|
دعواتكم لزميلنا المفكر د.الباقر العفيف بالشفاء العاجل
|
|
 Re: رحلة العمر .... رفاعة للجميع .... ((توجد صور)) (Re: عبير خيرى)
|
تحركنا بعد صعوبات شتائية من الميناء البري بالخرطوم في حافلة إتأخرت شوية لأنو في 3 مقاعد فاضية بفتشو في ركابها لقوهم بعد تلت ساعة للأسف في حافلة ماشة الفاو وكانو ركبو فيها غلط .
قبل ما نتحرك وأنحنا متفقين نصل رفاعة بالكتير الساعة 10 إتصالات مهند الجيلي بدت تكتر وإضطريت كذبت عليهو وقلت ليهو نحنا في الطريق .
قلنا بسم الله وتوكلنا عليك يا الله إتصل أبو هبة عشان يعرف أنحنا وين ، قامت نولا قالت ليهو الحقيقة وفضحتنا قام هو إتصل بي ناس رفاعة وقال ليهم الناس ديل يادوب متحركين وجات الفاس واقعة في راسي والحمد لله سمعت من مهند الما بقدر يكتبو هنا .. يلا كلو يهون في سبيل الرحلة الجميلة .
مشت الحافلة وكلنا حمدنا الله على التحركات ورسمنا ابتسامة رضا ، سواق الحافلة التقول عارفنا أمسك شغل لينا وردي ولما جات بإسمك الأخضر يا أكتوبر الأرض تغني الحافلة كلها اتلفتت دايرة تشوف المجانين الورا ديل بعملو في شنو كلنا بصوت واحد كنا بنغني مع ورد وبأعلى صوت وكأنو الحافلة دي حقت نولا .
طبعاً كنا ماسكين الكنبة الورا والكرسيين القدامها يعني ورا كان عبارة عن معسكر شي غنا وشي سندوتشات وشي كولا وحاجات باردة .
سواق الحافلة قال أحسن أتخلص من المجانين ديل وأشغل ليهم حيدر بورتسودان وحيدر أظنو عجبو الحال ووقع فينا بي تقلو وأول أغنية وقصدنا عديييييييييييييييييييل كانت أغنية "مافي داعي كان للحصل ما في داعي" ، سجيمان أصر يعرف شنو هو المافي داعي ليهو وكان تساؤل وصل لي نص ركاب الحافلة وبقو يفكرو مع سجيمان في المافي داعي .
الكلام ده كللللللللو قبل ما نصل الكاملين ومهند ملاحقنا بالتلفون .
أسمعو
بجيكم هسسسسسسسسي أنزل الصور بس ...
| |
 
|
|
|
|
|
|
|
|
Re: رحلة العمر .... رفاعة للجميع .... ((توجد صور)) (Re: انعام حيمورة)
|
مهما قلنا ومهما تحدثنا فلن نستطع ان نوصف مدى بهجتنا وسرورنا عند لقائنا بأبناء رفاعة والذين تسابقوا على خدمتنا وراحتنا بدأت منذ إستقبالنا على ضفة النهر بواسطة الرائعين مهند الجيلي واسامة وحافظ وحتى وداعنا بعد المغرب ونحن نتهيأ للعودة للخرطوم ..
تذكرت كبف ان خالد ماسا قال لنا قبل الوصول إلى رفاعة إنه فقط يخشى ويخاف من الكرم الفياض الذي( سيهاجمونا) به أبناء رفاعة وقد صدق ما قاله لدرجة اننا لم نستطع مجاراتهم بهجمة مرتدة واحدة
ونحمد الله أننا أقنعناهم كي يطلقوا سراحنا حتى لا يجعلونا معتقلين لديهم تحت رحمةسياط كرمهم التي لا ترحم حتى اليوم التالي ..
والله لولا المشاغل والعمل لما غادرنا رفاعة ذلك اليوم ..
| |
|
|
|
|
|
|
|
|
|
Re: رحلة العمر .... رفاعة للجميع .... ((توجد صور)) (Re: انعام حيمورة)
|
طــــق خاااااص
الوريفه " رفاعه "
الارض ومن عليها ..
- الارض .. النيل
ورائحة الطين ..
الابنية القديمه ..
الشوراع ورائحة التاريخ ..
واناس من " زمن جميل " ..
زمن سلامة الفطره ونقاء السريره ..
فقط غادرتكم يا اهل رفاعه وحالي ك " من فاتته ليلة القدر " ..
شكرا لكم ..فبرؤية امثالكم تستقيم الحياه .
طــق خصوصي ..
