|
|
 الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟
|
بمناسبة إنو الليلة عيد ميلادي الكم وأربعيناوي..للضمان كدا بعد الخمسة وأربعين
أها قمت الليلة من صباح الرحمن ..
زانة في راسي "بدري من عمرك"...
وبصوت الراحل أحمد ربشة كمان..
قدر ما ساسقت فوقها.. غلبتني كلو كلو..
ياخي دي أصعب أغنية في الدنيا..
من حيث أي حاجة..
إني آمنت بالله..
غايتو أنا لا قدرت أحفظ الكلمات كويس.. لا كمان قدرت أحفظ اللازمات بتاعتها..
لا قدرت أعزفها كويس.. الحكاية شنو؟؟
أقنع من خيراً فيها يعني؟؟
كدي هاكم ..أقبلوها مني في خانة جهد المقل..
طيب.. نجي للجلاكين بتاعين الزمن الجميل.. ناس عماد عبد الله والطيب بشير وديل..العالم الحضرت الغنا الصاح
أوعكم واحد يجيني (حانف وشو) ويقول لي ياخ خربتها ولا ياخ عفصتها..
أنا الأغنية دي داير أحفظها من قبل تلاتين سنة تقريباً.. .. ليوم الليلة قاعد أحاحي فيها
الله يرحمك يا ربشة ياخي ..
وربنا يطول عمرك يا حلنقي..
وربنا يطول عمرك ياالتاج مكي..
|
|
  
|
|
|
|
|
|
|
|
Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ (Re: خدر)
|
عاين يا طارق..
Quote: الله يجازي شيطانك انت دا
جميلة يا محمود والله
انا فاتح صفحة بي صوتك و صفحة تانية بتابع فيها المنبر
شكرا لتجميل صباحي يل فنان |
هسي دي نظام شنو يعني؟؟ نظام إنو الشرك ما قبض؟؟
ولا نظام إنك غتيت وما عايز تجدعها لينا ؟؟ خلاص أديني ليها في الإيميل درس خصوصي..
شكراً ليك كتير والله..
وجمعتك مباركة.. يا أجمل من يجمل صفحات المنبر لحناً وصوتاً شجياً..وتعليقاً رشيقاً..
امبارح قطعنا فيك أنا وواحد صاحبي.. قال الصاحب: بالمناسبة..قاعد تقرا مداخلات
طارق أبو عبيدة؟؟ قلت ليهو قاعد أخرم ليها عديل..وأفتشها .. وأتعاطاها..وأتخارج..
شايف المحبة دي كيفنها؟؟
يلا ..أمرق..وخلي الغتاتات دي..
| |
|
|
|
|
|
|
|
|
|
Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ (Re: Mahmoud Mustafa Mahmoud)
|
قلتَ لي عيد الميلاد بِحرِرُوا أهلو وكدا ...... قلت أحسن تغني لي رويحتك براااك ..... حِلوة الفكرة أساساً .... تعرف ليه، لأنو الإنسان الما بعرف يحتفي بي نفسو، ما بتكون عندو القُدرة إنو يحتفي بالآخرين، واللهُ أعلَم
ويتخيّل لي الفرح دا زي الزاد، لو ما كفّى ناس البيت (شخصك الجميل)، بِحْرَمْ على الجيران
(بدري من عمرك) أغنية مِن طِراز خاص، والدليل هو عدد الجميلين الغنوها
الحلنقي كان فيها أرقّ مِن رقيق، قال شنو: يا فرايحي اللون يا أبو عيون أحباب .... بالله شوف جِنس الوصِف دا ......!!!!!!
والتاج مكي كأنو كان قاعد مع الحلنقي لحظة بلحظة وهو بكتب في كلامو السَّمِح دا ..... لحن كدا براهو مِن بين ألحان التاج مكي
أنا بهديك في عيد ميلادك "طوق النُّجوم": كُلَّ السّنة ..... تلقاكَ خاتياك الهُموم
أفتكر القصيدة عندك
وياخ عقبال مليون فرح ومليونين أغاني وتلاته ألحان وأربعة أصحاب وأحباب و .....
| |
|
|
|
|
|
|
|
|
 Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ (Re: عصام عيسى رجب)
|
Quote: محمود العربي بجدة يهديها للأخ الشاعر الرقيق فاروق أبوحوه بمناسبة عيد ميلاده برضو ..
حاجة عجيبة فعلاً.. |
حاجه غريبه يا محمود فعلاً ..
ياخي أخوك في (صمة إيميلو) يلقي (خردمية) إيميل ..
كل فحواها إنو عيد ميلادك هو 21/10 وكل سنه وإنت طيب.وووو
وحاتك يا محمود دا شيتاً ما عندنا بيه عرفه..غايتو عشنا وشفنا..
التاريخ دا أنا شاك في الناس البكتبوا شهادات الميلاد دي
الله يقطع محنهم لو قاعدين يجبروا الأيام 
المهم يا صديقي كل سنه وإنت طيب وربنا يحقق أمانيك كلها يارب.
