هل تستوفي الاجازات الاكاديمية والعلمية ما يحمله الفرد من علم ؟

في دعم حملة علاج دكتور الباقر العفيف:- قليل من كثر خير من كثير من قلة
نداء أنساني بخصوص الدكتور الباقر العفيف
منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 21-11-2018, 02:42 AM الصفحة الرئيسية

مكتبة وليد محمد المبارك(وليد محمد المبارك)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
15-11-2008, 11:37 AM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


هل تستوفي الاجازات الاكاديمية والعلمية ما يحمله الفرد من علم ؟


    كثر في المنبر مؤخرا الحديث عن التخصصية .. وعن ان لا يكتب شخص في شي هو غير متخصص فيه اكاديميا .. ويحاول بعض اصحاب المهن والاجازات في مجال ما ... حرمان الاخرين مجرد التعليق حول ما هم متخصصين فيه بحكم الاجازة او المهنة .

    بتظهر اسئلة ملحة وضرورية

    الى اي مدي تعبر الاجازة الاكاديمة او العلمية عن ما يحمله الفرد من علم في ذات الخصص؟
    وهل بالضرورة ان يكون صاحب الاجازة المعينة في علم معين .. متقنه ويحمل في صنقوره علم موازي للدرجة التي منحها في الاجازة ؟

    يعني صاحب التقدير الممتاز بالضرورة يكون ممتاز في الواقع ؟
    والمقبول يظل مقبول الى ابد الدهر؟
    والما عنده اجازه في علم معين هذا يعني انه لا يعلم في ذلك العلم شيئا البته ؟

    وده بسوقنا لوسائيل التعليم نفسها

    موش ياها المشاهدة والاستماع والقراية ؟
    هل بالضرورة الوسائل دي لاذم تكون في صرح تعليمي اكاديمي ( خلوه ، مدرسة ، معهد . كلية ، جامعة )
    وهل بالضرورة ناقل العلم ده للاخرين ان يكون مدرس او معلم او برفيسور في التخصص المعني ويحمل بالتالي اجازة في التخصص ده .. وانه لاذم ينقل علمه ده عبر فصل او مدرج او قاعة دراسية

    يعني زي مثال فردتنا دينا خالد وحمور
    نعتمد قطعيا وبدون نقاش انو دينا بتعرف في القانون اكتر من حمور لانها درست القانون في الجامعة وحمور اخذه نقلا عن والده في المنزل
    موش نقل العلم لفرد اسهل من نقله لمجموعة؟
    وموش الوكت المتاح في البيت اكثر من الوكت المتاح في الجامعة؟
    وموش نقل العلم لمن نعرفة فيه اخلاص وتفاني اكثر من نقله لمن لا نعرفهم ولا تربطنا بهم صلة ؟

    وموش ممكن يكون الاستاذ الدرس دينا في الفصل والاخدت اجازتها بناء على تدريسه لها... موش ممكن يكون ياهو نفس والد حمور النقل ليه العلم ده في البيت؟

    وموش ممكن وسائل التثقيف الشخصي متاحة لحمور في المنزل من كتب ومراجع ودوريات اكتر من دينا بحكم مهنة والده ؟
    وموش ممكن يكون حمور قراها كلها وسمع من والده وناقشة وحاورة وحاضره وساله واجاب عليه .. وده ما بكون متوفر لدينا زي ما متوفر لحمور لضيق الوقت الممنوح ليها بحسبان انه زمن مقسم بينها و زملائها في الدفعة ونفس التخصص

    ومن جهة تانية
    هل بالضرورة المبدع في مجال انو يكون مبدع في كل مجال
    يعني محسن خالد عشان بكتب كويس وبعبر عن نفسه كويس وعارف كتير من مفردات اللغة .. ده بيعني انو بفكر كويس وومكن يحول ابداعة ده لي اي مجال هو عاوزه وبصورة تلقائية ... يعني مثلا ممكن عشان هو كاتب بارع يكون رسام او ناقد فني بارع برضو ...

    هو العلم ده زاتو وصل الناس كيف
    موش بكثير من النقل قليل من الاختراع والابتكار

    كدي فكروا معانا وادونا رايكم

    الى اي مدي يمكن ان تعبر الاجازات الاكاديمية والعلمية عن ما يحمله الفرد من علوم؟
    وهل هناك تخصصية في الابداع ولا المبدع مبدع في اي حاجة ؟

    وبعد ده كله دور المتلقي وين من دور المنتج ؟
    وهل يحق للمتلقى ابداء رائي في انتاج المنتج باعتبار ان هذا الانتاج الصادر من المنتج موجه للمتلقى
                   |Articles |News |مقالات |بيانات

15-11-2008, 11:48 AM

Mohamed E. Seliaman
<aMohamed E. Seliaman
تاريخ التسجيل: 15-08-2005
مجموع المشاركات: 17863

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    الأخ وليد السلام عليكم ورحمة الله
    موضوع مهم أشكرك جدا على طرحه

    أرجو ألا تتشعب كثيرا
    يفضل أن نتناول القضايا واحدة واحدة


    أتابع معك
                   |Articles |News |مقالات |بيانات

15-11-2008, 12:37 PM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: Mohamed E. Seliaman)

    الاخ محمد سلامات
    تسلم يا مان

    وربك يسهل
                   |Articles |News |مقالات |بيانات

15-11-2008, 11:53 AM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    رائي الشخصي انو الاجازات العلمية هي مفتاح فقط بيقول انه الزول ده تلقى دراسة في العلم ده

    قد يستقد ويفيد من هذه الدراسة .. وقد لا

    واحتمال كبير زول ما عنده اجازة في نفس التخصص يكون عارف فيه اكتر منو بسبب الاطلاع والمثابر خارج الصروح الاكاديمية التي تمنح اجازات


    واحتمال كبير الدارس حفيظ وما فهيم...
    وده بمكنه من اجتياز امتحانات الاجازات بتفوق
    بدون ما يكون فاهم التكتح

    ويمكن يكون فاهم لكن ما عنده ملكات انه ينقل علمه ده خارج جلده ليفيد به الناس
                   |Articles |News |مقالات |بيانات

15-11-2008, 02:25 PM

AnwarKing
<aAnwarKing
تاريخ التسجيل: 04-02-2003
مجموع المشاركات: 11481

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    سلام يا وليد...
    وشكراً على فتح هذا الموضوع العميق...

    أسطع نموذج في موضوع "القلم الما بزيل بلم"...هو الدكتور نافع علي نافع...
    الذي فعل العجب والصيام في رجب أبّان فترة توليه رئاسة جهاز الأمن والمخابرات في السودان...

    http://www.youtube.com/watch?v=RMF5WQ1IgjU

    Quote: رائي الشخصي انو الاجازات العلمية هي مفتاح فقط بيقول انه الزول ده تلقى دراسة في العلم ده

    قد يستقد ويفيد من هذه الدراسة .. وقد لا


    شكراً مجدداً وأتابع معك
    أنور
                   |Articles |News |مقالات |بيانات

15-11-2008, 02:51 PM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: AnwarKing)

    انور يا حبيبنا
    اسعدنا مرورك
    وشكرا لمتابعتك


    لكن الفيك اتعرفت
    عاوز تودي اخوك التوج
                   |Articles |News |مقالات |بيانات

15-11-2008, 12:21 PM

مريم بنت الحسين
<aمريم بنت الحسين
تاريخ التسجيل: 05-03-2003
مجموع المشاركات: 7727

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    الاخ وليد، تحية طيبة..

