دعواتكم لزميلنا المفكر د.الباقر العفيف بالشفاء العاجل
|
|
 جيلي انا .. يحيى وحيدا .. يقاتل وحيدا .. ويموت وحيدا
|
جيلي انا .. يحيى وحيدا .. يقاتل وحيدا .. ويموت وحيدا
الفرقه بين الدفعات زي عشره سنين .. نقول عشره ..
ناس الخمسينات جيل التحرر من الاستعمار.. استلموها من ناس الاربعينات القاومو الانقليز .. وسلموها لي ناس الستينات جيل بلورة الفهم السياسي السوداني .. ومفروض انو ناس الستينات يسلموها لينا نحنا ناس السبعينات .. وكان مفروض يكون التسليم والتسلم في بداية التسعينات حتى الالفين .. يعني في عز عهد الانقاذ ..
الحصل انو ما استلمنا اي عهدة عن الثقافة والاخلاق السودانية من اي زول ... لقينا الناس القدامنا .. يابره البلد .. يا محابي .. يا خايف .. يا مسجون ..
طيب نسوي شنو !!!؟؟؟؟؟
نعلم روحنا برانا
وما قصرنا علمنا روحنا قدر قدرتنا
وطبعا ما حا تطلبو مننا في الغابة دي انو نكون نماذج مستفحلة في الخير.. لانو ما حانقدر
ماهو يا اما تكون عزال وديع .. وبفترسوك
يا تكون ضبع متملق .. عشان تعيش على فتات المفترسين
يا تكون مع المفترسين .. وتاكل اي غزال قدامك وتخلي الضبع يتملقك وينظف ما تركته من وساخه
او تكون نصف مفترس ونصف وديع وغير متملق ... عشان تحافظ ليك على دائرة قدر مساحة جسدك .. مملكه خاصة بيك ما يدخلها لا مفترس ولا وديع .. حقتك براك .. يهاب منطقتك المفترسين لان الدخول في معارك معك يخرجهم بخسائر وان فازو
ده الشي اللقينا قدامنا
دي االخيارات اللقيناها
واخترنا الخيار الاخير
وعشان ما لقينا قدامنا زول يربينا ، انا ما قاصد التربيه الخام البتربيك ليها الاسرة ... الاسره بتذودك باساسيات التربية والاخلاق .. والشارع هو البفسرها وبوريك فنيات استخدامها...يعني كمثال .. بربوك بقولو ليك الكضب حرام ... لمن تمرق الشارع بتعرف انو الكضب ما كلو حرام .. في كضب مباح واحتمال تلقى فيه حسنات .
-أخرج مسلم في صحيحه عن أم كلثوم رضى الله عنها قالت: "ما سمعت رسول الله (ص) يرخص في شيء من الكذب إلا في ثلاث: الرجل يقول القول، يريد به الإصلاح (أي بين الناس)، والرجل يقول القول في الحرب، والرجل يحدث امرأته، والمرأة تحدث زوجها".-
يعني في كذب حلال ... وبحلك من مشاكل وبحل الدنيا كلها معاك ... اها دي ما بورونا ليها اهلنا.. بنعرفها من الناس القدامنا ... بنتعلمها من الشارع
والحمد لله .. والله عشان رحيم .. لحقنا بالانترنت .. عشان نتربي في البورتات .. وكت ما اتربينا في الشوارع ... وما قصرنا ... سكيناكم وكسناكم وفتشنا عنكم .. عشان نتعلم ونشيل منكم.... ونتحاور معاكم حسب الشي الاتعلمناه هنا وبرانا ...
لكن ....
لقيناكم رافضننا وما قبلانين بينا .... وما فاضين عشان تعلمونا .. بس فاضين عشان تنتقدونا ... زي ابوين ولدو ولد وخلو الشارع يربيه .. وبعد ما كبر جمعتهم به الظروف ... واتصرف الولد تصرف غير مقبول مع ابويه .. فما كان من الابين الا ان نعتاه بقلت الادب ...
بالله شوف !!!!!
ما لازم يكون قليل ادب .. وكت انتو ابيتو تربوه وخليتوه للشارع يربيه..
انا ما بتهم زول بالتقصير ... وما بطالب زول بالاجتهاد ..
