبأ طي الكلام .. فينفرط منا ادعاء التماسك .
    ثم هاهي ذي تخرج .. و قياسها وطنٌ بلا مقاسة . وطنٌ برسم الحريق أو التشظي - في أحسن أحوال التوقع -
    لك الله يا صاحبي الجميل .. يا أيها الشاعر الأمة ..
    ـــــــــــــــ
    ( ما خايف المطر
    يتحاشى الضهاري الراجية قولة خيرا.
    ولا خايف المطر
    يمشي على الصحاري تلمو في بشكيرا.
    ولا خايف العشم
    يتناسى العشامى ونيما ياكل نيرا.
    ولا خايف النفس
    تتذكر نفسها وتنسى يوم حِدّيرا
    وخوفي على البلد
    الطيب جناها وقمنا في خُديرا
    شاحدك يا كريم
    لا تحصل خراب لا أرجى يوم ودّيرا.
    ***
    وانا ما بجيب سيرة الجنوب.
    عيال بتسرح للمدارس ..
    والفطور نجماً بعيد.
    بنوت بتجري
    على الخطاطيب الخطاطيف
    البتجرح ..
    والعريس نجماً بعيد.
    الدكاكين التملا تفضي،
    السماسرة يسمسروا،
    والبسفو الطين ..
    يسفوا،
    والبحتّوا الراب ..
    يحتّوا،
    والبناطلين ليها سستم،
    والقوانين ليها سستم،
    البنوك الفيها بستم ..
    من سويسرا ولي ماليزيا
    بالسفارات
    والعمارات
    والخبارات ..
    انا كنت متغطي ..
    ومتدفي،
    العمة ملوية،
    والشال على كتفي.
    سودان وكان ما كان
    سودان علي كيفك
    السكة ساعة إيد
    والأرض مروية
    والناس حنان وظراف
    والراح يجيك ..
    للحول
    والخدمة مظبوطة
    مظبوطة مدنية
    والدنيا حرية
    الماشي درب الكار يغور
    والتاب من التمباك يتوب..!
    انا مابجيب سيرة الجنوب.
    الغبّوا عرفوهو
    والعرفو سوّوهو
    والسووا بلقوهو ..
    ......
    أصبحت زي الزول
    قادل بوسط السوق
    سروالو نصلوهو
    لو العِرق مسروق
    أو قلبي نشلوهو
    طعم الكضب مسلوق
    ماسخ تضوقوهو
    لو فمي ما مطلوق
    أو كمي غسلوهو
    ياني البسوي القوق
    قولي البتابوهو
    ماعندكم دمي
    ما عندهم دمي
    من دمي لا لا لا
    ماقدروا فصلوهو.

    وانا ما بجيب سيرة الجنوب؟
    قول استقلْ ..
    انا في صفوف الزوق
    واقف مع الواقفين مزنوق بهنِّيهو
    ويهنوهو
    أواستقال ..
    ودا أول الأحزان
    أو قالوا باعوهو
    ودا ياهو قطِّيع القلوب
    أنا ما بجيب سيرة الجنوب،
    فالسيرة كمين ألف عام
    لوني المحرق مندوكور
    وشكلي شكلين
    شكل منقة
    وشكل تور
    دمي المشتت من قبايل نوح وحام
    شعري المقرقد زي حصايا
    اتشتت فوق الدروب
    كتفي المهدل بالعيوب
    وانا ما بجيب سيرة الجنوب
    أصل البقت
    من ساس وسايس أو يسوس
    ياها البقت
    خلونا من حرب البسوس
    الفاضلة
    تكفير الذنوب
    الفاضلة لمليم البشاتن
    والمعاطن
    والخبوب
    الباقي
    مايخموكا تاني على
    الدفافير والكناتر والحروب

