|
|
|
 Re: (الخرطوم تتنفس)..الخميس 23 \12 ...أمال النور وفرقة الخرطوم جنوب (حدائق المتحف القومي) (Re: naeem ali)
|
Quote: آمال تربت على يدي في الدورة المدرسية بمدني 1979وكنت حينها عضو لجنة اختيار
الاصوات التي تمثل مدرية الخرطوم وكانت وقتها في (ثالثة)عالى
وقد كان لي القدح المعلى في اختيارها والفنان نادر خضر برغم وجود اسماء كنجم الدين الفاضل حينها
وفي حضرتها لحنت الاماني السندسية لها وحدها لتغنيها ألهمتني هذا اللحن طالبة صديقة لها وغنته آمال
بطريقة تعلمت منها الكثير فكان هذا الاداء منها عو الطريق الذي أنار لي ولمصطفى في أداء هذه الاغنية وبعدنا كل الذين تغنوا بها
ثم درست ونضجت وبيني وبينها سيكون عملا كبيرا
فازت آمال وفاز نادر كل منهما بالمرتبة الاولي في تنافس خطير من كل الولايات
خصوصا من مدني بقيادة ناس الفاتح حسين وعثمان النو
وبالمناسبة لو سمعتموها بتغني في أغنيتي سفر العيون ذلك المقطع لقتلكم الشجن
كل الحب لك ياآمال وانا من ايدك دي لي ايدك دي وانتي تأمري |
الاستاذ الموسيقار يوسف الموصلي
الاستاذه أمال النور .. قامه تنضح عطراً
| |
  
|
|
|
|
|
|
|
 Re: (الخرطوم تتنفس)..الخميس 23 \12 ...أمال النور وفرقة الخرطوم جنوب (حدائق المتحف القومي) (Re: tayseer alnworani)
|
سلام تيسير ..
الجدول موجود في لافتة كبيرة في مدخل المسرح
الأكيدة الليلة شرحبيل وبكرة عقد الجلاد .. القائمة فيها كمال ترباس وأمال النور وحمد الريح وأسامة بيكلو وكمية من الفنانين ..
الشي اللاحظت ليو إنو ما في فنانين شباب في الاحتفالية ولا اي صواميل حائمة ..
البرنامج حا يستمر يوميا لحدي أخر الشهر دا .. البرنامج عبارة عن قيدومة إستعدادا لمهرجان الخرطوم الدولي للموسيقى ..
غنا مخضرم وبس .. تسمع أضانك غنا نضيف في جو نضيف وحلو في شارع النيل وتمشي مرتاح بيتكم ...
كدة وزاد وجدي ..
| |
|
|
|
|
|
|
|
|
|
Re: (الخرطوم تتنفس)..الخميس 23 \12 ...أمال النور وفرقة الخرطوم جنوب (حدائق المتحف القومي) (Re: ناذر محمد الخليفة)
|
وبمناسية اللخبطة يا نعيم هاك دي :
زماان في الثانوي طبعا كانو بيدرسونا لغة فرنسية .. أنا كنت بكره الفرنسي جدا جدا وبزوغ من حصصو .. واحد صحبي شديد بيحب الفرنسي جدا .. كل ما أقابلو بعد الحصة يعمل لي فيها ولا فرانسوا مترين داك ..!! شابكني ليك نقة بالفرنسي وطبعا أنا ما ناقش حاجة وشابكني ليك قال نفسو بس يلقى فرنسيين يتكلم معاهم لأنو مستواهو وصل للمرحلة دي ..!!
ربك رب الخير بعد فترة نادي الأسة كان فيهو فعاليات وفرقة فرنسية زائرة .. مشينا بالصدفة وهناك عرفنا إنو في فرقة فرنسية حا تشتغل .. عاينت لي صحبي دا وقلت ليهو : الليلة يومك يا فرانسوا .. ديل ناسك التكوس ليهم زاااتم .. عليك الله نادي ليك واحد وأقنعوا خليهو يآمن عدييل كدة .. صحبي صلح قميصو وعامل فيها واثق من نفسو .. إتلفتنا كدة لقينا ولد فرنسي صغير عمرو زي عشرة سنوات قاعد مطرف . قلت لي صحبي دا نادي الشافع دا أرطن معاهو دا ولد صغير وبيكون ما مجضم فرنسي كتير .. أحسن ليك من زول كبير يجي يخش معاك في الغريق يبهدلك ساي وتشرط عينا قدام الاجانب ..
صحبي أول مرة عمل فيها ما داير الشافع دا .. عايز زول كبير عشان يتكلم معاهو في قضايا كبيرة .. لكن في النهاية إقتنع ..
الشافع قاعد قدامنا بي خمسة أو ستة صفوف .. صحبي دا قعد يكورك ليو : بنجور .. بنجور .. دي أظنها بالفرنسي صباح الخير ولا حاجة .. المشكلة هو كان بينطق الكلمة كدة : بنجور بنجور .. زي ما بننطق عجور بالضبط ..
صاحبنا يكورك سااااي : بنجور !! بنجور .. بنجور !! الولد دا أطرش ولا شنو ..!! قلت ليو يكون ما بعرف فرنسي .!!
المهم صاحبنا يكورك بنجور بنجور قد اضامما والولد داقي طناش ..
في النهاية قلت ليهو أنا بلفتو ليك :عاينت جهة الولد قلت ليهو :بنجوس .. بنجوس !!!
أنقر ما إتلفت ..!!
| |
|
|
|
|
|
|
| |
naeem ali
ناذر محمد الخليفة
هشام كمال
فيس بوك
تويتر
انستقرام
يوتيوب
بنتيريست