لو قدرتَّ غيب عليَّ وأبقى بي وصلك ضنين يـــــا حياتي ونور عنيّا ويـــن تروح من حبي ويـــــــن ؟
ولـــحين ميــــسرة
دعوة لكل عشاقة وعشاق هام في الوله بعد أن ضاع منه الحبيب / الحبيبة ذهب وبلا وتركه القلب يأمل .. هل للعودة من سبيل ولم يعد في الميعاد المنتظر وظلَّ واقف بحساسه وهل بعد الحب حب تاني ؟؟؟ ( عوض )
لكل من أخفق في قصة حب جميل سعد به وصار الحُلم كبير خرج كما دخل الفؤاد الحــب الكبير وما أوجع خروج السهم من الرمية والحب يصرع صناديد الرجال حائط لسكب الدموع ودموع الرجال ( مقطعة في الأكباد ) ودموع النساء تسيل وتبل الخدين ولا لوم
النسيم الماري هادي فيهو من أشواقي نفحة والقمر النورو بادي فيهو من ضي حبي لمحة
وضاحة لك التحية يمزجها التقدير مرورك يسعدنا وتزيد الفرحة بالمشاركة في هذا البساط متكأ لسكب العبرات وآهات القلوب لكل من جرح قلبة ليجد القليل من بلسم وقليل مراهم من العيادة
كيف طا وعك قلبك تهد كل البنينا سوا وتتركني !! زي مريكب لافحا التيار لكن صحيح قالوا البعيش الدنيا ياما تشوفوا تشقيهو بي فرقة عزيز
والقليب في بعدك أسير
كل زهور زيك عبيرا فايحا بي الشوق والهيام كل عطور أنت بتريدا شايلا ليك مني السلام وأنا راجيك بي الاماني بي كل أشواقي وحناني لو بعد طيفك عليَّ بطولو بي الفن والمعاني
شعرك الليل الطويل بيحكي ليك سهدي في غيابك ووجهك الناير جميل نورو زي أملي في إيابك أنا برضاهو السهر لو انت حسنك بي أمر ليلي بستناك تهل عليَّ يا أجمل قمر
12-29-2011, 10:28 PM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
الخفيف دمو التقيل وزنو الراسي عقلو يا الأبيض ضميرك hogy vagy is mi usag محمد حيدر سعيد جداً بمروك وقدحك ملئ ما جيتني فاضي زي ناس أسامة ونسي وديع ................................... .أسمعني قول لي الواحد بنزل الفيديو كدي كيف ما تستغرب أخوك قاعد لي تحت شدرة في شندي بس عندي لابتوب ألفت لي بطارية بتقعد 23 يوم وصف لي كيف ؟؟؟
12-30-2011, 08:07 AM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
سلام اهل داراً تملي عامر وتكرمو الضيف سلام الراسي طبعو ود الرجال وعفيف سلام يا عشاري المغرق المنشري فوق القيف أدخل حبابك صاحب الفكر والكيف سلامي وتحياتي ود القرشي تحياتي ومودتي وجودك في إنجمامتنا أسعدنا ويسعدنا
لما نكتب شقانا بأنفسنا ونبهت معاني الذي نجهد القلوب والأحاسيس المشاعر ليسعدنا يعود يشقينا نترك النعيم ونتلذذ نعشق حياة الجحيم ونرمي كل همومنا على القدر !!!
أديتك القلب المعذب وقلت لي ألمو بتزيلو قلت : هنا مهده في رموش أعيني
واقسمت تبقى زادو يقتات من معين حنانك وتبقى أملو في الليالي القاسي طولا وفي غمرة حبنا الجميل وننهل من الحنان صباح اً ومساء كنت غارس سكينة مسمومة في أضلعي ....