- الوريفه انعام اها الصور الاتفقنا انها ماتنزل لا زم تكون في الحفظ والصون " لزوم العين وكده"
- الوريفه عبير خيري اول حاجة اشد علي ايدك لنجاح البرنامج وكنت شايل ليك هم والله ..لكن ربنا بيديك علي قدر نواياك .. " شكرا علي البرنامج الغذائي المصاحب "
- الوريفه "نولا " والله لقيتك " كده " في المواقف الصعبه . وليك علي اردها ليك في اقرب موقف
" قر .قر. قر" وش ابو غمزه زي ما بتقول الوريفه سمريه .. قلتي لي الزول قايل الدنيا " شنب "
- الوريف " ناذر " .. محتاج تخش عفريته يا وريف ياخ مشوار ساعتين بس تتكرفس زي " مقص الشنب"
ياخ معقوله .. لكن برضو وقفتك معاي ما بتتنسي . بس تاني "اغاني ما يطلبه الركاب "دي ما تتعبنا بيها.
- الوريف سي جي .. نص كيلو لحم يا غتيت .. والله انت حقو عيد الضحيه الجاي تضرب عن اللحم عديل
غايتو ده تحذير لاي زول ما يقرب منك اليومين دي .. وين الفاضي بتاع البارد .. دي عملية تعملا في العود بتاع ناذر ..ابو المين ما بيكون سبقك عليها .
- الوريف المهندس ..بالله حافظ الشارع ذي كمساري السفنجه من عوج الدرب لي درب العجل .
- غايتو يا ناس رفاعه الله يقدرنا علي جزاكم .
| |
|
|
|
|
|
|
|
|
|
Re: رحلة العمر .... رفاعة للجميع .... ((توجد صور)) (Re: WAD ELGAALI#4)
|
.
ود الجعلي إزيك
أنا والله ما بزعل من زول أبداً ولو دخلت اللنك الجابتو أنعام الفوق ده حتلقى إني منزلة موضوع الرحلة قبل أسبوع وأمكنة التلاقي والحصل شنو أنا ما عارفة خلى الناس ما يجو .
ومعليش أمسحها لي في وشي رغم إنها عن غير قصد لكن الناس القريبين منك كان ممكن يقولو ليك الحاصل شنو .
وكان جيت لي الحق أنا الماعارفة عملت للناس شنو ؟!!!!!!!
| |
|
|
|
|
|
|
|
|
|
Re: رحلة العمر .... رفاعة للجميع .... ((توجد صور)) (Re: انعام حيمورة)
|
شكرا اهل رفاعة للكرم الفياض....
شكرا رفاعة ابسن....واهل رفاعة ابسن
شكرا لرفقاء الرحلة....رفقتكم كان ممتعة...
شكرا الكوكاكولا لقد اثبتي فعلا انك صناعة صهيونية كما يقولون...وشكيتك لل لا نام ولا اكل طعام.....
ششكرا نازر الخليفة لقد حققت لي منيتي بان اصبح شيال..وبالفعل شلت معاك...
شكرا شاعر الحافلة هاشم ود الزين والشكر كل الشكر لحبيبتك بت شيخ حسنين شكرا شيخ حسنين.....ومحنني ومطير من عيني النوم يا هاشم شوقك لحبيبتك الماشي كداري من الخرطوم للضعين.....اطالب الحكومة بشارع زلط....واللا اقول لك اسحن لو الطيارة...
شكرا سواق البنطون...كما قمت صوف في نص الموية...شكرا لتمساح النيل الازرق الشمينا ريحتو وما جا مارق.....
شكرا جوافة رفاعة.... يا اللبستي مصراني الاعور نضارة........
ولي عودة
| |
|
|
|
|
|
|
|
|
|
Re: رحلة العمر .... رفاعة للجميع .... ((توجد صور)) (Re: سجيمان)
|
سلامات
وعوافي
من وين ابدا وايه اقول ..
رفااااااااااعة عديل كدة ..
ومانعرف الا بعد ماتمشو ..
ياعبير بالغتو عديل كدة والله ظلمتونا ظلم ..
ياجماعة الله ..مشيتو لي تيراب رملية والا ماوصلتوهم ..
لو ما وصلتوهم تكونو بالغتو عديل ..
يعني لو كلمتونا والله العظيم كان خليناهم انتظروكم في الميناء البري ..
فرحان بي مشيتكم دي فرح مايعلم بيهو الا الله ..
رفااااعة عديل ..
عليكم الله مشيتو ناس خالتي صفية بت عبدالرحمن ابنعوف .. امنت بالله امنت بالله ..
بالله كيفنهن كلهم لي حدهن ..
كيف رفاعة خليتوها .. من ديم لطفي لي فريق السوق وديم العوض ..
والله طلقتو فينا نار الشوق ..
احبكم يابورداب الخرطوم واحب جمالكم شهامتكم وانسانيتكم ...
انا مبسوط والله ..
ياعبير خيري .. اوعا تقولي لي انتي اخت الوجيه "اكرم خيري" و"ايمن خيري" ..مابصدق طبعا ..
بعدين اكان ما مشيتو لي حيشان عيال رملية ما تكلموني سمح خلوني اتخيل انكم زرتونا واكرمتونا بي جيتكم ....
والله العظيم متاسف جدا جدا لي اني ماشفتا ولا عرفتا مشيتكم لي رفاعة دي الا لم اتصل بي الاخ الحبيب محمد عبدالرحمن واكد لي الكلام اخي وصديقي عبدالغني كرم الله "والاتنين معاي هنا في الدوحة"..
