|
|
 عوض شكسبير..إنت فعلاً فنان كبير.. لا تتأخر بالله
|
لا تتأخر يا عوض على المواعيد الكبيرة..
يكفيك ما ضاع من الوقت تحت عباءات تجاوزها الزمن..
إن كانوا قد ساعدوك في مرحلة من مراحل رحلتك الجميلة..
فليس من العرفان في شيء أن تظل (تلميذاً) طول عمرك..
عليك المبادرة بالمزيد من الأعمال الشجاعة..
فأنت تملك الكثير من المؤهلات لأن تكون نجماً حقيقياً..
وعليك فقط التوجه بالشكر والتقدير لبعض الأسماء (من الزملاء) مثل
الأستاذ علي مهدي..الأخ طارق الأمين..الأخ عبد السلام جلود.. الأخ محمد صالحين..
وغيرهم .. ولكن صدقني... لقد آن الأوان أن يعلم جميع هؤلاء..
أنك .. تمتلك من المؤهلات العظيمة ما يضعك في القمة ..
اكتسب المزيد من الثقة بحظوظك في "لهط" الساحة..
ملحوظة:
ربما لم يحالفني التوفيق في افتراع هذا الخيط..
ولكن .. توكلت على الله وطوالي على الهواء..
وحيث أنني لا أثق كثيراً في مزيد من التوفيق في هذا البوست..
سوف أكون مقلاً في الرد على أي مخاشنات للعبث بمضمون رسالتي
إلى الفنان المبدع عوض شكسبير (عوض حسن الإمام)...
وسلامتكم..
|
|
  
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: اساسي)
|
طبعاً يا أساسي (ولي أمري)..
ما حا أقدر أعزمك لايف شو لعوض شكسبير وأنا وإنت ملقحين جتتنا هنا في جدة..
وعليه ... أنصحك بمتابعة (النذر اليسير) من مقدرات هذا الفنان الجميل
عبر قناة الشروق..وقناة هارموني..
كمية فن ما معقولة ..
إلى الأمام يا عوض..
المعلومة بت الميداح دي قطعت بيها مصاريني ياخ..
وشايفك زي مطالب بإضاءات على أعماله..
ما كترتها شوية؟؟
إضاءات حتة واحدة؟؟
بالمناسبة أنا كنت شايل هم المخاشنة.. لكن طالما المسألة فيها (ولي أمري أساسي)..
فلا نامت أعين الجبناء والكلام ليك يا ود الصايم..
أحيييييييي يا راجي..
| |
|
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: حافظ كنجال)
|
بس بس بس يا حافظ يا حبيب..
Quote: الله يديهيو العافية ونشوفوا متالق دائما
عموما عوض شكسبير له مساحات شاسعة عن بعض الذين ذكرتهم |
بركة الجات منك.. أنا من قبيل داير لي زول يقولها ويريحني منها ياخ.. واقفة لي هنا دا..
كأني بك تقول: مفروض ما يضيع وقت في الظرافة والنكات ..الزول دا أكبر من كدا بكتير..
موش؟؟
شكراً حافظ كنجال...
| |
|
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: وليد محمد المبارك)
|
أووووووووووووووووووووووهـ
البوست جاب ليهو سيناتورات؟؟
| Quote: التحية لعوض وحقيقي ان الاوان لشروق شمسه |
وكذلك آن الأوان لهارموني شمسه ونيل أزرق شمسه والتلفزيون القومي شمسه..
ونتمنى أن تمتد تجربة عوض شكسبير حتى خارج مسرح البقعة..
حبابك يا وليد..
عاد بنقدر نلومك في عدم السلام ؟؟
صفوة وسيناتور وفردة عوض شكسبير..
اعتبر المكان مكانك ..
| |
|
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: Mahmoud Mustafa Mahmoud)
|
عوض شكسبير
بيمثلنا كل عام في العديد من مهرجانات المسرح التجريبي في أروبا والدول العربية
وبالجد الناس في السودان ما إتعرفو على الوجه الآخر لعوض شكسبير الممثل الجاد
إلا من خلال مهرجانات المسرح زي البقعة وغيرو ودي روادا محدودين وبسيطين جداً
بالمقارنة بي رواد المسرح الكوميدي .