في نهاية لومي ليك كنتَّ بطمع تاني ترجع كنتَّ راجي الدنيا تبسم لينا في أفراحها تجمع مـــا أنت الزول المن عرفتو طرفي مـــا أظن مرة دمّع
ـــا شمس المشارق والمغارب وضـــاحة يسلم فاهك وقلمك كلمات تسطر بماء الذهب أحس انها خرجت من أعماق مشاعرك الجميلة يحمل كل حرف منها آها وآنات قلب مفعم بالحنان والمودة حاولي ان تخرجي كل جميل في قلبك الجميل وأخطي دريب دراب ودشيقوق المسخوت مرمي الله تسلمي
12-30-2011, 03:39 PM
وضاحة وضاحة
تاريخ التسجيل: 01-16-2005
مجموع المشاركات: 9116
نتمنى عودة سماح وكل الاحباب حتى يجتمع الشمل المسنوح بكون بحضر للسنة الجديدة الما شافو في البردانة بس قولي لي الما شوفتو في بيت ابوك بهجمك نستحملو العرريب بي علاته شكلو عليك الله شكلو كدي مــا غقير باب في مستشفى وكمان لئيم مابخلي مراة تدخل ههههههههههههههههههههه خليك قريبة دوما من الإنجمامة لكي يعود الجمع ونسعد بها زي زمان ونعيد سيرتها الأولى مودتي يا بدر أهل
12-30-2011, 05:53 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
شكيتا على الله الامها انجليزية وابوها سوداني وكمان تترنم بالطابق البوخة القام نداهو يهتف
حباب المسنوح .. المسخوت .. دابي الرجيمة .. وما بحوي علي البهيمة من زمان مشركين ليك وبي قلوبية القمري أبــ طوق ونغني ليك القديل القديل يا أبو حوا القديل القديل ريشو يراري القديل القديل تعال بي غادي القديل القديل لا تضرب الوادي رك تعال يا القديل عيشي مو حرام حلال
لآمن تقع في الشرك رب وضــاحة إنس وفي الانس إنسانه تحجي الصديق وتقيف مع أخوانه قداميّه للواجب سريع تتب حفيانه اها شن قولك فيها أخت أخوانه
سماح جايا قريب أمس اتصلت بيها
12-30-2011, 09:23 PM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
حسن وجمال صوت ابداع في الاداء حلاوة الكلمة وريدنا ليك يا جميل كل هذا فعل ما فعل وحرك مشاعرنا التي رخم فوقها الحزن والاسى والألم خلي يزيد في هجرانه وصار الحزن السهاد نديم
12-30-2011, 09:56 PM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
السلام عليكم ورحمة الله وبركاته انجمامتك ياود المنسي جات في وكتها الكل ضايق ومخنوق لو سمحت كتر من الهبابيات (جمع هبابي) والله نحن راقدين قش من تعب الزايله وكمان كتر من نمات اهلنا الطيبن معليش كترت الطلبات الا عشمانه يالعشا خير
12-31-2011, 05:21 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
حباب ومليون حباب أهلاً أهلنا الجونّا حباب بت التوم منى الفي فرنسا سكونا وداك الزمان أبعدك والغربة ما مضونة أسعليني أنا بي غربتي روحي تب ممكونة
أهلين وحبابك يا منى بين أهلك وأحبابك تشيلك في إنجمامتنا رموشنا قبل المطرح وفي إنجمامتنا مجدعين عناقريب الهبابي لي حلاة الونسة والقعد نصفي النفوس وكلو بهون. بينا الكلمة الطيبة والبسمة حت لوكان أروحنا بي الزعل ممكون تحياتي ومودتي أبقي بينا ركن من اركان الإنجمامة نسعد بي طلتك وزيارتك تهني بكانا
12-31-2011, 08:31 AM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
حار بي الحيل فراق قلبين إرتبطا برابط عميق لا اسميه حــب بل مودة متينة خلاياها في تلقائية تجدد شئ سامي نحسه ونراه في أفعالنا بتلقائية لا نتعمدها كدي تحدث وتسعدنا لا شك في يقيننا وايماننا بقضاء الله وقدره ولا نسأل الله رد القضاء ولكن نسأله اللطف فيه أن يعود الحبيب وما أجمل العودة عاد اكيد أفرح