انا عاوز بس تفهمونا
وتعرفو انو ده العندنا .. وسويناهو برانا
وتقبولونا على علاتنا وكت ما ساهمتو في ازالت علاتنا دي
لحدي ما تعاد تربيتنا على اياديكم
وشكرا كتير
وليد
ــــــــــــــــــــــــــــــــــــــــــــــــــــــــــــــــــــــــــ
اي مصطلحات او احصائيات مقطوعة من راسي .. ما لقيت لي زول يوريني منهجية انشاء المصطلحات والاحصائيات فخلقت لي فلسفة حقتي
|
|
 
|
|
|
|
|
|
|
|
Re: جيلي انا .. يحيى وحيدا .. يقاتل وحيدا .. ويموت وحيدا (Re: وليد محمد المبارك)
|
Quote:
انا ما بتهم زول بالتقصير ... وما بطالب زول بالاجتهاد ..
انا عاوز بس تفهمونا
وتعرفو انو ده العندنا .. وسويناهو برانا
وتقبولونا على علاتنا وكت ما ساهمتو في ازالت علاتنا دي
لحدي ما تعاد تربيتنا على اياديكم
|
ازيك ياوليد
الموضوع الذى طرحته فى غاية الاهمية
ساعود لجيلكم، وجيلنا، جيل الهزائم والمرارات
تشكر على هذا الموضوع القيم وبجيك راجعة برؤتيتى
وتأكد بانى وكثيرين عاوزين يتعلموا برضو منكم، من جيلكم
ولاتنسى ان المدى ممتدا لنا لنهزم احزاننا ونركض معا تجاه شمس ابت الطلوع لوكنها حتما طالع
اشراقه
| |
|
|
|
|
|
|
|
|
|
Re: جيلي انا .. يحيى وحيدا .. يقاتل وحيدا .. ويموت وحيدا (Re: وليد محمد المبارك)
|
| Quote: الحصل انو ما استلمنا اي عهدة عن الثقافة والاخلاق السودانية من اي زول ... لقينا الناس القدامنا .. يابره البلد .. يا محابي .. يا خايف .. يا مسجون .. |
Quote: انا عاوز بس تفهمونا
وتعرفو انو ده العندنا .. وسويناهو برانا
وتقبولونا على علاتنا وكت ما ساهمتو في ازالت علاتنا دي
لحدي ما تعاد تربيتنا على اياديكم |
لا حولا يا وليد حيرتني عديل كدا
تعرف انا لي تلاتة أيام بفكر انزل بوست موجه ليك انت بالذات بي نفس مضمون البوست بتاعك دا...
حقيقي موضوع مهم... وبحييك على مقدرتك لتحسس مشكلة جيلكم بهذا الوضوح
حأجيك راجع برواقة في نهاية اليوم...
| |
|
|
|
|
|
|
|
|
|
Re: جيلي انا .. يحيى وحيدا .. يقاتل وحيدا .. ويموت وحيدا (Re: وليد محمد المبارك)
|
our generation has also lost a lot between Numeiri and the current regime!
Hope to be able to contribute,
Muna
كلو زول يقول لي بمشي وبجييك وما يجني
مالي انا ريحيتي عفنة...
