|
|
 هجـير القريفـة
|
يا كيفى ما تمّ العِبـــَار ..
كارف الغُبَـــــار ..
قليّــة مزااااج ..
يومـاتى داااج
كايس دروباً أشرفه
زي حر هجير القريفه
ليكم شرف شوفى وشفاي
بيكم يروق البال غصِب ..
ترمح دمـــاى ..
تكسر قيودي المجحفه
إنتو الوفا..
وجنّة إلآهنا الوارفه
راحة رقاد قلبي البريد
عارف تمام مين إصطفي
يوماتى هايم فى العيون
يشرب حنانكم وما أكتفى
يشرق صباح عيداً جديد
يحرق جراح جسد الجفا
ويتم عِبار كيفى الخِرِب
ويلقي الدرب
ما كان ضِهِب ..
ما كان تِعِب ..
لو كان دروبكم بِعرِفه
آآآخ يا وطن ..
وصلت رسالتك بس كفى
وما ألطفه ..
واضحة البُعاد ما زيّفه
ياطِيِبة فى كل الخلوق
يا بسمة فى ساعة صفا
حضنك تمام ..
أطيب مقام
لى لهفة الزول البعيد
ما أظن حرام الشوق يفيض
حين يدلّهِم زمناً عنيد
الليل يفتِّق فى الهيام
والغربة تلسع والزحام
من غير كلام ..
حاجات تحيِّر.. لو نغِّير
فكرة السفر ال ب ل ي د
حاجات تحيِّر .. لو نغيِّر
حُجة الفجر الجديد
حاجات تحيِّر ..لو نطيِّر
بومة الزمن العنيد
من ها العقول
الواقفة فى خط الوصول
قابضة الذهول..
فى كيف تطول ..
خطوه وتقول ..
إنت الملاذ..
شرف العُزاز
الفى المصانع ..
والحقول
وطن الخليل ..
عازه البتول
أنت المديح ..
نار الضريح
هدى الرسول ..
هوى آآآ ولاد ..
لِمُّوا البعاد نقعد سوا
نبدا الـمُـراد
ندرس سوا درس الوطن
درس البلد ما زى مزاد
نفهم سوا كيميا المحن
ما تبقى زاد
نرسم سوا خط الزمن
خضرة وحصاد
جغرافيا من غير إنهزام
بالجد حرام
الخير هِنا .. عافيه وهَنا
وكل المنى ..
تأشيرة للغربة الحرام
الكل يطِش..
يدقش شرق
الكل يطِش..
يدقش غرب
كايس الفرح فى بلاد كُتُر
ضيعنا فى الوهم العمر ..
شفنا العذاب .. لُكنا الصبر
من غير نفكر فى الصبر
وافضل صبر ..
ليك يا بلد
ليك الشموخ ..
وإنت الأمّدْ
كيفن صمّدْ ..
كل الدهور
لا هزّ عزمك إحتراب
لاهدّ ساسك إختصام
دايماً تمام ..
رافع جباهك فى السما
عزه وجلال طول الأبد
ما شلت هم برقاً يفور
ما شلت هم هادى المطور
ما قلت غير خير الكلام
غتيتنا مابين المسام
علّمتنا أفضل علام
إنو الوطن .. وآآحد وبس
ليه الغرام ..
الإشتياق ..
الإحترام
والكل سوا..
مافى البِضُر كل الخلوق
غير الخصام .. الإنقسام ..
غير الهوان ..
الإنهزام.
فاروق أبوحوه
الأمارات – ليوا
28 أغسطس 2006م
|
|
  
|
|
|
|
|
|
|
 Re: هجـير القريفـة (Re: عبدالفتاح أبوشيمة)
|
Quote: حبيبنا الجميل الله يديك العافية
اسمح لي أخطرف شوية:
سودان جديد
وأنا عندي عيد
بتمنّاه من زمن الرشيد
لكني وا أسفاي
ما جالي عيد
ولا عدت أنا من جديد
واحسرتي هيّجت فيني البانجديد
والأركويت والنيل نخيل تنبت جديد
والوحدة أعلنت الوعيد
وأنا ما داير أعيد
قولي الزمان ذاك المجيد
سئمت على قولك يا لبيد
شن فايدة الدنيا أم وعيد
وقتين تشيل مِنّي النشيد
يا منقو ما بس كان تجود
ما تركب الراس العنيد
خليني أردد للنشيد
وارجع أقول الدنيا عيد
كان حيرجع الخليل بس من جديد
ويا عازة تبقى نغمة حلوة للنشيد
الغربة ما حارة وصعيبة يا وليد
بس شن نسو هوي يا وليد
أقسمنا بالقسم الغليظ قولة نعود
لكن أسف هل من جديد
بيقولوا سودانّا الجديد
ياخي رجّعونا محل بعيد
نعيش تخلف من جديد
بدل تقولوا لي الجديد
البفرق الأم والوليد
وبجيب كمان غُصّة نشيد
لا بيُزْدرد ولا ترجِّع تستفيد |
| |
|
|
|
|
|
|
|
|
|
Re: هجـير القريفـة (Re: إدريس محمد إبراهيم)
|
Quote: فاروق ...
أجمل الصباحات النديه ....
ياخي أنت زول كتّاب لامن غلط ... إلا ترمح دي براها قصيده ...
بالغت يااااخ ..... |
الصديق إدريس محمد إبراهيم..
لا فرق إن (رمحت) أو (مرحت) دماء أبناء السودان
فالوجهة واحده ..
والشوق لوطن
واحد.
الكتابه يقين القلب المشتاق للوطن..
نحمل تحت جلدنا همه ، وفي الدم عافيته التي نتمني دوماً.
أرانا زهور في الغربة العاصفة.
غربــة روح
وشوف مجروح.
زهور ..
محرومه ..
من النيل
و كيف بتفوح ؟
منو القال ليك
تفارق النيل.؟
من السهران طلبت النـوم
شكيت همك علي المهموم
يراعك في المسافه خليل
وأناتكـــ تهد الحيل
هذا هو الحال الذي يغني عن السؤال يا صديق.
الله يقوي الوطن يا إدريس
كل الإمتنان
| |
|
|
|
|
|
|
|
|
|
Re: هجـير القريفـة (Re: فاروق أبوحوه)
|
Quote: حاجات تحيِّر.. لو نغِّير
فكرة السفر ال ب ل ي د
حاجات تحيِّر .. لو نغيِّر
حُجة الفجر الجديد
حاجات تحيِّر ..لو نطيِّر
بومة الزمن العنيد
من ها العقول
الواقفة فى خط الوصول |
يا سلام عليك يا ابوحوه ياخي
عدلت لي مزاجي .... يا جميل
دا الكلام و اللا بلاش
الله يديك العافية و يخدر قلمك اكتر و اكتر
| |
|
|
|
|
|
|
| |
فاروق أبوحوه
إدريس محمد إبراهيم
عبدالفتاح أبوشيمة
ناصر احمد الامين
فيس بوك
تويتر
انستقرام
يوتيوب
بنتيريست