    طبعا انا الايام دي فاصلة جداً، وفهمي بقى غريب.. انا داخله على اساس الموضوع عن الاجازات الvacations... عليك الله ما تضحك شديد...

    تعليقا على موضوعك، دي نقطة فيها خلاف شديد، واعتقد انها بتعتمد على التخصص نفسه، يعني مثلا التخصصات البتعتمد على skills زي الطب مثلاً، فيه نظر شويه.. يعني دون الدرجة العلمية لا افتاء ولا ممارسه.. التخصصات التنظرية/الانسانية فيها تداخل شديد.. يعني مثلا العلوم السياسية فيها كثير من علم الاجتماع.. والآداب بشكل عام متاحة إلى حد كبير.. الكومبيوتر حقنا ده، بقى يمكن اوضح مثال على عدم ضرورية الدرجة العلمية للمارسة، لكن لو قالوا لواحد اكتسب خبراته في الكومبيوتر انه يدّرس طلاب المادة، فما حيقدر يوصلها بمستوى الحامل للدرجة الاكاديمية... ودي بقولها من تجربة...

    شكرا

    بنت الحسين
                   |Articles |News |مقالات |بيانات

15-11-2008, 12:58 PM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: مريم بنت الحسين)

    اختنا مريم
    مدروشة في الشغل اظنك
    هاهاهاهاهاهاهاها


    _________
    طيب نجيك للموضوع
    الاختلاف حاصل وواقع وكل اصحاب مهنة وتخصص مكنكشين في مهنتهم وتخصصهم
    ضربتي بالطب مثال للمهن والتخصصات التي تعبر عنها اجزاتها ولا يجوز ممارستها بغيرها
    ما قلنا شي
    وده سببه واضح
    انه الطب تحديدا مرتبط بحياة البشر وارواح الناس ودي حته ما بتستحمل تجريب واجتهاد ونجر من الراس

    لكن برضو ما برد الكلام ده عن تساؤلاتي الفوق
    لو اخدنا بلدنا تحديدا نجد انو مهنة الطب بالذات عاملة مشاكل واشكاليات مع انو البمارسوها عندهم شهادات ولو راجعتي البورد ده بس حا تمر بيك اكتر من حالة بتقول انو الطبيب صاحب الاجازة في موقف ما عجز عن معالجة شخص ما ويمكن ضراه كمان .. والحكاية دي تكررت لدرجة انها بقت ظاهر شكتت في مؤهلات اطباء بلادي .. وانه هل الشهادات البحملوها فعلا تؤهلهم لممارسة مهنة الطب

    ومن زاوية تانية
    نجد ان كثير من ممارسي الطب البديل او الطب البلدي او حتى الطب النبوي ينجحون بطريقة ما في علاج كثير من الحالات يعجر عن علاجها الطب الاكاديمي

    بحكم تجربتي القديمة اثناء لعب كرة القدم
    شاهدت اكثر من حالة لشخص كسرت ساقه ثم كسرت مره اخرى بسبب خطا طبي
    وعندي صديقين ( نذار وعضل ) الاتنين كسرت ساقيهما ودخلوهم جبص عمله الطبيب
    بعد كم يوم فكو الجبص وعملوا جبيره عند ود البدري في المورده
    وعضل تحديدا ود البدري كسر ليه ساقه تاني وقال ليه منزله غلط
    وهسع الاتنين جارين في الشارع

    كتير من الامراض تداوي باعشاب بلدية عند ناس ما عندهم شهاداتمشوا ليهم الناس بعد ما حفو من مساسكة العيادات

    انا ما بقول انو نخلي الطب الاكاديمي ونمسك في البديل
    لكن المثال الضربتيه بياكد انو الشهادات لا تعبر عن علم حاملها في كثير من الاحيان
    وظاهرة في مجال الطب تحديدا في السودان

    بعدين ليه دون الدرجة العلمية لا افتاء ولا ممارسة ؟
    السبب شنو ؟
    ومنو القال كده؟

    عاوزين اسباب منطقية تدعم الكلام ده

    والطب الصيني وين من ده .. عارف انو قامت ليه معاهد وكليات هسع .. لكن لسع وبصورة كبيرة بمارس خارج نطاق الاكاديميات البحته

    شكرا كتير ياخ
                   |Articles |News |مقالات |بيانات

15-11-2008, 12:51 PM

khalid abuahmed
<akhalid abuahmed
تاريخ التسجيل: 25-10-2005
مجموع المشاركات: 3122

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    الاخ وليد

    أحيك ..هذه المرة على طرح هذا الموضوع الجاد والهام، كما قال لك أحد الاخوة لا تتشعب كثيراًً، خليك على عنوان البوست أعتقد أن هذا البوست هو موضوع الساعة وفيه أحاديث كثيرة لأن بعض الاخوة لديهم فهم مغلوط في موضوع الشهادة الجامعية، مثلاً أن يعتقد شخصاً ما أن عديمي الشهادات الجامعية والذين منعتهم ظروفهم الخاصة من الالتحاق بالجامعة جهلة أو لا يحق لهم المشاركة في طرح الأفكار والرؤى المختلفة، في حين أن غالبية العلماء الذين صنعوا لنا الحياة الحديثة التي نعيشها لا يملكون شهادات جامعية وفي السودان لدينا شواهد كثيرة على ذلك مثل استاذنا المرحوم محمد الحسن أحمد عميد الصحافة السودانية لم يدرس حتى الخلوة، لكنه أصبح من أشهر الصحافيين السودانيين وهناك العديد الكبير في مجالات الموسيقى والفنون والتراث والعلوم الآخرى.

    أ{جو أن يجد هذا البوست الاهتمام اللائق..
    وشكرا اخي وليد
                   |Articles |News |مقالات |بيانات

15-11-2008, 01:23 PM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: khalid abuahmed)

    الاخ خالد ابو احمد
    شكرا كتير على التحية والاهتمام بالموضوع


    Quote: في حين أن غالبية العلماء الذين صنعوا لنا الحياة الحديثة التي نعيشها لا يملكون شهادات جامعية وفي السودان لدينا شواهد كثيرة على ذلك مثل استاذنا المرحوم محمد الحسن أحمد عميد الصحافة السودانية لم يدرس حتى الخلوة، لكنه أصبح من أشهر الصحافيين السودانيين وهناك العديد الكبير في مجالات الموسيقى والفنون والتراث والعلوم الآخرى.


    فعلا اخونا خالد
    خاصة الايام دي بعد ما اصبح التعليم استثمار .. زيه زي بيع الطماطم
    استثمار بالنسبة للصرح التعليمي من جهة وبالنسبة لمقدم العلم ( الاستاذ ) من جهة اخرى
    عشان كده ظهرت الكلفته والايجاز المضر كسبا للوقت او الاطناب المضر كذلك لمل وقت
    بقي العلم ما عشان العلم
    عشان الكسب المادي
    او قشرة اجتماعية
    ما بتحدده الرغبات ولا حتى المؤهلات

    وبظهور هذا الكم الكبير من الصروح التعليمية
    اصبحت الشهادات من كل شكل ونوع ويصعب جدا ضبطها وتقويمها وتقيمها

    يا زول شكرا تاني
    ونحاول ننضبط وما نمرق من خط راس الموضوع
    كان الله هون

    اسعدنا مرورك
                   |Articles |News |مقالات |بيانات

15-11-2008, 02:00 PM

Frankly
<aFrankly
تاريخ التسجيل: 05-02-2002
مجموع المشاركات: 34875

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    الشفت وليد
    تحية وسلام