كل زول يكتب عزرو وسبب غيابو
I just noticed this funny comment from you, while I was about to post, malaish, I will be honest with you, enta zaul zarif and I will come back to you,
| |
|
|
|
|
|
|
|
|
|
Re: جيلي انا .. يحيى وحيدا .. يقاتل وحيدا .. ويموت وحيدا (Re: وليد محمد المبارك)
|
وليد:
جرحتَ ليه خاطر الحبيبه؟
الحبيبه:
المَشّطَتْ عَصَب التضاريسْ
وهَدّتْ على كل الخرايط.. والفراغاتْ
مدهونه
بِى لونا أرصفةَ المحطّات
واقده من رِيقَا الفوانيس
جرحْتَ ليه خاطر الحبيبه
دي السكَّه أبعد من حدود الإحتمالْ
والجرح أعمق من بكا الليل والنويح
ويوم استفزَّتْ قُدرتَكْ
قِيمة المسافات
عرفتَ إنَّك قَليلْ حِيله وفَصيحْ
ستفَّت عُمرك فى حقايب الرجعه
للسفر القديم
مَرَقَتْ
تشهِّل غربتكْ
وبى توبا تَسْتُر عورة الزمن اللئيمْ
وتكْسِي فى الشِّدر اللّحا
ماهى دي الحبيبه الطوَّلتْ ضُلْ الضحى
وقَعدتْ تفلِّي السِكّه من وجع الضِّرِيَسه
وعضّضة الجوع الزَنيم
!ماهي دي الحبيبه
الشَّحْتَفتْ روحي
ومعطَّنه فى ينابيع الألقْ
الشاربه من فجر الشروق
وماخده من لون الشَفَقْ
ماهى دى الحبيبه
الداخله من بين مسامات العَرَقْ
رَقْرَاقْ
وطالعه زي قمر الدُجي
وسايقانى فى كل الدروب: سَاسَاقْ
راميانى حد القَريْفَه
وقالْيانى زى قهوةْ بِجا
ماهى دى الحبيبه
يومي المشيتْ مجبور
على السكَّه المُريبه
أدَّتني إحساسا الرَّطِبْ
وشَهَرتْ ضحكتا العَذْبَه وْ مَشَتَ
كانت رؤاها بتحْتشِد
زى نار
بتسجنْ روحا
فى عود الثِّقاب
وتعلن مهرجانات الحريقْ
لو كشّت الواطه ولقيتا
ما كنتَ ضلّيتْ الطريقْ
ودفقتَ مويتى على الرِهابْ
مشيتْ ورا الشدر اليمامه
دى الرتّبتْ خدّر الحنينْ
فى الروح وعبَّت
دُوار النشوه...
فى جَسَد الندامه
وانا كنتَ مفتونْ
بي تداعي اليابسه
فى عرس التسَابْ
مَشدُود على حبل الصعود أٍفل
مَشَلْهتْ بالأيادى الفوق..
مَشَلْهتْ والبدن مُنحلْ
لفحتَ من الأرِض طِرقه
مرقتَ على البحر شاشوق
لقيتْ توب البَحَرْ خِرْقَه
لقيت درب الرجوع أطول.
!هَيَا يازوله
المخَارِجْ وين؟
لا غُلَّتْ يَداكْ عن حَلْ
غِلبتَ فى الحيل البِلمِّك
من حِبال الصوت
!وينَدهِلْك:تعالى
!:تعالى
مَا وردَّتْ مُرْحَاكة البيوتْ الناشفه
سَاسَاقِكْ عَبَثْ
شِنْ قُدْرِتَكْ تنسلِّي
من قلب الضُلمَّه الحالكه خنْجَر
!مِنْ قَبَس
ومن وين أجيبلِكْ قُدْرَه
تستلهم رؤاك
وانا جَايِّ من وحشة سنيني
المُرّهْ
بى آخر نَفَسْ
من...
وين..
أجيبلك قُدرهْ بَسْ؟
مِنْ وين؟
وانا هَدَّ إحساسي السَفَرْ
أنا بندهِكْ: لو مَرّه
ضَفّه اتبرّجتْ
حلَّت ضفايِراَ للبَحَر
بَنْدَهِكْ:لو لَّبش الموج فى الطَّمِى
والشاطي
فى ذروة المَدْ
انكسرْ
وانا بَعْزِمكْ علي مويهَ..
عذبَه
وضُل وريف: لو هَمْ سَقَطْ
من طاقه..
فى حلم الحبيبه..
وإنتحر
جرحتَ ليه خاطر الحبيبة؟
وبرجع ليك ( ها ها ها )
أبوذر
| |
|
|
|
|
|
|
|
|
|
Re: جيلي انا .. يحيى وحيدا .. يقاتل وحيدا .. ويموت وحيدا (Re: وليد محمد المبارك)
|
يا وليد
جيل ما وجد محمد احمد المحجوب ده ما جيل..
جيل ما لحق الخليل يقول فيهو شعر ده ما جيل..
جيل ما غني ليهو عثمان حسين ده ما جيل ..
جيل اصبحت اغانيه الوطنية والثورية (دفاعنا الشعبي يا هو دي ) ده ماماجيل..
