|
|
 قصيدتان قديمتان
|
لكـــــــــــن
قد تنزعوا حنجرتي أو تسحقوا أقلامي
لكن ألكلمه لا تفطس ستعيش بين صخور الطغيان
تقاوم مبيدات الرجعية
وتلبس حلل الثورة الحمراء
قد يفشل كل ألابطال
لكن اذا إتحد ألبسطاء فالفشل محال ، الفشل محال ، الفشل محال
الغيث المنهمر في البحر لا يجدي
ولكن بعض قطرات خجلي في الصحراء
قد تنبت عشباً تأكله شياهُ عجفاء
ويشبع أطفالُ قد ضمرت منها الاحشاء
مهما تكاثفت الظُلمـــه سيكون هنالك بعض ضياء
ومهما تشابكت اللأكمه سيكون هنالك مكان يلتقي فيه العُشب بالسماء
أنا من شعب رائع هو السودان
أنا من بلد منكوب هو السودان
فيا من تحكمني هل أنت أخي أم أنت الشيطان ؟
هل يعلم أسياد العالم إنا جزءُ من هذا الكوكب ؟
أم هل نسيو لانــا لم نتذكر ؟
رضينا لسخافتنا بركُنٍ مظلم ، ولكن هذا الرُكن المظلم لم يسلم
فقد يحتاجونه كمزبلةٍ أو محرقةٍ أفهل نُعلم ؟
من السهل أن نتنبأ ولكن ماذا إذا كان ألامـر يتعلق بالمستقبل ؟
من السهل أن نجد الحل ولكن ماذا إذا كنا نواجه بعض مشاكل ؟
أعظم ما إكتشف الإنسان هو النار والحديد ولكن من الاثنين نصنع القيود
لا قيمه للذهب سوي مظهره ولكن بسببه تُهتك العروض وتُكتسح الحدود
ألبشر يحبون الحرية ولكن من يصنع الأباطرة سوي ألاقنان والعبيد ؟
الكل ينادي بالتغيير ولكن لماذا نعادي ونرفض كل جديد ؟.
شوقي بدري ....
مــا تكســـــرو
بعد التحية والسلام والبكاء والحنين وأحلي الكلام
وشيه الجمر بي طعم الدعاش والأهل فيهم الرضيع والنزل المعاش
والشوق بحر لا ليهو رأس ولا قعر. والناس هناك عزاز لا بعرفوا غش ولا بطر
ومع الدغش يدق الباب كو كا كو , أقوم أحمر لي سيد اللبن
أقول ليهو دق براحه يا متخلف يا ما عندك فهم
يضحك يقول إنت الزول الكان بعيد غائب وما عنده هم
أقول ليهو لبنك يطير . يضحك يقول ما ضقته ساكت بالفطير
في الزيفه ديك وين تلقاه وين ساخن مقنن بالمنين
في المورده أطلب صحن فولاً كبير ما فيه غير شمار وزيت ويمكن كمان جرجير
أحرد أقول ليه مكسرو ؟! ما قلت ليك ما تكسرو
الناس تقول سمعناك قلتا كسرو. وده فولاً سمح الكسير ما بخسرو
عاوزه حب ما تهبشو. وأحلف يأكلوا معاي وأقول عشان تاني ما تتدخلوا
في الناصيه تحت الشجره راجلاً كلس بطيخه ينسي الزول فلس
بعد الثالثه يقول, ماني قاطع ليك خدار إنت زولاً ما بحس
بطيخي كله أحمر . أدفع للتلاثه وأقع فيهم نخر
وسط البهائم أشوف لي جضعاً سخي . إتالف أقول ده ما تني؟!
يقولوا لا ده جضعاً سخي . حتي بعد فتح الخشم أقول تني
يقولوا إنت رأسك قوي أكان غلوا ودخلوا الفرن ما بستوي
والله رأسي ما قوي بس بدور أناكف ناس بتفهمني
أربعين سنه رطانه. بعيد من بله توم روحي وعثمان رفيق دربي
أفتح عيني وأشوف الكمساري يعاين ذي كأنه يسأل ماك نازل هني؟!
أغمد تاني وأقوله كو . يهزني ويقول هلو.
أعاين من الشباك وأشوف قضيب السكه الحديد لكن الأرض مغطيها الجليد
أتاري أنا حلمان ولسه بعيد من أمدرمـــــان .
شوقي بدري...
|
|
 
|
|
|
|
shawgi badri
فيس بوك
تويتر
انستقرام
يوتيوب
بنتيريست