دعواتكم لزميلنا المفكر د.الباقر العفيف بالشفاء العاجل
|
|
 عند ود امينه الخبر اليقين ........الي الجندريه.
|
بنت عمي الجندريه في بوستها عن الدستور كتبت عن كيف مرت بفتره اكتئاب و فجأه مع سماع اغنيه تغير الحال بالنسبه لها . يعني كما كنا نقول في السودان ( لقت خيتا) .
اذكر قديما في امدرمان عندما يظهر شخص جديد كنا نقول الزول ده خيته شنو؟ و بالخيت نقصد ما يحركه او يفرحه او يحفذه . و عندما تمر المرأه او حتي الرجال بازمه نفسيه خاصه الاحباط او الاكتئاب يفكر الناس في الظار . و لكن قبل الشروع في ذلك يجب ان يعرف الخيت .
هذه مهمه شيخه الظار و مساعداتها . و الموضوع اقرب الي الطبيب النفسي . و حفل الظار يكلف كثيرا . و اذا لم تكن دراسة الجدوي متكامله فقد لا ينجع الدواء و يضطر صاحب الظار ان يعيد الكره . و هنا المحك و اثبات خبرة و دراية شيخة الظار .
من الخيوت المشهوره الخواجه و تلبس ست الظار البدله و البرنيطه و تشيل العصايه و تدخن السجاير و تشرب الويسكي و ترطن متبشهه بالخواجه مع رائحة البخور و دقات الظار .
السحار و فيه تمشي المرأه علي يديها و ركبيها و تلتهم اللحم النئ او تشرب دم الخروف المذبوح . و خروف الظار قد يكون مزين بودع و سوميته و محنن .
التربي و فيه ترقد المرأه كانها ميته ومكفنه و عليها غطاء و لا ادري كيف تنتفخ و يبدو الغطاء عاليا و لا بد انها احدي حيل شيخة الظار .
و هنالك لوليه الحبشيه و الايقاع لها سريع و اظنها تبدأ ب(اللول اللول يا لوليه ، بسحروك يا السمحه الحبشيه ) .
الهدندوي و الايقاع رتيب و بطئ و تلبس المراه العراقي و السديري و السروال و تشيل سوط و الاغنيه تبدأ ب( احمد البشير الهدندوي ، اللباس طويل يا الهدندوي ، راكب الهجين يا الهدندوي ، سوطك الوروير يا الهدندوي ) .
و من الخيوت المعروفه الفلاتيه و البرناوي و نمر الكندو ، ازرق بنده( البنداوي ) ، النمناوي، شلبي و جوراباشا .
و هنالك من يتسائل شوقي العرفو بي ده كلو شنو ؟ الشلاقه طبعا و الشقاوه و كان ما كده ما كان عرفته و لا كان انتو حتعرفو . الغريبه انني حضرت حفل ظار استمر ايام طويله و شارك فيه نساء و رجال . و شاهدت مراه تسمرت و لم ترقص و مساعدات الشيخه كن يقلن ( ليه ما نزلت ، غيروا الدقه ، كبوا بخور ، خلوها حسه نزلوا زول تاني يمكن تنزل بعدين. ) .
و شاهدت رجلا يرتدي ملابس نسائيه و هو يقف علي ركبيه و يديه و يبدا في الحركه ببطء و ينتهي باهتزاز شديد و يقفز كالضفدعه و كانه قد فقد السيطره علي جسمه و الشيخه تصرخ ( دستور يا اسيادي ) . و كان هذا في منزل الشيخ حسن الحوري في الهجره امدرمان و هو شيخ خلوة ابروف . و هو رجل لطيف كان يعاملني بود و هو ابيض اللون اي ود حور .
اشهر شيخة ظار قديما في امدرمان كانت حليمه بت بشه التي ورثت الشياخه من امها بشه . و هي ام صديقنا ادريس ودحليمه . و تسكن في غرفه مغلقه علي الدوام في حوش حمد المواجه لدكاكين الطاهر خال العيال . حوش حمد يسكنه مجموعه كبيره من البشر منهم الحاج حمد و شقيقه ابوشقه و اولادهم و احفادهم و تحت ادارة المرأه الامدرمانيه العظيمه ستنا بت الصندليه و في الجزء الشمالي من المنزل هنالك طاحونة بيت المال القديمه .
