الشعبية نجمة تزين سماء مدينة الخرطوم بحري (الجزء الثاني)

Quote: تسجيل حضور يا حاج حمد... ومعاكم من أجل الشعبية دائما,... تحياتي

العزيز كمال كرار شكرا لك فقد كنت و منذ بداية بوست الشعبية مؤازرا و مشجعا و كنت أحد الذين حققوا هذا النجاح و الآن تتشرف بضربة البداية في الجزء الثاني..شكرا لك يا رائع

Quote: لي رجاء واحد من الأخوان أن يطلقوا حوش الشعبية و ليس حوش الحاج حمد على تجمعنا.. و بدأ الجزء الثاني من البوست بعد نجاح الجزء الأول بعدد 110 صفحة و كأول منبر لأحد أحياء الخرطوم فقد كانت المنابر للكليات و التجمعات الجامعية لتأتي الشعبية و تؤكد انها تناطح القمم الأكاديمية و تأخذ لها مكانة في أكبر موقع على الشبكة العنكبوتية موقع سودانيزاونلاين..

Quote: وفاة والد الأخ دفع السيد جيب الله (منقستو)

Quote: Quote: وفاة والد الأخ دفع السيد جيب الله (منقستو) اللهم تغمده بواسع رحمتك واسكنه فسيح جناتك انا لله وانا اليه راجعون

Quote: الاخوة والاخوات احبائي واهلى بالنجمة الاخ (آبدون ) عبدون الاخ راعي الحوش أسعد الله اوقاتكم جميعا بكل خير وكل عام وانتم بخير وانشاء الله عام سعيد احبتي الشكر الجزيل لاخونا الحاج حمد واخي عبدون الذي من عبره اطل عليكم واخي الاستاذ (ود البوب )الذي كان السبب في دخولى لهذا البوست عندما كان فى مهمة لدبى وترك هاتفه لدى الاخ ابو محمد فؤاد واتصلت به حيث ايضا تعرفت على الاخ ابو محمد فؤاد ومنها اكتشفت العديد من ابناء الشعبية الذين لم اتشرف بمقابلتهم ولكن تعرفت عليهم من خلال هذا البوست وزي ما بيقول الاخوان انني من الديناصورات وهل يعلم الجميع انني لم اتشرف إلا بمقابلة ثلاثة فقط من الشعبية وهم الاخ حسن طه الاخ عابدون وان كان قد نسي شخصي وإلا بعد ان ذكره الاخ عز الدين محمد عثمان اما البقية الباقية فلم اتذكر باننيى قابلت اجدا منهم بل اسمع بهم واستمتع بمداخلاتهم منهم خاطبني عبر الهاتف ومنهم من تطرق عن شخصي عبر البوست وبالفعل اذكر من الاخوان والاخوات الدكتور / امير قناوي الذي كان والده رحمه الله من اعلام الشعبية الكبار الاخ الفاضل ياسين الدكتوره / ستناخضر الاستاذ محمد فؤاد الاستاذ شمس الدين الدكتور / عماد عبد الله الاستاذ / وليد عبد اللطيف الاستاذ/ الموثق والباحث عماد احمد والذي لديه الطلات المستمرة اما البقيه فلم اتشرف بلقائهم بل كان لي عظيم الشرف ان اتعرف عليهم عبر البوست وهم الاستاذ / صلاح شكوكو صاحب القلم والفن الاصيل الاستاذ / صلاح عباس فقير الاستاذ / عز الدين الفحل الاستاذ/ خالد درق الاستاذ / حسن عثمان مضوي الاستاذ / عبد الوهاب الاستاذ/ عادل عثمان الاستاذ بدر الدين اسحاق الدكتورة / روما عادل / على صالح لكم الشكر جميعا من ذكرتهم ومن لم اذكرهم ولهم العتبى حتى يرضوا وبهذه المناسبة اوجه تحياتى للابن/ عاطف عبد الله عبد الماجد وهو من ابناء الشعبية وقد كان صغيرا في ذلك الوقت وقد قابلت اخيه الاكبر نادر على ما اذكر بالرياض وطبعا الذاكرة خربه فهل صحيح يا عابدون ولا انا خلاص خرفت ولو صاح يبقى الذاكرة حديد والحمد لله اخي عابدون وين قرشلى والطيب نور الدين وعبد الرحيم اخو جوكو وناس زكريا جار ناس نادر البيتهم مقابل بيت حلمي ابراهيم وكذلك ناس كمال حسين طلبه اعتقد ليه علاقة بالاخ يوسف عبد الفتاح والاخت الدكتورة ستنا ذكرتني بيوسف عبد الفتاح زمنه الكان طالب بالاقباط كنا نركب من محطة عمك السنجك ( حسن جردل) وفعلا كان التجمع فى هذه المحطة فى انتظار بص الشعبيةيا لها من ايام كنا نتقابل ونسلم على بعض ونصبح على بعض و ونركب البص المتجه للخرطوم نعود للكرة كما طلب الاخوان الفاضل ياسين وبعض الاخوان اول من اسس فريق الصداقة قبل انقسامه وقبل تكوين رابطة الشعبية حيث كنا نتبع لرابطة المزاد وكنا نلعب بميدان زحل هم الاخ عبد المنعم فيسبا عبد الصادق عطا باقرين فيصل عبد الله بدرالدين ديكا رحمه الله الاستاذ / عيسى حبيب رحمه الله محمد ثابت عثمان بانقا بله حسونه ابراهيم الشيخ يوسف المفك عبد الحميد كباشي عبد المنعم بين عوض طه علي الفكي وشله تخوني الذاكرة وكنا العدو اللدود بالنسبة لفريق زحل الذى كان يدربه كمال حسب الله يديهو الصحة وانشاء الله لنا لقاء والسلام ختام اخوكم فيصل عبد الله محمود الرياض / المملكة العربية السعودية