عموماً عوض شكسبير إستحق هذا التنويه ويستحق التوثيق لأعماله الثرية
وتشكرات يا محمد المصطفى على البوست الجميل واللفته الطيبة
| |
|
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: Sabri Elshareef)
|
الأخ صبري الشريف..
لك التحية..
Quote: فعلا عوض شكسبير فنان وله مستقبل كبيير
يا سلام علي الحركه في المسرح وسرعة البديهة |
هو كذلك.. وكمان تحياتنا لإمام الفنان المخرج..
إمام زي معتمد على أنه (قيافة) حبة كدا.. على الأقل بالمقارنة مع عوض
ههههههههههه... طبعاً برضو فنان والله..لكن عوض إيييييييييييييك..فنان كلو كلو..
| |
|
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: tarig almakki)
|
الأخ طارق المكي..
تحياتي..
| Quote: عموماً عوض شكسبير إستحق هذا التنويه ويستحق التوثيق لأعماله الثرية |
صدقني لو ما استحق ما كنا اتعبنا نفسنا في متابعته..موش بس التنويه..الله ما كتر إلا الريموتات
عوض فنان جداً... وعارفه قاعد يمشي أوروبا وهسي كمان جابت ليها أمريكا.. لكن عايز أقول شنو...
عوض مفروض يطلع في الكفر.. لا تقول لي هناي ولا هناي ولا هناي.. التلفزيون أخطر حاجة
عوض مفروض يمسك ليهو في ناس بتاعين انتاج... ويلا... التلفزيون ثم التلفزيون ثم التلفزيون..
وفي المواسم برضو يحاول تدشين عوض شكسبير الكبير.. ويعمل مجموعته برضو دون (تنميط)..
يعني ما يكرر الفاضل سعيد وجمال حسن سعيد وغيرهم من أصحاب التجارب الواضحة..
لا نعيب عليهم شيئاً.. لكن الفكرة بتاعة إنه زول واحد هو (الأستاذ) والممثلين المعاهو
بتاعين عدادات ساكت..أيوة فنانين وأي حاجة.. لكن الواحد لو قلت ليهو ماشي وين؟؟
طوالي يقول ليك والله شغالين مع الأستاذ...السكة دي قريبة وما غلط..لكن ما جديدة..
وعوض ممكن يعمل أحسن منها كنقلة تاريخية ونوعية في الحركة الدرامية في السودان (القديم)...
خلاص كدا؟؟
شكراً ليك
| |
|
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: حسن حماد محمد)
|
Quote: عوض شكسبير فوق أنه فنان صاعد ومتميز الأداء ومحبوب لدى الجميع
له شخصية سودانية تحمل كل الطيبة والعفوية والصدق
تعرفت عليه من قرب أثناء زيارة فرقة مسرح البقعة لنيويورك فاصبح فى قاموس الأصدقاء
ود بلد أصيل ومتواضع مع الجميع |
صاح والله.. وآآآميييييييييييييييييييييين يا حسن حماد ياخ..
شكراً ليك كتير
| |
|
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: عليش)
|
| Quote: عوض شكسبير قاعد يعمل شنو علي الاقل نكون علي اطلاع وندعم مسيرته الفنية |
ما اعرفه يا اساسي عن تجارب عوض
مؤلف مسرحيه( العقرب)
مهرجان الثقافه الرابع بالخرطوم.
وهو مهرجان معروف شاركت فيه كل ولايات السودان المختلفه وقد فازت المسرحيه وقتها بجائزتي تمثيل نالتها الفنانه امنه امين الطاهر والفنانه سحر ابراهيم.
مؤلف مسرحية (الرجاء اصطحاب الكبار)
ود شاركت بمهرجان البقعه المسرحيه ومهرجان الشباب العربي بالقاهرة
كممثل شارك في مهرجان القاهرة التجريبي 2001 في مسرحية عرس الزين للكاتب الكبير الطيب صالح وتكوين الاستاذ علي مهدي.
شارك بشخصية الزين بطل المسرحيه وقد اجاد في الاداء.
شارك حاليا بمسرحيه سلمان الزغرات بمهرجان لعالم العربي بباريس.
كممثل ايضا شارك في مسرحية(فرجه بين سنار وعيذاب) وهي اعداد من رواية الطيب صالح وتمثلت هذه المسرحيه بنيويورك في مسرح برودواي الشهير.
