دعواتكم لزميلنا المفكر د.الباقر العفيف بالشفاء العاجل
|
|
 هَتَف جُوَّاىَ ماذونِك
|
هَتَف جُوَّاىَ ماذونِك
شاذلى جعفر شقَّاق
بَراىْ والسكَّة
تقْصَرْ أو تطول
ماشِّى
بَراىْ لا يغرينى
ضُلاًَّ صاح :
تعال غاشِى
ولا يْوَهْدِبْنى بالنبَّاح
ولا يْعَرْقِلْنِى بالواشى
معاىْ شايلِكْ واشابيلِكْ
تسلِّى خُطاىْ مواويلِكْ
غُناىْ – رغم الوجَعْ – هاشِّى
غُناىْ لو مَكْرِى لو راشى
أنا البَضْرَعْ وانا البَزْرَعْ
وانا البَقْطفْ قناديلِكْ
براى وُكتين يغور الغير
براىْ وُكتين يغير الطير
برىْ وُكتين تهوج أُمْشير
براىْ وُكتين يشِحَّ الخير
يحلِّق فوق سماىْ الصيفْ
يَسِلَّ السيفْ
يَشِلَّ الكَمْ يجِزَّ الكيف
يلوِّشْ والبحر عكران
يطلِّق للدَّميرة الزِّيفْ
يهوِّشْ عِرْقو بى سيلو
يحرِّشْ موجو بالهدَّام
وياكْلَ القيف
بتلِّب فوقو يا السمحه
وبجيب آخرو
واخلِّى الشاكرو مو فاكرو
رفعنا شعارنا
لا تْقيليهو لا يْقيلِكْ
أقيفى وراىْ
فِداك دِماىْ
أنا البَحْميكْ
وانا البتصدَّ للجاييكْ
وناويلِكْ
أنا البَقْلعْ قُصاد الضيمْ
أطير لا فوق واتِبْ
نِعْلاتى ما رَكَّنْ
مَكان ما ركَّنْ اتْشكَّنْ
مَحَلْ مى فاضية تِتْجَكَّنْ
مَحَلْ مى رايقة تِتْكَبْجَنْ
مَحَلْ مَرخيَّة تِتْزرْقَنْ
واطير لا فوق واتِبْ
فى الدَّارة وادْوَّرْ
قدُر ما اتْهوَّروا
الهمباته بتْهوَّرْ
وانا البَرْكِزْ قُصاد الضيمْ
أهِزْ ضِرعاتى
لا بِتْهَزْ ولا بَرْمِشْ ولا بِتْلَزْ
ولا طاقِيْتى فوق الحاجِبْ الأعسر
بِتَشْرَب نَزْ !
واقيف فى الصَّفْ واضُرْب الكف
واشاشيلِكْ
توسوِسْ بالودِعْ للشَّفْ
شبابيلِكْ
وادوبيلِك واغنيلِكْ
براىْ متحزِّمْ النجعة
براىْ متلزِّم المشوار
بشارات الشِّعِرْ
تجدَع عليك مسدار
رفيقى غُناكْ
طريقى هواكْ
براىْ ومعاكِ
لا بختار ولا بحتار
ولا بَقْبل سوى
قِبْلة عيونِكْ مِيس
واجيكِ عريس
عروسى انا
بجيكِ عريس
وارخِّسْ كُلِّ شَىْ دونِكْ
يقولِّى نفيس
اقولُّو رخيس !
غلاة الزول طريقو عديل
غلاة الزول ضميرو دليل
غلاة الزول ضراعو يقول :
براااااىَ بَشيل
مُحال يرْفَع تقيلى بديل
ولا يدخُل ضَراىَ عميل !
ندهتِك من صميم جَلَدى
هَتَفْ جُوَّاىَ ماذونِك
ضَرَعْتِك نفْرة يا بلدى
نضح بالوفْرة ماعونِك
ولا قسَّمتَ لا حدَّدْتَ
لا قَتَّتْتَ مخزونِك !!!
فَتَحْتَ على الغُبُشْ نفَّاج
ضِحِكْ بَرْقَ الخلاص وهَّاج
رقص غيم الضحى اللجلاج
نَقَزْ فى الساحه مسجونِك
كَرَفْ ريحةَ الدُّعاش جَرْتِقْ
دَفَع مَهَر الصَّبُرْ مَسْرات
وقولةَ خيرو مطمورات
وسيرْتِك جـــات
زغاريد الفرح تابْرات
بَورِّق فيها بالبِشِّير
أيشِّر بالسَّمِحْ والخير
أنا الـ هولِك
وانا الـ طولى مِن طولِك
أنا الشايلاهو فى عْيونِك
وانا الـ لونى من لونِك
أشيلِك ضَوْ
واجيكْ مِن ضَوْ
واسْوِّى القَوْ
يدودى غُناىَ
شايْلو النَّوْ
ويشْرب شِعْرى من نيلِك
وفوق راس الضلام بَشْلَعْ
واضوِّيلِك
أنا الشمس القبيل
هيلِك
|
|
 
|
|
|
|
|
|
|
 Re: هَتَف جُوَّاىَ ماذونِك (Re: Abuzar Omer)
|
مُحال يرْفَع تقيلى بديل
ولا يدخُل ضَراىَ عميل !
ندهتِك من صميم جَلَدى
هَتَفْ جُوَّاىَ ماذونِك
ياتري الصحاك مين في زمان ماليهو قيمة
يمكن تكون خيرا بجي
زمن التحاريق بالمطر
شكرا شاذلي
نص موجع
| |
|
|
|
|
|
|
|
|
|
Re: هَتَف جُوَّاىَ ماذونِك (Re: هند محمد)
|
Quote: ياتري الصحاك مين في زمان ماليهو قيمة
يمكن تكون خيرا بجي
زمن التحاريق بالمطر
شكرا شاذلي
نص موجع |
بعضُ الصَّحْو - اختى هند - أكثر إيلاماً من اللا وعى المتهرِّب من مجابهة أوجاعنا ..
وزمهرير الحريق يمنِّى النفسََ -المصليَّة- بالمطر ..معجزة أن نصطلى برداً وسلاما ..!
شكرأ جزيلاً
| |
|
|
|
|
|
|
|
|
 Re: هَتَف جُوَّاىَ ماذونِك (Re: shazaly gafar)
|
Quote: معاىْ شايلِكْ واشابيلِكْ
تسلِّى خُطاىْ مواويلِكْ
غُناىْ – رغم الوجَعْ – هاشِّى
غُناىْ لو مَكْرِى لو راشى
أنا البَضْرَعْ وانا البَزْرَعْ
وانا البَقْطفْ قناديلِكْ
براى وُكتين يغور الغير
براىْ وُكتين يغير الطير
براىْ وُكتين تهوج أُمْشير
براىْ وُكتين يشِحَّ الخير
يحلِّق فوق سماىْ الصيفْ
يَسِلَّ السيفْ |
الأخ العزيز / الشاذلي جعفر ...
تحية ملؤها الود والتجلة .. .
حقيقة يا شاذلي نص جميل ورائع مليان صدق وإبداع .. لا أملك إلا أن أحييك عليه، وأقول ليك ما تحرمنا من مثل هذا الجمال ...
مع خالص حبي وتقديري ؛؛؛
| |
|
|
|
|
|
|
| |
shazaly gafar
Abuzar Omer
هند محمد
حبيب نورة
إدريس محمد إبراهيم
فيس بوك
تويتر
انستقرام
يوتيوب
بنتيريست