    الباقي تعظيم التماسك
    في الخطوب
    لا نافع الشَّدة العلوق
    ولا نافع المبقوص يحوق
    لا بنفعك عَرَق الزنوج
    ولابرقعك لبن العروب
    إلا الوقوف ألفاً ضكر
    واحد براك
    في الشيمة تلفحك الهبوب
    الغيمة تديك
    للسفاسف
    والعواصف
    والمطر
    برطع مع الأفعال
    وادخل على التاريخ
    يغلب أجاويدك
    من قرقريب عوسك
    اخرِج من التاريخ
    شيخك وعربيدك
    لا نافعك التكفير
    ولانافعك التوبيخ
    فامشيه وحيدك
    وامرق على التاريخ
    تلقاه في السهلات
    مستني كمسيدك
    لا بيظلم التاريخ
    ولا يرحم التاريخ
    إياه عوس ايدك.

    والأرض موقوت القنابل
    في الحدود
    والأرض منهبة الثعالب
    والطحالب
    والجيوش
    باليوناميد
    واليوناميس
    والفُرقة بينات القبايل
    والشتايم في المنصات
    والشراكة الفي
    المكايد
    والخناجرفي الحناجر
    والمنابر ..
    آه من تلك المنابر،
    إنداية كرتلة وبنابر
    والجرايد
    داقة طارات المدايد
    الصَدَق في الناس كذوب
    الساسة نِيّام العسل
    بين انتباهة
    وغفلتين
    بين السلاطين والحبوش
    والشلاتين
    والقرايب
    فين حلايب؟
    واللي بنى الأرض كان في الفرض سوداني
    عيني عليها
    اتمزعت
    حتة في قلبي
    وحتة ف غصتي .. تاني
    آدي اسرائيل في النيل
    بكِّيني ولعبطني
    والنيل أدنداني
    إحنا حبايب في الطيّبة والآه؟
    آ.
    غنيلي ورقصني ؟
    طيب.
    بسِّ سمعني آه الآه في وداني.
    ***
    أنقد السُقا وما بينصلح وكَّايو
    وانكشح اللبن ما بينفعِن بكَّايو
    بعدن بى الدروب مابقصِّرِن تكَّايو
    والشاكي النقاص ناقص قمح شكَّايو
    ***
    وانا لا بجيب سيرة الجنوب
    ولا أكلوني
    إذا ما أكلو التور الأبيض ..
    (الأرض في الجزيرة)
    وبدر الله فوق سماهو
    يا ساسا يابساحوتة
    مكوار حبس مياهو
    عطشت قبايل ابقوتة؟
    البودة في خلاهو
    والأرضة في بيوتا؟
    الزول رِبَت كلاهو
    سمينة بي مقوتا
    يا تمت المعاهو
    أو خلصت الحدوتة
    وانا لا بجيب سيرة الجنوب
    ولا أكلوني
    إذا ما أكلو التور الأبيض ..

