كان الفنان العملاق أحمد جاويش بديعاً في سهرة تلفزيون السودان بالأمس - ولكني أحسست بالغبن والضجر من الطريقة الغبية التي دائماً يتبعها مقدمو البرامج عندما يكون أحد الضيوف فنان والبقية متحدثين ساكت ., حيث كان الفنان أحمدجاويش يجلس ضمن ضيفي السهرة الذين كان أحدهما د. محمدعبداله الريح ..
وبغباء شديد كان المقدمون والضيوف يديرون الكلام عن فنانين آخرين ويتركون الفنان المخضرم أحمدجاويش قاعد زي الديكور بدون أي محاولة لإشراكه في الحوار الأشتر الذي كان أغلبه عن فنانين آخرين مثل المرحوم أبو داؤود وبادي محمدالطيب ..إلخ .. وكمان في النهاية يجوك بكل بلاهة يطلبوا من أحمدجاويش أن يغني لهم أغنية فلان وفلان بينما جمهور المشاهدين مساهرين من أجل إبداعات أحمدجاويش .. لدرجة أن الفنان جاويش بدا عليه الغضب وقال ليهم إنو جاء عشان يغني أغانيه هو لا أن يقضي السهرة يغني غناء الآخرين !!! .. حاجة تفقع المرارة .. هم قايلين أحمد جاويش ده من نجوم الغد واللاّ شنو؟ !!
كنت أعشم وأظن أن د.محمد عبدالله الريح سيفطن لهذا الخلل ويكون حصيف ليوزع الحوار حتي لا يحس المشاهد بأن الفنان قاعد زيادة عدد من أجل الغناء وتسلية الضيوف، ولكن الدكتور لم يأبه ولم ينتبه وكان دمه تقيل عديل !! ..
وغايتو هذا الغبن ضد مقدمي السهرة ومعديها نغص علينا الإستمتاع بأغنيات الفنان أحمد جاويش الذي لا نشاهده إلاّ من عيد لعيد !!! ..
09-13-2010, 00:01 AM
Munir Munir
تاريخ التسجيل: 02-11-2002
مجموع المشاركات: 10496
Quote: لدرجة أن الفنان جاويش بدا عليه الغضب وقال ليهم إنو جاء عشان يغني أغانيه هو لا أن يقضي السهرة يغني غناء الآخرين !!! .. حاجة تفقع المرارة .. هم قايلين أحمد جاويش ده من نجوم الغد واللاّ شنو؟ !!
بالجد كانوا مملين شديد لما جاويش نفسة ظهر علية الغضب حاجة تحزن
09-13-2010, 00:34 AM
Munir Munir
تاريخ التسجيل: 02-11-2002
مجموع المشاركات: 10496
Quote: ولكن الدكتور لم يأبه ولم ينتبه وكان دمه تقيل عديل !! ..
الدكتور لم يأبه دا ما شغله لأنه ضيف والزاير في أيد المزيور. لم ينتبه لا أظنه غافلاً لكن الأمر يتعلق بأسياد البرنامج. أما حكاية دمه تقيل عديل دي فما صحيحة.. الدكتور دا دمه شربات .. وكلامي من معايشة حقيقية له لعدة سنوات. وعشان تتأكد أقرأ كتاباته مثل كتاب حساس محمد حساس. ومقالات مشهلت في صحيفة الخرطوم في تسعينيات القرن الماضي. لكن قديماً قيل:(لولا إختلاف النظرات لبارت السلع). تحياتي.
كبـــّـاشي الصـــّافي
09-13-2010, 01:18 AM
Munir Munir
تاريخ التسجيل: 02-11-2002
مجموع المشاركات: 10496
والله يا كانتونا أنا أعرف أن الدكتور هو حساس محمدحساس وعشان كده كنت عشمان فيهو وفي نباهته إنه يستعدل الموقف البايخ، ولكنه خيّب ظني وحسيت بأنه دمه تقيل لأن دي حاجة بسيطة كان ممكن يستعدلها بحكم إنه زول حصيف ومقدم برنامج تلفزيوني سابق .. وحكاية إنو المسئولية مسئولية مقدمي السهرة دي ما بتحله، لأن السهرة في الآخر بريقها بقي باهت ويخصم من حضورهم هم ذاتهم .. وأنا شخصياً تضجرت منهم لأنهم عاملين فيها بيتكلموا في الثقافيات وخاتين الفنان للغناء بس كأنما الحوار ما شغلته ..