أديتو ريدي الجوا كلّو لغيرو مــا فضلت باقي هو الوحيد الإستطفيتو كنت قايلو شريك حياتي حبيتو من غير خيانة أخر جزايّا جرح فؤادي تعاـــــو شوفو الكنتَّ راجي أربع سنين صادق في ريدو كان أملي بيهو أنال مرادي
كان ذنبي ايه؟ تقصد عذابي تحرمني من لحظة لِقانا وتهون عليك عُشرة سنيني تنساني يا خائن الأمانة غرقت في حنانّك وحييت عشانك ما كان تسيبني وتمشي غادي تعالوا شوفو الكنتَ راجي حليل حبيبي الكنتَّ راجي أنا بالسنين صادق في ريدو كان أملي بيهو أنال مُرادي أمشي في الطريق الأنتَّ عايزو مــادام أبيت قلبي اللِرادك بتمنى لِيك كُل السعادة إن شاء الله تلقى الفي مُرادك أنعم بحالك .. ولو شفتَّ حالي لاحولا مــن شدة سُهادي
12-31-2011, 10:23 AM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
تتعدد الأسباب والموت واحد تتعدد الأمراض ... ومرض القلوب ( بعد أن تفارق من أحبت ) القلبي أوجع بما يسبه من من مرض عضوي وتجتمع معاً ربنا يحميكم من مرض الفراق والبين والبين أوجع
قال ودالشوبلي
قال مرضان هواك لشِفاهو مافي طريقة ف ي كبدو الحِراب وفي جوفّو باقيا حريقة قط مــلي عِلاج من غير يقرطع ريقّا وللا يمددو ويمسحو بي عِريقا ي
قرطع : يشرب بإحداث صوت في بلع السائل ( ماء أو نحوه )
الريق . ما يرطب الفم من لعاب وما خرج فهو لعاب وهو زائد عريقا : العرق هو عمل العمالي ( الفقير البكتب المحايا )
12-31-2011, 10:32 AM
ismeil abbas ismeil abbas
تاريخ التسجيل: 02-17-2007
مجموع المشاركات: 10789
ل أنتَّ الجمال وكل الجمال سماحة معشرك وحسن خُلقك ونبل مشاعرك مرات يزيد حُسن اللقاء المحيط ومكان الملتقى ألتقينا في ظل جمال دوحة لشخص جميلة روحه فأعطت لقانا طعم خاص ربنا يديم المودة والاخاء الطبيعي سعدت بالأنس معاك يومها الذي سبقته معرفة من خلال حرفك الذي يبعث الدفئ بقراءته فلك مني كل المودة والخوة الصادقة يا أسماعيل عباس فعلاً رجعت من بلد الحُنان وعسسسسل أهلنا الطيبين الصابرين علي المرين مرارة الوضع الراهن وقسوة الطبيعة حولهم من كتاحة وحر وبرد بدخل في العضام لما تهب في أماسيهم ابقى بيننا يا جميل نسعد بوجودك ودمت أخ عزيز أسماعيل عباس
12-31-2011, 04:41 PM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
أهداء لمنى التوم من ربوع بلادنا عرضان .. أو ابـــ عروض
وهو الشخص أن زاره أحد ما بطلع من بيتو بدون ما يقدم لي شئ ثمين لذا دوما يعطي وكريم نسمة من البلاد في أخر ليلة من سنة 2011 تطربك فأقبليها منا أختي الكريمة منى التوم إبراهيم
عرضان يا يمّا السيرة لي العرضان يا يما أقابل العوجات أخوي زول حُوبات من يوم أبويا المات أخوي عشا البايتات
أرباب بسد الدين في يوم ماسوا الشين ماعندو كِلمتين في الجد بيملا العين
مابقطع الأرحام ودناس عزاز وكرام لو غدرت الايام أخوي أسد ضِرغام سآلاك يا كريم في لحظة وحين إنجح دنيا ودين وأكسب رضى الوالدين
12-31-2011, 04:48 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
كــــل سنة وأنتم طيبين سنة جديدة فيها نصر للاسلام وأظهار كلمة الحــــق سنة جديدة بالخير علي أهلنا الطيبين تنقشع من أعينهم سحابة الحزن والظروف الصعبة فرح خير عمار إكتفاء للناس الطيبة