    ***
    يدر الله يابسلوكة
    سلوكة الجزيرة
    كل يوم فينا بتنتش
    سكك الحديد بي كم؟
    بي كم بيت المفتش؟
    والبيع بيعة عدوكا
    بعت الأرض بترابا؟؟
    باكر تبيع أبوكا
    وان مُتْ من تُخمة باكر
    ناس الشرق يبكوكا
    وناس الغرب يبكوكا
    ناس الشمال يبكوكا
    وناس الجنوب يبكوكا.
    وانا لا بجيب سيرة الجنوب
    ولا أكلوني
    إذا ما أكلو التور الأبيض ..
    ***
    حمدتكم بالجاية
    والجاية فوق الجاية
    وعسكري الجباية
    قلبو الحجر اللداية
    ***
    بشرتكم بالسادة
    والسادة بعد السادة
    وجرادة فوق جرادة
    من دوكة لام كدلدة
    ***
    حمدتكم بالواقعة
    والصاقعة جنب الصاقعة
    مقدودة مالها راقعة
    والدمعة صابة وناقعة
    ***
    بشرتكم بالتوية
    والصبنة لي الدامبوية
    في الحلة دي ام كدوية
    ما تقعدوا شدرة موية
    ***
    والأرض لا حليوة
    ولاها دي الجزيرة
    الأرض أمات الحنين
    لو نقط الضحوي البريق،
    في الحين تبتق شهوتِن.
    تحبل
    كما الأمات
    وتشرق بالوحم
    لو تسعة الميلاد بتمرق بالسنين،
    أو دي الشوارع بالبنات متحينة،
    ترسل تراتيل الخروج في يوم
    وتقطع سرتِن.
    الأرض تعريف الهديل
    هدل الحمام بشري
    وشوق السلام انسان
    بالحيل بيعرف أنَّتِن
    والأرض شافت
    إلا خافت
    من عيون الليل
    تناجي حبيب
    غريب في الليل
    وتفرز غنوتِنْ.
    زي بذرة في جوف الأرض
    أو ضحكة عند طرف القلب
    بتغني لو جات في العيون
    والضحكة لاقت مرقتِن
    الأرض منصوص الضمان
    حضن أمك الدافي وأمين
    ريحة حبيب
    جاياني من شمة حبيبتي وكرفتِن
    لو جاتا في يوم الهموم،
    في الحين تزغرد فرحتِن.
    أو حرقصت فوقها السموم،
    باكر تهبهب نسمتِن.
    والأرض ما بتعرف تنوم
    ترتاح
    وغابت جمتِن
    بس تدِّي مدين للعديم
    بالمدة تحفظ ذمتِن
    ***
    هن مارقات خلاهِن
    ما مارقات بَراهِن
    لي بصاص حِداهِن
    إو قصاص بِراهِن
    هن مارقات تراهِن
    تريانات تراهِن
    الخوف ما حَماهِن
    من شوفة حِماهِن
    طمانات جناهِن
    بي لبنا معاهِن
    يوم الشينة جَاهِن..
    مرقن ليهو جَاهِن
    بالعز المبطَّر
    والزوق الشَفاهِن
    لا حايدات مداهِن
    لا قايدات عماهِن
    وما كشحن بلاهِن
    فوق زولاً أباهِن
    لو الضيم رماهِن
    هِنْ ياهِنْ
    وما هِنْ.
    ***

    وانا لا بجيب سيرة الجنوب
    لاني زول بالمرة خايف
    إلا شايف
    إلا شايف
    إلا شايف
    ***

    أنا شايف المطر
    يتحاشى الضهاري الراجية قولة خيرا
    وانا شايف المطر
    يمشي على الصحاري تلمو في بشكيرا
    وانا شايف العشم
    يتناسى العشامى ونيما ياكل نيرا
    وانا شايف النفس
    تتذكر نفسها وتنسى يوم حديرا
    وانا شايف البلد
    الطيب جناها وقمنا في شدِّيرا
    ...
    ...
    شاحدك يا كريم
    لا تحصل خراب لا أرجى يوم وديرا.


    محمد طه القدال
    9/12/2010م )
                  

12-28-2010, 07:36 AM

جمال المنصوري
<aجمال المنصوري
تاريخ التسجيل: 04-02-2009
مجموع المشاركات: 1090

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ( طواقي الخوف ) .. آخر أوجاع محمد طه القدال ، قليلاً قبل فصد الكبد ! (Re: Emad Abdulla)

    العمدة

    سلامات

    مرينا عشان ندعو مع الشاعر:
    Quote: شاحدك يا كريم
    لا تحصل خراب لا أرجى يوم ودّيرا.


    عسي الله يفرجا، الفينا اتعرفت الا الفي يد الكريم ما قنعانين منها


    الله في
    ..
                  

12-28-2010, 08:15 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ( طواقي الخوف ) .. آخر أوجاع محمد طه القدال ، قليلاً قبل فصد الكبد ! (Re: جمال المنصوري)

    تسلم يا جمال ..
    شاحدين الكريم .
                  