حليمه بت بشه كانت طويلة القامه لها نظرات مغناطيسيه تجالس الرجال و يحترمونها جدا ، كنت اراها جالسه امام دكان عم عمر المكوجي .
الاخت الاستاذه ام سلمه خال العيال زوجة الصحافي المخضرم محمد طه الفيل الان بدبي ، تقول دائما انها عندما كانت صغيره كان الاهل يخيفون الاولاد و البنات بحليمه بت بشه .
في السبعينات و الثمنينات كانت حاجه كبره بضم الكاف اشهر شيخة ظار في امدرمان . و لقد تطرق لها الاخ امير زاهر في كتاباته حكاوي المورده . قبل سنتين عندما كان الاخ الفنان ابراهيم عوض عبدالمجيد في زيارتنا قلت له عن اغنيه انها زي دقة حاجه كبره فضحك سعيدا و قال ( انته يا شوقي متذكرحاجه كبره ؟ ).
حاجه كبره ماتت في نهاية الثمنينات و رفع مزمل غندور دعوه علي ورثتها بدعوي انها كانت خادم جده و العبد و ما ملكت يداه ملكا لسيده . و النزاع كان علي بيت من جالوص في العباسيه و هذا الرجل كان من المفروض ان يكون حاكم السودن بدل نميري . الا انهم قالوا ذكي ( و هذه حقيقه ) و طموح .و فضل تنظيم الظباط الاحرار نميري لانه بليد .
شيخات الظار كانوا في الاغلب من بقايا الرقيق .
كما كتبت و قلت قديما ان الديسكوتيهات في اوربا و امريكا نوع من الظار ، الموضوع تنفيث . و السويديون المتزمتون الملتزمون و الذين يتحدثون همسا و بادب و تتدلي ربطات عنقهم و كانها مرسومه ، يتحولون الي شئ مختلف تماما بعد عدة كاسات خمر و موسيقي . و في الصباح يرجعون كمديرين و مدرسين و بروفيسرات و مهندسين محترمين، ديل برضو بلقوا خيتهم في الليل يا بت عمي .
بنت عمي الجندريه اذا الموضوع احتاج و مشيتي رفاعه بتلقي شيخات ظار. لكن عليك علي اتصلي في امدرمان بست البنات بت سمح جيبو دلوقت هي اكبر شيخة ظار في امدرمان و هي بمثابة اختي الكبيره يجمعني معها حب و ود كبير . و انا صغير و هي فتاة جميله بجضوم ممتلئه و شلوخ مميزه كانت تجلس في حوش البلك و تخيط في منديل قلت لها مازحا ( ده حيكون اجمل منديل في الراي العام كلها ) فبهتت و لم تكن تصدق انني لصغر سني قد لاحظت انها تهتم بالخال عبدالعظيم الحاج الذي كان يعمل في الراي العام وقتها . و كلما يذهب اهلنا او معارفنا لزيارتها او لشراء البخور تذكرهم بتلك الحادثه .