الكادا الجوع اللاحسا الكوع الخيلهم نفّن الناس الحادة علي المــا مات الحي ومكفّن
تحياتي ومودتي للجمع العامر في إنجمامتنا
12-31-2011, 07:14 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: كــــل سنة وأنتم طيبين سنة جديدة فيها نصر للاسلام وأظهار كلمة الحــــق سنة جديدة بالخير علي أهلنا الطيبين تنقشع من أعينهم سحابة الحزن والظروف الصعبة فرح خير عمار إكتفاء للناس الطيبة
الكادا الجوع اللاحسا الكوع الخيلهم نفّن الناس الحادة علي المــا مات الحي ومكفّن
تحياتي ومودتي للجمع العامر في إنجمامتنا
كل عام والجميع بخير مع إطلالة العام الجديد .... وعينى باردة فقد عادت الإنجمامة حافلة بأعمدتها ... وربنا يديم الود
قطعاً راجعين
12-31-2011, 10:31 PM
mona altom mona altom
تاريخ التسجيل: 10-20-2010
مجموع المشاركات: 536
حباب الكلس اللي ضيوفو في الضلام كباس حبابو الكريم السخي سيد الجلد والراس وسمكم باين في رفاعة ساعة العراك ودواس القاسم أخوي تعبر وتمتر وما بتكوس لي مقاس
التحية سلام يا ابوبكر نعم الإنجمامة عامر وإن شاء ديمة عامرة بيكم منتظرنك تاني ماعندك عذر
أخدي غمدتك وارتاحي من تعب يوم طويل وليل الغريب الريح تجيب من أهلو حبة عطر النار تبق جوا الضلوع أمَّ الدموع سيل منهمر الذكرى جمرة تحرقّو والوحشة تأكل من حشاهو تأرقّو يطرا البلد وناس البلد ويفضل يعد يعد وينسى العدد يهدي السلام وكل الحنين ناس البلد الليل غريب مازي ليالينا الزمان القمرة في ليل الغريب ما زي قميراتنا الحِسان الدنيا في ليل الغريب نشفانّه عدمانه الحنان يا حليل زمان وسط الحبايب والاهل يا حليل زمان منى الظريفة والله كلام حنين وسمح فيهو من ريحة أهلنا الطيبين طعم واطتنا بعد رشة مطيرة وصوت غنويات الجنات يلعبو في الرشاش يا مطيرة صبي لينا في إيدينا وهنان في طرف الفريق كوم من عيال يبنو القبب من رمال كل هذه اللوحات الجميلةهاجت بي الذكرى والذكرى للحبان أجمل وصاية وكل سنة وانت طيبة وسنة جديدة وشها حلو عليك شان تسيلك دقل في البلد
المحرب حبابك شيخ العرب وانت طيب واهلك طيبين عاماً جديد يعود عليكم بالخير والبركة مرورك كدي ساكت ما بعجبني بندورك تقعد تنجم معانا نكب ليك القهوة بكري وتني وبركة ومن بعدها يجي الشاي المقنن بي لبن النعاج وتخلف كراع في كراع وتسرح تهود بعيد تجيب النم البديع وجميل من أرض البطانة ونحن نقول ليكَ هييييييع ابشر بي الخير
العزيز عبد اللطيف بكري لك التحايا سلااااام تشكر مبارك لك على هذه اللوحة الجمالية الحسنة للصوت والاداء المميز لصالح الضي ويا جميل يا حلو وكل الروائع والبديع التي ترنم بها لصالح الضي نسأل الله الرحمة وأن يتغمده برحمته ولك الشكر على المرور بينا في إنجمامتنا والمشاركة الحلوة
تسلم يا الخزين تسلم يا جبل الحديد الصم يا مقنع بنات العم
الحبيب أنت الخالد وأنا المنسي،، والله وضعت الفديو لهذه الأغنية ولم أستطيع وضع كلمة أو تعليق قد يفسد مذاقها المعتق لما يقارب نصف قرن،،
صالح الضي : أول شريط أشتريه من حر مالي وكان ذلك أبو الغلاف الأحمر من منصفووون!!! (عيييك)،، وكان فيه معظم أغانيه حيث كان مقلاً وعلى إقلاله عاجلته المنية في شبابه،،
ثم شريت بعده آخر للرحل صلاح محمد عيسى : بسمة نظرة غيرو حالي : لاعايز إنت تحت ولا ترحم حالي ليه : ليه إنت ماتعطف علي ياغالي،، بسمة،،