وبعدين ياخوي ممكن الزول برضو يكون دمه خفيف جداً، ولكن ليس في كل الأوقات - الليلة ممكن يكون دمك شربات وبكرة قرادة ..
. .
وخلي روحك رياضية .. هه
09-13-2010, 01:25 AM
cantona_1 cantona_1
تاريخ التسجيل: 01-04-2003
مجموع المشاركات: 6837
يا منير مش العرب بتقول: (ما دام سيد الحق راضي شِن دخّل القاضي؟). سيد الحق هو صاحب التلفاز ودكتور ود الريح هو القاضي. فأسياد الحق طالعين في الكفر وبقسموا في الأدوار .. وود الريح قاضي بدون مادة تحكُّم في البرنامج وعليه اللوم يقع على عاتق البنت والولد المعاها. لكن إنت مش ملاحظ أنّ هذا هو ديدن كل مقدمي البرامج في تلفزيونات السودان؟ هذه ملاحظتي والله أعلم. تحياتي.
كبـــّـاشي الصـــّافي
09-13-2010, 01:37 AM
Munir Munir
تاريخ التسجيل: 02-11-2002
مجموع المشاركات: 10496
Quote: يا منير مش العرب بتقول: (ما دام سيد الحق راضي شِن دخّل القاضي؟). سيد الحق هو صاحب التلفاز ودكتور ود الريح هو القاضي. فأسياد الحق طالعين في الكفر وبقسموا في الأدوار
يا كانتونا سيد الحق ديل نحن .. وودالريح كان عشان نحن ما نتضجر منه هو ذاته يحاول بذكائه المعهود يدردق أطراف الكلام للفنان لتكتمل الحلقة .. لو مثلاً إنت جيتني زائر ومعاك صديقك أنا ما بعرفه - ولو أنا كنت زول حنطور ساي وما عندي ذوق وما بحس وظللت أتكلم معاك إنت فقط وتجاهلت صديقك ، أفلا تتدخل بلباقة وتدردق لصاحبك أطراف الحديث حتي لا يحس بالغربة والضجر ؟؟ ..
وطيب ..
09-13-2010, 01:05 AM
Ahmed Elmardi Ahmed Elmardi
تاريخ التسجيل: 01-14-2004
مجموع المشاركات: 1663
بيحترم شغله ممكن تتخيل جنس المجهود التم في الاعداد للغنا دا
ياخي صدقت .. الزول ده بيدي كل حرف حقه من التنغيم فينعكس علي الكلمة والجملة كلها .. صوت عميق وجهوري .. وألحان دسمة .. ولاحظ أنك تحس بأن الفرقة تأخد مساحتها كاملة وتحسها تبذل إمكاناتها علي الآخر .. يجوا جماعتنا ديل كانوا عاوزينه يغني أغاني الآخرين !!! ..
09-13-2010, 06:26 AM
الخير محمد عوض الخير محمد عوض
تاريخ التسجيل: 10-25-2005
مجموع المشاركات: 3547
الحتة دي شاويش طلع من الدنيا حقتنا دي اي والله طلع وبقى درويش في حظرة تطريبية عالية الجودة. وفعلا هز وجدانه وهو يتمايل ويرقص طربا وحبا في كون جماله الخاص ياااااااااااه يا له من مبدع هذا الشاويش
ما عارف اشكرك كيف يا منير ياخ قد جملت يومي هذا بهذه الطلة الشاوشية البهية
09-13-2010, 06:58 AM
ASHRAF TAHA ASHRAF TAHA
تاريخ التسجيل: 08-04-2007
مجموع المشاركات: 1017
جاويش او ( شاويش ) فنان من طينة الكبار الذين ندر وجودهم في زمننا هذا ... ما استغرب له كيف يظل شخص مثل احمد شاويش بعيدا عن الاضواء بينما (ناس قريعتي راحت) يحتفى بهم صباحا ومساء ..بمناسبة او دونها ..؟!!