Quote: بسم الله الرحمن الرحيم السلام عليكم ورحمة الله وبركاته الاستاذ / الفاضل حاج حمد حفظه الله صباح جميل يشبه ابتسامة امى الساعة الان الواحدة والنصف صباحا بتوقيت جدة وهى كذلك بتوقيت الشوق الدائم للمنبر منبر سودانيز اون لاين وخاصة بوست الشعبية نجمة تزين سماء مدينة الخرطوم بحري هكذا نحن كلما مسنا الخير ننام كالاطفال واذا مسنا الضر فنحن من الساهرين اخي حاج حمد لا انكر اننى قد استمتعت بوقتى جدا غير اننى ما زلت كامل الاندهاش كيف يمكن للمرء ان يستمتع بوقته وحيدا ربما كان لهذا المنبر اليد العليا وخاصة بوستك الاروع من الرائع الشعبية نجمة تزين سماء مدينة الخرطوم بحري لست ادرى حقيقة ياحاج حمد عدت بي الى زكريات الايام الخوالي ايام الشعبية الجميلة لاني اعشق كل تراب فيها ابتداء من مدارس الشعب وانتهاء بالمقابر وكل يوم تراني اهيج لوعة الذكرى وانا انهل من منبعكم الخصب وقفشاتكم الحلوة عن الحلة واهلها وبين تلك وذاك ياحاج حمد اقف حائرا وتشدو بي الخيالات الى عوالم بعيدة وافاق جديدة واجد نفسي عندما اكون في لوعة الشوق والحنين للماضي والحاضر ومستقبل حقيقة ياحاج بجد احببت جدا سودانيز اون لاين واحببت خاصة اتكاءتك ( الشعبية نجمة .... ياله من روعة وانت تسرد ومن معك ذكريات واحداث تلك البقة الجميلة من مدينة بحري وانا مرات عديدة اقف عاجز ( بيكون حلقي مليان كلام عن الشعبية واهلها وعن مداخلاتكم الحلوة انت والمجموعة الطيبة ) وعند الرد لا اجد طريقة لعدم التسجيل دي جزء من رسالتي التي بعتها للاخ بكري اطلب فيها الانضمام وبالمناسبة دي مااول رسالة احببت سودانيز اون لاين لاني اجدها فاكهة الحرف المُحـــرّم شربت الأمـرّين .. طعم الشجن المحزون .. و .. ضجر إلانتظار بالسماح لي بمقدم لداركم العامرة كل يوم ٍاعيش حال الترقب بالوصول وانظر في مجرات الحظ بين أن تأتيني الموافقة أو لا تأتيني مكثت في هذا .. المد الجزر .. أشواقاً عددا لم تتبقى حبة صبر في ساعات الفقد الرملية لم تذروها رياح الإنتظار....... اخي حاج حمد اتمنى الموازرة واحب ان تكون من ضمن الكوكبة الرائعة والاقلام الفذة التي ازرت انضمامي للمنبر ومنهم خالد علي محجوب أحمد القرشي فيصل خليل سمية الحسن طلحة أسيا ربيع الاخ حاج حمد كم سعدت بمكالمتك اليوم وارجو ان يتكرر لقاءنا عبر الهاتف مرة أخرى وياريت نشوفك في القريب. وجوالي معك الاخ حاج حمد لك من المودة اطرافها الجميلة اخوك عاطف جدة 29/12/2009 م

Quote: للفقيد الرحمة والمغفرة ولكم اخي منقستو الصبر وحسن العزاء اللـهـم ابدله دارا خيرا من داره واهلا خيرا من اهله وادخله الجنة واعذه من عذاب القبر ومن عذاب النار . اللـهـم عامله بما انت اهله ولا تعامله بما هو اهله . اللـهـم اجزه عن الاحسان إحسانا وعن الأساءة عفواً وغفراناً. اللـهـم إن كان محسناً فزد من حسناته , وإن كان مسيئاً فتجاوز عن سيئاته . اللـهـم ادخله الجنة من غير مناقشة حساب ولا سابقة عذاب . اللـهـم اّنسه في وحدته وفي وحشته وفي غربته. اللـهـم انزله منزلاً مباركا وانت خير المنزلين . اللـهـم انزله منازل الصديقين والشهداء والصالحين وحسن اولئك رفيقا . اللـهـم اجعل قبره روضة من رياض الجنة ,ولا تجعله حفرة من حفر النار . اللـهـم افسح له في قبره مد بصره وافرش قبره من فراش الجنة . اللـهـم اعذه من عذاب القبر ,وجاف ِالارض عن جنبيها . اللـهـم املأ قبره بالرضا والنور والفسحة والسرور. اللـهـم إنه فى ذمتك وحبل جوارك فقه فتنة الفبر وعذاب النار , وانت أهل الوفاء والحق فاغفر له وارحمه انك انت الغفور الرحيم

Quote: الحمد و الشكر لله الذي جمعنا في حوش الشعبية عبر سودانيزاونلاين و نجاح هذا التجمع في التوثيق لهذا الحي العريق و نجاحه أيضا في استمرار العلاقات الانسانية الطيبة التي جمعت بيننا في الشعبية متجاوزة القبلية و الجهوية لتحقق الانسانية في أسمى معانيها...

Quote: انتقل الى رحمة مولاه العم جيب الله والد الأخ دفع السيد (منقستو)و اخوانه ، رحمه الله رحمة واسعة

Quote: من الشعبية وهم الاخ حسن طه الاخ عابدون وان كان قد نسي شخصي وإلا بعد ان ذكره الاخ عز الدين محمد عثمان اما البقية الباقية فلم اتذكر باننيى قابلت اجدا منهم بل اسمع بهم واستمتع بمداخلاتهم منهم خاطبني عبر الهاتف ومنهم من تطرق عن شخصي عبر البوست وبالفعل اذكر من الاخوان والاخوات الدكتور / امير قناوي الذي كان والده رحمه الله من اعلام الشعبية الكبار الاخ الفاضل ياسين الدكتوره / ستناخضر الاستاذ محمد فؤاد الاستاذ شمس الدين الدكتور / عماد عبد الله الاستاذ / وليد عبد اللطيف الاستاذ/ الموثق والباحث عماد احمد والذي لديه الطلات المستمرة اما البقيه فلم اتشرف بلقائهم بل كان لي عظيم الشرف ان اتعرف عليهم عبر البوست وهم الاستاذ / صلاح شكوكو صاحب القلم والفن الاصيل الاستاذ / صلاح عباس فقير الاستاذ / عز الدين الفحل الاستاذ/ خالد درق الاستاذ / حسن عثمان مضوي الاستاذ / عبد الوهاب الاستاذ/ عادل عثمان الاستاذ بدر الدين اسحاق الدكتورة / روما عادل / على صالح لكم الشكر جميعا من ذكرتهم ومن لم اذكرهم ولهم العتبى حتى يرضوا