جميل قولك ، وجميل هذه البوستات التي تخرجنا من هذا الغلو في حياتنا بكل أشكاله،،
01-01-2012, 02:45 PM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
العزيز عبد اللطف حشاك ما بتتنسي وكيف ننسى ونسلى لي زولا بهذا الجمال الداخلي ينعكس جمال الروح بطريقتك في الحياة ف ي مشيتك في قدلتك بتعاملك مع خلق الله في هوياتك في ماذا تشاهد وماذا تسمع صالح الضي .. صلاح محمد عيسى وكفى وحدهم مؤشرات تنبئ عن ذوقك الرفيع ياراقي
وقول ليهو بس من كلمتين الحب دا ناس إتبادلو ونحن بنعزك من سنين ولا حد عاجب يا حلو
ونحن ما ناس ما ناسك ( ليه التنكر ) ناكر الجميل مابلقى حق .. كيف تبقى ناكر لي الجميل
في شيقوق بقول يوم العراك والخلوق منشرّا وقف الصيم جبل أحد فوق إيدو شايل اب دره وكت الأروح ترح تغرعر للمروق منجره واقف ثابت الحديد البرنز لا بزح ولا بنترا
تمر هذه الايام اعياد الميلاد تجدها اعياد لها نكهتها الخاصة فى هذه الديار يتبادلون الهدايا وكان لى نصيب من هذه الهدايا فى المدرسة التى اشتغل فيها فاولياء الامور جاءونى تملا وجوههم الابتسامات والود حاملين هداياهم وكان من ضمن الهدايا ما جاءتنى به السيدة التى اعمل معها فى الفصل وتعرف انهم يضعون فى كل فصل مدرستين لصعوبة العمل لشخص واحد هذا العمل مرتبط بحضانة الاطفال من سن (شهر الى سنه) ولك ان ترى ما نقوم به من جهد يجد التقدير لدى اولياء الامور قلت ان هذه الايام يعبر الكريسماس متهاديا الى داخل الحياة كان ان جاءتنى المدرسة التى تعمل فى الفصل بهدية كبيرة ولضيق ذات يدى خفت ان لا استطيع ردها فلجات الى حيلة ظريفة قمت هذا الصباح الى ما كانت امى تفعله حين يود عزيز لديها السفر وتكون مجابهة مثلى برد بعض جمائله وشمائله واحتكمت الى امر امى فما وجدت خيرا منه ودلفت الى (الخبيز ) صانعة اطباق منه على طريقة امى وهاانى ادفع به الى تلك المدرسة التى كما حدثتنى صديقة سودانية انها (لا يعجبها العجب ) وبطبيعة الحال الصيام فى رجب او رمضان ايضا المهم انها تقبلت الهدية وهى لا تكف عن قول( واو سلمى) هذه المراة نعدها من النساء (الشريرات )فى ارثنا لانها صعبة المراس لكنى دائما اكون مع امى اسالها فى غيابها ـ كيف ياامى يمكننى ان اواجه مثل اولئك البشر كانت تقول ـ الحسنه بعشرة امثالها وطفقت افعل كلما قالت امرا اجبتها عنه واحيانا قبل ان تقول فصارت تحكى عنى للجميع ومن خلالها تمكنت من صنع ما اشاء من تعليم لغتى للاطفال حتى الهدهدات كانت بلغتى والاغانى والكلام بطبيعة الحال وما زال الجميع مندهشون لامرى كيف تمكنت من الاستمرار معها كل هذه المدة دون ان يختل ميزان علاقتنا؟ ليس خوفا منها بطيبعة الحال ولا خوفا على وظيفتى لكنهاانسانة تحمل ماساة وتجول بها فلقد فقدت فلذة كبدها الاولى اثر مرض عضال كل المها ان تلك الطفلة رحلت بين يديها وان ابنها ايضا معاق لذات السبب فبدات اتلمس معها طريقا يحول بين تلك الالام بدات احكى لها احيانا قصصا خيالية فرقت وبدات تستعيد بعضا من الق حتى انها بدات تفكر فى امر (الرجل) لانها هجرت الحياة بعد رحيل ابنتها تعلمت اذن كيف اطفئ بعضا من وجد حاق بها والم استطال كما الزمان وبتنا صديقتين الان بدات تكتب فى كتاب يحمل تجربتها بضغط يومى عليها لانها صاحبة تجربة فى مجال التعليم ما قبل الابتدائى تمتد خبرتها الى اكثر من عقدين من الزمان سعيدة يا صديقى بهذا العمل وسعيدة بوجودكم حولى تشدون من ازرى وتدفعون بى دفعا الى الحياة التى احببتها لانكم تشكلون بهاءها والحديث هنا لكل من بعث الى متخيرا ما اكتب ،لكل من صادفت كتاباتى هوى فى نفسه ولامست عصبا ما ، الحب والتجلة وكل عام والوطن بالف خير وابناء الوطن ملؤهم التفاؤل بان الغد احلى واكثر نضارة