12-28-2010, 08:27 AM

abuguta
<aabuguta
تاريخ التسجيل: 04-20-2003
مجموع المشاركات: 8276

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ( طواقي الخوف ) .. آخر أوجاع محمد طه القدال ، قليلاً قبل فصد الكبد ! (Re: جمال المنصوري)

    Quote: ..
    (الأرض في الجزيرة)
    وبدر الله فوق سماهو
    يا ساسا يابساحوتة
    مكوار حبس مياهو
    عطشت قبايل ابقوتة؟
    البودة في خلاهو
    والأرضة في بيوتا؟
    الزول رِبَت كلاهو
    سمينة بي مقوتا
    يا تمت المعاهو
    أو خلصت الحدوتة



    حبيبى انت ياعمدة,,,

    خلاص خلصت الحدوته,,,

    يافصل يافصل,,,التحية لشاعرنا الفحل
                  

12-28-2010, 08:57 AM

وليد محمد المبارك
<aوليد محمد المبارك
تاريخ التسجيل: 12-04-2004
مجموع المشاركات: 26313

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ( طواقي الخوف ) .. آخر أوجاع محمد طه القدال ، قليلاً قبل فصد الكبد ! (Re: abuguta)

    البس يا حبيبنا
    البس ساكت مقاسك او ما مقاسك


    تحية خاصة للشاعر المهول القدال
                  

12-28-2010, 11:03 AM

Mohamed Moatasim
<aMohamed Moatasim
تاريخ التسجيل: 06-27-2007
مجموع المشاركات: 275

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ( طواقي الخوف ) .. آخر أوجاع محمد طه القدال ، قليلاً قبل فصد الكبد ! (Re: وليد محمد المبارك)

    tears-2.jpg Hosting at Sudaneseonline.com
                  

12-28-2010, 12:40 PM

أيمن مبارك أبو الحسن
<aأيمن مبارك أبو الحسن
تاريخ التسجيل: 08-08-2009
مجموع المشاركات: 656

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ( طواقي الخوف ) .. آخر أوجاع محمد طه القدال ، قليلاً قبل فصد الكبد ! (Re: Mohamed Moatasim)

    أوجاعنا كلنا يا عمدة.... كلننننننننننننا

    كيفنك يا راجل .. وكيف أيامك...

    التحية لشاعرنا الجميل القدال ....
                  

12-28-2010, 12:58 PM

علاء الدين حيموره
<aعلاء الدين حيموره
تاريخ التسجيل: 08-08-2006
مجموع المشاركات: 5689

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ( طواقي الخوف ) .. آخر أوجاع محمد طه القدال ، قليلاً قبل فصد الكبد ! (Re: أيمن مبارك أبو الحسن)

    مؤكد يا عماد انو الشاعر المبدع القدال قد رسم صور جمالية واخرى حزينة في تناسق فريد


    سمعت هذه القصيدة من لسانه وبطريقة القاء متفردة في بيت الفنون في تدشين كياح للاخ خالد عويس


    حقيقة ابداع وشكرا ليك كتير




    طلبت منو ان يسجلها لان بصوته يكون الكلام اجمل
                  

12-28-2010, 03:10 PM

Osman Musa
<aOsman Musa
تاريخ التسجيل: 11-28-2006
مجموع المشاركات: 23082

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ( طواقي الخوف ) .. آخر أوجاع محمد طه القدال ، قليلاً قبل فصد الكبد ! (Re: علاء الدين حيموره)


    الخوف كندك البلد
    وكال الطواقي .. تاني كيف الدبارة ؟؟؟؟
                  

12-29-2010, 02:54 PM

توما
<aتوما
تاريخ التسجيل: 08-07-2003
مجموع المشاركات: 1466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ( طواقي الخوف ) .. آخر أوجاع محمد طه القدال ، قليلاً قبل فصد الكبد ! (Re: Osman Musa)

    يا القدااااااال

    ...