Quote: - < صباح الخير يا ناس الشعبِية >

Quote: كُنا بنمشي سينما الصافِية كُل خميس ومرات سينما الوطنِية بحري والحلفايا ونطلع ناكُل باسطة

Quote: احبائي بالنجمة دون فرز اسعد الله اوقاتكم بكل خير الاخ الحاج / حمد سيد الحوش الاخ (آبدون) عبدون الاخ / خالد درق الكتور / امير قناوي الاخ وليد عبد اللطيف الاخ عمدتنا الكبير الباحث والموثق يعجز لساني عن شكركم لتشجيعي للكتابةبهذا البوست العريق وأود أن اشكر اخي الاستاذ عزام حسن فرح وقد علمت انه من المحس حسب قوله فى احدي مداخلاته الثره حيث انني قبل معرفتي به حسبت انه من البطانه حيث انه يقلد اهل البطانه فى حديثهم واقوالهم وان دل هذا فانما يدل على بحثه وتنقيبه وارجو منه ان يتحفنا دائما وابدا بمداخلاته حيث انه في بعض الاحيان يغيب عن البوست فله مني التحية وانني لسعيد جدا بمعرفته وكما سبق أن ذكرت اتمني من الله ان يجمع هولاء الأخوان والاخوات فى ساعة خير ا خوتي عبركم اتقدم بعزائي للاخ / منقستو فى وفاة والده طالبا من الله سبحانه وتعالى له الرحمة ولاهله الصبر والسلوان كما واتمني لوالدة اخي الحبيب وليد عبد اللطيف الشفاء العاجل اللهم اجعله اجر وعافية يارب اخي الحاج حمد والله لم انتبه بعدم ذكر اسمي مع الاخوان وجل من لا يسهو واعلم انك مشغول بالرقم من العمل بغير البوست ولا يهمك اخي وانني مواصل معكم ولن اتخلى عن هذا البوست طال الزمن ام قصر ولكم جميعا تحياتى ولنا لقاء مع ذكريات الشعبية ومرة اخري اترحم على جميع الاموات بالشعبية واتمنى من الله سبحانه وتعالى ان يديم الدود والمحبة بيننا والسلام ختام اخوكم فيصل عبد الله محمود / الرياض

Quote: حقو يا جماعة في الجُزء التاني ده ... نبعِد شوية -والأحسن نبعِد خالِص- مِن الحاجات البِتخنُق العمود ... يعني المُجاملات الكتيييييره بِتخلي الواحِد ما يِدْخُل البوست ... خلاص الفينا إتْعرفت ... جيبو جديد ... أنا بقول الكلام الحار لأني زول شقي ساي وبِطولي ده زول بِيسْمع لي ماف ... بس بقولو ااااي بقولو ... معقول نبقى في < محمد إتصل بي وقال بِسلِم عليك شديد > ونحنا لا بِنعرِف محمد ولا عارفين السلام الشديد ده فوق شنو بِالضبط ... ولا حنقدر حتى نتصَور السلام الشديد بِكون كيفِنو ... لو الجُزء التاني ده بِقى زي أغلب آخر صفحات الجُزء الآول مُمكِن نقول بوست وراح ... أسمع يا زول الحي الله والكاتِل الله

Quote: تشكر سودانيزاونلاين الاستاذ خالد الحاج-ابا و الاستاذ جمال عبد الرحمن-هولفل لمساعدتى فى اعادة كتابة هذه الوثيقة والتى قمت بنسخها من مجلة كتابات سودانية من pdf file الى text و التى تنفرد سودانيزاولاين بنشرها فى الشبكة العالمية من مجلة كتابات سودانية عن ود الشعبية الواثق صباح الخير الذى اعدمه جلاد السفاح نميرى سى السمعة و عديم المعرفة و الجاهل بدينه المدعو المكاشفى طه الكباشى فى ما كان يسمى بمحاكم العدالة الناجزة بكرى ابوبكر امين موقع سودانيزاونلاين

Quote: وثيقـــة علي المــك في أزمنة الرعب … هل سنواصل الغناء؟ أجل .. وسنغنى أغانى الرعب هكذا قال يرتولد بريخت .. وهكذا ولدت الفكرة .. أن نصوغ عملاً سينمائياً .. حول ذلك الزمان .. مبوتقاً في سيرة الواثق وعدت أنا الي لندن وبقى هو في "مدينة التراب" وكانت رسائله والتى كانت تأتينى كل حين وآخر وعلي مدى عام، هى الركيزة التى تجسدت حولها الرواية السينمائية الواثق صباح الخير.. لم يكتمل المشروع بعد … ثم غاب علي… أهكذا حال الدنيا ..؟ حسين شريف القاهرة 25/2/1993

Quote: الوصول الي ديار المشنوق المصلوب .. هذا شأن العمران ودأبه في مدن السودان، بيوت البوليس والسجانة كانت تلفظها المدن إلي أطرافها البعيدة، تظن أن العمران لن يبلغ تلك المجاهل النائيات. وبعد عهد ليس بطويل تحيط بها البيوت من كل جانب ويتغير تبعاً لذلك موضع القلب من المدينة وكذلك سائر الأعضاء. وهذا ايضاً حال الأحياء الشعبية. و"شعبية" بحري بعضها اختفت الآن معالمها القديمه شيئاً، قل: درست فحين انشئت أول مرة كانت كماً مهملاً علي أطراف بحري بيوت من "بلوكات" الأسمنت، ممسكا بعضها برقاب بعض، شكل واحد هيئة واحدة، ليس هناك ما يميز بيتاً عن آخر، المهم إلا إذا غرس أهله في حوشه الضيق شجرة نيم أو بان، أوشيئاً من نبات سريع النمو نسميه (العوير) لا ادرى لماذا ولا نسأل. أسقف البيوت دونما استثناء من "الزنك". وأهل البيوت من الحرفيين والعمال والصناع – علي العموم: المساكين .. ومن بعد أن انتفخت أوداج المدينة علي مر السنين، صارت بيوت الشعبية قريباً من مكان القلب، فطمع فيها أصحاب القصور وأصحاب الفلوس فجاءوها من كل صوب من الخرطوم ومن الفاشر وبورتسودان ثم من ودراوه وشرق النيل ومن بحري نفسها جاءوا . ضاع إذن طابعها المميز فصارت وكأنها لا ترى، أحاطت بها العمائر السامقات والبيوت الأنيقة وهوائيات التلفزيون الملون .. وتأكلت. هناك كوشة في طرف ميدان الكرة غربه تُفضى الكوشة إلي زقاق بالشعبية به بيت حسن ابوعنجة وعلي طرف الميدان الجنوبى بيت الواثق صباح الخير كلاهما ينظر إلي صاحبه جدار البيت من الطوب يختلف من نمط بيوت الشعبية .. قال عبدالمنعم صباح الخير: هذه ليست الشعبية أنها تعويضات شمبات كان القوم من اهل شمبات نفس النظرية تنزع الحكومة ارضهم وتوزعها للموسرين بحجة التخطيط وجمال المدن وهلم جرا .. وتعوضهم ثم تنزع وتعوض .. حلقه مفرغه.