01-01-2012, 02:26 PM
mona altom mona altom
تاريخ التسجيل: 10-20-2010
مجموع المشاركات: 536
تعرف ياخالد لما الرويس يدودو ويرجع لورى حبه اليوم داك الدنيا مابنسعني بحوم وبحلق في سماء الله كلو بتوارى قدام عيوني من دوبيت وغناء ونمه علا اختك اتوكرت في الغربه وعشمها في الرجعه عشم ابليس في الجنه
01-01-2012, 03:50 PM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
وأنا متصفح لما كتبتي قفذت وبدون سايق إنزار قفذت لمخلتي
النوم النوم بكريك بي الدوم النوم تعال سكت الجُهال
برية برية حبيبي برية برية برية حبيبي جِيد ليا تكبر وتجيب ليا حبيبي جِد ليا إنغام بصوت الأ م العذب في محاولات يائسة أن ينوم غرة عينها ولا تكل ولا تمل في المحاولة حتى يخلد في نومه طفلها صاحبتك استمري معها بنفس الاسلوب والحسنة تمعط شارب الأسد ت
حياتي ومودتي
01-01-2012, 04:02 PM
وضاحة وضاحة
تاريخ التسجيل: 01-16-2005
مجموع المشاركات: 9116
Quote: في شيقوق بقول يوم العراك والخلوق منشرّا وقف الصيم جبل أحد فوق إيدو شايل اب دره وكت الأروح ترح تغرعر للمروق منجره واقف ثابت الحديد البرنز لا بزح ولا بنترا
هيييييييييييييييييييييييع كع عافي منك يا العشاء
01-01-2012, 06:20 PM
وضاحة وضاحة
تاريخ التسجيل: 01-16-2005
مجموع المشاركات: 9116
عندما أعلنت الساعة حدادها على عام مضى واحتفاءها بميلاد عام جديد كنت قد قررت.. ان امضي تلك اللحظات المقدسة وحيده .. مجردة من كل شيء .. لأحتفي بذاتي ..بما كنته .. وما سأكونه .. وما أنا عليه الان ..!! وابارك لذلك الرجل العنيد المجنون عامه الجديد بعيد عن الاحلام والامنيات
وأتساءل بدهشة خالصة .. أي مخلوق مجنون يسكنني او ربما اسكنه انا
Quote: قلتي لي أدوس أبنص وما أرفع الزويل قال الروووب يا منى لكن بعد الشكر دا أنا ما بضمنو هو زي الدابي يدودر يدودر وتخ يلدغ أبداً ماقاعد ارقد في مأمن من شرو
يا زول بعد نمك دا نوم قفا
علا وضاحتك البنلولي فيها هنا ليل وصباح وعينا هناااااااااك في ود القرشي اها دا طرفي منها
01-02-2012, 05:51 AM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
بحكم.......... . أولاً تلك البقعة التي جاء منها عثمان الشفيع ..( ود معزة عثمان ) تلك هي موطني ومسقط رأسي شندي الجميلة عثمان ذو الصوت الحاد الشجي عثمان عليه الرحمة جاء من شندي ودواخله مليئة بالحب والحنان الذي رضعه من ثدي تلك المدينة الطاهرة شندي وجمال شندي بي ناسها مافيها شئ جميل غير ناسها وجناينها جعليين .. حسانية .. دينكا .. تامراب .. نقادة .. ولاد ريف شايقية .. عرب خلا .. ناس بطانه بطاحين وشكرية .. دناقلة وحلفاويين عبابدة وعبدلاب .... تامة وحبش مساليت وفور وقبائل النيل النيل الازرق وغيرهم كثر جمعتهم تلك البقعة الطيبة وانصهرو في بوتقة واحدة وجاء النتاج إنسان شندي ( ونحن كدي أنتو كيف ؟ ) عثمان الشفيع خرج من شندي يحمل معه حب الارض وحب إنسان شندي مشاعره كلها حب كلها مودة وحنان من هنا كان الابداع
