|
قلبى مع الجروف الخدرن قام كلو
|
اولا جزى الله الاخ احمد يوسف ابو حريرة عنى خير الجزاء لانه كثيرا ما يحرك فى النفس اللواعج الدفينة بذكره للطائف البطانة وتبرها وشراها وبديع فحول شعرائها... ومن ثم استميح اهل البطانة عذرا إن اقتبست هذا المقطع من قول بديع سمعته من الاخ احمد وهو "وقلبى مع الجراسة البنقرن قام كلو" لانه ذكرنى ورجع بى كلية الى جروفنا الخضراء بعد ان ينحسر عنها النيل وتزرع كلها مشكلة منظرا بهيجا بل ورجع بى الى ايام الموسم الشتوى واؤلئك الناس الكادحين الذين يقضون سحابة نهارهم وجزءا من الليل على شريط النيل الخالد يزرعون ويحصدون وكأنى الآن بينهم ممسكا بالطورية والواسوق إبان زراعة البصل المملة القاسية والممتعة فى نفس الوقت بما يعولون عليها من آمال عظام خاصة الصبية الذين لا هم لهم إلا ان يكون الحصاد وفيرا من البصل او البطاطس ويمتلئ الجيب بالفلوس لتبدأ مواسم الاعراس فى تلك القرى الوديعة، مواسم لها طعم خاص بعد ان تسمع الكل يردد "الهوا قلب آجنى" يعنى اصبح يهب من الصعيد حاملا معه انفاس الخريف الندية بعد ان كان زمهريرا يهب من الشمال الشرقى (الشتوى) عندها تبدأ القيدومة وتتجمع الحسان الغيد امام بيت ام العريس الذى يكون فى هذه الاثناء طاير بالريش الدقاق يركب فى لورى وينزل من التانى يقضى فى حاجات العرس من البندر، وتبدأ حفلات العصارى وتسمى عندنا العصرية وهى حلوة بكل ما تحمل الكلمة من معنى عندما تسمع الليلة فلان عندو عصرية يسبقك الشوق وتسارع الخطى اليها ولو كنت فى قاع سحيق، تبدأ وتستمر اياما بل اسابيع حسب مقتضى الحال وينتر صوت الدليب البجيب الوحوحة والتكلبن يا ود المحرب " وهناك دق السوط والركزة بفرق الناس عشان زينوبة ما بتحوق" وقد صاغ هذا المشهد الشاعر الفحل ود بادى العكودابى وجسده ايما تجسيد.... ويستمر الحال اياما الى ان يزف العريس الى عروسه.. ثم ياتى الدرت وهى فترة قصيرة بين الخريف والشتاء ليبدأ الموسم الشتوى وجروفه الخضراء وهكذا تستمر الحياة على هذا المنوال الرتيب. هذا ما حركه قول الحبيب ابو حريرة فى نفس كبلتها غربة قاسية وتحن كثيرا الى تلك المراتع. ودمتم
|
|
|
|
|
|
|
|
Re: قلبى مع الجروف الخدرن قام كلو (Re: على احمد النعيم)
|
العزيز ود النعيم،،،
أرى ان أساريرك بدت تتهلل شيئا فشيئا...وقدأبدعت في الوصف ... وإنت زول كثير الحنين إلى تلك المقامات...
Quote: ومن ثم استميح اهل البطانة عذرا إن اقتبست هذا المقطع من قول بديع سمعته من الاخ احمد وهو "وقلبى مع الجراسة البنقرن قام كلو" لانه ذكرنى ورجع بى كلية الى جروفنا الخضراء بعد ان ينحسر عنها النيل وتزرع كلها مشكلة منظرا بهيجا بل ورجع بى الى ايام الموسم الشتوى واؤلئك الناس الكادحين الذين يقضون سحابة نهارهم وجزءا من الليل على شريط النيل الخالد يزرعون ويحصدون وكأنى الآن بينهم ممسكا بالطورية والواسوق إبان زراعة البصل المملة القاسية والممتعة فى نفس الوقت بما يعولون عليها من آمال عظام خاصة الصبية الذين لا هم لهم إلا ان يكون الحصاد وفيرا من البصل او البطاطس |
ألم أقل لك مفروض تكون (سواق لوري بصل) بدلا عن هذه الأفندية التي لم تقتنع بها في اي يوم ؟؟؟
تعرف يا أبو احمد ولنا قصص كثيرة مع سواق اللوري هذا وقد كان مبجل جدا جدا في الزمان الماضي .. كيف لا وهو الوحيد الذي تفرش له (المدسوسات) من المفارش الحجازية عندما يحل ضيفا على احدهم في تلك المناطق، بينما تجد ان غيره وخصوصا (المساعد) أو (البلف) قد إفترش ساعديه على أقرب برش صلاة او على اي قوز رمل قرب اللوري الذي يعشقه أكثر من صاحبه..
وكان يضرب بهم المثل في العجرفة والتعالي على غيرهم ، وكم سمعت عندما يغضب احدهم من أخيه ويشكوه بأنه قد فعل لي كذا وكذا وعندما حدثته صعر لي خده (التقول سواق) !!!
وانت يا صاحبي مع عشقك للزراعة والبصل والبطاطس كان لابد ان تعشق اللوري حتى تكتمل الصورة..
شكرا على البوست الجميل يا ود النعيم والحديث ذو شجون...
