شيخنا خليل بي فرح اشعارك خلي غلاظ القوم تتبارك قوم يا الكاشف سن اوتارك وضوي ظلام الليل بي نارك ابداوود معلوم مقدارك ومقدار كل من زارك ودارك
اتقدل بي عودك وطارك في الغافلين بين اسرارك وامسح ظلم القوم عن جارك
يابلدا غنت انهارك وبين نهرين فاحت ازهارك وين سمارك وين زمارك من برهانك لي زنقارك بالحب تقدل تاخد تارك ولي خلاس زمن استحقارك في الوجدان الحي نتشارك نجر النمه بدل نتعارك يابوليس اعزل اشرارك درب الفن للسلم خيارك
في المزيكا بهاك ووقارك وضرب الناس في مسرح عارك يابلدا ان درت نضارك افرد بين الناس مزمارك لاتكون فظا تلقي دمارك ولاتتفرزع ربي اجارك
يارجال فلاح اتلمو وجرو النمه جميعكم همو الطمو عدو الفن في فمو البوليس لاتهدرو دمو خلو شويه يخفف دمو
فوق الطيب صالح سمو ياهو الدابي البمسك سمو المابنو خلاس ينجمو ومن الحين مفروض ينطمو
ياشبرين وياشيخ بسطاوي
يا اللوحاتكم هي البتداوي
الريشه تزيل الام وبلاوي
وتملا الدنيا حكاوي غناوي
شيخنا الصلحي سماحه ال صوره
وخلوتو في امدرمان مشهوره
بي حيرانا مشيد سورا
وبي سعديه ملانا قدورا
كملت البهيان والنوره
والمنشكك يمشي يزورا
شيخنا الدوش اب قلما شافي
شوف شن سوو عيال متعافي
امرق قولك سيل وقوافي
ورجع حضن الوطن الدافي
بت عمسيب ينجدنا دليلك يالمبروكه سميح تمثيلك بي دعواتك طولي ليلك رطبي عصب البلد الهيلك
يابا سرور ياشيخي كرومه تسكتو كيف والناس مظلومه اي حكومه وراها حكومه تعادي الفن ح يسغر كوما وبي ايديها تقرب يوما
الشيخ يحيا ولد فضل الله
وشيخ خطاب خسمتكن الله
حدثو قاسم اريت يتعلا
فسرع ضوو ضلام الحله
وقبال نمرق من المله
ود المك ياعلي تنجدنا تدلي اصابعك في منقدنا
يالحردلو عليك مأخدنا ان ماعنتنا في منشدنا صلاح ياشيخنا وابونا ولدنا يالبي حرفك اتوحدنا البوليس جانا وهددنا وخرمج لينا جمال مشهدنا
مصطفي ود سيد احمد وينك لسع عندنا معلوم دينك شيخ الهجعه الرافع عينك فوق استار الموت بيقينك سلام يازولا سمحه سنينك جس طوريتك والمس طينك وبرنا الله يبر والدينك
سيدي فتاكي الساطع نورك السودان ملموم بي سورك يي دي بلدنا ندورا ندورك حان موعدنا وراجين دورك
يالتاج مكي ويازيدان حلات اسماكم في السودان جرو النمه اعقدو الهمه السودا يحتاج فرسان
شيخنا الموصلي من امريكا
املا بلاد الخير مزيكا
وياحميد قدال راجيكا
في دار ود الريح ديكا
شان يابلدي نعرف الليكا
ونفرز حقنا من الكيكه
ياعثمان وكمال ترباس وسيدنا الكابلي وعمر احساس
افزعو خففو حزن الناس راجين سيفكم يالفراس لمو شتات الناس اجناس لمو الناس اجناس اجناس غنو الحب والوحده اساس الفنان كيفن ينداس قبل الحال مايبقي دواس قبل الحرب تدق اجراس بلد الخير خلوهو معلا قبل يفر ونكوسو كواس
يالباشكاتب بي حنجرتك
الحق بلدا دار تتفرتك
وياشيخ وردي وبي مقدرتك
لي هذا الطاعون اخترتك
سنو غناكم
نحن وراكم
نحو الالفه سلامنا اتهتك
ونحو الوحده كاخر مسلك
(عدل بواسطة طارق الأمين on 08-13-2010, 05:00 PM) (عدل بواسطة طارق الأمين on 08-13-2010, 05:22 PM) (عدل بواسطة طارق الأمين on 08-13-2010, 06:57 PM)
08-13-2010, 04:58 PM
Ahmed musa
Ahmed musa
تاريخ التسجيل: 07-08-2007
مجموع المشاركات: 16669
تسلم يا طارق ياخ و تسلم دماغك بكل الابداع الفيها دا و فعلاً ضروري جداً خلق جبهة ثقافية لحماية الابداع و المبدعين من هجمات المغول الجدد جبهة مبدعين منهم و بهم تحدد متاريس صراعاتها براها و تحاول تخلق البيئة الخلاقة و الماتية لحماية الجمال و الابداع و المبدعين
تسلم مرة تانية يا طارق
08-13-2010, 08:09 PM
بخاري عثمان الامين
بخاري عثمان الامين
تاريخ التسجيل: 10-25-2007
مجموع المشاركات: 3456
Quote: تسلم يا طارق ياخ و تسلم دماغك بكل الابداع الفيها دا و فعلاً ضروري جداً خلق جبهة ثقافية لحماية الابداع و المبدعين من هجمات المغول الجدد جبهة مبدعين منهم و بهم تحدد متاريس صراعاتها براها و تحاول تخلق البيئة الخلاقة و الماتية لحماية الجمال و الابداع و المبدعين
يا دكتور ما عصرته علينا شوية .... خلي المداح طارق الامين يمدح ياخ
08-13-2010, 07:10 PM
محمد أبوالعزائم أبوالريش
محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
الاستاذ طارق الامين ، بداية رمضان كريم عليك و الاسرة وكل احبابك . هذه واحدة ، الثانيه اكيد هذه القصيده مشروع اغنيه ناجح ، عليك الله ما تديها لى زول عشان ما يبهدلها ، اعطها لمن يبدع و يمتع .
08-13-2010, 09:49 PM
سيف اليزل برعي البدوي
سيف اليزل برعي البدوي
تاريخ التسجيل: 04-30-2009
مجموع المشاركات: 18425
المبدع طارق الامين والله انا عاتب عليك في المدحة دي في شان ما جبت فيها سيرة شيوخنا المحدثين ناس طه سليمان وشيخي العارف بالغناء جمال فروفور والشيخة بت القلعة والشيخ احمد الصادق وكل اهل الطريقة الجداد ديل وكل شيخ بي حواره وبرضو بنقول وراك امييييييييييييييييييييييييييييييييييين
08-14-2010, 02:38 PM
عبد اللطيف السيدح
عبد اللطيف السيدح
تاريخ التسجيل: 03-11-2008
مجموع المشاركات: 5454
طارق اللمين ازيك ورمضان كريم عليك .. كامل تضامني مع بيتنا ... وكلامك مليان كلام سمح إلا لاكين ما عصرته علي البوليس شوية ....؟؟؟ دحين دا ما بوليس ناس أبوآمنه حامد , إبراهيم أحمد عبد الكريم , أحمد المرتضي البكري أبو حراز ,عبد الغني خلف اللة الربيع و محي الدين محمد علي و..و.. غيرهم كتير ...؟؟؟
وحات الله مجرد سؤال ..
08-15-2010, 02:58 PM
عبدالفتاح أبوشيمة
عبدالفتاح أبوشيمة
تاريخ التسجيل: 04-15-2008
مجموع المشاركات: 4163
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة