|
|
 والله حرام يا الطيب وداعة " نموذج لفنان راااااااااح " !!
|
تموت حاجات تحيركـ
مرات بقول ليه ؟؟ عشان اتولدت هنا !!
موهبوب يروح ساااااااااي كده
ده لو في حته تانية " يربوهو " لامن يكبر ويشتهر أكتر
تربية تكبِر " البيسوي " فيهو
كان غنا ولا سياسة ولا علم ولا كوره !!
الطيب وداعة شاب شايقي ظهر واختفى رغم الموهبة الظاهرة والمحتاجة لرعاية
.................
مرات كتيرة بتلقى نفسكـ في دندنة لأغنية لا تدري من وين ( نكتَــــها )
وده الحصل لى مساي ده ، وجريت لى حبينا " قول قول " وقلت ليهو
ولا شوفتن تبل الشوق ولا رداً يطمن ويطلع لى شقي الحال ده
الطيب وداعة الفنَــــــــان مشى وين ؟؟
شاركوني السمع والراي
الراي كان في أداء الطيب وداعة ؟؟
ولا : ليه الحاجات عندنا بتموت !!؟؟
http://www.youtube.com/watch?v=uXJ2APYznZg
ومتأسف لمشوار اليويتوب لأن الفيديو ممنوع من النسخ
لو لقاهو زائر ارجو انو يجبوا لينا هنا على أن يعمل مباشرةً مع فتح البوست
رجاء
|
|
  
|
|
|
|
|
|
|
|
Re: والله حرام يا الطيب وداعة " نموذج لفنان راااااااااح " !! (Re: عمران حسن صالح)
|
أخونا عمران
الطيب وداعة واحد من أجمل الأصوات التي سمعتها
وقد ساكننا الرجل في حلتنا قي الديم لسنين عددا
شايقي كامل الدسم ، رغم عيشتهم في العاصمة
لكن طيبة القرية ، وأخلاق أهلها هي السمة المميزة له ولأهله
تحلف تقول نزلوا هسسسسسي من البص ..
زول غنّاي جد ، أبهجنا وأحال كثير من ليالينا الى طرب أصيل
يجّوّد الغنا كما يجب ، صوت قوي وزي الصاقعة
والله الزول ده لو اهتم شوية بقصة الغنا دي زول يلحقوا مافي..
الطيب زاهد في كل شئ ، ومشوطن ، الله يهديه..
رحل وأهله من الديم ، وأظنهم سكنوا في الكلاكلة..
تحية لك يا عمران ، وعبرك لأخونا الطيب ولأسرته الكريمة..
| |
|
|
|
|
|
|
|
|
|
Re: والله حرام يا الطيب وداعة " نموذج لفنان راااااااااح " !! (Re: Salah Abdulla)
|
Quote: الطيب وداعة واحد من أجمل الأصوات التي سمعتها
وقد ساكننا الرجل في حلتنا قي الديم لسنين عددا
شايقي كامل الدسم ، رغم عيشتهم في العاصمة
لكن طيبة القرية ، وأخلاق أهلها هي السمة المميزة له ولأهله
تحلف تقول نزلوا هسسسسسي من البص ..
زول غنّاي جد ، أبهجنا وأحال كثير من ليالينا الى طرب أصيل
يجّوّد الغنا كما يجب ، صوت قوي وزي الصاقعة
والله الزول ده لو اهتم شوية بقصة الغنا دي زول يلحقوا مافي..
الطيب زاهد في كل شئ ، ومشوطن ، الله يهديه.. |
أها يا صلاح مشوطن دي باقي لي هي سبب البلا كلو الخلاهو يروح ويتخندق وراء الجن
البسوي فيهو ده ، الولد كمَل الغنا بي صوت زي ما قلت زي الصاقعة وراح مننا ساي دون ان يجد اهتمام .
تسلم يا صلاح يا فنان
| |
|
|
|
|
|
|
|
|
|
Re: والله حرام يا الطيب وداعة " نموذج لفنان راااااااااح " !! (Re: عمران حسن صالح)
|
أمانة ما اتلومن يا عمران .. يا الكعب .
خلينا من كعوبيتك هسه , قالوا كراع البقر جيابة ..