جيل اصبحت فيه امدرمان لحددددددددددي الثورة الحارة 87 وانتهت حدود الركابية وودنوباوي والموردة وتلاشت فيه ده ما جيل...
جيل اصبح فيهو طالب الجامعة بيشيل قروش الفطور من اهلو ويدخل دروس خصوصية ده ما جيل..
جيــــــــــــــــــــــــــــــــلي انا ..جيـــــــــــــــــــلي انا
الله يرحم جيلنا يا وليد ونتمني نحن انشاء الله نقدر نستفيد من غلط الجيل السبقنا ونقدر نعمل حاجة في الجيل القادم ..
ملحوظة صغيرة يا وليد :
ما كل الغلط علي الاجيال السبقتنا ولكن جل الغلط من جيلنا نفسه جيل انهزامي غير طموح توفرت له كل سبل الرفاهية والثقافة ولكنه لم يستفد منها ..
فااااااااااااااااااااااااااااااااا ...بس..
وقااااااااااااعد حارسك اصصصصصلو ما بقول ليك راجع ليك
| |
|
|
|
|
|
|
|
|
|
Re: جيلي انا .. يحيى وحيدا .. يقاتل وحيدا .. ويموت وحيدا (Re: معتز تروتسكى)
|
مافي بكاء وانكسار يامعتز
انحنا ما بكيناولا انكسرنا من القاعدين هنا وعملوا هلع للناس
تاني الببكينا شنو والبكسرنا منو
ده بسموه رجاء
محاولة توضيح فهم بي زوق يا زوق
لكن النقاش والمصادمه ما بتغلبنا وبنعرف ليها وحريفييين فيها
وكمان الغلات زاتو اتعلمناه
ما قاعدين هنا ما مرقنا واتعلمنا اي شي
وهسع الموضوع انا ما فاتحو للجدل والنقاش
ناس البورد هم القررو انو موضوع مهم ومفروض يتناقش
وكلام الناس هو البمشي " تحت تحت لقيت ليك روحي بعرف أفتح مواضيع مهمة .. تصدق "
انا فتحتو للذكرى
عشان الناس تذكر قبل ما تنتقد
ونحنا برضو بنستفيد من اتقادهم
لكن الاتهمات الجزاف او حتى غير الجزاف
على خلفية كلمة او غلطه او فكره بدت لزول سيئة او فعلا كانت سيئة يقومو يحكموا علينا
مابنقبلها ولاذم نقيف عندها
طيب وهم البحكم عليهم منو
عموما يا حبه مستنينك
وبيناتنا كلام كتير عاوزين نتمو على الماسنجر
والبرد كيف يا حب
اتغطى كويس
واتزحلق لي معاك
اقول ليك شي
ما نفسي الا العب بالتلج
واتزحلق فيه
| |
|
|
|
|
|
|
|
|
|
Re: جيلي انا .. يحيى وحيدا .. يقاتل وحيدا .. ويموت وحيدا (Re: وليد محمد المبارك)
|
فردة جناحي التانية لما الناس تطير لي عالما :
خجلتك مش؟؟؟
ياخوي السودان ما اتخرب السودان ياهو ده السودان من زماااااااااااان بس الناس الاتخربت ..
انا والله يا ولي مصر ومصر انو من اكبر اسباب تدهور هذا الجيل هو سياسات التعليم الحالية والتي فرضتها سياسات الانقاذ بالرغم من انها ظهرت حديثا ولكن ولدت فينا احساس اننا قرينا الاعدادية وليس الجامعية وانو نحن اطفال مركبين مكنة كبار ...
جيلنا جيل لا يتمتع بالثقافة جيل لا يحب القراءة جيل يعتمد علي الجاهز جيل اصبح طالب الجامعة فيه يدخل الامتحان وهو مزاكر من كراسات made in andonisia الملونة ..جيل منذ دخوله الجامعة وحتي خروجه منها لا يعرف اين طريق المكتبة (ان وجدت) جيل حتي اذا كلف نفسه بقراءة كتاب فستجده كتاب المدرسة او الجامعة ..
جيلنا هو الجيل الوحيد الذي انهي مقولة القاهرة تكتب وبيروت تطبع والخرطوم تقرأ فاصبحت الخرطوم تفكر في محو الامية ...