Quote: نقدم لكم عبد الكريم محمد خير وزوجته فاطمة صباح الخير. جلسنا في البرندة التى تفتح صدرها للهواء الجنوبى العذب، ذلك الذى يلثم الوجوه آن الصيف.. سقفها جريد، جدرانها الطين السميك .. تحمى من الشمس حجرة نوم، تختلس العين منها طرفاً دولاب وسرير كبير، وبعض ارض من الرمل مرشوشه رطيبه. عبدالكريم محمد خير يعمل بناء عمره ثلاثون سنة زوج فاطمة صباح الخير أخت الواثق، تكبر الواثق بعام او يزيد قليلاً - طريدة الواثق .. تزوجا في مارس عام 1984. والخلاصة طفل يحبو، يقع ويقيف .. عبدالكريم من أهالى الشعبية أيضاً .. يروى: كنت أعرف الواثق من بعيد، انا أكبر منو، لكن أخوه عبدالمنعم الكبير ودفعتى في المدرسة بعد ما عرفت الأسرة. وخطبت فاطمة أخته عرفتو اكثر .. إنسان كويس .. ودود .. بعد زواجي بي زى شهر كده جا في البيت عدد من بوليس ام درمان .. الدنيا صباح كانت.. أنا نايم .. قالوا قوم قوم قوم يا الواثق .. قوم يللا معانا .. عريس جديد أنا وأمشى معاهم؟ يا ناس أنا ما الواثق .. أنا نسيبه .. مافيش فايدة قوم أمشي معانا. عرفت أن الجماعة ديل قاصدين الواثق عديل.. شالوني معاهم للقسم الأوسط أم درمان . وكان معاى 9 أنفار سألونى ماشفت الجماعه ديل في حياتى . الشاهد قعدنا في الحراسة من دقش الرحمن لحدى الساعة 9 مساء أو بعدها شوية .. غايتو جناب القاضي جا في حوالى المعاد ده. وسال أنتو بتعرفوا الواثق؟ قلنا لا . قال للبوليس (فِكُوهْم) .. البوليس تحس إنو قاصدو قاصدو عايز يقبض عليه بأى ثمن. يوم تاني بعد زواج الواثق، كنا برضو الصباح بنفطر في البيت، الواثق وأنا.. جه واحد دق الباب ... انت منو؟ سألنا قبل ما نفتح قال: أنا ما عندى اسم .. قلنا ليه لما تعرف إسمك نفتح ليك رجعنا نأكل .. قلبي أكلنى .. بعد دقائق طلع الواثق شاف زول قاعد بعيد جنب عمود الكهرباء .. لابس ملكى .. لما الراجل شاف الواثق طلع مسدس.. رفعوا في ايدو .. زى العايز يورينا هو منو .. وبعدين دساهو في جيبو ومشى .. وكتير البوليس ضدنا..