    تعرف كان عندنا بروفيسور جد جد يعني درجة علمية في تخصصه هو أحد ثلاثة مؤلفين لكتاب يعد المرجع الأم في مجاله

    لكن في الحياة اليومية والمعلومات العامة هو مثار تندر وضحك من الكل , زملاء وطلاّب علم

    شخصية مهزوزة جداً ومتردّدة جداً لا يستطيع محاورة عامل النظافة الذي لم يكمل تعليمه المتوسط في أي من المواضيع خارج حدود تخصصه الضيّق

    لذلك أرى أن تضّمن تساؤلاتك هذه سؤالاً:

    هل على من يملك درجة علمية في تخصّصه يتحتّم أن يكون بديع زمانه في في شتى ضروب العلم ؟

    يعني هناك من يحمل لقب أكاديمي قبل اسمه ويريد أن يتكلّم في كل شيء ويريد من الأخرين غير المتخصصين في نفس موضوعه الي هو بدوره غير متخصص فيه أن يسمعوا له وينصتوا ويأخذوه كله كلاماً قطعاً ممّن لُقّب بال"د." مثلاً وكأنّ لقبه هذا يجوّز له أن يتنقّل به بين مضارب العلم بصفة "د." حتى ولو كان لقبه في "مسارب النمل وسعيه الحثيث لادّخار قوته الشتوي"

    تحياتي كمال
                   |Articles |News |مقالات |بيانات

15-11-2008, 03:06 PM

AnwarKing
<aAnwarKing
تاريخ التسجيل: 04-02-2003
مجموع المشاركات: 11481

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: Frankly)

    كمال فرانكلي...
    والله مشتاقين يا زول يا زين...
    لعلك بخير واسرتك...

    ----------

    يوجد بُعد آخر مجتمعي...وهو إحتفاء المجتمع نفسه بالمتعلم صاحب الشهادة العلمية (بكل صنوفها)، وغير حامل الشهادة...

    على سبيل المثال...هنا في كوريا الجنوبية، يتم سنوياً تكريم الشخص الذي أدّخر أكثر في البنك...وهذا العُرف يجري منذ سنوات
    طويلة جداً ، حينما كان الكوريين فقراء جداً ...وتحتاج الحكومة لكل مليم من مدخراتهم لتمويل النهضة الصناعية...

    أول من تم تكريمه...كان نقلتي...(بتاع تصليح أحذية وتلميعها)...قبل سنوات طويلة، عبر البوستة والبريد حينها...
    وهذا نموذج لتكريم شخص من قبل المجتمع والدولة ، لتطبيقه مثلاً أسس إقتصادية على
    المستوى الشخصي...بدون شهادات عليا وهيلامانة وجوطة...

    ما يزال الإحتفاء بهذا الشخص جارياً كل سنة في كوريا...وذلك بتجديد الجائزة
    للشخص صاحب أعلى إدخار سنوي في رصيده البنكي


    وهنا يحضرني سؤال مهم جداً: هل يتم عندنا مثلاً : الإحتفاء ببائعات الشاي (وما أكثرهن) بكل عظمة الرسالة التي يقومون بها،
    من مكسب حلال...وتربية الأجيال؟

    أم يتم تمريغ سمعتهن بالتراب وملاحقتهن من قبل عمال البلدية والصحة والخ؟

    ولي عودات...

    أنور
                   |Articles |News |مقالات |بيانات

15-11-2008, 05:00 PM

حمور زيادة
<aحمور زيادة
تاريخ التسجيل: 28-03-2007
مجموع المشاركات: 12116

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: AnwarKing)

    Quote: رائي الشخصي انو الاجازات العلمية هي مفتاح فقط بيقول انه الزول ده تلقى دراسة في العلم ده

    قد يستقد ويفيد من هذه الدراسة .. وقد لا


    وليد ازيك ..
    لا نمل قط ترديد مثال الاستاذ العملاق العقاد .. الذي لا درس و لا يحزنون .. لكنه ملك العلوم الفلسفية و النقد و الشعر في الوطن العربي الذي لم يأتي بعده حتى الان احد مثله
    كان العملاق يجلس في صالونه و يحاور اساتذة الفلسفة المتخصصين الذين يدرسونها في الجامعة لطلابهم فيردهم خاسرين ..
    دعك من الاطباء الادباء .. رواية و شعرا ..

    تحيز اهل المهن لمهنهم و اهل العلوم لعلومهم شئ معلوم .. و حفظ حقوقهم فيها واجب .. فلا يمكن لشخص لم يدرس علما ما بصورة منهجية (سواء اكاديمية او فردية ) ان يجتهد لمجرد انه وجد معلومة عنة في كتاب او موقع الكتروني ..
    لكن عدم التخصص العلمي لا يعني ان يصمت المرء و لا يفتح فمه حتى يأتي كهنة المعبد المقدسون ليتكلمو هم و يسمع الناس ..

    دم بخير
                   |Articles |News |مقالات |بيانات

15-11-2008, 06:54 PM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: حمور زيادة)

    يا حمر ازيك ياخ
    ياخ مثال الاستاذ الطيب محمد الطيب رحمة الله عليه ما حاجة واضحة في السودان
    تراث السوان ما نصه كان في صدره

    ترباس ده ما امي
    ناس بتقرا صوت اربعة سنوات وحضرت قدرهم ما بتقدر تتعامل مع المايك زيو

    بعدين هو غير اهل القانون الغطس حجر البلد شنو ؟

    موش الترابي قانوني وهو اكبر منهتك للقوانيني في السودان
    على عثمان موش قانوني وهو نائب رئيس دولة وصلوا للحكم بصورة ما بتشرف زول قانوني

    هسع مشكلة دارفور دي ما كانوا بحلوها عمد ما فكوا خط وبحلوا اعقد الملفات من بدري
    وكت ما دخل فيها اهل القانون الاكاديميين
    جاطت

    __________
    بره الموضوع
    دينا زولة حلوه للدين
    ومن حسناتها انها واضحة زي اللمبة الفوق راسي دي
    وبتقول رايها توشك
    المشكلة انو رايها الدور ده كان ناشف للحد البعيد
    ما تزعل منها
    لي قدام حا تحبها جدا

    (عدل بواسطة وليد محمد المبارك on 15-11-2008, 06:54 PM)

                   |Articles |News |مقالات |بيانات

15-11-2008, 06:12 PM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: Frankly)

    مرحب فرانكلي

    والله يا كمال مع انو قالوا ما نشعب الموضوع .. لك تظل المشكلة في الشخصية السودانية

    شخصية هشة للحد البعيد

    تغتر وتترفع وتتافف بسرعة عندالمدح
    تنهار وتهد المعبد في راس الجميع عند النقد

    خلاص الدكتور دكتور في اي حاجة وما بقبل زول ما عنده ( د.) زية يناقشه في تركيب ماسورة
    حتى لو كان الزول ده سباك بالوراثة
                   |Articles |News |مقالات |بيانات

15-11-2008, 06:36 PM

Tragie Mustafa
<aTragie Mustafa
تاريخ التسجيل: 29-03-2005
مجموع المشاركات: 49964

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    العزيز وليد
    اولا بوست له طنة ورنة
    ويعني قعدته في الواطته دي وفاقت كتابتك الخمسه سطور
    معنها الامر فعلا جادي جدا.


    وشكلك وصلت لقواعدك سالما
    وحمدا على سلامتك.