السودان هو البلد الذي عموما تحس فيه بان الاجيال فيهو " ماشة حركة ورا " فجيل اجدادنا كان يقول لابائنا " الله يرحم ايام الانجليز" وجاء جيل ابائنا وقال لنا " الله يرحم زمن المحجوب " وبدأنا نحن نردد لاخواننا " هيييييييييييييييه ما حضرتو نميري" واخاف واخاف جدا من اليوم الذي ياتي ونقول لابنائنا " يا اولادي انت محضرتو زمن الانقاذ زمن الزمن زيييين "
اختلف ايقاع الحياة وهذه حقيقة ولكن كم تمنينا ان تواكب اجيالنا هذا الايقاع ..
كبارنا قصروا في حاجة واااااااااااااحدة بس : :كتلونا بي المغصة بي حكاويهم عن زمان وما حافظو عليهو ولا سلمونا ليهو زي ما لقوهو "...
ولسسسسسسة راجيك ..
| |
|
|
|
|
|
|
|
|
|
Re: جيلي انا .. يحيى وحيدا .. يقاتل وحيدا .. ويموت وحيدا (Re: عمر الفاروق شيخ الدين)
|
يا جوز الجنحين الاتنين
وانا الظل بتاعهم بس
| Quote: كبارنا قصروا في حاجة واااااااااااااحدة بس : :كتلونا بي المغصة بي حكاويهم عن زمان وما حافظو عليهو ولا سلمونا ليهو زي ما لقوهو ". |
ياخي الحته دي عجبتني شديد
زي لمن زول صحبك يحكي ليك عن حفله حضرها وكانت حفلة سممممحة
وفي نفس الوكت ابي يعزمك معاهو
الحته بتاعت القراية دي ما تحملها لي ناس الانقاذ براهم
في رايي انو ده مشكلة عالمية حتى الامريكان بعانو منها
والمنتبهين ليها دول شرق اسيا
بالذات الهند والصين
اما حكايت الجامعات الكتيرة دي
فهي حسنة وسيئة
حسنة انو السنة دي 100% من الطلة الناجحين في امتحان الشهادة حايلقى مقعد في جامعة لو هم عاوزين
يابكلوريوس ولا دبلوم المهم في مقعد
وسيئة لانو التعليم متدهور في الجامعات دي وفعلا هي زي مدارس الثانوي
ويمكن مدارس الثانوي زمان احسن منها كتير
وانا بقول انو اغلب الشهادات الممنوحة من الجامعات السودانية مزورة
الكلام ده يعني شنو
يعني المعلومات المكتوبة في الشهادة وبتقول انو الطالب بيعرف العلوم المكتوبه دي
ده كلام فاضي
الطالب ما بعرف التكتح من المكتوب في شهادته الا جامعات معينة وبالعدد
طيب الحل وين
الحل في الناس القاعدين بره
ياخ انحنا عندنا بره علما
لو جو درسونا
والله العالم الا يجري
والصين زاتها ما ماسالين فيها
غايتو المهم نحنا قرينا القرايه النص نص دي
وتمينا الباقي مويه من عندنا
خليهم يشيلو شيلتهم البره ديل
ويحصلوا البعدنا
انحنا ما خلاص الفينا اتعرفت
ولسع راجيييييك
| |
|
|
|
|
|
|
|
|
|
Re: جيلي انا .. يحيى وحيدا .. يقاتل وحيدا .. ويموت وحيدا (Re: وليد محمد المبارك)
|
ولي ولي ..حلاوة بلي..:
ماااااا اكتر الحفلات الحضروها كبارنا وما عزمونا ليها حفلة الجنيه الاكتر من الدولار وحفلة الطلاب البيدوهم قروش في الجامعة وحفلة الخرطوم البيغسلوها 3 مرات في اليوم وحفلة الوصلة في الاكل في المطعم مجان وحفلة قهوة جورج مشرقي وتجمع المثقفين فيها وماااااااااااا اكترها من حفلاتهم التي لم نتعلم منها الا النبق النبق والقرد ...