Quote: نقدم عبدالمنعم صباح الخير.. الواثق كتلوه علي 22 سنة بس .. دخل المدرسة وقرأ فيها لحد سنة تالته ابتدائي، طلع اشتغل مراسله في مصلحة الوابورات الوالد نفسه شغال في المصلحة دي .. طلع من هناك اتجند في الجيش في مدرسة المشاة في كررى، اشتغل سنتين عمل مشكلة مع واحد عسكرى رفتوه .. طلع من الجيش ابتدأ يشتغل أعمال حرة، البوليس ما خلاهو يرتاح ولا يشتغل كل مرة داخلين علينا البيت عايزنو في تهمة .. حداشر أو اتناشر تهمة يرموه في الحراسة تطلع براءة مافيش حاجة.. كانوا دائما لما يجو في البيت ينطوا الحيطه طوالى, يصحونى من النوم .. يسألوا عنه أقول ليهم ما في يوم أنا راقد نايم جوا بلورى كومر Commer كبير. طلعت ليهم أختى قالت ليهم وكانوا ابتدوا ينطوا الحيطة وقفتهم قالت ليهم: الواثق مافي قالوا طيب في منو؟ قالت ليهم في أخوى عبدالمنعم قالوا ليها ناديه جات صحتني من النوم قالت في عساكر عايزنك .. سمعونى أقول ليها أنا ما ماشي ليهم جوا طوالى داخلين ببنادقهم الاتوماتيكية (قوم،قوم،قوم) (الضابط بره عايزك) مشيت معاهم الدنيا ليل شديد في الشارع نزل الضابط من الكومر ووقفونى قدام العربية وولعوا فوقى النور الشديد .. العساكر البره قالوا: لا لا ده ما الواثق.. يوم تانى في الصباح كنت ماشي ومعاى واحد صاحبى في بحرى .. الصدفة جابتنا المحكمة وده شئ طبيعي، تعرف لانو المحكمة والبوليس، وبوليس الحركة كلهم تقريباً جوه السوق. خلق كتيره جداً جداً .. فجأة ظهر قدامنا واحد من ناس المباحث زي الشيطان طوالى قال لي: الضابط عايزك ! عايزنى أنا ؟ استغربت جداً.. مشيت معاه دخلنا علي الضابط سأل :الواثق وين؟ قلت : لا أعرف بعد كده الضابط شال برنيطته وفات دون أى كلمة زياد، خلاني ليك مع عساكر المباحث، ديل ابتدوا يتكلموا معاى لازم توريا محل الواثق – ضروري جداً – ده علي منو؟ أنت عارف إلخ.. أصريت قلت ليهم: أنا ما عارف محله لما زهجوا منى واحد لازم كبير قال : دخلوه الحراسة، ضيفوا لي بلاغ سرقة مسجل العربية والراديو. دخلونى طوالى أغرب حاجة في الحراسة لقيت واحد اتذكرت أنى شفته الصباح في ميدان الكورة جنب البيت.. وكنت شكيت فيه وسألته في نفس الوقت :يازول أنت بتعمل شنو هنا؟ قال لي: والله أنا منظر واحد شغال معاه عشان نمشي الشغل .. مشيت خليتو ، لما لقيته في الحراسة إستغربت جداً جداً .. ولما لاحظ قال لي: بعد ما أنت سألتنى ومشيت جوا عساكر وسألونى: يازول الواثق وين؟ قلت ليهم : والله ما سمعت بالأسم دا قبل كده، وأنا منتظر زميلى عشان نمشي الشغل سوا. طبعا ما صدقوا ساقونى معاهم، ولما جيت الحراسة قال واحد كبير منهم ضيفوه لي سرقه مسجل العربية !! وستطرد عبدالمنعم تانى يوم ونحن لسه في الحراسة ساقو الراجل ذاتو لحراسة بحرى، وفي اليوم الخامس طلعونا سوا ساقونا لفسحة مركز بحري وقفونا في الفسحه أنا والشاب ذاتو ومعانا ناس تانى . وقفونا طابور وقالوا: امشوا مشينا زي خمسة أمتار، بعد شوية جابوا قصاص الأثر.. ابتدأ يمشي ويجي ويعاين بعدين رفع رأسه وقال ( الزول هنا مافى) أطلقوا سراحنا طوالى .. الواثق دى أخوى الصغير يعني أنت عارف .. صلتى بيه حميمه ... كنا بنلعب كورة سوا، زمالة الرياضة شئ جميل وشئ عظيم، مرة كان عندنا مهرجان رياضي في ميدان (الجهاد)في الشعبية، بعد نهاية المهرجان كنا قاعدين نرتاح ونتونس .. ظهر تاكسي، وراه طوالى عربيه ثان وقفوا جنبنا، نزل منهم ناس شايلين مسدسات قالوا : كلكم قوموا فوق .. يلا قوموا فوق ... منا فوق عاينو فينا كده أخذوا الواثق معاهم وكما اتنينزملا تانين واحد اسمه محمد والثانى ميسرة .. عاينوا لي بحزم وقالوا ممكن تجنب لهم غيار في مركز بحرى.. الجماعة طبعاً كانوا بي لبس الكورة.. ميسرة بس ما كان لاعب ولابس عادي.. العربية طلعت طويل ... رحت البيت شلت غيار للواثق ولصاحبنا محمد .. مالقيتهم في مركز بحري وطيب؟ قالوا نقلوهم نقطه كوبر .. بالسرعة دي؟ في نقطه بوليس كوبر أول حاجة تضرب عينيك الحراسة، يازول أول ما دخلت كده اشوف ليك محمد رابطين ايدينو بالكلباش مع حديد الباب طوالى جسمه كلو جارى دم .. سالت بسرعه: الواثق وين؟ قالوا ودوه نقطه كوكو .. بالسرعة دي؟ دخلت لقيت واحد لابس جلابيه بضرب الواثق بالعكاز ويقول ليهو أنت قايل نفسك وين؟ دى حلة كوكو، يضرب يضرب والواثق ثابت وفي شوية عساكر بوليس لابسي رسمي واقفين يتفرجوا ... لحظة زي البرق الواثق قبض من أبو جلابية العكاز، ودور فيهم كلهم ضرب

Quote: B]رحمه رابح الأم ويكتفوا لحدي ما يهدأ ويقول ليه عشان ما تكشف حالنا مع الجيران زمان ما عندنا عناقريب كفايه يجي يلقاني راقده في الواطه .. لما يشوفني كده طوالى يبكى(عمري ما متأكده منو) قالت سوداء نبيلة السواد، طويله وجسدها يبدو قوياً، ولا توحي بالبدانه شلوخها مطارق، ليست شلوخاً عميقه ولكنها تستوقف العين قبل الخدين جاءت في ثوب بسيط أبيض زهيد الثمن.. لا أظن أنها تجاوزت الخمسين ... جميله. قال: الواثق كان أبوى وأخوى وأمى (اجهشت ببكاء حار جداً إستمر دقائق) بعد أن تماسكت قالت كل تصرفاته معاى من صغير احد ما كبر والله ما غلط علي بكلمه .. اشتغل في البابورات ما قصر، اشتغل في الجيش ما قصر .. قليل كتير كله للبيت ولي أخوانه لما كان في المدرسة يقش لي البيت، ويغسل العده ويساعدني وكمان يدق لي الشطه والبهارات ويختها في العلب .. هو فرق واخوانه فرق، ارسلو أي مكان يمشي ولو طلع يتعشي مع اصحابوه ما بنساني يجي شايل لي عشاي بكره الخمره .. أبوه بشرب كتير.. كان يشرب ويعمل مشاكل في البيت .. الواثق كان يزعل جداً من الحكاية دي .. طوالي يمسكو .. ويتنازل عن عنقريبه وينوم في الواطه .. كل حكايه دي سمعناها عند الناس بس .. لما مرقوه من السجن وعملنا ليه كرامه قال إلا يعرس .. كان خاطب، اتحنن وسار تاني يوم طوالى .. السبت كان دخلته، قال يا أمي الأحد عرس أختي، أختو فاطمة دي كانت مخطوبة قلت ليه يا ولدي أخرو شويه اصر علي رايو .. وتم عرس فاطمه كمان الواثق في امانه الله اتزوج، وسافر ، بعد ما سافر وجا عندو أخت مخطوبة ناداها قال ليها عرسك متين قالت : لسه قال تعرفي يا أمى أنا عايز أجهز لأخواتي كلهن عشان بالي يكون فاضي...