09-13-2010, 09:40 AM
نزار عثمان السمندل نزار عثمان السمندل
تاريخ التسجيل: 01-19-2007
مجموع المشاركات: 144
شكراً لشاويش الذي جمــّـل عيدنا بغنائه الذي يرتّب الروح ويعدّل مزاج الفؤاد. وبالنسبة لي فقد عفيت نفسي ـ كلياً ـ من متابعة الحوار . والله لم أسمع ماذا كان يقول المذيعان ولا ضيوفهما. حتى لا أفسد على نفسي متعتها. تركتُ كل الوقت للاستماع لشاويش ومتابعة "مَسْرَحَتِه" للشجن، والتمتع بتطريبه العالي الذي رطّب قلبي ونقلني إلى رحابة لا يحدها حد، ولا يضاهيهاغفران.
09-13-2010, 01:55 PM
مجاهد عمر مجاهد عمر
تاريخ التسجيل: 04-30-2010
مجموع المشاركات: 12
الأخ منير والأخوه فى البوست لكم التحيه وكل عام وأنتم بخير
التلفزيون السودانى لايترك مساحات للفنانين كى يتحدثون ويناقشون أفكارهم . إلا من خلال الغناء فهم دائما يتعاملون مع الفنان كأستراحه موسيقيه أو فاصل ونواصل ؟ لا كموضوع أو رساله أو فكر وحتى هذه الإستراحات التى تعطى لهم تكون فى المناسبات والأعياد فبالتالى ينتظر الفنان الفرصه تأتى فى الأعياد وفى يوم قال لى الاخ طارق جويلى أن الزمن المتاح للفتره الموسيقيه فى اليوم هو 15 دقيقه فقط لكل أشكال الموسيقى فى السودان أما بانسبه للحلقه فالمشكله هى فى إعدادها وهو ظلم كبير لفنان مثل شاويش وللمستمع السودانى رغم أن الفنان شاويش هو زميل لهم فى الحوش الأعلامى وفنان كبير ويحترم فنه
09-13-2010, 02:36 PM
الرشيد ابراهيم احمد الرشيد ابراهيم احمد
تاريخ التسجيل: 02-27-2009
مجموع المشاركات: 845
كل سنه وانت طيب يا منير اجمل بوست خلال هذا الاسبوع لانه يحمل مادة بديعه جميله فريده متفرده علي كل انا كنت اعيش مع شاويش لحظات لا يقل فيها الاحساس بالنصر عن لحظات التي عاشه الزعيم الازهري وهو يرفع علم الاستقلال شكرا مكررا
09-18-2010, 11:42 PM
Munir Munir
تاريخ التسجيل: 02-11-2002
مجموع المشاركات: 10496
Quote: كل سنه وانت طيب يا منير اجمل بوست خلال هذا الاسبوع لانه يحمل مادة بديعه جميله فريده متفرده علي كل انا كنت اعيش مع شاويش لحظات لا يقل فيها الاحساس بالنصر عن لحظات التي عاشه الزعيم الازهري وهو يرفع علم الاستقلال شكرا مكررا
الأخ الرشيد ابراهيم .. شكراً ليك يا ذوق .. كل سنة وأنت طيب .. الواحد كان بيستمع ويشاهد ويقرأ في شريط الشاشة رسائل المشاهدين وكان متأكد إنه الجمهور طربان ..