و ما الخرطوم دي !! .. انا قاااااعد حارسا . النشوف آخرتك .
خلينا هسه في الزول النصيبة الطيب وداعة ده ..
و دي الغنوة دي التي تسيل البني آدم من جوه .
عندي شريط للنعام .. تتصدرو هذه النصيبة . و يا عمران ما حصل سمعتها إلا و أصابني سهم الحنين الحزين ..
حنين لشنو ما تعرف و حزن بيجي من وين الله أعلم .
و أشهد إنه هذا الطيب زادها شجن و طلاوة .
فلا إله إلا الله ..
هو الحرام الحاصل علينا شوية ؟ .. ولّلا الراح قليل يا عمران ؟؟
| |
|
|
|
|
|
|
|
|
|
Re: والله حرام يا الطيب وداعة " نموذج لفنان راااااااااح " !! (Re: عبدالمجيد الكونت)
|
عمران وكل الأحباب إزيكم .. وإنشالله طيبين ..!!
الطيب وداعة أنا في الحسبة خلو عديل ... ولا يخاطبني إلا بالخال ...
الطيب يمتلك موهبة ما عادية .. ولكنه ظلم نفسه كثيراً ...
هو الآن متزوج الحمد لله ومستقر ..
ما زال موجود في الساحة ولكنه مقل جداً .. ومطلوب بكثرة .. ولكنه "كسلان" جداً .. وكما قال أحدهم زاهد في كل شيئ ..
إني أشهد أن الطيب لم يظلمه أحد ولكنه ظلم نفسه .. ربنا يديه الصحة والعافية ..
شقيقه الأصغر "التاج وداعة" لا يقل عنه موهبة .. ولكنه ليس مهتماً كثيراً حتى الآن بمسألة الغناء لدرجة الإحتراف ...
توفي والده قبل ثلاثة أشهر تقريباً .. له الرحمة والمغفرة
تحياتي
| |
|
|
|
|
|
|
|
|
|
Re: والله حرام يا الطيب وداعة " نموذج لفنان راااااااااح " !! (Re: Emad Abdulla)
|
عماد يا صاحبي
والله أيام ممحوقة ، ضاعت بين انتظار شنطتي في مطار السجم حقنا ، وبين السوق المركزي بحري ونادي ما عارف شنو كدي لزوم الإحتفال بذهاب آخر الشقيقات إلى دار مثواها الأخير  الحاج قال لي بعد ده بكبِر حقتي والزارعني غيرو اليجي يقلعني بناتو الخمسة كِملن يا عمده ، بيني وبينكـ أنا زاتي بكبِر سجارتي .
أفرحني جداً معرفتكم بالطيب وداعة يا عماد
وشهادتكـ إنت وصلاح ورتني إنو ما براي الكنت بسمع الزول ده كويس
وطلعتو مني خوفة إنو البوست يبور بي سبب عدم معرفة الناس لموهبة مثل الطيب وداعة ...
لكـ كل الشكر والتقدير
والخرتوم ياها مطارنا كانت جابت كتَاحة ولا دبايب
ويانا الحا نقابلكـ بعون الله
| |
|
|
|
|
|
|
|
|
|
Re: والله حرام يا الطيب وداعة " نموذج لفنان راااااااااح " !! (Re: عمران حسن صالح)
|
ياعمران خلعتنى والله انا قايل الطيب وداعة المدرب الخلوق اللى دربنا فى الاملاك بحرى فى يوم من الايام.. الله يديهو الصحة والعافية .
يا عابدون
تصور في الاول انا قلت يا ربي ده الطيب وداعه لاعب التحرير بحري المعروف
لكن دا راجل كبير علي الغنا اقصد من ناحية العمر
لكن الحمد لله بان الرجل طلع واحد تاني
وفنان حقيقي طالما اثني عليه اخوي عماد وصلاح عبدالله
وانت اخي عمران
ساسمع التسجيل حالما ارجع البيت
| |
|
|
|
|
|
|
| |
عمران حسن صالح
Emad Abdulla
صديق عبد الجبار
عابدون محمد عابدون
يحى الشريف
فيس بوك
تويتر
انستقرام
يوتيوب
بنتيريست