الموضوع شايفو اخد منحي عن التعليم وده موضوع طوييييييييييييل يا وليد والله قدر ما اتزكرو بيصيبني غم عديييل كده
Quote: الحته بتاعت القراية دي ما تحملها لي ناس الانقاذ براهم
في رايي انو ده مشكلة عالمية حتى الامريكان بعانو منها
والمنتبهين ليها دول شرق اسيا
بالذات الهند والصين
|
طييب ليي مانكون زي ناس شرق اسيا ونخلي (الغرب ده شوية) اعمل حسابك رودا ما تجينا ناطة بي هنا
Quote: حسنة انو السنة دي 100% من الطلة الناجحين في امتحان الشهادة حايلقى مقعد في جامعة لو هم عاوزين
يابكلوريوس ولا دبلوم المهم في مقعد
وسيئة لانو التعليم متدهور في الجامعات دي وفعلا هي زي مدارس الثانوي
ويمكن مدارس الثانوي زمان احسن منها كتير |
اخطر مشكلة عملتا سياسات التعليم العالي هو اهتمامنا الافقي في التعليم وليس الرأسي ..بقينا نهتم بالكم وليس الكيف ..زمان بنطلع 12 طبيب ال 12 بيكونو اطباء بي حق وحقيقى بيكون فيهم سليمان فضيل وفيهم ناس سعد الفاضل وناس ريتشارد وعامر مرسال و اللستة طوييييييييييييييلة
الليلة (مع الاحترام للبعض) اصبح عدد الاطباء اكبر من عدد المرضي وللاسف المستوي متدني والكلام ليس منطبق علي الطب بس بل كلللللللل المجالات ...
Quote: طيب الحل وين
الحل في الناس القاعدين بره
ياخ انحنا عندنا بره علما
لو جو درسونا
والله العالم الا يجري
والصين زاتها ما ماسالين فيها |
كلام صحيح مية المية وانا زماااان كنت بقول كده وكنت بلوم الناس البرة ديل لكن شاءت الظروف الواحد يطلع ويشوفهم عاملين كيف وليي ما بيجو راجعين .. قرار الرجوع في ظل انظمة طائفية صعب بي النسبة ليهم ..
اضرب ليك مثال بي مجالنا في الكمبيوتر فاكمبيوتر في السودان ماسكنو( لوبي) معييين تلقاهم في اي حتة في اي جامعة نفس الاستاف تلقاهو بيدرس ناس الماستر في كللل الجامعات ونفس الناس ديل تلقاهم مسشارين لي الجهات الحكومية ونفس الناس ديل هم البيسوقو الانظمة اها الناس البرة ديل يجو مع الناس ديل وين ؟؟؟؟؟
شي تاني مفروض ننتبه ليهو انو بعض الناس من الكبار العظماء قد لا يواكب تطور العصر وسرعتو وتغيير البلد يعني ممكن يكون لسة واقف مع حاجات زمااااااااااااااان وده خطورة كبيييرة ونحن كجيل جديد قاعدين نجامل الناس ديل علي حساب اسماؤهم لكن ممكن جدا تلقا زول خريج جديييد وفاهم ومتطور ومواكب اكتر منهم وخصوصا في مجال الكمبيوتر وانت براك عارف ..لانو في ناس لسة بتبرمج بي الفورتران والكليبارد والفوكس برو والناس اسة في الدوت نت ...
موضوع تاني مهم عايز اثيرو هنا ..
ليي نحن كمان مرات بنخاف من قول الحقيقة للجيل القبلنا بانو عندنا ناس احسن منكم ؟؟لي مرات بيمنعونا انو في اسماء كده ممنوع الاقتراب والتصوير ؟؟كللللللو الا فلان ده ؟؟؟ الزول ده انتو ما عارفنو كان خطيير كيف ؟؟ الزول ده ابو العلم ؟؟الزول ده والزول ده ووو وانا متاكد انو واحد من الخريجين الجدد قد يكون مواكب اكثر واكثر منو ولي في ذلك تجارب اتركها لحينها ..
نواصل...