    اخي
    انا بتفق معاك في حاجات
    انه مرات الهواة اذا جاز لنا اعتبارهم هواة
    بيكنوا اخطر من المتخصصين.
    يعني مثلا حمرو قد يكون عرج على القانون من باب الهواية
    ولكنه ممكن يتبحر في العمل لانه جايه عن رغبة حقيقيه
    اكثر من المحامي المتخصص البيكون مقيد بفهم ما يعرف (بقانون الاجراءات).



    وهذا مثل يمكن تعميمه على كل شيئ وكل علم.


    مثال آخر
    يقال ابدع الشعراء لم يكنوا نحويين.

    واعلظم علماء النحو لم يتمكنوا من الابداع
    عارف ليه؟؟؟لانه قالوا بتقيدهم معرفتهم النحويه فلا يطلقون العنان لموهبتهم.



    الناس الزي حمور ديل ممكن يصلوا لقيم وحقائق افضل وهي استنباط معنى العداله المجرده
    وامرر هذا يشمل كل مجال.



    كلام دينا مثلا ليس خطأ فهي فعلا كقانونيه ملزمة ان تلتزم بالقانون.
    ولكن يفوت عليها ان الراي العام فعلا يؤثر ويجب ان يؤثر لانه القوانين
    اصلا تستمد من قيم المجتمع,وبعدين القوانين دي ما مطلقة وانما نسبيه يعني
    ممكن تعدل وتصحح وغيره.اي ليست الالهيه.


    بعدين خرمجة العامة دي مهمة جدا
    لانها هي التي توجه الراي العام.


    كلن فعلا تنبيه دينا لنا ايضا صحيح
    فقد كانت بمثابة الناقوس الصحانا الا نحلم بعدالة كثيره لانه توجد قيود.



    خليني اديك مثال
    قضية( سمبسون) كل الامريكان كانوا مقتنعين انه قتل زوجته
    ولكن القضاء برائه!!


    لفى الزمن ودار وتورط في قضية آخرى وهاهو يقضيى عقوبة طويلة الامد
    مما جعل الناس يقولوا ان الله يمهل ولا يهمل!!


    يبقى الخلاصه العلوم يا وليد لن تستغنى ابد عن المتخصصين بها ولا الهواة لها
    لكل منهم اسهاماته التي ستؤدي لتطورها.



    تحياتي.
                   |Articles |News |مقالات |بيانات

15-11-2008, 08:16 PM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: Tragie Mustafa)

    تراجي سلامات

    والله لسع في الامارات

    Quote: واعلظم علماء النحو لم يتمكنوا من الابداع
    عارف ليه؟؟؟لانه قالوا بتقيدهم معرفتهم النحويه فلا يطلقون العنان لموهبتهم.


    ده كلام عظيم يا تراجي
    وبما انه اي حاجة كان تنفيذية ولا ابداعية موجهة للعامة
    فلاذم راي العامة يكون فيها مسموع

    Quote: يبقى الخلاصه العلوم يا وليد لن تستغنى ابد عن المتخصصين بها ولا الهواة لها
    لكل منهم اسهاماته التي ستؤدي لتطورها.


    وده كلام برضو عظيم ومتفقين عليه

    تحياتي لجوز اللوز

    (عدل بواسطة وليد محمد المبارك on 15-11-2008, 08:17 PM)

                   |Articles |News |مقالات |بيانات

15-11-2008, 06:26 PM

Elsiddig A. Ahmed
<aElsiddig A. Ahmed
تاريخ التسجيل: 28-10-2006
مجموع المشاركات: 309

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    الاخ وليد بعد التحية والسلام

    هذا البوست له اهمية خاصة ونحن بني السودان كثيري التنظير وعندنا راي فى كل صغيرة وكبيرة واعتقد هنا مربط الفرس كدا نبدا اولا بالتعليم النظامي من التعليم قبل المدرسي وانتهاءا بدرجة الاستاذية
    اولا الاجازات الاكاديمية ماهى الا عبارة عن اعتراف رسمي من المؤسسة المانحة بان فلان بن فلتكان حصل على الدرجة الفلانية من العلم لكن هل هذه الدرجة العلمية المتحصل عليها كافى لجعل زيد او عبيد ضليع ومجضم الشغلانه ولا تحصيل حاصل هناك الكثيرين من اصحاب هذه الدرجات فاطين سطور تقول الواحد فيهم متخرج من ست فله
    وعموما التعليم هو عبارة عن تدريب عملى خاصة التعليم الجامعي لتمليك الدارس مفاتيح التفكير النقدي وكيفية التعامل فى الحياة العامة والعملية
    لذلك نجد اشخاص كثر لم يحصلوا على اى نوع من التعليم النظامي لكنهم برعوا فى عدة مجالات وحققوا نجاحات غير مسبوقة ومثال لذلك حكى احد اعضاء المنبر قصةالموظف وهو خريج جامعى كان يعمل مع الشيخ مصـطفى الامين رحمه الله عليه ارسله لشراء سمسم من القضارف رجع الموظف دون ان يشتري السمسم ساله الشيخ يا ولدى وين السمسم رد عليه بانه وجد السعر مرتفع وبسرعه البديههوالخبرة مايهو دا السعر بمعنى اخر اى السعر بيتم تحديده حسب الطلب و العرض دا نموذج واحد مع ان الموظف خريج اقتصاد
    ثانيا هناك علوم وتخصصات فعلا محتاجة لتعليم نظامى مثل الطب والصيدلة لا لشئ سوف المحافظة على ارواح الناس اما بقية العلوم الاخرى ممكن لاي شخص طموح ويمتلك من الذكاء والعبقرية ما يؤهلة لسبر اغوار ما يتطلع اليه يمكن ان يحقق المعجزات وهناك علماء كثر ليست لديهم اجازات اكاديمية اكتشفوا واخترعوا واصبحت منجزاتهم مراجع اساسية فى مجال تخصصهم
    اما فى السودان يمكن لاى فرد ايا كان مستواه التعليمي ان يفتي لك فى السياسة الاقتصاد شئون الخلق والعباد و لا اعتقد دى مشكلة كبيرة لان السودانين شعب بيحب القراية والثقافة العامة لكن جزء كبير من معارفهم تمت عن طريق المشافهة اى التلقى من الاخرين حتى الطب لم ينجو من ذلك تجد واحد يوصف اعراض المرض ونوع الدواء وعندما تذهب للطبيب تلقى كلامو طلع صاح وقس على ذلك
    عموما الانسان بكتسب معارفه من من الاخرين وبالممارسة وتراكم الخبرة كما ان اصحاب الاجازات الاكاديمية كثيرين منهم يتوقفوا عند اخر كتاب او مرجع اتطلع عليه اثناء الاستعداد للتخرج لذلك لا حرج ان تجدهم غير ملمين باخر المستجدات فى مجال تخصصه العامل بيهو جوطه وممكن يا وليد تسال اى واحد من طرف ممن تخصصوا فى الاقتصاد عن الازمة المالية العالمية كيف حدثت وما مدى تاثيراتها على السودان

    موضوع البوست شيق وممتع وحقيقة محتاجين تسليط الضوء على مثل هذه الاشياء
    تشكر يا وليد

    الصديق عبد المجيد
                   |Articles |News |مقالات |بيانات

15-11-2008, 10:04 PM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: Elsiddig A. Ahmed)

    الاخ الصديق
    سلامات واحترامات

    Quote: اولا الاجازات الاكاديمية ماهى الا عبارة عن اعتراف رسمي من المؤسسة المانحة بان فلان بن فلتكان حصل على الدرجة الفلانية من العلم لكن هل هذه الدرجة العلمية المتحصل عليها كافى لجعل زيد او عبيد ضليع ومجضم الشغلانه ولا تحصيل حاصل


