البتسوى الليله بتلقه كله لى قدام والبجر خيشك بتجر حريرو كمان والسيف إن طلع ببين السجمان والحريق ان كِبر بِلزموه بالنيران
كان لميت السجم لازم تكون غلطان والميز والفهم ما بوزنوه بميزان وان عز السرج ايه فايده البَطان والكتف البرف ما بكشفو لى بُطان
الناس العزاز ما بقسمون كيمان والجوع والشبع بيحسبا المصران والبسردب بقول كمان وكمان والكلمه الحنينه بتفرح الحردان والزول السفيه ما بسوو ليهو بيان ونلف وبندور والدنيا هى امدرمان
ما كضبوا القالوا الولف كتال لكن وين شفتوا قلباً كتفو بحبال واهم من الجمال والخِصل فى خِصال والفارس بيركز لو اتناوشنو نبال والخَلِق تتبدل لمن يعز المال واول رشاش التَبسَ بِغير حال
اللعوت بتلاقا فى الحرق والموت والجايبوا الدرب يوماً بقوم ويفوت والقام فى الخلا ما بمسكنو بيوت وكَدَب القلب ما بِبرطنو زيوت
الشرف العريض عِبارو ما الفدان والجود والكرم ما كبر قيزان والناس ما بهمها شن كنت انت زمان والبتقاسمو مالك بدورك كمان جيعان
الشارى السمك لا بد يلاقي زفاره والدايرك بدورك لو راسمالك الشُماره والاهل التمام ما بتفقدم فى الحاره والغدر الكريم ما يحسبها دى شطاره
البعشوم مخرجو وسيع ببلعو اللالوب وبعد فرحه العرس كل واحد بقول الروب والبحر ان طمح لازم يجيب لو خبوب والفقرى ان شبع بحوجك لصبر ايوب
الاشتريتو بى قرش ببيعك بى تعريفه والزول الهميم عداوتو ذاتا نظيفه وفى الدنيا فى الما لاقى ملح ورغيفه لكن الروح سمحه والنفس حلوه عفيفه
الباعك مره ببيعك كمان مرات والما بسوى هين ما ترجا فى الحارات ومين قال الصدق بيحل من الورطات ولا حتى الكضب بيقلل الشمات
الحموها الكلوميت كيفن تشد العرقى وبعد الهدر ما يجوز الفحل يرغى والخواف بيحسب كل المرض بعدى وحتى الكلس ما بتقصد الجدرى
( البطان .. بضم الباء الجلد بالسوط فى حفلات العرس )
( التبس .. الشجيرات الصغيره . اشاره لضغار القوم )
( القيزان .. القدور الكبيره )
( الشماره .. بضم الشين خرقه تستعمل كازار للطيانى التربال او المزارع )
( اللعوت .. اشجار تنمو كفروع طويله من الارض لا تلتقى فروعها )
( الكلوميت .. مشروب مسكر يخمر )
( الهدر .. صوت الجمل عندما يكون غاضبا ومتهياءً للعراك )
( الرغى .. صوت الجمل وهو يتألم كنوع من الشكوى )
(عدل بواسطة shawgi badri on 11-03-2004, 12:01 PM) (عدل بواسطة shawgi badri on 11-05-2004, 07:49 AM) (عدل بواسطة shawgi badri on 11-05-2004, 07:52 AM) (عدل بواسطة shawgi badri on 11-08-2004, 07:38 AM)
11-01-2004, 08:54 AM
Yasir Elsharif Yasir Elsharif
تاريخ التسجيل: 12-09-2002
مجموع المشاركات: 50077
المليح دكتور المليح لك التحيه والموده . شكرا على مداخلتك ويسعدنى انك وجدت فيها بعض الحكمه آسف للرد المقتضب فنحن نسرق الوقت والكيبورد . التحيه والشكر شوقى ,..
11-03-2004, 11:34 AM
عشة بت فاطنة عشة بت فاطنة
تاريخ التسجيل: 01-06-2003
مجموع المشاركات: 4572
الباعك بى قرش بتبيعو بى تعريفه والزول الهميم عداوتو ذاتا نظيفه وفى الدنيا دى فى الما لاقى ملح ورغيفه
ما احوجنا لهذه المعاني وياريت الناس كلها تقرا هذا الكام البسيط السمح الملئ بالحكم / الزول الهميم عداوتو ذاتا نظيفة ، ما اجمل هذا العدو السمح صورة حية . ويا حليل زمن القرش والتعريفة والقرشنص ، ويا ريت الناس تعرف بان السفيه ما بسوو ليه بيان ولا راس وقعر ، كلام كلو حكم شكرا ليك يا استاذ ورمضان كريم
11-04-2004, 09:19 PM
Saifeldin Gibreel Saifeldin Gibreel
تاريخ التسجيل: 03-25-2004
مجموع المشاركات: 4084
الاستاذ والاديب الرائع شوقى بدرى عرفت انك اديب مفوه من قريبى دكتور قاسم الجرافى وهو التقاك فى هامبورغ عدة مرات,لذلك لا استبعد ان تكون هذه القصيدة الرائعة من نظمك وان لم تصرح بزلك.
سيف الدين محمد جبريل
11-05-2004, 07:38 AM
shawgi badri shawgi badri
تاريخ التسجيل: 04-26-2003
مجموع المشاركات: 622
العزيزه عشه بت فاطنه شكرا على المداخله . يسعدنى انك تذكرتى التعريفه والقرش لقد نسى الناس الكثير , كان هنالك المليم والفرطاقه وهى نصف المليم ويقول الناس عادةً ما اديك فرطاقه . وهنالك عشره فضه وهى ربع القرش ويقول المثل ملوخيه بعشره فضه ولا جميله الخولى . اى صاحب المزرعه . لقد قال لى محجوب شريف مره الكلام البتكتبوا ده يا شوقى مرات عاوز مترجم . والمؤلم ان الناس يريدون ان ينسوا كثير من التراث . التحيه ... شوقى ...
11-05-2004, 07:40 AM
shawgi badri shawgi badri
تاريخ التسجيل: 04-26-2003
مجموع المشاركات: 622
العزيز سيف الدين التحيه لك ولقاسم وشكرا على المداخله . ليس المهم من الذى قال الكلام المهم ان يصل الكلام وان نتذكر بعض تراثنا الذى يحاول الكثيرون الآن نسيانه . شكرا على المداخله ويسعدنى ان الكلام عجبك . لك التحيه والموده ... شوقى ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
shawgi badri
Yasir Elsharif
عشة بت فاطنة
Saifeldin Gibreel
فيس بوك
تويتر
انستقرام
يوتيوب
بنتيريست