09-18-2010, 11:37 PM
Munir Munir
تاريخ التسجيل: 02-11-2002
مجموع المشاركات: 10496
Quote: الأخ منير والأخوه فى البوست لكم التحيه وكل عام وأنتم بخير
التلفزيون السودانى لايترك مساحات للفنانين كى يتحدثون ويناقشون أفكارهم . إلا من خلال الغناء فهم دائما يتعاملون مع الفنان كأستراحه موسيقيه أو فاصل ونواصل ؟ لا كموضوع أو رساله أو فكر وحتى هذه الإستراحات التى تعطى لهم تكون فى المناسبات والأعياد فبالتالى ينتظر الفنان الفرصه تأتى فى الأعياد وفى يوم قال لى الاخ طارق جويلى أن الزمن المتاح للفتره الموسيقيه فى اليوم هو 15 دقيقه فقط لكل أشكال الموسيقى فى السودان أما بانسبه للحلقه فالمشكله هى فى إعدادها وهو ظلم كبير لفنان مثل شاويش وللمستمع السودانى رغم أن الفنان شاويش هو زميل لهم فى الحوش الأعلامى وفنان كبير ويحترم فنه
ألف مرحباً أخي الفنان مجاهد عمر .. إن كانوا لن يشركوا الفنان في الحوار فمن الأكرم له إبعاده عن الجلوس وسط المحاورين .. حتي لا يبدو كأنه لا يرقي لمستوي النقاش، وإنما قاعد للتسلية الغنائية !!! .. وذلك أمر يزعج المشاهد جداً ، خاصة لو كان من معجبي الفنان الضيف ..
أحترم جداً الأخ طارق جويلي وأجده مقدم برامج ومحاور لبق وكله ذوق ومفهومية وحاضر البديهة ...
أذكر لك يا مجاهد أنك أول من قدمت أسرار بابكر للتلفزيون في برنامج أصوات وأنامل .. أليس كذلك؟؟
09-14-2010, 04:55 PM
Munir Munir
تاريخ التسجيل: 02-11-2002
مجموع المشاركات: 10496
أنا لي سنين عديدة ما حصل قعدت حضرت لي سهرة كده بمزاج .. ولكين عندما شفت شاويش في المناظر قلت لازم أخش الفلم وساهرت .. وشربت ليكم السهرة كلها .. وأغاني شاويش دي أنا سمعتها بالعود بس .. ولكن الفرقة الموسيقية الكاملة أدتها دسامة كاملة .. الشئ الوحيد العكر مزاجي هو عدم إشتراك الفنان في الحوار ومكوثه صامتاً طول الوقت .. كان يسجلوا الأغانيات ويخلوه يمشي بيته ويقدموها كفواصل بدل الجهل والتجاهل بتاعهم دا..
09-13-2010, 08:06 PM
Munir Munir
تاريخ التسجيل: 02-11-2002
مجموع المشاركات: 10496
شنف المبدع أحمد شاويش أذاننا بما قدمه من طرب أصيل في تلك الأمسية والتي تعد من أجمل ماقدمه تلفزيون السودان في الأونة الأخيرة ,, أذكر انه تمت إستضافة الموسيقار محمد الأمين في تلفزيون النيل الأزرق قبل عدة سنوات وطوال السهرة كان يطلب منه الغناء فقط دون المشاركة في الحوار وفي نهاية الحلقة تم توجيه سؤال له من المذيعة وأذكر انها كانت نسرين سوركتي ,, عندها رفض الموسيقار محمد الأمين الإجابة على السؤال ورد عليها بأنه أتى للغناء فقط واحقاقا للحق نشير بان البرنامج اليومي الذي كان يقدمه المذيع القدير الطيب قسم السيد ( بيني وبينكم ) خلال شهر رمضان كان يهتم كثيرا بطرح الأسئلة للفنانين المشاركين في الحلقة باعتبار أن الفنان صاحب رسالة مهمة في المجنمع ومن حقه المداخلة والمشاركة بما يثري الحوار .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Munir
وليد عبد اللطيف
cantona_1
Ahmed Elmardi
الخير محمد عوض
ASHRAF TAHA
البدري عبد الله
نزار عثمان السمندل
مجاهد عمر
الرشيد ابراهيم احمد
Emad Ahmed
فيس بوك
تويتر
انستقرام
يوتيوب
بنتيريست