    Quote: وعموما التعليم هو عبارة عن تدريب عملى خاصة التعليم الجامعي لتمليك الدارس مفاتيح التفكير النقدي وكيفية التعامل فى الحياة العامة والعملية


    شكرا ليك انت ياخ
    لاهتمامك
                   |Articles |News |مقالات |بيانات

15-11-2008, 10:49 PM

سيف النصر محي الدين محمد أحمد

تاريخ التسجيل: 12-04-2011
مجموع المشاركات: 0

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    سلام يا وليد
    Quote: هل تستوفي الاجازات الاكاديمية والعلمية ما يحمله الفرد من علم ؟


    اعتقد أنه في معرض الاجابة على هذا السؤال لازم نثبت بعض النقاط الأساسية,مثلا من تلقى تعليما
    و تدريبا اكاديميا منضبطا بالضرورة هو في درجة متقدمة نسبيا على من سلك نفس المجال و اعتمد
    في تحصيله المعرفي على طرق أخرى غير الطريق الاكاديمي المؤسسي..الشهادة تضع الواحد في طريق
    ممهد للمعرفة يسهل السير فيه..قد يكتفي البعض بما حصل عليه فيتوقف بينما يتقدم الآخرون.
    و نقطتي الثانية أن حملة شهادة عليا في تخصص ما ليسو بالضرورة متساوين في مقدار علمهم به
    و ابداعهم في تطبيقاته و إلا لماذا ينجح البعض في الاضافة و الابتكار بينما غيرهم يمضي بقية
    حياته مستهلكا و مستعيدا لما علمه أول مرة,إذن حملك للشهادة لا يعطيك صكا بأنك قد جمعت علوم
    الاولين و الأخرين في مجال علمك.النقطة الثالثة و هي اتفق فيها مع مريم الحسين أن هناك فارق
    بين العلوم الانسانية ذات الطابع النظري و بين العلوم الطبيعية ذات الطابع التطبيقي من حيث
    قيمة الشهادات و دلالاتها على كم المعرفة التي يملكها حائزوها.
                   |Articles |News |مقالات |بيانات

16-11-2008, 04:59 AM

Al-Sadig Yahya Abdall
<aAl-Sadig Yahya Abdall
تاريخ التسجيل: 01-05-2006
مجموع المشاركات: 485

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: سيف النصر محي الدين محمد أحمد)

    الاخ/ وليد صباح الخير
    في رايي الاجابة هي لا و نعم و ساعود مفصلا.... و ارى ان الالقاب العلمية تستخدم احيانا لارهاب الاخر في هذا المنبر
    و لنا عودة،،،
    و دمت
                   |Articles |News |مقالات |بيانات

17-11-2008, 03:58 AM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: Al-Sadig Yahya Abdall)

    الاخ الصديق

    في الانتظار
                   |Articles |News |مقالات |بيانات

16-11-2008, 05:39 AM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: سيف النصر محي الدين محمد أحمد)

    سلامات سيف النصر


    Quote: الشهادة تضع الواحد في طريق
    ممهد للمعرفة يسهل السير فيه


    Quote: إذن حملك للشهادة لا يعطيك صكا بأنك قد جمعت علوم
    الاولين و الأخرين في مجال علمك


    Quote: اتفق فيها مع مريم الحسين أن هناك فارق
    بين العلوم الانسانية ذات الطابع النظري و بين العلوم الطبيعية ذات الطابع التطبيقي من حيث
    قيمة الشهادات و دلالاتها على كم المعرفة التي يملكها حائزوها


    في رائي السبب انه العلوم التطبيقية مشاكلها انية وتظهر مباشرة
    يعني من الاول بتعرف الزول صاحب العلم من الزول الكضاب وشايل شهادة ورق

    لكن العلوم الانسانية عاوزة وكت طويل جدا عشان تكتشف هل فعلا صاحب الشهادة بحمل علم ولا زول بياع كلام
                   |Articles |News |مقالات |بيانات

17-11-2008, 04:49 AM

دينا خالد
<aدينا خالد
تاريخ التسجيل: 26-06-2006
مجموع المشاركات: 8736

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    وليد صاحبى !

    ياخ اكعب حاجه الواحد يمشى الامارات دى وهو مفلس

    بتحول بقدرة قادر لى فيلسوف عظيم وعبقرى لا يشق لة غبار

    والاهم من دا كله ما بقدر ينوم ,,,,, لووووووووووووول

    خلينى اشرب لى شاى واجيك اقول ليك الكلام دا واااااااحده وااااحده

    انت قايلنى انا بتكلم مع اى زول ............ سجمكم ...

    وبعدين تقول لى شاربة شنو ؟ ياخ انا فى ام القوين ؟



















    ـــــــــــــــــ
    اووووووووعك تمشى السوق ,, ما بفتح هسه .. انتظرنى
    الغريبة بوستيك دا ما شفتو الا الان ... اقيف
                   |Articles |News |مقالات |بيانات

17-11-2008, 04:53 AM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: دينا خالد)

    Quote: الغريبة بوستيك دا ما شفتو الا الان ... اقيف


    طمنتيني
    وانا القت دينا ركبت لي مكنة بت شهادة عربية

    عاينت لي من فوق لي تحت مطت شلوفتها وقالت

    بسسسسسسسسسسسسسسسسسسسسسسست حِكَم

    وشتتي

    (عدل بواسطة وليد محمد المبارك on 17-11-2008, 05:01 AM)

                   |Articles |News |مقالات |بيانات

17-11-2008, 06:27 AM

أسامة الفضل
<aأسامة الفضل
تاريخ التسجيل: 13-06-2008
مجموع المشاركات: 1277

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    العزيز وليد
    لك التحية
    أصعب شيئ شرح المعروف من الأمور.
    فنحاول تعريف مصلح التعليم الذي في رأي المتواضع كان لا يعني الذهاب إلي المدارس والجامعات و إنما يعني الحصول على كامل المعرفة المتوفرة آنيا في علم أو علوم ما. و قد تم ربط ذلك حديثا بالمراحل التعليمية لأنك في المراحل حتى الثانوية تدرس معارف عامة وفي الجامعات تدرس تخصصات و تم ربط ذلك بالإجازات العلمية لأن الحاصل على دبلوم هندسة مدنية لا يكون قد تحصل على كامل المعرفة في ذاك المجال مثل من حصل على درجة الدكتوراة. عليه نظريا يكون الحصول على أعلى الشهادات في مجال ما مرتبط بعدد السنوات التي قضاها أحدهم في تعلم ذلك المجال و الأخير مرتبط بالشهادة في ذلك المجال,
    عليه إذا موضوع البوست هو; هل الشهادات العلمية العليا تخول لصاحبها لقب العالم في مجاله? فالإجابة هي نعم إذا استثنينا بعض الحالات الشاذة والدليل أنك لن ترضى أن يجري لك عملية جراحية - لا قدر الله- إلا من تعرف أنه تخرج من أحسن الجامعات وحصل على أعلي الدرجات.أما إذا كان الموضوع هل العلماء فقط هم من يحملون الشهادات العليا ? فالإجابة هي أيضا نعم إذا استثنينا بعض الحالات الشاذة . لأننا اتفقنا على علاقة الشهادات العلمية بالحصول على كامل المعرفة في ذلك المجال.
    نأتي لبعض النماذج المذكورة والتي لم تحصل على شهادات . هنا نأتي لنقطة مهمة جدا وهي الفرق بين العالم والمبدع - شاعر..قاص ..الخ- المبدع مثل العقاد ليس عالما والإبداع تصلقه الدراسة ولكن عدمها لا يقتله كما أن الكثير من العلوم النظرية كانت في يوما ما تدرس من قبل أشخاص و في أماكن لا تمنح الإجازات العلمية ولكن يقال فقط أن فلانا درس على يد فلان وهذه تعتبر درجة علمية رغم أن الدارس لم يتحصل فعلا على شهادة.
    أما نموذج أديسون فهو يدخل في ما قلناه في البدء.أي أنه حصل على كامل المعرفة المتوافرة في مجاله لذا فهو عالم.
    هناك نقطة مهمة جدا أن ما ينطبق على الماضي لا يمكن تطبيقه الآن بمعني أن المعرفة أكثر الآن و العارفون أقل وهذا يرجع لظروف كثيرة ليس هذا مكانها عليه أنا الآن أثق قليلا في أصحاب الشهادات العلمية ولا أثق مطلقا فمن لا يحمل شهادة في كل المجالات إلا مجال واحد و هو الكومبيوتر.
                   |Articles |News |مقالات |بيانات

17-11-2008, 07:01 AM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: أسامة الفضل)

    الاخ اسامه الفضل سلامات


    Quote: ولا أثق مطلقا فمن لا يحمل شهادة في كل المجالات إلا مجال واحد و هو الكومبيوتر.


    لماذا لعلم الحاسوب خارج الحسابات ؟

    ارجو التوضيح

    بالنسبة لعلاقة المعرفة الكاملة بالشهادة العلمية
    الكلام ده كان قبل سنوات جائز
    لكن الان ومع الانفتاح المعرفي الهائل وثورة المعلوماتية
    اصبح التثقيف الشخصي اهم من الدراسة الرسمية لانه العلم بتجدد بسرعة لا تستطيع مجاراتها وتداركها قيود ورسميات قاعات الدرس

    كثير من العلوم التي تدرس في جامعاتنا ( جامعاتنا تحديدا ) اصبحت تاريخ للعلوم
    والمتميز من يجتهد خارج نطاق الجامعة للمواكبة وتطوير الذات

    والممارسة بالطبع اهم منهم الاثنين
    زائدا الملكات الفردية للشخص


    في بلادنا علم طب العظام يسيطر عليه البصير اكثر من الطبيب
    والثقة فيه في كثير من الاحايين اكثر من الثقة في الطبيب
    ده واقع معلوم

    اهم من ده كله
    تاريخ اعتماد الشهادات او الاجازات الاكاديمية في العالم كم سنة ؟
    وقبليه كيف كان الامر ؟


    Quote: والإبداع تصلقه الدراسة ولكن عدمها لا يقتله

    دي نقطة مهمة جدا

    اختلف معاك في تعريف العقاد بالمبدع فقط
    فالعقاد مبدع وعالم

    وعشان نمشي لي قدام
    ما هو تعريف المبدع؟
    وما هو تعريف العالم ؟
    وما هو الفرق بينهما؟


    شكرا كتير على الاضافة
                   |Articles |News |مقالات |بيانات

17-11-2008, 07:29 AM

أسامة الفضل
<aأسامة الفضل
تاريخ التسجيل: 13-06-2008
مجموع المشاركات: 1277

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    العزيز وليد
    Quote: لماذا لعلم الحاسوب خارج الحسابات ؟
    أوعي تكون بتاع حاسوب?

    لا أعرف قد يكون بسبب أن معظم ممن أعرف أن لهم دراية كاملة في الكومبيوتر ليس لديهم شهادات فيه وربما لأنه يحتاج للمبدع الفنان أكثر من العالم خاصة الSOFTWARE وربما لأنه علم جديد نسبيا و مجال لإجتهاد فيه ما زال كبيرا. الحقيقة لا أعرف.
    الثقافة هي معرفة شيئ من كل شيئ و لا تجعل المرء عالما و إن كانت تجعله مثقفا.
    الحديث لم يكن عن جامعاتنا و إنما عن المعرفة عامة.
    على حسب علمي المتواضع أن المبدع هو صاحب الملكة و الموهبة الفطرية في مجال ما فإذا قرن ذلك بالمعرفة الكاملة في ذلك المجال أصبح عالما مبدعا و لا يشترط أن يكون المبدع عالما كما لا يشترط أن يكون العالم مبدعا.
                   |Articles |News |مقالات |بيانات

17-11-2008, 08:14 AM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: أسامة الفضل)

    العزيز ود الفضل

    شهادتين وحاتك في الحاسوب وتمرقني كيييييييت كده

    ______________

    Quote: لا أعرف قد يكون بسبب أن معظم ممن أعرف أن لهم دراية كاملة في الكومبيوتر ليس لديهم شهادات فيه وربما لأنه يحتاج للمبدع الفنان أكثر من العالم خاصة الSOFTWARE وربما لأنه علم جديد نسبيا و مجال لإجتهاد فيه ما زال كبيرا. الحقيقة لا أعرف.


    تجربتك الشخصية بتنطبق على ناس تانيني في مجالات تانية

    Quote: الثقافة هي معرفة شيئ من كل شيئ و لا تجعل المرء عالما و إن كانت تجعله مثقفا.


    ما اختلفنا ومتفقين
    Quote: الحديث لم يكن عن جامعاتنا و إنما عن المعرفة عامة.


    خلاس بضيف ليك معاها ناس رومانيا والهند ( ما كلها ) ومصر ودول تانية كتيره
    يعني اسحب الكلام ده وديه للمعرفة العامة

    Quote: على حسب علمي المتواضع أن المبدع هو صاحب الملكة و الموهبة الفطرية في مجال ما فإذا قرن ذلك بالمعرفة الكاملة في ذلك المجال أصبح عالما مبدعا و لا يشترط أن يكون المبدع عالما كما لا يشترط أن يكون العالم مبدعا.


    عليك نوووووور
    قرن ذلك بالمعرفة الكاملة .....
    والمعرفة الكاملة لا تحدها قاعات الدروس ولا تاطرها شهادات

    اعتقد ان المبدع عالما في مجال ابداعه حتى لو كان العلم ده علم فطري علمته ليه الطبيعة او كان في الجينات حقته ولن تبدع في شي انت غير ملم بيه
    والابداع بميزك من بقية فاعلي الشي نفسه
    فهم يفعلونه بالحد الادني
    وانت تبدع فتضيف عليه مع احتفاظك بالقيام بحده الادني


    اتفق معاك لا يشترط ان يكون العالم مبدعا

    كل الود
                   |Articles |News |مقالات |بيانات

17-11-2008, 06:48 AM

دينا خالد
<aدينا خالد
تاريخ التسجيل: 26-06-2006
مجموع المشاركات: 8736

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)


    وليد .. ياخى صباحك خير وبعدين نتشاكل

    اولا انا ما قلت الناس ما تتكلم فى القانون والقوانين والقانونيين ظاطم ,,

    ابدا الناس بتقول اراءاها ذى ما عايزة وانا قلت فى كلامى الاووول فى بوست
    ( خطوات جاده لاعادة محاكمة مغتصب حمادة ) .. انو الراى العام فى مراحل سن
    التشريعات والعامة ديل ذاتهم عندهم دور (اساسى ) فى التاثير على صياغة التشريع
    يعنى دورهم اخطر لانو متعلق بخلق القانون ذاتو ... وحتى المجلس التشريعى لو انت لاحظت
    تكوينو بكون معظمه من غير القانونيين بكون من سياسيين ونخب اجتماعية وعمد وبتاعين علوم وكمبيوتر
    واطباء وعمال وزراع ,, لانو ديل كلهم لازم يضعو بصمتهم فى صياغة القوانين وحدودها

    لانو ذى ما قلت انت او احد المتداخلين انو القانون فى النهاية تعبير عن المجتمع
    نظرة واحده لقوانين اى بلد كفيلة بتصنيفها .. الى بلد متخلف او بلد راقى ومتقدم


    اها دا من ناحية القانون ...

    برضو فى اى مجال تانى ذى ما قلت ليك هناك ممكن نطق الحنك
    .. ونقول ليكم والله يا ناس الكمبيوتر علمكم دا
    ماااا نافع معانا لانو خليتونا نكتب ونتكلم لكن لسسسسسسسسسه ما قدرتو تخلونا نشم
    الزول البتكلم معاه !! وننتقدكم ونطوووووووول لسانا رغم انو الواحد بكون لو جهازو فتح
    ما بقدر يقفلوا او العكس ,,
    بكون مثلا قاعدة معاك فى دكانك وبتفاصح فى علوم الكمبيوتر من يوم ما حفروا الكمبيوتر
    وانت بتتبادل معاى الاراء وتجادلنى لكن اوووول ما يختو ليك لابتوب قدامك يقولو ليك
    صلحو .. ما بتخلينى ادخل يدى معاك .. ولوابتديت اتدخل واتشاور وانت بتصلح يا دووووووب
    البسطونتين بجونى فى راسى الكبير ..

    نفس القصة فى الطب نتفاااااااااصح لكن اووول ما يختو حالة بعينها فى التربيزة تانى
    مافى زول بيدخل يدو الا طبيب .. وكذا السباك والجناينى والترزى والنجار واى صنايعى او مهنى
    او مزارعى وحتى العمال ... يعنى يا وليد التعامل مع اى كيس فى اى مجال بكون محتاج تدابير
    فنية ,, لا تتوفر الا لمتخصص ,,,

    صاح فى ديل كلهم كل شيخ عندو طريقتو ،، لكن بيفضل حاجز الشرعية مهم لحماية العمل
    نفسه ... صاح ممكن يكونو فى نا سس جربندية افضل من متخصصين كتار لكن بفضل سياج
    شرعية الممارسة حاجز مطلوب عشان الناس ما بتقيس على النشاز والحالات النادرة بنفضل
    محكومين بمقاييس ومعايير مطلوبة لتنظيم الممارسة نفسها وتحديد المسئولية وعواقبها
    او ما يترتب عليها من تبعات ... صاح ممكن الحواجز دى تحرم قلة من معرفتهم ومواهبهم لكنها
    مطلوبة وواجبة الاتباع والا سادت الفوضى والقاعده الذهبيه الفقهية بتقول درء المفاسد اولى
    من جلب المصالح ......... كدا كيف ؟؟ تابع معاى ما تمرق سمح ؟؟
                   |Articles |News |مقالات |بيانات

17-11-2008, 07:23 AM

دينا خالد
<aدينا خالد
تاريخ التسجيل: 26-06-2006
مجموع المشاركات: 8736

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: دينا خالد)

    وليد يا صاح ( ذى ما بقولوا المبدعين ) ,,,

    اها دى من الادوات الفنية للمبدعين ما صاح نحن نتبادلها بيناتنا ,,

    نجى لكلامك الفلسفى انو ممكن الزول يكون بعرف فى مجال اخر اكثر من ناسو

    بعدين عايز اقول ليك البعملك محامى مهنى حقيقى مش سنوات الدراسة الاربعة او السته

    والبعملك طبيب ممارس هى مش سنوات الدراسة براها فى الممارسة والخبرة والتواجد فى الحقل

    نفسه البساهم فى افادتك واستفادتك منو .. يعنى انت لما تبتدى تمارس فى مهنتك ظروف
    كتتتتتتتتتتتتيرة ما عندها علاقة بالدراسة هى البتشكلك وبتخلقك ،، التواجد بعيد منها

    بياثر حتى فى ما اكتسبته بالشهادات الاتكلمت عنها يعنى وليد الليلة ما ذى البت اولة دفعتو

    ال بعد ما تخرجت عرسوها وولدت وسافرت السعودية قاعده بين 4 حيطان ... ابدا مافى مقارنة
    رغم انها كانت الاولى عليك ... اتذكرتها ؟؟

    المعرفة دى اصصصصصصلوا مافى زول بقول ليك ما تناقش بيها وتخترع حتى نظريات ،، لكن
    لما نكون بصدد حالة علاجية لى كيس محدد بتقيف معارف الناس وببقى مافى زول مسموح
    ليه بممارسة الخطوات الفنية الا المتخصص حتى لو كان بليد وداك شاطر ومثال ساطع لذلك
    ( دينا - حمور ) ,,,,,,,,,

    دى نواميس الدنيا كدا انت دايما محدود بى شروط يجب توافرها لفعل الاشياء

    يعنى مثال لطاقات الناس وقدرتها .. انت ممكن تكون بتحب 10 بنات
    وبتقدر تعمل 100 علاقة بس انت فى النهاية محكوم بروابط شرعية ماعندها علاقة

    بى انك داير شنو ... وانو العلاقة دى مستوعباك وحاسيها وعايشها اكتر من ديك

    العندك فيها حبل .... بفضل الحبل دا ملفوف حول عنقك يجهض كل مواهبك ورغباتك
    لانو اى حاجه من غير ضوابطها اللازمة بتفضى بالناس للفوضى الشاملة ...

    لو ما اقتنعت قول لى بجيك تانى



















    ــــــــــــــــــــــ
    عندنا كم وليد نحن ؟؟؟
                   |Articles |News |مقالات |بيانات

17-11-2008, 08:49 AM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: دينا خالد)

    اها هسع الجاب سيرة العرس والجكس منو ؟
    انت مرندكة علي ولا شنو ؟

    هاهاهاهاهاهاهاااااااااااااااا
    ما تتعقدي
    خليك واسعة


    _____________

    اقري كلامي التحت ده فيه رد عليك
                   |Articles |News |مقالات |بيانات

17-11-2008, 07:39 AM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: دينا خالد)


    قاعد ليك في حلقومك
    __________


    يا دينا العلاقة بين حامل علم او صنايعي او مبدع اوصاحب مهنة والجمهور بتكون كده

    مُنتِج ( وده صاحب الصنعة او المعرفة )
    مُنتَج ( بغض نظر انو المنتج ده مادي ولا معنوي )
    مستفيد ( وديل نحن الجمهور )

    المنتج متخصص في انتاج الشي ده
    والجمهور مستفيد
    والعلاقة بناتهم المُنتَج ذاتو

    انا كجمهور طالما انو المنتج مستوفى متطلباتي بغم ما بقولها .. ده لو ما شكرت المُنتِج كمان

    لكن بما اني المستفيد الاول والمتاثر الاول كمان من الحاجة دي
    اذا انها ما استوفت متطلباتي
    فبقوم شمطه

    طيب هي ما بتستوفى متطلباتي كيف ؟
    1) انو الصنايعي ولا العالم ولا المبدع قصر لاي سبب... كان نعسان ..اساسا ما مؤهل ..استخدم مواد ما تمام.. ارتكز على فرضيات ما سليمة ...... الخ

    2) انو المصنوع ذاته غير قابل للصنع يعني حاجة ضد نواميس الطبيعة او حاجة لسع العلم ما قدر يوصل ليها
    3) او انا كجمهور متطلباتي اكبر من امكانيات المُنتِج والمُنتَج ذاتو