Quote: صباح الخير دراج العمر 70 سنة يعمل في النقل النهري باشبحار.. الميلاد: الصبابي بالخرطوم بحري.. التعليم الخلوة.. صفته أسود سواده بعض نبيل قصير القامة نوعا خفيف الحركة .. صحة جيده فيما تبدو ذلك الصباح قال: الولد ده الله يرحمه ويحسن اليه مما قام ما غلط علي، البلقاها كلها بناولها أمه ما بشرب سجاير ولا خمرة ولا سعوط .. لما يلقاني شارب وعامل دوشه يكتفني ويخلني في الأوضه عشان الجيران ما يسمعوا شئ .. أنا بشرب من المغصه محمول عندي في ضهري ده 6 بنات غير الماتو ما هيتي كلها مايه كام وعشرين.. وشغال في البابورات دي من سنة 42ّّ تصور وما اتقدمت في الشغل، تعرف الناس الكانوا بعوسوا لي الكسره في البابور حسي دي يقوا ريسين( من ريس الوابور) والحد حسي ماهيتو تحصل 400 أو 500 جنيه أنا ما زادت حاجه من 42 بس من بحار لي باشبحار ما بعرف اشتكي ولا اكتب طلب، مستني رب العالمين .. الخمره البشربها دي قروشه ما منى – من الأخوان يجي ماري واحد بالشارع من الجماعه المرتاحين البعرفهم اقوم اشتموا وأنا شبعان ( يعني سكران جداً) بكره يجي يناولني ويقول يا صباح الخير لو اديتك هسع بتشتمنى تاني؟ أقول ليه: لا .. اقبض منه أمشي الحله طوالى ويجي تاني اشتمه نعرف أنا زهجت من شغل البابورات ده أحسن يدوني حقوقي أعمل لي دكان أربي أولادي .. عندي الأعصاب، يودوني المصحه 15 يوم شهر شهر ونص وارجع الشغل تاني .. وتزيد علي لما اتذكر الولد الكتلوه ده قبال ده كان في الحراسة في المديريه رسل قال داير ضمانه., مشيت اضمنه القاضي سال ده ولدك؟ ورددها 3 مرات وقال: تحلف القسم .. اقسمت علي المصحف وبعد ده كله رفض ضمانتي قمت قلت ليه انت العملك قاضي منه؟ لأنك بليد والعملك قاضي أبلد منك ... عشان القانون ما بيخليك تحلفني علي الولد خاله، عشان الجنا بحلف عليه خاله أخو أمه، ويقول ده ود أختى، برضه ما نفع الكلام مولانا اباه ما قبل الضمانه ( لاحظ الشبه بين رأى صباح الخير في القاضي ورأي ابنه عبدالمنعم في وكيل العريف) البوليس كان ورا الواثق طوالي أهم حاجه إنه كانه يكره كعامله البوليس للمواطنين في الحراسة ويقول ليهم خلوني أنا بدخل ليكم المتهمين بالذوق. وما بيسمعوا كلامه والحال في حاله ضرب ونهر وزجر إلخ .. قبال ده ودوه للقاضي وجابو اوراق القضية القاضي سأل البوليس ون المعروضات المسروقه؟ ماعندهم معروضات القاضي أمر: أمشي يا واثق خلاص مافي حاجه لكن الجماعه وراهو. تعرف الطوارئ بتاعتم دي أنا ما سلمت منها .. قبضوني شارب مبسوط جلدوني,, ودي الحكايه ,, مره بالليل بشرب براي قدام البيت أيام الطوارئ ديك... شرابي كمل ... الليل سرح والرأس إتملا اتهيأ لي أنو طيارة الصباح جات .. ودي بتمر فوق راسي كل دقش واصحى بيها أن كنت نايم واشوفها ... أتارى الساعه كانت اتنين بس .. قمت مشيت بيت الدينكا .. صحيت مديرة البيت شايل الفاضي في ايدي ما كضبت عبت لي قزازتي لي عيبنه طلعت اقدل في الشارع قزازتي في إيدي بس في السكه لاقوني اتنين من الجيش شايلين سلاحهم .. واحد قال بالحرف: تعال يا عمو المسأله باظت، ما قاومت ابداً، عندي قلق شديد يجيني طوالي وزهج انا محمول يا زول الجماعه ساقوني ودوني علي المركز الجماعه في مركز بحري بعرفوني إعتزرو لي وقالوا: تعرف يا عم صباح الخير لو القبضوك ديل كانوا بوليس كنا اطلقنا سراحك لكن الجيش ده صعب نار اللحظه ديك يا دوب النباه في جامع السيد علي علي ابتدأ ينبه قالوا تمشي الدكتور للكشف مشيت.. زولك مما شافني بدون كشف قال سكران، جابوني الحراسة .. استلموا القروش المعاى فضل لي بس ريالين .. دخلتي الحراسه قفلو الباب نطوا فوقى المحتجزين، واحد يخنق وواحد يدافر وواحد يلكز .. كله ده عايزين القروش العندي .. ما لقوا حاجة فكونى بعد شوية شبكونى (يا أبو الواثق ما عندك سفه؟) قلت ليهم لما انتو عارفيني أبو الواثق عايزين تضربوني ليه.. إعتزروا إعتزار شديد. القاضى سألني قلت ليهو أنا ما شربان لكن شايل دا اشربوا لأنى أبو بنات ومحمول .. ولازم أشرب ... القاضي حكم قال: عشان سنك حكمنا عليك بــ40 جلده و10 جنيه غرامه يعني يا صاحبي سخره وخم تراب الزازه بــ10 جنيه والغرامة 10 جنية غاظونى العساكر يدفقوا في العرقى في الأرض ويقولوا (والله عرقى شديد يا أبو الواثق) وما تنسي 40 جلدة .. أها ده ما بيجيب المغصة. وحكاية ثانية فيها قاضي كمان ده كان أيام الدنيا سمحه قبل البسموها الشريعه دي الدنيا نهار حار رسلت البت تجيب بن من الدكان، تعرف رأسي كان فار وعايز قهوة .. البت إتاخرت، طلعت حفيان بلباسي ودارع القميص في كتفي ومشيت أفتش ليها .. الرماضه حرقتنى شديد جات عربية اشرت ليها وقفت كان سايقها قاضى ساكن قدام في الحلة وابوه صاحبى والله وبعدين؟ يازول اتوكلت ونسيت البن والقهوة وأي حاجة ، يا زول ركبت حفيان ، ولبست العراقى جوه عربية مولانا، كان زول ظريف خلاص، سألني بي أدب (علي وين؟) قلت ليه... أمشي الله بفتح عليك، طوالى علي بيت كيدان الحبشية يا زول عندها كلوميت ومرايس تدوش الرأس .. والله مولانا ما سالني وكان ممكن يوديني السجن، نزلني وفات ... الحبضية لما فات صرخت وقالت: ويجيبك القاضي كمان