تتلمذ في فنه على يد أبن شندي وفنانها المخضرم علي الأمين عمر وأبدع ... الكلام يقف حياءً في حضرة علي الامين عليه رحمة الله الهجروك حبي عيون الصيد هاك يا قلبي روّح وأدرع حديد وهني ملك حياتي بالعام الجديد
طولنا خلاص أخبار شندي فوق ماجاتنا في صدرك مدافع تحتو البرينات راطنا دا الفرقش كويلنا وطرشق عجلاتنا
يــا سلام يا وضاحة لما ادخل في سيرة شندي واهل شندي بتوه مابرجع وانجذب في حلقة الدروايش والمريدين وبرجع لي الذكريات
Quote: وووووووووووووينوا دكتور احمد البدواى الجروح
يا وضاحة انا طبيب أسنان لكن شوفي وصفات ابوصلاح
لمداواة الجروح في هذه الأعنية
من قليبو الجافي ولى قليبي الحان.....النسيم يتردد عامل استمحان *********** الغضون تتناول منه خمر الحان ......والطيور تتناشد رايق الألحان والفروع تتمايل ميلة الفرحان........والزهور بتصفق ويرقص الريحان *********** يا نسيم ما بالك تتنى قامة البان ...........انت رايق تلعب والعشوق تعبان اكتشف ما دائي وما الدواء الصعبان.......هل دا جرحا بالغ أم دا سم ثعبان ************** قال لي لازم جرحك مدة الأزمان.............لا روايحى تطبك لا ولا لقمان البداوى جروحك إن شفتو يا سقمان.........في عصير الند البنضحو الرمان ************** يا الغرامك حلّ ورحل السكان..............من مدائن جوفي تملك الأركان ما ألذ النار السارجه بى لو كان..........يبقى قلبي وقلبك في الغرام شركان ************ قلبي لا يسلاك ولا يطيق نكران .............بين شاهد جفني البى الدموع وكران درعك البتقمز بالوضيب عكران............والضمير الميل صاحي أم سكران ************** صاحي سياف لحظك والطريف نعسان......ليك رشرش قاطع جندل الفرسان انت بدرا ساطع في قوام إنسان.................ليك حسن الدنيا ولى شعر حسان ************ الدوش افكارى وربّ لي جنان...........خمرة تمزج لينه وتسقى در أسنان رق يسطل سمعي لهيجك الرنان.........انت ناس في دنيا ولا حور في جنان
لك الود والتقدير أختي وضاحة
وللعزيز ود المنسي كل المودة
وكل سنة وانتم طيبين
01-02-2012, 12:38 PM
أبي بكر سيد احمد أبي بكر سيد احمد
تاريخ التسجيل: 11-27-2007
مجموع المشاركات: 339
Quote: الغضون تتناول منه خمر الحان ......والطيور تتناشد رايق الألحان والفروع تتمايل ميلة الفرحان........والزهور بتصفق ويرقص الريحان *********** يا نسيم ما بالك تتنى قامة البان ...........انت رايق تلعب والعشوق تعبان اكتشف ما دائي وما الدواء الصعبان.......هل دا جرحا بالغ أم دا سم ثعبان ************** قال لي لازم جرحك مدة الأزمان.............لا روايحى تطبك لا ولا لقمان البداوى جروحك إن شفتو يا سقمان.........في عصير الند البنضحو الرمان
تسلم يا قرشي وهذا مسكن نحن دايرين العلاج
الزمن طال والجرح غائر لم يطب بعد نعم هو جرحاً بالع وينتح سم درق
وعصير الند البنضحو الرمان كيف الوصول إليه الطريق شائك وحراسو مابترحم
01-02-2012, 05:22 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: كل عام والناس كلهم طيبين ....والبلد حاله ينصلح ...والجمال والحب في بلادي ..والظروووف تهدى وترووق والمحبه شعار حياتنا ..