انتظرتو لما ما جا رحت زرتو ..
| |
|
|
|
|
|
|
|
|
|
Re: جيلي انا .. يحيى وحيدا .. يقاتل وحيدا .. ويموت وحيدا (Re: عمر الفاروق شيخ الدين)
|
عمر الفاروق شيخ الدين
انت اسمك كبير كده مالو
هسع الواحد لو عاوز يدلعك ما يعرف يدلعك كيف
Quote: اخطر مشكلة عملتا سياسات التعليم العالي هو اهتمامنا الافقي في التعليم وليس الرأسي ..بقينا نهتم بالكم وليس الكيف ..زمان بنطلع 12 طبيب ال 12 بيكونو اطباء بي حق وحقيقى بيكون فيهم سليمان فضيل وفيهم ناس سعد الفاضل وناس ريتشارد وعامر مرسال و اللستة طوييييييييييييييلة
الليلة (مع الاحترام للبعض) اصبح عدد الاطباء اكبر من عدد المرضي وللاسف المستوي متدني والكلام ليس منطبق علي الطب بس بل كلللللللل المجالات ... |
انت عارف دي اهما حته
لانو الكلام الفات كلو ممكن يكون ملحوق
اما الطبيب فبيكون تعاملة مع الانسان مباشرة
واي غلط ممكن يؤدي الى الموت برضو مباشرة
نعم كل العلوم ليها علاقة بحياة الانسان
لكن الطب علاقتو مباشرة
ومفروض زاتو الدكاتره ديل يصححو ليهم الغلط بالماينس
يعني لو اخطات في سوال يشيلو منك درجة
يعني لو جاوبتا 50 صاح و50 غلط تكون جايب صفر
ولو جاوبتا الـ 100 غلط
تكون جايب سالب ميه
عشان بعدين قدام الناس لو ما متاكد وما عارف تقول للمريض ما عارف
موش تديه علاج خطاء
اما موضوع الخريج الجديد
كلامك فيه شي من الصاح
وفي الحاسوب بالذات
انا قريت اعلان بتاع تعيين لي بنك السودان
طالبين خرجين اخر دفعة من الحاسوب للعمل
عرفت ليك الزول المسئول هناك ده زول مفتح
وفي انتظارك يا حبيبي
رايح ارعاك بي حناني..
القا في قريبك سعادتي
وانسى تعزيبي وهواني..
| |
|
|
|
|
|
|
|
|
|
Re: جيلي انا .. يحيى وحيدا .. يقاتل وحيدا .. ويموت وحيدا (Re: وليد محمد المبارك)
|
اسة عموري دي مالا عيبا لي ...
انت عارف انا زمان في المدرسة لمن جيت امتحن شهادة المدير قال لي مليني اسمك رباعي
بديت قلت ليهو عمر الفاروق .. شيخ الدين .. محمد احمد وده كان الثلاثي قام طوااااالي وقف الكتابة وطلع قروش من جيبو قال لي هاك امشي اشتري ليك قلم كملت لي قلمي ده ..
بي النسبة لي ناس بنك السودان ديل ما مفتحين والله لانو جو المملكة قبل كده وانا مشيت مع زميل لي في نفس مجال الكمبيوتر عشان عندهم فكرة يعملو نظام بنكي متكامل قمت مشيت علي اساس الموضوع بيهمني ووو ولمن سمعت كلامهم ..اسكت ساي ..
غير انو قبل كده حاولنا نمشي نشتغل هناك في بنك السودان (كنا خريجين جداااااد) الله لا وراك المعاينات وشالو منو وخلو منو وسألو شنو (بلد المليون شهيد لي ناس) ( ولي ناس تانيين اذكر اسماءهم )
اقتراحك للاطباء اثنيه وبشدة وكبك واييي حاجة
بي المناسبة ..انت اخبار جيل الناس الاكبر مننا شنو ؟؟؟
الناس ديل يقولو ليك الموضوع مهم وانا كنت عايز اناقشو وتاني عييييييييييييك الا الكريم ..ياخ والله راجينكم عشان نستفيد منكم بي الجد جد
رجعنالـــــــــــــــــــك
| |
|
|
|
|
|
|
| |
وليد محمد المبارك
Nasr
ست البنات
Ishraga Mustafa
Hafiz Bashir
عشة بت فاطنة
Muna Khugali
lana mahdi
abookyassarra
معتز تروتسكى
فيس بوك
تويتر
انستقرام
يوتيوب
بنتيريست