وواصل
| |
|
|
|
|
|
|
Re: قلبى مع الجروف الخدرن قام كلو (Re: Ahmed Yousif Abu Harira)
|
هلا هلا هلا هلا ملاي العتامير حبابك عشرة ود النعيم وكتر خير ود ابي حريرة وود المحرب كشكشوك وجابوك لينا في الفاوية دى ( ابو بكر الفاوية منسوبة الى الفاو والفاو مش المنظمة العالمية البتعرفها انت الفاو دى مدينة الفاو الاتمددت من نهر الرهد وشقت ارض البطانة مرورا بالصادقاب السوكى وحريرة وريرة والصفية ( بكسر الصاد وتشديد وفتح الفاء ) مش صفية زوجتك النوبية . راجع كتاب بت طلحة في وصف البطانة ص 33 .
Quote: "الهوا قلب آجنى" يعنى اصبح يهب من الصعيد حاملا معه انفاس الخريف الندية بعد ان كان زمهريرا يهب من الشمال الشرقى |
هواء الصعيد حق الرشاشية يا ود النعيم نحن بنسميهو الحويسد ( تصغير حاسد) وعندما يهب الحويسد تشم ريحة بخور المطامير ( ود المحرب لم لسانك ) من طرف الحلة ودى يا ودالمرتضى هى اعز ايام طبق البوخة ( حى منها انا تاني اجازتى ما تكون الا ايام نسام الحويسد ده اكان ناس جهنم يخلونى ( يا ودالمحرب )
| |
|
|
|
|
|
|
Re: قلبى مع الجروف الخدرن قام كلو (Re: الطيب شيقوق)
|
الا خ على النعيم والله المحيرنى ات كملت الكتابه دى الى الاخر كيف وانت بتسرد فى هذه القصص واكيد سرحت بخيالك مع هذه المواضيع ناسك ديل بعد مايلمو البصل زى ماقت الواحد سكينو فى ضراعو وتقول كدى العصريه تبدا والكهربا بتاعتن تقعد تشطشط زى واحد اخونا الحكايه تانى مابتخرب من اول زقريته من البنات هيع
| |
|
|
|
|
|
|
Re: قلبى مع الجروف الخدرن قام كلو (Re: على احمد النعيم)
|
شيخ العرب أبوبكر
تعرف ، موضوع ود النعيم اساسا كان عن البصل والبطاطس والزراعة ومواسم الحصاد والأعراس وهلم جرا والونسة شكلها كانت نيلية خالص وكلام فوق الجروف والنيل والحدائق والبساتين والزهور والورد وكلام من النوع ده ..لكن ود شيقوق عايز يختطفها ...وقد كان ...وأهو إنت شايفه كيف بدودر فيها علشان يذهب بها شرقا ويوديها على ريره والصفية وجبل المخشرف والفاو...
وبيني وبينك البوست كان مفخخ من الأول لأن صاحبه (قج الشرك) للجماعة من خلال العنوان وعليه أن يتحمل النتائج...
أما انت يا شيخ العرب و(النوبيين) جميعا فلك القدره على اللعب في كل الخانات ، رغم تواضعك الظاهر...
إنت وودالنعيم كان عايزين تملؤوا راس (ود شيقوق وودالمحرب) أدخلوا ليهم في الزراعة النيلية دي ومصطلحاتها ومواسمها ..الخ.. وح تشوفوا النتيجة..
| |
|
|
|
|
|
|
Re: قلبى مع الجروف الخدرن قام كلو (Re: abubakr)
|
ود النعيم سلام والله عرفت من أين يؤكل كتفنا بهدا العنوان كل شى ولا جراسة أولاد الشلهمة دى مما نسمع نقرتابتكمل المعانا خلاااس أما عن زراعة البصل أنا سمعت عن نوع غير وهو قصة حقيقية واحد اخونا هنا فى الخليج قال لأم الوليدات أنا بمشى السودان السنة دى فى الموسم أزرع بصل وبرجع ليكم... زولنا سافر أتزوج ورجع!!! فسارت مثل أى واحد يسافر ويخلى أولاده هنا بنقول ليهو ماشى تزرع بصل ولا شنو!؟
ولكم التحية
| |
|
|
|
|
|
|
Re: قلبى مع الجروف الخدرن قام كلو (Re: سمية الحسن طلحة)
|
الاخت الفاضلة سمية، تحياتى وانا والله اعاهدك قدر ما القالى طار اقعد احمس واحمس فيهو عشان تتفتح قرائح اولاد بطحان واقنب اعرض واتمتع بتلك التحف. اما صاحبنا المشى عرس اظنو لقالو بيعة سمحة فى بصلو دا وخوزق المسكينة دى بى وراهو وانا عارفو البصل البسويها مى ساهلة. شكرا ثانية على مرورك الكريم.
| |
|
|
|
|
|
|
Re: قلبى مع الجروف الخدرن قام كلو (Re: abubakr)
|
أبوبكر لك التحية بعد طول الغياب .... فقدناك جابتك جراسة ودالشلهمة ؟ حقيقة هي بتجيب الضهبان . الجراسة : جمع مفردها جرس . تربط في رقبة البهيمة فتحدث رنين يعرف به موقعها خاصة في الظلام والدهاريب وسط العتامير . أولاد الشلهمة : هم فطاحيل وأساطين شعراء البطانة ( طه والفنجري )
| |
|
|
|
|
|
|
Re: قلبى مع الجروف الخدرن قام كلو (Re: abubakr)
|
يا ابو بكر انت تبرا من الحمي والنيران وتبرا من المرض البجوك فيه الجيران لا اسكت لك الله حس ولا اوجع لك بدن وربنا يجعل ده اخر حزانك
حمد اله علي السلامه الرجعتا تاني لي اخوانك
ام احمد
| |
|
|
|
|
|
|
|