شوقي
|
|
 
|
|
|
|
|
|
|
|
Re: عند ود امينه الخبر اليقين ........الي الجندريه. (Re: WALEED YASSIN)
|
العزيزه راويه
لك التحيه ما دام نزلتي في مستشفي التجاني الماحي الموضوع ده ما فيهو انصاف حلول لازم تحصلي نفسك ، ما اظن في خيت اسمو الصحفيه او الكاتبه لكن مين عارف يمكن تكون البدايه . مستشفي التجاني الماحي ده يا راويه من بيتنا بس عرض الشارع و انا لي من الشارع ده 15 سنه بالله مش حقو يدقو لي خيت المفارق ؟ شكرا
شوقي
| |
|
|
|
|
|
|
|
|
|
Re: عند ود امينه الخبر اليقين ........الي الجندريه. (Re: shawgi badri)
|
شكرا يا استاذ شوقى،
أنا معجبه جدا لكتاباتك
ماهى العلاقة بين الظار و (الفودو) أذا كانت أى ؟
هل للظار الذى يمارس فى الشمال المسلم علاقة مع الديانات الأصلية الأفريقيه؟
و هل يضطر الناس الى ممارسة طقوس هذة الديانات فى مجتمع الشمال عن طريق (الزار) لأنة لايمكن جهرهم بالرغبه فى ممارسه أحدى طقو س الديانة الأفريقية لأن هذا (االطقس) قد يكون ممنوع أسلاميا و حرام ؟ و أن كان يحبونه و هو شافى لهم من الأمراض الجسديه و النفسية ؟
فى بوستك عن (المسكوت عنة) تحدثت عن ظاهرة (نكران الأصول الأفريقيه) التى يبتلى بها الكثير من أهل السودان الشمالى، بالذات فيما يتعلق (بافريقيتهم) فهل لهذا النكران دورا فى ظهور
(الظار)؟
و ياريت تحدثنا عن الغ\علاقة بين الظار و مجتمعات (المهمشين) لأى من أسباب التهميش و العزل الأجتماعى فى ثقافة السودان الشمالى دين، عرق، نوع...الخ .
و لك من الحب الكثير.
| |
|
|
|
|
|
|
|
|
|
Re: عند ود امينه الخبر اليقين ........الي الجندريه. (Re: Roada)
|
الأستاذ شوقي بدري
لك التحية والتقدير ..
لقد شاهدت بأم عيني هذه الظاهرة وكل الحركات التي يقمن بها النسوة وقتها ونحن صغار ولا زلت أتذكرها جيداً وصوت الملعقة مع القزاز أو كبابي الماء يرن في أذني وكنا نخاف جداً حينما تقع إمراة في الأرض وكنا نعتبرها قد ماتت والنساء يصحن دستور يا أسياد وكل الموشحات كنا نحفظها عن ظهر قلب .
شكراً على هذا السرد الرائع ..
| |
|
|
|
|
|
|
|
|
|
Re: عند ود امينه الخبر اليقين ........الي الجندريه. (Re: عشة بت فاطنة)
|
وفي حلقات الزار تتماهي الراقصة مع الخيت—نفسيا وجسديا وتتمثل الشخصية التي تؤديها ، والملاحظ ان الخيوت او اغاني الزار كلها، يا حبشيات ويا رجال مميزين والمسالة تعويضية لتغييب المراة عن المجتمع وبكيح جماحها ا و سجنها داخل المنزل مقابل الحرية الغير مشروطة للرجل من خروج وترفيه واحتساء للخمر وهي بالضبط تمارس في الزار ما يمارسه الاخ او الزوج ويمنعها منه المجتمع ، كذلك تتقمص شخصية الدكتور والتمرجي لانها محرومة من العمل ويقتصر دورها على المطبخ واشباع حاجات الزوج وامتاعه فتتوق للخروج والعمل فتعبر عن كل هذا وكانهاتقول للمجتمع انها قادرة على اداء كل هذه الادوار وحلقة الزار ثورة على المجتمع الابوي الذي يقوم على هيمنة الذكور ونفي النساء في تفرقة نوعية لا اساس لها بل يصنعها المجتمع بتنشئة كل من المراة والرجل حسب الدور الذي يتطلبه المجتمع وليس للنوع (الجندر) اي دخل كوننا ذكور او اناث . وتتماهي المراة السودانية مع الحبشيات لان الحبشيات اذا ما قورنن بالسودانيات فهن منطلقات وينلن شي من الحرية اكثر من السودانية وارجو ان يساعدني ف يهذه المقارنة من له الخبرة في عالم الحبشيات لاني لم اختلط بهم ابدا بالرغم من انه يجمعنا