|
دعواتكم لزميلنا المفكر د.الباقر العفيف بالشفاء العاجل
|
|
 Re: ألــــــــــــــــــف .......... وعام من الابحـــــــــــــــــــــــــــار (Re: WadAker)
|
...........و للزكرى والتاريخ ...دى كانت اول مشاركة خاصة بعد عدد من المداخلات....
للمتزوجات فقط ... كيف اقضى ليلتى الاولى... ؟؟!!
كدى براحة الشغلانة ما زى فى الليلة ديك ..الشغلانة دى جادة وبتخص الرجال كاملين الدين وبقو فى النسوان زاهدين...مدخل اول
طبعا اخوكم/ ن العبد لله اذا اعتبرتونى اخوكم من زمان مطبق فى خريطة شق الديار علم لحدما زمنى كلو عديتو لاف بره لامن تروسى فوتت..قراية بره.... شغل بره.... وكلو بره بره ...اهه فى الاخر قلت اجرب الشغل الجو جوه علشان اكتسب خبره وارجع اطش تانى ..وحصل... رجعت السودان بعد طول غياب بحثا عن اكتساب الخبره وفعلا حصل ... اهه قمت لاقيتا ليكم وحصلت الكهربة من اول تماس لحدما بقيت تورش وما بولع اكان ما شفتها ومليت بطارياتى منها ..وبعد برهه " حلوة برهه دى " رجعت حليمة لعادتها القديمة وتانى قمت جارى بره ومرت سنوات والبطارية كملت,,,, ولما اسال منها يقولو لى انتهت من جامعة وبدت فى واحدة تانى .... عينى باردة ما لاقيت لى زولة بتقرا فى قران كريم ....ومحاسبة وقانون فى وكت واحد .. و الرابعة انا ماعارفه شنو؟ ... اهه قلت احسن اسرق لى اسبوعبن تلاتة من الغربة و امشى اشوف الحاصل شنو .؟ .انتهى المدخل التانى
تعرفو يوم انا جالس وخالط لى خلطة شغل مع حاجة كدى يكفى انها مخرجة رائعة وعاملين سوا شغل حلو وتمام التمام ... يقوم الموبايل يرن ويزن وكانت رنة طويلة وحزينة..
انا :الو
هو: الو معاى الاستاز "....."
انا : ايوه معك انت منو؟
هو: انا فلان ماعرفتنى شغال مع اخوك الكبير ..
انا : اهلا معليش الزمن طال كيفك وكيف اخوى وناس المكتب؟
هو: كويسين.. اخوك بيقول ليك ابوك مات قبل شوية واسع بيعملو فى اجراءات شهادة الوفاة وبيدفنو الساعة ... فى حمد النيل
انا :......................
هو: طااااااخخخخخخخخ السماعة
هى :خير ايش فى ؟
انا :لا مافى شى بس ابوى مات قبل ساعات !!
هى :................
انا: .................. يلا نكمل الصفحات دى..
المهم حصل لى انقطاع فى الارسال لفترة من الزمن ثم اصبح الارسال مشوش مره اشوف ابوى ومره اسمع رنات تلفونات ومره اشوفا ليكم .. تقولى يخص عليك ابوك مات وانت لسع مزازى بالبلدان ؟
وقررت الرجوع للبلد بعد السنين المرة يادوب...............
