|
|
 ميكائيل الزمن الجائر
|
ميكائيل الزمن الجائر
شاذلى جعفر شقَّاق
ميكائيل الزمن الجائر
طرَّق سيف قطَّاع ارزاقك
قول يا ساتر
وجاب احزانو تحِج فى قلبك
ديمه عليك
تشابى تدافر
وقفَّل قِبَل الدنيا السبعة
وكل ما تطاوعو
يلوج ويكاجر
يومك أسود وجيبك أبيض
ودمَّك فاير
راسك صلَّع وجات تتفدَّع
بت ايامك
ليها ضفاير
وشيخ اوهامك
شدَّ خيالك
وقامْ بَك عاير
ركَّب دقنو ولفَّ العِمَّة
وشالاً فاخر
دسَّ فسوقو
تِحِت طاقيتو
وطقَّ السوق
بى دينا يتاجر
ولمَّع دينو
عشان يتبوبر
عيشة الدنيا
الدايرة مظاهر
وانت هناك
مسوكِر رزقك
ميكائيل الزمن الجائر
اسماعيل افراحك يصرخ
داير الموية
تشولِت هاجر
الله رماك
فى دنيا يتيمة
وارضاً عاقر
حالة تجنِّن
مرَّة تقلِّب فى ماضيك
ومرَّة تفتِّش
لى يوم باكر
مات احساسك
وظاهر راسك
يوم اغتلتَ
رسول العصب الحائر
ليه ما تحفر فى ارض الله؟
فيها خائن
وخيراً وافر
وليه ما تعمل فى الحيكومة؟
تبقى معلِّم
وتصبح ناظر
ليه ما تفتِّش
أىِّ وظيفة
ابوها حلال من صلباً طاهر؟
وانت مكرَّب وضمَّة مجرَّب
كنت زمان
للزملاء تحاضر
مين قال ليك
انا ما فتَّشتَ
وما جرَّبتَ
ركوب الريح
والموج الزاخر
ما اتراجعتَ
وما اتوقَّفتَ
وديمة بشقَّ
الدرب الواعر
خليفة الله
المالِك ارضو
وعمَّ فسادو
خلَّى الموسم
كل الموسم
يصبح كاسر
وديك وظايف الدولة
الحِرْمت للمتشمِّر
آهل وكادر
الا منظَّم او طرطوراً
شاف الزفَّة
وتابعها ساير
مين قال ليك
انا ما فتَّشتَ
وما دودَرْتَ
الرزق الطاير؟
كلْ ما ادودرو
عشان ما يقبُض
فجأة يطير
من شركى الهابر
اظنِّك عارف
لا يا دوبى عرفتك
انت هناك
مسوكِر رزقك
ميكائيل الزمن الجائر
الترحال الهدَّم حيلك
خلَّى خيالك
ديمة مسافر
والنسيان اللابس العتمة
يمحى ملامح
الزمن الغابر
شان ما يحفر
فى اعماقك
كل ما تصبح
جرحاً غائر
تدفن فيهو
جنازة احلامك
وباقى ايامك
قبلِ تسافر
سحابة الصيف
الما بتبلِّل
ريقك جاتك
دى البِتْشحْتِف
روح الزول الصابر
اظنِّك صابر
او متصبِّر
او ما قادر
دى النظرية
اللونها رمادى
بِتنْشُد واقع
اخضر وناضر
سيب افكارك
ترتع وتمرح
فى ملكوت الكون الساحر
عشان ما تنسى
وما تتذكَّر
انو هناك
مسوكر رزقك
ميكائيل الزمن الجائر
|
|
 
|
|
|
|
shazaly gafar
فيس بوك
تويتر
انستقرام
يوتيوب
بنتيريست