ياجماعة والله بيتنا كان "رديتو ليهو الروح" بعد ماستو سلمت الامانة ورحلت لدار الخلود ..
اكان مامشيتو زعلااااااااااان منكم الف مليون مرة ...
والله لو قلتو لي خالتي صفية ماشين ناس رملية كان ودتكم اصلوا خالتي صفية دي عندنا معاها محبة شديدة وبعدين انا بيتم دا ساكن فيهو سكنة لما كنت في رفاعة اهلي لو عاوزيني بيضربو لي عندهم او عند ناس الزبيدي.. وبعدين عيالا اصاحبي للاسف مالاقيتو زول فيهم لانهم برا البلد "عبدالله وطلال" ..
يااخوانا الله يحفظكم ويغطيكم .. وانتو تتعلو ما تتدلو يارب ياكريم..
محبتي بقدر ابتهاج رفاعة بزيارتكم ..
دمتم
| |
|
|
|
|
|
|
|
|
|
Re: رحلة العمر .... رفاعة للجميع .... ((توجد صور)) (Re: انعام حيمورة)
|
مبروك لكم /ن ويارة موطني رفاعة ويا سلام علي التواصل
لي ملاحظة ان كاتبة البوست من ضمن الوفد وناس عبير خيري لكن الكاميرا لا زالت ذكورية التصوير هل هذا محض صدفة؟
للجميع معزتي لاني اري بوستات لا تظهر فيها المراة مبدعة الحياة وكترت صور الرجال بتجيب الفقر
للجميع محبتي
| |
|
|
|
|
|
|
|
|
|
Re: رحلة العمر .... رفاعة للجميع .... ((توجد صور)) (Re: انعام حيمورة)
|
سلامات
وعوافي
اختي انعام ..
امانة ما نزلتو في بيت الكرم .. وبيت الشهامة والطيبة والاصالة ..
النار موقدة طول اليوم والباب مفتوح للاهل والحبان والنور عمرو ما نام ..
يازولة البيت دا محطة الفة وحنية لكل المدينة ..
والله نار الكرم في حوش ابنعوف تشهي الزول ينزل عندهم كل يوم ..
وخالتي صفية دي مرة قبيلة بي حالة .. من شدة كرما قعادا كلو في المطبخ ..
وان طق الباب الساعة 4 صباحا بتوقد نارا للضيف قبل ماتعرفو قريب والا بعيد ..
يازولة تستاهلوا انتو والله ..
وطبعا هذا هو البيت الذي ينتمي اليها الخال الحبيب الغالي "عبدالله ابنعوف - ابوهبة" وهو كتاب اخر يحتاج لسنيين واقلام واحبار وخرائد حتي نكتب الصفحة الاولي عنه ..
اذكر له موقف واحد فقط وانا ابن الطاشرات كان صديقي ورفيق دربي هو ابن اخته محمد حمزة ابوقبالة .. جاء عبدالله "ابوهبة" في اجازتها السنوية والتقيته مرتين فقط في رفاعة وكلاهما كنت مصاحبا لابن اخته محمد حمزة .. ولما شارفت اجازته علي النهاية التقي محمد بن اخته "ودسا في جيبه حزمة من الاوراق الخضراء" واعطاه في يده "حزمة اخري وقال له هذه لصديقك عبدالرحيم" والله العظيم كنت اعتقد انه اذا سالوه عني لن يعرفني فتذكرني وانا غايب في تلك اللحظة فهل يمكن ان يكون صاحب هذا المثل من غير هذا البيت السوداني الاصيل "حوش ابنعوف" .. ظل هذا الامر عالقا في ذهني الي الان ربما مضي عليه الان قرابة 15 عاما ولكن اتذكر اليوم الذي جاءني محمد فيه واعطاني "هبة" "ابوهبة" واتذكر جدا الاحساس الذي زرعه في وريد الروح ....
ولكم جميعا تمام المودة ..
| |
|
|
|
|
|
|
|
|
|
Re: رحلة العمر .... رفاعة للجميع .... ((توجد صور)) (Re: انعام حيمورة)
|
عبد الرحيم اخوى
Quote: اختي انعام ..
امانة ما نزلتو في بيت الكرم .. وبيت الشهامة والطيبة والاصالة ..
النار موقدة طول اليوم والباب مفتوح للاهل والحبان والنور عمرو ما نام ..
يازولة البيت دا محطة الفة وحنية لكل المدينة ..
والله نار الكرم في حوش ابنعوف تشهي الزول ينزل عندهم كل يوم .. |
يا اخى انتو ناس روعة
شكرا انعام
| |
|
|
|
|
|
|
| |
انعام حيمورة
ابوحراز
ناذر محمد الخليفة
حسن الجيلى سعيد
عاطف عمر
أيزابيلا
عبير خيرى
سمرية
خالد ماسا
WAD ELGAALI#4
Elmoiz Abunura
سجيمان
ودرملية
الطيب شيقوق
معتصم دفع الله
فيس بوك
تويتر
انستقرام
يوتيوب
بنتيريست