ساعود
| |
|
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: عليش)
|
أها يا عليش...
أنا الفوق حذفتها.. لكن طالما عوض صاحبنا..فله علينا حق النصح وكدا..
الزول المخرج ولا الزول بتاع المونتاج.. مستعجل مالو؟؟؟
يعني في داعي يدقس زي دقسة القميص دي؟؟
ياخي دي أساسي ممكن يمسح بينا البلاط بسببها..
زول مساهر مع صاحبو بقميص...يقوم يرجع البيت بقميص تاني؟؟
المشكلة المشهد مقلوب من ناحية التسلسل المنطقي...
لكن في النهاية لذيذ..
هنا بقى عدم المهنية بتاعة ناسنا قاعدة تعمل الفرق...
يا ربي يكون الكسل؟؟
يا ربي يكون قال ليهم خلاص ما فارقة؟؟
غايتو..
| |
|
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: ود الباوقة)
|
Quote: عوض شكسبير
فنان رائع بحق وحقيقة
وانا والاسرة نتابعه يوميا عير قناة الشروق العملاقة |
ود الباوقة..
حبابك ياخي.. بعدين لو جا دينق هنا وقال ليك إنت قاعد تساهر مع العائلة ولا برة..
أنا غايتو بررررررررررررررررررررة...
البوست دا دمو خفيف.. بالله حاولوا إنكم تتوخوا خفة الدم ما أمكن..
شكراً لمجيئك..والتحية لأسرتك الكريمة..
| |
|
|
|
|
|
|
|
|
 Re: عوض شكسبير..إنت فعلاً فنان كبير.. لا تتأخر بالله (Re: Mahmoud Mustafa Mahmoud)
|
الأخ: محمود
سلامات
أولا أحيكم و اشكركم على هذا البوست الموفق
الأخ: عوض شكسبير، بالإضافة كونه فنان مبدع، و صاحب إمكانية ضخم
هو في رأى مجدد في المسرح السوداني الحديث، فخلال زيارتي الأخيرة شاهدت له عرض جميل – شكسبير شو – و اعتقد انه نقله و طفرة نوعية للمسرحي السوداني و فكرته جميلة، و أداءه رائع.
و شاءت الأقدار، و تعرفت على الأخ: عوض شكسبير عن قرب خلال زيارة مسرح البقعة لنيويورك، فوجدنها نعم الأخ و الصديق. و قد قامت الرابطة السودانية الأمريكية بنيويورك باستضافتهم مرتين، و قدموا اقوي و أجمل العروض كأول تجربة مسرح سوداني متكامل بمدينة نيويورك.
أخى: عوض كن دائما بخير، مع تمنياتنا لكم بالنجاح و التوفيق.
شوق كميـــــــــــــــــــــــــــات
عبدالرحيم منصور
نيويورك
[email protected]
*
**
| |
|
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: عوض شكسبير)
|
ما أجمل الفنان السودانى الرائع بقامة عوض شكسبير فهو بالفعل يمتلك مقدرات كبيرة فى الدراما والكوميديا وهو من الممثلين السودانيين القلائل الذين لا يتكلفون ولا يكلفتون العمل الدرامى
تحية لهذا الفنان القادم وهو يمتعنا بكل ما هو جميل رغم إحباطات الوحدة والإنفصال
هشام شيخ الدين
| |
|
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: عليش)
|
علاقتى بفن المسرح السودانى والدراما السودانيه ..
زى علاقتى بالمريخ و (..)
( يموت الهوى منى اذ لاقيتها ,, و يحيا اذا فارقتها فيعود)
..
عوض فنان كبير ..
يصنع الابتسامه بتلقائيه محببه ..
| Quote: بعد برودواي باقي ينا نمشي الحج والاردن للبروستاتا وننتظر الموت |
حلوه يا عليش ..
وسلام للجميع وأولهم سيد البوست
| |
|
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: محمد حيدر المشرف)
|
أووووووووووووووووووووهـ دكتورنا ود المشرف..
شرفتنا شرف شديد والله..
Quote: علاقتى بفن المسرح السودانى والدراما السودانيه ..
زى علاقتى بالمريخ و (..)
( يموت الهوى منى اذ لاقيتها ,, و يحيا اذا فارقتها فيعود)
..