يا جميل يا حلو لك التحية من نادي الخرطوم جنوب لــــ مدارس دال وكاف وعين تتوهج رمال إنجماتنا تحت الشدديرات والرملة مرشوشة بقدومك دوما يا زول يا جميل
والله ما بتصدق قدر شنو مبسوط بعودتك وربنا يجيب كل الاحباب تيسير المبارك أبارو سمـــــــــــــــــــأح القمر بوبا أسيا ربيع هاشم خلف الله سلمى صبحي محي الدين جبريل ماجدة خوجلي ابوبكر سيداحمدالرطاني ريحانة البطانة ( سمية الحسن طلحة ) فيسل هليل هند محمد عمو كمال وشيخة البوردابيات وهي الان بيننا سلمى سلامة ود هاشم مربط العقد وضــــأحة وهي من أصرت لترجع الإنجمامة
Quote: Quote: هاك يا قلبي روّح وأدرع حديد وهني ملك حياتي بالعام الجديد
ينصر دينك ياود المنسي
العزيزة منى تعرفي هذه القصيدة لها قصة قريبة جداً
هاك يا روّح وأدرع حديد وهنّي ملك حياتي بي العام الجديد
للأسف لا أحفظ الأغنية لكن يقول لها أوعا تكون عنيد وتستهدف حياتي بي السيف الوليد القصدة نظمها الشاعر ( حماد المكي ) وهو من قرية مويس ضواحي شندي كان أبنه متعلم في ذاك الزمان عجبتو بنت ( تاني تصدقي البنت دي قريبتنا )وحب أن تكون هذه البنت شريكة حياة أبنه المتعلم وهو علي حماد المكي ( كان مدير عام السجون في يوم من الايام عليه رحمة الله بنت عمدة شندي ( محمد بادي ) فتغني لها وكانت تسكن في حلة محطة شندي لذا قال لها لذا يقول فيها الهالكني شندي ساكن في السكة الحديد
01-03-2012, 07:32 PM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
يـــأ القريب وبعيد يــا اللِمابنطاق غايتو ما بي الإيد غير نقــول نعيد ريدنا ليهو شــديد الله يعلم ريدنا ليهو شديد
يــا البعيد وبعيد زي قمر ضوّى وانتَّ برضو قريب في الفؤاد جوه انتَّ راحة البال زي صفا الخوة انتَّ سمح الفال بيهو نتحوّى بـــــــس بلاك الحال لا حـــــولا لا قــــــوة
يــا البعيد ونواك جرس المُشتاق لا طراهو النوم لا في بالاً راق التقول مكتول طرطشو الوراق جوفو موقد نار تحرق الحراق قلبو في التأويل للبعيد لحاق ( يا رب )
يا البعيد وبعيد يا سمحنا الزين يا الصباح والعيد نرجى فيك لا متين خضنا موج الشوق من حنين لحنين نرسى وين ومتين والله مــا عارفين يــا البعيد وبعيد نحن بس عارفين ريـــدنا ليكَّ شديد والله مُشتاقين
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
خالد علي محجوب المنسي
وضاحة
محمد حيدر
Ahmed al Qurashi
فيصل محمد خليل
الطيب شيقوق
أبي بكر سيد احمد
سلمى الشيخ سلامة
mona altom
ismeil abbas
أبوبكر أبوالقاسم
خالد المحرب
فيس بوك
تويتر
انستقرام
يوتيوب
بنتيريست