    إياهو


    إياهو عوس إيدنا


    ***

    عماد إزي الحال ياخي
                  

12-29-2010, 03:46 PM

Amin Mahmoud Zorba
<aAmin Mahmoud Zorba
تاريخ التسجيل: 02-09-2005
مجموع المشاركات: 4578

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ( طواقي الخوف ) .. آخر أوجاع محمد طه القدال ، قليلاً قبل فصد الكبد ! (Re: توما)



    امبارح يا عمدة
    اتعاظم فيني الخوف
    وكترت جواي جقلبة الحزن
    سنين الهجرة اتطاولت
    واتمليت بالاسى
    وداخلي في جوة الجوة حشاي محروق
    قمت إتجاسرت ورفت سلك للشاعر الجميل محجوب شريف
    وبعد كم رنة رفع الصوت المايغباني
    اتخيل عشرين سنة ماتسمع صزت زول
    وبعد رنة جرس صغيرة تسمعو تاني
    ذي العشرين سنة دي كانت امبارح
    وبعد السلام والاشواق والسؤال عن الاهل والاصحاب
    سألت محجوب قريت قصيدة القدال

    قال : تتخيل القدال معاي الان وقرأ لي النص قبل شوية
    وشرب تلاته كبابي شاي

    واتكلمت مع القدال
    الشوق والاحوال
    اينعت
    اتخيل اينعت

    ________

    القصيدة دي منبرية لابد من تسجيلها صوت وصورة
    وبتطلع منها الف قصيدة ومليون معنى
    لان المنفجر فيها وطن
    مهم جداً تطلع في فيديو
    مهم جداً
                  

12-30-2010, 01:17 AM

Abuzar Omer
<aAbuzar Omer
تاريخ التسجيل: 07-26-2008
مجموع المشاركات: 2109

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ( طواقي الخوف ) .. آخر أوجاع محمد طه القدال ، قليلاً قبل فصد الكبد ! (Re: Amin Mahmoud Zorba)

    ســلام يا عمدة

    صنعت لينا السنة اللسة ما جات. أن شاء الله يوم شكرك ما يجى..

    و أعلم يا أمين زوربا أن حاسدك عديل كدة، الحسادة الواحدة دى..
                  

12-30-2010, 06:21 AM

Manal Mohamed Ali

تاريخ التسجيل: 01-06-2005
مجموع المشاركات: 1134

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ( طواقي الخوف ) .. آخر أوجاع محمد طه القدال ، قليلاً قبل فصد الكبد ! (Re: Abuzar Omer)

    فوق



    محبتي
                  

12-30-2010, 06:50 AM

ندى عثمان حسن
<aندى عثمان حسن
تاريخ التسجيل: 11-20-2009
مجموع المشاركات: 875

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ( طواقي الخوف ) .. آخر أوجاع محمد طه القدال ، قليلاً قبل فصد الكبد ! (Re: Manal Mohamed Ali)

    Quote: أنا شايف المطر
    يتحاشى الضهاري الراجية قولة خيرا
    وانا شايف المطر
    يمشي على الصحاري تلمو في بشكيرا
    وانا شايف العشم
    يتناسى العشامى ونيما ياكل نيرا
    وانا شايف النفس
    تتذكر نفسها وتنسى يوم حديرا
    وانا شايف البلد
    الطيب جناها وقمنا في شدِّيرا
    ...
    ...
    شاحدك يا كريم
    لا تحصل خراب لا أرجى يوم وديرا.
                  

01-02-2011, 01:04 PM

Amin Mahmoud Zorba
<aAmin Mahmoud Zorba
تاريخ التسجيل: 02-09-2005
مجموع المشاركات: 4578

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ( طواقي الخوف ) .. آخر أوجاع محمد طه القدال ، قليلاً قبل فصد الكبد ! (Re: ندى عثمان حسن)

    k
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de