عوض فنان كبير ..
يصنع الابتسامه بتلقائيه محببه .. |
ياخي عوقتنا عدييييييل بالبيت بتاع جميل بن معمر دا..
كدي هاك السياق الواردة فيهو رائعته المشهورة؟
وقد تلتقي الأشتات بعد تفرق * وقد تدرك الحاجات وهي بعيد
إذا جئتها يوما من الدهر زائرا * تعرض منفوض اليدين صدود
يصد ويغضي عن هواي ويجتني * ذنوبا عليها إنه لعنود
فأصرمها خوفا كأني مجانب * ويغفل عنا مرة فعنود
ومن يعط في الدنيا قرينا كمثلها * فذلك في عيش الحياة رشيد
يموت الهوى مني إذا ما لقيتها * ويحيا إذا فارقتها فيعود
حاجة زي العسل والله..
أها نجي لشكسبير المجنون دا..
ياخي الراجل فنان وجميل وأي حاجة..لكن عاين ليهو..من قولة تيت قاعد يفكر في الحج وعمليات (العيون).. وانتظار البترول..
بعدين يا دكتور أتاريك صفوة؟؟
وأنا أقول الوجاهة دي من شنو؟؟
حبابك والله
| |
|
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: عوض شكسبير)
|
| Quote: انا طبعا فى هذا الموقف ماعندى كلام غير احبكم جدا جدا .. وتحديدا انت لانك ختيت فى رقبتى مسؤلية كبيرة .. الناس الدخلوا كلهم شكرا وانا اوعدكم انو .... احاول رغم هذا الاحباط القاتل .. شكرا حميما |
عاين يا عوض..لو ما حب الناس ليك يشكل عامل أساسي في نجاحك أخدها مني الآن طازجة على الهواء وعلى طريقة ربيع طه:
الشطارة براها ما بتصنع نجم ناجح..ونجاح النجم يعني جماهيريته..والجماهيرية يعني حب الناس..
بمعنى آخر: لو ما حب الناس ، أب كباس ما يوديك "برودواي".. ههههههههههههههه
نحن كذلك نحبك جداً جداً..وبطل الحركات بتاعة نحن في بداية طريقنا وشنو وشنو وشنو...
نتحدث هنا عن "المواعيد الكبيرة"...
فإلى الأمام..
| |
|
|
|
|
|
|
|
|
|
Re: عوض شكسبير..إنت فعلاً فنان كبير.. لا تتأخر بالله (Re: Mahmoud Mustafa Mahmoud)
|
اخوي محمود
بالجد انت فنان كبير
كونك تلفت انظار الناس ( الما شافو عوض او ما ركزوا عليهو)
عوض فنان طبيعي 100%
يمثل ويحكي ويتقمص الشخصيات باتقان ونجاح
تابعته في رمضان
في شكسبير شو
وفي مرات قناة الشروق
عوض فنان وحريف
وعدم ظهور عوض بفنه الكبير للناس
سببه ان التمثيل فريق كامل
ولازم يكون في الفريق اكثر من لاعب يجيد اللعب بحرفنة في الخانة البيلعب فيها
وده في الكورة مافي خليهو التمثيل
عوض لم يجد لاعبين مهرة يستطيعون ان ينجحوا كفريق واحد
لذا تجده مع نفسه
او مع واحد (ابجضوم) او اثنين
تلقائية عوض في الفن
هي من بدايات الاصدقاء المسرحية
والتي مازالت تقدم تابلوهات خد وهات في تناغم وهارموني عالي
تحس انك بينهم عندما يمثلون
فرق كبير يا محمود من ان يقوم الفنان بالتمثيل لك او التمثيل عليك
وعوض من الفنانين الذين يمثلون لنا الكثير والكثير
معا من اجل عوض
وعوض من اجل معاً
| |
|
|
|
|
|
|
| |
Mahmoud Mustafa Mahmoud
اساسي
حافظ كنجال
وليد محمد المبارك
tarig almakki
Rawia
حسن حماد محمد
عليش
نادر النور آدم
خالد عبد الله محمود
Abdelrahim Mansour
يازولyazoalيازول
محمد حيدر المشرف
جمال السنوسي
ياسر السر
فيس بوك
تويتر
انستقرام
يوتيوب
بنتيريست