    عليه لو حصل وانه السلعة ما ارضتني
    بتدخل في جميع مراحل انتاجها عشان ترضيني
    اولا من التخطيط ليها مرورا بانتاجها تعريجعا على طرق استخدامها وصولا لصيانتها

    ود حق مكفول لي بما اني المستفيد والمتضرر من الشي ده

    فلو انو الصنايعي العالم المبدع القانوني بتاع البصل ... الخ
    ارضاني وامتعني واقنعني كجمهور
    كلام بكون مافي

    لكن اي تقصير بيؤدي لاني اتدخل في جميع مراحل الانتاج

    انت لو جيتيني انا بتاع كمبيوتر وبصلح ليك في لاب توب بعد ما عرفتي اني شاطر والذي منو
    واديتني لاب توب فيه مشكلة كرت صوت
    قمت خربتو ليك كله وبدل ما اصلح كرت الصوت قام اللاب توب كضم

    ردت فعلك بتكون شنو ؟
    موش بتراجي فكرة اني زول شاطر دي

    ولو كان عندك معرفة بالتصليح ولو محدوده
    موش بتتابعي معاي الاجراءات في التصليح من الاول باعتبار اني نسيت حاجة او اني ما بفرق منك وما ضليع في الشي ده

    بالنسبة لقضية محمد
    في مشاكل كتيره فيها
    منها الفي عضم القانون
    ومنها الاجرائي

    وده بورد للنقاش
    هدفة تطوير القانون او حتى اجراءات القانون
    عشان محمد ياخد حقة
    والاطفال البعديه ما يتعرضوا للحصل ليه


    انت بتقولي الكلام ما يكون في قضية معينة عشان ما يتم التاثير على القاضي
    ونحن هسع بحكم بديهة الرائي العام والعقل الجمعي للمجتمع
    قاصدين ناثر في القاضي والمشرع مجتمعين
    عشان محمد ياخد حقه كامل لو عنده حق
    لو ما عنده حق
    بنفترض جدلا انو المجتمع سليم لدرجة انو حا يتكون راي عام مضاد يقيف قصاد راينا القلناه

    كده وقع ليك
                   |Articles |News |مقالات |بيانات

17-11-2008, 08:40 AM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    Quote: ال بعد ما تخرجت عرسوها وولدت وسافرت السعودية قاعده بين 4 حيطان ... ابدا مافى مقارنة
    رغم انها كانت الاولى عليك ... اتذكرتها ؟؟


    ياتو بت
    في يتاتو جامعة
    انا قريت جامعتين بالمناسبة ؟

    قاصدا ياتا فيهم
    وبالمناسبة الاتنين ما كنت منتظم في محاضراتهم
                   |Articles |News |مقالات |بيانات

22-11-2008, 11:04 PM

دينا خالد
<aدينا خالد
تاريخ التسجيل: 26-06-2006
مجموع المشاركات: 8736

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    وليد اللهلوبة

    ياخ بتك المهددنا بيها ديك بتخلى زول يرندك ؟؟

    بس من ناحية مرندكة مرندكة !

    اسمع اووووووووول حاجة الضمة دى بجيبوها من وين ؟؟

    تانيا ياخ ممنونة للراى السمح وبعتزر لحمور مرة اخرى

    وحقيقى ما دام انت شفتو تاشف هو فعلا بكون ناشف ! انا مقتنعه انك شوااااف

    بس لما تخالف الزول الراى بتتعبو وتنشف ريقو ,,

    ميزتك انك هلالابى ******* ودمك خفيف ! (جيب وش من سيتى سنتر )

    شوف يا وليد
    المونتج ،، دا عشان ما ( بعرف اجيب الضمة) ،، مرات بكون متطلب شهادة ولا يسانس
    بعدها ... من عير ديل لو انتج بكون مخالف للقانون وبيتسجن

    يعنى المونتج بتاع سوق الله اكبر دا غير المونتج فى سوق المهن !

    معاى انت ؟؟ واضح انو مثلك كان من سوق الله اكبر .........



                   |Articles |News |مقالات |بيانات

22-11-2008, 11:32 PM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: دينا خالد)

    Quote: من عير ديل لو انتج بكون مخالف للقانون وبيتسجن


    تااااااااااااااني جابت سيرة البحر !!!


    قانون منو ياخ

    انا كرهتي العساكر لحدي القضاة

    هو وينو القانون زاتو ؟


    ينضموا معاك في الجكس
    تجيبي لينا سيرة غنية زيدان بتاعت انا الحافظ قوانينو

    ينضموا معاك في الصداقة
    تجيبي سيرة قانون الحياة

    ينضموا معاك في القراية
    تجيبي لينا سيرة قانون اوم

    ينضمو معاك عن الشارع
    تجيبي لينا سيرة قانون المرور

    نقول ليك ليك السفر والرحلات
    تجيبي لينا سيرة قانون الجاذبية والطيارة بتقع والسفينة بتغرق

    نقول في الموسيقى
    تخلي الالات كلها وتمسكي في آلة القانون

    ننضم في الكورة
    تجيبي سيرة برعي الملقب بالقانون

    كرهتينا البلي

    يعني الا تدخلي كلمة قانون
    _________________________

    انت بتغيبي تمشي وين ؟
    ياخ انتي زولة كده
    (اليد في شكلة بنيه واصبع الابهام مرفوع الى الاعلى)
    برضو كيتا في دكين
                   |Articles |News |مقالات |بيانات

22-11-2008, 11:24 PM

دينا خالد
<aدينا خالد
تاريخ التسجيل: 26-06-2006
مجموع المشاركات: 8736

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    Quote: انا قريت جامعتين بالمناسبة ؟


    يعنى لبط بى شهادة !!


    Quote: وبالمناسبة الاتنين ما كنت منتظم في محاضراتهم


    هسة لو كنت انتظمت مش كنت ريحتنا من اللولوة دى يا وليد ياخ ...
                   |Articles |News |مقالات |بيانات

22-11-2008, 11:36 PM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: دينا خالد)

    Quote: هسة لو كنت انتظمت مش كنت ريحتنا من اللولوة دى يا وليد ياخ ...


    خفت الجكس الزيك كده يتكسر فيني
    وانا زول مرتبط


    هاهاهاهاهااااااااااااااااااااااااااااااااااااااااي

    لقيت فيك فرقة
    براك درقتيها لي


    وااااااع
    قرقرقرقرقرقرقرقرق

    ضحكت حتى وقعت طاقيتها
    على قول تماضر شيخ الدين الله يطراها بالخير
                   |Articles |News |مقالات |بيانات

23-11-2008, 03:20 AM

Farahat Sayed
<aFarahat Sayed
تاريخ التسجيل: 24-04-2005
مجموع المشاركات: 592

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: وليد محمد المبارك)

    لكن الفيك اتعرفت
    عاوز تودي اخوك التوج








    الشفت شفتنا برانا


    يظهر انو انور دي هلالابي

    عاوز يوديك وراء الشمس
                   |Articles |News |مقالات |بيانات

23-11-2008, 07:57 AM

وليد محمد المبارك
<aوليد محمد المبارك
تاريخ التسجيل: 04-12-2004
مجموع المشاركات: 26313

للتواصل معنا

FaceBook
تويتر Twitter
YouTube


Re: هل تستوفي الاجازات الاكاديمية والعلمية ما يحمله الفرد من علم ؟ (Re: Farahat Sayed)

    شفت يا فراحات اخوك اتجاوزها بي حرفنه كيف

    كانها ما انكتبت

    هاهاهاهاهاهاهاها
                   |Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de