كانت الاجازة تلاتة اسابيع ..الاول فى العزاء والتانى بين الضرائب والخدمة الالزامية والتالت انا عريس"بدون دخله اكيد " طبعا ما حاتصدقو حتى ولو غنت ليكم احلام.... لا تصدقونه ...طبعا انا من زمان بتاع نظريات وبكره الحزن وبدى الدنيا دى بالجزمة الجديدة ودايسه للاخر.. اسبوعى كان تمام ... التلاتاء اقنعت ناس البيت انو الحى ابقى من الميت وداير امى تشوف جناى وعشاى و.اقتنعو بس مين بيقنع الجيران ؟ ..الاربعاء الجيران اقتنعوا ..الخميس الرجال والنسوان مشو اتقدمو وفتحو خشومن ... الجمعة كان العقد ...الاحد انا احلق على ارتفاع الاف قدم فوق البحر طاش مرة تانية... وبعد فترة هى زاته جاتنى طايرة واصبحنا فى الهوا سوا.. احلى حاجة فى العقد كلو ما اشوف لي راجل قيمة كده "زى ما بقول سمير غانم" اقول دى زولى ده ابو القدح اقصد ابو النسب يطلع ده واحد تانى والغريبة هو زاتو كان بفتش لى بس بى حرفنة طبعا ما حلوة يسال عن راجل بنتو ؟ والالز اكتشفنا انا هو كنا قاعدين فى كرسيين متجاورين فى صيوان العقد ..
دى قصتى باختصار شديد...!!
الحمد لله الان انتجنا الاء امورة تفتح النفس على الدنيا وهى على مشارف النصف الثانى من عامها الاول ..ولكن المشكلة فى الاتى :
لا انا ولا الاء ولا ام الاء بنعرف بيتنا ولا بيتهم لان كلا الاسرتين رحلتا فى منزل جديدة فى احياء اخرى ودى حلها بسيط ...
لكن اساس رفع هذا البوست هو التنازع بين الاهل ... اهل الزوجة التى ترغب امها فى النزول معها لقضاء كامل الاجازة وما بعدها ..... وام البطل الزوج التى ترغب فى ضم زوجة ولدها فى حضنها وتحت جناحها يعنى الولد مفروض ينزل فى بيت ابوه.. البيت الكبير .. وهى مشكلة رغم بساطتها الا ان احتمال ولادتها لمشاكل اخرى وارد... وفى حالتى هذه ... وانا انوى قضاء اجازة هادئة بين الاهل ماذا افعل خاصة وانا بيتى لم يكتمل بعد..يعنىباختصار من المطار الى اين اتجه اولا واين اقضى ليلتى الاولى وكيف اقضيها من حيث الاسلوب والتعامل مع النسيب والنسيبة و.....و,,,,,, خاصة وانا طريفى زول نصيحة وما بعرف اسكت على شيى ما عاجبنى والا وضع انا شايفو ماياهو...نسمع من الخبراء/ ت من باب انها مشكلة عامة...
_______________
| |
 
|
|
|
|
|
|
|
|
Re: ألــــــــــــــــــف .......... وعام من الابحـــــــــــــــــــــــــــار (Re: WadAker)
|
سيف ود عوج الدرب شوف ده اول شى بعدين برد عليك ..........
اول ست مداخلات كانت من : خمسة رجال وانثى
الاولى من الاخ / عمر الفاروق شيخ الدين
اول شي وتووشك كده ممكن أقول ليك ياخ إنت زول راقي ...
السهل الممتنع روعة في السرد تنقل ما بين الحزين والسعيد ما بين المبكي والمضحك وما بين المؤلم والممتع ..
معليش للتخريمة وماني متزوج بس كلامك سمح بالحيل ..
غايتو بقول ليك السودان بقت فيهو الشقق المفروشة والمجهزة مخصوووووص للمغتربين الزي حالتك دي لكن كم وكم أتمني أن تقضي إجازتك كللللللللللللها بين الأهل فقط الأهل ولا شئ غير الأهل ...
_______________
التانية من الاخ /saif massad ali
دي يحلها دكتور عادل سجيمان
_______________
التالتة من الاخ / ahmed babikir
سلام عزابي برضو...
والله انا شايفكم يالمعرسين انكم مترفين خالص خالص.. مشاكلكم ذاته كده مشاكل بالرجاله كده..
بعد الواحد لقي بت الحلال، وبعدين اهلوا اقتنعوا بيها، وبعدين عمل حاجاتوا كلها الكلام الكتير بتاع فتح خشم وقفل خشم وشيله وحفله وووو،،،، تاني انا ماشيف اي مشكله ممكن تكون اكبر من كده،،،
عيشوا حياتكم واستمتعوا بيها كان هنا، كان هناك.. والله يفك حيرتنا!!