هذا في شأن عيد ميلادنا وميلادكم وبلا شك زكري ثورة أكتوبر المجيده..
أما في شأن الأغنيه يا حبيب أخوك يومين بفتح البوست وبسرح مع الأغنيه
في نفسي أقول : يا عمك كدي نستمتع وبعدين العربي دا بنجيهو للكتابه الملحوقه.
(امانةً في عمري) إستمتعت بيها جدا يا مسنوح.
في (ظمتي) داعيتك وقلت الجنا دا غير (يبحت) في الحاجات (البتوِّك) الروح دي ما عندو شغله تب؟
ياخي جننت الغنا بيك يا عربي ، ممكن أهدي؟أهدي الأغنيه لكل الذين يحتفلون بأكتوبرالمجيد ولكل الوطن فيك.
بالمناسبه أنا مرات مرات عندي جن بقوم عليّ خصوصاً عندما (يحمِّر) الحرف عينو الشمال في أختها اليمين. .
(الإتجاهات هنا ليس لها علاقه بالسياسه) أوعك تمشي بعيد يا مسخوت..
ذات مساء قال الحرف:
العمر ..
ما هو السنين
والدنيا ما ياها الأيام
العمر إحساس نعيشوا
لما نفرح ببقي تاااااام
والسنين البينا مرّت
مهما تطوَل تبقي (عام).
--------------
شفت أخوك لما يحس بدبيب الأيام في الروح يدندن بالأبيات أعلاه تجاسراً علي العمر (إبن الذين) هذا.
غايتو لو (بتعافره) بنرسله ليك في الخاص. (شوته) يا عمك خلينا نحس بأننا (لسه نحن شباب يا أبو عود هوّاب)
| |
|
|
|
|
|
|
|
|
|
Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ (Re: فاروق أبوحوه)
|
Quote: العمر ..
ما هو السنين
والدنيا ما ياها الأيام
العمر إحساس نعيشوا
لما نفرح ببقي تاااااام
والسنين البينا مرّت
مهما تطوَل تبقي (عام). |
صح لسانك يا عربي..
كل سنة وإنت طيب..(والله بقول فيها وخجلان منها يعلم الله).. الله يقطع أبو الفيسبوك ياخ..
لوووووووووووووول....
المهم.. بالنسبة للمعافرة وكدا..
إنت أديني ليها في الإيميل ولا في الوريد ولا شتتها لي في الأكسجين دا..
أقول ليك حاجة؟؟ أربطها في غيمة خليها تغشانا بي جاي وتصب فوق رويساتنا ديل..
فحرفك يجري فينا مجرى الموية في أرض تعبر عن شكرها بريحة الدعاش..
أرح آآرفيق..
| |
|
|
|
|
|
|
|
|
|
Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ (Re: Mahmoud Mustafa Mahmoud)
|
أها يا عربي جاتك وأجرنا علي الله
العمر ما هو السنين
والدنيا ما ياها الأيام
العمر إحساس نعيشو
لما نفرح ببقي تـام
و السنين البينا مرت
مهما طالت تبقي عام
*** ***
الفرح جوانا عايش
إلا نحن كيف نحِّسو ؟
والحزن لو يبقي طايش
بيني بينك ليه ندِسو ؟
*** ***
المراكب مهما يإسو
في النهايه لازم يرسو
و الحبايب ممكن يقسو
بس وحاتك ما بينسو
*** ***
العمر لحظات تجلِّي
بين بشاشه وإبتسامه
لما تفرح فيك يعلِّي
عافية الروح والوسامه
*** ***
الحزن كتّال تملِّي
للنهارات السلامه
ليك يودِّر وفيك يخلِّي
نكسة الروح وانهزامه
| |
|
|
|
|
|
|
|
|
|
Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ (Re: عصام عيسى رجب)
|
الحبيب عصام..
Quote: أنا بهديك في عيد ميلادك "طوق النُّجوم": كُلَّ السّنة ..... تلقاكَ خاتياك الهُموم
أفتكر القصيدة عندك |
مقبولة الهدية وبالحيل عندي..
من زمان غايتو ما احتفلنا بعيد ميلاد..وحسب الشفناهو وما توفر لنا من ثقافات جديدة..
شفنا إنو الناس بيهدوهم حاجات كدا..ساعة..موبايل..لابتوب...إلخ..
وكم شمعة كدا..وكيكة وكم أمنية جميلة ..
لكن زول يهدوا ليهو طوق نجوم حتة واحدة ... دي شوية صعبة..ما عندنا ليهو رقبة عديل يا الحبيب..
والله عاد ما قصرت يا صاحبي... نجيك في السمح إن شاء الله..
| |
|
|
|
|
|
|
|
|
 Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ (Re: عصام عيسى رجب)
|
| Quote: مُش بتحِس برعشة شجَن رهيييفة كِدا لما تسمع بعض الأغاني والمزازيق ....؟! تحٍس إنو ما فيها حاجة لو دمعة صغيرونة كِدا إدحرجت من عينك، غصب عنك أو غصب عنك ..... ولو دمعة خفيّة تنزل بس جواك وما عندها شغلة بعيونك |
طيب نقول عملنا الكوتيشن دا...