Quote: B]2/1 كلمة من فاطمه صباح الخير أنا كنت بودي ليه الأكل في كل مرة يتسجن فيها وكان دايما يقول لي ويوصيني يافاطمة أوعى تتشاكلي في البيت مهما كان‍ الطريق إلي النهاية: رواية عبالكريم محمد خير ختوه محبوس في القسم الأوسط أم درمان 2 يوم، قدم بعدها للمحكمة .. طلب محامي .. المحامي أيام الطوارئ السودا ما بتكلم ممنوع بس ينصح المتهم والمتهم هو البتكلم .. جابوا الشهود سته عساكر من بحري، والقضية في أم درمان تصور‍ لكن كانوا مجهزين، حلفوا اسم الله بالزور، بعرف واحد اسمه صالح حسين وواحد تاني اسمه عليش .. بدون مستندات .. قالوا كان بضربنا .. نفس بوليس بحري الجبان ده ضربوا بالرصاص في العشش وكان نايم.. المكاشفي ما اداهو فرصه يدافع عن نفسه، كلما يطلب كلمه يتجاهلو ويدي الفرصه للعساكر، وفي الآخر قال ليهو: بكره نديك فرصه تدافع عن نفسك .. بعدين رفع الجلسه ورجع بعد دقائق وفاجأة بالحكم القاسي بعد الحيثيات إياها.. بعدها نطق بالحكم الواثق قال ليه: شكراً .. رحنا انتظرنا في كوبر وجبنا محامي يعمل استرحام عند عمر محمد الطيب .. النميري الله لا رحمه كان مسافر قابلنا الواثق في مكتب السجن سلمنا عليه، كان يضحك ويقول: القاضي ده مجنون أنا لم اقتل أحد .. قلنا ليه: إن شاء الله ما تحصل عوجه .. وبدينا نطارد الاسترحام مشينا نفتش عمر الطيب‍ مشينا القصر، قالوا اللواء في القيادة العامة، فضلنا نفتش عليه من هنا يقولوا هنا .. وهنا وهنا لحد الساعة 2 صباح (أتذكر طائرة الصباح وسكره صباح الخير‍) .. قلنا نبدأ تاني يوم فجر .. كان يوم الجمعه ... مشينا السجن .. الواثق رفض يقابلنا قعدنا في الشارع .. الشمس طلعت فينا وكبرت.. ده يوم إعدامه .. أعدموه ونحنا بره سمعنا الخبر ... بكينا شديد ... جوا الناس قال: هوى الزول ده مات راجل قلنا: كيف؟ قالوا: لما ودوه المشنقه الشاويش أمر العسكري عشان يعلق الحبل الواثق قال ليه: تعال علقوا بي نفسك عشان تخلي للظلم ده الدنيا كلها شيعه الوف من الناس .. وبكوه ... وقليلون من التقوا به واقل من عرفه

(عدل بواسطة Adil A. Salih on 12-30-2009, 03:06 PM)

Quote: صباح الخير دراج وأخرى /ضـد/ حكومة السودان م ع/ ع د/7/1987 المحامون: طـه إبراهيم: الحكـــم التاريخ: 24/12/1987 تقدم الأستاذ طه إبراهيم المحامي بعريضة طعن دستوري نيابة عن صباح الخير دراج والرحمة رابح مبروك والدي الواثق صباح الخير الذي أدانته محكمة الطوارئ رقم (7) بأم درمان تحت المادة 334 من قانون العقوبات لسنة 1983 وحكمت عليه بالإعدام شنقا والصلب، ذلك الحكم الذي تم تنفيذه بعد أن أيده النائب الأول لرئيس الجمهورية السابق.

Quote: ميدان الرابطة يتوسط هذا الميدان حي الشعبية الجزء الشمالي منه ،، يمثل أكبر تجمع لاهل المنطقة حيث يحده من جهة الشمال سوق الشعبية والذي يضج بكل أنواع التجارة ، ومن الجنوب شارع الشعبية ( شارع المواصلات) وتطل عليه بعض منازل مربع 9/8 ر ، ويحده من ناحية الشرق مبنى نادي الشعبية الرياضي الثقافي ومن جهة الغرب مدرسة الخشب سابقاً ومدرسة البنات للأساس حالياً ، كل هذه المرافق ممتلئة بالمارة والراجلين وأصحاب المركبات والدواب، لذلك له القدح المعلا في عكس مدى نشاط هذه المنطقة ومدى أهميتها ،،، يعتبر هذا الميدان روح الحي، على الرغم من وجود كثير من الساحات داخل أحياء الشعبية إلا انه هو المساحة التي تجتمع فيها نشاطات الرياضة بأشكالها جميعا وبالذات رياضة كرة القدم فهو ميدان الرابطة الرسمي فتشتعل فيه روح التشجيع ويزداد فيه تجمع شباب وسكان الحي حيث ياتون من كل فج عميق لمشاهدة مباراة اليوم، كل يساند فرقة حيه (فريق الحلة). وإن كنت مارا من هناك تعجب للمشهد العظيم ، الميدان محاط بالمشجعين، ومعركة اللاعبين دائرة في وسطه، وتسمع من هنا وهناك التعليقات والقفشات والتي تجبرك على الإبتسام. ولكن حتى يكتمل جمال هذا المشهد وتكتمل هذه اللوحة كان لا بد من ذكر هذا الرجل العظيم (.....) والذي يأتي دائما وسط النهار تحت الشمس الحارقة ويحمل في يده وعاءا فيه بدرة الجير البيضاء لتخطيط الميدان ليكتسي الميدان بشكل جميل وكأنه يخط إطارا للوحة ويأتي البقية لوضع اللمسات الأخيرة منها ،،، أيضا يمثل هذا الميدان مساحة ترفيهية للأطفال في الأعياد حيث تنصب فيه الأرجوحات وتؤجر فيه الدراجات لهم/لهن بأحجامها المختلفة. أيضا كانت تقام فيه بعض العروض الترفيهية لطلبة/طالبات المدارس، كعروض شمشون الجبار .. مباريات كرة القدم والمنافسات بين الفصول يشاركة في ذلك ساحة ميدان الصداقة والذي يقع منه غرباً. سنعود ونكمل البقية ،،، أخوكم ياسر محمد سعد حبيبنا وليد ياريت لو تذكرني وتكب إسم الزول اللي كان بخطط ميدان الرابطة قبل المباراة ( الذاكرة لم تسعفني) عامل السن يا إبني !! أطلب منك أخي وليد أن ترصد مباراة (أي مباراة) كانت تحمل كثير من الأحداث في ميدان الرابطة تحت عنوان (قصة مباراة أ من ذاكرة ميدان الرابطة) تنزل تحت باب ميدان الرابطة مع أطيب تحياتي أخوكم ياسر محمد سعد