معهم الجوار والثقافة الا ان معظم السودانيين يتجهون الى مصر او البلدان العربية اكثر من ميلهم الى اثيوبيا ، وكما ذكرت رودا ان الزار يعتبر من الثقافات الافريقية –الطبول والرموز – وهناك مثلا نمر الكندو وهو نوباوي اعتقد من جبال النوبة ويمثل القوة والسطوة للمراة ولا تخلو المسالة من الاثر الاسلامي اذا ان الزار يفتتح ( خاصة الكرسي ) ياهل السلسلة والشيخ عبد القادر الجيلان والسيد الحسن واهل السلسلة وكنت اتمنى ان اسال امي لو كانت قريبة لانها تحفظ كل هذه المساءل رغم ان الوالد يكره الزار ويثور غضبه اذا عرف هذه المسالة لانو يعتبر بيت الزار تمارس فيها عادات غير اسلامية مثل شرب الدم وشرب الخمور والمريسة وشراب السجاير والسجائر عادة تشرب في خيط ساير ( ساير ساير بالهوا طاير شرابو السجاير ) خيال وشخصيات تتقمصها حتى لا تعود الى الارض وتظل محلقة بعيدا عن واقعها الممل ، وتظل ترقص وترقص حتى يغمى عليها احيانا فتدنو منها الشيخة وتبخرها وتضربها على ظهرها وتقول : طلباتكم يا اولاد ماما ، العايزنو كلو جاهز بس تفكوها وتشفوها ، دستور يا اولاد ماما دستور وطلباتكم مجاية )واذا كان من صرعها هو الخواجة تساله طلباتك يا خواجة عايز شنو فيطلب له البيرة وسشرب ثم تضحك وتصحو من حالبتها ، اما الحبشية الجاية من كرمك ايضا لهاطلبات من العطور والرقص والبخور والذهب وطبعا كل واحدة لازم تدفع حق البخور عشان الشيخة تشوف طلباتها وتتفاهم ليها مع اولاد ماما وطبعا يسبق الزار زيارة للشيخة في البحث للشفاء عن الشفاء من القلق وخمة النفس والارق فتمهلها الشيخة لحين تحلم اولاد ماما –بكسر الحا-ثم تجاوبها بانها مسكونة باولاد ماما وعندها ريح احمر ويلزمها تعمل ليهم يومية وفي بعض الحالات المستعصية تطلب منها ان تعمل كرسي ( اسبوع تستمر ااحتفالات ) او نص كرسي تلاته ايام حسب حالتها المرضية واحيانا الاقتصادية . وكذل ظروف المكان واذا كان زوجها يرفض ممكن تعمل الزار عند احد صديقاتها او قريباتها وفي حال استحالة المكان ينقل الزار الى بيت الشيخة مع استمرار الجو البهيج ، . اما في عهد لانقاذ اصبحت ستات الزار يتعرضن للكشات وكذلك المنازل التى يقام فيها الزار ما عدا بعض الاستثناءت حيث تقام بتصريح ولعدد محدد من الساعات من اجل التضييق على النساء حتى لا يهملن القيام باعداد زاد الشهيد واعداد ابنائهن للشهادة وزواج بنات الحور والزار يشبه الى حد كبير الكجور في جنوب لسودان كوسيلة للمعالجة .
| |
|
|
|
|
|
|
|
|
|
Re: عند ود امينه الخبر اليقين ........الي الجندريه. (Re: سجيمان)
|
والله كتابتك دي امتع من كل خيوت الزار الموصوفة...يا شوقي ...ربنا يديك العافية وتحكي....تحكي لامن تدستر...ليك خمستاشر سنة ومحتفظ بكل هذه التفاصيل ونحن ان غبنا سنتين نعوج لساننا وننكر الكتاحة
بلاي عليك الله يا شوقي...شوف لينا خيت مزمل غندور دا مالو ما بقي حاكم؟؟؟؟؟
| |
|
|
|
|
|
|
|
|
|
Re: عند ود امينه الخبر اليقين ........الي الجندريه. (Re: nazar hussien)
|
العزيزه راويه
زمان كانوا شيخات الظار نسوان الا فيما ندر و الاغلبيه كانوا من بقايا الرقيق زي المعدله التي تمسك بالعروس بطريقه خاصه و تقيد يديها تحت ركبتيها حتي يقوم العريس باغتصابها تحت ارشادات المعدله و بعض شيخات الظار ممن لهم قوه جسديه كن يقمن بهذه المهمه و عندما اختفي الرقيق صارت هذه المهمه تمارس ممن هم ليسوا من الرقيق .