أها
الواحد يقعد يتلفت..يمين ..شمال..يصنقع..يدنقر.. عييييييييييك.. ما في حاجة..
(ملفك)...(عدِّلْ)...(رد)..بس كدا؟؟ هذا كل ما هنالك؟؟
طيب أجيب من وين تعليقاً يليق؟؟
غايتو الإحساس حسيتو..والدمعة بالحيل بعرفها..
وأكثر منهما..أعرف قدر شنو عصام عيسى زول جميل..
معرفة بلغت ربع قرن من الزمان بالتمام والكمال..
أدامها الله .. وأبقاك جمالاً لا يفنى..
| |
|
|
|
|
|
|
|
|
|
Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ (Re: عمران حسن صالح)
|
يا جماعة عن إذنكم أرد لعمران دا ياخ.. بعدين الطيب بشير وطارق ديل أصحابي وملحوقين..
عمران ياااااااااا دفعة ياخي....حبابك والله..وجيد بالشوفة..
ما تتعقد من (دفعة) دي...حيث أننا (تبرضبنا) في يوم واحد .. ومن يومها لم تجمعنا أي مداخلة ..
البركة في الأغنية الكاسرة فيك ضلعة دي..بينما كسرت فيني قفص صدري كامل..كش كش كش كش..
أقول ليك من تلاتين سنة ياخي.. أحححححححححححححححححح
ثم إنه إنت فنان ومتذوق من فصيلة آخذة في الانقراض بكل أسف..
طالما بتعرف صديق رحمة.. وطالما دي اختياراتك.. فسعادتي بوجودك هنا..
لا يضاهيها إلا سعادتي الحقيقة بإجازتك لصوتي ..وهي شهادة تسعدني بل وأفتخر بها..
صديق رحمة ما كان كورس في أول حفل بورداب جدة.. والدليل أهو..
يظهر في الصورة من أقصى اليمين وجه الأخ المستشار عصام دهب ثم البشوش صديق رحمة النور ثم الصحفي تاج السر وشخص آخر
غالباً يكون أنا..
بالله الصورة دي ما يجي زول يستعملها أي استعمالات ما ياها ... سمح؟؟
مشكور يا عمران ياخي على إثراء البراح دا بالمواد الدسمة والنادرة المخضرة..
ونجيك في السمح إن شاء الله
| |
|
|
|
|
|
|
|
|
|
Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ (Re: الطيب بشير)
|
عاينو الفن دا...
Quote: بالأمس
دخلت فرحة و.. أخذت نغمة و خرجت
بشيء من الـ(ربشة)
جاءت اليوم..
قالت: يا فرايحي اللون..
قال: بدري من عمرك
قالت: إنت لسـّـة شباب..
فقلنا: هل من مزيد؟ |
الطيب أخوي..
عاد المِتلَكْ إتَّ..بكوس (للحديس)؟؟
ماك فنان وشاعر..
أنا قالولك ناغمتك لجنس (حديسك) دا؟؟
أنا دايرك تقلب معاي شجونك حول الزمن داك ياخ..
زمن التريفيرا والكاروهات والخنفس والخلال الأنيق..
يا حليلنا يا الطيب ياخ.. لكن طبعاً (إنت لسه شباب بدري)..
محبتي..شيلها كلها وما تكلم زول..
| |
|
|
|
|
|
|
|
|
|
Re: الجوهري..طارق أبوعبيدة..حمزة سليمان..الله لا كسب شيطانكم..دي قاعدين تغنوها كيف دي؟؟ (Re: عبد الدائم سيد أحمد)
|
Quote: مليون شمعة لبتنا الحلوة متاب
ربنا يخليها ويخلى ليك الاولاد وامهم ... |
حبيبنا عبد الدائم أبو عناب البريدوها بناتي..
كتر خيرك وتهنئتك الرقيقة وصلت لمتاب والأسرة..
طيب نجي للكلام البعد كدا..
Quote: فى اطار احتفالنا بيك يا محمود انا عاوز ادخل معاك من اليوم فى تحدى
والحكم للجمهور وللجنة السنوسى ، كمال الرفاعى قيقراوى ومجدى |
تحدي عديل يا عبد الدائم؟؟ هسي خلقتي دي خلقة زول فيهو حيل لتحدي؟؟
وكمان من اليوم؟؟
بعدين عاين اللجنة بتاعتك دي... كلهم أصحابك..
غايتو للضمان كدا..التحكيم فاشل من هسي ياخوي..
| Quote: حدد الزمن والمكان وانا جاهز |
إنت حدد الزمن والمكان والموضوع وغير اللجنة..وأنا جاهز
مشتاقين ياخ..
| |
|
|
|
|
|
|
| |
Mahmoud Mustafa Mahmoud
جمال السنوسي
كمال ادريس
لؤى
خدر
فاروق أبوحوه
الطيب بشير
عمران حسن صالح
عبد الدائم سيد أحمد
فيس بوك
تويتر
انستقرام
يوتيوب
بنتيريست