_______________
الرابعة من الاخ / smart_ana2001
الحل بسيط جدا
و للمعلويه هو الحل الوحيد للمشكله دى . يعنى اى حل اخر غير قابل للتفيذ
كل واحد فيكم يمشى بيت اهلوا
هى تمشى (مع بنتها) لبيت اهلها و انت تمشى لبيت اهلك
لكن لازم (اقول لازم ) اثناء ايام الزياره للسودان تشيل ليك غيارين تلاته و تمشى تقعد معاهم فى بيت اهلها , و هى برضوا لازم تيجب شويه غيرات لبنتها و تجى تقعد مع اهلك عشان والدتك تشوف حفيدتها و بنتها الجديده ( زوجتك )
صدقنى ده هو الحل المثالى
_________________
الخامسة من الاخ/ Badreldin
الحل تنزل اولا في البيت الاقرب للمطار فاذا كان بيت النسابة تنزل الزوجة وحقائبها وتنزل للسلام وتفقد الاحوال ثم تتحركوا الى منزلكم للسلام ايضا بعد وجبه او اثنين تقوم بارجاع الزوجة وبنتها الى اهلها وتعود تبيت مع الوالدة ضروري جدا جدا جدا اول يوم بالذات مهما حصل بعد اليوم الاول تتجول انت بين هذا وذاك على ان تكون منزلتك مع والدتك ولابأس ان تترك بعض الملابس وفرش الاسنان مع الزوجة واكيد حتقلي مبلغ مع الزوجة لزوم الفنجرة
____________
ضفرة: مريم بنت الحسين كانت اول متداخلة وجاءت فى المرتبه السادسة .......
انا ما متزوجة (احمد الله) لكن الشي البحصل معانا لما نرجع السودان اجازة.. ونمشي رفاعه حيث اهل والدتي واهل والدي، بنمشي بيت جدي والد والدي في البداية.. نبيت فيه.. رغم انه منزل جدي والد والدتي اقرب من البنطون... وبعداك والدتي بتمشي بيت اهلها.. احنا احرار، ممكن نبيت عند ديل او ديل او عند واحد من اخوالي او خالاتي.. لكن العبره انه بنهاية الاجازة نكون رضينا ع الكل..
رأيي.. تمشي بيت اهلك طويل...
بنت الحسين
| |
|
|
|
|
|
|
|
|
 Re: ألــــــــــــــــــف .......... وعام من الابحـــــــــــــــــــــــــــار (Re: WadAker)
|
التانية من الاخ /saif massad ali
دي يحلها دكتور عادل سجيمان
_______________
تعرف ياود عجب الدرب انت زول سمح جدا" رغم عصلجتك وهو طبع وراثى يرجع لجدكم الذى عوج الدرب بعد ان كان عديلا "......يااااخ مبروك وانت دايما فى القلب وقد انتقلت من التانى الى الاول بامتياز فلك كل الحب ,,,,,,,,,,
| |
|
|
|
|
|
|
|
|
|
Re: ألــــــــــــــــــف .......... وعام من الابحـــــــــــــــــــــــــــار (Re: WadAker)
|
Quote: ود عكر
صديقي الذي افتقده
قصرت معك في الفترة الاخيرة
توقع اتصال عن قريب |
نوبى الجميل ......... والله انت جميل يارجل
بس بعض العوارض تحول دايما النشاط الى حالة نفسية منخفضة الايقاع .......... ولكنها حتما ستزول ثم نتجول سويا فى رحاب الصداقة والتواصل المحترم ,,,,,,,,,,,, بالمناسبة مسقط شهدت امطارا بصورة كثيفة وكذلك موجة برد ارجو ان يكون الحال لديكم كذلك
| |
|
|
|
|
|
|
| |
saif massad ali
فيصل نوبي
فيس بوك
تويتر
انستقرام
يوتيوب
بنتيريست