نحن في ضلك وفي رجا ضيك
ورجا ايامك الحلوة
ياما سهرنا ليالي
حاضنين فيك كي بوردنا
شان نوافيك في المواعيد
صبحا بدري يا عشاي دايما بجيك
صف اونلاينك زايد زايد
وبشم فيك هوا كل الشبابيك
ياما اتلاقينا
افكارنا تتصافح في سما سماحك
ياما طقينا حنكنا
وقرقرنا
وفي تراب حوشك
جرجرنا عكازنا رسمنا
وياما انتظرنا طلة الزول السمح من شبابيكك
يجر حرفين جنب نضمنا
ومرسال شوقنا شايلو مسنجرك
جرجر حكاوينا طرف النهار واخر الليل
وفيك لاقينا كنوز بلدنا نتصافح
ونبرم طواقينا ونخلف رجولنا حبا فيك
اي والله نبرم طواقينا حبا فيك
ونكتح فيك النضم الجميل موزون
ونهضم فيك افكار كل الملل
شان نسوي لينا هوية في الزمن الصعب
هوية نقابل بيها مشلضم الايام
وصرة بووز الزمن الكعب
بمناسبة مرور خمسة سنوات على تاسيس سودانيس اون لاين
(عدل بواسطة garjah on 03-13-2007, 05:07 AM)