اخونا ابوعلي حسن الجزولي عنده معرفه ميدانيه بالظار و اتمني ان يساعدنا .فان ما كتبته الاخت عشه بت فاطمه كان امتع و افيد مما كتبته انا.
شوقي
| |
|
|
|
|
|
|
|
|
|
Re: عند ود امينه الخبر اليقين ........الي الجندريه. (Re: nazar hussien)
|
العزيزه روضه
اطلعي من دورك . انتي الما بتعرفيهو شنو؟ انا كتاباتك دي بدرسها و بتعلم منها. و حيرتينا و كنا بنقول روضه دي منصور خالد ، الكلمات المخدمه مع بعض دي زي كانها مربوطه بزرقينه ما بعرفها الا منصور خالد .
و لكن من المؤكد ان الظار نوع من انواع الفودو او الجوجو لم تقضي عليه الثقافه العربيه و لا الدين الاسلامي فالشلوخ مثلا عادة تتكون من ثلاث حذوذ و هذه بقايا الديانه المسيحيه – الاب و الابن و الروح القدس – ودرب الطير او التي هي الصليب المسيحي و عادة درب الطير يحدث عندما يموت الاخوان او عندما يموت احد الوالدين والطفل صغير و يخاف ان ياخذه معه و يكون درب الطير ، و هو الصليب المسيحي لحماية الطفل و قد يتبعونه باسم الفقر زي العبد ، و لقد قابلت احد اولاد الغرب و يحمل اسم ميرغني فكانصاري( ميرغني) اسوأ اسم يمكن ان يطلق عليه . و اخذ الطفل الي البحر او النيل و غسله امتداد للتعميد و زيارة المرأه للنهر بعد الاربعين هذه عاده نوبيه قديمه و الفصد علي السيقان و مقابلة الهلال علي حافه النهر للنساء عاده نوبيه قديمه ايضا.
شوقي
| |
|
|
|
|
|
|
|
|
|
Re: عند ود امينه الخبر اليقين ........الي الجندريه. (Re: nazar hussien)
|
الاخت الابنه سهير
والله المعادله صعبه، يمكن اكون رباط جنتلمان او جنتلمان رباط عشان كده بقول
ما بنرفع النظرات و ما بنكشف الجارات
ما بنكشف الا الضيم و ثباتنا في الحارات
ديمه بنقول الحق حتي اللكان بوجع
ما بهمنا الحاكم و من كلمه ما بنرجع
زمان في امدرمان البوليس جاني مرتين ، لقوا زول مضروب و كانوا بقولوا لي زول في امدرمان دي بنضرب نص الليل و ماله في جيبه الا تكون ضربته انته.
انا لا اؤمن بالعنف و لكن قديما كان هنالك حوجه لايقاف تصلت شخص علي الاخر . ناس بلوم و الرخا ديل في السبعينات ، في السبعينات دي انا بقدل في نيويورك و تكساس لكن بيت المال كنته بحوما بكراع كلب في الخمسينات و الستينات .
شوقي
| |
|
|
|
|
|
|
|
|
|
Re: عند ود امينه الخبر اليقين ........الي الجندريه. (Re: nazar hussien)
|
سجيمان
انته يا سجيمان قال ليك البطلعو بالظار ده شنو، ده ما انته .
يعني كمان تبقي شيخ ظار ، يعني انته داير تبقي المرض و العلاج .حسه شمهروش كان لاقاك ما بقول ليك يا خالي بي طمستك دي ؟.
حليمه بت بشه كانت بتقفل اوضتها لكن بتكون حايمه . ما بتخلي اي زول يخش الاوضه لانو فيها معدات العمليه . اسه اوضة الجراحه مش بقفلوها ، و لا بخلوها فاتحه ؟ اخونا عازف البنقز ابراهيم عبدالوهاب(كتبا) في العباسيه جوار الطاحونه كان يدخلنا علي غرفة جدته و كنا نشاهد البرانيط و معدات الظار و البرانيط كانت مرصوصه فوق بعضها البعض و هي تشبه النوع الذي كان يستعمله المفتش الانجليزي قديما . كمان بيني و بينك شيوخ الظار ديل يا ودعمي زي ما قال خليفة المهدي طاعمين .
الخليفه سأل زول ثلاثه مرات من اسمو و لم يرد و عندما غضب الخليفه قال له ( الاسم سالم يا خليفة المهدي ) الراجل طلع اسمو عبدالله فقال الخليفه ( و لله انتو يا اخوانا الـ.......ماكن طاعمين ). اها يا ودعمي كمان الطرطشه عرفناها الباقي ده اظني ما بشبهك .
شوقي
| |
|
|
|
|
|
|
|
|
|
Re: عند ود امينه الخبر اليقين ........الي الجندريه. (Re: nazar hussien)
|
نزار
يا سيدي ما بتغير الا مغير . شفنا ناس بصلو بالليل و بالصباح يعملوا اسياد البلد . وحده من خالاتنا في امدرمان زمان قالت لاولاد حاجه كلتوم بعد ما اتطنقعوا و عملوا فص ليمون في بلد قرفان ( دنيا يا اولاد كلتوم ، من المرس للتنس ؟ ) بالمناسبه المرس ده يا نزار اكله ، لكن بعد ما تاكلها الا تدعك ايدك بالتراب .
واحد من اخوانا المتخوجنين ختينا المفروكه و الكسره الرهيفه و الشيه قدامنا في الجنينه و نحنه في تقاطع شارع اي زول ممكن يشوف ، الراجل ابا يدخل ايده خجلان ، كيف ناكل بايدينا في السويد . فدمسناه ، بعد شويه غفل روحو و ختف ليهو لقمه ، انقر بعد داك فكر في الخواجات تاني . قام سداري لحدي ما الصحانه نظفت و طلب زياده.
مشكلة مزمل غندور انه كان مدرس في الكليه الحربيه و درس الدفعه العاشره و الحداشر القاموا بالانقلاب . و كان في المحاضرات بقول ليهم انا حاموت صغير لانو العباقره اصلهم بموتوا صغار و كان بقصد الاكسندر الاكبر و نابليون و....الخ . و لهذا كجنوه ، و الحقيقه انه رجل ذكي جدا لا يخلو من نرجسيه
شوقي
| |
|
|
|
|
|
|
|
|
|
Re: عند ود امينه الخبر اليقين ........الي الجندريه. (Re: shawgi badri)
|
الاستاذ شوقي شكرا ليك يا ملك ومنكم نستفيد ، وموضوع الزار دا اساسا لابد في الاشعور فحركو البوست بتاعك وزي ما قت ليك في رفاعة كانت جارتنا شيخة زار ، وانشاالله الواحد اسمع نصيحتك واتوسع في الموضوع ،بس دي عايزة ليها رجعة السودان ويا ريت الواحد القى ليهو زار ويصورو للتوثيق والدراسة . تسلم .
بت فاطنة
| |
|
|
|
|
|
|
|
|
|
Re: عند ود امينه الخبر اليقين ........الي الجندريه. (Re: عشة بت فاطنة)
|
يا جماعه
ضموا صوتكم معاي و طالبوا حسن الجزولي بان يكتب في موضوع الظار لانه الموضوع ده قريب ليه شديد و حسن امدرماني اصيل و ناقش ، عارف البير و غطاها .
زمان في الملجه محل ببيعوا المراكيب في مرا غالطت صاحب المراكيب بانو مركوبو خياتو تعبانا و حينفتح و عندما لم يوافقها قالت له ( داير تغالطني انا ، انا ما بت المراكيب ) . و طبعا ليس هناك مجالا للمقارنه هنا، لكن انا عارف انو ابوعلي عارف . و لكم التحيه
شوقي
| |
|
|
|
|
|
|
| |
shawgi badri
Rawia
nadus2000
معتصم دفع الله
Raja
الجندرية
عشة بت فاطنة
سجيمان
nazar hussien
فيس بوك
تويتر
انستقرام
يوتيوب
بنتيريست