Quote: الكلاب فى الشعبية. لماذا كان يربى السكان الكلاب؟ رفق بالحيوان وهواية؟ أم وظيفة امنية بوليسية؟ اتذكر كان عندنا كلب جميل. كان هجين بين كلاب سودانية وكلاب بوليسية جلبتها وزارة الداخلية من هولنده فى السبعينات. هذا الكلب الجميل اهداه لنا قريبنا الشاويش الذى كان سائق السيد مدير عام شرطة السودان وقتها. وكان جروآ بهجة للنظر، وكان رفيقآ للاطفال يلعب معهم ويسليهم ببهلوانياته وحيويته. وكبر الجرو ليصير كلبآ مهابآ وحارسآ يقظآ. ففى السبعينات ومع اشتداد الازمة الاقتصادية زمن نميرى، وظهور السكن العشوائى فى بعض انحاء بحرى (كوشة الجبل) وغيرها، تعرضت الشعبية والاحياء المجاورة لهجمات عانى منها السكان فى غياب خدمة بوليس السوارى الذين كانت اصوات حوافر خيولهم فى الشوارع بالليل تبعث الطمأنينة فى المدينة وتحد من زيارات اللصوص العابرين للحيطان! ولهذا كانت الكلاب بديل شعبى وشخصى لخدمة حكومية كان يدفع لها السكان العوائد والضرائب. وكم من كلب وجد مسمومآ، او مقتولا، حسب خطط زوار الليل الذين تكاثروا وتفننوا فى مقارعة خطوب الكلاب الشعبية. وهكذا عاش كلبنا الهجين وقام بدوره خير قيام فى حماية ممتلكاتنا وتأمين ثرواتنا! ولما كان كلبنا كلبآ وسيمآ وفتيآ فقد هامت به كلبات الحلة والشوارع المجاورة. وصار الكلب يتابع شهواته وصار يهاجر الى حدود شمبات لقضاء اوطاره. وبسبب هذا النشاط المحموم عبر السنوات، اصاب الكلب مرض ادى الى اختفاء ضنبه رغم العلاج. وقد كان يعانى فى الصيف معاناة قاسية بسبب اصوله الاوروبية المعتادة على المناخات الباردة. المهم فى الامر ان الكلب فقد ضنبه. وكان ضيوفنا يسألوننا عن سبب اختفاء ضنبه حين يرونه كلبآ جميلا ومختلفآ عن باقى الكلاب، ولكنه بلا ذنب. كنت اقول لهم إن كلبنا هام بكلبة هيامآ شديدآ، وفى احدى نوبات غرامه وحبه لها قطع ذنبه واهداه للكلبة التى سلبت لبه وشغلت قلبه. وقد كان ضيوفى يضحكون من هذا التفسير الرومانسى الذى كان يذكرهم قصة الرسام الهولندى المشهور (فان جوخ) الذى قطع اذنه فى نوبة غرام مجنون واهداها لحبيبته!!!!

Quote: الأخ العزيز وليد عبد اللطيف تحية طيبة ومساءك زين دعني في البداية أبتهل لله عز وجل أن يشفي الوالدة العزيزة شفاءا عاجلا شفاءا لا يغادر سقما وأن يمتعها بالصحة والعافية في كامل بدنها وأن يثوبها بالأجر ،،، أمين هذا الأيميل في عجالة من أمري سأعود إليك وإلى كثير من مشاركات الأحباب هنا بالتفصيل والتفحيص ،،، نبارك للجميع إشتعال المنبر والتفاعل الكبير من كل الأعضاء سكان الحوش المتاوقين ،،، أيضا نبارك البداية الفعالة لكتاب الشعبية ونحن نتابع بشغف كل حرف رصف وكل مشاركة تم رصدها له. أخي وليد أن تعلم جيداً كثيراً من الأحداث التاريخية القديمة في الحضارات وثقافة الشعوب إندثرت بسبب عدم وضوح التاريخ وعدم وجود من يؤرخها في زمانها حتى الإسلام لم يسلم من ذلك لولا قدرة الله عز وجل ومعجزة القرآن ما بقي ،،،كما نأمل أن تكون مشاركات الجميع متوافقة وأن لايكون هنالك تعارض في المعلومات. هذه المقدمة التي ذكرتها هي مدخل للتالي،،، فكرة إصدار كتاب للشعبية هي فكرة عبقرية فمن خلالها يمكن تجسيد تاريخ هذا الحي الحي ومافيه من أحداث وثقافات وشخصيات وإجتماعيات تعتبر نموذج لا مثيل له لا في السابق ولا في الحاضر ،،، لذلك علينا أن نضع في الإعتبار أن هذا الكتاب سيحمل إرث هذا الحي بكل شفافية ودقة متناهية لأنه سيكون في المستقبل القادم مرجع أساسي وتاريخ للأجيال القادمة يمثل لهمتاريخهم وأصالتهم وأنا في توقعاتي مستقبلا أن شاء الله أن يكون هذا الكتاب جزء لا يتجزأ من مخطوطات تاريخيه يتم الرجوع إليها لتفسير كثير من أمور الحي، لذلك علينا توفير أكبر مجموعة من المعلومات مشفوعة بالأدلة والوقائع ،،، من تم إختيارهم لصياغة هذا الكتاب هم أهل له وإختيار صادف أهله وبالتأكيد لن يمر عليهم ما ذكرناه أعلاه، فقط أحببنا أن نكون من المذكرين ، وفق الله الجميع في إكمال هذا العمل الكبير وجعله الله في ميزان حسناتكم جميعاً ،،، أخوكم ياسر محمد سعد وسنعود إن شاء الله